Në Stamboll fillon këtë të mërkurë procesi kundër aktivistit gjerman për të drejtat e njeriut, Peter Steudtner dhe 10 të akuzuarve të tjerë. Mes tyre edhe drejtoresha e Amnesty International për Turqinë, Idil Eser dhe kryetari i organizatës, Taner Kilic. Dhjetë vetë akuzohen për “mbështetje të një organizate terroriste”. Ndërsa Kilic duhet të përgjigjet për akuzën e anëtarësisë. Të akuzuarit rrezikohen nga 15 vite burg.
Kilic u arrestua në fillim të qershorit në Izmir, të tjerët në fillim të korrikut në një seminar të Stamboll. Arrestimi i aktivistëve të Amnesty International ndeshi në reagime të forta kritike ndërkombëtare. Qeveria gjermane e cilësoi arrestimin e Steudtner të pakuptueshëm dhe kërkon lirimin e tij. Pas këtij arrestimi ajo bëri të ditur orientimin e ri të politikës gjermane. Amnesty i hedh poshtë akuzat në aktpadi si të padrejta dhe poshtëruese.

Merkel takon bashkëshorten e Deniz Yücel
Peter Steudtner është njëri nga të paktën 11 gjermanët që ndërkohë qëndrojnë në burgjet turke për arsye politike. Këtu bën pjesë edhe korrespondenti i gazetës gjerman “Die Welt”, Deniz Yücel. Kancelarja gjermane, Angela Merkel u takua të martën me bashkëshorten e tij. Zëdhënësi i qeverisë, Steffen Seibert u shpreh, se Merkel ka folur me Dilek Mayatürk Yücel për gjendjen e Deniz Yücel në burg. Takimi u zhvillua në zyrën e Merkelit në Parlamentin gjerman. Yücel qëndron në paraburgim, kundër tij ende nuk është ngritur padia. Avokati i tij, Veysel Ok kritikoi faktin, se dosjet e Yücel mbahen të mbyllura dhe “për këtë arsye nuk e dimë ende, se çfarë hetimesh zhvillohen për të”.

Qeveria rajonale kurde e Irakut, ka ofruar “pezullimin” e rezultateve të referendumit për pavarësi nga Iraku, për të parandaluar dhunën dhe për të mbështetur dialogun me Bagdadin.
“Luftimet e vazhdueshme, nuk çojnë në fitoren e asnjërës palë, por do ta drejtojnë vendin në rrëmujë dhe kaos, që ndikon në të gjitha aspektet e jetës së qytetarëve”, ka thënë qeveria kurde përmes një deklarate.
Qeveria ka ofruar “armëpushim të menjëhershëm” në rajonin kurd, pezullim të rezultateve të referendumit dhe “dialog të hapur” me qeverinë federale në Bagdad. Kurdët kanë mbështetur pavarësinë nga Iraku, në referendumin e mbajtur më 25 shtator, votë kjo që është cilësuar si jo ligjore nga Bagdadi.

Zëvendës ndihmës sekretari amerikan i Shtetit, Hoyt Brian Yee, tha në Beograd se vendet që duan të anëtarësohen në Bashkimin Evropian duhet ta dëshmojnë qartazi një gjë të tillë.
Duke folur në një forum mbi ekonominë në Serbi, ai komentoi politikën zyrtare serbe që angazhohet për anëtarësim në Bashkimin Evropian, por edhe ruajtjen e lidhjeve me Moskën, aleaten e Serbisë.
“Nuk mund të qëndroni ulur në dy karrige, posaçërisht nëse ato janë larg njëra-tjetrës”, tha ai, duke nënvizuar se kjo nuk është normë në bashkësinë ndërkombëtare.
Ai tha se, synim i Shteteve të Bashkuara është që Serbia të jetë e përparuar, e qëndrueshme, e sigurt dhe e integruar në Bashkimin Evropian, prandaj ajo duhet të punojë me nismat që e afrojnë me BE-në.
“U propozoj partnerëve tanë në Serbi që të pyesin Rusinë se çfarë bën ajo që ta ndihmojë në rrugën drejtë BE-së. Nuk besoj se dhënia e imunitetit diplomatik për personelin e qendrës (humanitare ruse) do të ndihmonte Serbinë që të përmbushë synimin e saj për anëtarësim në Bashkimin Evropian”, tha diplomati amerikan.
Shtetet e Bashkuara kanë shprehur shqetësim për një qendër të emergjencave që Rusia menaxhon në qytetin e Nishit në Serbinë jugore. Disa grupe perëndimore dhe analistë ushtarakë e shohin si një bazë ushtarake të kamufluar që Kremlini e ka ngritur për të mbikëqyrur interesat amerikane në Ballkan.
Qendra ruse që u hap fillimisht në vitin 2012, gjendet relativisht pranë forcës paqeruajtëse prej 4 mijë trupash në Kosovë. Pjesë e forcave ndërkombëtare në Kosovë janë edhe 600 ushtarë amerikanë.
Moska kërkon që personelit të saj t’i jepet imunitet diplomatik, ndërsa mohon çfarëdo veprimtarie të saj përveç trajtimit të emergjencave.
Moska vazhdon të mbështesë pretendimet serbe mbi Kosovën dhe refuzon sikurse edhe Serbia të njohë pavarësinë e saj të shpallur në shkurt të vitit 2008. Ajo i dorëzoi javën që lamë pas gjashtë avionë ushtarakë MiG-29 Serbisë, ndërsa pritet që të dërgojë në Beograd edhe 30 tanke T-72 dhe 30 automjete të blinduara.
Megjithatë Beogradi është përfshirë në një proces bisedimesh për normalizimin e marrëdhënieve me Kosovën në shkëmbim të afrimit me strukturat evropiane. Zoti Hoyt Yee tha se Shtetet e Bashkuara janë të përfshira që nga fillimi në bisedimet ndërmjet Kosovës dhe Serbisë që drejtohen nga Bashkimi Evropian.
Pjesëtarë të shoqërisë civile, por edhe diplomatë perëndimorë janë shprehur të shqetësuar se Serbia po zhvillon një proces të ngadalshëm për ripajtimin në rajon, që është një prej kritereve për integrimet evropiane.
Javën e kaluar ministri serb i Mbrojtjes, Aleksandër Vulin, tha se gjenerali i pensionuar serb, Vladimir Lazareviç, i dënuar nga Gjykata e Hagës me 14 vjet heqje lirie për krime lufte në Kosovë mund të jap mësim në Akademinë Ushtarake në Serbi.
Zëvendës ndihmës Sekretari amerikan i Shtetit, Hoyt Brian Yee, tha se ideja që “dikush i cili është dënuar për krime lufte mund të jetë ligjërues në Akademinë Ushtarake, nuk është shenjë e mirë e orientimit të qeverisë që të dënohen krimet e luftës. E kanë vuajtur apo jo dënimin, ata janë përgjegjës”, u tha ai gazetarëve në Beograd.
Ai tha se Shtetet e Bashkuara duan që vendet e Ballkanit perëndimorë të jenë të qëndrueshme. “Ende ka rrezik nga konfliktet kudo ku ka probleme të pazgjidhura. Megjithatë, rrjedha e përgjithshme sa i përket paqes e qëndrueshmërisë është pozitive”.

Presidenti i Gjermanisë, Frank-Walter Steinmeier udhëtoi dje drejt Moskës. Me këtë ai vazhdon një traditë që u ndërpre nga paraardhësi i tij. Të gjithë presidentët e Gjermanisë e konsideronin detyrim të tyre që të bënin një vizitë mirësjelljeje në Rusi. Përjashtim bëri Joachim Gauck, i cili ishte President prej viteve 2012 deri 2017. Gauck-u, një ish-aktivist i të drejtave të njeriut të RDGJ dhe prift protestant ndjente një antipati të madhe ndaj shefit të Kremlinit, Vladimir Putin, një ish-punonjës i KGB. Këtë Gauck-u nuk e fshihte. Të dy u takuan vetëm një herë. Kjo ndodhi në verë 2012, kur Putini ndaloi në Berlin në udhëtimin e tij për në Paris.

Përpjekjet e shërbimeve të protokollit të të dyja vendeve, që të organizonin një vizitë të Gauck-ut në Moskë qenë të vogla. Në Berlin flisnin për vështirësi për të gjetur një datë të lirë. Por qarkullonte edhe fjala se pas pritjes së ftohtë në Berlin, Putini nuk kishte ndonjë dëshirë të zjarrtë që të takohej me Gauck-un në Berlin.

Udhëtim në kontekst të konfliktit të Ukrainës

Frank-Walter Steinmeier ushqen ndjenja miqësore për Rusinë. Edhe më tepër, njerëz që e njohin mirë, thonë se ai bën pjesë te ata gjermanë, të cilët e trajtojnë herë pas here Rusinë me respekt të thellë dhe që kanë simpati të madhe për të. Nuk është rastësi që kur ishte ministër i Jashtëm, Steinmeieri udhëtonte çdo vit në Jekaterinenburg ku mbante leksione në universitetin e Uralit dhe gëzohej sinqerisht për bisedën me studentët.

Njëkohësisht, Steinmeieri ka qëndrim kritik ndaj Presidentit rus, Vladimir Putin. Ai nuk fsheh as zhgënjimin e tij për Sergej Lavrovin, me të cilin ka kaluar shumë orë diskutimi në negociatat në “formatin e Normandisë” në nivelin e ministrave të jashtëm dhe me të cilin u përpoq të gjente një zgjidhje politike për konfliktin në Ukrainën Lindore.

Në kontekstin e këtij konflikti duhet parë edhe vizita e tij e tanishme në Moskë. Zyra presidenciale thekson edhe shprehimisht se nuk bëhet fjalë për një vizitë shtetërore, por për një vizitë pune. Në përputhje me këtë është konceptuar edhe programi.

Pas vendosjes së një kurore në varrin monumental të Ushtarit të Panjohur, Steinmeier do të takohet me përfaqësues të organizatës ruse të të drejtave të njeriut “Memorial”. Pastaj ai do të takohet në rezidencën e ambasadorit gjerman me Michail Gorbaçovin.

Qëndrimin e tij shumë kritik ndaj mënyrës së veprimit të Rusisë në Krime dhe në Lindje të Ukrainës, Presidenti gjerman nuk e ka braktisur. Nuk është rastësi që më parë ai udhëtoi në Shtetet Baltike, ku e quajti sërish në kundërshtim me të drejtën ndërkombëtare aneksimin e gadishullit ukrainas të Krimesë nga Rusia. Veç kësaj, ai u premtoi Estonisë, Letonisë dhe Lituanisë mbështetje gjermane në garantimin e sigurisë nacionale dhe në bashkëpunimin në NATO.

Pasaporta e Kosovës është radhitur në vendin e 85-të në botë, në raportin e përvjetshëm “Global Passport Index”.
Kategorizimi është bërë në bazë të numrit të vendeve, në të cilat një shtetas i caktuar mund të udhëtojë pa pasur nevojë për vizë.
Vendin e 85-të Kosova e ndan me Mianmarin [Birmaninë]. Pasaporta më e “fuqishme” është cilësuar ajo e Singaporit, e pasuar nga ajo e Gjermanisë dhe Suedisë. Vendin e fundit, të 94-të, e ka zënë pasaporta e Afganistanit.
Pasaporta e Kroacisë është renditur në vendin e 14-të, ajo e Serbisë ka zënë vendin e 38-të, e Maqedonisë është në vendin e 41-të, pasaporta e Mali të Zi gjendet në vendin e 43-të, e Bosnjë dhe Hercegovinës në vendin e 46-të dhe pasaporta e Shqipërisë është renditur në vendin e 48-të.

Presidenti i SHBA Donald Trump u takua me republikanët në Senat, duke shpresuar t’i bindë ata të miratojnë planet e tij për të ulur taksat për korporatat dhe klasën e mesme, ndërkohë që ka shkëmbyer deklarata thumbuese me një senator të njohur, Bob Corker nga shteti Tenësi.
Presidenti Trump priti në një drekë pune ligjvënësit, përfshirë zotin Corker, ndërsa është intensifikuar debati për reformën e tij në sistemin e taksave.
Javën e kaluar senati miratoi një buxhet që me gjasë do të çojë në 1.5 trilionë dollarë shkurtime në taksa gjatë dekadës së ardhshme dhe që do t’i shtonte të njëjtën sasi borxhit kombëtar të vendit prej 20 trilionë dollarësh. Presidenti Trump ka bërë thirrje për miratimin e projekt-ligjit të taksave deri në fund të vitit.
Por, Kongresi i kontrolluar nga republikanët ende nuk është pajtuar me disa ndryshime në sistemin e taksave rreth dispozitave që duhen mbajtur apo shfuqizuar, për të cilat po diskutohet në mënyrë intensive prapa dyerve të mbyllura. Presidenti Trump ka thënë se ligjet për pensionet qeveritare për amerikanët e moshuar dhe ato për llogaritë e kursimit për pension nuk do të ndryshojnë.
Senatori Corker, i cili do të tërhiqet nga Kongresi pas zgjedhjeve të vitit 2018 dhe është bërë një kritik i vazhdueshëm i presidentit, tha për rrjetin ABC Neës se zoti Trump duhet t’ia lërë në dorë ndryshimet në ligjin e taksave komisioneve të kongresit dhe jo “të përjashtojë kategori të ndryshme” që ia kufizojnë mundësinë ligjvënësve për të rënë dakord mbi një plan.
Zoti Corker tha se nuk ka parë vullnetin, aftësinë dhe angazhimin e presidentit Trump për të miratuar një reformë të sistemit të taksave.
Përmes postimeve në Twitter, duke iu kundërvënë senatorit, presidenti Trump tha se “senatori Corker ndihmoi në përgatitjen e marrëveshjes së keqe me Iranin”, “nuk arriti të zgjidhej për një post politik në Tenësi”, “u tërhoq nga gara kur unë nuk e mbështeta më” dhe “tani po lufton kundër shkurtimit të taksave”.
Senatori Corker iu përgjigj po në Twitter duke thënë “Të njëjtat të pavërteta, nga një president që nuk thotë asnjëherë të vërtetën”.
Më pas ai i tha rrjetit CNN se “presidenti ka problem të madh me të vërtetën”.