Drejtorja e “Zërit të Amerikës”, Amanda Bennett, u takua dje gjatë vizitës dyditore në Tiranë me autoritetet më të larta të shtetit shqiptar.
Presidenti i Republikës, Ilir Meta, e priti zonjën Bennett, së bashku me kolegët e saj që drejtojnë “Zërin e Amerikës” në departamentin e Euro-Azisë dhe seksionin në gjuhën shqipe.
Zonja Bennet dhe kolegët e saj u takua po sot me kryeministrin Edi Rama, me të cilin shkëmbyen dhurata simbolike dhe mendime për zhvillimet e fundit të demokracisë dhe medias.
Këto takime janë pjesë e një vizite disaditore që drejtorja e “Zërit të Amerikës”, Amanda Bennett, po zhvillon në disa shtete të rajonit të Ballkanit.
Ajo mori pjesë një ditë më parë në një forum diskutimesh pranë Universitetit Europian të Tiranës, ku diskutoi me një auditor të gjerë studiuesish dhe gazetarësh mbi sfidat e sotme të gazetarisë.
Zonja Bennett theksoi gjatë fjalës së saj, se njerëzit kanë nevojë për media të përgjegjshme, edhe pasi përfundojnë krizat, tensionet apo lufta e ftohtë.
“Gjendja e medias këtu në Shqipëri – tha zonja Bennett – pasqyron po ashtu gjendjen e mediave kudo në botë, ku ka shumë presione politike, ekonomike dhe ekziston një betejë për të patur sa më shumë ndikim, gjë që i shtyn palët që të polarizohen, dhe kjo betejë është më e ashpër se asnjëherë më parë, ndaj edhe bashkëpunimi midis vetë mediave është jashtëzakonisht i rëndësishëm”.
Zonja Bennett tha se, “njerëzit kërkojnë gjithmonë të vërtetën, por në kohët e sotme gazetarëve u janë shtuar vështirësitë për ta gjetur atë, sepse ajo gjendet e fashitur midis shumë detajesh të tjera të pavërteta. Ndaj edhe bashkëpunimi mes gazetarëve është i rëndësishëm për të verifikuar të dhënat dhe për të nxjerrë shkrime të sakta e të ndershme”.
Ajo iu përgjigj një seri pyetjesh nga auditori i universitarëve, ku në mesin e shumë profesorëve, drejtues mediash dhe gazetarë, kishin ardhur edhe deputetë studiues dhe zyrtarë të ndryshëm.
Zonja Bennett theksoi se, gazetarët nuk mund të ndalojnë dot përpjekjet e qeverive të përhapin lajmet e manipuluara, por ajo që mund të bëjnë gazetarët është të qëndrojnë besnikë parimeve të punës së tyre.
“Ajo që ne mund të bëjmë e të kontrollojmë përballë këtij presioni në rritje është të ruajmë standardet që ne kemi. Kudo në botë mediat po polarizohen, dhe dilema është çfarë njerëzit besojnë dhe jo se cila është e vërteta. Vlerat e gazetarisë tonë janë balancimi dhe renditja e drejtë e fakteve. Përpiqemi të përfshijmë të gjitha palët me përgjegjshmëri”, tha ajo.
Drejtorja e “Zërit të Amerikës, Amanda Bennett po viziton prej disa ditësh rajonin e Ballkanin, ku qëndroi në Beograd, Podgoricë, Shkodër dhe Tiranë ka në plan të vizitojë edhe Prishtinën.
Kjo është vizita e parë që një drejtuese e nivelit më të lartë të “Zërit të Amerikës” viziton vendet e Ballkanit.
Drejtoresha e VOA në Tiranë -gazetarëve: Porosia për lajmet e manipuluara të qeverisë
Zvarritja e çështjes gjyqësore kërcënon zbulimet arkeologjike pranë ‘Velierës’
Gjykata e Apelit mund t’i japë Bashkisë së Durrësit brenda javës të drejtën për të rifilluar punimet në zonën arkeologjike për ndërtimin e “Velierës”, ndërkohë që edhe pas katër muajsh, Gjykata Administrative nuk ka zhvilluar asnjë seancë për të shqyrtuar padinë e Shoqërisë Civile kundër projektit të shumëdebatuar.
Gjykata e Apelit në Durrës do të vendosë të premten lidhur me kërkesën e Bashkisë së qytetit bregdetar, e cila synon rifillimin e punimeve në territorin e zbulimeve arkeologjike të projektit “Veliera”, por ndërkohë padia e paraqitur disa muaj më parë nga Shoqëria Civile në Gjykatën Administrative, që kërkon bllokimin e plotë të punimeve, është ende larg shqyrtimit.
Mirela Jorgo, avokate e Shoqërisë Civile, tha për BIRN, se që nga qershori i këtij viti, kur Gjykata vendosi ta gjykojë çështjen me një trupë prej tre gjyqtarësh, nuk është zhvilluar asnjë seancë gjyqësore për kërkesën e tyre. Megjithëse, siç shpjegon avokatja, rregullorja përcakton një vijueshmëri të seancave në çdo 10 ditë. “Miratimi i emrave të dy prej gjyqtarëve ka vijuar javë me radhë, në kurriz të një vendimi që vazhdon të zvarritet”, tha Jorgo.
Sipas avokates, procedurat e zgjatura të Reformës në Drejtësi e kanë bllokuar formimin e trupës së gjyqtarëve për disa javë, por vonesa më e madhe vjen “nga mungesa e dëshirës për ta trajtuar si duhet këtë çështje”. Në krahun tjetër apelimi i Bashkisë kundër një vendimi të Gjykatës së Faktit, që pati pezulluar punimet në atë që quhet Zona A e riskut arkeologjik dhe ku janë zbuluar edhe mure të kohës romake e osmane dhe objekte arkeologjike, po ecën më shpejt dhe nëse vendimi i të premtes është në favor të Bashkisë punimet mund të rifillojnë në pak ditë.
Punimet për zbatimin e këtij projekti kanë nisur në dhjetor të vitit të kaluar, por pas zbulimit të disa objekteve arkeologjike dhe pjesëve të disa mureve, Shoqëria Civile organizoi një sërë protestash kundër tyre dhe po ashtu kërkoi bllokimin e punimeve e në Gjykatë. Gjykata e Faktit vendosi që punimet në krahun me risk arkeologjik të ndërpriteshin në shkurt të këtij viti, ndërsa çështja në themel po shqyrtohet nga Gjykata Administrative.
Ndërkohë përfaqësuesit e Shoqërisë Civile thonë se, Bashkia po kërkon ligjërisht anulimin e vendimit gjyqësor të shkurtit. Në këtë zonë pas vendimit të Gjykatës, ndërhyrja e ndërtuesve ka qenë minimale. “Një vendim i pritshëm pas dy ditësh nga Gjykata e Apelit pro Bashkisë do t’i japë mundësi firmave ndërtuese, të vijojnë pjesën e fundit të punimeve madhore, që kanë mbetur ende pa u zbatuar”, thotë Mirela Jorgo.
“Këshilli i Lartë i Drejtësisë tashmë i ka miratuar emrat që plotësojnë grupin prej tre gjyqtarësh”, tha më tej znj. Mirela Jorgo, “dhe ne jemi në pritje të seancës përfundimtare dhe të vendimit përkatës”.
Edhe më herët gjatë këtij viti dhe pas fillimit të përplasjeve ligjore me Bashkinë Durrës organizatat joqeveritare që pretendojnë se projekti dëmton historinë e qytetit dhe një zonë me vlera arkeologjike, janë ankuar për vonesë të sistemit të drejtësisë.
Padia ligjore e Shoqërisë Civile ka nisur thuajse menjëherë me zbulimet arkeologjike të muajit shkurt në krahun verior të projektit të “Velierës”. Përfaqësuesit e saj arritën të bllokojnë punimet, duke ruajtur fortifikimet e zbuluara, e duke penguar njëkohësisht edhe realizimin e plotë të projektit të shpallur nga Bashkia.
Në maj të këtij viti, Këshilli Kombëtar i Arkeologjisë vendosi ruajtjen dhe integrimin e objekteve të zbuluara, duke ia lënë si detyrë Këshillit Kombëtar të Restaurimeve. Një vendim që paraqet pjesërisht edhe pozicionin e Ministrisë së Kulturës për të ardhmen e monumentit të zbuluar.
Sidoqoftë, investitori vijoi realizimin e projektit, duke përfunduar nënkalimin e automjeteve, që nis pranë ish-hotel “Vollga” dhe përfundon pranë Bankës Kombëtare Tregtare. I gjithë ky territor i përket zonës B të riskut arkeologjik, që ofron më pak mundësi zbulimesh, ndërsa në zonën A ku kanë dalë në sipërfaqe fragmente të mureve romake dhe pjesë nga fortifikimi osman, punimet janë ndërprerë me një vendim të Gjykatës së rrethit gjyqësor të Durrësit.
“Rifillimi i punimeve në terren edhe në zonën arkeologjike, si dhe zvarritjet disamujore të Gjykatës për të vendosur mbi kërkesën e Shoqërisë Civile mund ta vështirësojnë vijimësinë e procesit”, thotë Jorgo.
Përfaqësuesit e Shoqërisë Civile ngulmojnë se jo vetëm në Zonën A të rriskut arkeologjik, ku janë evidentuar zbulimet, por edhe në Zonën B pranë hyrjes së portit mund të ketë elementë të dëmtuar të vlerave arkeologjike. “Ne presim vendimin e Gjykatës së Apelit, por nuk do të pajtohemi me të, nëse ai do të favorizojë projektin e Bashkisë së Durrësit”, tha Jorgo.
Sipas Bashkisë së Durrësit, sheshi i ri publik do të ketë një sipërfaqe prej 12 mijë metra katror dhe vela mbi të do të jetë 2 mijë metra katror. Ndërsa vlera e të gjithë këtij projekti arrin rreth 6 milionë dollarë. Ai është pjesë e të ashtuquajturës rilindje urbane, që përfshin rikonstruksione dhe ndërtime të shesheve të disa qyteteve, të cilat shpesh janë bërë objekt debati.
Gëzim Kabashi
PS në minorancë në Bulqizë, humbet shumicën në Këshill
Këshilli Bashkiak i Bulqizës votoi pas dy muajsh vonesash vendimin për shpërndarjen e ndihmës ekonomike, por i rrëzoi bashkisë projekt-buxhetin afatmesëm dhe po ashtu rrëzoi edhe një vendim dëmshpërblimi të emergjencave civile, duke akuzuar administratën dhe kryetarin Melaim Damzi se kishin përpiluar lista dëmesh të motivuara politikisht dhe kishin punësuar personel fiktiv.
Kryebashkiaku Damzi që drejton Bashkinë e Bulqizës i zgjedhur si pjesë e koalicionit mes PS dhe LSI, ka humbur shumicën në Këshillin Bashkiak pas përplasjeve me socialistët gjatë fushatës së fundit elektorale, kur ky koalicion u prish.
Pas përplasjeve para zgjedhjeve kreu i Bashkisë së Bulqizës, Melaim Damzi, akuzohet nga ish-aleatët e tij socialistë se ka shkarkuar nga puna disa punonjës të njësive të ndryshme administrative, përfshirë edhe administratorët e njësive Gjoricë, Fushë-Bulqizë, Martanesh, e të tjera për shkak se ata i përkasin Partisë Socialiste. Kjo ka sjellë që Këshilli Bashkiak që kontrollohet nga socialistët të mos mbështesë disa vendime të Bashkisë.
Kështu për dy muaj me rradhë këshilltarët socialistë dhe ata të opozitës refuzuan të votonin vendimin për ndihmën ekonomike, sepse pretendojnë që listat ishin politike. Këshilltarët ngritën të njëjtin shqetësim edhe për listën e fundit, por vendosën të votonin, siç thanë, për të mos lënë pa ndihmë familjet në nevojë.
Ndërkohë Munir Sinani kryetar i Grupit të këshilltarëve socialistë tha se, megjithë kërkesat e përsëritura të këshilltarëve drejtoria e personelit nuk u kishte vënë atyre në dispozicion listën emërore të të punësuarve. “Dyshojmë se mosbërja transparente e listës emërore të administratës së bashkisë, bëhet për të mbuluar abuzimet me këto emërime, pasi ka të punësuar që aktualisht kanë emigruar jashtë vendit”, tha ai.
Akuza të ngjashme u bënë edhe nga Myfit Duriçi po ashtu këshilltar i Partisë Socialiste. Ata përmendën rastin e drejtorit të Shërbimit Pyjor, që banon në Tiranë dhe gjatë situatës së zjarreve sipas tyre nuk ishte asnjë ditë të vetme në Bulqizë.
Në përgjigje të këtyre akuzave kryebashkiaku Damzi, i cili u shpreh se bërja prezente e listës së administratës, nuk është detyrim ligjor dhe se këshilli ka të drejtë të miratojë vetëm numrin total të punonjësve dhe jo emrat e tyre, pasi kjo është kompetencë e kryetarit.
Përplasje po ashtu pati edhe për projektbuxhetin. Këshilltarët nuk e miratuan projektbuxhetin afatmesëm 2018-2020, pasi sipas tyre aty ishin parashikuar që të rriteshin taksat për qytetarët në masën 143 për qind. Këtu këshilli votoi unanimisht dhe vendosi ta rikthejë projektbuxhetin në bashki për plotësime e ndryshime.
Po kështu, debate të ashpra mes këshilltarëve dhe bashkisë, u zhvilluan kur Drejtoria e Emergjencave Civile, paraqiti projekt vendimin për ndihma financiare për familjet e prekura nga zjarri. Këshilltarët thanë se në listë mungonin shtëpi të djegura, ndërsa ishin paraqitur raste ku kërkohej dëmshpërblim për një derë të djegur.
Këshilltarët e PS shprehën dyshime se një diferencim i tillë ka lidhje vetëm me përkatësinë partiake të këtyre familjeve. Këshilli vendosi të ngrejë ndërkohë një komision për verifikimin e dosjeve të Emergjencave Civile që janë trajtuar me ndihmë financiare, për të parë nëse në to kishte abuzime.
Hysen LIKDIASHA
Forumi Ekonomik Botëror: Qeveria dështon në forcimin e rolit të grave
Shqipëria renditet në vendin e 97-të në botë (nga 137) dhe e parafundit në Ballkan për sa i përket pjesëmarrjes së grave dhe vajzave në fuqinë punëtore. Kjo vjen në bazë të studimit të bërë në “Raportin e Konkurrueshëmrisë Globale 2017-2018” të “Forumit Ekonomik Botëror”. Raporti i pjesëmarrjes në fuqinë punëtore femra/meshkuj për Shqipërinë është 0.68.
E thënë ndryshe, ky studim tregon se gratë dhe vajzat në Shqipëri nuk janë të fuqizuara, pasi kanë pjesëmarrje më të ulët se meshkujt në fuqinë punëtore. Kjo tregon se gratë dhe vajzat kanë mundësi më të ulëta punësimi në tregun e punës se meshkujt. Dhe raporti është i atillë sa Shqipëria renditet ndër vendet më të këqija në botë për sa i përket pjesëmarrjes së grave dhe vajzave në fuqinë punëtore.
Gjithashtu kjo situatë ka qenë pothuajse e njëjtë për 4 vitet e fundit, nëse do t’u referoheshin raporteve të “Forumit Ekonomik Botëror” për Shqipërinë.
Këto të dhëna ngrenë në pikëpyetje veprimtarinë e shumë organizatave joqeveritare (OJQ) në Shqipëri, të cilat pretendojnë se punojnë për fuqizimin e grave. Dhe lindin pyetjet për çfarë i marrin fondet dhe si i shpenzojnë? Nga ana tjetër të dhënat që tregojnë mosfuqizimin e grave dhe vajzave shqiptare vë në dyshim edhe qeverinë, që pretendon se ka bërë progres në përmirësimin e jetesës për ato.
Kaos me pensionet, në një javë 45 dosje tek Administrativja
Shtatori ka nisur aktiv për Gjykatën Administrative, e cila në më pak se një javë ka marrë të paktën 45 dosje që mbajnë brenda tyre problematika nga më të ndryshmet të lidhura me çështjen e pensioneve. Kryesisht të paditura janë Drejtoritë Rajonale të Sigurimeve Shoqërore me një hartë që nis nga Tirana, Lezha, Durrësi, Elbasani dhe një seri qytetesh të tjera. Problematikat që hasen më shpesh duket se kanë të bëjnë me rillogaritjen.
Shumica e individëve që kanë çuar dosjen në derën e gjykatës kundërshtojnë masën e pensionit që u është caktuar sipas llogaritjes fillestare nga secila drejtori. Pretendimi i tyre është se kjo masë është caktuar më e ulët sesa duhet të ishte përfitimi real dhe për këtë duhet të bëhet rillogaritje. Mes të tjerave pensionistët kërkojnë edhe shlyerjen e diferencës që u është mbajtur në mënyrë të padrejtë gjatë periudhës që kanë marrë pensionin në masën e reduktuar, si dhe aplikimin mbi këtë vlerë të interesave.
Një tjetër problem që haset në dosje është ajo e mungesës së njohjes së vjetërsisë për periudha të gjata kjo më evidente për ata që kanë punuar në bujqësi dhe që në shumë raste kanë paguar kontributet në mënyrë kumulative për disa vite pas disa vendimeve nxitëse të qeverisë së asaj kohe. Në shumë raste pagesat edhe pse pretendohet se janë bërë nuk janë gjetur nga ana e Drejtorive Rajonale të Sigurimeve duke sjellë kështu një ulje të dukshme të masës së pensionit. Kundërshtimi i daljes së parakohshme në pension apo pensione suplementare që lidhen me kategori të veçanta si ushtarakët sërish kanë shfaqur problemet e tyre dhe kjo ka bërë që listës së padive t’i shtohet edhe kjo kategori.
BMI: Qeveria Rama po rrezikon integrimin në BE
Shqipëria rrezikon të mos integrohet në BE as brenda dekadës tjetër dhe ekonomia do të ngadalësohet. Kështu shprehet në një raport BMI Reasearch, një kompani e grupit Fitch (një prej tre agjencive më të rëndësishme të vlerësimit të riskut të kreditit në botë) për riskun që paraqet Shqipëria. Duke u ndalur tek reforma në gjyqësor thuhet, “Mbeten interesa vetjakë të lidhura me reformën që e kundërshtojnë procesin e saj, por kjo (reforma) është një kërkesë kyçe për pranimin në Bashkimin Europian, dhe për këtë arsye ne mbetemi skeptikë që Shqipëria do t’i bashkohet BE brenda dekadës tjetër”, thuhet në të njëjtin raport. Në fakt, Shqipëria është në përpjekje për të hapur negociatat, të cilat deri më tani nuk kanë pasur dritë të gjelbër nga ana e BE-së. Gjithsesi, përpara hapjes vendi ynë duhet të plotësojë detyrat që i janë caktuar që nuk lidhen vetëm me hapat e zbatimit të Reformës në Drejtësi. “Një kontraktim i vazhdueshëm i sektorit privat dhe një parashikim për inflacion të dobët do të thotë se ne shohim Bankën e Shqipërisë të mbajë një politikë monetare lehtësuese në 18 muajt e ardhshëm edhe nëse rritja ekonomike mund të përshpejtohet”, vlerëson raporti. BMI parashikon që ekonomia shqiptare do të rritet me 3.6% në vitin 2017, por ai pret që zgjerimi të ngadalësohet në 3.3% vitin e ardhshëm. Kjo është në linjë të kundërt me pritshmëritë e qeverisë shqiptare dhe institucioneve ndërkombëtare që parashikojnë që rritja ekonomike t’i afrohet 4% në afatin e mesëm.
18 mijë kredi të këqija në Përmbarim
Ekonomia shqiptare është e mbërthyer në një zinxhir të madh borxhesh të këqija, nga i cili po lulëzon vetëm një biznes, ai i Përmbarimit. Dhoma Kombëtare e Përmbaruesve Privatë bëri të ditur se bankat private kanë çuar mbi 18 mijë kredi të këqija për ekzekutim kolaterali. Shifra e lartë pasqyron situatën e vështirë në sektorin financiar, si dhe pamundësinë e debitorëve për të shlyer borxhet, që kanë marrë në banka. Sipas të dhënave zyrtare nga Banka e Shqipërisë aktualisht niveli i kredive të këqija në banka llogaritet rreth 90 miliardë lekë ose afro 690 milionë euro, ndërkohë që bankat kanë fshirë nga bilancet të paktën edhe 50 miliardë lekë të tjera kredi të humbura. Mijëra prona të sekuestruara për shkak të kredive të pashlyera i kanë shndërruar bankat private në pronaret më të mëdha të pasurive të paluajtshme në Shqipëri. Të dhënat zyrtare nga Banka e Shqipërisë tregojnë se në fund të tremujorit të parë të këtij viti vlera e pronave të sekuestruara në bilancet e bankave arriti në 23.3 miliardë lekë ose gati 175 milionë euro. Këtu bëjnë pjesë ndërtesa për qëllime tregtare, apartamente banimi apo toka, kryesisht në bregdet të sekuestruara nga individë dhe biznese, që nuk kanë kthyer kreditë e marra. Sipas shifrave krahasuar me fundin e vitit 2015, vlera e pasurive të patundshme që zotërohet nga bankat është rritur me 12 për qind, nga 20.8 miliardë lekë në 23.3 miliardë lekë. Por krahasuar me 5 vjet më parë, kjo vlerë është rritur me katër herë e gjysmë. Në total kreditë e këqija në banka vlerësohen rreth 690 milionë euro, rrjedhimisht vlera e pronave të sekuestruara është sa 25 për qind e totalit të kredive të këqija. Fillimisht, pasi e sekuestrojnë një pronë bankat e nxjerrin atë për shitje në ankand. Por sipas Bankës së Shqipërisë, një pjesë e madhe e tyre nuk arrijnë të shiten dhe bankat detyrohen që t’i marrin në pronësinë e tyre. Mbushja e bankave me pasuri të bllokuara i ekspozon ato para disa rreziqeve. Më kryesori është ai i rënies së çmimit të këtyre pasurive gjatë kohës që mbahen nga bankat, çka ul shumën e përfituar nga shitja. Por veç rrezikut të rënies së çmimit, mbajtja e pronave nga bankat është edhe një proces me kosto, pasi ato duhet të ruhen, por edhe mirëmbahen.
Shqiptarët paguan 130 milionë për shkarravinat e Ramës në Bienale
Javën e fundit u përcoll me bujë ekspozita personale/private e artistit Edi Rama në Bienalen e Venecias. Por një raport i Kontrollit të Lartë të Shtetit zbulon se qeveria e Kryeministrit Edi Rama e ka financuar me fonde publike këtë bienale.
Raporti i siguruar në rrugë zyrtare nga “Hashtag.al”, zbulon se në intervalin kohor mars-tetor 2016, Ministria e Zhvillimit Ekonomik ka kryer një sërë prokurimesh të paqarta dhe të dyshimta publicitare, me kompani të huaja dhe shqiptare. Pjesë e kapilarëve të financimit ka qenë dhe “Fondacioni Bienalja e Venecias”.
Historia nis në mars 2016, kur ish-ministrja e Ekonomisë, Milva Ekonomi, vendosi një fond prej afro 500 mijë dollarë në dispozicion të spoteve publicitare për promovimin e Shqipërisë. Ky ishte projekti i quajtur “Albania go on your ëay”.
Ministria e Ekonomisë lidhi kontratë me një kompani të huaj, e cila mori përsipër që të shfaqte spotin promovues gjatë kampionatit evropian të futbollit “Euro 2016”.
Shteti shqiptar pagoi 95 mijë euro për të drejtat e transmetimit të kësaj reklame, por siç zbulon raporti i KLSH-së, spoti nuk u transmetua në Francë për shkak të disa komplikimeve me afatet e kontratës.
Dhe çfarë bën ministria pas kësaj?
E sposton transmetimin e këtij spoti në tetor për llogari të “Bienales së Venecias”.
Lexoni me vëmendje çfarë konstaton raporti i KLSH-së:
“Spoti rezulton se është përdorur për promocion gjatë Festivalit të Venecias dhe jo gjatë kampionatit evropian”.
Më tej raporti zbulon:
Nga auditimi ekziston komunikimi elektronik me kompaninë”Outdoor Revolution” me seli në Londër, me AKT(Agjencia Kombëtare e Turizmit), përfaqësuar nga ish-drejtori i marketingut në AKT, ku është pranuar, “silver package 12×30” spote në ditë, për 11 ditë. Në këtë ofertë, del e paqartë që është spoti prej 10 sekondash, i cili u prodhua nga kompania fituese “Publicita shpk”, për t’u publikuar në Euro 2016 apo kemi të bëjmë me ndonjë spot tjetër. Në faturën e sjellë nga kompania e huaj, “Rapture Entertainment Limited” Londër, flitet për një spot 30 sekonda.
Nga auditimi i dosjes fizike kompania, e cila ka ekskluzivitetin për transmetimin e spotit është “Outdoor Revolution” me këto të dhëna: “Fondazione La Bienale di Venezia” dhe nuk jepet asnjë dokumentacion ligjor dhe asnjë argumentim faktesh për lidhjen që kanë këto kompani “të përzgjedhura nga AKT-ja”.
Thënë në mënyrë të përmbledhur, gjetjet e audituesve zbulojnë kryesisht se:
-Ministria e Ekonomisë ka bërë një “mish-mash” kontratash me disa kompani të huaja për transmetimin e spotit promovues në Euro 2016, me vlerë rreth 95 mijë euro.
– Ministria dështoi me realizimin e këtij spoti në Francë, por tre muaj më vonë, bëri transferimin e të drejtave të spotit promovues për në Bienalen e Venecias.
– Kontratat dhe procedura si e kreu këtë transferim duket e paqartë dhe për audituesit e KLSH-së, të cilët shprehin në mënyrë eksplicite mungesën e dokumenteve dhe faturave në ministri.
-Ato pak dokumente të siguruara nga KLSH-ja zbulojnë se kontrata e lidhur në tetor me kompaninë angleze “Outdoor Revolution” shkonte për llogari të “Fondacionit Bienalja e Venecias”.
-Ministria e Ekonomisë nuk ka ofruar dokumentacion të plotë për të treguar në mënyrë të detajuar se sa fonde publike ka përfituar “Fondacioni Bienalja e Venecias”, ndërsa KLSH-ja shprehet se projekti total i ministrisë për reklamat promovuese ishte rreth 500 mijë dollarë.
Ndonëse ka financuar një spot promovues për vendin, Ministria e Ekonomisë e ka mbajtur të fshehtë këtë fakt dhe nuk e ka deklaruar në asnjë zëdhënie publike.
Raporti i KLSH-së e vendos kryeministrin Edi Rama në një konflikt të pastër interesi, pasi audituesit kanë vërtetuar se ekspozitat private të Edi Ramës janë realizuar në një bienale, e cila merr financime nga fondet publike të qeverisë shqiptare.
Për më tepër, Ministria e Ekonomisë ka refuzuar të detajojë kontratat që ka lidhur me kompanitë private sa i takon këtij financimi.
“Hashtag.al”
Ku ka ngecur koncesioni 13 miliardë lekë i laboratorëve?
Ministria e Shëndetësisë nuk e ka nënshkruar ende marrëveshjen koncesionare për shërbimin e laboratorëve mjekësorë në 18 spitale të vendit, ndonëse fituesi u shpall pesë muaj më parë.
Të dhënat e siguruara nga BIRN tregojnë se, projekti është ende në fazën e negociatave, të cilat konsiderohen “të vështira dhe komplekse” nga palët e përfshira në to.
Në përgjigje të një kërkese për informacion të BIRN, Ministria e Shëndetësisë sqaroi se, marrëveshja nuk është nënshkruar ende pasi nuk kanë përfunduar negociatat mes saj dhe konsorciumit fitues të përbërë nga kompanitë “Labopharma shpk” dhe “AB Laboratory Solutions B.V”-të dyja në pronësi të biznesmenit Janis Karathano dhe kompanisë franceze EXALAB. Sipas dokumenteve shoqëruese të procedurës së tenderit, Ministria e Shëndetësisë pati planifikuar ta firmoste marrëveshjen në muajin maj.
“Projekti…është shumë kompleks dhe kërkon investime të rëndësishme në infrastrukturë, pajisje dhe burime njerëzore. Në këto kushte, duke patur parasysh edhe natyrën e këtij projekti, kërkohen negociata të detajuara për të finalizuar kushtet e kontratës”, deklaroi Ministria e Shëndetësisë për BIRN.
Negociatat u cilësuan të vështira edhe nga biznesmeni Karathano, i cili i tha BIRN në një bisedë telefonike se në proces janë përfshirë edhe ekspertët e Korporatës Financiare Ndërkombëtare, IFC. Megjithatë, Karathano tha se, shpresonte që marrëveshja të nënshkruhej brenda një kohe sa më të shkurtër.
Konsorciumi fitues-një bashkim i dy kompanive të zotëruara nga Karathano dhe kompanisë franceze EXALAB pritet të marrë në administrim për dhjetë vitet e ardhshme laboratorët e analizave të 18 spitaleve në vend. Pesë prej laboratorëve u përkasin spitaleve universitare në Tiranë, 11 spitaleve rajonale dhe 2 spitaleve të Sarandës dhe Lushnjës: të gjithë së bashku ato realizojnë rreth 5 milionë analiza në vit.
Sipas të dhënave të publikuara më parë nga Ministria, ky koncesion pritet t’u kushtojë taksapaguesve shqiptarë rreth 13 miliardë lekë ose 100 milionë dollarë në dhjetë vjet.
Koncesioni i laboratorëve është i katërti shërbim publik i shëndetësisë, që u kalon privatëve, pas atyre të Check Up-it, hemodializës dhe sterilizimit të sallave kirurgjikale. Kjo praktikë është përballur vazhdimisht me kritika në lidhje me kostot dhe procedurat përzgjedhëse të konkurrentëve në garë.
Kalimi i laboratorëve mjekësorë nën administrimin e Partneritetit Publik-Privat u shoqërua gjithashtu me kritika dhe protesta gjatë fazës së diskutimit. Një grup mjekësh, kimistësh dhe laborantësh protestuan për disa ditë me radhazi kundër projektit që pritet të shoqërohet edhe me shkurtime vendesh pune.
Kundër dhënies me koncesion u shprehën gjithashtu edhe shoqatat e Biokimisë Klinike dhe Mjekësisë Laboratorike, të cilët e shohin atë si një “model të paeksperimentuar në asnjë vend të botës më parë”. Sipas tyre, laboratorët mjekësorë janë një hallkë e rëndësishme e sistemit në diagnostifikimin e popullatës, funksion publik që sipas tyre nuk mund t’u delegohej kompanive private.
Ish-ministri i Shëndetësisë, Ilir Beqaj, i cili inicioi këtë koncesion iu përgjigj akuzave se përmes partneritetit publik-privat do të bëheshin investime të rëndësishme në këtë shërbim, të cilat sipas tij do të rrisin cilësinë e analizave dhe do të mundësojnë çertifikimin ndërkombëtar të laboratorëve.
Aleksandra Bogdani
PD: Referendum për plehrat
Partia Demokratike është e vendosur për të mbajtur një referendum popullor për çështjen e importit të mbetjeve, pavarësisht se sot Konferenca e Kryetarëve e rrëzoi kërkesën e saj për ta futur në seancën e nesërme të Kuvendit.
Kryetari i Grupit parlamentar të PD, Edmond Spaho, deklaroi pas mbledhjes se PD-ja do të ushtrojë presion për të mbajtur referendum për çështjen e importit të mbetjeve dhe do të fillojë, duke plotësuar mangësitë teknike që bënë që kërkesa e saj të refuzohej nga mazhoranca.
“Kjo kërkesë, tha Spaho, është zvarritur me qëllim nga mazhoranca, por ne insistojmë që kërkesa të futet në rendin e ditës së Kuvendit madje që në seancën e nesërme. Mazhoranca e rrëzoi duke u kapur pas disa elementëve teknikë, por ne do t’i plotësojmë mangësitë teknike dhe do të ushtrojmë presion që këtë referendum ta kryejmë, sepse është e drejtë që buron nga Kushtetuta, që forca jonë politike të kërkojë mbajtjen e tij, por edhe të drejtë e qytetarëve që të shprehen për të ardhmen e tyre”.
Konferenca e Kryetarëve diskutoi për ngritjen e Komisionit Ad-Hoc për Reformën Zgjedhore, ku të gjitha palët politike kanë rënë dakord në parim për nisjen sa më parë nga puna të tij.
Kreu i Grupit parlamentar të PD-së, Edmond Spaho, në një dalje për mediat pas mbledhjes tha se po punohet për të finalizuar objektin, përbërjen dhe kohën.
Nëse përmbyllet deri nesër, tha ai, do të kalojë në seancë, në të kundërt javën e ardhshme.
“Domosdoshmëria e realizimit të një reforme të tillë, është objektivi kryesor i PD në këtë legjislaturë bazuar në femomene shumë negative në zgjedhjet e 2013, 2015, 2017, veçanërisht blerja e votës. Në lidhje me këtë çështje dëshirojmë që Komisioni të ketë kohën e nevojshme. Të mos përsëritet eksperienca e viteve të shkuara, ku Komisioni është krijuar në periudha afër zgjedhjeve dhe për rrjedhojë nuk ka pasur mundësi të kryejë punën e planifikuar, përfshirë edhe rekomandimit e OSBE-ODIHR. Theksova që duhet të fillojë punë një orë e më parë në mënyrë që në zgjedhjet vendore të 2019 të mund të realizojmë objektivin më të rëndësishëm të kësaj pakete që është votimi dhe numërimi elektronik.
Ka dhe një premtim nga Kryeministri në maj të këtij viti, ku u shpreh se në zgjedhjet e ardhshme do të votohet dhe do të numërohen në mënyrë elektronike. Prandaj, insistuam që Komisioni të fillojë sa më parë nga puna dhe besoj se do fillojë shpejt pasi në parim u shprehën dakord edhe përfaqësuesit e mazhorancës, por edhe partia tjetër në opozitë, LSI. Po punohet nga palët për të finalizuar objektin, përbërjen dhe kohën. Nëse do arrijmë t’i mbyllim deri nesër do të kalojë në seancë, në të kundërt në seancën më të parë, që i bie javën e ardhshme.
Spaho tha se në Konferencë “diskutuam për organet e Vetingut dhe ne shprehëm mbështetjen për të gjithë procesin, mbështetjen e institucioneve me burime njerëzore dhe financiare, gjë që nuk ndodhi në Komisionin e Ligjeve, ku u bënë shkurtime. Por, ne do të paraqesim amendamentet tona në mënyrë që këto organe të kenë të gjithë mbështetjen e nevojshme, si është parashikuar që në hartimin e këtyre dokumentave. Kthimi pas i PS-së është i pajustifikueshëm”.
Pika e tretë e diskutuar, rrëfeu Spaho, ishte nisja e punës për Reformën Zgjedhore, votimin dhe numërimin elektronik, që në zgjedhjet e ardhshme, çështje për të cilën është rënë dakord në parim me mazhorancën dhe LSI-në”, tha Spaho.
Shndërrimi i Shqipërisë në pikë grumbullimi plehrash
Ndonëse parimisht duket se qeveria u tërhoq nga ligji i plehrave, duke miratuar dekretin e Presidentin Nishani që kërkonte ndryshimin e disa neneve të cilësuara si antikushtetuese, në të vërtetë ajo çka Rama po synon të bëjë është qetësimi i debateve dhe rigjetja e një tjetër mënyre për kalimin pa zhurmë të këtij ligji. Burime brenda PS bëjnë me dije se shumë shpejt diskutimet për një ligj të ri plehrash të amenduar do të nisin dhe ështw e sigurtë që ky ligj do të miratohet brenda një kohe relativisht jo shumë të shkurtër . Rama, në një intervistë për një media franceze pranoi se, ligji i mbetjeve do të miratohet. Përmes një rezolute të mbajtur të fshehur, Këshilli i Ministrave paralajmëron mbi rreziqet e tregut dhe thekson se industrisë së riciklimit nuk i duhet importi për të mbijetuar, pasi 83% e mbetjeve që prodhohen në vend rezultojnë të paricikluara. Rezoluta e përgatitur vitin e kaluar, në emër të Këshillit të Ministrave ka shprehur rezerva të forta përsa i përket rikthimit të importit të plehrave. Kjo rezulton nga një rezolutë e fillimgushtit të 2016 përmes së cilës, qeveria jep mendimin e saj për ligjin e propozuar nga 3 deputetë të majtë. Relacioni, i cili nuk është bërë publik nga 3 propozuesit e ligjit gjatë fazës së diskutimeve, thekson se një prej rreziqeve kryesore ka të bëjë me vetë tregun e riciklimit të mbetjeve dhe mundësinë që mosrespektimi i kontratave ta kthejnë Shqipërinë në vend grumbullimi të disa milionave mbetjesh shtesë. Partia Demokratike, qytetarët, Shoqëria Civile, Aleanca kundër Importit të Plehrave kanë shprehur rezervat lidhur me ndryshimet në ligj, ndërsa kanë paralajmëruar kundërshtimin e miratimit të këtij ligji me të gjitha forcat.
Kryesore
Continue to the category
