E ndërsa Shqipëria vijon të vuajë ndërprerjen sistematike të energjisë elektrike dhe OSHEE nuk garanton dot furnizimin me energji duke blerë masivisht përmes abuzimesh miliona euro energji, administratori i saj, Ardjan Çela shfaqet duke u relaksuar si “sheik” në një nga resortet super luksoze e të shtrenjta të Europës. I majmur nga fondet e vjedhura, Ardjan Çela rezulton të jetë sot një nga njerëzit më të pasuruar nga pushteti. Ai është fotografuar në një nga resortet më të shtrenjta në Ibiza duke pushuar. Një foto e publikuar dje nga ish-Kryeministri Berisha tregon se si Çela është duke pushuar në një nga resortet luksoze të Ibizës, një vend ky i njohur për çmimet super të larta. “Bosi i vjedhjeve në OSHEE, Ardjan Çela, pasi zhyt Shqipërinë në sezonin turistik në errësirë, për vete ka zgjedhur të qetësohet në Ibiza në një resort shumë të shtrenjtë!”, shkruan Berisha në denoncimin e tij. Ardjan Çela cilësohet si kampioni i abuzimeve me tenderat qindra miliona euro të OSHEE. Prej vitit 2014, kur ky institucion u mor nën drejtimin e Çelës, OSHEE rezulton të jetë një nga institucionet që zhvillon më tepër tendera në vend me shifra tepër të larta dhe me shkelje të rënda gjithashtu. I akuzuar dhe i hetuar për abuzime me tenderat që kur ishte në krye të komisionit të tenderave në Bashkinë e Durrësit, Ardjan Çela i qetë vijoi traditën e tij të abuzimit me tenderat edhe në tre vitet e drejtimit të OSHEE. Si fillim, administratori i Përgjithshëm i OSHEE, Ardian Çela është kujdesur që pagën e tij ta ketë edhe më të lartë se të presidentit të Republikës, rreth 3 milionë lekë në muaj (të vjetra). Krahas kësaj, akuzat ndaj tij për abuzime me tendera miliona eurosh jo vetëm për blerje energjie, por më së shumti për tendera luksi nuk kanë fund. Tendera skandaloze duke nisur nga ato prej 890 milionë lekëve për sigurimin e jetës së punonjësve apo tender 1.2 miliardë lekë për mobilimin luksoz të zyrave e madje për ndërtimin edhe të një kuzhine në zyrën e tij, 727 milionë për trajtimin e punonjësve nga stresi etj., janë vetëm maja e badërtisë së vjedhjeve galopante që kanë ndodhur në OSHEE gjatë këtyre viteve nën drejtimin e Çelës. OSHEE është institucioni më “spektakolar”, në fakt duhet thënë më i korruptuar, për zhvillimin e tenderave në Shqipëri. Miliarda lekë “investime”, të cilat kanë një të përbashkët 99.99% e tenderave të zhvilluara janë me 99.99% të vlerës. Këto tendera shkojnë në disa duar të “sigurta”, kuptohet Ardjan Çela gjen dhe mbrojtjen ligjore, kjo duke u kapur pas procedurave, por vështirë se mund t’i shpëtojë një kontrolli dhe investigimi të fortë dhe të rreptë nga Prokuroria. Nuk është e rastësishme që tenderat shkojnë në disa lidhje të forta politike, vëllezër dhe të afërm deputetësh dhe personash me influencë në PS. Shumë prej tenderave janë me ofertues të vetëm dhe me 99.99% të vlerës të tyre. Kanë konflikt interesi disa prej tyre. Të tjerë shkojnë në subjekte me vlerën maksimale të ofruar duke shmangur ofertat më të ulëta. Drejtori i OSHEE shpesh në qarqet mediatike dhe politike akuzohet si simbol i korrupsionit të Rilindjes, kjo jo vetëm nga tenderat me 99.99% të vlerës. Ka të dhëna dhe aludime ende të pafaktuara, kjo për faktin se është mjaft e vështirë të zbardhen, që në OSHEE merret paradhënie 30% për tenderat që zhvillohen dhe së bashku me Çelën janë përfshirë edhe drejtues të tjerë të institucionit.

Kushtet aspak normale dhe mësimi me turne në shkollat e kryeqytetit për kreun e Bashkisë së Tiranës do të zgjidhen brenda muajit me super investimin e bërë nga ‘bujaria’ e arkës së Bashkisë.
Bëhet fjalë për bujën e madhe me të cilën është prezantuar rikonstruksioni i ‘oazit’ të vetëm për balerinët e rinj të vendit, Shkollën e Baletit.
Prej dy ditësh në rrjetet sociale, portale, edicione informative, por sigurisht edhe tek ERTV, është promovuar videoja e rradhës lidhur me Super Investimin e Lali Erit, që nuk është asgjë tjetër veçse përmbushje e detyrueshme kundrejt taksapaguesve dhe banorëve të kryeqytetit, e detyrës së tij si qytetar i parë i Tiranës.
Por, prezantimi i ‘ndjerë’ i investimit, përmes ligjëratës me terma teknikë dhe plot dhembshuri për shkollën e re ngjasonte me entuziasmin e çiftit të ri që flet për shtëpinë e re. Sistem chilleri, parket arlekin, komoditet, hapësira, shumë përkushtim dhe një supër investim janë fjalët kyçe të kreut të Bashkisë që me shumë gjasa i ka të freskëta edhe nga investimet personale. Ndërsa, shumë prej shqiptarëve nuk kanë ende një mundësi për të bërë pushime, jo shumë larg Tiranës, në Qerret, Erion Veliaj i gëzohet një super vile, e cila padyshim është një super investim i rradhës.
Edhe pse pamjet flasin qartë, gjithë eksperienca e marrë nga detyra e re në rikonstruksione, instalime, shtrime pllakash e sheshesh dhe investime me vizion që janë bërë për qytetin, do të pasqyrohet detyrimisht edhe tek luksi i vilës së plazhit. Por, nëse investimet për shkollat dhe kopshtet bëhen nga shteti dhe bashkia, për vilën e Lali Erit kush ka investuar? Të jetë blerë vallë me kursimet e fundit të mamit apo derisa të gjendet alibia perfekte, hë për hë s’do pushojmë fare nga Kavaja?

“Boom.al”

Sa vila ka Erion Veliaj?

Ndërsa portali “Boom.al” ka publikuar foton e një vile të re të Veliaj në Qerret më herët mediat kanë publikuar një tjetër vilë superlukzose të porositur nga bashkëshortja e tij në periferi të Tiranës. Media sociale kanë botuan dokumentat origjinale të projektit dhe të ndërtesës të vilës luksoze dy katëshe në mermer dhe materiale të tjera të cilësisë së lartë prej 600 mijë eurosh të Erion Veliajt.
Dokumentat, kontrata me firmën e ndërtimit Prime Capital dëshmojnë se vetëm ndërtimi kushton 200 mijë euro, këtu nuk përfshihet arrendimi i brendshëm fabuloz shumë më i kushtueshëm se sa ndërtimi. Të gjitha dokumentat janë firmosur nga bashkëshortja e Erion Velisë, Ajola Xoxa, me të cilën Erioni u martua duke bërë me paratë e ministrisë së tij dasmën me dy raunde në Kështjellën e Gjirokastrës dhe në Pezë!
Pyetja që shtrohet është sa vila ka Erion Veliaj dhe ku i ka gjetur këto para për të ndërtuar brenda këtyre katër viteve këto vila? Veliaj tha se dasma e tij në Kalanë e Gjirokastrës dhe më pas në Pezë u bë me kursimet e mamasë. Po qindramilionët e dy vilave mos vallë edhe ato janë ndërtuar me kursimet e mamasë? Çfarë pune kaq fitimprurëse paska bërë mamaja e Erionit?
E vërteta është ndryshe nga ajo që pretendohet. Jeta e luksit të kryebashiakut hajdut të Tiranës ecën në gjurmët e shefit të madh në qeveri përmes vjedhjes së abuzimeve miliona euroshë nga tenderat dhe lekët e ndërtimit. I babëzitur në vjedhje e ka shndërruar Tiranën në një masakër betoni ku ndërtuesit duhet të japin si ryshfet nga një kat tek lali plehu në të kundërt nuk mund të marrin lejen e ndërtimit. Ndërkohë tenderat janë skandalozë në Bashki dhe fitohen në mënyrë të paracaktuar dhe me fonde afër vlerës limit ose me prokurim të drejtpërdrejtë. Janë këto vjedhje dhe abuzimeve skandaloze me paratë e taksapaguesve të Tiranës që i mundësojnë Veliajt jetën e luksit me disa vila dhe shpenzime marramendëse si ato të dasmës. Se si pastrohen paratë e korrupsionit të Veliajt dhe takëmit të Ramës, kjo është e qartë dhe në ndihmë u vijnë edhe bankat si ajo e bashkëshortes së kreut të qeverisë, të cilët janë të regjistruara në parajsat fiskale pikërisht për të humbur gjurmët e këtij korrupsioni galopant.

Enton DACI

Kur vjen puna për tendera dhe zhvatje fondesh, Ilir Beqja nuk zhgënjen. Ai është në krye të listës sa herë që përmenden koncesione, përfitime tenderash apo lajme të tjera të lidhur ngushtë me sasi të mëdha parash. Ai sërish rezulton të jetë duke shijuar fonde marramendëse përmes kompanisë së tij Intech+, që megjithë denoncimet publike dhe akuzat që rëndojnë për përfitimet abuzive të kësaj kompanie, ajo vijon ende të jetë ndër më të lakuarat për fondet që merr nga institucionet publike.

Mjafton një kërkim i thjeshtë në portalin e të dhënave Open Data për të parë se si Ilir Beqja vijon të jetë kampion në zhvatjen e tenderave publikë. Kompania e tij Intech+ numëron dhjetëra tendera të fituara me një vlerë prej 4.1 miliardë lekësh në vetëm një vit, viti 2016 deri në gusht të 2017, ku fondet në 90% të rastit janë dhënë nga Agjencia Kombëtare e Informacionit. Në zërat e specifikuar për tenderat e fituara nga kompania e Beqjes spikasin ato të shërbimeve qeveritare.

Midis shumë institucionesh publike vihet re se shumat më të mëdha i ka përfituar dhe vijon t’i përfitojë edhe sot nga AKSHI për portalin qeveritar “e albania”. Janë rreth 414,851,847.00 lekë ose 4.1 miliardë të fituara për rreth një viti. Në total kompania Intech+, brenda një kohe të shkurtër ka përfituar nga tenderimet publike një shumë rreth 15 milionë dollarë, duke i shtuar shumës së këtij viti edhe 11 milionë dollarë që kompania e tij përfitoi gjatë periudhës 2013-2015.

Sigurisht që suksesi i papritur i kësaj kompanie lidhet me emrin e ministrit të famshëm gjithashtu për tenderimet dhe konçesionet në ministrinë e tij, vetë zotin Ilir Beqaj. Ish-ministri i Shëndetësisë ka qenë aksioner kryesor i kompanisë Intech+, por në momentin e zgjedhjes deputet, për të qenë formalisht në rregull me ligjin, Ilir Beqaj i ka shitur aksionet e tij tek një person tjetër. Likuidimi është bërë me një kontratë të veçantë, që nuk është e publikuar në dokumentacionin në Qendrën Kombëtare të Regjistrimit. Shumëkush e mban mend që Intech+ ia dogji mandatin deputetit Ilir Beqaj në vitin 2011, pasi Gjykata Kushtetuese e quajti shkelje të ligjit faktin që kompania e deputetit socialist kishte përfituar fonde publike nga Bashkia e Durrësit. Për të mos e djegur edhe mandatin e dytë, pasi Partia Socialiste erdhi në pushtet dhe ai u emërua ministër i Shëndetësisë, më 9 shtator 2013, Ilir Beqaj i shiti pra aksionet e tij, 51 për qind, në shumën e afërsisht 120 mijë eurove. Me këtë akt, kompania Intech+ i kishte duart e lira të përfitonte nga tenderat publikë dhe ministri ishte formalisht në rregull.

E ndërsa vetë Beqaj akuzohej thuajse çdo ditë për tenderime e konçesione skandaloze në ministrinë e tij, kompania Intech+ lulëzonte në biznesin e saj me administratën e re të partisë së Ilir Beqajt. Me ose pa ndikimin e kryeministrit Rama, kompania ku kishte qenë pronar ish-ministri i Shëndetësisë, e cila ka si objekt të aktivitetit të saj shërbime të ndryshme të sistemeve kompjuterike, gjatë vitit 2014 është shpallur fituese e 10 tenderave në shumën e afro 2 milionë dollarëve nga institucione si Bashkia Durrës, Albcontrol, Agjencia Kombëtare e Shoqërisë së Informacionit, Instituti i Sigurimeve Shoqërore, Ministria e Financave, Fondi i Sigurimit të Detyrueshëm të Kujdesit Shëndetësor.

Gjatë vitit 2015, Inthech+ ka fituar deri tani plot 18 tendera në shumën e rreth 7 milionë dollarëve, ku institucioneve shtetërore të mësipërme u shtohen edhe OSSHE, Agjencia Kombëtare e Ushqimit, etj. Në total, për katër vite kompania që ishte në emër të ish-ministrit Beqaj, ka marrë rreth 15 milionë dollarë nga tenderat e fituar, në shumën prej të cilave është fituese e vetme, të tjerat në bashkëpunim me kompani të ndryshme.