Isco i sjell pak buzëqeshje Realit në Primera Divizion, me Los Blancos që mundën 2-0 Espanjolin në “Santiago Bernabeu” duke marrë fitoren e dytë radhazi dhe duke u ngjitur disi në klasifikim. Dy gola të 25-vjeçarit i dhanë 3 pikët ekipit të Zidane në një ndeshje që nuk ishte dhe aq e thjeshtë për kampionët e Spanjës. Reali madje pati nevojë për plot 30 minuta për të gjetur golin, me Iscon që u shërbye nga Ronaldo për epërsinë.
Espanyol nuk kishte ardhur në Madrid për shëtitje dhe në pjesën e dytë vuri në vështirësi në disa momente madrilenët, por pa gjetur dot golin e barazimit. Përballë Realit duhet të shfrytëzosh rastet që paraqiten pasi Los Blancos janë të aftë të ndëshkojnë në çdo moment dhe kështu ndodhi pasi në të 71-tën sërish Isco dërgoi topin në rrjetë duke i vënë vulën 3 pikëve për Realin.
Një fitore që ruan diferencën me Barcelonën kryesuese, e cila gjithsesi pas 7 javësh mbetet sërish e konsiderushme, plot 7 pikë.

Italia i mbyll kualifikueset e Grupit G në Botërorin 2018 në emergjencë të plotë dëmtimesh. Megjithatë, trajneri Giampiero Ventura nuk e fsheh atë që është objekti i skuadrës së tij. Të kaltërit synojnë fitore përballë Maqedonisë dhe Shqipërisë, për t’u kualifikuar të paktën në fazën play off. “Do të jetë katastrofë nëse nuk shkojmë në Botërorin 2018 në Rusi. Tavecchio dhe Malagò kanë të drejtë kur thonë se do të ishte e rëndë nëse nuk kualifikohemi. Nuk mendoj për fazën play off. Jemi të përqendruar vetëm te dy ndeshjet e radhës, më pas do të bëjmë vlerësimet tona, në bazë të kudërshtarit që mund të kemi përballë”, u shpreh Ventura.
Dëmtimet e Verrattit, De Rossit dhe Pellegrinit kanë bërë që “të kaltërit” të humbasin mesfushën, ndërsa peshon edhe mungesa e Belottit, pavarësisht se në sulm Ventura beson që ka kualitetin e duhur.
“Dëmtimet e lojtarëve janë situata që ndodhin. Së fundmi Verratti dhe De Rossi ishin titullarë në mesfushë, ndërsa Pellegrini alternativë e parë. Të tre janë futbollistë të rëndësishëm që do të na mungojnë, zgjedhjet në këtë repart i kemi të detyruara, por besoj se ata që do të luajnë do të tregojnë kualitetin. Ndërsa në sulm, megjithë dëmtimin e Belottit, kemi lojtarë që mund të luajnë si Immobile, Eder dhe Gabbiadini. Nuk ka rëndësi moduli i lojës, sepse idetë mbeten të njëjtat, çështja është se kemi vetëm 48 orë në dispozicion për t’u përgatitur ndërmjet ndeshjeve”, tha trajneri i Italisë.
Tashmë është zyrtare: më 9 tetor në “Loro Boriçi”, Italia do të luajë pa dy yjet e skuadrës, Marco Verrattin dhe Andrea Belottin. Pas fantazistit të Paris Saint Germain që vuan një dëmtim muskulor, edhe sulmuesi i Torinos nuk do të jetë për “të kaltërit” në sfidat e fundit kualifikuese të Botërorit 2018. Belotti u largua nga fusha me barrelë, në ndeshjen ku Torino barazoi këtë të diel në shtëpi me Veronën. Sulmuesi u dëmtua në gjurin e djathtë dhe në fytyrën e tij dukej qartë dhembja dhe zhgënjimi. Pas kontrolleve të specializuara mjekësore, u përjashtua rreziku i këputjes së ligamentit, megjithatë 23-vjeçari nuk do të jetë në dispozicion të trajnerit Ventura për duelet me Maqedoninë dhe Shqipërinë.
Belotti u largua nga grumbullimi i përfaqësueses italiane dhe u kthye në klubin e Torinos, ku do të vazhdojë periudhën e rehabilitimit, edhe pse ende nuk ka asnjë të dhënë zyrtare për gradën e dëmtimit dhe kohën që sulmuesi duhet të qëndrojë larg fushave.
Verratti dhe Belotti u zëvendësuan në skuadër nga mesfushori i Cagliarit, Nicolò Barella dhe sulmuesi i Chievos, Roberto Inglese, ndërsa në dyshim te Italia është edhe kapiteni i Romës, Daniele de Rossi. Mesfushori vuan prej një kisti në meniskun e gjurit, problem me të cilin bashkëjeton prej vitesh. Sipas stafit mjekësor të përfaqësueses italiane, De Rossit i nevojitet rreth një javë pushim. Kjo periudhë bën që sipas gjasave edhe 34-vjeçari të largohet nga grumbullimi, ndërsa zëvendësuesi i tij pritet të jetë Roberto Gagliardini i Interit.

Pas Moratës dhe Carvajal, Spanja rrezikon të humbasë edhe Iniestën. Italia në alarm, mungojnë Belotti dhe Verratti, lëndim i lehtë për Candrevan. Spanja dhe Italia humbasin disa nga yjet e tyre përpara ndeshjeve kualifikuese me Shqipërinë. Edhe pse në letër përballja me dy skuadrat kampione të botës mund të duket e pamundur, zhvillimet e fundjavës mund t’i japin shpresë kuqezinjve. Situata është më alarmante te Spanja, kundërshtari me të cilin kombëtarja do të luajë më 6 tetor në Alikante. Sikur të mos mjaftonte situata kaotike e krijuar nga referendumi i Katalonjës, listës së mungesave në skuadrën e Julen Lopetegui i është shtuar Andres Iniesta. “Truri” i Barcelonës u lëndua në përballjen e fituar 3-0 me Las Palmas. 33-vjeçari u aktivizua nga stoli në startin e pjesës së dytë, por në minutat e fundit të ndeshjes u largua nga fusha i dëmtuar. Në orët në vazhdim mesfushori do t’i nënshtrohet vizitave të specializuara për të vlerësuar shkallën e dëmtimit dhe kohën e rikuperimit.
Iniesta është lojtari i radhës i dëmtuar te përfaqësuesja spanjolle, pas sulmuesit Alvaro Morata. Lojtari i Chelsea-t u dëmtua në pjesën e pasme të kofshës në minutën e 34 të takimit me Manchester City-n dhe sipas trajnerit Antonio Conte edhe pse lëndimi nuk është serioz, sulmuesi mund të mungojë për Spanjën. Një tjetër mungesë për iberikët do të jetë edhe ajo e mbrojtësit të Realit të Madridit, Dani Carvajal, i cili vuan nga një virus që i ka shkaktuar edhe probleme me zemrën. Lajmi është konfirmuar zyrtarisht edhe nga klubi madrilen, me Carvajal që pritet të qëndrojë të paktën gjashtë javë jashtë fushave të lojës.
Probleme me dëmtimet ka edhe Italia, kundërshtari i Shqipërisë në sfidën e 9 tetorit në “Loro Boriçi”, që mbyll edhe kualifikueset e Botërorit 2018. Shqetësimi më i madh i të kaltërve lidhet me gjendjen e sulmuesit titullar, Andrea Belotti. Pak minuta përpara fundit të ndeshjes ku Torino barazoi me Veronën, lojtari u largua nga fusha me barrelë prej probleme në gju. Belotti ishte dukshëm i shqetësuar, ndërsa trajneri Ventura dhe e gjithë Italia janë në ankth. Edhe pse pritet diagnoza e saktë e dëmtimit, sipas gjasave sulmuesi do të mungojë në ndeshjet me Maqedoninë dhe Shqipërinë.
Problemi te Italia bëhet edhe më serioz nga problemet muskulore të Marco Verratti-t, i cili nuk i është bashkuar grumbullimit të skuadrës në Koverçano. Në këtë situatë, për të zëvendësuar Belottin dhe Verratin, trajneri Ventura grumbulloi në ekip sulmuesin e Kievos, Roberto Ingleze dhe mesfushorin e Kaljarit, Nikolo Barrela.
Tjetër i dëmtuar për të kaltërit është edhe Antonio Candreva. Lojtari i Interit u largua nga fusha në minutën e 51-të në sfidën ndaj Beneventos për shkak të një lëndimi në dorë. Gjendja e 30-vjeçarit do të vlerësohet në orët në vijim, edhe pse situata e tij duket më pak serioze se ajo e shokëve të skuadrës.

Me përultësi dhe i vetëdijshëm se ndaj Spanjës dhe Italisë nuk është aspak e lehtë, por me guximin dhe mentalitetin e një emri të madh, që nuk pranon të niset i dorëzuar. Christian Panuçi ka besim se Shqipëria do të provojnë shanset e saj përballë dy kampioneve të botës. “Me Spanjën dhe Italinë janë dy ndeshje shumë të rëndësishme për imazhin e Shqipërisë. Janë dy skuadra më të forta se ne, por futbolli na tregon se edhe përballë më të mirëve mund të bësh diçka të rëndësishme. Këto janë ndeshje që i sheh e gjithë bota, duhet të luajmë plot krenari dhe dëshirë, sepse ndeshjet nisin 0-0. Dua 11 luanë në fushë. Ne do të provojmë të marrim rezultat, sepse përveç kënaqësisë kjo do t’i jepte imazh shumë të mirë Shqipërisë. Kemi respekt për këta kundërshtarë, por nuk më pëlqen të dëgjoj që rivalët janë më të fortë ende pa luajtur. Ai që shfaqet i dorëzuar nuk do të aktivizohet. Natyrisht që ndeshja me Italinë më emocionon, ashtu si edhe ajo me Spanjën, ku kam kaluar etapën më të rëndësishme në karrierë. Megjithatë, personalisht më intereson vetëm Shqipëria, jam i fiksuar te suksesi i ekipit kombëtar”, tha Panuçi.
Përballë dy rivalëve ku skuadra ka pak nevojë për motivim, Panuçi premton se do të hedhë në fushë më të mirët, me kurajë për të provuar t’i godasë kundërshtarët sa herë të jepet mundësia. “Ndeshje të tilla mbahen mend gjithmonë dhe uroj që lojtarët e mi të kenë dëshirën të ndryshojnë historinë. Ende nuk e kam vendosur formacionin titullar, por edhe nëse do të më duhet të marr vendime të vështira, do të luajnë ata që kanë më tepër dëshirë. Kemi respekt për Spanjën dhe Italinë, por do të provojmë t’i ndëshkojmë. Kundër Spanjës është e vështirë të luash mirë, sepse e zotërojnë topin 70 për qind të kohës dhe në fushë luajnë gjithmonë ata. Duhet kujdes, sepse ata shfrytëzojnë çdo detaj të vogël. Ne do të provojmë të luajmë futboll dhe të shfaqim kurajo. Preferoj të humbas, por duke qenë kurajozë. Të jemi realistë, Spanja është e fortë, por në futboll mund të ndodhë gjithçka si në Francë-Luksemburg. Ndaj Spanjës nevojitet edhe fati, por duhet të jemi shumë solidë në mbrojtje. Sa herë që do të kemi topin, duhet të shfaqim kurajë dhe të provojmë t’i godasim”, tha ai.
Trajneri kuqezi provoi të ulë edhe euforinë, përsa i takon shanseve të kombëtares, duke vlerësuar mungesat e yjeve te rivalët. “Spanja ka shumë lojtarë të mirë. Lopetegui fle disa orë më tepër se unë, edhe pse disa yje janë të dëmtuar. Carvajal, Iniesta, Morata janë të lënduar, Busquets i pezulluar dhe ka një çështje Pique, por spanjollët kanë një kontingjent që mund t’i mbulojnë edhe 3-4 mungesa. Mbetet një ndeshje shumë e vështirë.
Në anën tjetër nuk dëshiroj të flas rreth çështjeve politike. Ndjej keqardhje për atë që po ndodh në Spanjë, por ne mendojmë të luajmë futboll dhe të provojmë të hedhim në fushë ekipin më të mirë edhe pse kemi mungesat e Mavrajt, Kukelit dhe Roshit. Te Italia mungon Verratti dhe Belotti e De Rossi janë në dyshim, megjithatë për atë ndeshje do të nis të mendoj nga e shtuna e ardhshme”, u shpreh Panuçi.
Arlind RAMA

E cilësoi si ndeshjen më të vështirë të karrierës Gerard Pique atë të luajtur në “Camp Noun” e boshatisur për shkak të tensionit të krijuar në ditën e referendumit për pavarësinë e Katalonjës. Mbrojtësi i Barcelonës, një përkrahës i flaktë i pavarësisë së krahinës katalanase ka pasur jo pak herë fërkime me lojtarët spanjollë kundër kësaj ideje dhe ky fakt i ka krijuar jo pak probleme edhe në kombëtaren e Spanjës. “Mendoj se mund të vazhdoj me Spanjën, por nëse drejtuesit e skuadrës mendojnë se unë jam një problem, do të bëj një hap pas dhe do të largohem nga kombëtarja përpara vitit 2018. Sot ndihem katalanas më shumë se çdo ditë tjetër dhe jam shumë krenar për mënyrën se si po sillen katalanasit.
Votimi është një e drejtë që duhet mbrojtur”, deklaroi Pique pas ndeshjes së kampionatit ndaj Las Palmas, duke lënë të hapur mundësinë e largimit në mes të një momenti delikat. Pique shkon edhe më tej duke kritikuar sjelljen e dhunshme të policisë, duke shtuar se njerëzit nuk janë dakord me atë çfarë po ndodh në Katalonjë sepse ata besojnë te demokracia. Pique është aktivizuar në 91 ndeshje me Spanjën, por referendumi i Katalonjës e ka bërë atë një nga figurat më të urryera në pjesën tjetër të Spanjës. Shpeshherë ai është sulmuar verbalisht në qytete të ndryshme nga mbështetësit e unionit, ndërsa shoku i repartit, Sergio Ramos i ka kërkuar që të tregojë respekt ndaj vendit të tij.

Arbnor Fejzullahi nuk do të jetë në dispozicion të Partizanit minimalisht deri në muajin janar. Mbrojtësi i kuq nuk arrin të zgjidhë problemet me ligamentin e gjurit të djathtë dhe shumë shpejt do t’i nënshtrohet ndërhyrjes kirurgjikale që do të kërkojë një kohë të gjatë rikuperimi që varion nga 3 në 4 muaj. 24-vjeçari i lindur në Preshevë u dëmtua në sfidën e parë të kupës kundër Naftëtarit, duke krijuar probleme për trajnerin Mark Iuliano, i cili duhet të improvizojë për të përshtatur lojtarë në krahun e djathtë të mbrojtjes.
Fejzullahi do t’i nënshtrohet ndërhyrjes gjatë ditëve të ardhshme në një klinikë në Tiranë, por nuk përjashtohet mundësia që operacioni të kryhet edhe jashtë vendit. Pas ndërhyrjes, lojtari do të nisë fazën e rehabilitimit, por ende nuk ka një datë të saktë për rikthimin e tij në fushë që me shumë mundësi do të jetë në fillim të muajit shkurt. Fejzullahi u transferua te Partizani përpara tre vitesh dhe është një prej lojtarëve më të aktivizuar në formacionin e skuadrës kryeqytetase me 91 ndeshje të luajtura në kampionat gjatë 4 sezoneve të fundit.

Jahmir Hyka protagonist absolut në fitoren e San Jose. Sulmuesi i kombëtares shqiptare ka treguar një formë shumë të mirë teksa ndihmoi skuadrën e tij të merrte tre pikë shumë të rëndësishme në përballjen kundër Portland Timbers. Hyka ishte një ndër më të mirët për skuadrën e San Jose duke krijuar raste të rrezikshme. Ishte pikërisht 29-vjeçari ai që dhuroi asistin e golit të avantazhit për skuadrën e tij. Ndërsa në minutën e 21 pati një rast shumë të mirë për të shënuar, por gardiani i Portland, Atinnella u tregua pozicional dhe pas tij ishte shtylla që nuk e lejoi Hykën ta ndalte topin në fundin e rrjetës.
Sidoqoftë tre pikë të arta për skuadrën e San Jose që mban gjallë shpresat për të siguruar një vend në zonën e play off. Futbollisti i kombëtares kuqezi që prej momentit kur ka firmosur për këtë skuadrër ka qenë një prej lojtarëve më të rëndësishëm, ku jo në pak raste është shfaqur vendimtar me golat dhe lojën e tij. Ndërkohë që forma e shkëlqyer e Jahmir Hykës është edhe një lajm shumë i mirë për teknikun e kombëtares, Christian Panucci në prag të dy takimeve të fundit për eliminatoret e botërorit Rusi 2018, ndaj Spanjës dhe Italisë.

Fillimi i tij në Primera Divizion me Deportivo Alavesh nuk mund të kishte qenë më i suksesshëm, me De Biasin që fitoi me skuadrën e tij të re 0-2 ndaj Levantes. Një sukses që ka lënë të kënaqur ish-trajnerin e kombëtares kuqezi, që në një lidhje telefonike me emisionin “Zona Gol” foli për rikthimin e tij në Spanjë, por dhe ndeshjet e kuqezinjve me Spanjën dhe Italinë. “Besoj se kam ardhur në një prej kampionateve më të rëndësishëm në Europë dhe ishte zgjedhje futbollistike, pasi për para mund të kisha bërë një tjetër zgjedhje. Jam në një klub serioz dhe pse jo shumë i madh. Jam shumë i kënaqur që fituam në ndeshjen e shtatë, e para e imja, pasi ekipi vinte pas 6 humbjesh dhe ishte rezultat i rëndësishëm sepse na jep besim mua dhe djemve për të ardhmen. Si fillim punova pak në aspektin taktik dhe atë mbrojtës dhe fola me ekipin për besimin që duhet të kemi për njëri-tjetrin”, u shpreh De Biasi.
Dhe pse jo më në stol, Shqipëria mbetet gjithmonë nën vëmendjen e De Biasit që komentoi dhe dy sfidat e radhës së kuqezinjve me Spanjën dhe Italinë. “Më mungon Shqipëria, më shumë tani që nuk jam sesa kur isha. Kur ke kaluar një periudhë të mirë në një vend ke gjithmonë nostalgji. Një ditë më parë mora një mesazh nga presidenti Duka dhe i thashë po fituat me Spanjën do ju bëjnë monument në Itali. Uroj që të fitoni aty dhe pse në ndeshjen e fundit do të bëj tifo për Shqipërinë”, tha ai.
Pavarësisht se punon në La Liga, De Biasi vazhdon të ndjekë me vëmendje Serinë A italiane dhe futbollistët shqiptarë që luajnë aty. “Jam i kënaqur për Etrit Berishën dhe faktin që ka pritur 11-metërshin e Dybala-së. E përcjell Serinë A vazhdimishit, madje Milan-Roma e ndoqa falë Digitalb, që e kam marrë me vete dhe këtu në Spanjë dhe falë tij mund të studioj dhe kundërshtarët e radhës”, përfundoi De Biasi.