Simone Zaza bind trajnerin e Kombëtares së Italisë, Gian Piero Ventura, për ta grumbulluar për përballjen e dyfishtë me Suedinë në play off-in e “Rusi 2018”. Sulmuesi i Valencias po konfirmohet protagonist absolut në La Liga, duke e udhëhequr skuadrën e tij në vendin e dytë pas Barcelonës. Ka realizuar 8 gola në 9 javët e para të kampionatit, i fundit në fitoren e thellë 4-0 ndaj Sevilla-s. Për me tepër, ka barazuar rekordin e argjentinasit Mario Kempes, që rezultonte i huaji i vetëm që kishte shënuar në 5 ndeshje radhazi për Valencian. Fiton më shumë pikë kandidatura e tij për një vend në përfaqësuese ndaj Balotelit, që duhet të rikuperojë shumë nga marrëdheniet e krisura me pjesën më të madhe të futbollistëve në dhomat e zhveshjes.

Eros Grezda ka shënuar golin e tretë në Kroaci. Një javë më parë i kishte shënuar Dinamo Zagreb, ndërsa sot u ka shënuar kampionëve kroatë të Rijekës. Mesfushori i Kombëtares shqiptare vazhdon të shkëlqejë, teksa ka shënuar një gol spektakolar në minutën e 62-të, duke barazuar përkohësisht ndeshjen dhe më pas skuadra e tij Osijek e ka fituar 1-2 në transfertë. Ai mori një top në zonë, bëri një rrotullim të bukur dhe më pas godet me të majtën për ta dërguar në rrjetë. Këtë sezon, Grezda ka shënuar 3 gola në kampionat me ekipin e Osijek, ndërkohë që edhe në Kombëtare ka zhvilluar ndeshje shumë të mira, ku vlen të përmendet ndeshje me Italinë në Shkodër, ku Buffon ndali 3 herë gjuajtjet e tij.

Tani është zyrtare, Lazio blindon Thomas Strakoshën deri në vitin 2022. Lojtari shqiptar, që këtë sezon e ka nisur si titullar, tashmë ka hedhur të zezën mbi të bardhë, duke zgjatur kontratën me klubin bardhekaltër. Pas shumë muajve bisedime, palët janë ulur duke gjetur gjuhën e përbashkët për ta zgjatur edhe më shumë kontratën aktuale. Në komunikatën zyrtare, nuk bëhen të ditura shifrat e kontratës që do të skadojë më 30 qershor të vitit 2022, por theksohet se termat ekonomikë me numrin 1 të portës bardhekaltër, janë përmirësuar ndjeshëm dhe ai do të përfitojë një shumë të konsiderueshme për të vazhduar rrugën me projektin e klubit bardhekaltër, ku këtë sezon është transformuar në një hero të vërtetë me pritjet vendimtare.
Strakohsha është portieri me mesataren më të lartë të pritjeve për ndeshje, madje në shumë raste ai ka rezultuar vendimtar në rezultatet e këtij sezoni. Bashkë me portierin shqiptar, Lazio komunikon edhe rinovimin me qendërsulmuesin Ciro Immobile për të njëjtin afat. Lojtari italian do të përfitojë 2.5 milionë plus bonuset e lidhura me paraqitjet e tij.
Strakosha nuk ngurroi të shprehë gjithë kënaqësinë e tij në rrjetin social Facebook. “Ky rinovim më mbush me kënaqësi. Bashkë deri më 2022-in, Go Lazio”, shkruante Strakosha në llogarinë e tij në Facebook. Portieri i kombëtares shqiptare do të jetë i lidhur me Lazion deri në vitin 2022, me një kontratë shumë më të majme sesa aktualja. Strakosha po bën paraqitje të shkëlqyera me fanelën e bardhekaltërve, duke u bërë shpeshherë edhe protagonist i fitoreve të arritura.

Mino Raiola-Zlatan Ibrahimoviç, një marrëdhënie e qëndrueshme prej shumë vitesh, nga e cila kanë përfituar shumë të dy. Kushedi së çfarë do të ketë menduar gjiganti suedez i Mancheser United nga batutat e menaxherit të tij italian, që, mes shakasë dhe seriozes, u shpreh: “Duhet të luajë akoma për 5 ose 6 vjet. Nuk do ta lë të heqë dorë kaq shpejt, kam punuar me të për shumë vjet tani është radha e tij të punojë për mua. Fëmijët e mi janë rritur dhe kanë nevojë për para. Kemi rëndë dakord që për 5 vitet e ardhshme të punojë vetëm për mua”.
Por çfarë do të ndodhë me Zlatanin kur të heqë dorë nga futbolli? “Do të jetë gjithmonë në jetën time, si futbollist, sipërmarrës, drejtues sportiv ose trajner, nuk ka rëndësi. Shpresoj që një ditë të bëhet trajner, sepse jam kurioz të shoh futbollistët tek i thonë Zlatanit që nuk e kuptojnë se për çfarë po flet. Do të doja të kisha një telekamera të fshehtë për të parë reagimin e tij, kur ndonjë lojtar t’i thotë se është më i mirë se ai”, u shpreh Raiola. Raiola theksoi edhe një herë se futbolli italian mbetet 50 vite, pas sidomos për shkak të diskriminimit të lojtarëve me ngjyrë.

Vazhdojnë replikat mes Gary Lineker dhe Zinedine Zidane në Twitter. Ish-ndërkombëtari anglez kishte vënë në diskutim cilësitë reale të Karim Benzema, ndërsa trajneri i Real Madrid-it i është përgjigjur duke mbrojtur lojtarin e tij. Deri në këtë pikë të sezonit Karim Benzema ka shënuar vetëm një gol në La Liga kundër Getafe-s. I futur në lojë në pjesën e dytë, ndërkombëtari francez nuk shënoi, por shërbeu një asist për Marcelo-n që realizoi golin e tretë të fitores 3-0 të “Los Blancos” ndaj Eibar-it.
Por këshilltari i BBC-së nuk ka ndalur dhe ka përfituar nga performanca e Harry Kane për të vijuar replikat. Me dy golat e shënuar Harry Kane ishte protagonist i fitores së Tottenham-it 4-1 ndaj Liverpool-it në javën e 9 të Premier League-s:“Harry Kane shënoi sërish. Fatmirësisht, Zidane mendon se, Benzema është më i miri, pra, ata nuk do të tentojnë të na e marrin”, shkroi në Twitter Lineker. Real Madrid është përfolur si një nga klubet që interesohet për ndërkombëtarin anglez.

Fabio Capello, në mënyrë të qartë e përjashton një rikthim në stolin e Milanit: “Unë kam dhënë tashmë kontribut si trajner për kuqezinjtë. Italia është gjithmonë në zemrën time, por kam pasur fatin e mirë për të punuar në Spanjë, Angli, Rusi dhe tani në Kinë. Vetëm duke udhëtuar kështu jemi pasuruar profesionalisht. Jiangsu Suning është përvoja ime e fundit. Kam kërkuar për t’u kthyer trajner i një klubi dhe e kam bërë. Unë ende kam një vit kontratë dhe pastaj do të shkoj me pushime”. Asnjë udhë “romantike”, pra, në rastin e një shkarkimi të Montellës dhe zëvendësimit të tij, siç është përfolur së fundi.
Refuzimi – Don Fabio, i intervistuar nga “Radio Anch’io Sport”, kundërshton projektin e rindërtimit të kuqezinjve, por shpëton trajnerin e tyre: “Kur ju bëni revolucione, me kaq shumë lojtarë, duhet t’i jepni kohë trajnerit. Ndoshta gabimi është një tjetër: ekipi u forcua shumë në pikat e dobëta, duke blerë kaq shumë lojtarë. E mira do të ishte për të marrë tre lojtarë të rëndësishëm, që me të vërtetë të bënin diferencën”.
Napoli dhe Interi – Me pak fjalë, Milani i ri nuk e ka bindur Capellon, që gjykon së jashtmi: “Në Kinë flasim më shumë për Interin. Është për të ardhur keq që Milani është në këtë situatë”. Ndërsa Napoli dhe Interi e kanë goditur trajnerin aktual të Jiangsu: “Unë pashë një futboll të madh në ndeshjen mes tyre, çka nuk ma zinte syri prej një kohe të gjatë në Itali. Arbitri ndërhyri shumë pak, sepse topi ishte duke udhëtuar me njëmijë në orë. Napoli dhe Interi kanë dy stile loje shumë të ndryshme, por ia vlejnë të zgjohesh në 02:30”.
Teknologjia, VAR – “Unë kam qenë gjithmonë në favor të VAR, kjo të ndihmon shumë, thotë
Capello. “E kam paguar në Angli gabimin e arbitrave për një gol me vlerë një metër e gjysmë”, tha ai.
Botërori – Don Fabio i “kalon gishtat” edhe në funksion të “play-off”-it të Italisë kundër Suedisë, për t’u kualifikuar në Kupën e Botës, “Rusia 2018”: “E tërë Italia duhet ta mbështesë ekipin kombëtar. Unë dua ta shoh të mbushur plot “San Siro”, sepse tifozët të shtyjnë shumë drejt Kupës së Botës. Natyrisht, nuk mund të bëj parashikime, por Botërori pa axurrët është i mangët”.
Arlind RAMA

Cesc Fabregas thotë se është shumë i lumtur te Chelsea për të kërkuar një transferim, por pranon se i mungojnë miqtë dhe familja e tij në Barcelonë. Fabregas u kthye në Premier League me Chelsea në vitin 2014, për një kontratë prej 27 milionë paundësh, duke bërë 151 paraqitje për klubin katalanas. 30-vjeçari e filloi karrierën e tij në Barcelonë, para se të bashkohej me Arsenalin si një 16-vjeçar. Tani ai ka pranuar se ndien mungesën e më të afërmve dhe më të dashurve, pavarësisht lumturisë së tij të padiskutueshme në “Stamford Bridge”. “Kam gjetur lumturinë absolute te Chelsea, tha ai për “Vanity Fair”. Familja ime është e kënaqur, ajo është përshtatur tërësisht me jetën në Londër. Unë jam shumë i lumtur”, tha ai.
Në një intervistë të gjerë, Fabregas, një nga lojtarët më të dekoruar të brezit të tij, gjithashtu lëshoi një fjali-këshille për lojtarët e rinj, që kërkonin të bënin rrugën e tyre në futboll: “Mos shikoni vetëm llogarinë tuaj bankare. Mos u hutoni nga fama dhe paratë, mos u udhëhiqni nga lloji i gabuar i njerëzve. Unë kam parë të rinj me talent të jashtëzakonshëm, që kanë dështuar. Dhe, përkundrazi, kam parë lojtarë më pak të talentuar, që triumfojnë në bazë të qëndrimit dhe angazhimit të tyre. Të jesh i rrethuar nga njerëz që me të vërtetë të duan, është shumë e rëndësishme”, tha ai.