Një nga anëtarët e bandës “Çela” në Elbasan, u arrestua mbrëmë me urdhër të Prokurorisë. Enea Bekteshi u arrestua në Cërrik gjatë një operacioni, i cili u krye nën drejtimin e Krimeve të Rënda në Tiranë. Sipas burimeve të Prokurorisë, Enea Bekteshi, ka qenë në “Audin” e blinduar që goditi makinën e nëndrejtorit të Policisë në Elbasan, Gjergj Oshafi. Gjatë kontrollit në mjetin e tij është gjetur një sasi e lëndëve narkotike.
Enea Bekteshi dyshohet të këtë qenë anëtar i disa ngjarjeve kriminale. Bekteshi dyshohet se ka qenë në makinën tip “Audi” që goditi mjetin e nëndrejtorit të Policisë, para 2 javësh në Elbasan. Por Enea Bekteshi dyshohet se është pjesë e grupit të njohur si banda “Çela”, që disa muaj më parë, më 6 gusht 2017 qëlloi me antitank biznesin e fisit “Çapja”, hotel “Universin”.
Kapja e Bekteshit vjen dy ditë pas deklaratave të forta të ambasadorit amerikan Donald Lu, se vendin e drejtojnë katër klane dhe 20 familje mafioze.

Prokuroria kërkoi të përgjohet banda Çela, policia refuzoi

Prokuroria i ka kërkuar policisë që ta vinte në përgjim Enea Bekteshin, si pjesë e një bande të rrezikshme kriminale në qytetin e Elbasanit, por policia refuzoi me pretendimin se punonjësit e policisë janë me pushime. Pak ditë më parë u publikua nga “ABC News” një foto e një makine të djegur në qytetin e Elbasanit, e cila sipas policisë, dyshohet se u përdor mbrëmjen e 6 gushtit për të qëlluar me antitank, drejt banesës së familjes Çapja. Siç duket edhe nga fotoja, makina nuk është shkrumbuar plotësisht, duke lënë gjurmë brenda në kabinë, të cilat janë të vlefshme për ekspertët e Policisë Shkencore.
Automjeti luksoz, një BMW X3, sipas efektivëve ishte vjedhur në qytetin e Durrësit në fillim të gushtit, teksa rezulton pronë e një drejtuesi lokal të atij qyteti. Fillimisht, automjetit iu ndryshuan targat në unazën lindore të qytetit dhe më pas atentatorët përshkojnë të gjithë gjatësinë e saj, deri kur mbërrijnë tek objektivi.
Fatmirësisht, predha e antitankut, një armatim i rëndë lufte nuk ka shpërthyer. Ai u gjet nga policia në oborrin e shtëpisë dhe u çmontua nga forcat xheniere. Vetëm pak çaste pas ngjarjes, automjeti i vjedhur në Durrës u gjet i djegur afër Spitalit Psikiatrit “Sadik Dinçi”, rreth 500 metra larg vendit të ngjarjes.
E gjithë kjo histori e denjë për filmat hollivudian u mbajt e fshehtë nga organet e rendit. Policia e Elbasanit nuk dha asnjë njoftim në komunikatën e përditshme, siç ndodh rëndom për ngjarje me arrestime të drejtuesve të automjeteve në gjendje të dehur, apo motoçikleta pa dokumente.
Menjëherë për këtë ngjarje të rëndë, Prokuroria urdhëroi që nga data 11 deri më 26 gusht të mbaheshin nën përgjim, ambiental, fotografik, filmik dhe me audio, Sokol Sanxhaktari, Enea Bekteshi dhe Kelmend Xhaferri. Pavarësisht kërkesës së Prokurorisë së Elbasnit për të mbajtur nën mbikëqyrje personat e lartpërmendur, Policia e Shtetit ka kthyer këtë përgjigje në organin e akuzës. “Nga ana e sektorit të forcës së posaçme, nisur nga dinamika e madhe me shërbime në funksion të procedimeve penale në ndjekje dhe numrit të limituar të ndihmës specialistëve si pasojë e ndjekjes së grafikut të pushimeve vjetore, është e pamundur kryerja e veprimeve të vëzhgimit të fshehtë të personave dhe mjediseve në këtë periudhë kohore”.
Kelmend Xhaferri u prangos në tregun Agro-Ushqimor më 18 shtator, kur u godit makina e nëndrejtorit të Policisë, pasi lëvizte gjatë gjithë kohës me eskortë, ndërsa për dy të tjerët, Policia nuk jep asnjë të dhënë. Në momentin e prangosjes, Xhaferri kishte në përdorim një automjet tip “Range Rover”, ndërsa pas tij qëndronte një “Audi A8” i blinduar. Aktualisht, pas hekurave për ngjarjen e 18 shtatorit qëndrojë vetëm Ledio Zabeli dhe roja i objektit të tregut, Valmir Dedja. Ndërsa ndaj Kelmend Xhaferrit, Gjykata e Krimeve të Rënda urdhëroi qëndrim me arrest shtëpie.
Ndërkohë, autori kryesor i sulmit ndaj Policisë në Elbasan, Suel Çela, është larguar jashtë shtetit nga Aeroporti i Rinasit me ndihmën e Policisë. Denoncimi u bë një ditë më parë nga një oficer policie, i cili i është drejtuar me një mesazh ish-Kryeministrit Berisha. Oficeri i Policisë së Elbasanit shkruan se, Suel Çela është larguar jashtë shtetit që natën e 18 shtatorit, pasi sulmoi me makinë nëndrejtorin e Policisë së Elbasanit. Ai bëri të ditur se, Çela është përcjellë nga Policia në Aeroportin e Rinasit. Biznesmeni Petrit Çela është mik i afërt i kreut të Bashkisë së Elbasanit, Qazim Sejdini dhe kryeministrit Rama. Banda e drejtuar nga djali i tij dhe dhëndri i kreut të Bashkisë detyruan qytetarët që të votojnë për Partinë Socialiste në zgjedhjet e 25 qershorit.

R.POLISI

Emiljano Shullazi, i cili po gjykohet për gjobëvënie dhe kërcënim, duket se po shkon drejt lirisë. Për t’ia arritur këtij qëllimi, ai po ushtron presion ndaj dëshmitarëve nëpërmjet njerëzve të tij që ndodhen në liri për të ndryshuar deklarimet në seancat gjyqësore. Dhe mesa duket kjo skemë e tij po funksionon, pasi disa nga dëshmitarët e thirrur nga organi i akuzës në seancat gjyqësore kanë ndryshuar dëshmitë ndaj Shullazit. Në këtë skemë duket se janë të përfshirë edhe struktura shtetërore, spese ndonëse ligjërisht dëshmitarët dënohen me burg për dëshmi të rreme, deri tani nuk është marrë asnjë masë ligjore për dëshmitarët që kanë ndryshuar dëshmitë në sallën e gjyqit ndaj Emiljano Shullazit.
Gjatë senacave të fundit gjyqësore disa nga dëshmitarët kanë dëshmuar të kundërtën e deklaratave që kanë bërë në Prokurori ndaj Shullazit. Njëri ndër ta ishte edhe biznesmeni nga Lushnja, Adriatik Kërçuku, të cilit iu vu tritol në biznesin e tij në janar të vitit 2016. Ishte kallzimi i tij në Prokurori që la në burg Emiljano Shullazin, por çuditërish ai ndryshoi dëshminë një ditë më parë në seancën gjyqësore.
Biznesmeni Kërçuku, deklaroi para trupit gjykues se nuk e njihte Emiljano Shullazin. Kërçuku u shpreh se disa kohë para se të ndodhte ngjarja, dikush i ishte prezantuar në telefon: “Shullazi jam, të pres të më takosh”, tha ai, ndërsa po sipas tij, një muaj më pas i kishte ndodhur një shpërthim në makinë. “Unë nuk e njoh Emiljano Shullazin. Një ditë të bukur një person më mori në telefon dhe m’u prezantua si Shullazi. Ai më kërkoi të vija ta takoja në Tiranë, por unë nuk pranova. Më pas, pas një viti më është vënë eksploziv tek pronat”, ka deklaruar Adriatik Kërçuku. Por përfaqësuesit e akuzës deklaruan se dëshmia e tij para togave të zeza ndryshonte nga ajo e dhënë para prokurorëve. Prokurorrja e çështjes deklaroi para Gjykatës, se Kërçuku kishte deklaruar para prokurorëve se ishte kërcënuar nga Shullazi.
Të njëjtin version ka mbajtur edhe Ismail Dervishaj, magazinier në biznesin ku ndodhi shpërthimi. 62-vjeçari tha se, nuk njeh asnjë nga të pandehurit, pavarësisht se ka qenë ai që ka pritur personin e prezantuar si Shullazi. Prokuroria kundërshtoi dëshminë e tyre, pasi në hetimet paraprake ata kanë deklaruar tjetër gjë.
Sipas Prokurorisë, kallëzimi i biznesmenit nga Lushnja bëri që Gjykatat e Apelit për Krimet e Rënda të vendosë mbajtjen në burg të Emiljano Shullazit, Blerim Shullazit dhe Gilmando Danit. Kërçuku kishte depozituar një dëshmi në Komisariatin e Lushnjës dhe më pas në Drejtorinë e Policisë së Fierit, ku tregonte se në muajin janar 2016 është telefonuar nga një numër i panjohur, duke i kërkuar takim, por ai i është përgjigjur se s’mund të takoheshin, pasi atë ditë ndodhej në Durrës. Sipas dëshmisë së biznesmenit të aluminit, telefonata e panjohur është kryer pas vizitës që katër djem të panjohur kanë kryer në biznesin e tij në autostradë, afër Lushnjës.
Më tej është zbuluar se bëhej fjalë për Emiljano Shullazin. Në dëshminë e tij biznesmeni Kërçuku, thotë se tek njësia e shërbimit kanë shkuar 4 vetë me një “BMW” të zezë, me targa të identifikuara dhe janë prezantuar tek punëtori i tij, Mili Dervishi, duke i kërkuar takim me pronarin.
Ai ka sqaruar se, njëri prej tyre i është prezantuar si Emiljano Shullazi. Këtë ia ka rrëfyer punëtori i tij, ndërsa vetë biznesmeni thotë se nuk e ka takuar ndonjëherë Shullazin. Telefonata ku i kërkohej takim i ka ardhur pas kësaj “vizite”. Ai e ka refuzuar dhe pak ditë më pas, më 25 janar 2016 një sasi tritoli shpërtheu brenda oborrit të biznesit të tij. Por dëshmitari në seancë e mohoi këtë version, duke shtuar se kërcënuesi nuk ishte Shullazi.
Deri më tani i vetmi që i ka qëndruar dëshmisë së dhënë më parë se, Emiliano Shullazi e ka kërcënuar dhe marrë shuma të mëdha parash në formë gjobëvënie është dëshmitari i mbrojtur Ylvi Beqja. Në dëshminë e dhënë para Gjykatës dëshmitari i marrë në mbrojtje Ylvi Beqja ka treguar se është kërcënuar me armë nga Shullazi dhe u detyrua t’i ofronte shuma të mëdha parash. “Jam detyruar t’i jap pronën sapo kemi shkuar te noterja A. Spahiu, pasi aty Shullazi ka mësuar për shitjen e një pjesë të ish-Vollgës, te çifti Kodra. Pas kërcënimit që më bëri me pistoletë dhe me fjalë të ndryshme, një ditë më pas kam shkuar te noterja A. Spahiu, duke i kërkuar që t’i jepte Shullazit 30 për qind të pronës, dhe jo 20 për qind siç kishim rënë dakord”, ka pohuar në Gjykatë biznesmeni Ylvi Beqja. Gjithashtu ai ka deklaruar edhe për një shumë prej 700 mijë eurosh, që i kishte dhënë Shullazit dhe miqve të tij nëpërmjet kërcënimit.

Të shtëna me breshëri armësh në qytetin e Durrësit. Ngjarja ka ndodhur rreth orës 21:00 të mbrëmjes së djeshme në lagjen nr.18 të qytetit bregdetar dhe si pasojë e breshërisë së plumbave është plagosur shtetasi Marvin Malja. Bëhet e ditur se 25-vjeçari ka marrë dy plumba në këmbë dhe është dërguar në spital. Banorët janë terrorizuar nga breshëritë e plumbave.
Policia ka shkuar menjëherë në vendngjarje. Sipas policisë, ngjarja ka ndodhur mes një blloku pallatesh, në të njëjtin vend ku muaj më parë iu vendos tritol një ambienti që po përdorej nga LSI si zyrë elektorale. Ende nuk dihen shkaqet e plagosjes së 25- vjeçarit me armë.
Ditët e fundit, vendi ka përjetuar një seri krimesh të rënda, të cilat kanë shkaktuar frikë dhe terror tek qytetarët.
Më 18 shtator në Elbasan, një prej bandave të Elbasanit, drejtuar nga Suel Çela dhe Sokol Sanxhaktari, ushtroi dhunë mbi një grup policësh. Makina e Zëvendës/drejtorit të Policisë u përplas nga një makinë e blinduar që dyshohet se është në pronësi të Suel Çelës.
Më 29 shtator në Laprakë, katër persona u plagosën pas një konflikti me armë brenda një lokali. Një ndër personat e përfshirë është Arben Seferaj, person në kërkim për një tjetër vepër penale.
Në Shkodër, ndodhi një shpërthim me eksploziv në katin e parë të banesës 3 katëshe të Avdyl Dërgutit.
më 30 shtator në Peqin, një 63-vjeçar qëlloi me armë zjarri ndaj një 56-vjeçari pas një konflikti.
Më 1 tetor në Vlorë, persona të pa identifikuar qëlluan me armë drejt makinës së Ferdinand Llanajt. Mbetën të plagosur Ferdinand Llanaj, djali i tij 8-vjeçar dhe Dritan Bega. Ndërsa më 2 tetor në Vranisht të Vlorës, një 40-vjeçar u plagos për motive ende të panjohura.

Ish-Kryeministri Berisha ka publikuar mesazhet e dy zyrtarëve, të cilët shprehen se kanë dy muaj pa marrë rrogat. “Punonjësit pa rroga, ministrat zhgërryhen në luks! Ky është shteti i Noriegës! Lexoni mesazhet e punonjësve dixhital!”, shkruan Berisha në një postim në Facebook.
“Përshëndetje Doktor Berisha. Jam një mjek nga Qarku i Dibrës. FSDKSH (drejtoria e Fondit të Sigurimeve Shëndetësore) Dibër ka rreth dy javë pa drejtor dhe pa nëndrejtor dhe nuk është komanduar askush, sepse Beqja i koncesioneve nuk ka mbaruar akoma pazaret e emërimeve. Jemi rreth 600 vetë personel infermier dhe mjek të shërbimit parësor që nuk mund të marrim rrogat. Janë dhe shumë subjekte farmaceutike të pa likuiduara. Ju lutem publikojeni ju këtë shqetësim, sepse ndryshe nuk ndërgjegjësohen ata që na kanë paralajmëruar me kohë që nuk kemi parë gjë akoma. Janë infermierë që presin atë rrogë për të mbajtur familjet e tyre dhe 10 ditë vonesë (e cila mund të shkojë dhe një muaj me këto të papërgjegjshëm) është e palogjikshme. Shumë faleminderit!”
– Nëpunësi dixhital, 100 punonjësit e Ministrisë së Turizmit e Mjedisit pa paga.
“I nderuar Dr. Berisha,
Me shpresën që ju do ta bëni publik shqetësimin tonë, ju bëj me dije se mbi 100 punonjës të Ministrisë së Turizmit e Mjedisit me VETO të ninistrit Klosi nuk kanë marrë pagat e muajit shtator.
Deri në këto momente asnjë procedurë nuk ka nisur ende.
Aktualisht shumë punonjës të Shërbimeve Mbështetëse (Shoferë, pastruese, roje, mirëmbajtës) këtë rrogë e kanë jetike dhe shumë të tjerë e kanë të pamundur të paguajnë kreditë e marra, detyrimet e shkollës për fëmijët e tyre, si dhe nevojat jetike në këto kushte që siç e dini çdo gjë është shtrenjtuar. Ju lutem bëjeni publik këtë mesazh me besimin se ministri Klosi mund të verë dorën në zemër e na jep pagën!”, shkruan zyrtari.

Një pako me eksploziv ishte vendosur mëngjesin e djeshëm në një dyqan rrobash në rrugën “Petro Nini”, pranë Shkollës së Baletit në Tiranë. Policia dhe ekspertët xhenierë që mbërritën në vendin e ngjarjes, konstatuan se lënda plasëse ishte vendosur pranë shkallëve të dyqanit, në pronësi të Bruneta Aliaj, 55 vjeç.
Menjëherë forcat e policisë kanë ndaluar qarkullimin e makinave dhe të qytetarëve në atë zonë, duke nisur procedurat për shpërthimin e kontrolluar të pakos së dyshuar të eksplozivit. Ka qenë telefonata e pronares së dyqanit në atë zonë që ka alarmuar Policinë e Tiranës.
Pas këqyrjes së kryer prej ekspertëve, u vu re se eksplozivi, nuk kishte shpërthyer, pasi nuk kishte të aktivizuar kapsollën dhe detonatorin. Pakoja u administrua nga ekspertët, të cilët do të kërkojnë të gjejnë shenja gishtash, por edhe të mbetjeve biologjike për të identifikuar autorët.
Pronarja 55-vjeçare është bërë objekt i një sulmi edhe në 2 maj të këtij viti. Në veturën e saj “Smart”, shpërtheu një sasi eksplozivi në zonën e 9-katësheve, pa lënduar njerëz. Ajo është shoqëruar nga Policia në Komisariatin Nr.1, ku ka dhënë dëshminë e saj mbi ngjarjen. Policia e lidh ngjarjen e fundit me atë të 4 muajve më parë. Po verifikohen konflikte të mundshme të tregtares 55-vjeçare.

Trupi i pajetë i një 50-vjeçari është gjetur mesditën e djeshme në rrugën që të çon në plazhin e Zvërnecit. Burime nga policia thanë se mesditën e djeshme me anë të një telefonate janë njoftuar se në anë të rrugës, kur shkon për në plazhin e Zvërnecit gjendet një person i pa jetë.
Policia dhe ambulanca kanë shkuar menjëherë në vendngjarje ku edhe kanë konstatuar se ‘në anë të rrugës, në hyrje të plazhit të Zvërnecit gjendet i pajetë 50-vjeçari me inicialet A.J.’ Dyshohet se ky person të jetë vetëhelmuar. Por policia po punon për zbardhjen dhe sqarimin e plotë të rrethanave të kësaj ngjarjeje.

Ushtari profesionist Xhuliano Kasaj i prangosur tashmë, ishte drejtuesi kryesor i rrjetit që tregtonte droga të forta. Edhe pse kishte zgjedhur rrugën fisnike, duke shërbyer si ushtar profesionist në forcat tokësore të Zallherrit, nuk i kishte shpëtuar pjesëmarrjes në aktivitet kriminal. Kokaina e sekuestruar një ditë më parë në Tiranë, kishte si treg të saj lokalet e natës dhe ato të lojërave të fatit.
Xhuliano Kasaj u arrestua ditën e hënë nga oficerët e Komisariatit Nr. 6., në Tiranë, gjatë operacionit të koduar “Tekstili”, dhe iu gjetën në banesë rreth 80 gram kokainë. Së bashku me ushtarin Kasaj, në pranga ra edhe “vartësi” i tij Denis Kanani, i cili përveç kokainës shpërndante edhe kanabis.
Fillimisht për të rënë në gjurmët e Kasajt, Policia kishte mbi një muaj që monitoronte çdo lëvizje të Denis Kananit. Ky i fundit, tregtonte lëndë narkotike në lokalet e natës, në zonën e ish-Bllokut, duke u fiksuar në të paktën 3 raste nga kamerat e sigurisë. Sipas hetimeve blerësit e kokainës dhe kanabisit ishin, personat VIP, si këngëtar apo edhe lojtar i lojërave të fatit.
Ky aksion, lidhet me atë të policisë disa ditë më parë, në kryeqytet, ku u sekuestrua, drogë, tavolina pokeri dhe ambiente të përshtatshme për marrjen e lëndëve narkotike. Fillimisht, komandoja, 22-vjeçar ka tentuar të largohet në momentin e arrestimit të tij, ku po qëndronte në një lokal pranë zonës së ish-Kombinatit Tekstil. Ai ishte munduar më së miri që ta fshihte kokainën në banesë. Policia e gjeti drogën poshtë dyshekut, të mbështjellë me një qese dhe e ndarë në disa doza.