E ardhmja e mesfushorit spanjoll, Isco është në “Santiago Bernabeu”, pasi kjo është dëshira e lojtarit dhe kryesisë së klubit. Sipas “AS”, lojtari tashmë ka arritur marrëveshje me Realin dhe kjo do të zyrtarizohet pas Superkupës së Spanjës ndaj Barcelonës.
Isco do të nënshkruajë kontratë deri në vitin 2022 dhe do të ketë një klauzolë prej 700 milionë eurove. Kështu Reali dëshiron të ndalë interesimin e skuadrave të tjera për Iscon, i cili kërkohet nga Barcelona, Liverpool dhe Juventus.
Isco do të vazhdojë kontratën me Realin
Tirana, Merveille te Getafe për 400 mijë euro
Merveille te Getafe. Talenti i Tiranës transferohet në atë që konsiderohet gjerësisht si një ndër kampionatet më të fortë dhe të bukur të botës, La Ligën e Ronaldos dhe Messit. Nga shitja e tij klubi bardheblu përfiton bukurinë e 400 mijë eurove, ndërkohë që Tirana do të marrë edhe 10 për qind të të ardhurave në rast rishitjeje të 19-vjeçarit nga Kongo që spikati sezonin e kaluar me talentin e tij në Kategorinë Superiore.
Merveille Ndockyt hyn në këtë mënyrë drejt e në listën e 3 shitjeve më të bujshme të kampionatit shqiptar në këto dekadat e fundit, pas atyre të Olyainkës dhe Bernard Berishës. I kërkuar prej kohësh nga Osijek në kampionatin kroat, por edhe skuadra të tjera, sharmi i Getafes dhe kampionatit spanjoll ka qenë i parezistueshëm për vetë futbollistin, ndërkohë që për klubin është padyshim një biznes i mirë, duke marrë parasysh që oferta e Osijek për Mervielle dhe Aquah ishte në total 550 mijë euro, Tirana tani prej largimit të tij merr 400 mijë euro, ndërkohë që drejtuesit e klubit me largpamësi kanë ruajtur edhe 10 për qind të të drejtave në rast rishitje, duke patur parasysh moshën e re të lojtarit, si dhe faktin që La Liga është një vitrinë ku nëse shkëlqen mesfushori mund të shumëfishojë disa herë vlerën e tij.
Për arkat e Tiranës vjen në këtë mënyrë një garanci e rëndësishme financiare, ndërsa Merveille shkon në La Liga. Të gjithë të lumtur, ndërkohë që vlen të evidentohet se si Kategoria Superiore është kthyer tanimë zyrtarisht në një kampionat me vëmendje më të madhe dhe trampolinë e rëndësishme për kampionatet elitare të Europës, me largimin e Merveille që konfirmon trendin e sulmuesit të Partizanit Khaleb Ekuban, që falë paraqitjeve të mira me të kuqtë arriti të transferohej te Leeds United në Angli.
Morata i shqetësuar te Chelsi: Tifozët tashmë më kanë vrarë
Alvaro Morata nuk e ka nisur siç duhet aventurën tek Chelsea. Sulmuesi spanjoll, Alvaro Morata gjatë kësaj vere u largua nga Real Madrid për të kaluar në Chelsea për 80 milionë euro. Fillimi për Moratën duket të jetë shumë i vështirë, pasi tashmë veç tifozët kanë filluar ta kritikojnë dhe po bëjnë shumë presion mbi të.
Këtë e di edhe Morata, i cili edhe pse thotë se ka luajtur vetëm 15 minuta me Chelsean, tifozët tashmë e kanë “vrarë” atë. “Unë kam luajtur në dy miqësore, 15 minuta në ndeshje zyrtare ndaj Arsenalit ku humba edhe penalltinë dhe tifozët tashmë më kanë vrarë”, tha Morata gjatë një interviste për “Marca”. “Unë e di se çfarë do të më presë në Chelsea. Ndoshta ky presion kaq i madh është edhe për shkak të çmimit të lartë që kanë paguar për mua”.
Ndërkohë, kampioni i Anglisë vazhdon me politikën e saj për huazimin e lojtarëve të rinj dhe atyre që nuk kanë vend në skuadrën e parë. Lewis Baker ka nënshkruar kontratë të re me Chelsean dhe është huazuar për dy sezone të skuadra e Premierligës, Middlesbrough. Ai u kërkua edhe nga skuadrat tjera si Reading, Birmingham City dhe Aston Villa, por trajneri i Middlesbrough i premtoi më shumë minuta.
Baker edhe sezonin e kaluar ishte i huazuar, ku luajti në Vitesse të Holandës bashkë me Milot Rashicën. Chelsea këtë sezon ka shitur ose huazuar mbi 25 lojtarë, duke qenë skuadra më aktive në Evropë.
Dybala merr nr. 10
Paulo Dybala i gëzohet numrit të tij të ri me shpresën se te Juventusi do të ndjekë hapat e një legjende si Alex del Piero. Pas 2 sezonesh si protagonist me numrin 21 mbi shpatulla, sulmuesit argjentinas i është besuar 10-ta e famshme që te bardhezinjtë që pas largimit të ish-kapitenit Del Piero e ka mbajtur mbi supe për vetëm 1 sezon Paul Pogba.
Por me largimin e mesfushorit francez për tek Manchester United verën e kaluar, 10-ta nuk kishte më zot, por në sezonin e ri ajo do t’i përkasë një prej lojtarëve më të talentuar, më spektakolarë që ka patur ndonjëherë Juventusi pikërisht La Joya-s. Është një fanellë speciale, shkruan Dybala në profilin e tij në Instagram, është një nder për mua ta mbaj veshur pasi përfaqëson një përgjegjshmëri shumë të madhe, shton më tej argjentinasi. Për mua është një ëndërr e bërë realitet që nga momenti që kam qenë fëmijë, por tashmë duhet të impenjohem më shumë për të udhëhequr skuadrën time drejt sa më shumë sukseseve, nënvizon Paulo Dybala.
Ndërkohë, Juventus dhe Torino kanë arritur marrëveshje për mesfushorin Tomas Rincon. Mesfushori nga Venezuela, Tomas Rincon është duke kryer testet mjekësore të Torino dhe nga sot do të jetë pjesë e kësaj skuadre.
Rincon është huazuar për dy sezon në Torino me obligim të blerjes. Për huazimin dyvjeçar Juventus do të përfitojë dy milionë euro, ndërsa për shitjen shtatë milionë tjera. Kështu mbyllet aventura e ish-mesfushorit të Genoas në Juventus, i cili kaloi vetëm gjashtë muaj.
Massimiliano Allegri insiston se Leonardo Bonucci nuk u largua nga Juventus për fajin e tij. Mbrojtësi italian, Leonardo Bonuci gjatë kësaj vere u largua nga Juventus për të kaluar në Milan për 42 milionë euro. Në këtë transferim nuk ka gisht trajneri i Juventusit, Massimiliano Allegri.
“Më erdhi shumë keq sepse Leo do të ishte kapiteni i ardhshëm i Juventusit. Do të ishte njeriu i duhur në dhomat e zhveshjes për të transmetuar ADN-në bardhezi”, tha fillimisht Allegri në një intervistë për “Premium Sport”. “Por, bëri zgjedhjen e tij dhe për këtë nuk ka faj askush. Nuk ka faj ai, nuk ka faj shoqëria dhe nuk ka faj as trajneri”.
Allegri ka katër qendërmbrojtës Barzagli, Benatia, Chiellini dhe Rugani, por dëshiron edhe një tjetër në skuadrën e tij. Alternativat e para të Juventusit janë De Vrij i Lazios dhe Ezequiel Garay i Valencias. Por, “Tuttosport” shkruan se Juventus mund të transferojë edhe mbrojtësin e Manchester City-t, Eliaquim Mangala. Është vetë francezi që i është ofruar Barcelonës, duke parë që nuk ka vend në formacionin e Pep Guardiolas. City do të lejonte shitjen e tij, nëse merr një ofertë prej 30 milionë eurove.
Gabigol drejt largimit nga Interi
Interi po finalizon goditjet në merkato për përforcimin e skuadrës së Spallettit, por nga ana tjetër duhet edhe të shesë. Pas Murillos dhe Medel është radha e Gabigol dhe Ansaldit. Për sulmuesin brazilian është e sigurt largimi në huazim për të luajtur rregullisht dhe Sporting Lisbon është në krye të preferencave. Për mbrojtësin argjentinas është vetë agjenti që ka zbuluar se Valencia dhe Fenerbahçe kanë kërkuar informacion për të mundësuar blerjen e tij nga Interi.
Fiorentina ka gjetur pasuesin e Federico Bernardeschit në sulm. Vetëm në rast të ndonjë surprize të fundit mund të pengojë Jese Rodriguez të zbarkojë në Firenze për të nisur një aventurë të re. Spanjolli, i cili nuk është në planet e Emery te Paris Saint Germain, gjysmën e sezonit të kaluar u huazua te Las Palmas ndërsa tani do të huazohet për 2 sezone te Fiorentina me të drejtë të detyruar blerjeje. Gjithsesi për dy sezonet e huazimit, një pjesë e pagës së sulmuesit do të mbulohet edhe nga klubi francez.
E ardhmja e talentit Moise Keane është ende një pikëpyetje. Sulmuesi 17-vjeçar pëlqehet nga shumë ekipe në Itali dhe jashtë saj, por klubi i ka idetë e qarta për të, nëse nuk firmos rinovimin nuk do të ketë mundësi të luajë në një ekip tjetër. Gjithashtu, e ardhmja e tij varet edhe nga afrimi i Keita Balde pasi Keane do të jetë zëvendësuesi i Higuain nëse dështon blerja e lojtarit të Lazios.
Sampdoria duket e dorëzuar për largimin e Patrick Schick dhe tashmë nuk ka më rëndësi ekipi ku do të shkojë, pasi klubi do të arkëtojë 30 mln euro, ndërsa tani misioni është të gjejë pasuesin e sulmuesit çek. Ideja më e fundit e presidentit Ferrero është Duvan Zapata i Napolit, të cilin De Laurentiis e vlerëson 26 mln euro. Një shifër tepër e lartë kjo për Sampdorian, por palët pritet të ulen në tavolinë për të negociuar këtë operacion të rëndësishëm.
30% do jenë spiunë me ligj
Ligji “Për sinjalizimin dhe mbrojtjen e sinjalizuesve”, i miratuar në qershor të vitit 2016, hyri në fuqi këtë muaj. Ky ligj ka për qëllim parandalimin dhe goditjen e korrupsionit në sektorin publik e privat, me anë të të punësuarve brenda këtyre strukturave, të cilët do të raportojnë në rast shkeljesh.
Ligji parashikon që në çdo “organizatë” publike, e papërcaktuar qartë në ligj, por me më shumë se 80 nëpunës dhe në çdo kompani private me më shumë se 100 punonjës, të vendoset një zyrë e quajtur “njësia përgjegjëse”, e ngarkuar për të vëzhguar e më pas raportuar shkeljet nga ana e stafit dhe drejtuesve.
Me hyrjen në fuqi të ligjit, ILDKPKI, institucioni përgjegjës për monitorimin e zbatimit të ligjit dërgoi pranë çdo biznesi që plotëson kushtet, një shkresë për dorëzimin e strukturës së njësisë përgjegjëse dhe të dhënat e sinjalizuesve të kompanisë.
Në vitin 2016, qeveria e prezantoi këtë nismë si gjetjen e fundit botërore për luftën ndaj korrupsionit. Sipas relacionit bashkëngjitur, projektligji u përgatit në bashkëpunim me të ashtuquajturit “ekspertë ndërkombëtarë”, eksperienca e të cilëve ka qenë një “vlerë e shtuar gjatë përgatitjes”.
Por duket se e vetmja gjë që mund të bëjë ky ligj është krijimi i një klime shantazhi kundrejt sipërmarrësve.
Qëllimi i këtyre “njësive përgjegjëse” do të jetë mbledhja dhe hetimi i çdo sinjalizimi apo dyshimi nga ana e të punësuarve për “çdo veprim ose mosveprim të kundërligjshëm, sipas legjislacionit penal në fuqi në lidhje me çdo formë të korrupsionit aktiv e pasiv, shpërdorimit të detyrës ose kompetencave, ushtrimit të ndikimeve të paligjshme në kryerjen e detyrave apo marrjen e vendimeve, shpërdorimit të të ardhurave të buxhetit të shtetit, përfitimit të paligjshëm të interesave, mitdhënies/mitmarrjes, si dhe çdo akt tjetër i ngjashëm me sa më sipër”.
Kjo zyrë do të administrohet nga një ose më shumë punonjës të kompanisë, të përgatitur dhe të përzgjedhur nga shteti- Inspektorati i Lartë i Deklarimit dhe Kontrollit të Pasurive dhe Konfliktit të Interesave, të cilët do të edukohen në mënyrë specifike për mbrojtjen e “sinjalizuesve”.
Punonjësi do të paguhet nga kompania dhe do të ketë detyrën të hetojë, të marrë prova dhe dokumente, duke ruajtur burimin e informacionit dhe duke respektuar sekretin shtetëror (!) deri në kalimin e denoncimit në Prokurori, madje duke ruajtur burimin e informacionit nga çdo hakmarrje e mundshme e kolegëve dhe nga punëdhënësi.
Kjo duket se është hileja e vërtetë e ligjit, mbrojtja e “hafijes” që është dhe vetë titulli i ligjit.
Dhe në këtë pikë, ekspertët kanë bërë më të mirën e tyre: ligji parashikon anulimin e çdo akti hakmarrjeje të kompanisë kundër “hafijes”, kundër tij nuk mund të merret masë disiplinore, nuk mund të pushohet nga puna, lëvizet nga pozicioni dhe as nuk mund t’i ulet paga ose privilegjet.
Dhe ligji, nëse mund ta quajmë të tillë, garanton mirëbesimin e sinjalizuesit për aq kohë sa nuk është provuar e kundërta. Sipas ligjit, ai mund të raportojë edhe vetëm dyshime dhe pastaj i takon të akuzuarit të vërtetojë që nuk e ka kryer aktin për të cilën ka dyshuar sinjalizuesi.
Ky është një modifikim tërësor i Kodit Penal, nëpërmjet një ligji të zakonshëm. Është një kryevepër e vërtetë e teknikës legjislative ballkanase që e kalon barrën e provës nga akuzuesi tek i akuzuari.
Marrim një shembull praktik dhe të thjeshtë, sa për të kuptuar efektet e ligjit: një nëpunës i një rrobaqepësie, i cili ka frikë se do të pushohet nga puna për shkak të rendimentit të ulët në punë, kontakton “njësinë përgjegjëse”. Ai deklaron se dyshon që pronari i rrobaqepësisë i ka dhënë ryshfet menaxherit të kompanisë porositëse për të mos pasur kundërshtime mbi cilësinë e prodhimit. Dhe faktikisht, kohët e fundit nuk ka pasur reklamim nga klienti. Për Kodin Penal shqiptar-neni 164 pika “a”, “korrupsioni aktiv në sektorin privat” dënohet me gjobë ose burgim nga tre muaj deri në dy vjet. Kështu, kolegu i “njësisë përgjegjëse” duhet të hetojë punëdhënësin, i cili duhet të provojë që nuk e ka korruptuar klientin.
Vërtetimi i moskryerjes së aktit është qartësisht i pamundur-si mund të provohet që nuk ke bërë diçka, e cila nuk dihet nëse ka ndodhur?
Në një rast si ilustrimi i mësipërm, loja përfundon 3–0 për punonjësin sinjalizues; ndoshta pronari arrin të korruptojë prokurorin, por me gjasa ai do të humbë kontratën e prodhimit për shkak të pakënaqësisë së blerësit që nuk do probleme ligjore. Si rezultat ai do të ulë numrin e punonjësve. Por, i detyruar nga ligji, ai nuk mund të pushojë atë që e shkaktoi këtë dramë, denoncuesin. Sepse, ai nuk mund të pushohet nga puna dhe mund të qëndrojë në kompani, duke mos bërë asgjë për të gjithë jetën e tij.
Gjë që nuk është e sigurtë për kolegun e tij të “njësisë përgjegjëse”, i cili nuk ka të njëjtën mbrojtje. Përkundrazi, në përgjegjësi të punonjësit të njësisë janë parashikuar gjoba në rast të mosfillimit të hetimeve ose pushimit të pajustifikuar të hetimeve nga ana e tij, gjithmonë në bazë të dyshimeve në mirëbesim të denoncuesit.
Ngarkimi i barrës së provës të akuzuarit është një gabim juridik, i cili e largon Shqipërinë nga Europa me të paktën dyqind vjet. Dhe qeveria duhet të dijë se për të gjetur raste të shpërdorimit të detyrës nuk duhen kaq shumë ngatërresa, mjafton një vështrim rrotull ose një lexim i gazetës.
Por problemi nuk është nëse ky gjysmë ligj i shkruar keq do të funksionojë apo jo, kjo është absolutisht e sigurtë: ligji nuk do të prodhojë asgjë më shumë se dëmtime, sherre, shkatërrime sociale dhe ekonomike, shpenzime të shtuara për kompanitë, terror, frikë, ankth dhe ndjenjë persekutimi.
Dhe ndoshta është pikërisht ky qëllimi i vërtetë: terrori, por jo për të gjithë.
Sepse në fakt, Agjencia e Prokurimit Publik, duke qenë se ka vetëm 22 punonjës, nuk do të ketë “njësi përgjegjëse” ose “komisar politik”, siç quheshin në një kohë tjetër.
Spiunët do shpërblehen me ngritje në detyrë
Në projektin e këtij ligji, i diskutuar dje në një takim këshillues në Ministrinë e Drejtësisë, “spiunët” e shkeljeve njihen me përcaktimin “bilbilfryrës”. Në 26 nene, projektligji propozon mënyrën si do të realizohet vjelja e informacionit, krijimi i organeve të specializuara brenda organizatave, ruajtja e konfidencialitetit të kallëzuesit, masat që do të merren pas kallëzimit, e deri te shpërblimet dhe mirënjohjet ndaj “spiunit”.
“Shpërblime apo forma të tjera mirënjohjeje mund të përfshijnë njohjen publike apo shpërblime (nëse janë të pranueshme për bilbilfryrësin), rritje në detyrë, ose një ndjesë publike për ndëshkimin”, thuhet në nenin që propozon shpërblim. Ditën e djeshme, ministri i Shtetit për Çështjet Vendore, Bledi Çuçi, në cilësinë e koordinatorit kombëtar kundër korrupsionit, në bashkëpunim me Ministrinë e Drejtësisë, organizoi takimin e parë konsultues mbi këtë projektligj. Në takim ishin të pranishëm përfaqësues të ministrive të linjës, institucioneve të pavarura, si dhe donatorëve të projektit.
“SPIUNET”
Në variantin fillestar të projektligjit sqarohet se termi “bilbilfryrës” nënkupton çdo person që kallëzon ose zbulon informacione në lidhje me shkelje të ndryshme. Sipas projektligjit, mbrojtje përfitojnë vetëm informatorët e sinqertë. “Një person që nën një kallëzim apo demaskim, që tashmë dihet se është fals, nuk ka të drejtën për mbrojtje”, thuhet në projekt. Nenit 5 i projektligjit parashikon organin ku do të bëhen kallëzimet. “Brenda çdo organizate publike ose private me 10 ose më shumë punonjës dhe me një xhiro vjetore ose bilanc vjetor që i kalon vlerën prej 2 milionë eurosh, duhet të ngrihet një organ i posaçëm për të marrë kallëzimet e bilbilfryrësve. Ky organ mund të jetë një departament specifik, ose një person i caktuar enkas për atë detyrë”, vijon pika 1 e këtij neni. Referuar projektligjit, identiteti i bilbilfryrësit mbahet i fshehtë gjatë gjithë fazave të procesit.
KOMISIONI
Në projektligj propozohet krijimi i një komisioni, i cili do të jetë një organ i paanshëm dhe i pavarur qeveritar. Ky organ do të marrë dhe shqyrtojë kallëzimet e bilbilfryrësve, do të ndërmarrë masat brenda fuqive të veta, si dhe do të njoftojë Prokurorinë për shkeljen e konstatuar. Në vërejtjet e shprehura në projektligj propozohen disa variante për emrin e këtij organi: “Autoriteti bilbilfryrës”, “Komisioni kombëtar i bilbilfryrjes” ose “Komisioni për parandalimin e korrupsionit”.
SHPËRBLIMI
Mbrojtja e “spiunëve” zë një hapësirë të gjerë në projektligj. Kështu, në nenin 15 thuhet se bilbilfryrësi ka, ndër të tjera, të drejtën e mbrojtjes kundër ndjekjes penale për shpifje apo shkelje të sekretit zyrtar, mbrojtjes së dëshmitarit, si dhe të dëmshpërblimeve të efektshme. Më tej propozohet mbrojtja e kallëzuesit nga hakmarrja, që nënkupton pushim nga puna, pezullim, ulje në detyrë apo forma të tjera të hakmarrjes lidhur me punën. Në rastin kur jeta e “spiunit” është në rrezik, në projektligj propozohet përfitimi i masave mbrojtëse për të dhe familjen e tij.
NGA PROJEKTLIGJI
• Termi “bilbilfryrës” nënkupton çdo person, i cili kallëzon ose zbulon informacione në lidhje me shkelje të ndryshme.
• Kallëzimet apo demaskimet nuk konsiderohen të jenë bërë në mirëbesim në rastin kur ato janë abuzive, dashakeqe, të pavlera, apo kur ka mundësi të jenë shpifje.
• Në momentin e vendosjes së kontaktit të parë me organin e përcaktuar, bilbilfryrësi do të informohet se identiteti i tij do të mbahet i fshehtë gjatë gjithë fazave të procesit dhe veçanërisht nuk do t’u jepet palëve të treta, personit të lidhur me çështjen apo organit drejtues të bilbilfryrësit.
• Në rastin e komunikimit me Prokurorinë ose me autoritete të tjera për zbatimin e ligjit, komisioni do të pajtohet me detyrimet strikte të konfidencialitetit dhe ua komunikon informacionin e përpunuar vetëm personave të specifikuar në Prokurorinë publike ose autoriteteve ligjzbatuese.
• Në rastet e kallëzimeve të brendshme, organi i posaçëm është përgjegjës për mbrojtjen e bilbilfryrësit kundër hakmarrjes.
• Çdo akt ndërhyrjeje, parandalimi apo reprezaljeje ndaj kallëzimit të një bilbilfryrësi për një shkelje, do të konsiderohet si sjellje e keqe dhe do të bëhet subjekt i sanksioneve disiplinore, administrative dhe/ose civile.
• Shkeljet që duhet të denoncojnë “spiunët”.
•Në këtë akt, shkelje do të thotë një veprim ose mosveprim që përfaqëson rastin e një korrupsioni
• Detyrimi për të krijuar spiunë.
• Në një nen të draftit të përgatitur thuhet se të gjitha organizatat dhe sektorët publikë ose privatë duhet të krijojnë procedura dhe mekanizma kallëzues të brendshëm dhe të garantojnë se kallëzimet për shkelje të ndryshme do të hetohen
• Denoncuesit nuk paditen për shpifje.
• Në një nga nenet e tjera të draftit thuhet se personat që kryejnë spiunim të rasteve të ndryshme të korrupsionit dhe shkeljeve në organet shtetërore apo private, kanë të drejtën e mbrojtjes kundër ndjekjes penale për shpifje apo shkelje të sekretit zyrtar ose privat.
• Varësia e raportimit te ministri.
• Në ligjin e ri është përcaktuar edhe varësia e mekanizmave që do të mbledhin kallëzimet e “spiunëve” dhe që më pas do t’i administrojnë ato. “Komisionet” të cilat do të krijohen në çdo rast dhe në çdo strukturë për të marrë kallëzimet e “bilbilfryrësve”, do të kenë lidhje varësie direkte nga ministri që mbulon institucionin në rastin e administratës shtetërore dhe fushën e veprimtarisë në rastin e biznesit dhe kompanive private.
Kallëzimet anonime, ligji i lejon
Në draftin e paraqitur për diskutim ditën e djeshme, “spiunëve” u njihet e drejta që të paraqesin kallëzime edhe në mënyrë anonime. Sipas ligjit, një raportues në momentin e parë që bie në kontakt me “komisionin marrës të kallëzimit”, ka të drejtë të kërkojë qëndrimin e tij anonim. Pasi të shpjegojë arsyet e këtij qëndrimi, ai ka të drejtë të paraqesë kallëzimin, ndërsa në ligj thuhet se për këto raste duhet bërë kujdes i veçantë.
Spiunët, zbardhet skema si po emërohen strukturat
Në datë 15 korrik të gjitha bizneset që kanë mbi 100 të punësuar duhet që të kenë ngritur strukturën që do të jetë përgjegjëse për përmbushjen e detyrimeve që vijnë nga Ligji “Për sinjalizimin dhe mbrojtjen e sinjalizuesve”. Në një shkresë që Inspektorati i Lartë i Deklarimit dhe Kontrollit të Pasurisë dhe Konfliktit të Interesave, ka dërguar pranë kompanive që plotësojnë kriterin e numrit të të punësuarve vihet theksi tek zbatimi i kërkesave ligjore dhe ngarkimi me përgjegjësi administrative dhe penale në rast neglizhimi.
Procedura për ngritjen e strukturës
Por si po procedohet nga kompanitë për ngritjen e kësaj strukture? Si përzgjidhet stafi që do të jetë pjesë e njësisë përgjegjëse? Më poshtë do të japim modelin konkret nga një biznes që ka emëruar tashmë strukturën. Së pari nga ana e ortakut të kompanisë miratohet një vendim për ngritjen e strukturës së Njësisë Përgjegjëse, si dhe rregulloret e brendshme që sanksionojnë përshtatjen me kërkesat që ka Ligji “Për sinjalizimin dhe mbrojtjen e sinjalizuesve”. Pas kësaj nga ana e administratorit bëhet emërimi i punonjësit të zgjedhur në njësinë përgjegjëse. Punonjësi në rastin konkret është përgjegjës departamenti. “Ju bëjmë me dije se ju jeni i përzgjedhuri për ndjekjen e gjithë praktikave të dyshuara të korrupsionit për shoqërinë …. në përputhje me dispozitat e Ligjit 60/2016. Nëse jeni dakord me këtë përzgjedhje ju lutem vendosni nënshkrimin tuaj tek kjo shkresë dhe depozitoni një kopje origjinale pranë shoqërisë (X)”, thuhet në kopjen e emërimit të përgjegjësit të njësisë. Pas kësaj është në dorën e të emëruarit për të pranuar pozicionin ose për ta refuzuar atë. Referuar dokumenteve për rastin në fjalë punonjësi ka pranuar të jetë pjesë e njësisë duke deklaruar se, “Unë i nënshkruari (X) lindur në datë ( ) në Tiranë dhe banues në Tiranë, mbajtës i letërnjoftimit, madhor dhe me zotësi të plotë për të vepruar e punuar në pozicionin e drejtuesit të Departamentit pranë (X) shoqërie themeluar sipas ligjit shqiptar dhe regjistruar pranë Regjistrit Tregtar shqiptar mbajtur nga Qendra Kombëtare e Biznesit me seli në rrugën …Tiranë. Pasi mora dijeni për përzgjedhjen në njësinë përgjegjëse për ndjekjen e procesit të praktikave të dyshuara të korrupsionit për shoqërinë (X) në përputhje me dispozitat e Ligjit 60/2016. Nëpërmjet kësaj shkrese deklaroj se e pranoj në njohje të plotë të detyrave që duhet të përmbush për pozicionin që më keni caktuar”. Pasi merret miratimi edhe nga personi i emëruar atëherë biznesi vë në dijeni Inspektoratin e Lartë të Deklarimit dhe Kontrollit të Pasurisë dhe Konfliktit të Interesave. Bashkëngjitur dokumentit të urdhrit për ngritjen e strukturës, emërimit të personit përgjegjës dhe pranimit të detyrës së caktuar nga punonjësi vendosen edhe gjeneralitetet e tjera që kanë të bëjnë me personin e strukturës së “spiunazhit”. Kjo strukturë duhet të ketë të paktën një person.
Qëllimi i strukturës sipas ligjit
Qëllimi i këtij ligji është marrja e informacioneve dhe sinjalizimeve nga sinjalizuesit, njësia përgjegjëse ose e drejtpërdrejtë nga ILDKPKI për rastet e veprave penale të korrupsionit, çdo veprim ose mosveprim të kundërligjshëm sipas legjislacionit penal në fuqi, në lidhje me çdo formë të korrupsionit aktiv, korrupsionit pasiv, shpërdorimit të detyrës ose kompetencave, ushtrimit të ndikimeve të paligjshme në kryerjen e detyrave ose marrjen e vendimeve, shpërdorimit të të ardhurave të buxhetit të shtetit, përfitimit të paligjshëm të interesave, si dhe çdo akt tjetër të ngjashëm me to të kryer në subjektin tuaj nga pronarët, administratorët, drejtuesit dhe cilido tjetër, hetimin e këtyre rasteve nga ILDKPKI dhe përcjelljen e tyre organit të Prokurorisë dhe policisë kur gjenden elementë të veprave penale të mësipërme. Bizneset që kanë mbi 100 të punësuar janë të detyruar të ngrenë strukturën e “spiunazhit” brenda datës 15 korrik dhe të dërgojnë pranë Inspektoratit të Lartë të Deklarimit dhe Kontrollit të Pasurisë dhe Konfliktit të Interesave gjeneralitetet e personave të përzgjedhur. Menjëherë pas zgjedhjeve, shumicës së bizneseve që janë të klasifikuara me mbi 100 punonjës u ka shkuar një shkresë që përcakton edhe detyrimin që iu lind atyre për ngritjen e një strukture të posaçme që vjen si detyrim i Ligjit “Për sinjalizimin dhe mbrojtjen e sinjalizuesve” i miratuar një vit më parë. Në shkresën e firmosur nga kryeinspektori Shkëlqim Ganaj thuhet se në rast se nuk zbatohet kjo kërkesë, atëherë biznesi ngarkohet me përgjegjësi administrative dhe penale. Ligji “Për sinjalizimin dhe mbrojtjen e sinjalizuesve” do të funksionojë në administratën publike, por edhe te kompanitë që kanë mbi 100 të punësuar. Rastet që do të sinjalizohen do të lidhen me korrupsionin, shpërdorimin e detyrës, ushtrimit të ndikimeve të paligjshme në kryerjen e detyrave ose marrjen e vendimeve apo shpërdorimin e të ardhurave të buxhetit. Sinjalizuesit do të jenë punonjës të institucionit publik, por edhe atij privat, do të paguhen nga këta të fundit dhe gëzojnë status dhe mbrojtje të veçantë me ligj.
Pse qeveria nuk shpall gjendjen e jashtëzakonshme për zjarret?
Flakët e zjarreve që kanë pushtuar vendin po përpijnë mijëra hektarë me pyje dhe zona të mbrojtura, ndërsa Rama dhe ministrja vazhdojnë pushimet në bregdet. Si është e mundur që janë qindra vatra zjarri dhe mijëra hektarë pyje të djegura dhe qeveria nuk shpall gjendjen e jashtëzakonshme,
Flakët e zjarrit po rrezikojnë edhe zonën turistike në Sarandë. Bëhet e ditur se, një zjarr me përmasa të mëdha ka rënë pranë Syrit të Kaltër, zona e njohur dhe e frekuentuar shumë nga turistët, sidomos gjatë verës. Për të shuar zjarrin që rrezikon zonën turistike janë nisur zjarrfikëset nga Delvina dhe Gjirokastra, pasi në Finiq, zonë e cila mbulon Syrin e Kaltër, nuk ka zjarrfikëse.
Ndërkohë, flakët e zjarrit vijojnë të përpijnë pyjet në Parkun Kombëtar të Dajtit. Flakët kanë përfshirë një sipërfaqe me shkurre në Parkun e Liqenit të Tiranës rreth orës 14:00 dhe është shuar nga ndërhyrja e menjëhershme e punonjësve të zjarrfikëses. Mësohet se nuk ka pasur dëme të mëdha, por është djegur vetëm një sipërfaqe me shkurre. Mbas malit të Dajtit, tek ‘Antenat’ flakët përpijnë pyje e kullota. Edhe në fshatin Trovë të Ulzës janë riaktivizuar vatrat e zjarrit që në orët e para të mëngjesit të djeshëm.
Zjarret kanë marrë përmasa të mëdha në Gjirokastër, duke vënë në rrezik edhe nënstacionin elektrik në Grapshit. Ka qenë Operatori i Shpërndarjes së Energjisë Elektrike, i cili ka njoftuar autoritete për të reaguar sa më parë, pasi zjarri i është afruar shumë nënstacionit.
Në Dropull, zjarret e rëna po shkaktojnë dëme të mëdha. Në fshatin Lugar zjarret kanë qenë shumë pranë banesave, duke vënë në rrezik dhe jetën e njerëzve. Ndërsa situata është paraqitur e rënduar dhe në Frashtan, Horace dhe Goricë. Flakët dhe tymi i madh e ka bërë të vështirë ndërhyrjen e helikopterëve. Për shuarjen e flakëve janë angazhuar edhe banorët e zonës.
Vatra e zjarrit në Muzinë është riaktivizuar ditën e djeshme, duke krijuar rrezik për zonën përreth. Banorët të fshatit Frashtan në Dropull, të shqetësuar nga flakët e zjarrit kanë kërkuar ndërhyrjen e forcave zjarrfikëse. Ndërhyrja e zjarrfikësve është e nevojshme në këtë zonë, pasi duhet të mbrohen manastiret. Mësohet se një nga zjarrfikësit është lënduar gjatë operacionit për shuarjen e zjarrit. Nisur nga situata e vështirë, banorët kanë kërkuar ndërhyrje me helikopter për të vënë në kontroll flakët.
Zjarret që kanë përfshirë vendin prej dy muajsh po shkaktojnë dëme të mëdha. Mbi 1 200 hektarë është sipërfaqja e djegur nga zjarret. Prej të cilave, 724 hektarë pyje, 182 hektarë në zona të mbrojtura dhe 273 hektarë kullota. Dëmi i deritanishëm, sipas përllogaritjeve të Ministrisë së Mjedisit është mbi 66 milionë lekë të reja, ose 500 mijë euro. Po kaq po kushtojnë pothuajse operacionet për shuarjen e zjarreve. Pjesa më e madhe e tyre shkon për ndërhyrjet nga ajri.
Helikopterët e angazhuar në operacione kanë kryer qindra fluturime. Për çdo fluturim, kompanisë private që i disponon, Emergjencat Civile i paguajnë nga 150 mijë deri në 337 mijë lekë të reja.
Drejtuesit e Emergjencave flasin për afro 200 orë fluturime dhe përllogarisin rreth 500 mijë euro të tjera. Fondi i disbursuar deri tani për helikopterët është 230 mijë euro. Në kostot paraprake nuk janë llogaritur shpenzimet për forcat zjarrfikëse apo ato të ushtrisë. Deri tani në të gjithë vendin ka pasur 280 zjarre, disa prej të cilave ka rezultuar se janë vendosur qëllimisht.
Zjarret i afrohen Tiranës, vatër edhe tek Parku i Liqenit
Situata e zjarreve në Shqipëri është bërë aq shumë alarmante, sa që vatrat kanë mbërritur edhe pranë kryeqytetit. Së fundmi flakët nuk kanë kursyer as periferinë më të afërt të Tiranës, ku mësohet se një vatër zjarri ka shpërthyer në një pjesë të Parkut të Liqenit.
Sipas informacioneve të para, bëhet fjalë për një zjarr masiv të rënë në Parkun e Liqenit, ndërsa në vendin e ngjarjes kanë shkuar forca të shumta zjarrfikëse që po punojnë për izolimin e flakëve dhe mos përhapjen e tyre në të gjithë parkun. Deri tani nga flakët nuk rrezikohen banesat.
Situata paraqitet e vështirë në Qarkun e Tiranës. Vazhdon operacioni për shuarjen e vatrave të zjarrit në Malin e Derjes pranë fshatit Shëngjergj, Bashkia Tiranë. Zjarrfikësit së bashku me forcat ushtarake janë në vendngjarje, por për shkak të terrenit të thyer kanë vështirësi për shuarjen e zjarrit. Si pasojë është djegur një sipërfaqe e konsiderueshme me pisha dhe shkurre.
Në fshatin Maknor, Pezë, Bashkia Tiranë, ka rënë zjarr në një sipërfaqe me shkurre. Në vendngjarje janë dërguar 3 automjete zjarrfikëse me personelin përkatës dhe forca ushtarake, por nuk kanë arritur ta shuajnë zjarrin. Operacioni vazhdon edhe ditën e sotme. Si pasojë e zjarrit është djegur një sipërfaqe e konsiderueshme me shkurre.
Në fshatin Kuç, Bashkia Vorë, ka rënë zjarr në një sipërfaqe me shkurre. Në vendngjarje janë dërguar 2 automjete zjarrfikëse me personelin shoqërues, por nuk kanë mundur të shuajnë plotësisht zjarrin. Operacioni është në vazhdim edhe ditën e sotme. Si pasojë e zjarrit është djegur një sipërfaqe e konsiderueshme me shkurre.
Në Kavajë, është izoluar vatra e zjarrit në pyllin me pisha të fshatit Cikallesh. Forcat zjarrfikëse me mjete, të ndihmuar edhe nga helikopteri kanë izoluar zjarrin. Si pasojë u dogj dhe u përshkua një sipërfaqe rreth 90 ha me shkurre dhe pisha.
R.POLISI
11 vatra të reja zjarri vetëm ditën e djeshme, situatë e rëndë në Gjirokastër
Gjatë 24 orëve të fundit në të gjithë vendin janë shënuar 11 vatra zjarri të reja. Emergjenca Civile njoftoi në mesditë se po vazhdon puna e forcave zjarrfikëse për të shuar zjarrin në afërsi të tunelit të Krrabës në aksin rrugor nacional Tiranë-Elbasan.
QARKU BERAT
Zjarri i rënë te Parku i Bogovës, Bashkia Skrapar, ka vazhduar edhe gjatë ditës së djeshme. Zjarrfikësit nuk kanë mundur të ndërhyjnë për shkak të terrenit të thyer malor. Pritet ndihma nga helikopteri.
QARKU ELBASAN
Në fshatin Gjinar, Bashkia Elbasan ka vazhduar puna e forcave zjarrfikëse të mbështetura dhe nga forcat ushtarake, për të shuar zjarrin e rënë në shkurre dhe pisha. Ditën e djeshme ka ndërhyrë helikopteri, duke ulur intensitetin e zjarrit të rënë. Operacioni është në vazhdim.
Në operacione për shuarjen e zjarreve janë angazhuar 133 punonjës zjarrfikës, 18 automjete zjarrfikëse, 162 personel nga Forcat të Armatosura të Ushtrisë, dhjetëra vullnetarë punonjës të Pyjores dhe të bashkive etj., të mbështetur nga helikopterë dhe 2 avionë të ardhur nga Greqia.
QARKU DIBËR
Në fshatin Madhesh, Bashkia Burrel, zjarri i rënë ka qenë aktiv. Zjarrfikësit dhe forca ushtarake, të pyjores etj., kanë punuar gjithë kohën, por nuk kanë mundur të izolojnë vatrat e zjarrit. Ende vazhdon operacioni për shuarjen e flakëve.
QARKU GJIROKASTËR
Në fshatin Jorgucat, Bashkia Dropull ka vazhduar zjarri i rënë, në një sipërfaqe me shkurre dhe kullotë, i cili ka kaluar më pas në fshatin Muzinë, Bashkia Finiq. Për shuarjen e zjarrit kanë punuar forca zjarrfikëse me automjete, forca ushtarake, dhe forca të bashkive Dropull, Finiq e Gjirokastër. Në operacione, në fshatin Muzinë, janë përfshirë edhe dy avionë të ardhur nga Greqia.
Gjatë operacioneve kanë marrë plagë të lehta dhe 2 punonjës zjarrfikës, por pa rrezik për jetën e tyre. Gjatë mesnatës zjarri ka kaluar në afërsi të ‘Syrit të Kaltër’, midis fshatit Muzinë dhe qytetit Delvinë ku po ndërhyhet me helikopter dhe forcat zjarrfikëse.
QARKU SHKODËR
Në Gruemirë, Bashkia Malësi e Madhe, ka rënë zjarr në një sipërfaqe me shkurre dhe pemë frutore. Zjarrfikësit me mjete kanë ndërhyrë, duke shuar zjarrin. Si pasojë e zjarrit u dogj një sipërfaqe rreth 2 ha me shkurre dhe disa pemë frutore.
QARKU FIER
Në fshatin Dukas, Bashkia Patos, ka rënë zjarr në një sipërfaqe me shkurre, bar dhe ullinj. Zjarrfikësit kanë ndërhyrë dhe kanë arritur të shuajnë zjarrin. Si pasojë u dogj një sipërfaqe rreth 0,5 ha me shkurre, rreth 30 dengje bari dhe rreth 50 rrënjë ullinj.
Zjarret rrezikojnë Gjinarin turistik
Një masiv pyjor i mbuluar me pisha dhe ahe po digjet në fshatin Derstilë të Elbasanit, duke rrezikuar edhe Gjinarin turistik. Flakët janë duke djegur sipërfaqe të mëdha me shkurre dhe pisha. Për shkak të terrenit të thyer, flakët është e vështirë të fiken. Forcat dhe mjetet tashmë janë pozicionuar në afërsi të zonave të banuara, pasi zjarri po përparon me shpejtësi drejt malit Bukanik. Vetë banorët kanë apeluar për ndërhyrje nga ajri, pasi sipas tyre situata mbetet kritike. Zjarri është i qëllimshëm dhe deri tani janë djegur 20 hektarë me pisha dhe ah.
Kreu i Antimafias: Shqipëria biznes kolosal me drogën
Prokurori i Antimafies italiane, Franco Roberti ka dhënë sërish alarmin për trafikun e drogës nga Shqipëria drejt Italisë. Vrasja e tmerrshme e katër personave në Foggia të Italisë, mes të cilëve gjendej edhe bosi i klanit të Manfredonias ka kthyer edhe njëherë vëmendjen nga kriminaliteti i madh që ka kapluar zonën e Puglias. Por këtë ngjarje që ka shkaktuar bujë të madhe përtej Adriatikut, prokurori i Antimafies italiane, Franco Roberti e ka lidhur edhe me trafikun e drogërave që vjen nga Shqipëria. “Sot, konflikti është ndezur rreth trafikut të drogës, sidomos të drogave të lehta që vijnë nga Shqipëria. Një biznes kolosal që ushqen oreksin e klaneve dhe që përfshin gjithë bregun Adriatik, nisur nga ai foxhian deri në Europë”, ka thënë ai pas krimit të tmershëm.
Kreu i Antimafies italiane, Franco Roberti që është një njohës i mirë i Shqipërisë ka kërkuar bashkëpunim më të fortë me autoritet shqiptare për gositjen e trafikut të drogës:
“Natyrisht duhet bërë më shumë, edhe në planin e bashkëpunimit ndërkombëtar për të ndaluar lumin e drogave të lehta që vijnë nga Shqipëria, sepse janë pikërisht ato që çojnë në shpërthimin e konflikteve. Ishim në Shqipëri muajin e kaluar për të kërkuar bashkëpumim, takuam në Romë ministrin e Brendshëm shqiptar që premtoi bashkëpunim më të madh. Duhet të fitojmë mbi omertanë dhe për ta bërë këtë duhet krijuar një kulturë e ligjshmërisë që në atë territor është ende periferik”, është shprehur Roberti.
Një njësi vrasësish e përbërë nga katër ose pesë persona u vunë të mërkurën në ndjekje të një makine ku ndodhej objektivi kryesor Mario Luciano Romito, 50 vjeç, i konsideruar si bosi i klanit të Manfredonias, në Gargano. Për vrasjen janë përdorur dy armë, Ak 47 dhe një armë gjahu, kalibri 12. Në fillim vrasësit kanë vrarë Romiton dhe kunatin, Matteo de Pajma që bënte shoferin, më pas janë vënë në ndjekje të një makine ku ndodheshin dy fshatarë që kishin qenë rastësisht dëshmitarë. Vëllezërit Luigi dhe Aurelio Luciani, 47 dhe 43 vjeç nuk ja dolën dot të largoheshin.
Ngjarja ka bërë bujë në Itali, sepse risjell në vëmendje skenat e Siçilisë së viteve ’80 – ’90, por në një rajon si Pulia, kriminaliteti i organizuar i të cilës, deri më tani nuk është konsideruar i të njëjtit nivel me atë të Siçilisë dhe Napolit, por droga shqiptare po ndryshon situatën në terren.
Kreu i Antimafies italiane, Franco Roberti ka deklaruar se shpërthimi i konflikteve mes grupimeve mafioze po vjen si rezultat i drogërave të lehta që mbërrijnë nga Shqipëria. Roberti flet për një biznes kolosal që ushqen oreksin e klaneve, ndërsa kërkon krijimin e një kulture të ligjshmërisë në Shqipëri, që sipas tij vazhdon të jetë periferike.
Kjo nuk është hera e parë që Franko Roberti flet për kriminalitetin shqiptar. Edhe në të shkuarën ai ka bërë deklarata të forta që kanë pështjelluar politikën vendase. Në vitin 2016 në kulmin e mbjelljes së plantacioneve me kanabis në të gjithë Shqipërinë, Roberti bëri deklaratën bombë se, “është trefishuar sasia e drogës që është kultivuar në Shqipëri!”. Po ashtu në një tjetër deklaratë të fortë po atë vit ai tha se, vitet e fundit autoritetet shqiptare e kanë ulur nivelin e tyre të bashkëpunimit me antimafian italiane.
R.POLISI
Kryesore
Continue to the category
Festivali i arkitekturës/ Musai: Akt i mirëfilltë teatral. Po përdoret për...
Doriana Musai, urbaniste tha se festivali i arkitekturës se ishte një akt i mirëfilltë teatral dhe se fjalimi i Ramës ishte folklor dhe poezi.
Sipas...
