Dua ta nis këtë fjalë me një histori të ditës:
Dhëndri i një kryebashkiaku bashkë me disa banditë ushtron dhunë mbi policinë dhe rrezikon jetën e disa policëve. Prokuroria nis hetimet dhe urdhëron policinë të përgjojë anëtarët e bandës. Policia refuzon të zbatojë urdhërin e Prokurorisë. Pas disa ditësh, policia e mohon fare se është ushtruar dhunë dhe rrezikuar jeta e policëve. Gjithçka mbyllet si incident i rëndomtë pa asnjë rrezik e pa asnjë pasojë, normalitet.
Qyteti i kësaj historie, është Elbasani. Banditi i kësaj historie është dhëndri i kryebashkiakut të Elbasanit. Ndërkohë që kompania e gruas së kryebashkiakut të Elbasanit është duke u hetuar për trafik droge.
Po e përmbledh dhe një herë me pak fjalë. Një bandë kriminelësh ushtron dhunë të hapur ndaj policisë. Policia refuzon t’i hetojë e t’i përgjojë. Pastaj policia mohon fare të ketë ndodhur dhunë.
Pyetja që ngre është: Ku e gjen kurajon një grup banditësh të sulmojë policinë? Çfarë i bën policët që megjithëse u është rrezikuar jeta nuk guxojnë të hetojnë banditin, por ulin kokën dhe heshtin?
Përgjigjen e kësaj pyetje e dini të gjithë.
Dy mijë kilometra larg Elbasanit, në Londër, para disa ditësh Agjencia Kombëtare e Krimit e Mbretërisë së Bashkuar botoi Raportin 2016 të Vlerësimit Strategjik të Rrezikut të Krimit në Britani. Një nga konkluzionet kryesore të raportit është:
Grupet kriminale shqiptare kanë arritur një profil me ndikim të lartë brenda krimit të Mbretërisë së Bashkuar dhe kanë kontroll të konsiderueshëm mbi të gjithë tregun e trafikut të drogës në Mbretërinë e Bashkuar. Rreziku me të cilin përballemi nga grupet shqiptare të krimit është rritur ndjeshëm.
Këto janë dy histori të shkëputura nga dhjetëra e qindra të tilla këto ditë.
Pyetja ime është: Si shpjegohet që brenda katër vjetësh, katër vite jo më shumë, krimi u kthye në problemin kryesor të Shqipërisë dhe një kërcënim serioz për shumë vende të Europës perëndimore, nga Spanja në Holandë, nga Franca në Mbretërinë e Bashkuar, në Itali, Greqi, e kudo tjetër?

Në 4 vite nga vend i sigurtë në vend të krimit

Si shpjegohet që brenda katër viteve, 4 vite jo më shumë Shqipëria u kthye nga vendi i sigurtë, qytetarët e të cilit fituan të drejtën të udhëtonin lirshëm pa viza, e shumë europianë gjenin mundësi dhe siguri për të investuar këtu, në vendin që prodhon rrezik për ta?
Sot ne po diskutojmë marrëveshjen e ekstradimit me Mbretërinë e Bashkuar. Eshtë një kërkesë shumë domethënëse e qeverisë britanike, e cila e konsideron atë një hap të rëndësishëm për të sjellë para drejtësisë kriminelët me shtetësi shqiptare.
Por dua të paralajmëroj sot këtu: kjo marrëveshje do mbetet një copë letër, për aq kohë sa Edi Rama do jetë kryeministër.
Sepse Edi Rama nuk ka asnjë problem me krimin dhe kriminelët. Prandaj i futi në politikë. Edi Rama nuk ka asnjë problem me drogën, ndaj e ktheu Shqipërinë në parajsë të drogës.
Në katër vjet, vetëm në 4 vjet jo më shumë, ekonomia e Shqipërisë u kthye në një ekonomi të drogës. Asnjë investim i ri i huaj, asnjë investim prodhues, asnjë vend i ri pune. Prodhimi kryesor i Shqipërisë u bë droga. Eksporti kryesor i Shqipërisë u bë droga dhe krimi. Funksioni kryesor i sistemit financiar u bë pastrimi dhe riciklimi i parave të pista të drogës.
Kështu, Shqipëria kapi në katër vjet të gjitha rekordet e zeza të krimit: Interpoli e shpalli prodhuesin dhe furnizuesin kryesor të marijuanës në Europë. Interpoli dhe Departamenti Amerikan i Shtetit e përcaktuan si korridor kryesor të heroinës për në Europë. Departamenti i Shtetit e futi zyrtarisht në listën e vendeve kryesore të pastrimit të parave në botë. Po Departamenti i Shtetit e cilësoi Shqipërinë bazë operacionale të krimit të organizuar në të gjithë Ballkanin.
Ndërsa libri më i rëndësishëm i referencave në botë: Libri i Fakteve i Angjensisë Qëndrore të Inteligjencës, CIA-s, e quan Shqipërinë zyrtarisht vend të drogës.
Tani që e gjithë Shqipëria dhe Europa janë alarmuar dhe po reagojnë ndaj përhapjes së krimit, kryeministri, po përpiqet të ndezë ndjesi dhe ndjeshmëri anti-europiane mes shqiptarëve, duke u thënë atyre se europianët janë racistë dhe nuk i duan shqiptarët.
Streha e fundit e maskarallëkut është pseudo-patriotizmi, dhe kjo është streha e re ku është vendosur Edi Rama dhe nga ku sulmon këdo që e akuzon për favoret që ai i bën krimit.

Dy arsye pse krimi po lulëzon

Ka dy arsye pse krimi shqiptar ka lulëzuar në Shqipëri dhe kudo në Europë këto katër vite.
Arsyeja e parë është lejimi i qëllimshëm i kultivimit të drogës në Shqipëri.
Inkurajimi i drogës krijoi një burim të ri, të lehtë dhe të sigurt, të të ardhurave marramendëse për krimin. Lehtësia e kultivimit të drogës dhe trafikimit të drogës nga Shqipëria radar-fikur, bëri që trafiku i drogës të tërheqë gjithnjë e më shumë njerëz, shqiptarë por edhe të huaj, në Shqipëri, në rajon dhe në Europë.
Arsyeja e dytë, është kthimi i Shqipërisë në një strehë të sigurtë për kriminelët shqiptarë të kërkuar në Europë. Shqipëria, u bë vendi ku kriminelët vijnë, ku ndiqen, investigohen apo kur rrezikohen nga policitë e vendeve të tjera.
Kriminelët e dinë se mund të trafikojnë drogë, të kryejnë lloj-lloj krimesh, madje edhe të vrasin në Holandë, Gjermani, Greqi apo në Britani, në Amerikë, por gjithmonë e ke një rrugëdalje: kthehu në Shqipëri dhe të jetosh i qetë.
Po qe nevoja mund të ndërrosh kollaj identitetin dhe të rilindësh. Mund të rilindësh si biznesmen, mund të rilindësh si deputet, mund të rilindësh si kryebashkiak.
Mund të të kërkojë policia e gjithë botës, Europa dhe Interpol bashkë, por në Shqipëri t’i mund të shijosh hapur në publik, mund të shijosh jetë luksi, vila luksi, makina të shtrenjta, restorante luksi dhe të gjitha qejfet e mundshme të kësaj dynjaje. Madje mund t’i ndash këto qejfe dhe ndonjë vizë të bardhë edhe me politikanë, që janë shoqëria dhe klientela më besnike e krimit.
Mjaftojnë këto dy arsye që krimi të lulëzojë, të dalë e të teprojë. Por Edi Rama e përfshiu me vetëdije krimin në politikë dhe në qeverisje.
Në Shqipërinë e Edi Ramës kryetar Kuvendi është dikush që partnerët strategjikë e cilësojnë të zezë mbi të bardhë, si lidhje të bandave dhe trafikut të drogës. Ministër i Brendshëm është dikush tjetër, vëllai i të cilit kërkohet nga Interpoli si trafikant ndërkombëtar droge. Në Shqipërinë e Edi Ramës ministrat inaugurojnë hotelet e trafikantëve ndërkombëtarë të ndërtuara me paratë e drogës.
Në Shqipërinë e Edi Ramës, përdhunuesit janë kryetarë bashkie. Në Shqipërinë e Edi Ramës, ministri i Brendshëm koordinon direkt trafikantët, ndërsa drejtori i Përgjithshëm i Policisë përgjon paligjshmërisht kundërshtarët politikë të kryeministrit dhe diplomatët e huaj dhe sipas informacionit, gjyhnaqarin që mbante kufjet e ke nisur sot me urgjencë për në Amerikë para se t’i vinin prangat.
Në Shqipërinë e Edi Ramës, ata që kërkon Interpoli i mbron policia edhe kur shpallen nga mediat botërore si eskobarë.
Në Shqipërinë e Edi Ramës paratë shkojnë për ekspozita pikturash dhe udhëtime qejfi, por jo për makina policie dhe pajisje për ta. Në Shqipërinë e Edi Ramës paratë shkojnë për propagandë dhe jo për laboratorë të kriminalistikës, të cilat zënë flakë dhe marrin zjarr sa herë hetimet u afrohen politikanëve të bërë njësh me krimin.
Në Shqipërinë e Edi Ramës paratë shkojnë për sharës me pagesë dhe lobistë dhe jo për punonjësit e sistemit të drejtësisë dhe organeve të Vettingut.
Kjo lloj Shqipërie nuk ka asnjë mundësi të integrohet në Europë. Ajo është tashmë e izoluar ekonomikisht dhe politikisht dhe procesi i integrimit europian është tërësisht i bllokuar.

Krimi, katër kërkesat e Bashës për Ramën

Shqipëria nuk do të marrë ftesë për hapjen e negociatave në fund të këtij viti. Dhe nuk do ta marrë as më vonë, nëse nuk zgjidh pengesën kryesore të integrimit: krimin dhe drogën, dhe sidomos lidhjet qeveritare të krimit dhe drogës.
Ndaj le ta miratojmë këtë marrëveshje, por të mos mbyllim sytë për gjendjen ku ndodhet vendi.
Partia Demokratike luftoi 4 vjet rresht, duke denoncuar dhe ngritur zërin për të vetëdijësuar të gjithë, për drogën, krimin dhe rrezikun e tyre. Partia Demokratike ndërmori veprime ekstreme politike për ta bërë drogën dhe krimin çështje parësore të debatit politik dhe publik. Ne do të vazhdojmë të luftojmë pa kompromis kundër drogës dhe krimit, por kërkojmë mbështetjen e të gjithë shqiptarëve të ndershëm në këtë mision.
Sot nga kjo sallë të kërkoj ty Edi Rama që ta nisësh luftën kundër krimit, duke ndërmarrë disa masa të thjeshta, por që kanë domethënie të madhe:
Largo Gramoz Ruçin dhe Fatmir Xhafën nga drejtimi i Kuvendit dhe i Ministrisë së Punëve të Brendshme.
Kërko menjëherë shkarkimin e Qazim Sejdinit.
Bëj publike listën e të gjithë personave në administratë shtetërore që kërkohen nga Interpoli dhe fillo menjëherë aksion për arrestimin e tyre.
Spastro rradhët e drejtuesve të korruptuar të policisë nga bashkëpunëtorët e drejtpërdrejt të trafikut të drogës.
Por këto ti nuk do t’i bësh dhe as nuk ke ndërmend t’i bësh.

Replika e Bashës me Xhafajn

Çfarë kuptuam nga zoti ministër i Brendshëm?! “Problemi është opozita. Opozita po nxin vendin”. Kjo më kujton thënien e famshme popullore: “Kur gishti tregon Hënën, budallai tregon gishtin!”
Problemi nuk është opozita. Problemi nuk është shpallja botërisht e të vërtetës: që sot keni frikë ta thoni ju, grupi juaj parlamentar, këtë e denoncon vetëm opozita me zë të lartë.
Problemi është kjo e vërtetë e dhimbshme, që sot rëndon mbi qytetin e tretë më të madh të Shqipërisë, që ka kyçur banorët dhe banoret e Elbasanit, tash dy vjet nën terrorin e bandave të bëra njësh me politikën lokale të Qazim Sejdinit me mbështetjen e hapur të Edi Ramës dhe të segmenteve të tij në Elbasan.
Elbasani nuk është përjashtimi. E njëjta situatë është në Lezhë, në Shkodër, në Fier, në Lushnjë, Vlorë. Krimi sundon Shqipërinë. Bandat sundojnë Shqipërinë.
Kjo nuk është propagandë. Nuk ka Partia Demokratike dhe opozita fuqinë të manipulojë raportet e EUROPOL-it, INTERPOL dhe agjencive ligj zbatuese të vendeve anëtare të Bashkimit Europian. Por ka vetëm fuqinë të tregojë të vërtetën këtu, para këtij Parlamenti.
Fjalimi që lexove këtu ishte fjalimi i vjetër i Saimir Tahirit: analiza, ndjekja me vëmendje, ndjeshmëria. Jo! Vetëm përballja. Por këtë ti nuk e bën dot. Dhe për këtë nuk ke ti faj! Fajin e ka ai që të ka vënë aty. Ti je në konflikt interesi! Dhe natyrisht, ai që të vuri.

Magazina në Elbasan, kështjellë e krimit të Ramës

Ju të gjithë e keni parë videon, dhe me siguri, ata që s’kanë lidhje me krimin dhe me qeverinë e kapur nga krimi, shumica e shqiptarëve të ndershëm, janë ndjerë keq kur kanë parë se si policia u dhunua, u spraps, u poshtërua, u shpartallua në mes të qytetit nga një bandë.
Dhe të gjithë pyesin, pse nuk hyri policia brenda magazinës ku u strehuan banditët, pse nuk e kaloi portën?
Eshtë shumë e thjeshtë. Policia nuk e kaloi atë rrethim, jo se nuk i ka mjetet, jo se nuk ka oficerë të përgatitur e kurajozë.
Por sepse ajo magazinë, është kështjella e Edi Ramës. Eshtë kështjella e krimit, e bandës. Ka imunitet, gëzon mbështetje dhe mbrojtje qeveritare.
Dhe këtë nuk e bën dot policia, nuk e çan dot atë rrethim. Ndaj, mos t’ia kërkojmë këtë oficerëve, burrave e grave në uniformë.
Duhet t’ia kërkojmë Edi Ramës të dalë nga magazina e krimit. E nëse nuk del, duhet ta nxjerrim nga aty bashkë me qytetarët.

Duke denoncuar lidhjet e forta të Ramës me krimin Berisha tha se, në telefonin e Ramës ndodhen me qindra mesazhe telefonike nga krerët e bandave kriminale dhe trafikantë. “Edi Rama je koka e krimit. Në celularin tënd ke me qindra mesazhe nga vrasës, serialë killer, trafikantë droge. Në kabinetin tënd ke ministra që mbajnë në eskortë serial killerë të dalë nga burgu, sepse e dinë që për ty kriminelët janë njerëz të mirë, janë ata që na japin vota. Edi Rama ti je koka e krimit, sepse ti ja rrëmbeve Shullazin atij tjetrit (Tahirit) dhe e bëre pjesë të qenies tënde, e përdore për t’i çuar mesazhe vrasëse kryetarit të opozitës, e përdore dhe për të nxjerrë fituese atë zonjën rektore, deri sa në një rast unik e arrestoi opozita me denoncimin që bëri. Ti je koka e krimit, sepse ti, për të mbrojtur lidhjet e tua me krimin, emërojnnë krye të Rendit, Xhafën, vëllain e njërit prej kriminelëve më të rrezikshëm të Shqipërisë, i cili del e thotë “ç’më duhet mua se ç’bën im vëlla”. Po ti mor zotëri e di shumë mirë që, më së paku je në konflikt flagrant interesi, ti nuk mundesh të bësh të paditurin. Yt vëlla ka një dënim nga Gjykata italianë të formës së prerë për drogë e për kokainë. Ti je atje vetëm si përfaqësues i klaneve më kriminale të Shqipërisë, për t’i garantuar ata se sa të jemi ne në pushtet, nuk ju prek njeri”.

Droga e sekuestruar nuk shkatërrohet por fshihet në tunelet e ushtrisë

Berisha zbardhi të tjera të dhëna tronditëse mbi mënyrën se si bandat e drogës dhe krerët e trafikut kanë në dispozicionin e tyre gjithë strukturat e policisë dhe ushtrisë për mbarëvajtjen e trafikut.
“Edi Rama je nëna e krimit, je mater matrix e krimit të organizuar. E mbushe Shqipërinë nga Jugu në Veri me kanabis. Deklarove se keni prerë 2 milionë e 400 mijë rrënjë, afërsisht pra 10 mijë ton. Që të gjitha këto ndodhen nëpër tunelet e ushtrisë, në magazinat shtetërore, në bunkerë dhe ndërtesat e militantëve siçilistë të tu. Ku janë, ku janë të shkatërruara? Ka një ligj qeveria, por i mbroni ju, i mbron ti si një pasuri e madhe që more për zgjedhjet.
Me gjithë këto që bërë, Shqipërisë i ke vënë damkat më të zeza që nga koha e Enver Hoxhës. Kjo Shqipëri ka patur shumë halle, ka patur tronditje të mëdha, po kurrë ndonjëherë kjo Shqipëri nuk është bërë qendër operacionale e krimit të organizuar, kurrë ndonjëherë më parë s’është quajtur Kolumbi e Europës, nuk është bërë kurrë fjalë për narko-shtet. Kurse në doktrinën e krimit, të etërve të tij, krimi që ndihmon për pushtetin është krim i dobishëm, atij duhet t’i heqim kapelen, atë duhet ta mbrojmë, atë duhet t’a mbështesim”.

Rama e mban të fshehtë, borxhi publik në stratosferë 85%

Ndërsa zbardhi të gjitha aferat kriminale me asetet publike të vendit, Berisha theksoi se për shkak të vjedhjeve e zhvatjeve pa kriter, sot Rama e ka rritur borxhin publik me 85%, një nivel alarmant, të cilin Rama po e mban të fshehtë në mënyrë fanatike.
“Edi Rama je koka e krimit, sepse me kriminelë përcakton të gjitha tenderat. A e dini ju se çfarë ndodh me By Pass-in e Fierit? Kompania që iku ishte kompani që kishte mëkate shumë të rënda dhe do të futet me komaninë e plehrave të Lal Plehut për Tiranën. A e dini që pas 4 vitesh By Pass-i i Fierit dhe ai i Vlorës po ritenderohet edhe një herë.
A e dini ju se, By Pass-i i Fierit u kushton taksapaguesve dhjetëra milionë më shumë, sepse janë bërë punime që s’janë paguar nga miku i Edi Ramës. A e dini ju, se kompania e Elbasanit po i merr 40 milionë euro Edi Ramës.
A e dini ju ça është lista 1 miliard? Ajo është krim, krim dhe vetëm krim. Pse nuk ja u thua ti këto shqiptarëve? Pse nuk u thua shqiptarëve se qeveritë, të cilat e kanë borxhin në qiell për të mashtruar borxhin kalojnë në partneritete masive dhe thellojnë borxhin shumë më tepër?
Pse nuk ja u thua që borxhi është 85%. Pse nuk u thua, se në përputhje me kriteret ndërkombëtare, çdo partnership publik-privat është borxh për shqiptarët? Se çdo garanci e një qeveri është borxh për shqiptarët. Krimi përdori sufiçitin. Ai sufiçit shkoi tek krimi. Je koka e krimit dhe Shqipëria asnjë të ardhme nuk ka nëse nuk del nga kthetrat e krimit. Ajo që ndodhi në Elbasan është vetëm ajo që ndodh në një qytet.
Mendoni se kemi situatë tjetër në Shkodër? E njëjtë është. Mendoni se ka situatë tjetër në Berat? A e dini kush janë senior kumbarët e Beratit? Të gjithë kryebanditët e ‘97-ës që janë tepër afër me këtë shokun mbrapa. Koha do t’i nxjerri. Po në Vlorë? Habilajt janë lule. Morën përpjetë një kohë, por tani ligjin e bëjnë Xhafajt me Ramën.
Edi Rama është koka e krimit dhe me këtë ai po gjeneron çdo sekondë, çdo minutë, çdo orë e ditë dëshpërim, pasiguri dhe vrarje shprese tek shqiptarët. Shqiptarët po ikin sot pothuaj si në ‘90-ën. Por jo se janë në atë gjendje, sot të ardhurat për frymë janë dhjetëra herë më të larta se në ‘90-ën. Në ‘90 ikën se dolën nga tirania komuniste, por nuk dolën nga tirania e nderimit, kurse sot po ikin, sepse duan të dalin nga tirania e krimit. Duan që fëmijët e tyre të jenë të sigurt, duan që vetë të jenë të sigurtë, nuk shohin asnjë perspektivë”.

Hapja e seancës plenare ditën e sotme, u shoqërua me debate të forta lidhur me një bllokim që Televizioni Publik Shqiptar i bëri të gjitha televizioneve private në vend.
Me arsyetimin se këto televizione duhet të paguajnë për të marrë sinjal, TVSH-ja nuk lejoi shpërndarjen e pamjeve.
Menjëherë pas kësaj, kreu i Grupit parlamentar të PD-së, Edmond Spaho kërkoi ndërprerjen e seancës dhe rikthimin e sinjalit në çdo televizion.
Kreu i Kuvendit Gramoz Ruçi, tha se mediat ishin në sallë, duke iu referuar transmetimin në TVSH.
“Media është prezente nuk ndërpritet seanca”,tha Ruçi.
Ruçi tha se seanca duhet të vijonte normalisht, duke mos u shqetësuar për terrin informativ që për 60 minuta përfshiu të gjitha televizionet në vend.
PD dhe LSI braktisën për disa minuta sallën e Kuvendit, deri në normalizimin e situatës.
Ish-Kryeministri Sali Berisha foli për një atentat ndaj fjalës së lirë. Berisha tha se kjo është vepër e Ramës, pasi ky i fundit ka frikë nga qytetarët dhe gjykimi i tyre.
“Ndërprerja e sinjalit për mediat të cilat në vite kanë përcjellë ditë e natë punimet e Parlamentit, përbën një atentat prej xhelati, të Ramës së zi. Ky vendim është kryekëput vepër e Edi Ramës, i cili u del shqiptarëve nga mëngjesi në darkë. I bëj thirrje të mblidhet Kryesia e Parlamentit për këtë veprim të pashembullt. Akt prej xhelati për fjalën e lirë. Dhunim i madh për të drejtën e informacionit. Ato vendime që merr opozita i ka grupi parlamentar. Vetëm ai që ka frikë të tmerrshme nga 2.4 milionë vota kundër, që ndjen neveri për përçmimin qytetar, mund të bëjë këtë gjë”, tha Berisha.
Kreu i Grupit parlamentar të LSI-së, Petrit Vasili gjithashtu e quajti të papranueshëm faktin që publiku duhet të informohet vetëm nëpërmjet TVSH-së për zhvillimet në Kuvend.
“Mbyllja e fjalës së Parlamentit, mbyllja e fjalës së lirë. Po shkohet drejt asfiksimit të Parlamentit. Rama kërkon të mbajë nën kontroll mediat, duke shkëputur kontaktin e të zgjedhurve me popullin. Dhe i vetmi informim do jetë nga dritarja e zgjedhur nga Rama. Po kthehemi në vitet 1996-1997”, tha Vasili.
Gazetarja e “News 24”, raportoi se presioni i opozitës dhe disa telefonata të Kryeministrit Edi Rama bënë të mundur zgjidhjen e këtij incidenti.
Me rifillimin e seancës fjalën e mori Kryeministri Rama.
Rama tha se opozita u mbyt me një pikë ujë, dhe se askush nuk kishte për qëllim për të censuruar askënd.
Rama foli për krijimin e një televizioni të ri, ekskluziv për punimet e Kuvendit.
Rama tha se nuk është e nevojshme që në Kuvend të qëndrojnë stafe mediatike aq të zgjeruara, pasi një regji qendrore është e mjaftueshme.
“Sapo u mbyt opozita me një pikë ujë. Është koha që mënyra sesi funksionon shërbimi i Parlamentit për dhënien e hapësirës televizive për punimet e tij, të ndryshojë. Deri më sot jemi në kushtet e një shërbimi komunist në kushtet e demokracisë. TVSH nuk mund të ketë asnjë ekskluzivitet për transmetimet e punimeve. Si çdo vend i botës, Kuvendi duhet të ketë televizionin e vet, ky shërbim jepet nga Kuvendi. Është koha të bëhet dhe kjo në Shqipëri. Nuk ka pse të ketë 25 kamera, mjafton një regji televizive e Kuvendit. Ligji që i imponon TV publik dhënien falas të sinjalit është adaptim në kushtet e demokracisë i një situate komuniste, këtu nis e mbaron gjithçka dhe kërkesa e TV publik për tua shitur apo për t’iu imponuar TV private një faturë, dhënien e sinjalit me logon e TVSH është diçka që i takon të shkuarës, sepse asnjë TV qoftë publik e privat nuk mund të ketë këtë ekskluzivitet”, tha Rama.
Kryeministri ironizoi akuzat për censurim dhe kontroll të informacionit në një dorë, kur tha se kushdo që ka dëshirë të dëgjojë ‘oratorët e opozitës’ do e ketë këtë mundësi sa herë të dëgjojë në televizionin që do krijohet.
Kjo ide për një televizion të dedikuar për Kuvendin, ishte një nga pikat e programit të qeverisë Rama 1, por që nuk u realizua.
Opozita ka folur sot për një përpjekje për të kontrolluar komunikimin e deputetëve me qytetarët, ndërsa Rama e ka mohuar një gjë të tillë.

Kryetari i PD, Lulzim Basha replikoi ashpër me Ramën dje në Parlament, ndërsa e paralajmëroi rrëzimin e shpejtë të Ramës nga pushteti që sot ai mban përmes lidhjeve të tij me krimin dhe drogën.
Basha risolli në vëmendje urgjencën për Reformën Zgjedhore si të vetmen zgjidhje, e cila do t’i japë fund shitblerjes së votës dhe rezultateve zgjedhore nga deformimi i vullnetit të qytetarëve.
“Kjo nuk është lojë, s’do rrimë të bëjmë lojë këtu. Ti ke ardhur këtu me votat e krimit! Kjo është mazhorancë fiktive! Ky është një Parlament ilegjitim!
Ke vetëm një shans: të bësh atë që premtove në 18 majin e famshëm dhe nuk e bëre! Ti rikthesh sendin e vjedhur shqiptarëve përmes zgjedhjeve të lira e të ndershme!
Prandaj urgjenca është Reforma Zgjedhore. Jo për pakte e stërpakte që i hodhe në erë, sepse bëre krejtësisht të kundërtën e asaj. Por për të kthyer një herë e mirë qeverinë e qytetarëve, që të japin llogari para qytetarëve. Se sa kohë ti të kesh krimin që t’i mbush kutitë me vota, me blerje, me shantazhe, me dhunë, nuk do të ketë qeveri të qytetarëve.
Prandaj bëhu gati, se siç t’u rrëzua karrigia sot, shumë shpejt do të rrëzohen këmbët e karriges së pushtetit tënd që janë krimi i organizuar dhe trafiku i drogës”, u shpreh Basha.
Kreu i PD tha se për shkak të papunësisë, pasigurisë, fuqizimit të pushtetit të krimit dhe drogës, sot me mijëra të rinj, të cilat janë e ardhmja e vendit shohin si zgjidhje të vetme largimin nga Shqipëria.
“Prandaj çadra vazhdon e do të vazhdojë, meqenëse të është bërë obsesion. Po harroje se do të mbetet brenda çadrës. Çadër do të të bëhet gjithë Shqipëria ty shumë shpejt. Pavarësisht se po përpiqesh ta zbrazësh me të njëjtin pasion si Neroni për Romën, për vendin tënd.
Ti që e do kaq shumë Shqipërinë, o patriot i madh, ku i ke 10 për qind të qytetarëve të tu sot?! i ke çuar ti azilantë apo i kemi çuar ne, Partia Demokratike? Apo janë në tregun e punës siç thua zotrote?! Në treg të punës janë bullgarët, janë rumunët, janë polakët. Këta janë anëtarë të Bashkimit Europian.
Tanët ikin nga sytë këmbët, shumica prej tyre në kushte të mjerueshme. Por ti s’i sheh ato se ti udhëton në të tjera forma dhe mënyra. Nuk i sheh kur rrasen si sardele nëpër bagazhe për të kaluar në tokën e premtuar, ikin nga sytë-këmbët nga Shqipëria që ke ndërtuar ti, Shqipëria me krimin”, tha Basha.

Griselda, Rama hesht

Basha i kujtoi Ramës në Parlament lobimet skandaloze të tij në institucionet europiane kundër integrimit të Shqipërisë, ndërsa solli si shembull konkret rastin e turpshëm të përdorimit të skenarit të gënjeshtërt të gruas së Elvis Roshit në Parlamentin Europian, si një mënyrë për të bllokuar procesin e anëtarësimit.
“Jo e vërteta e tmerrshme e shqiptarëve, jo ankthi dhe tmerri i qytetarëve të Elbasanit, Shkodrës, Lezhës, Durrësit, Shijakut, të Vlorës, të Fierit: teksa shohin policinë me uniformë të mpaket e të nderojë makinat e krimit, ku jo rrallë herë janë përfaqësuesit më të lartë politikë të mazhorancës tënde fiktive. Jo, jo, as raportet e Europolit dhe Interpolit që u shpallën sot nga ty armiq në këtë sallë, departamente të Partisë Demokratike. Po Departamenti i Shtetit çfarë është sekretariat i Partisë Demokratike?! Jo!
As 260 mijë shqiptarë që në katër vite të qeverisjes tënde kanë braktisur vendin, 125 mijë kanë kërkuar azil me letra, numri i mjekëve të ka rënë me 1/3-ën. Asnjë nga këto nuk qenka problemi!!!
Problemi është se pse themi të vërtetën, pse e themi këtu dhe pse u kërkojmë miqve të na ndihmojnë, të ndihmojnë Shqipërinë, jo mua, jo PD, por Shqipërinë. Janë të njëjtët miq që ndihmuan këtë vend për t’u futur në NATO, kur zotrote çove Griseldën në Bruksel. Kush e çoi? Unë e çova?! Kush e çoi?! Ti e çove, ti e çove. Për turpin tënd, nuk ke kërkuar një herë falje para shqiptarëve!
Inskenove një skenar të denjë vetëm për filmat horror. Sepse ti nuk mpakeshe as para filmave horror për të ndalur Shqipërinë të arrinte atë objektiv kombëtar, vetëm e vetëm që mos cenonte shanset që ti të vije në pushtet.
Kush e bëri këtë unë apo ti?! Partia Demokratike apo Partia Socialiste?! Lulzim Basha, Sali Berisha apo Edi Rama?! Kush e çoi Griseldën në Bruksel?! Na tromakse edhe zonjën e nderuar sllovene, Fajonin, që kishte dy muaj që se kishte marrë vesh gënjeshtrën tënde! Se nuk e përgënjeshtrove një herë të vetme. Një herë të vetme nuk dole të thoje: më falni o shqiptarë, u verbova nga dëshira për pushtet, nuk është se nuk e dua NATO-n, nuk është se jam bir sovjetikësh. Jo, jo u verbova nga dëshira për pushtet dhe hartova e gatova me Elvis Rroshin, apo Ervin Rroshin një skenar të tmerrshëm, vetëm e vetëm për të ndalur një sukses kombëtar, një aspiratë të çdo shqiptari të djathtë e të majtë nga frika, se mos do pakësonte shanset për të ardhur në pushtet”, tha Basha.

Boshtinaru, majmunë qesharakë në PE

Përpjekjet e Ramës për të bllokuar lëvizjen e lirë të shqiptarëve përmes personaliteteve të korruptuara dhe të blerë, Basha i cilësoi dje në Parlament si përpjekje të dështuara, të cilat nuk patën asnjëherë sukses.
“Po pse vetëm kjo? Po boshtunarët e t’u u kthyen në majmunë qesharakë në Parlamentin Europian, rumunët e blerë me zhaget e korrupsionit, që nuk lenin gënjeshtër pa pështyrë kundër Shqipërisë. Por prapë se prapë vizat nuk i bllokove dot. Nuk i bllokove dot, nuk le gjë pa bërë, por nuk i bllokove dot.
Me këta partnerë që sot i deklaron racistë antishqiptarë, me Kristian Demokratët e Angela Merkel, me Kristian Demokratët e Sybrand Bumës, me partitë e djathta që ishin shumicë siç janë edhe sot në parlamentet e Europës, ne hoqëm vizat për shqiptarët. Sepse luftuam krimin! E luftuam me fakte dhe jo me fjalë. Me shifra. Të raportuara e të kontrolluara nga personalitetet e zbatimit të ligjit anembanë Europës. Jo nga mediat e kontrolluara dhe lobistët e paguar.
Erdhën këtu, Presidenti i Bundeskriminalambt (Policia kriminale gjermane) dhe e çertifikoi se Shqipëria ka tani prioritet konfiskimin e pasurive, se në fakt ka shkatërruar totalisht infrastrukturën kriminale; 206 në burg, pothuaj zero trafiku i drogës. I atij Lazarati që përmende ti, që Policia kur u fut kur ti ishte kryeministër, tha që gjetëm 100 ton. Se kishte 3 vjet që nuk dilte drogë”, tha Basha.

Ku janë trafikanët e mëdhenj të Lazaratit

Kanabizimi i Shqipërisë dhe mbrojtja e kokave të trafikut të drogës ishte gjithashtu pjesë e akuzave të ngritura nga kreu i opozitës, Basha dje në Parlament teksa iu drejtua Ramës për lidhjet e tij me krimin e drogën.
“Mirë dakord, ti u fute. Dhe pate mbështetjen time kur u fute në Lazarat. Dy gjëra deklarova: kujdes popullsinë civile, kujdes policët. Më thuaj pak, ku i ke ti bandat e Lazaratit?! Ku i ke trafikantët e mëdhenj të Lazaratit?! Nuk i kape dot se i kishe me vete. Se ndërkohë bëhej plani për ta bërë gjithë Shqipërinë, gjithë Shqipërinë Lazarat! Dhe ti e bëre gjithë Shqipërinë Lazarat. Ironikisht, i vetmi vend ku nuk mbillej drogë ishte Lazarati. Kudo tjetër, edhe në Dibër e çove drogën.
Kush e bëri këtë?! Partia Demokratike?! Opozita?! Imperalistët e huaj?! Ti e bëre Edi Rama! Dhe këtu erdhe me gjysëm zëri ditën e parë në Parlament dhe na njohe ne kredon që paskemi bërë luftën tonë, por ti në radhë të parë duhet t’u kërkosh falje shqiptarëve.
A u premtove në tetor të 2016-ës se në dhjetor të 2016-ës do të hapim negociatat. E ke me zë dhe figurë. A e premtove ti?! Sa herë i ke premtuar negociatat???
Nuk hapen negociatat! S’kam fuqi unë t’i bllokoj negociatat. Jo! Fuqinë për t’i bllokuar negociatat e ka vetëm qeveria dhe ti i ke bllokuar. Sepse ti qeveris me krimin dhe më akuzon mua se bëj politikë me krimin, ti qeveris me krimin.
Për çfarë do që të flas unë?! Për peshkun?! Për zogjtë?! Për farërat?! Kur ti qeveris me krimin, një opozitë e vërtetë, e ndershme ka për detyrë të përballet! Dhe unë këtë po bëj; po përballem, ndërsa ti po fshihesh si struci. Po fshihesh si struci!
Kështu që atdheut i ke vënë ti damkën e zezë. Prej teje shihemi sot si delja e zezë, jo prej meje dhe as prej Partisë Demokratike. Ne hoqëm vizat, ne futëm Shqipërinë në NATO. E gjete gati procesin e marrjes së statusit. T’u dha dhuratë dhe nuk ke bërë asnjë hap tjetër më në atë drejtim! Dhe nuk do bësh! Mbaje mend. Shënoje”, tha Basha.

Si i mbylli gojën Basha-Ballës

Me tone të ashpra, kreu i PD replikoi edhe me deputetin socialist, Taulant Balla dje në Parlament, ndërsa i kujtoi lidhjet e forta me bandat kriminale e me afera korruptive gjithashtu.
“Jo se ma thotë mua i pari apo i dyti i Bashkimit Europian, dhe jo se ata janë të Partisë Popullore Europiane, por se nuk ka dhe nuk mund të ketë Bashkim Europian që të pranojë një vend ku nuk dihet se ku fillon qeveria e ku mbaron krimi. Ku ministri i Brendshëm është në konflik interesi se vëllai i tij është një ndër figurat kryesore të trafikut të kokainës dhe se sot dikton në Vlorë.
Marr me dhjetëra mesazhe. Doni të filloj t’ua publikoj?! Edhe nga policë që tremben nga hija e vëllait tënd, Fatmir Xhafaj. Unë e krijova këtë problem?! Ti ke thënë që nuk mbaj përgjegjësi për vëllain. Ti qofsh! Se je ulur në atë karrige të ministrit të Brendshëm! Po si do ta zgjidhësh këtë problem?! Më thuaj si do ta zgjidhësh këtë problem?! Ti nuk e zgjidh dot sikundër nuk e zgjidh dot ai tjetri aty.
(I drejtohet Taulant Ballës). E di unë se në cilin drejtim flas. E të jesh me fat që nuk të drejtohem ty. Po të të drejtohem ty, kam edhe gjëra të tjera, se ke qenë me mision në Elbasan para dy netësh, dhe dihet se kë ke takuar.
Çështja është fare e thjeshtë. Prano sëmundjen e rëndë, “dhuratën” e vetme që i ke bërë këtij vendi, kancerin e krimit të bërë njësh me politikën.
Dhe padyshim është detyrë e të gjithëve bashkë të nisim kurën e rëndë për ta shëruar vendin. Por kjo kurë e rëndë nuk mund të kalojë nga gjë tjetër përveçse nga themeli i këtij sistemi të kalbur politik të bërë njësh me krimin, me përfaqësues të krimit këtu në këtë sallë, që ti i di fare mirë, dhe me të cilët rri nga mëngjesi deri në darkë.
Dhe me qindra të tjerë të padukshëm për sytë e qytetarëve nga kjo sallë, por me të cilët qytetarët përballen ditë për ditë, drejtorë hipotekash, kadastrash, drejtorë të përgjithshëm, pushtet lokal, njerëz që ndajnë emërimet, bëjnë tenderat, japin prona, marrin pronat, vrasin e presin.
Çfarë t’i kërkosh policisë?! Çfarë t’i kërkosh burrave dhe grave në uniformë?! Për të cilët kam nderimet më të mëdha, për ata të ndershmit që kanë shërbyer me mua dhe kam shërbyer si ministër i tyre i Brendshëm, kur e dimë që kur bën gjënë e duhur edhe Europa bën gjënë e duhur për ne.
Po, gjënë e duhur! Që hoqi vizat, luftuam krimin.
Ti e ke krimin karrige, dhe këmbë të karriges tënde dhe ky është problemi. Ti nuk do të ndahesh nga kjo”, u shpreh kreu i PD.