Ngjarjet në gjirin e partisë kryesore të opozitës pas humbjes së thellë të 25 Qershorit kanë treguar një realitet që duket i pandryshueshëm. Lulzim Basha humbi zgjedhjet e 25 Qershorit thellë, por fitoi garën brenda Partisë Demokratike edhe më thellë sesa në vitin 2013.
Fitorja e tij duket se e ka përcaktuar fatin e Bashës në krye të partisë për së paku 4 vite të tjera, por shumë veta dyshojnë se jetëgjatësia e tij do të jetë edhe më e madhe, pavarësisht rezultatit të zgjedhjeve, qoftë lokale të 2019, qoftë atyre të përgjithshme politike të vitit 2021. E megjithatë, kritikat ndaj tij vazhdojnë, madje në mënyrë të ashpër. Tashmë ka shumë pikëpyetje në opinionin publik lidhur me atë se çfarë realisht kërkojnë kritikët e tij, ata që s’morën pjesë në garë kundër tij në korrik, por edhe ndonjë prej tyre që riskoi gjithçka, duke u bërë pjesë e saj, si Eduard Selami.
I ftuar në “Top Story”, Selami theksoi se gara në Partinë Demokratike “nuk nisi si e barabartë, por ishte gjëja e duhur për t’u bërë”.
“Pavarësisht se kishte mangësi e manipulime dhe pavarësisht se Basha nuk është prononcuar ende për këtë fakt për turpin e tij, unë prapë i uroj suksese dhe shpresoj që PD të fitojë zgjedhjet e radhës. Unë i qëndroj asaj që nuk bojkotohet partia. Kritikët nuk i shërbyen as vetes dhe as Partisë Demokratike. Kam thënë që fushata ishte e pabarabartë dhe e padrejtë, por unë sërish e njoh legjitimitetin e zotit Basha, sepse mendoj se është në të mirë të forcës sime politike”, deklaroi Selami.
Në lidhje me kritikat e Sali Berishës mbi listën e PD-së, Selami u shpreh: “Nuk besoj se lista është bërë pa bekimin e Berishës. Kritikat që i ka bërë Bashës janë të vonuara, por të drejta. Por, për mendimin tim, nuk besoj se lista që paraqiti Lulzim Basha është bërë pa miratimin e Sali Berishës”.
Selami, i cili nënvizoi gjithashtu se “Partia Demokratike sot është më pak demokratike sesa në fillimet e saj”, theksoi se “është krenar” që është pjesë e kësaj partie.
Eduard Selami deklaroi nga studio e “Top Story” se ka ardhur koha që të ulet zëri kritik në Partinë Demokratike tani që Lulzim Basha u zgjodh sërish në krye të saj.
“Nuk jam dakord me bojkotin siç u bë. Tani duhet ulur pak zëri, sepse Basha u zgjodh tashmë. Edhe Basha dhe kritikët duhet të zbuten. Basha duhet të telefononte Patozin, Bregun dhe Topallin e të fliste me ta. Unë them që Basha duhet të mblidhte grupin e vjetër parlamentar dhe të bënte kalimin e stafetës. Këtu humbi një rast”, tha Selami, i cili sqaroi se nuk do të kandidojë për asnjë post në PD.
“Unë do të jap kontributin tim maksimal për Partinë Demokratike, por nuk do të kandidoj për asnjë lloj posti në parti. Basha më ka në dispozicion. Kontributi nuk janë vetëm funksionet apo postet”, tha Selami.
Në fund, Selami theksoi se “suksesi i Bashës është suksesi jonë i përbashkët”.
Selami, mesazhe për bashkim në PD
Haradinaj-Basha: PD, rol në zhvillimet pozitive në Kosovës
Kryeministri i Kosovës, Ramush Haradinaj zgjodhi Tiranën për vizitën e tij të parë jashtë vendit në cilësinë e Kryeministrit. Ai u prit në një vizitë zyrtare nga autoritetet më të larta të vendit bashkë me një delegacion ministrash, deputetësh e personalitete të tjera të rëndësishme që e shoqëronin. Forcimi i bashkëpunimit midis dy vendeve, ecja e përbashkët në rrugëtimin europian dhe afrimi gjithnjë e më shumë i dy popujve e shteteve ishte kryefjala e Haradinajt në takimet me zyrtarët shqiptarë.
Në takimin me kryeministrin shqiptar Rama, Haradinaj vuri në dukje rëndësinë e angazhimit të Shqipërisë në mbështetje të Kosovës në sfidat që e presin përpara, siç janë integrimi në strukturat dhe institucionet shqiptare. Ai vuri në dukje gjithashtu rëndësinë e angazhimit për të forcuar më tej bashkëpunimin e gjithanshëm midis dy vendeve.
Në një takim të veçantë, në selinë e PD, Haradinaj mori nga Kryetari Lulzim Basha mbështetjen e gjithanshme të Partisë Demokratike ndaj Kosovës. Basha dhe Haradinaj biseduan mbi politikat e bashkëpunimit Shqipëri-Kosovë në të gjitha planet, krahas atij politik edhe ekonomik, social etj.
Basha i uroi suksese Haradinaj në detyrën e re dhe me shumë përgjegjësi në drejtimin e qeverisë së Kosovës. Kryetari i Opozitës e siguroi Haradinaj për mbështetjen e plotë e të gjithanshme të Partisë Demokratike në rrugën e integrimit europian dhe euroatlantik të Kosovës, dhe në përballimin e sfidave të tjera.
Integrimi europian dhe euroatlantik i Kosovës, është në interes të sigurisë dhe stabilitetit jo vetëm të Kosovës, por të mbarë rajonit, u shpreh Lulzim Basha. Kryetari i PD, më tej theksoi se Partia Demokratike, ashtu siç ka qenë që në ditët e para të themelimit të saj, një mbështetje e fuqishme dhe konstante e aspiratave të popullit të Kosovës, do të vazhdojë të jetë gjithmonë një zë aktiv në familjen e partive simotra të PPE, dhe më gjerë, për të përkrahur me forcë interesat e Kosovës.
Gjithashtu, nuk do të mungojë asnjëherë edhe mbështetja konkrete për njohjen nga shtete të tjera, përmes kontakteve dhe raporteve që Partia Demokratike ka me forca të rëndësishme politike në Europë dhe vende të tjera. Nga ana tjetër, të dy personalitetet theksuan rolin që Partia Demokratike me autoritetin e padiskutueshëm që gëzon në Kosovë, mund të luajë në drejtim të zhvillimeve pozitive edhe të vetë politikës aty, në bashkëpunim me të gjithë spektrin politik kosovar.
Haradinaj: Kosova, mirënjohëse Presidentit Berisha për Rrugën e “Kombit”
Kryeministri i Kosovës Ramush Haradinaj, ka falenderuar ish-Kryeministrin Berisha, “pasi në kohën që ai qeverisi Shqipërinë u bë realitet edhe Rruga e “Kombit”.
Prononcimi u bë për gazetarët pas takimit që ish-Kryeministri Sali Berisha zhvilloi me Kryeministrin e Kosovës, Ramush Haradinaj, ku të pranishëm ishin dhe zëvendës/Kryeministri, Behgjet Pacolli, ministri i Financave, Bedri Hamza dhe ministri i Kulturës, Rinisë dhe Sporteve, Kujtim Gashi si dhe i ngarkuari me punë i Kosovës në vendin tonë, Syle Ukshini.
Pas takimit, Berisha tha: “Pata kënaqësinë të takoj zotin Haradinaj, të cilin e kam takuar shumë herë, por sot pata kënaqësinë t’a takoj për së dyti si Kryeministër të Kosovës dhe t’i uroj shumë suksese në detyra jashtëzakonisht të rëndësishme që e presin përpara për të zgjidhur për Kosovën, por detyra që janë të rëndësishme për mbarë shqiptarët, sepse, pavarësisht nga kufijtë që kemi, interesat në shumë e shumë drejtime janë të njëjta dhe kam besim të madh që zoti Haradinaj dhe qeveria e tij do të realizojë një axhendë, e cila është në interes, do të thoja më të madhin të popullit të Kosovës, por dhe mbarë shqiptarëve. Edhe një herë suksese!!”
Ndërsa Haradinaj deklaroi: “Zoti President, se ne në Kosovë e kemi patur për nder dhe kënaqësi ta thërrasim president, pastaj kemi bashkëpunuar në çdo kapacitet tjetër si kryeministër i Shqipërisë, si kryetar i Partisë Demokratike të Shqipërisë. Në Kosovë e kemi ndjerë dashurinë e zotit Berisha për Kosovën, e ndjejmë edhe sot. Po ashtu, jemi të nderuar që të ndajmë një kohë bashkë duke patur parasysh se ka udhëhequr Shqipërinë në procese demokratizuese, procese jetike si anëtarësimi në NATO dhe në procese të tjera. Po ashtu ne kosovarët do t’i jemi falenderues presidentit Berisha, pasi në kohën që ai qeverisi Shqipërinë u bë realitet edhe rruga e “Kombit”. Ju faleminderit shumë zoti President!”
Më mirë pa heronj, sesa keqpërdorimi i tyre!
Enver BYTYÇI
Ramush Haradinaj është për vizitë zyrtare në Tiranë. Dhe është për të, kjo vizita e parë që bën në postin e kryeministrit jashtë Kosovës. Për mua, kjo është gjithashtu një ngjarje. Dy kryeministra që nuk kanë nevojë për përkthyes, flasin, bisedojnë dhe rekordojnë me njëri-tjetrin. Eshtë një zhvillim ky shumë pozitiv nga pikëpamja formale, sepse në atë që i jepet publikut duket shija e një spekullimi, manipulimi dhe përpunimi të trurit të shqiptarëve në favor e pse jo në mbështetje të një qeverisjeje me shumë probleme, me shumë dështime. Ata rekorduan, por jo për projekte zhvillimi. Rekorduan për Vitin e Skënderbeut dhe Ditën e Flamurit!
Sapo jam kthyer nga Austria dhe një nga njerëzit prominentë të këtij vendi, me ndikim në Bruksel, më thotë: “Nuk e kuptoj pse Shqipëria është kaq prapa në integrimet europiane, kur Serbia dhe Mali i Zi kanë përparuar shumë”! I them se, “Vijmë edhe ne drejt integrimit, por pak më me ngadalë”! Nuk doja që jashtë kufijve të vendit tim të fajësoj dikë, qofshin këta dhe përgjegjësit kryesorë të kësaj situate, pra, ata që na qeverisin keq.
Vizita e zotit Haradinaj u shfrytëzua mjeshtërisht për ta fsheh këtë qeverisje të mbrapshtë! Skënderbeu u bë përsëri simbol i keqqeverisjes. Megjithëse zoti Rama ia la këtë lojë manipuluese ta ekzekutojnë Presidenti Meta dhe Presidenti Thaçi, ata mblodhën grupet e punës për “Vitin e Skënderbeut”! Pastaj caktuan datën e mbledhjes së përbashkët të të dy qeverive në një ditë feste, më 28 nëntor. Diabolikët do të marrin daullet dhe do t’i krahasojnë këta të dy me Skënderbeun. Do t’i himnizojnë dhe mitizojnë dhe me këtë akt, politikanët tanë do ndjehen si në qiellin e shtatë! Entuziazëm, eufori, flamuj, protrete të Skënderbeut e të Ismail Qemalit, diku mundet që të shfaqen edhe portretet e diktatorit Hoxha. Kjo do të jetë panorama e atmosferës së brendshme.
Do “hedhim vallen në gojë të ujkut”, thjesht për të mos vënë re varfërinë, hajdutërinë, krimin, trafiqet, korrupsionin, por edhe lëvizjet mbas perdes për të krijuar atë që quhet “Jugosllavi e Re”. Duke mitizuar Skënderbeun, qeverisjet e sotma na e ngushtojnë më shumë lakun në fyt dhe e lirojnë atë, sa për të na lejuar të marrim pak frymë. Ndërsa oksigjenin na e japin me komandë, patriotizmin na e shesin me okë, mjafton që të mos kuptojmë se na mungon frymëmarrja, mjafton të bëhemi rob të ireales.
Jo për kompromis, por nuk dua që për këtë ta fajësoj kryeministrin e Kosovës, zotin Haradinaj. Ai kishte nevojë për ndihmën e zotit Rama dhe është i detyruar si malësor të jetë mirënjohës ndaj tij. Ky është një princip njerëzor i patjetërsueshëm, nëse kemi të bëjmë me njerëz. Por zoti Rama nuk mundi që të njëjtën gjë ta bënte me Isa Mustafën, i cili mund të kishte njëmijë gabime, ndërkohë që duhet vlerësuar për ruajtjen e integritetit të tij përballë kërcënimit të kryeministrit shqiptar me paternalizëm klasik!
Në mungesë të rezultateve në ekonomi, në infrastrukrurë, në rritjen e të ardhurave për qytetarët, në kryerjen e reformave aq të bujshme, zoti Rama ka zgjedhur të luajë me mjeshtri muzikën e mitizimit të figurave historike e patriotike shqiptarë dhe t’i keqpërdor ato në funksion të forcimit të pushtetit të tij. Në këtë skemë ai ka bërë llogari të qarta. Në Ballkan mitet janë modë e nacionalizmit dhe nacionalistëve. Njerëzit jetojnë ende me legjendat religjioze dhe heroizmat, të cilat janë të pakapshme për trurin njerëzor, siç i definon ato shkrimtari britanik, Robert Graves.
Studiuesit e shkencës së mitologjisë venë në dukje gjithashtu se mitet dhe mitizimi i historisë bëhet me qëllim homogjenizimin e kombit. Të njëjtën gjë synon zoti Rama me fushatën e shpalljes së vitit të Skënderbeut. Serbët prej dy shekujsh e kanë homogjenizuar kombin e tyre përmes miteve të krijuara, me qëllim sundimin e kombeve të tjera në rajon dhe fatkeqësisht asgjësimin fizik të shqiptarëve. Prandaj, ata zgjodhën si model mitizimin e Betejës së Fushë-Kosovës të 28 qershorit 1389, ditë të cilën e shndërruan në festë fetare si dita e Shën Vidovdanit. Në këtë ditë janë kryer disa akte politike: U vra Fnaz Ferdinand në Sarajevë (1914), u publikua letra e Informbyrosë, Stalinit (1948), u bënë mitingje me një milion pjesëmarrës (1989), etj.
Ndërsa ne shqiptarët më së shumti i kemi përdorur heronjtë e vendit për të justifikuar keqqeverisjen. Diktatori komunist shpalli “Vitin e Skënderbeut” (1968), sepse dështoi me revolucionin kulturor të tipit kinez të vitit 1966-1967 dhe i mëkoi shqiptarët me mitin e heroit kombëtar. Një dekadë më vonë, kur Shqipëria ishe izoluar tërësisht dhe kishte dështuar në politikat e tij zhvillimore, pra vitin 1968 e shpalli vitin e Lidhjes së Prizrenit (100-vjetori).
Tani është rikthyer miti i Skënderbeut si një model jo për të krijuar një momogjenitet kulturor, etnik, fetar, por për t’i bashkuar shqiptarët rreth një elite politike, që fatkeqësisht me shumë gjasa është e lidhur me krimin, trafiqet dhe oligarkinë, duke rrënuar kështu shpresën e shqiptarëve për një jetë më të mirë, më cilësore dhe më të denjë. Askush nuk mund ta qortojë përkujtimin e ngjarjeve dhe figurave historike, nëse ato zhvillohen natyrshëm dhe thjesht si nevojë e kujtesës historike. Kjo mënyrë e trajtimit të ngjarjeve të tilla nuk ka nevojë për shpallje politike e qeveritare, aq më pak për impenjime në 365 ditët e një viti. Thjesht do të mjaftonte mbështetja e qeverisë për veprimtaritë që mund të zhvillojnë institucionet e specializuara.
Nga pikëpamja e shkencës moderne në studimet bashkëkohore, nuk është historia ajo që përcakton shkallën e nivelit të integritetit dhe dinjitetit të një kombi e të një populli. Përkundrazi, është suksesi politik zhvillimor, gjendja ekonomike dhe të ardhurave, situata sociale në të cilën jetojnë njerëzit e një vendi, shteti. Nëse do të ishin mitet historike prova e përparimit dhe progresit e për pasojë edhe integritetit dhe dinjitetit të një kombi, shqiptarët, ballkanasit, sidomos serbët, do të ishin shënuar në histori si vendi/vendet më të civilizuara në botë. Por nuk ndodh kështu! Janë kritere të tjera ato që përcaktojnë pozitën civilizuese të kombeve dhe popujve. Qeverisja e mirë është në themel të këtij civilizimi.
Ndërsa ne vazhdojnë të na i japin e ndërkohë t’i pranojmë mitet historike si nevojë e përditësuar për përceptimin e gradës identitare tonën. Sa kohë do të vazhdojmë me këtë logjikë, ne do të mbetemi peng i një politike të gabuar, nuk do të bëjmë hajër, e ndërkohë do të shënohemi në rendin e parë të refugjatëve e të pjesëmarrjes në kriminalitet e në veprimtari të paligjshme!
Emri, Greqia e Maqedonia në pikën zero
Zgjidhja e kontestit më të madh që ka Maqedonisë me shtetet fqinje, përkatësisht atij të çështjes së emrit që kontestohet nga Greqia, mbetet vetëm në deklarata politike, përderisa nuk ka ndonjë propozim konkret nga palët.
Ndërmjetësuesi i Organizatës së Kombeve të Bashkuara, Metju Nimic ka paralajmëruar se nga fundi i këtij viti apo në fillim të vitit 2018 mund të ketë lëvizje nga pozicionet e të dyja palëve. Ky paralajmërim i tij, ishte përcjellë më pas nga kryeministri i Maqedonisë, Zoran Zaev me deklaratën se nga mesi i vitit të ardhshëm mund të ketë ndonjë propozim konkret.
Por, shefi i diplomacisë greke, Nikos Kocias ka thënë se konteksti nuk ka të bëjë vetëm me emrin, por edhe me çështjen e identitetin dhe të historisë, duke e kthyer kështu procesin në pikën zero.
Duke komentuar deklarimet e këtilla optimiste të palës maqedonase, por edhe ato të palës greke, njohësit e çështjeve ndërkombëtare thonë se ky kontekst vështirë se mund të ketë një zgjidhje të shpejtë.
Mersel Bilalli, profesor në Universitetin “Fon”, thotë për Radion “Evropa e Lirë” se pa një ndërhyrje serioze nga jashtë zgjidhje nuk mund të ketë. Ai thotë se do të ishte sukses sikur Maqedonia të merrte ftesë për anëtarësim në NATO si dhe datën për nisjen e bisedimeve me BE-në për anëtarësim dhe këto procese të përfundojnë paralelisht me zgjidhjen e kontekstit të emrit.
“Unë nuk jam i bindur se problemi është aq i thjeshtë. Besoj se ftesa për anëtarësim në NATO dhe një vendim për hapjen e bisedimeve për anëtarësim në BE, janë hapa, të cilët do të ndodhin pa një zgjidhje përfundimtare të emrit, por me klauzola, të cilat gjatë procesit të ratifikimit apo zhvillimit të bisedimeve do të mund të kemi zgjidhje përfundimtare të emrit, por në etapa të ndryshme”, thotë Bilalli.
Ish-ministri i Punëve të Jashtme, Denko Malevski, thotë për Radion “Evropa e Lirë” se, lëvizje mund të ketë, por vetëm pas një muaji apo pas përfundimit të zgjedhjeve lokale, periudhë kjo që sipas tij është e ndjeshme për t’u hapur debati për çështjen e emrit.
“Duket të kalojnë zgjedhjet lokale, që më lehtë të mund të hapet një debat për atë se çfarë do të ndodhë apo se çfarë duhet të bëjë Maqedonia për të arritur qëllimin e saj, anëtarësimin në NATO dhe BE. Qeveria nuk duhet të presë se çfarë do të bëjë Nimici, por edhe ajo duhet të punojë në arritjen e kompromisit, pasi ka kompromise të mira dhe të këqija dhe ajo duhet të angazhohet që të arrijë më të mirën e mundshme”, thotë Maleski.
Çështja e emrit po përdoret edhe nga partitë politike në fushatën elektorale për zgjedhjet lokale më 15 tetor me akuza mes partive se cila prej tyre ka bërë më shumë për interesat kombëtare. Kryeministri Zoran Zaev në vazhdimësi shpreh gatishmërinë për mbylljen e të gjitha çështjeve të hapura me fqinjët, ndërsa VMRO-DPMNE-ja opozitare akuzon për marrëveshje që dëmtojnë interesin kombëtar maqedon.
“Unë këtë e shoh vetëm se tek pjesa e shumicës qeveritare se ky segment afirmohet kurse sa i përket opozitës, ajo vazhdon me akuzat për çështjet, të cilat nuk janë bërë për 100 ditë e që vet nuk i ka bërë për 11 vjet”, thotë analisti Mersel Bilalli.
Çështja e emrit me Greqinë daton që nga pavarësia e Maqedonisë 27 vjet më parë. Athina kërkon nga Shkupi të ndryshojë emrin e saj dhe maqedonasit të mos pretendojnë se janë pasardhës të maqedonasve antik. Ky kontest ka bërë që Greqia ta bllokojë tash e disa vjet anëtarësimin e Maqedonisë në NATO dhe hapjen e bisedimeve për anëtarësim në Bashkimin Evropian.
Raporti: Taksat dhe korrupsioni, pengesat për biznes në Shqipëri
Forumi Ekonomik Global ka publikuar raportin e konkurrueshmërisë globale 2017-2018, ku Shqipëria është renditur në vendin e 75 nga 137 shtete, me një përmirësim prej 5 vendesh në raport me vitin e kaluar dhe duke pasur pozicionimin më të mirë në rajon.
Nga analiza e detajuar e raportit konstatohet se faktori më problematik për të bërë biznes, i cilësuar si i tillë nga drejtuesit e sipërmarrjeve shqiptare, janë taksat, me 21.7 pikë. Shqetësimi i dytë është korrupsioni, me 16.4 pikë.
Më pas renditen aksesi në financë, rregullimi i taksave, qeverisje ineficiente dhe burokratike, forca e papërshtatshme e punës, inflacioni, etika e ulët e forcës së punës, për të vijuar deri te shqetësimet më të vogla si regjimi i monedhave të huaja dhe rregullat kufizuese të tregut të punës.
Një vit më parë, në renditjen e vitit 2016 kishte qenë korrupsioni shqetësimi kryesor, me 23.6 pikë, i ndjekur nga taksat me 21.3 pikë.
Nga një listë prej 16 faktorësh, drejtuesit ekzekutivë të anketuar nga Forumi Ekonomik Global u pyetën që të zgjidhnin pesë faktorët më problematikë për të bërë biznes në vendin e tyre dhe t’i rendisin ato midis 1 (më problematiku) dhe 5. Pikëzimi i korrespondon peshimit të përgjigjeve në bazë të renditjes.
Edhe në Serbi (në vendin e 78), që ka taksa të krahasueshme me ne, shqetësimi kryesor janë taksat, ndërsa në Mal të Zi është aksesi në financë, ndërsa taksat jashtë shqetësimi i shtatë. Në Bosnjë, që është në total në vendin e 103, shqetësimi kryesor është ineficienca dhe burokracia e qeverisë, teksa ky shtet vuan pasojat e ndarjes etnike dhe institucionale. Maqedonia mungon këtë vit në renditje.
Raporti i konkurrueshmërisë globale merr në konsideratë 12 shtylla kryesore: institucionet; infrastruktura; mjedisi makroekonomik, shëndeti dhe edukimi parësor; edukimi i lartë dhe trajnimi; eficienca e tregjeve; eficienca e tregjeve të punës; zhvillimet e tregut financiar; teknologjia; madhësia e tregjeve; sofistikimi i bizneseve; novacioni.
Shqipëria ka renditjen më të mirë në treguesin e shëndetit dhe edukimit primar, ku renditet në vendin e 36. Edhe edukimi i lartë dhe trajnimi kanë renditje pozitive, në vendin e 49.
Më keq Shqipëria paraqitet në treguesin e risive dhe sofistikimit, ku sidomos për novacionin është e 87-a. Negative është edhe renditja për madhësinë e tregut, në vendin e 2017, por kjo lidhet kryesisht me popullsinë e vogël të vendit.
Shteti më konkurrues në botë mbetet Zvicra, të ndjekur nga Shtetet e Bashkuara të Amerikës, Singapori, Holanda, Gjermania, Hong Kongu, Suedia, Mbretëria e Bashkuar, Japonia.
Votim elektronik për zgjedhjet e ardhshme
Partia Demokratike është e vendosur në objektivin kryesor të saj, që në zgjedhjet e ardhshme të mundësohet votimi elektronik. Deputeti demokrat Edmond Spaho theksoi dje se, puna për Reformën Zgjedhore duhet të fillojë sa më parë, në mënyrë që qytetarëve t’u mundësohet vota e lirë. “Objektivi ynë është t’i japim qytetarëve shqiptarë zgjedhje të lira e të ndershme. Në përgjithësi zgjedhjet në Shqipëri, 2013, 2015, 2017, kanë patur probleme thelbësore, veçanërisht shitblerja e votës. Këto probleme do të evidentohet edhe në raportin e OSBE/ODIHR për zgjedhjet e 2017. Kur themi që duhet të kryhet Reforma Zgjedhore, përveç votimit elektronik, evitimit të shitblerjes së votës, është e rëndësishme që t’u mundësohet qytetarëve një sistem zgjedhor i ndershëm. Ndaj synohet të kalohet në një sistem të ri zgjedhor, i cili do të mundësojë të zgjedhurve dhe zgjedhësve votë dhe garë të ndershme. Sa i takon votimit elektronik do të them se e kanë aplikuar vende të tjera, dhe tashmë tek ne kërkon vetëm vullnet politik. Nëpërmjet votimit elektronik do të mund të bëhet identifikimi elektronik i votuesve, do të evitohet manipulimi i votës, apo që të manipulohet lista e votuesve, po kështu ka mundësi që të votojnë emigrantët.
Bashkia Kavajë nuk di asgjë për projektin prej 5 milionë euro të kanalizimeve
Vincent Van Gerven Oei
Exit.al, kohët e fundit ka raportuar gjërësisht mbi projektin e financuar nga Bashkimi Evropian për “Ndërtimin e Sistemit të Ujërave të Zeza dhe sistemit të Kanalizimeve në Vlorë, Ksamil, Kavajë dhe Shëngjin, Shqipëri”, me vlerë 14 milionë euro e nisur më vitin 2011. Analizimi i dokumentave të tenderit dhe raporteve mujore tregon se, Zyra e Delegacionit të BE-së në Tiranë ka zgjedhur fitues një kompani, e cila falimentoi 6 muaj pasi fitoi projektin. Kjo kompani u zgjodh pavarësisht nga pyetjet dyshuese të ngritura nga Komisioni i Vlerësimit të Ofertave të tenderit mbi mundësinë financiare dhe ekonomike të bashkimit të kompanive. Shembull është rasti i zbatimit të projektit në Ksamil, ku një vonesë kapi tjetrën. Pavarësisht se supervizori i punimeve në mënyrë të vazhdueshme i raportoi Delegacionit të BE-së në Tiranë për mungesën e fuqisë punëtore dhe keqfunksionimin e mjeteve të punë, BE nuk ndërhyri dhe nuk e rregulloi problemin. Si përfundim i bashkimit të këtyre dy avarive, në mos të keqadministrimit, projekti përfundoi 2 vjet me vonesë. Dhe disa muaj më vonë, këtë verë, në Sarandë dhe Ksamil plasën tubat e kanalizimeve dhe përmbytën bregdetin përreth me ujëra të zeza. Bashkia fajësoi BE-në, duke u shprehur se ato nuk ishin përfshirë në projekt, ndërsa BE-ja deklaroi se projekti u përfundua dhe zyrtarisht iu dorëzua autoriteteve shqiptare. Në të njëjtën periudhë, impjanti për trajtimin e ujërave të zeza në Kavajës i kryer nga e njëjta kompani, me vlerë rreth pesë milionë euro. Ndërtimi ka mbaruar në dhjetor të vitit 2015, por në raportin përfundimtar të supervizorit në dhjetor 2016, duket se “procedurat për pranimin provizor” ishin ende në pritje për të filluar. Pavarësisht se statusi aktual i projektit është i panjohur – Shërbimi i Jashtëm i BE-së nuk ka dhënë asnjë dokument – faza e ardhme duket se do të jetë një lojë fajësimi ndërmjet Delegacionit të BE-së dhe Bashkisë. Exit.al i bëri kërkesë Bashkisë së Kavajës nëse ishin ose jo në dijeni të ndërtimit të rrjetit të kanalizimeve të financuara nga BE. Përgjigjia e Kyebashkiakut Isa Sakja ishte e qartë: Në Bashkinë e Kavajës nuk ka asnjë dokument për rinovimin e sistemit të kanalizimeve të ujërave të zeza apo ndonjë projekt tjetër i financuar nga Bashkimi Evropian. Me fjalë të tjera, nuk ekziston asnjë dokument për financimin me vlerë 5 milionë euro të projektit të BE-së, i cili ka filluar më 2012 në Bashkinë e Kavajës. A njihni ju dikë që mund t’i thotë atyre për projektin?
Drejtoresha e VOA në Tiranë -gazetarëve: Porosia për lajmet e manipuluara të qeverisë
Drejtorja e “Zërit të Amerikës”, Amanda Bennett, u takua dje gjatë vizitës dyditore në Tiranë me autoritetet më të larta të shtetit shqiptar.
Presidenti i Republikës, Ilir Meta, e priti zonjën Bennett, së bashku me kolegët e saj që drejtojnë “Zërin e Amerikës” në departamentin e Euro-Azisë dhe seksionin në gjuhën shqipe.
Zonja Bennet dhe kolegët e saj u takua po sot me kryeministrin Edi Rama, me të cilin shkëmbyen dhurata simbolike dhe mendime për zhvillimet e fundit të demokracisë dhe medias.
Këto takime janë pjesë e një vizite disaditore që drejtorja e “Zërit të Amerikës”, Amanda Bennett, po zhvillon në disa shtete të rajonit të Ballkanit.
Ajo mori pjesë një ditë më parë në një forum diskutimesh pranë Universitetit Europian të Tiranës, ku diskutoi me një auditor të gjerë studiuesish dhe gazetarësh mbi sfidat e sotme të gazetarisë.
Zonja Bennett theksoi gjatë fjalës së saj, se njerëzit kanë nevojë për media të përgjegjshme, edhe pasi përfundojnë krizat, tensionet apo lufta e ftohtë.
“Gjendja e medias këtu në Shqipëri – tha zonja Bennett – pasqyron po ashtu gjendjen e mediave kudo në botë, ku ka shumë presione politike, ekonomike dhe ekziston një betejë për të patur sa më shumë ndikim, gjë që i shtyn palët që të polarizohen, dhe kjo betejë është më e ashpër se asnjëherë më parë, ndaj edhe bashkëpunimi midis vetë mediave është jashtëzakonisht i rëndësishëm”.
Zonja Bennett tha se, “njerëzit kërkojnë gjithmonë të vërtetën, por në kohët e sotme gazetarëve u janë shtuar vështirësitë për ta gjetur atë, sepse ajo gjendet e fashitur midis shumë detajesh të tjera të pavërteta. Ndaj edhe bashkëpunimi mes gazetarëve është i rëndësishëm për të verifikuar të dhënat dhe për të nxjerrë shkrime të sakta e të ndershme”.
Ajo iu përgjigj një seri pyetjesh nga auditori i universitarëve, ku në mesin e shumë profesorëve, drejtues mediash dhe gazetarë, kishin ardhur edhe deputetë studiues dhe zyrtarë të ndryshëm.
Zonja Bennett theksoi se, gazetarët nuk mund të ndalojnë dot përpjekjet e qeverive të përhapin lajmet e manipuluara, por ajo që mund të bëjnë gazetarët është të qëndrojnë besnikë parimeve të punës së tyre.
“Ajo që ne mund të bëjmë e të kontrollojmë përballë këtij presioni në rritje është të ruajmë standardet që ne kemi. Kudo në botë mediat po polarizohen, dhe dilema është çfarë njerëzit besojnë dhe jo se cila është e vërteta. Vlerat e gazetarisë tonë janë balancimi dhe renditja e drejtë e fakteve. Përpiqemi të përfshijmë të gjitha palët me përgjegjshmëri”, tha ajo.
Drejtorja e “Zërit të Amerikës, Amanda Bennett po viziton prej disa ditësh rajonin e Ballkanin, ku qëndroi në Beograd, Podgoricë, Shkodër dhe Tiranë ka në plan të vizitojë edhe Prishtinën.
Kjo është vizita e parë që një drejtuese e nivelit më të lartë të “Zërit të Amerikës” viziton vendet e Ballkanit.
Zvarritja e çështjes gjyqësore kërcënon zbulimet arkeologjike pranë ‘Velierës’
Gjykata e Apelit mund t’i japë Bashkisë së Durrësit brenda javës të drejtën për të rifilluar punimet në zonën arkeologjike për ndërtimin e “Velierës”, ndërkohë që edhe pas katër muajsh, Gjykata Administrative nuk ka zhvilluar asnjë seancë për të shqyrtuar padinë e Shoqërisë Civile kundër projektit të shumëdebatuar.
Gjykata e Apelit në Durrës do të vendosë të premten lidhur me kërkesën e Bashkisë së qytetit bregdetar, e cila synon rifillimin e punimeve në territorin e zbulimeve arkeologjike të projektit “Veliera”, por ndërkohë padia e paraqitur disa muaj më parë nga Shoqëria Civile në Gjykatën Administrative, që kërkon bllokimin e plotë të punimeve, është ende larg shqyrtimit.
Mirela Jorgo, avokate e Shoqërisë Civile, tha për BIRN, se që nga qershori i këtij viti, kur Gjykata vendosi ta gjykojë çështjen me një trupë prej tre gjyqtarësh, nuk është zhvilluar asnjë seancë gjyqësore për kërkesën e tyre. Megjithëse, siç shpjegon avokatja, rregullorja përcakton një vijueshmëri të seancave në çdo 10 ditë. “Miratimi i emrave të dy prej gjyqtarëve ka vijuar javë me radhë, në kurriz të një vendimi që vazhdon të zvarritet”, tha Jorgo.
Sipas avokates, procedurat e zgjatura të Reformës në Drejtësi e kanë bllokuar formimin e trupës së gjyqtarëve për disa javë, por vonesa më e madhe vjen “nga mungesa e dëshirës për ta trajtuar si duhet këtë çështje”. Në krahun tjetër apelimi i Bashkisë kundër një vendimi të Gjykatës së Faktit, që pati pezulluar punimet në atë që quhet Zona A e riskut arkeologjik dhe ku janë zbuluar edhe mure të kohës romake e osmane dhe objekte arkeologjike, po ecën më shpejt dhe nëse vendimi i të premtes është në favor të Bashkisë punimet mund të rifillojnë në pak ditë.
Punimet për zbatimin e këtij projekti kanë nisur në dhjetor të vitit të kaluar, por pas zbulimit të disa objekteve arkeologjike dhe pjesëve të disa mureve, Shoqëria Civile organizoi një sërë protestash kundër tyre dhe po ashtu kërkoi bllokimin e punimeve e në Gjykatë. Gjykata e Faktit vendosi që punimet në krahun me risk arkeologjik të ndërpriteshin në shkurt të këtij viti, ndërsa çështja në themel po shqyrtohet nga Gjykata Administrative.
Ndërkohë përfaqësuesit e Shoqërisë Civile thonë se, Bashkia po kërkon ligjërisht anulimin e vendimit gjyqësor të shkurtit. Në këtë zonë pas vendimit të Gjykatës, ndërhyrja e ndërtuesve ka qenë minimale. “Një vendim i pritshëm pas dy ditësh nga Gjykata e Apelit pro Bashkisë do t’i japë mundësi firmave ndërtuese, të vijojnë pjesën e fundit të punimeve madhore, që kanë mbetur ende pa u zbatuar”, thotë Mirela Jorgo.
“Këshilli i Lartë i Drejtësisë tashmë i ka miratuar emrat që plotësojnë grupin prej tre gjyqtarësh”, tha më tej znj. Mirela Jorgo, “dhe ne jemi në pritje të seancës përfundimtare dhe të vendimit përkatës”.
Edhe më herët gjatë këtij viti dhe pas fillimit të përplasjeve ligjore me Bashkinë Durrës organizatat joqeveritare që pretendojnë se projekti dëmton historinë e qytetit dhe një zonë me vlera arkeologjike, janë ankuar për vonesë të sistemit të drejtësisë.
Padia ligjore e Shoqërisë Civile ka nisur thuajse menjëherë me zbulimet arkeologjike të muajit shkurt në krahun verior të projektit të “Velierës”. Përfaqësuesit e saj arritën të bllokojnë punimet, duke ruajtur fortifikimet e zbuluara, e duke penguar njëkohësisht edhe realizimin e plotë të projektit të shpallur nga Bashkia.
Në maj të këtij viti, Këshilli Kombëtar i Arkeologjisë vendosi ruajtjen dhe integrimin e objekteve të zbuluara, duke ia lënë si detyrë Këshillit Kombëtar të Restaurimeve. Një vendim që paraqet pjesërisht edhe pozicionin e Ministrisë së Kulturës për të ardhmen e monumentit të zbuluar.
Sidoqoftë, investitori vijoi realizimin e projektit, duke përfunduar nënkalimin e automjeteve, që nis pranë ish-hotel “Vollga” dhe përfundon pranë Bankës Kombëtare Tregtare. I gjithë ky territor i përket zonës B të riskut arkeologjik, që ofron më pak mundësi zbulimesh, ndërsa në zonën A ku kanë dalë në sipërfaqe fragmente të mureve romake dhe pjesë nga fortifikimi osman, punimet janë ndërprerë me një vendim të Gjykatës së rrethit gjyqësor të Durrësit.
“Rifillimi i punimeve në terren edhe në zonën arkeologjike, si dhe zvarritjet disamujore të Gjykatës për të vendosur mbi kërkesën e Shoqërisë Civile mund ta vështirësojnë vijimësinë e procesit”, thotë Jorgo.
Përfaqësuesit e Shoqërisë Civile ngulmojnë se jo vetëm në Zonën A të rriskut arkeologjik, ku janë evidentuar zbulimet, por edhe në Zonën B pranë hyrjes së portit mund të ketë elementë të dëmtuar të vlerave arkeologjike. “Ne presim vendimin e Gjykatës së Apelit, por nuk do të pajtohemi me të, nëse ai do të favorizojë projektin e Bashkisë së Durrësit”, tha Jorgo.
Sipas Bashkisë së Durrësit, sheshi i ri publik do të ketë një sipërfaqe prej 12 mijë metra katror dhe vela mbi të do të jetë 2 mijë metra katror. Ndërsa vlera e të gjithë këtij projekti arrin rreth 6 milionë dollarë. Ai është pjesë e të ashtuquajturës rilindje urbane, që përfshin rikonstruksione dhe ndërtime të shesheve të disa qyteteve, të cilat shpesh janë bërë objekt debati.
Gëzim Kabashi
Kryesore
Continue to the category
