Aksidenti në Memaliaj, ku mbeti i plagosur 59-vjeçari Axhem Mërtiri është kryer nga drejtori i Policisë së Gjirokastrës, Lorenc Panganika. Për këtë ngjarje të rëndë reagoi dje edhe Partia Demokratike. Në një njoftim për mediat, deputeti i PD, Enkelejd Alibeaj bën të ditur se, “Panganika është larguar nga vendi i ngjarjes duke mos i dhënë as ndihmën e nevojshme qytetarit, por tashmë po tenton të manipulojë ngjarjen”. Sipas Alibeajt, drejtori i policisë e rregulloi makinën në servis pas aksidentit, duke tentuar të mbyllë çështjen.
“Një ngjarje e rëndë ka ndodhur në Gjirokastër. Drejtori i Policisë, Lorenc Paganika ka aksidentuar një kalimtar në Memaliaj dhe është larguar nga vendi i ngjarjes duke mos i dhënë as ndihmën e nevojshme qytetarit, por tashmë po tenton të manipulojë ngjarjen. Fatmirësisht qytetari i aksidentuar është jashtë rrezikut për jetën. Makina e tij pësoi dëmtime nga aksidenti, por drejtori nxitoi që ta rregullojë dhe ka lejuar ekspertimin nga grupi hetimor vetëm pasi makina ka dalë nga servisi, duke tentuar të mbyllë çështjen”, deklaroi Alibeaj.
Alibeaj tha më tej se, kjo ngjarje, e gjitha e filmuar, tregon sjelljen e paprecedent të kreut të policisë së një qarku. Sjellja e këtij kryepolici vërteton gjendjen e Policisë së Shtetit, ku shefat e saj janë mbi ligjin dhe nuk ka asgjë të përbashkët me qindra oficerë të tjerë të ndershëm të Policisë së Shtetit. “Kjo është e vërteta. Policia ka kapitulluar përballë krimit të organizuar, trafikut të drogës dhe nuk garanton dot sigurinë e qytetarëve. Ky është realiteti i qeverisë së Edi Ramës, me krimin që zotëron vendin, me drogën që blen zgjedhjet, me kryepolicë që nuk duan t’ia dinë për ligjin”, përfundoi Alibeaj.

Publikimi i videos

Televizioni “OraNews” publikoi dje videon e aksidentit të ndodhur pak ditë më parë pranë fshatit Krahës, ku është përfshirë edhe drejtori i Policisë së Gjirokastrës, Lorenc Paganika. Në pamje duket makina “BMW X1” me ngjyrë të bardhë me targa AA 572 BF.
Aksidenti ka ndodhur pranë fshatit Krahës, në dalje të Gjirokastrës, ku ka mbetur i lënduar 59- vjeçari Axhem Mërtiri. Nga hetimet rezulton se i plagosuri është dërguar në spitalin e Fierit ku është marrë në pyetje nga Prokuroria dhe ka thënë “nuk di kush më ka goditur”. Çështja është regjistruar në Prokurorinë e Gjirokastrës për shkelje të rregullave të qarkullimit dhe largim nga vendi i aksidentit. Sipas hetimeve rezulton se makina e ka goditur kalimtarin me pjesën e pasqyrës së djathtë.

Çfarë fokusuan kamerat

Goditja ka ndodhur në këndin më të largët në pamjen që ka kamera dhe për arsye dhe të natës nuk duket qartë. Por kamera ka filmuar momentin kur drejtuesi i automjetit frenon dhe disa çaste më vonë pasi ikën nga vendi i ngjarjes rikthehet dhe në këto momente dëshmitarët thonë se drejtuesi i mjetit i ka pyetur çfarë ka ndodhur.

Sekuestrohen pamjet filmike

Nga ekspertimi dhe kqyrja që i është bërë makinës së Drejtorit të Policisë Gjirokastër ekspertët kanë shënuar se pasqyra e djathtë e BMW X1 e Paganikës nuk ka dëmtime apo ndërhyrje në pasqyrë. Në vendngjarje është gjetur ndërkohë edhe kasa e pasqyrës së djathtë të makinës që ka shkaktuar aksidentin. Prokuroria ka vendosur të sekuestrojë kamerat e Drejtorisë së Policisë për të parë kur ka hyrë dhe ka dalë Drejtori Paganika në 24 orët e fundit, para dhe deri kur ka ndodhur aksidenti.

Kryetari i Bashkisë së Hasit është i përfshirë familjarisht në trafikun e qenieve njerëzore. Denoncimi është bërë nga një qytetar nga Hasi, i cili i është drejtuar me një mesazh ish-Kryeministrit Berisha. Sipas denoncuesit, kreu i bashkisë së Hasit, Adem Lala sëbashku me vëllezërit e tij merren me trafikimin e qenieve njerëzore nga Shqipëria në Britaninë e Madhe. “Kryetari siçilist i Bashkisë së Hasit i përfshirë familjarisht në trafikun e qenieve njerëzore! Lexoni mesazhin e qytetarit dixhital”, shkruan Berisha.
“Zoti Berisha përshendetje, në fillim ju lutem për konfidencialitet të plotë të këtij mesazhi, sepse ushtroj një funksion publik. Një ndër problemet kryesore me të cilat po përballet Shqipëria janë edhe kërkesat e larta për azil në vendet e BE, dhe ikja nga Shqipëria drejt Britanisë së Madhe të qindra shqiptarëve, fakt ky i denoncuar nga mediat me prestigjioze disa herë. Por po të shkruaj këtë mesazh për të denoncuar një rast i cili deri më sot ka kaluar në heshtje të plotë edhe pse në dijeni të këtij janë çdo institucion ligjzbatues në zonën e Hasit.
Bëhet fjalë për vëllezërit e kryetarit të bashkisë Has, Adem Lala. Vëllezërit e tij, prej vitesh merren me trafikimin e qenieve njerëzore nga Shqipëria drejt Britanisë së Madhe, fakt ky që dihet nga çdo hasjan dhe është lehtësisht i vërtetueshëm. Por nuk përfundon me kaq. Paratë që marrin dy vëllezërit e kryetarit të Bashkise (12-14 mijë paund për një person) kalojnë pikërisht nga kryetari i bashkisë dhe nipi i tij, shofer personal i kryetarit (nuk po e përmendim nepotizmin në këtë rast, sepse ka dhjetëra raste të tjera në këtë bashki të tilla). Pra po ndodh në Has, bashkia më e varfër në vend, Kryetari Lala, detyron hasjanët, të cilët nga varfëria detyrohen t’i drejtohen vëllezërve të kryetarit për të gjetur shpëtim dhe për të ikur nga vendi, këto para qarkullojnë në këtë institucion lirshëm dhe pa kurrfarë kontrolli, kalojnë në llogaritë e kryetarit, nipit dhe vëllezërve të tij. Nuk po e bëj këtë denoncim për të treguar sa keq qeveris kryetari i bashkisë, por për të treguar se ai është kriminel, dhe për t’i bërë thirrje institucioneve të vihen menjëherë në lëvizje”, shkruan qytetari.

Katër persona u plagosën me armë mbrëmjen e djeshme pas një sherri në një lokal në zonën e Laprakës, në kryeqytet. Raportohet se pronari i lokalit, Arben Seferi, është një prej personave të shpallur në kërkim pasi dyshohet të ketë qëlluar mbi katër të rinjtë. Të plagosurit ndodhen në spital jashtë rrezikut për jetën. Alarmi te Policia është dhënë rreth orës 18:40 dhe në vendngjarje kanë mbërritur shërbimet e policisë dhe ambulanca. Sipas Policisë së Tiranës, nga verifikimi paraprak, ka rezultuar se në rrugën “Gjergji Legisi”, pas një konflikti në një lokal, janë plagosur me armë zjarri shtetasit: E.L., 31 vjeç, B.M., 31 vjeç, B.K., 33 vjeç, dhe A.B., 46 vjeç.
Ata janë transportuar në spitain e Traumës, jashtë rrezikut për jetën. Ndërkohë, Policia njofton se janë identifikuar autorët dhe po punohet për kapjen e tyre. Një sherr i momentet dyshohet se ka degraduar më pas në të shtëna me armë zjarri dhe se mes të palëve nuk ka pasur konflikte të mëparshme.

Drejtori i Policisë Beratit, Dilaver Shimaj lëviz me një makinë luksoze që kushton 70 mijë euro, ndërsa u bllokon qytetarëve makinat që kushtojnë 5 milionë lekë të vjetra. Denoncimi është bërë nga një qytetar nga Berati, i cili i është drejtuar me një mesazh ish-Kryeministrit Berisha. Ai shkruan se shefi i policisë së këtij qyteti, po abuzon me detyrën, pasi po u konfiskon makinat qytetarëve me pretendimin se ato janë luksoze, ndërkohë që vetë lëviz me një mjet që kushton 70 mijë euro.
“Nga operacioni i konfiskimit të makinave luksoze! Qytetari dixhital denoncon bosin e Policisë së Beratit për makinën e tij luksoze që i kushton 70 mijë euro ndërkohë që i konfiskon qytetarit si luksoze makinën që e ka blerë 5 mijë euro!”, shkruan Berisha.
“Zoti Berisha po të dërgoj foto të makinës së drejtorit të policisë Beratit, Dilaver Shimaj, një hajdut ish-sigurims, ‘Mercedes’ i 2015, blerë me rrogën e tij të ‘ndershme’ 70 mijë euro. Plus edhe hoteli në Durrës. Anonim të lutem shumë. Targa AA 202 OY. Foto e bërë në ambientet e policisë Berat ditën që morën makinën time që kushton 5000 euro për gjoja luksoze”, shkruan qytetari nga Berati.

Policia italiane e qytetit të Bolonjës ka arrestuar dy shtetas shqiptarë me akuzën e trafikut të drogës të tipit heroinë e armëmbajtje pa leje. Shqiptarët e arrestuar janë Indrit Baldiu, 28 vjeç e Shkëlqim Xhafa, 25 vjeç.
Në banesën e tyre janë gjetur 25 kg heroinë e pastër me vlerë tregu 1 milion euro, rreth 100 mijë euro e një pistoletë gjysmë automatike e tipit “Smith & Wesson” e kalibrit 45 me numër serie të fshirë e dy karikatorë me 16 fishekë.
Arrestimi i tyre është bërë gjatë një kontrolli rutinë të forcave policore nëpër rrugët e qytetit.
Ka qenë sjellja e dyshimtë dhe nervoze e shqiptarit Shkëlqim Xhafa që ka detyruar policët italianë në ndalimin e kontrollin e tij. Në një qese plastike që mbante në duar i janë gjetur 18 mijë euro.
Më pas në kontrollin në banesë ku jetonte së bashku me Indrit Baldiun, 28 vjeç, forcat e policisë kanë gjetur të fshehura rreth 25 kg heroinë që në shitje tregu do të sillte një përfitim prej më shumë se 1 milion euro. Gjithashtu në banesën e shqiptarëve janë sekuestruar dhe 100 mijë euro para të thata dhe instrumente për konfeksionimin e dozimin e drogës.
Dy shqiptarët Indrit Baldiu, 28 vjeç e Shkëlqim Xhafa, 25 vjeç janë emigrantë klandestinë në Itali e të paskeduar më parë nga Policia italiane. Ndaj dy shtetasve shqiptarë është lëshuar urdhri i arrestimit me burg.