Prokurori i Përgjithshëm i Antimafias italiane, Franko Roberti në një dalje publike është shprehur sot ndaj situatës së trafikut të drogës nga Shqipëria drejt Italisë. I ftuar në kongresin vjetor të Organizatës Kombëtare të Gjyqtarëve italianë, Franko Roberti tha se “drogat e lehta kanë pushtuar vendin, duke shkaktuar viktima siç ndodhi në San Marco in Lamis, në provincën e Foxhias, e rrjedhë e trafikut të drogave të lehta nga Shqipëria”.
“Për këtë, tha ai, i kemi kërkuar qeverisë e Parlamentit italian një zgjidhje të pashmangshme; Ose të bashkojmë të gjitha forcat për të luftuar trafikun e drogave të lehta, ose t’i japim shtetit monopolin e prodhimit e shitjes së drogave të lehta, duke njohur mungesën e vlerës morale të përdoruesit të saj. Objektivi i shtetit të së drejtës është të luftojë fuqitë kriminale e jo të bashkëjetojë me ta”.
Prokurori i Përgjithshëm i Antimafias ka shpjeguar se, “impenjmi i forcave të rendit ka reduktuar trafikun e sasisë së drogave të rënda në vend, ndërsa trafiku i drogave të lehta është shtuar në mënyrë të dukshme me gjithë impenjimin e të gjithëve”. “Legalizimi i drogave të lehta do të ishte një goditje e rëndë e klaneve kriminale”, tha ai. “Shteti duhet të prodhojë e shesë droga të lehta të cilësisë më të mirë e me çmime më konkuruese se ato të trafikuara nga klanet kriminale”.

Kryetarja e LSI-së, Kryemadhi, ka dalë në një prononcim për mediat nga selia e partisë, ku ka reaguar për deklaratat e kryeministrit Rama në mbledhjen e Grupit parlamentar të PS-së. Sipas Kryemadhit, me atë që tha sot Rama dëshmoi pazarin ndërmjet kriminelëve që ndajnë pazaret mes tyre dhe kërkojnë ta kthejnë drejtësinë në një zgjatim të kriminelëve dhe jo në shërbim të qytetarëve. “Kryeministri shqiptar iu hoqi çdo mëdyshje shqiptarëve për lidhjen me krimin dhe trafikantët. Po, ai është një prej tyre, mbështetësi, inspiruesi dhe përdoruesi i tyre. Drejtësia po përballet sot me një pengesë të madhe që nuk janë më vetëm kriminelët, por edhe kryesuesi i falangës politike që i mbështet dhe sakrifikohet për ta. Kryetari i Kuvendit dhe mazhoranca e kthyen Këshillin e Mandateve dhe Imuniteteve në një gjykatë politike. Ata dhunuan Kushtetutën dhe nga garante e kthyen në mbështetëse të krimit. Dhunuan edhe rekomandimet e Komisionit të Venecias, i cili shprehet qartë në raportin e 2014 se: “Ky komision nuk duhet në asnjë rrethanë të japë qëndrimin e tij për pafajësi ose jo të deputetit përkatës”. Komisioni i Këshillit të Mandateve, e patë dhe vetë, që u kthye në një gjykatë politike dhe teatrale”, u shpreh Kryemadhi. Ajo tha se të gjithë shqiptarët prisnin më të paktin veprim që kryeministri i tyre duhet të bënte: Të lejonte drejtësinë të zbardhte të vërtetat. “E prisnin të gjithë shqiptarët që janë burgosur për kalimin e semaforit të kuq, e prisnin me qindra dhe mijëra shqiptarë që janë burgosur për mos pagimin e energjisë elektrike, për shkak të varfërisë së tyre. E prisnin me qindra dhe mijëra shqiptarë që janë ndaluar dhe janë gjobitur për mosvendosjen e një rripi sigurimi apo për një parkim të gabuar. Ata panë sot kryeministrin që shndërrohej në një mburojë të krimit. Shqiptarët sot panë një kryeministër që shantazhon hapur Drejtësinë dhe e kërcënon atë, duke dashur t’i lërë shqiptarët në duart e trafikantëve që po helmojnë brezin e ri dhe po dëmtojnë shpresën dhe të ardhmen e shqiptarëve. Edi Rama po lë shqiptarët në duart e kriminelëve gjobëvënës, të vrasësve me pagesë dhe profesionist dhe po u hap trafikantëve autostrada të reja të trafikut të drogës, të armëve e shumë trafiqeve të tjera të rrezikshme. Fjala e tij sot ishte dëshmi publike jo e qëndrimit të një kryeministri, por e një pazari mes kriminelëve që ndajnë rolet dhe hesapet midis tyre. Fjala e tij ishte sot një dëshmi publike e strategjisë së tij për ta kthyer drejtësinë shqiptare në një zgjatim të kriminelëve dhe jo në një institucion në luftën ballore kundër krimit, korrupsionit dhe në një drejtësi që të jetë në shërbim të qytetarëve. Kryeministri edhe para pak minutash i përfshirë nga frika dhe paniku kërkoi t’i mbyllte gojën Prokurorisë, pasi ai do që të jetë edhe kryeprokuror, edhe kryegjykatës edhe kreu i organizatave kriminale. I bëj thirrje Prokurorisë të mos intimidohet, por t’ju shkojë të vërtetave deri në fund, sepse kjo është ajo që presin të gjithë shqiptarët, të cilët nuk duan të qeverisen nga krimi dhe kriminelët”, tha Kryemadhit.

Nënkryetari i LSI-së, Luan Rama ka dalë në një konferencë për shtyp për mediat nga selia e partisë ku ka deklaruar se deputetët e kësaj force politike do votonin të mërkurën pro kërkesës së Prokurorisë për heqjen e imunitetit të ish-ministrit, Tahiri. ‘Grupi i LSI rithekson edhe një herë qëndrimin parimor të saj, ligjor, e në përputhje jo vetëm me moralin tonë politik, por edhe me aspiratën e qytetarëve që presin nga Kuvendi qasje, që respekton ndarjen e pushteteve, ndaj ne do votojmë pro miratimit të kërkesës së Prokurorisë për t’i çelur rrugën çdo veprimi procedurial, që organi i akuzës e çmon se i shërben çdo hetimi të paanshëm dhe zbardhjen e të vërtetës në lidhje me një deputet të mazhorancës”.
Më tej, në deklaratën e tij Rama theksoi se nuk bëhej fjalë thjesht për një individ, por përballë një grupi të strukturuar kriminal që ka shtrirë tentakulat e tij edhe në përbërje të qeverisë. ‘S’jemi përpara një individi, por përballë veprimit të organizuar të një grupi të strukturuar kriminal, që fatkeqësisht gjen tentakulat e veta edhe në përbërje të qeverisë. Kjo është arsyeja e sulmeve të ndërmarra ditët e fundit dhe të artikuluara më drejtpërdrejt sot nga kryeministri në mbledhjen e grupit parlamentar. LSI jo vetëm distancohet, por e dënon qartë e prerë sulmin mbi organet e drejtësisë si përpjekje për ta devijuar fokusin e sistemit të drejtësisë, te qëndrimet e kompromentuara të shumicës parlamentare, e cila po dëshmon se ka zgjedhur që në sfidën mes shtetit dhe grupeve të organizuara kriminale të mbajë anën e krimit’. Në fund, ai theksoi se LSI mbështet qëndrimin e PD-së, për të bojkotuar komisionet parlamentare, me përjashtim të mbledhjes së Komisionit të Shëndetësisë, për shkak të rëndësisë së saj.
Po dje, nënkryetari i Lëvizjes Socialiste për Integrim, Luan Rama, ka fajësuar kryeministrin Rama, për situatën e rëndë kriminale në vend. Ai analogon, gjendjen e trazuar politike, me një poemë të hershme, ku shprehet se “Ec e ec e s’kanë të sosur kriminelët e Rilindjes…”. “Kryeministri, edhe sot në mbledhjen e deputetëve të Rilindjes, i përfshirë prej panikut e frikës, na dëshmoi të gjithëve që ai është përgjegjësi kryesor për situatën e rëndë kriminale në vend! ‘Ec e ec e s’ka të sosur ky kanali i Myzeqesë’ – thuhet në një poemë të viteve të para të epokës socialiste! Fare mirë sot nën qeverisjes e kriminelorilindjes, ato vargje mund të përshtaten: “Ec e ec e s’kanë të sosur kriminelët e Rilindjes…”, shkruan Rama.
Ndërkohë po dje, Kryetari i Grupit parlamentar të Lëvizjes Socialiste për Integrim, Petrit Vasili, ka cilësuar sjelljen e kryeministrit Rama, si atë të një shërbëtori të trafikantëve të drogës. Sipas tij, këto janë ditë të zeza për vendin, pasi kryeministri i është dorëzuar totalisht krimit. “Kryeministri njësh me krimin. Ditë shumë e keqe për vendin. Kryeministri i dorëzuar, peng dhe shërbëtor i trafikantëve dhe kriminelëve sot e pranoi publikisht përpara gjithë shqiptarëve këtë. Reforma në Drejtësi e këtij të inkriminuari në krye të qeverisë sot ka rënë”. “Kryeministri donte Reformë në Drejtësi që të mbronte trafikantët dhe kriminelët që i mbështeste dhe i përdorte dhe një drejtësi tjetër që godet pa mëshirë njerëzit e zakonshëm, të pambrojturit dhe të varfërit”, shkruan Vasili.