Dy shqiptarë janë kapur me drogë në makinë në Itali. Teksa po bënin një shërbim normal patrullimi të territorit, patrulla e Skuadrës së Ndërhyrjes së Shpejtë në Modena të Italisë, është ndeshur me një makinë që ka shtuar shpejtësinë sapo ka parë policinë. Por arratisja e mjetit tip “Toyota Yaris” nuk ka zgjatur shumë, pasi policët i kanë bllokuar pak metra më tutje gjatë rrugës “San Giuliano”.
Sipas mediave italiane, dy personat që ndodheshin brenda në makinë, u zbritën nga policia dhe u identifikuan si A. K., 21 vjeç i padënuar më parë dhe F. K., 32 vjeç me precedent penalë. Ka qenë pikërisht sjellja e tyre që ka bërë që policët të kenë dyshime dhe të kontrollojnë imtësisht makinën, duke zbuluar të fshehur nën sedile dy vende të fshehta ku ishin 600 gramë marijuanë si dhe një dozë kokainë.
Ndërkohë, policia italiane ka deklaruar se droga u sekuestrua, ndërsa dy shqiptarët që ishin me dokumente të rregullta janë dërguar në qeli në pritje të vlerësimit të arrestit. Sipas policisë, droga ishte e destinuar për shpërndarësit lokalë, hallkat e fundit të zinxhirit që më pas do e shpërndanin tek klientët.
Kapen me drogë në makinë dy shqiptarë në Itali
Arrestohet në Maqedoni kryebashkiaku i Pustecit
Mediat në Maqedoni njoftojnë për arrestimin e kryebashkiakut të Pustecit, Edmond Themelko, një ditë pasi Gjykata e Shkupit dha vendimin me 30 ditë burg. Prej së hënës, për të ishte lëshuar një fletë-arresti ndërkombëtar. Themelko është kryetari i Bashkisë së Pustecit në Shqipëri, por ai jeton në Maqedoni, prej nga udhëtonte çdo ditë për të ushtruar detyrën në zonën me shumicë minoritetin maqedonas.
Ai akuzohet nga Prokuroria Speciale Publike për manipulimin e zgjedhjeve lokale të vitit 2013 në Maqedoni dhe është pjesë e dosjes “Titaniku”. Ai u arrestua në shkurtin e vitit 2016 për këtë çështje dhe më pas u la i lirë. Hetimet për çështjen në fjalë kanë nxjerrë se rreth 400 shtetas nga Pusteci kanë votuar në zgjedhjet e vitit 2013 në Maqedoni me dokumenta të falsifikuara. Prokuroria Speciale Publike ka përfshirë në këtë hetim edhe ish-kryeministrin Gruevski, ish-ministren e Brendshme, Jankullovska dhe ish-zyrtarë të lartë të qeverisë në Shkup.
Erdogan, gati për ndërhyrje ushtarake në Kurdistan
Presidenti turk Rexhep Tajip Erdogan tha se vendi i tij po shqyrton të gjitha opsionet duke filluar nga ndërhyrja ushtarake deri te sanksionet ekonomike kundër rajonit kurd të Irakut.
Ai i bëri komentet pas një referendumi të kurdëve të Irakut, rezultatet zyrtare të të cilit priten sot.
Duke folur në Ankara, zoti Erdogan tha megjithatë se ai shpreson që udhëheqja kurde e Irakut të braktisë synimet e krijimit të një shteti të veçantë dhe se nuk do ta detyrojë Turqinë të ndërmarrë sanksione.
Ai shtoi se rajoni kurd irakian pa dalje në det nuk do të ishte në gjendje të mbijetonte pa mbështetjen e Turqisë.
Presidenti turk tha se asnjë vend tjetër përveç Izraelit nuk e mbështet referendumin e kurdëve të Irakut për pavarësi dhe shtoi se përpjekjet e kurdëve për të formuar një shtet të pavarur janë të destinuara të dështojnë.
Një votë “PO” në referendum nuk do të çonte në një deklaratë pavarësie, por zyrtarët kurdë shpresojnë se kjo do të shërbente si një hap i parë drejt negociatave për shkëputjen.
Skandali në Elbasan! Armë të rënda në tunelin e tregut
Ish-ministri i Brendshëm, Dritan Demiraj deklaroi mbrëmë gjatë një emisioni në News24 se, në tregun ushqimor të Elbasanit, ku ndodhi sulmi, ka tunele ku banda ka fshehur armatime të rënda, dhe kjo dihet nga policia. Demiraj shkoi edhe më tej, duke i krahasuar tunelet që janë bërë në vendqëndrimin e bandës, me ato që përdoren në luftën e Afganistanit.
Demiraj tha se, policët hezituan për t’iu përgjigjur bandës që i sulmoi në Elbasan, pasi kishin frikë për jetën e tyre. Demiraj u shpreh Sipas Dritan Demirajt, vonesa e policisë për t’u futur brenda në vendqëndrimin e bandës i ka dhënë kohë të largojnë armët dhe të pastrojnë gjurmët. Mendohet se policët qëndruan jashtë tregut ushqimor për gati tre orë.
Në gjunjë para krimit
]Bandat bëjnë ligjin në Elbasan, ndërsa shteti ka rënë në gjunjë para krimit. Qyteti ndodhet në duart e bandës që ka mbështetje nga kreu i Bashkisë, Qazim Sejdini dhe kryeministri Rama, ndërsa policia nuk guxon t’u përmendë as emrat dy kokave të bandës. Edhe vetë drejtori i Përgjithshëm i Policisë së Shtetit, Haki Çako darkoi me peshqit e mëdhenj para një jave në Elbasan.
Shteti ka rënë në Elbasan që prej mbrëmjes së 18 shtatorit, ku makina e nëndrejtorit të Policisë u godit nga një makinë e blinduar, në pronësi të biznesmenit Petrit Çela, i cili njihet dhe si mik i kryetarit të Bashkisë, Qazim Sejdini dhe kryeministrit Rama. Autorët e sulmit ndaj Policisë ende janë të lirë, ndërsa qytetarët shprehen se në këtë skandal të madh janë përfshirë edhe drejtues të lartë të Policisë së Shtetit, mes tyre dhe drejtori i Përgjithshëm, Haki Çako. Ndërkohë, Prokuroria e Krimeve të Rënda është tërhequr nga hetimi i goditjes së policisë nga banda Çela-Sanxhaktari.
Në Elbasan i gjithë qyteti është i tronditur.Dy qytetarë nga Elbasani i janë drejtuar ish-Kryeministrit Berisha ku shkruajnë se dy kokat e krimit në Elbasan janë dhëndri i kryetarit të Bashkisë së Elbasanit, Qazim Sejdini dhe djali i biznesmenit Petrit Çela, ndërsa Policia e Shtetit ka frikë t’i arrestojë. Qytetarët i shkruajnë Berishës se, të gjitha operacionet e policisë për kapjen e autorëve janë false, pasi uniformat blu komandohen nga bandat.
“Rezultatet spektakolare në operacionin e Çakos së drogës në Elbasan! Lexoni mesazhet e qytetarëve dixhital ku denoncojnë: Operacionet farse të Çakos së drogës kundër bandës së Norieges dhe don Lalës, që terrorizojnë natë e ditë qytetin e njerëzve fisnik të Elbasanit!”, shkruan Berisha në një postim në Facebook.
“Përshëndetje i nderuar zoti Berisha. Marr shkas nga postimi që bëre. Eshtë mëse e vërtetë, por Policia s’ka nxjerrë ngjarjen ku Policia u godit dhe me plumba. Po ju drejtohem ju me një adresë tjetër se tek e imja kam shumë frikë. Dhe unë jam ofenduar nga Qazim Don Sejdini dhe s’kam mundur të bëj gjë se më është vënë pistoleta në kokë nga ushtarët e tij. Asnjë nuk është mbajtur në burg, të gjithë kanë dalë. As mediat e Elbasanit nuk e dhanë lajmin se kanë frikë. Suel Çela dhe Sokol Sanxhaktari, janë bërë si faraonët në Elbasan. Të godasin vetëm sepse i sheh, të kërcënojnë dhe s’e kanë problem të vrasin. Arrestimet në Elbasan u bënë sa për shou. Të gjithë e dinë se peshqit e mëdhej darkuan me Haki Çakon. Në Elbasan i gjithë qyteti është tronditur nga ky lajm. Dje, janë arrestuar shumë të rinj pa faj, kjo vetëm sa për sy e faqe e të thonë; “ja i arrestuam”. Po mos kishit qenë ju, lajmi s’do ishte bërë i ditur dhe ata do vazhdonin të bënin terror akoma. Jemi bërë si Napol. Ju lutem doktor, bëni diçka para se të merren jetë të pafajshme”, shkruan qytetari.
“Përshëndetje zoti Berisha. Jeni i vetmi zë në Shqipëri që i thoni gjërat e vërteta. Jam nga Elbasani dhe doja të thoja se operacioni i Policisë së Shtetit me në krye Haki Çakon është një operacion falco sa për t’i hedhur hi syve njerëzve. Nëqoftëse Policia do t’i arrestojë me gjithë mend ato të ngjasjes së datës 18 duhet të marrë në pytje Qazim Sejdinin, sepse ai është i vetmi njeri që di ku fshihen autorët, sepse njëri është dhëndrri i Qazimit, kurse tjetri është miku i Qazimit. Ata kanë përkrahje nga Qazimi dhe nga Edi Rama, sepse kur vijnë fushatat ato dalin dhe mbledhin vota me dhunë. Eshtë neveri kur sheh nëpër lajme që ky aksion i policisë po shitet si një sukses”, shkruan qytetari nga Elbasani.
Kamerat e sigurisë së Tregut Ushqimor kanë filmuar të gjithë episodin e incidentit me Policinë në Elbasan, mbrëmjen e së enjtes së kaluar. Ngjarja ndodhi pak minuta pas orës 20:00, ku postblloku policor është ngritur në derën kryesore të biznesit privat. Pasi kanë shoqëruar dy personat që ndodheshin në mjetin “Range Rover”, efektivët e policisë ndeshen me një “Audi”, që duke u futur në treg përplas mjetin tip “Golf” të zv/drejtorit të Policisë, Gjergji Oshafi, i cili bën një lëvizje mbrapsht, por nuk dihet nëse për të bllokuar mjetin, apo për t’i hapur rrugën që të kalonte.
Makina e zv/drejtorit të Policisë së Elbasanit, Gjergj Oshafi u godit nga “Audi” i blinduar që drejtohej nga Suel Çela, djali i biznesmenit Petrit Çela, që rezulton pronar i makinës. Në pamjet e kamerave të sigurisë duket se edhe pse dera kryesore e tregut qëndron e hapur për më shumë se 20 sekonda, efektivët ngurojnë që të hyjnë brenda rrethimit të tregut për të vijuar ndjekjen. Duket se punonjësit e policisë kanë frikë të arrestojnë autorin që goditi makinën e nëndrejtorit.
Krimet e Rënda tërhiqen nga hetimi
Prokuroria e Krimeve të Rënda shpall moskompetencë për ngjarjen e Elbasanit, ku një makinë e blinduar goditi makinën e Policisë. Nga pamjet filmike të publikuara në emisionin “Opinion”, Prokurorët e Krimeve të Rënda kanë arritur në përfundimin se çështja është kompetencë e organit të akuzës në Elbasan.
Pas publikimit në emisionin “Opinion” në “TV Klan” të pamjeve ekskluzive të momentit të përplasjes së makinës së zv/drejtorit të Policisë së Elbasanit nga një “Audi” e blinduar, Prokuroria ka bërë një këqyrje të hollësishme të tyre. Pamjet janë sekuestruar në “TV Klan” pas përfundimit të emisionit. Bazuar në to, Prokuroria e Krimeve të Rënda mësohet se ka shpallur moskompetencë, duke e dërguar për hetim në organin e akuzës së Elbasanit.
Nga këqyrja e pamjeve të kamerave të sigurisë të shfaqura në “Opinion”, Prokuroria ka krijuar bindje se nuk ka pasur sulm të drejtpërdrejt të forcave blu, ku makina e zv/drejtorit të Policisë së këtij Qarku, Gjergji Oshafi u godit nga një “Audi A8” e blinduar. Pavarësisht se vepra fillimisht u kualifikua si “vrasje e mbetur në tentativë ndaj punonjësit të policisë”, kjo gjë u rrëzua poshtë pas publikimit të pamjeve në emisionin “Opinion”.
E gjithë skena zhvillohet përpara Tregut Ushqimor në Elbasan, pronë e biznesmenit Petrit Çela. Për Prokurorinë, në momentin që nisen makinat e policisë për të çuar në komisariat Klement Xhaferrin, “Audi” vjen me forcë për të hyrë në Tregun Ushqimor. Siç shihet në pamje, ky automjet godet makinën e policisë. Nga ky incident efektivëve nuk ju është kërcënuar jeta, pohojnë burime nga organi i akuzës, pasi ata ndodheshin në distancë nga vendi i ngjarjes dhe një pjesë e tyre ishin brenda në furgonin e Forcave Speciale “Shqiponja”.
Por një ndër akuzat që mund të kualifikohet kjo vepër është, mosbindja ndaj urdhrit të punonjësit të policisë dhe largimi nga vendi i ngjarjes, kompetencë kjo që e hetojnë prokuroritë e rretheve dhe jo ajo e Krimeve të Rënda.
Më herët, Gjykata e Krimeve të Rënda kishte lënë në masën e arrestit me burg, Ledio Zabelin dhe rojen e objektit, Valmir Dedja. Ndërkohë, drejtuesi i mjetit tip “Renge Rover”, Klement Xhaferri, është në një masë sigurie arrest shtëpie.
Krimi në Elbasan dhe roli i Qazim Sejdinit
Policia e Elbasanit nuk guxon as të zerë në gojë emrat se kush e goditi makinën e zv/drejtorit të Policisë Elbasan apo kush janë krerët e grupeve kriminale të drogës në këtë qytet. Lapsi.al publikoi para pak ditësh reagimin e gazetarit të kronikës që e njeh me detaje problematikën e Elbasanit, Flamur Vezaj, i cili në një postim në Facebook shkruante se, vrasjet mes grupeve kriminale që kontrollojnë trafikun e drogës vazhdojnë të terrorizojnë këtë qytet. Nga ana tjetër, ai thekson se, policia është e pafuqishme të ndërhyjë, pasi i përfshirë në luftën mes bandave është edhe dhëndri i kryetarit të Bashkisë, Qazim Sejdini. Kryebashkiaku Sejdini ruhet nga Forcat Speciale 24 orë në 24 për shkak të problemeve të dhëndrit të tij.
“Operacioni “xhiroja e fundit” në Elbasan! Sa keq më vjen për Gjergj Oshafin dhe shefin e tij Arben Dashin, që drejtojnë Policinë në këtë kohë në Elbasan. Për shkak se kriminelëve në atë qark, politika i ka dhënë pushtet! Shpesh kemi dëgjuar, kryesisht nga opozita se dhëndëri i kreut të Bashkisë është person me precedent të rrezikshëm kriminal!
Kjo thuhet edhe në dosjen e tij personale, që Policia e disponon! Për këtë fakt dhe shumë të tjera, edhe vjehrrit të tij (kreut të Bashkisë) politika me ndihmën e Policisë i ka vënë mbrojtje shtesë 24 orë me efektivë të Forcave Speciale të Policisë! Nëse nuk do ishte i lidhur me krimin apo i rrezikuar nga kriminelët pse duhet të ruhet një kryetar Bashkie, kush e ka kërcënuar?!
Këtë përgjigje nuk e kam marrë asnjëherë nga Policia apo edhe Prokuroria… nën zë të gjithë e pranojnë se, “kreu i Bashkisë së Elbasanit ruhet për shkak të problemeve të dhëndrit”…
Nuk është vetëm ky problemi në Elbasan, janë vrasjet që po vazhdojnë të terrorizojnë këtë qytet. Si masakra e pazbuluar ndaj familjes Çapja, atentatet e ndryshme mes qytetit dhe të gjitha pa autor se Policia nuk është në gjendje, kjo falë edhe ndërhyrjes së politikës, të provoi e zbuloi autorët!
Gjithashtu, dihet tashmë prej vitesh se Elbasani është bërë si qendër e grumbullimit dhe përpunimit të drogave të forta që hyjnë nga Maqedonia dhe Greqia e më pas që përfundojnë në vendet e BE-së. Kjo për faktin se disa “biznesmenë” të këtij qyteti (që njihen nga vendasit) kanë ngritur prej vitesh rrjetin e trafikut të drogave të forta në Itali e Holandë e që vazhdojnë të punojnë të pashqetësuar nga Policia (që i di emrat)!
Për ta mbyllur, i kthehem përsëri politikës, se është kjo e fundit, që ka lejuar përsëri që në Parlament të hyjnë deputetë të kësaj zone me të kaluar të errët kriminale dhe që i japin mbështetje të fortë krimit që të lulëzojë jo vetëm në qytetin e Elbasanit”, shkruan ai.
LSDM dhe VMRO joshin votuesit shqiptarë
Gara politike në Maqedoni ka filluar. Kreu i BDI-së, Ali Ahmeti, ka theksuar se kandidatët e partisë së tij kanë projekte të shumta për zhvillimin e komunave dhe se theksi kryesor gjatë fushatës do të jenë projektet e infrastrukturës, që sipas tij do të përmirësojnë jetën e qytetarëve nëpër komuna.
Ahmeti: Ndajmë një hapësirë të përbashkët
Ahmeti gjithashtu ka folur për partneritetin dhe marrëveshjen e arritur me LSDM-në. “Qëllimi është që ne të krijojmë klimë dhe të japim porosi për qytetarët se këta qytetarë ndajnë fatet dhe jetojnë nën qiell dhe hapësirë të përbashkët, andaj mendohej se duhet që edhe politikisht të afrohen mes vete, rreth një kandidati shqiptar, rreth një kandidati maqedonas. Në këtë drejtim ne kemi investuar dhe do të investojmë”, ka deklaruar kryetari i BDI-së, Ali Ahmeti.
Aleanca: Rinia – aseti më i fuqishëm
Lideri i Aleancës për Shqiptarët, Ziadin Sela, njëherazi edhe kandidat për kryetar në Komunën e Strugës ka theksuar se rinia shqiptare është aseti i tij më i fuqishëm në zgjedhjet e 15 tetorit.
“Një gjë është e vërtetë, çdo gjë që e kemi bërë e kemi bërë në emrin e rinisë, në emër të perspektivës që duhet ta kenë gjeneratat e reja këtu në vendlindjen e tyre”, ka theksuar Sela në hapjen e fushatës
Besa: Vëmendje problemeve në terren
Nga Lëvizja Besa, partia më e madhe e opozitës shqiptare, thonë se programi i tyre kryesisht ka të bëjë me nevojat e shqiptarëve në nivelin lokal, që sipas tyre, janë në gjendje të rëndë nga qeverisja e keqe e drejtuesve të tyre nga BDI-ja e Ali Ahmetit. “Lëvizja Besa programin e saj për zgjedhjet lokale e ka projektuar në pesë shtylla; shtylla e parë është që të çlirohen komunat nga borxhet, korrupsioni, mafia urbane, pika tjetër ka të bëjë me zhvillimin ekonomik, stimulimin e ndërmarrjeve të vogla dhe të mëdha përmes tërheqjes edhe të investitorëve të jashtëm, si dhe pika tjetër që ka të bëjë me sportin dhe rekreacionin”, thotë Faton Fazliu, nga Lëvizja Besa.
PDSH: Interes që shqiptarët të fitojnë në zonat e tyre
PDSH që drejtohet nga Menduh Thaçi thotë se pala maqedonase përmes partnerëve shqiptarë në qeveri synon të ngushtojë hapësirat e banuara me shqiptarë. “Ne jemi jashtëzakonisht të interesuar që shqiptarët në këto zgjedhje së bashku me aleatët e tyre, të ngadhënjejnë në të gjitha territoret e tyre. Klani i maqedonasve punon me shumë angazhim që në këto zgjedhje në disa komuna, ku nuk janë shumicë të fitojnë kandidatët e tyre. Ata duan që ta shtrydhin territorin, ta zvogëlojnë territorin ku jetojnë shqiptarët, që territori i maqedonasve të rritet në 93 apo 94 për qind”, ka deklaruar Thaçi në konventën partiake.
LSDM dhe VMRO- synim votat e shqiptarëve
Dy partitë kryesore maqedonase LSDM dhe VMRO në këtë fushatë për zgjedhjet lokale si asnjëherë më parë synojnë votat edhe në vendbanimet shqiptare. Retorika e tyre është zbutur tejmase, ata flasin për shqiptarët dhe të drejtat e tyre elementare. Lidhja Social-Demokrate që drejton qeverinë, edhe në pushtetit lokal do të vazhdojë me retorikën e zgjedhjeve të fundit parlamentare duke u angazhuar për një shoqëri për të gjithë.
LSDM: Shoqëri për të gjithë
LSDM-ja pretendon që këtë koncept ta zhvillojë në partneritet me BDI-në e Ali Ahmetit, me të cilën është në koalicion qeveritar. “Këto zgjedhje janë zgjedhje të personaliteteve dhe me të drejtë qytetarët kërkojnë kuadro me kualitet të lartë, për të cilët do të votojmë. Ne duam që konceptin tonë për jetë në Maqedoni, apo një shoqëri për të gjithë, ta vazhdojmë edhe në nivelin lokal. Ne ofrojmë zgjidhjet më të mira, si me kandidat ashtu edhe me programe. Ne si partner qeveritar do ta mbështesim njëri-tjetrin në disa komuna”, ka deklaruar Zoran Zaev, kryeministër dhe kryetar i LSDM-së. Kjo parti ka nxjerrë edhe kandidatë shqiptarë në disa komuna, në të cilat shënoi rezultat të mirë në zgjedhjet e 11 qershorit.
VMRO-DMPNE: Oferta jonë kundër kaosit të LSDM-së
Kryetari i VMRO-DPMNE-s Nikolla Gruevski thotë se oferta e tyre, përkushtimi, përgjegjësia dhe dija do të jenë përgjigja më e mirë për kaosin dhe pasigurinë që e ka shkaktuar LSDM-ja.
“Maqedonia do të kthehet në rrugën e suksesit dhe zhvillimit dhe atë rrugë do ta udhëheqim ne së bashku me qytetarët. Këto zgjedhje janë një mëngjes i ri për të gjithë ne”, ka deklaruar Nikolla Gruevski, kryetar i VMRO DPMNE-së opozitare.
Fushata elektorale për zgjedhjet e 15 tetorit zgjat 20 ditë. Në garë për drejtimin e 80 komunave dhe Shkupin si njësi e veçantë e pushtetit lokal marrin pjesë 19 parti politike dhe koalicione si dhe disa lista të kandidatëve të pavarur për këshilltar komunal.
Dy anët e medaljes të zgjedhjeve gjermane
A do të ndikojnë zgjedhjet e fundit në Gjermani në përmirësimin e këtij vendi apo në përkeqësimin e tij? Nuk duhet që të hamendësoni fare, por të vendosni nëse jeni pjesë e grupit të optimistëve apo pjesë e grupit tjetër, atij të pesimistëve
Gjermania e pesimistëve
Të djathtët e Gjermanisë, një parti kryesisht e përbërë nga neonazistë të vërtetë, është në rrugën e duhur për të zënë 93 vende në Parlament, madje në shtetin e Saksonisë, ajo doli e para në renditje, me kandidatin e saj, i cili lobon fort dhe me bindje kundër “popujve të përzier” dhe “kultit të fajit” të Gjermanisë për Holokaustin. Edhe mesazhet politike të këtij grupi pritet që të përhapen edhe më tej sesa godinës së Parlamentit gjerman, ku ata kanë një numër të madh anëtarësh. Dhe është vetëm një çështje kohe derisa ajo të bashkohet me një koalicion në nivel shtetëror. Diskutimi i fundit televiziv pas zgjedhjeve midis Christian Lindner, liderit të Partisë së Demokratëve të Lirë dhe Angela Merkel, ishte edhe fillimi i një periudhe të re të mosmarrëveshjeve politike në një vend që dikur cilësohej si më harmoniku në këtë drejtim.
Pas përjashtimit nga ana e social-demokratëve për një koalicion të mundshëm, Angela Merkel nuk i mbetet gjë tjetër veçse të formojë një koalicion me partinë FDP, të liberalëve të djathtë dhe me ambientalistët e Partisë së Gjelbër, të cilët gjatë javëve të fundit nuk kanë bërë gjë tjetër përveçse të sulmojnë njëri-tjetrin. Bashkimi Social Kristian, partia simotër bavareze e CDU, duket se i ka dhënë fund armëpushimit të saj parazgjedhor dhe tani duket më i guximshëm se kurrë. Ndërkohë me FDP-në euroskeptike në Ministrinë e Financave, bisedave optimiste të boshtit të ri franko-gjerman mund t’i vijë shumë shpejt fundi. Gjermania është duke hyrë në një periudhë paqëndrueshmërie politike, dhe sikur të mos mjaftonte një gjë e tillë, në këtë shtet po rriten edhe probleme të fushave të tjera. P.sh, industria e fuqishme e makinave është në krizë.
Gjenerata “baby boomer” është në prag të daljes në pension. Infrastruktura sa vjen e po përkeqësohet. Kërkesat që Gjermania të rrisë nivelin e saj të sigurisë ndërkombëtare po rriten gjithnjë e më shumë. Integrimi i mbi 1 milion emigrantëve që hynë në këtë shtet gjatë periudhës që znj. Merkel në mënyrë të vetëdijshme i mbajti hapur dyer e vendit, ka nevojë për zgjidhje më efikase edhe pse është akoma në fazat e tij të para. Retë e errëta që po mbulojnë këtë vend po shtohen gjithnjë e më shumë.
Gjermania e optimistëve
Gjermania ka mirëpritur më shumë se 1 milion njerëz në dy vitet e fundit. Në këtë drejtim, duhej të kishte pasur një reagim, sidomos duke marrë parasysh mënyrën se si znj. Merkel e trajtoi vendimin, duke e miratuar ligjin për emigrantët në minutën e fundit, pa shumë konsultime dhe pa marrë aspak parasysh opinionin e popullit të saj. Ndërkohë gjatë fushatës, ajo bëri edhe disa gabime shumë të rëndësishme, një ndër të cilat është etiketimi i saj si intelektualisht dembele, në vend që të angazhohej dhe të ishte pjesë e debateve të ashpra politike. Ajo i nënvlerësoi votuesit e saj dhe prandaj edhe pagoi çmimin përkatës për një gabim të tillë, duke marrë si trofe rezultatin më të dobët të arritur ndonjëherë, në krahasim edhe me ato të vitit 2005 dhe ato të vitit 2009. Risia e këtyre zgjedhjeve është fuqia që morën partitë e vogla, pas gati 12 viteve gjatë të cilave Merkel ka qeverisur me koalicione të mëdha, të tilla si ai i SPD-së. Në shumë aspekte, ky copëzim është edhe një përgjigje e duhur ndaj kësaj politike të lodhur. Rezultati mund të risigurojë edhe demokracinë gjermane.
Partia Socialdemokrate po kthehet në opozitë, ku z. Schulz së bashku me energjinë dhe idetë e tij moderniste dhe me mbështetjen e anëtarëve të tij, ku mund të përmendim edhe nënkryetaren e saj, Manuela Schëesig, mund t’i krijojnë mundësinë partisë së tyre për të fituar zgjedhjet e ardhshme në vitin 2021. Kjo mund të nxjerrë në dritë edhe partinë populiste euroskeptike të djathtë, Alternativa për Gjermaninë, e cila do të detyrohet që si pasojë e rreptësisë së legjislaturës, të tjetërsojë pjesët e koalicionit të saj zgjedhor (“marrëdhënia midis Alternativës për Gjermaninë dhe votuesve të saj të dobët”), vë në dukje Cas Mudde. Ndërkohë që koalicioni i ashtuquajtur “Xhamajka”, që znj. Merkel duhet ta ndërtojë tani, mund të shkaktojë tronditje në konsensusin e përgjumur të Gjermanisë, me Partinë e Gjelbër të ambientalistëve në përkrahje të makinave elektrike dhe energjisë së rinovueshme dhe me FDP-në që do të mundohet të reduktojë sa të mundet burokracitë e shumta dhe të zhvillojë më tej dixhitalizimin. Shumë prej diferencave ndërmjet Partisë së Gjelbër të Ambientalistëve dhe FDP-së ishin thjesht ekzagjerime gjatë fushatës zgjedhore.
Gjithsesi e gjithë kjo situatë zgjedhore në Gjermani ka të bëjë me të vërtetën që qëndron midis pesimizmit dhe optimizmit. Por pyetja më e rëndësishme në këtë drejtim është, ndaj cilës ajo afrohet më shumë, kahut të pesimistëve apo atij të optimistëve? Përgjigjja e kësaj pyetje nuk është e lehtë për t’u dhënë, sepse rezultati i zgjedhjeve është shqetësues në disa aspekte, sidomos në lidhje me Partinë Alternativa për Gjermaninë. Edhe qetësia parazgjedhore në Gjermani ishte thjesht një iluzion shumë i bukur, sepse zemërimi prej vitesh ishte i pranishëm në popull dhe suksesi i fundit i partisë “Alternativa për Gjermaninë” e nxori atë në dritë.
Përpjekja e Ramës për të zhbërë shtetin vazhdon!
Jorida Tabaku
Qeveria e sotme në pranverën e vitit 2013 votoi Ligjin e Nëpunësit Civil, iu desh shumë kohë për të bindur kryetarin e djeshëm të opozitës që të votonte një nga kushtet e BE-së, shumëkush nga të majtët mendoi se Rama nuk dëshironte t’i jepte suksesin që i takonte qeverisë Berisha. Por, historia provoi diçka edhe më të hidhur. Kryeministri Rama nuk e ka pasur synim integrimin e vendit në BE dhe për vite me radhë u ka shitur shqiptarëve dokrra hiri për përpjekjen e tij mbi integrimin.
E nisi ofensivën e tij ndaj integrimit, duke ndryshuar që ditët e para në pushtet ligjin që po vetë kish urdhëruar ta votonin. Vazhdoi sulmet, duke shkatërruar administratën publike dhe duke zhdukur memorien institucionale, ngarkoi buxhetin e shtetit me miliona dollarë detyrime karshi nëpunësve që i përzuri nga detyra në mënyrë antiligjore.
Pastaj, kur gjithçka dukej se qe e përfunduar kërkoi tepsinë e plotë të qeverisë për të bërë siç ia do qejfi me administratën dhe integrimin e vendit. Sot, thikën për të ndarë pushtetin ia ka dhënë partisë. Punësimet në kundërshtim me ligjin u vërejtën që tek emërimet pa konkurs të sekretarëve të përgjithshëm të ministrive. Sipas ligjit të votuar edhe nga PS, këto pozicione janë niveli më i lartë i administratës publike dhe duhet të ndjekin hapat e përshkruara nga ligji për t’i punësuar. Por ligji nuk ekziston!
Prandaj, ndërsa dëgjoni kryeministrin që të ligjërojë në publik se, shqiptarët nuk duhet të kërkojnë punë në shtet, duhet të kini parasysh se ai po ju thotë se “puna në shtet vjen nëse ke teserën e PS-së dhe nëse udhëheqësit e partisë të përzgjedhin për të hyrë”. Për qeverinë, nuk ka rëndësi aftësitë e individit apo dhe meritokracia, qëllimi i qeverisë është ta mbushë administratën me shërbëtorë partie qoftë edhe të nivelit mediokër. Për kryeministrin, kushti i BE-së për një administratë të depolitizuar është një çarje koke, sikundër edhe vetë integrimi në Europë është shndërruar kohët e fundit për të.
Ndërkohë që shpresat e të rinjve dhe qëllimit të një politike mbi 17-vjeçare për të ndërtuar një administratë dinjitoze që jo vetëm të merret me procesin integrues, por edhe të hedhë themelet për një shtet edhe pas shumë vitesh; ato kanë marrë goditjen e rëndë. Përpjekja për të zhbërë shtetin vazhdon!
PD akuzon Nikollën: Punësohet në arsim kush dorëzon zarfin
Opozita në Komisionin e Edukimit ngritën përpara ministres Nikolla një sërë shqetësimesh që lidhen me emërimet dhe largimet politike të mësuesve, klasat kolektive dhe braktisja e shkollës nga 22 mijë nxënës. Vali Duka: Mësueset të cilat punojnë në shkollat e Korçës, kanë pasur frikë të takojnë deputetët e opozitës. Emërimet janë politike. Emërimet e drejtorëve janë superpolitike. “Ulja e numrit të nxënësve na qenka për shkak të uljes së lindjeve. Nuk e keni pranuar fenomenin e azilimit, por ka zona të tëra që juve i keni shpopulluar. Është një akuzë që ne do të vazhdojmë ta bëjmë” është shprehur deputetja demokrate Albana Vokshi. Ministrja Nikolla mohoi emërimet dhe shkarkimet politike nga shkolla duke thënë se 3500 mësues janë emërtuar nga portali Mësues për Shqipërinë.
Mashtrimi i qeverisë me rimbursimin e librave
Jo vetëm që rriti çmimet e teksteve shkollore, por qeveria nuk po rimburson familjet me ndihmë ekonomike në blerjen e librave për fëmijët e tyre. Denoncimet vijnë nga vetë prindërit sipas të cilëve ata po mashtrohen nga strukturat përkatëse që duhet të bëjnë rimbursimin e pagesës së librave shkollorë. “I Nderuar Zoti Berisha jam nga Vlora. Çupa ime është në klasën e 6 me rezultate të shkëlqyera, jetojmë me një ndihmë ekonomike 40 lekë në muaj. Unë jam kryefamiljare dhe pasi brodhëm nëpër Vlorë se mezi i gjetëm dyqanet e librave se ishin mbyllur që të mos paguanin taksat, edhe kuponat mezi na i jepnin, jo hajde sot, nesër jo ta jap, jo nuk më punon kasa etj., na detyronin të merrnim edhe libra që fëmijëve nuk ju duheshin, sot drejtoresha e shkollës jua kishte thënë fëmijëve me të drejtë që pse i blen vetë, lekët ne që jemi me ndihmë ekonomike nuk na i kthejnë psh., Librat kushtuan 76 mijë lekë na japin 20. Tjetra, shkolla ka 15 ditë që ka filluar, fëmijëve u kanë filluar tu grisen librat, me një fjalë arsimi është për tokë”, thuhet në denoncimin e publikuar nga ish-kryeministri Berisha. Krahas këtij denoncimi, prindër të tjerë kanë denoncuar rritjen e çmimit të teksteve shkollore, paçka se nga ana e Ministrisë së Arsimit u deklarua se çmimet do vijonin të ishin po të njëjtat. Këtë vit, pavarësisht deklaratave të Ministrisë së Arsimit se çmimet do të jenë po të njëjtat, ndihet një rritje e ndjeshme e tyre. Ndryshe nga sa ishte lajmëruar nga Ministria e Arsimit, shitja e librave për nxënësit e shkollave 9-vjeçare dhe të mesme nis ditën e hënë. Ndërkohë, shkollat kanë afishuar listat me librat që prindërit duhet t’u blejnë fëmijëve dhe çmimin përkatës që varion nga 1,825 lekë për klasat e para në 4.295 lekë për klasat e 9. Por edhe pse çmimi i shitjes nuk ka ndryshuar për shumë prej librave krahasuar me vitin e kaluar, të afërmit e nxënësve shprehen për mediat se çmimet aktuale janë të larta dhe të papërballueshme.
Kryesore
Continue to the category
