Zbardhja e një raporti për radarët, të dërguar nga oficerët e grupit të punës, gjeneralit të Forcave Detare, Ylber Dogjani, dëshmon qartazi se ministrja e Brendshme, Mimi Kodheli në katër vitet e para të qeverisjes Rama injoroi totalisht shqetësimet e ngritura mbi mosfunksionimin e radarëve e për rrjedhojë krijimin e terrenit të përshtatshëm për trafikantët e drogës. Raporti i është dërguar nga oficerët e punës gjeneralit të Forcave Detare, Ylber Dogjani. “Ja një nga informacionet periodike që i shkonin Komandantit të Forcave Detare, Ylber Dogjanit nga grupet e punës së FD në lidhje me mosfunksionimin e sistemit të radarëve, por sigurisht që Oficeri i Logjistikës në krye të Forcave Detare kishte ardhur me mision të dedikuar nga çifti Kodheli-Kraja, vetëm e vetëm për të mbuluar këtë aferë korruptive, duke mos marrë asnjë masë për radarët (sepse për specialistë në fushën e veprimtarisë detare thonë që sdi as not)”, shkruan Berisha në postimin e tij.
Raporti, radarët në të gjitha pikat jashtë funksionit
Lënda :Raport mbi kontrollin e shërbimeve/riparimeve në SIVHD të kryera nga Shoqëria “Idea- Tel” sh.p.k. Tiranë, për muajin janar 2016.
Drejtuar: Gjeneral Brigade, Ylber DOGJANI
Komandant i Forcës Detare
KETU
I nderuar Zoti Gjeneral,
– Komisioni për zbatimin e Kontratës me Nr. 233/3, datë 11.08.2015 me objekt “Shërbimi i Mirëmbajtjes Tekniko-Operacionale të Sistemit të Integruar të Hapësirës Detare (SIVHD) për një periudhë trevjeçare”, i ngritur me Urdhrin e Komandantit të Forcës Detare Nr.274, datë 24/08/2015 , i ndryshuar.
– Nga data 20 – 22.01.2016 realizoi kontrollin e shërbimeve/riparimeve në SIVHD të kryera nga Shoqëria “Idea – Tel” sh.p.k. Tiranë, gjatë muajit janar 2016.
– Nga kontrolli i ushtruar rezultoi se nga shoqëria “Idea Tel” sh.p.k. Tiranë, nga data 01 – 22.01.2016 nuk ishin kryer kontrolle/shërbime në SITE-et e PRT-11 Ksamil, PRT-VQ Sarandë, PRT-13 Portopalermo, QO Pashaliman dhe PRT-19 Gur Lushnjë.
– Sipas Aneksit Nr.2 të Kontratës, Neni 1 Paragrafi I “Shërbimet e Mirëmbajtjes Parandaluese”, Pika B “Inspektimi mujor dhe eliminim i problematikave të konstatuara”, firma ka për detyrim të inspektojë në çdo vend- instalim “site”, pajisjet sipas moduleve të SIVHD.
– Anëtarët e komisionit të zbatimit të kontratës, pasi verifikuan/kontrolluan gatishmërinë e pajisjeve të SIVHD-së konstatuan edhe këto problematika:
– PRT- VQ Sarandë:
1. UPS i kompjuterit të postoperatorit ka probleme me bateritë,
2. Mikrofoni i radios IP 1616 ndodhet jashtë gatishmërie,
3. Kondicionieri i sallës së postoperatorit nuk kalon në ngrohje, ka nevojë për shërbime,
4. MG i pajisjeve të sallës nuk ndizet auto, por manualisht,
5. Dritat e sinjalizimit të kullës nuk ndizen.
– PRT-11 Ksamil:
1. MG 2 gjatë punës fiket, u kontrollua dhe ka të nevojshme ndërrimin e filtrave dhe vajit,
2. MG1 ndizet në mënyrë manuale, ka probleme me karikuesin e baterisë, duhet ndërruar.
– PRT-13 Portopalermo:
1. MG i dërguar nga Durrësi nuk është montuar dhe të vendoset në gatishmëri pune,
2. MG1 nuk ndizet auto, por manualisht,
3. Më datë 24.12.2015 në MG 1 është ndërruar skeda elektronike PÇ Control me 771 orë/pune dhe është instaluar skeda elektronike me 4561 orë/pune, e cila është marrë nga MG e hequr të PRT-17 Ishull Sazan,
4. Voltmetri tek paneli i ATS nuk punon,
5. Dritat e sinjalizimit të kullës nuk ndizen.
– Salla Operacionale Pashaliman Vlorë:
1. Paisjet e njërit prej postoperatori nuk punojnë,
2. Dy radiot IP 1616 nuk janë në gatishmëri pune,
3. Njëri prej telefonave Cisco ndodhet jashtë gatishmërie,
4. Rrjeti i ndriçimit në sallë ka nevojë për riparim.
– PRT-14 Maja e Thanasit Llogara:
1. Paneli i ATS në shelter ka nevojë për riparime/zëvendësime të disa prej automateve, pasi janë dëmtuar nga shkarkesat elektrike,
2. Ventilatori i shelterit duhet vendosur në gatishmëri.
– PRT-19 Gur Lushnjë:
1. MG1 ndodhet jashtë gatishmërie, duhet vendosur karta e kontrollit dhe dinamo,
2. Dritat e sinjalizimit të kullës nuk ndizen.
– Qendra Operacionale Durrës (QNOD):
1. Radio konsole IP 1616 (tavolina III), është marrë për riparim nga firma dhe nuk është instaluar radio tjetër,
2. Radio konsole IP 1616 (tavolina I), ka probleme në marrje,
3. Vija e kufirit në hartën e paraqitur në softin e ri të radarit PRT-14 dhe PRT-20, nuk është instaluar/konfiguruar.
– Pjesët dhe pajisjet rezervë më të domosdoshme të parashikuara në kontratë sipas paragrafit V (76 shtatëdhjetë e gjashtë artikuj), të cilat janë një kusht për të siguruar një ndërhyrje të shpejtë për riparimin e sistemit brenda kërkesave operacionale, nuk janë në gjendje në një makazinë të rakorduar midis dy palëve. Për këtë problem kemi bërë me dije edhe përfaqësuesit e shoqërisë “Idea Tel”, por nuk kemi marrë ndonjë përgjigje.
– Përsa i përket ndërtimit të sistemit Back-up të Softit të Menaxhimit të Trafikut Detar, Ju bëjmë me dije se:
– Implementimi i sistemit back-up duhej të ishte realizuar nga shoqëria “Idea Tel”, brenda 120 ditëve kalendarike nga hyrja në fuqi e kontratës dhe e instaluar në të gjitha SITE-et e SIVHD-së, sipas paragrafit (Implementimi i Sistemit).
– Aktualisht është instaluar sistemi back-up vetëm në SITE-et: PRT-14 Llogara, PRT-20 Durrës, Qendra e Serverave Plepa Durrës, QO Durrës dhe QBO MM.
– Gjithashtu specialistët e shoqërisë “Idea Tel” sh.p.k. Tiranë kanë instaluar në çdo SITE të SIVHD-së kamera vëzhgimi për ruajtjen e shelterave dhe pajisjeve të SIVHD-së, gjë e cila nuk është parashikuar në kontratën e shërbimit. Kërkojmë nga firma që serveri i këtyre kamerave të instalohet në QVD Plepa Durrës dhe të monitorohet nga QO Durrës. (Që do të thotë që firma kontrollonte aktivitetin e personelit ushtarak nëpër PRT se mos ngatërronin “misionin e marrë përsipër prej tyre”)
– Mbi këto probleme të konstatuara gjatë këtij muaji në SIVHD, i është dërguar e-mail në adresën zyrtare shoqërisë “Idea Tel” sh.p.k. Tiranë, për marrjen e masave dhe eliminimin sa më shpejtë të defekteve të konstatuara, në të kundërt do të procedohet me penalitete sipas Neneve të Kontratës së Shërbimit.
– Për sa më sipër, me qëllim ndjekjen dhe monitorimin më të mirë të punës së sistemit propozojmë:
– Të njoftohet Shoqëria “Idea Tel” sh.p.k. Tiranë lidhur me problemet e konstatuara dhe t’i lihet afat riparimi i tyre brenda datës 02.02.2016.
– Në muajt në vazhdim kontrolli i gatishmërisë së sistemit SIVHD të bëhet nga Komisioni në prezencë dhe të specialistëve të Shoqërisë “Idea Tel” sh.p.k. Tiranë.
– Rikontrolli i gatishmërisë së sistemit SIVHD do të kryhet nga data 03.05.02.2016”.

Shqipëria ende me radarët jashtë funksionit

Shqipëria edhe aktualisht rezulton të jetë pa radarë monitorimi. Duhet qartësuar se sistemi që kur është ndërtuar, nuk siguron mbulimin 100% të hapësirës detare. Komandanti i Qendrës së Vëzhgimit Detar ka zhvilluar disa herë seanca sqaruese, si për gatishmërinë dhe performancën e sistemit, ashtu edhe për zonat e pambuluara me sinjal nga Sistemi i Vëzhgimit të Hapësirës Detare, me qëllim rritjen e kontrollit me mjete apo shërbime të tjera alternative. Skandali me radarët përplasi institucionet, por në fakt asnjë prej tyre nuk informoi, nëse do të merren masa për përmirësimin e sistemit, që sipas kryepolicit Çako do të rriste efektivitetin e policisë në luftën kundër drogës.

Kryetari i Partisë Demokratike, Lulzim Basha ka paralajmëruar dje krijimin e një fronti të fortë opozitar bashkë me qytetarët me qëllim ringritjen e vendit dhe largimin e kartelit politik që sot qeveris vendin. Pas mbledhjes së Grupit parlamentar demokrat, Basha tha se, largimi i kartelit politik në qeveri do të nisë me largimin e Ramës, ndërsa bëri të ditur se PD do të konkretizojë betejën e saj kundër krimit të organizuar përmes një plani politik të detajuar në hapat dhe aksionet që do ndërmerren.
“Partia Demokratike po përgatit një plan politik dhe ligjor për të nisur sëbashku me të gjithë shqiptarët e ndershëm, pa dallime politike, një luftë, e cila mund dhe duhet të ketë vetëm një përfundim: Mposhtjen e krimit të organizuar. Dhe për këtë duhet patjetër të mposhten mjeshtërisht dhe ustallarët e tyre politikë. T’i kërkosh Edi Ramës të luftojë krimin e organizuar, do të thotë t’i kërkosh të luftojë vetveten. Mendoj se kjo është e tepërt. Ndaj detyra jonë është të bëhemi së bashku në një front të gjerë opozitar dhe në një aleancë të vlerave me të gjithë qytetarët shqiptarë, e ardhmja e të cilëve, e ardhmja e fëmijëve të të cilëve cenohet rëndë nga krimi i organizuar me pushtet. Dhe t’i japim vendit zgjidhjen e vetme të kësaj gjendje, që është largimi i kartelit politiko-kriminal me në krye kryeministrin e votave të blera, të mazhorancës fiktive dhe të Parlamentit ilegjitim”, u shpreh kreu i PD.
Nga ana tjetër, Basha iu referua raportit të OSBE si dëshmia më e qartë e asaj që ndodhi me zgjedhjet e 25 qershorit dhe faktit se sot shqiptarët po i qeveris një shumicë e zgjedhur me vota të blera e të deformuara. Blerja e votave, tjetërsimi i vullnetit të qytetarëve, influenca e bandave kriminale dhe ndikimi i këtyre fenomeneve në rezultatet e zgjedhjeve, e pranuar tashmë nga OSBE për kreun e PD, Basha janë fakte që kanë si përgjegjës Edi Ramën.
“Në qendër të vëmendjes ka qenë raporti i OSBE/ODIHR-it për zgjedhjet, çështja e ngritjes së Komisionit të Reformës Zgjedhore dhe konfirmimi i të vërtetës së njohur botërisht nga shqiptarët, se sot Shqipëria nuk qeveriset, por sundohet nga bandat dhe nga klanet mafioze. Raporti i OSBE/ODIHR-it e thotë qartë. Fakti i parë është se vota në 25 qershor u ble, u dhunua, u tjetërsua. Fakti i dytë është se vota u ble, u dhunua dhe u tjetërsua nga Edi Rama dhe nga Partia Socialiste. Fakti i tretë është se blerja, dhunimi dhe tjetërsimi i votës nga Edi Rama dhe nga Partia Socialiste u bë përmes parave të pista të krimit të organizuar dhe ndihmës së bandave kriminale dhe klaneve kriminale të krimit të organizuar anembanë Shqipërisë”, tha Basha.
Basha paralajmëroi se PD është duke ndërmarrë këtë plan masash për të shpëtuar vendin, i cili sot për shkak të krizës së rënduar sidomos, ekonomike dhe sociale është në prag të greminës.
“Qytetarët e kanë fare të qartë se, kur një qeveri del nga shitblerja e votës, kur një qeveri vjen në pushtet me votat e blera, edhe vetë qeveria është e blerë. Se kur përdoren kriminelët për të blerë, për të shantazhuar, për të dhunuar, për të mbledhur votat e qytetarëve, qeveria do t’i përkasë kriminelëve dhe jo qytetarëve. Vendi është në prag të një gremine, është një katastrofë totale përsa i përket shtetit ligjor dhe demokracisë dhe është në prag të një gremine të paimagjinueshme në këto 27 vite. Kjo është një këmbanë alarmi për çdo shqiptar të ndershëm”, u shpreh kreu i PD.

Ambasadori i SHBA, Donald Lu ka hedhur sërish deklarata të forta ndaj drejtësisë dhe policisë shqiptare. Në fjalën e tij në 20 vjetorin e Shkollës së Magjistraturës, Ambasadori Lu deklaroi sot se Lul Berisha u lirua qëllimisht nga burgu, ndërsa Emiljano Shullazi vijon të bëjë trafik droge nga burgu.

Po kështu ambasadori amerikan është shprehur hapur kundër lirimit të ish-kreu i Bandës së Durrësit, Lul Berisha. Nuk kanë munguar as emra të tjerë të njohur të botës së krimit si Emiljano Shullazi dhe Klement Balili në deklaratën e ambasadorit Lu. Ai tha se, Shullazi vijon të bëjë trafik droge nga qelia, ndërsa Balili prej 18 muaj i shpëton drejtësisë.

Ai tha se gjyqtaren Fildes Hafizi e kla në baltë sistemi i drejtësisë. “Sistemi i drejtësisë e la në baltë Fildez Hafizin. Lul Berisha u lirua gabimisht më herët nga burgu. Megjithëse u procedua drejtori dhe juristi burgut, Berisha është i lirë. Shullazi thuhet se, vijon të bëjë trafik droge nga qelia. Balili ia ka dalë prej 18 muajsh t’i shpëtojë drejtësisë. Shkak, paaftësia e policisë, prokurorisë dhe Ministrisë së Drejtësisë”, tha ambasadori Lu.

“Lufta kundër krimit të organizuar bëhet për peshqit e mëdhenj. Ka shumë Shullazë, Klemend Balili dhe Lul Berisha në Shqipëri që meritojnë burg. Vetingu nis javën që vjen dhe do të jetë një proces me profesionalizëm. Në 2016 u arrestuan 1940 persona, por më pak se 100 u dënuan. 20 familje kriminale dominojnë krimin në Shqipëri. Mes tyre veprojnë 4 klane kryesore”, është shprehur Lu, duke lënë të kuptohet se ambasada amerikane ka informacione të hollësishme për atë që ndodh në vendin tonë.

Qeveria shpenzon çdo vit miliona euro për kompensime e dëmeve të shkaktuara nga përmbytjet. Për t’i dhënë fund këtij fenomeni Autoriteti i Mbikqyrjes Financiare në bashkëpunim me Bankën Botërore kanë hartuar një projekligj për sigurimin e detyrueshëm të banesave për Tërmetet dhe Përmbytjet.

Është siguruar nga “klan plus” një kopje e këtij drafti konfidencial, i cili parashikon që sigurimi i detyrueshëm i banesave do të bëjë të mundur mbulimin e kostos në raste përmbytjesh dhe tërmetesh.

Bëhet fjalë për banesat e hipotekuara ose banesat që kanë një certifikatë pronësie. Draft ligji thotë qartë se kompensimi i dëmit mund të refuzohet nga kompanitë e sigurimeve për objekte që nuk kanë respektuar kushtet teknike të ndërtimit ose janë modifikuar ose dobësuar nga ndërhyrjet në strukturë.

Po ashtu, Kompanitë e Sigurimeve mund të refuzojnë zhdëmtimin edhe për ato që nuk është ofruar informacion i saktë.

Qytetarët, sipas ligjit, do të paguajnë një tarifë të përvitshme dhe kjo do të vendoset në bazë të zonës së banimit dhe riskut që mbart.

I gjithë ky proces nga lidhja e kontratës me qytetarët e deri tek mbulimi i humbjeve financiare, mendohet paraprakisht të menaxhohet nga Qendra Shqiptare e Sigurimit nga Katastrofat që do krijohet Tiranë.

Një entitet juridik publik jo-fitimprurës, i cili vetë-financohet nga primet e sigurimit, me menaxhimin e pavarur, e krijuar ekskluzivisht për kryerjen e veprimtarisë së sigurimit të detyrueshëm të banesave.

Qendra e sigurimeve nga Katastrofat sipas draftit është menduar të qeveriset nga një bord prej 5 anëtarë jo ekzekutivë.

Anëtarët e Bordit miratohen nga AMF dhe një përfaqësues duhet të jetë nga Ministria e Financave, i cili do të veprojë si kryetar i Bordit Drejtues. Një përfaqësues nga Drejtoria e Emergjencave Civile, një nga Shoqata e Sigurimeve dhe një përfaqësues nga Banka e Shqipëri.

Kjo qendër do të krijojë një bazë të dhënash elektronike dhe policat e sigurimit do të shiten online, nga kompanitë e sigurimit të regjistruara në këtë Qendër. Vërtetimi nëse një qytetar e ka kryer apo jo sigurimin e detyrueshëm nga katastrofat do të kontrollohet në procedurat e aktit të pronësisë, abonimet e ujit dhe energjisë elektrike dhe procedurat e kredisë për strehim.

Sipas nenit 30, Sigurimi i Detyrueshëm do të jetë edhe kusht për hipotekimin e pronës. Drafti nuk parashikon shifra. Por aktualisht sigurimi i një vile me vlerë 100 mijë euro kushton 90 ose 100 euro, ndërsa për të siguruar një apartament me të njëjtën vlerë kushton 50 – 60 euro në vit.