Kur futbolli të mos më argëtojë më atëherë do të largohem, deklaron kështu trajneri i Juventusit, Massimiliano Alegri, suksesi i të cilit, konfirmon vlerat dhe meritat e 50-vjeçarit. 3 herë radhazi kampion në Serinë A me bardhezinjtë si dhe dy finale radhazi të Champions League flasin qartë se Alegri është ndër teknikët më të mirë në botën e futbollit.
“Deri sa mësimdhënia në fushën e futbollit të më japë kënaqësi do të vazhdoj me këtë profesion. Më pas ndoshta 5 apo 6 vite më vonë mendoj se do të largohem. Më pëlqen tej mase të mësoj të rinjtë dhe kënaqësia më e madhe është atëherë kur shoh rezultatet, përmirësimin e futbollistëve”, u shpreh Alegri.
Trajner praktik por dhe me shumë thelb, Alegri shpjegon me fjalë konceptin e tij të futbollit, që i kërkon skuadrës ta konkretizojë në fushë. “Futbolli është një sport i thjeshtë, nuk ka sens ta komplikosh atë. Si rregull bazë duhet bërë e kundërta e asaj që bën kundërshtari në fushë”, tha trajneri i Juventusit.
Sa i takon të ardhmes së tij, emri i Alegrit si kandidat për stolin e Kombëtares italiane është ndër më të denjët e më të lakuarit. “Është një motiv i fortë për t’u ndjerë krenar, Kombëtarja më intereson dhe intrigon jashtë mase. Edhe Kombëtarja e të rinjve premton shumë”, tha Alegri.
Lidhur me sekretet e tij në përgatitjet e ndeshjeve Alegri shton se nuk është nga ata tranjnerë që mendojnë 24 orë apo më shumë vetëm për një ndeshje. “E them gjithnjë se ka trajnerë të lindur dhe trajnerë të ndërtuar gjatë rrugës. Unë mendoj që bëj pjesë tek kategoria e parë, te ata trajnerë që gjithçka ju vjen natyrshëm. Nuk më nevojitet të qëndroj gjithë ditën, duke parë video, kështu vetëm sa do të stresohesha pa kuptuar se çfarë duhet të bëj. Unë shoh aq sa më nevojitet dhe në një çerek ore e kam gjithçka të qartë se çfarë duhet të bëj. I delegoj shumë detyra edhe stafit teknik, por psikologjia është ajo që e bën lojtarin të performojë mirë në fushë dhe kjo është detyrë e trajnerit. Ai duhet të kuptojë momentet, në të cilat duhet të përkëdhelë apo karikojë një futbollist, ta stimulojë apo edhe ta grushtojë simbolikisht, për ta zgjuar kur nevojitet”. Kështu e mbylll fjalën e tij Massimiliano Alegri si një strateg i madh njëherazi edhe një psikolog.
Alegri: Pas 5 vitesh drejtoj Italinë
Forcimi i populistëve në Gjermani dhe votat për AfD
Partia populiste e djathtë AfD (Alternativa për Gjermaninë) pas zgjedhjeve të së dielës (24.09) hyn në Bundestag si forca e tretë politike, duke fituar si me katapultë katër vjet pas themelimit mbi 12% të votave. Partia fitoi pikë me tema populiste si refugjatët dhe siguria në vend, duke i joshur zgjedhësit. Votuesit e pavendosur, që donte t’i bënte për vete kandidati socialdemokrat për kancelar Martin Schulz, i kthyen kurrizin partisë me traditë, duke preferuar t’ia japin votën AfD-së.
Partitë e mëdha popullore si kristiandemokratët CDU dhe socialdemokratët SPD kanë pësuar erozion rekord elektorati. SPD-ja madje ka humbur shumë vota edhe në bastionet tradicionale të saj siç janë p.sh. qyteti i Esenit në rajonin e Ruhrit. Qё pas zgjedhjeve socialdemokrati Karlheinz Endruscheit sikur nuk e njeh mё qytetin e tij Esen. Dikur kёtu SPD fitonte me 60%. Tё dielёn e votimeve, ajo arriti tё marrё vetёm 28% tё votave. Shumё prej fqinjёve tё tij ia kishin thёnё, se kёsaj radhe do tё votojnё pёr partinё populiste tё djathtё AfD. Ja se si e shpjegon Karlheinz Endruschat këtë dukuri.
Qytetarët tërheqin vëmendjen për problemet e veta
Njerëzit, thotë ai me siguri kanë menduar, se “ne vijmё nga njё familje socialdemokrate, por ne kёtё herё do tё zgjedhim AFD-nё, sepse kemi ndjenjёn, qё duhet tё tёrheqim vёmendjen pёr problemet tona. Por ne socialdemokratët duhet t’i fitojmё pёrsёri kёta zgjedhёs. Mendoj, se nёse tani vetёm presim katёr vjet, nuk do t’i kthejmё pёrsёri tek ne kёta votues”. Politikani socialdemokrat do t’i rifitojё kёta votues – tё paktёn punёtorёt nё qytetin e vjetёr industrial tё Esenit.
Por edhe nё lokalin e tij tё preferuar Endruscheit takon simpatizantё tё AFD. Njëri ndër klientët thekson, se “edhe unё do tё kisha dashur mё mirё tё votoj pёr ta. Por a e dini çfarё? Unё e kam hedhur poshtё fletёn time tё votimit. Ajo u bё e pavlefshme e kaq. Policia? Ajo nuk guxon mё tё shkojё nё stacionin e trenit nё qytetin e vjetёr! Madje as me automjetin e policisё dhe nёn shoqёrim!”
Rritje e kriminalitetit, 11% papunёsi, 40% migrantё dhe njё qytet, qё nё fakt ёshtё i falimentuar dhe nuk ёshtё nё gjendje tё kujdeset pёr problemet e veta. Kёshtu shpjegohet forcimi i tё djathtёve nё bastionin e dikurshёm socialdemokrat Essen.
“Po zien vrullshëm”
E ёshtё pikёrisht ky rajon, rajoni i Ruhrit, qё shquhet pёr modelin e suksesshёm tё integrimit tё qindra mijёra punёtorёve tё dikurshёm migrantё, tё ashtuquajturit Gastarbeiter tё viteve ‘60-tё. Nё njё event kundёr racizmit nё qendёr tё qytetit gjermanёt dhe migrantёt ngrenё flamurin kundёr AfD-sё sё djathtё. Por shumё migrantё qё pas zgjedhjeve kanё nisur tё shqetёsohen. Një banore me origjinë turke në Essen thotë: “Nga ana e AfD-sё do tё pёrpiqen qё t’i pengojnё tё tilla aktivitete. E si rrjedhojё mund tё ketё tensione. Kёto tensione do tё kenё pasoja ndaj bashkёjetesёs ndёr qytetarёt”.
Ndërsa Harald Parussel ёshtё funksionar i AfD-sё nё Esen. Dikur ai ka qenё mёsues dhe anёtar i Partisё Socialdemokrate. Atje ai ndihej gjithnjё e mё pak i kuptuar. Aty nuk i lejohej tё shprehte dyshime ndaj politikёs sё refugjatёve. Ai thotё, se nuk ёshtё racist, madje ai prej vitesh u jep mёsim fёmijёve me prejardhje tё huaj. Ai ka mirёkuptim ndaj kёrkesёs sё disa shokёve tё partisё sё tij AfD, qё duhet t’i jepet fund komoleksit me tё kaluarёn nacionalsocialiste. “Ndonjёherё edhe unё kam ndjenjёn, se po kultivohet njё lloj krenarie e fajit. Sa herё qё gjermanёt shfaqin njё filiz tё njomё patriotizmi, u kujtojnё kryqin e thyer e u bien kokёs”.
Por nё lajme jepet njё ditё pas zgjedhjeve njoftimi, se nё radhёt e grupit parlamentar tё AfD kanё nisur pёrçarjet. Parussel ёshtё i shtangur. Ai vetë papritur nuk ёshtё mё i sigurtё, nёse partia e tij do tё ekzistojё edhe pas katёr vjetёsh. “Po zien vrullshёm! Shumё vrullshёm”.
Grindjet nё AfD nuk i interesojnё socialdemokratit Endruscheit. Ai do t’i fitojё sёrish njerёzit nё zonёn e tij nё veri tё Esenit pёr demokracinё. Si p.sh. duke bёrё diçka kundёr plehrave nё rrugё. Qytetari duhet tё rifitojё ndjenjёn, se politikanёt kujdesen pёr tё. Mё shumё se tё shpresoj pёr kohё mё tё mira nuk i mbetet socialdemokratit Karlheinz Endruscheit. E qartё ёshtё vetёm, se qё pas zgjedhjeve nё Essen shumё gjёra kanё ndryshuar e nuk janё mё si mё parё.
Rusia, si po i shfrytëzon pikat e dobëta të Perëndimit
Vendet perëndimore thonë se, Rusia nuk i fsheh përpjekjet për të ndërhyrë apo ndikuar tek çështjet e tyre dhe madje edhe tek zgjedhjet e tyre. Megjithatë, ato e pranojnë se tentativat për të frenuar këto veprime po hasin vështirësi.
Përkrahësit e lëvizjes anti-islamike PEGIDA u mblodhën së fundmi në tubime në rrugët e Dresdenit…pasi partia Alternativa për Gjermaninë (AfD) fitoi 12.6 për qind të votës në zgjedhje…një rritje që disa e kanë lidhur me një raund tjetër ndërhyrjeje ruse, një praktikë që tashmë është bërë e njohur.
“Ata ndërhyjnë tek forcat e majta, tek të djathtat dhe partitë ekstremiste fetare”, thotë Nils Svartz, një zyrtar suedez.
Në rastin e Gjermanisë, zyrtarët thonë se Rusia shfrytëzoi pasiguritë lidhur me fluksin e qindra-mijëra refugjatëve.
Zyrtarë suedezë si Nils Svartz thonë se po shohin shenja taktikash të ngjashme para zgjedhjeve të planifikiara për vitin e ardhshëm:
“Objektivi për këto veprime nuk është për të imponuar ndonjë ideologji të veçantë ndaj suedezëve. Është më shumë për të na përçarë, për të na bërë një shoqëri të pasigurt”.
Dhe pas përpjekjes ruse për të ndikuar në zgjedhjet presidenciale amerikane vitin e kaluar, ligjvënësit amerikanë druhen se përpjekjet ruse vetëm janë intensifikuar:
“Propaganda e tyre ka si synim dizinformimin, të bindë evropianët se nuk mund t’i besojnë askujt”, thotë senatori republikan Ron Johnson.
Vendet perëndimore thonë se kjo fushatë është realizuar kryesisht përmes mediave sociale, si Facebook, Twitter dhe Google.
Dhe nga televizione si kanali RT i Moskës, gjë që Rusia dhe RT vetë e mohojnë.
“Ne i nxisim shikuesit të ndezin televizorin, të shohin dhe të vendosin vetë”, thotë korrespondentja e RT-së, Laura Smith.
Por televizione si RT mund të jenë vetëm fillimi.
Një nga shqetësimet në rritje për zyrtarët amerikane dhe evropianë është se Rusia nuk po mjaftohet më vetëm me përhapjen e propagandës dhe dizinformimit. Dhe nga ana tjetër, Moska po përpiqet të gjejë metoda të tjera për të depërtuar në shoqërinë perëndimore:
“Njëra është aftësia e forcave të jashtme të fusin para në zgjedhje pa treguar se nga vijnë këto para. Paratë e papastra të politikës dhe korporatat fantazma janë një ftesë e hapur për rusët që të vazhdojnë ndërhyrjen në zgjedhje”.
Deri tani duket se këto taktika kanë funksionuar.
“Ata po ndikonin tek debatet publike, politike dhe programet e partive politike ose qëndrimet e drejtuesve të tyre”.
Siç u shpreh një studiues rus, vetëm gjysmë me shaka, tani çdo zgjedhje janë zgjedhje ruse, pa dyshim një perspektivë e zymtë.
SHBA do të pranojë 2 mijë emigrantë nga Europa
Qeveria amerikane do të lejojë vitin e ardhshëm vetëm 45,000 refugjatë që të hyjnë në SHBA. Kjo është shifra më e ulët që nga hyrja në fuqi e një ligji mbi pranimin e refugjatëve 37 vjet më parë.
Uashingtoni zyrtar i paraqiti një propozim kongresit, sipas së cilit parashikohet që në vitin e ardhshëm fiskal në SHBA të lejohet të pranohet vetëm një maksimum refugjatësh, respektivisht 19.000 nga Afrika, 5.000 nga Azia Lindore, 2.000 nga Evropa dhe Azia Qendrore, 1.500 nga Amerika Latine dhe Karaibet dhe 17.500 nga Lindja e Mesme dhe Azia Jugore. Viti fiskal 2018 nis nga tetori 2017 deri në shtator 2018. “Siguria e popullsisë sonë amerikane është shqetësimi ynë i parë”, tha një zyrtar i qeverisë amerikane. Ne duhet të sigurohemi që tek ne të vijnë vetëm ata njerëz që nuk përbëjnë rrezik për sigurinë e vendit tonë”.
Në SHBA është e zakonshme që qeveria vendos një kufi maksimal vjetor për pranimin e refugjatëve. Kufiri më i ulët i dekadave të fundit u vendos nga Presidenti Ronald Reagan në vitin 1986 dhe ishte 67,000 vetë. Gjatë kohës së ish-Presidentit Barak Obama, në vitin 2016 kufiri ishte 110.000 refugjatë.
Politikë rigoroze migrimi
Gjatë këtij viti, Shtetet e Bashkuara kanë pranuar deri tani rreth 54.000 refugjatë. Në vitin 2016, shifra ishte 85,000. Për krahasim në Gjermani kanë kërkuar azil nga janari deri në gusht 2017 rreth 150,000 vetë. Kufizimi i qartë i numrit të refugjatëve në Shtetet e Bashkuara lidhet me politikën rigoroze ndaj emigrantëve të Presidentit Donald Trump, të cilën ai e justifikon me mbrojtjen ndaj terrorizmit.
Që nga qershori i këtij viti SHBA-ja ka vendosur ndërprerjen e plotë të pranimit të refugjatët. Por dekreti përkatës i Presidentit Trump vlen për 120 ditë dhe përfundon më 24 tetor. Deri tani nuk është e qartë nëse qeveria amerikane dëshiron ta zgjasë këtë vendim të përkohshëm për disa javë ose për disa muaj të tjerë.
Ronaldo përshëndet tifozët kosovarë
Mirëdita, unë jam nga Kosova! Ky është mesazhi që Cristiano Ronaldo jep për të gjithë tifozët kosovarë të Realit të Madridit dhe sulmuesit portugez. Një gjetje e zgjuar e numrit 7 për të shprehur afirmitetin e tij me gjithë mbështetësit në mbarë globin. Në videon personale të publikuar në rrjetet sociale, Ronaldo shfaqet me dy binjakët dhe djalin e tij të madh në një moment pushimi në shtëpi. Më pas, ai shton gjithashtu që është edhe një indonezian duke përshëndetur edhe fansat në Azinë Juglindore. “Dua të ndaj me ju këtë moment të bukur me familjen time”, shton luzitani.
Një mesazh që flet shumë dhe qartë duke dhënë një mesazh të drejtpërdrejtë. Ronaldo ndoshta nuk është një shtet, por një nga futbollistët më të njohur të planetit dhe dedikimi i tij personal ndaj popullit kosovar është një gjest simbolik, por edhe domethënës, sepse atë që me vështirësi e bën diplomacia kosovare, Cristiano Ronaldo e realizon me një fjali të vetme, duke e ndërkombëtarizuar Kosovën edhe në sportin më të ndjekur të planetit.
Kristiano Ronaldo e nisi atje ku e kishte lënë sezonin e shkuar kur vjen fjala te golat në Champions. Portugezi e ngriti trofeun për herë të 4-t në karrierën e tij të lavdishme në qershor, kur banda e Zidanit mposhti 4-1 Juventusin në finale. CR7 shënoi dy herë në Kardif, ndërsa më parë i kishte realizuar 5 gola Bajernit në dy ndeshjet çerekfinale dhe 3 Atletikos në gjysmëfinale.
Ai e mbylli sezonin me 12 gola në 13 ndeshje dhe, me sa duket, është në rrugë të mbarë për ta thyer vetveten, pasi e ka nisur sezonin e ri europian me një dopietë ndaj APOEL Nikosias në ndeshjen e parë të grupit dhe shënoi edhe dy herë të tjera ndaj Dortmundit mbrëmjen e së martës.
Rekordi total i golave të 32-vjeçarit në Champions arrin në 110 në 146 ndeshjet që ka luajtur me Sportingun e Lisbonës, Mançester Junajtid dhe Realin e Madridit (përfshirë edhe raundet kualifikuese). Dhe po të përfshijmë edhe dy golat që ai shënoi në finalen e Superkupës së Europës kundër Seviljes, gjithashtu luajtur në Kardif, ai ka regjistruar në total 112 gola.
Ronaldo i ka shënuar këto gola në 15 shtete të ndryshme, në 24 qytete dhe viktima të tij kanë qenë 33 klube të ndryshme. 49 prej këtyre golave ai i ka shënuar në Madrid. Ai do të synojë të arrijë shifrën 50-të, kur Reali të presë Totenhemin në ndeshjen e radhës më 17 tetor.
Nata e Zezë e Karlo
Humbja nga Paris Saint-Germain ka vënë në dyshim të ardhmen e Karlo Ançelotit në Bayern Munich. Bankina e Karlo Ançelotit është duke u dridhur pas humbjes së Bayern Munichut nga Paris Saint-Germain në Ligën e Kampionëve, me rezultat të lartë 3:0. Pas ndeshjes, mesfushori holandez, Arjen Robben, nuk ka dashur të flasë rreth të ardhmes së trajnerit italian. “A e mbështetni Karlo Ançelotin? “Nuk do t’i përgjigjem kësaj pyetjeje”, ka deklaruar ish ylli i Chelseas dhe Real Madridit pas ndeshjes.
Matthias Brügelmann, komentuesi i gazetës gjermane “Bild”, është kundër Karlo Ançelotit. Karlo Ançeloti nuk i ka punët mirë pas humbjes së Bayern Munichut nga PSG, me rezultat 3:0, në Ligën e Kampionëve.
Komentuesi i gazetës gjermane “Bild”, Matthias Brügelmann mendon se Bayern Munich duhet ta zëvendësojë Ançelotin me Jurgen Kloppin, trajnerin aktual të Liverpoolit. “Klopp do të jetë pasardhësi ideal për Ançelotin”, thuhet në kolumnen e shkruar nga Brügelmann.
“Si pasardhësi i Ançelotit në vitin 2018 apo 2019, Bayern ka nevojë për një personalitet që mund të trajtojë yjet dhe talentet e reja, me pasion të madh lojë dhe ide”, ka shkruar Brügelmann. Kurse, “Bild” humbjen e Bayernit nga PSG e ka titullar: “Nata e Zezë e Karlo”.
Trajneri i Bayern Munichut, Karlo Ançeloti ka folur pas humbjes 3:0 nga PSG në kuadër të Ligës së Kampionëve. Italiani e ka pranuar se do të kritikohet për përzgjedhjen e formacionit, por insiston se për këtë ka menduar shumë gjatë.
Ançeloti kishte vendosur që ndaj PSG të luante pa dy lojtarët kryesorë, Arjen Robben dhe Franck Ribery. “Kam menduar shumë gjatë rreth formacionit. Në fund më duhet t’i pranoj kritikat, por nuk e kam problem”, tha Ançeloti pas ndeshjes për “Sky”. Ai ka folur edhe për Riobery, ku tha se nuk ka ndonjë problem, por zgjedhja për ta lënë jashtë ishte teknike.
PSG ka shënuar fitore të merituar ndaj Bayern Munichut në Ligën e Kampionëve, duke e mposhtur me rezultat të thellë 3:0. Golat për PSG-në i shënuan Dani Alves, Edinson Cavani dhe Neymar. Pas kësaj fitoreje PSG mban vendin e parë në Grupin B me 5 pikë, ndërsa Bayern dhe Celtic ndajnë vendin e dytë dhe të tretë me nga 3 pikë.
Agolli rrëfen emocionet e debutimit në Ch. League
Luan prej 8 vitesh me skuadrën që po dominon futbollin azer, por për herë të parë të mërkurën në mbrëmje shijoi emocionet e një kompeticioni prestigjoz si Champions League. Mbrojtësi kuqezi, Ansi Agolli debutoi në Baku me skuadrën e Qarabag në Champions League, pasi u rikthue në skuadër pas një dëmtii disajavor që nuk e lejoi të zbriste në fushë disa ditë më parë në “Stamford Bridge” ndaj Chelseat. Gjithsesi, 34-vjeçari i indur në Tiranë e pranon se rikthimi në fushën e lojës në një ndeshje kaq të rëndësishme ishte vërtet emocionuese.
Edhe pse në vitet e fundit të karrierës, Agolli ka arritur të përjetojë emocione kaq të mëdha vetëm gjatë vitit të fundit ku ka fituar gjithçka në Azerbajxhan dhe është gjithshtu pjesëmarrës në kompeticionin europian. Mbrojtësi shqiptar e pranon se po kalon momente të rëndësishme.
Nga Azerbajxhani në Kombëtare. Për Agollin ky do të jetë një muaj i ngjeshur, por ai është përherë gati dhe në radhën e parë për t’i dhënë një dorë edhe skuadrës kuqezi. Fillimisht, Italia dhe më pas Spanja. 34-vjeçari nuk vendos objektiva, por thekson se skuadra do të japë më të mirën për të marrë maksimumin nga këta dy kundërshtarë të vështirë.
Barcelonës i mjafton një autogol
Barcelona konfirmohet në kreun e grupit në Ligën e Kampioneve me pikë të plota pas dy ndeshjeve të para. Por nëse ndaj Juventusit katalanasit shkëlqyen me një lojë spektakolare, ndaj Sporting Lisbonës ata thjesht bënë detyrën dhe siguruan tri pikët vetëm falë një autogoli të Koates.
Sportingu i bëri rezistencë ekipit të Valverdes, duke mos e lënë të luante lojën e rrjedhshme të tij. Ndaj Barcelona e kishte të vështirë të gjente rrjetën në këtë ndeshje. Gjithçka u zgjidh me episodin e fillimit të pjesës së dytë, kur Koates devijoi në portën e vet një goditje dënimi nga e djathta.
Në takimin tjetër, heroi i mbrëmjes ka qenë Gonzalo Higuain, i cili ka treguar se është ende shumë i vlefshëm për Juventusin, pavarësisht kritikave për “krizën e golit”. Alegri kishte lënë argjentinasin në stol në duelin kundër Olimpiakosit, duke e aktivizuar në minutën e 60, meqë skuadra e tij nuk po gjente dot rrugën e rrjetës. Higuain iu deshën pak minuta që të gjente portën e ekipit grek, ndërsa më pas ishte Manxhukiç që vulosi rezultatin përfundimtar 2-0.
PSG turpëron Bayernin
Milionat e Paris Saint Germain shkëlqejnë në Champions League. Parizienët e Unai Emery dominuan Bayern Munich, që u duk një skuadër e vogël përballë yjeve të ekipit francez. Treshja e ëndrrave Neymar-Cavani-Mbappe ishte thjeshtë fantastike, duke vallëzuar mes mbrojtësve të Bayern-it. Në minutën e 2-të Dani Alves i shërbyer nga Neymar mposhti Ulreich për avantazhin e Parisit. Bayerni shpërdoroi shumë raste për të barazuar shifrat dhe në minutën e 31-të, Cavani i asistuar nga Mbappe shënoi edhe të dytin. Fitorja e Paris Saint Germain dhe vendi i parë në grupin B pas 2 ndeshjeve të para u vulos nga goli i Neymar në të 63-ën. Në sfidën tjetër të këtij grupi kishte festë për Celtic Glasgow që mposhti me shifrat 3-0 brenda në Bruksel, Anderlechtin me finalizimin e Griffits dhe autogolin e Kara dhe golin në sekondat e fundit të Sinclair.
Në grupin C, Chelsea regjistroi një fitore të madhe, duke hedhur një hap të sigurtë drejt kualifikimit në fazën tjetër. Një gol i Batshuayai në minutën e 94-ën, la me gisht në gojë Diego Simeonen me Antonio Conten fitoi duelin me rivalin e tij. Në Ëanda Metropolitana përfundoi me suksesin 2-1 me përmbysje të Bluve të Londrës që u ngjitën në kuotën e 6 pikëve dhe kryesojnë bindshëm grupin C. Golit të Griezmann nga pika e bardhë e penalltisë iu përgigj Alvaro Morata përpara se të vinte finalizimin me vlerën e tre pikëve që mban firmën e beglut Mitchy Batshuayi. Në orën 18-të, në Baku, Qarabagut nuk i mjaftoi rikthimi në fushë i Ansi Agollit për të ndalur Romën që triumfoi me shifrat 1-2. Manolas dhe Dzeko në 15 minutat e para shënuan 2 herë për verdhekuqtë, ndërsa rrjeta e Pedro Henriques vetëm sa rihapi sfidën.
Në grupin D fitore për Barcelonën dhe Juventusin. Një autogol i Coates i mjaftoi blaugranave për të mposhtur në Lisbonë Sportingun vendas. Në Torino, ndërkohë bardhezinjtë morën fitoren e parë falë suksesit 2-0 ndaj Olympiacosit. Higuain i ardhur në fushë nga stoli dhe Mandzukiç ishin autorët e golave për skuadrën e Alegrit.
Në grupin A fitore të thella për Manchester United dhe Baselin. Në Moskë, formacioni i Jose Mourinhos kaloi 4-1 Cska-në e Moskës, duke marrë fitoren e dytë në grup. Lukaku, Martial me penallti dhe sërish Lukaku, shënuan në pjesën e parë për United, ndërsa Mkhitaryan e çoi rezultatin në 0-4 në fraksionin e dytë. Në fund kishte vend edhe për golin e nderit të skuadrës ruse që u realizua nga Kuchaev. Në St Jakob Park Baseli me Taulant Xhakën në fushë që u ndëshkua sërish me karton të verdhë shpartalloi Benficën me rezultatin e thellë 5-0. Lang hapi serinë e golave që në minutën e 2-të, ndërsa Oberlin i çoi shifrat në 2-0 në të 20-tën. Ricky Van Vonsëinkel nga pika e bardhë e penalltisë, sërish Oberlin dhe më pas Rivieros fiksuan shifrat përfundimtare të këtij takimi në 5-0 me Baselin që zhyti në krizë Benficën, duke marrë tre pikët e para.
Përçarjet e reja në SHBA
Provokuesit rusë në internet po e shfrytëzojnë kundërthënien lidhur me protestat e lojtarëve zezakë amerikanë kundër dhunës policore për t’i thelluar përçarjet në Shtetet e Bashkuara, ka thënë senatori, James Lankford, republikan nga Oklahoma, anëtar i Komitetit të Inteligjencës së Senatit amerikan.
Duke folur mbrëmë në një dëgjim, ai theksoi se shfrytëzuesit e paguar të mediave sociale, të cilët ai i ka quajtur si “djaj”, duke i mbështetur të dy palët e debatit të nxehtë publik, që filloi ditëve të fundit pasi disa lojtarë zezakë të futbollit amerikan, në shenjë proteste kundër incidenteve të raportuara të dhunës policore kundër personave të dyshuar zezakë se kanë bërë krime, janë gjunjëzuar derisa është ekzekutuar himni kombëtar i Shteteve të Bashkuara, gjatë së cilit rregullisht njerëzit ngriten në këmbë në shenjë nderimi.
Presidenti amerikan, Donald Trump, gjatë ditëve të fundit i ka kritikuar lojtarët, duke thënë se “nuk e kanë respektuar vendin tonë” dhe u ka bërë thirrje pronarëve të ekipeve të Ligës Kombëtare Futbollistike, që t’i përjashtojnë ose suspendojnë futbollistët, të cilët kanë qëndruar në gjunjë.
Senatori Lankford tha se provokuesit rusë, për të cilët ndihmësit në Kongresin e Shteteve të Bashkuara thonë se ishin detektuar nga agjencitë e inteligjencës amerikane dhe i kishin informuar anëtarët e komitetit, nuk po anojnë për asnjërën palë në këtë mosmarrëveshje, por po synojnë ta rrisin zemërimin e shprehur nga njerëzit e të dy grupeve.
“Ata u drejtoheshin të dy palëve gjatë fundjavës së kaluar dhe janë përpjekur në mënyrë djallëzore për ta shtuar nivelin e zhurmës në Amerikë dhe për ta zmadhuar këtë çështje që të duket shumë më e madhe”, tha senatori Lankford gjatë dëgjimit në Komitetin e Sigurisë së Brendshme dhe të Punëve Qeveritare në Senatin e Shteteve të Bashkuara.
Komiteti i inteligjencës i Senatit është njëri prej disa paneleve të Kongresit, që po zhvillon hetime për përpjekjet e dyshuara ruse për të ndikuar në zgjedhjet presidenciale të vitit të kaluar në Shtetet e Bashkuara.
Ndihmësit në Kongres thanë se hetuesit kanë gjetur dëshmi se përpjekjet për ndikim kanë vazhduar edhe këtë vit.
Rusia i ka hedhur poshtë pohimet se janë bërë çfarëdo përpjekjesh për të ndikuar në zgjedhje ose në debatin publik.
Hetuesit privatë, të cilët e gjurmojnë propagandën ruse dhe fushatat e dezinformimeve, thanë se akuzat e senatorit Lankford janë të besueshme.
Një faqe në internet e themeluar së bashku nga hetuesit që punojnë për Aleancën për Sigurimin e Demokracisë, i cili është projekt dypatriak transatlantik për ta kundërshtuar fushatën e dezinformimeve ruse, i tregon postimet në Twitter, që i mbështesin të dy palët e debatit futbollistik nga profilet e ndryshme, për të cilat thuhet se ishin përdorur për ta përhapur propagandën ruse në rrjetin Twitter.
Clint Watts, kërkues që ka ndihmuar në krijimin e kësaj faqeje që e gjurmon propagandën ruse në mediat sociale, i tha agjencisë “AP” se fushata e përshkruar nga senatori Lankford, është e ngjashme me fushatat propaganduese, të cilat ishin mirë të dokumentuara, sikur ajo që ishte shfrytëzuar në rrjetin Facebook, për të përhapur mesazhe në favor dhe kundër lëvizjes Jetët e Zezakëve Janë të Rëndësishme.
Zoti Watts tha se përpjekjet e fundit të propagandës ruse janë të ngjashme me fushatat “me masa aktive” të periudhës ish-sovjetike, kur Moska ishte angazhuar në luftën informative të paraparë për t’i destabilizuar demokracitë perëndimore nga brenda.
“Qëllimi është që të shkaktojnë përçarje në Amerikë”, tha Wattts.
Njëherësh, Komiteti i Inteligjencës në Senat dhe ai në Dhomën Përfaqësuese të Shteteve të Bashkuara, kanë kërkuar nga kompanitë gjigante teknologjike, siç janë Google, Facebook dhe Twitter, që të flasin për përvojat e tyre me organizatat ruse, që postojnë shpallje në rrjetet e tyre, gjatë një dëgjimi publik në javët e ardhshme.
Kryesore
Continue to the category
