Kontrolli i Lartë i Shtetit ka kallëzuar në Prokurori ish-drejtorin e ALUIZNI-t për Qarkun e Korçës dhe 3 ish-zyrtarë të tjerë të kësaj agjencie. Në deklaratën për mediat bëhet e ditur se, pas auditimit ka rezultuar se personat e kallëzuar i kanë shkaktuar buxhetit të shtetit një dëm në total prej 96.2 milionë lekësh. Ish-drejtori i ALUIZNI-t për Qarkun e Korçës bashkë me tre ish-zyrtarët e tjerë i kanë shkaktuar buxhetit të shtetit një dëm në total prej 96.2 milionë lekësh, duke kryer legazime në zona të ndaluara nga ligji, afër rrugëve kryesore, lumenjve, kanaleve, shtyllave të tensionit të lartë pa dokumentacion, si dhe kanë kryer transaksione të paligjshme me pronat shtetërore dhe regjistruar privatizime, pa u paguar detyrimet ndaj shtetit, duke tjetërsuar pronat “shtet” dhe kthyer prona nga lloji “shkëmb” në llojin “arë”, duke favorizuar persona të interesuar. Procesi i auditimit ka nisur në datën 3 mars të vitit 2017, nga i cili u konstatuan parregullsitë. Nga ky auditim, u konstatuan një sërë shkeljesh dhe parregullsi të zbatimit të dispozitave ligjore në fuqi, që konsistojnë në legalizime të paligjshme, si dhe shkelje në pranimin dhe administrimin e dokumentacionit tekniko-ligjor në miratimin e lejeve të legalizimit. Sipas auditit të KLSH, në 375 raste, në marrjen e vendimeve në kualifikimin e objekteve informale, ka dërguar pranë bashkive në rang qarku, vetëm shkresën për llogaritjen e pagesën e taksës së ndikimit në infrastrukturë, pa marrë konfirmim mbi pagesën e kryer, për dalje me vendim kualifikimi, duke krijuar një mungesë të ardhurash në buxhetin e shtetit në vlerën 38,506,651 lekë. Në 23 raste është evidentuar një sipërfaqe parcelë ndërtimore brenda/jashtë vijës së verdhë e palegalizuar prej 8207 m2(në total), me një vlerë prej 18,468,003 lekë, (çmimi i tregut referuar zonave kadastrale), duke shkaktuar mungesë të ardhurash në buxhetin e shtetit për fondin e kompensimit të ish-pronarëve. Në 42 raste, legalizimi i objekteve informale është kryer në kundërshtim me dispozitat e ligjit të legalizimit dhe akteve nënligjore të dala në zbatim të tij, ndër të cilat: në 17 raste, janë kryer legalizime të objekteve pa respektuar distancat nga rrugët nacionale e urbane ku sipas dokumentacionit disponibël në dosje, si gentplani, harta dixhitale e paraqitur, rezulton se objektet ndodhen në një distancë prej buzës së rrugës nacionale më pak se përcaktimet ligjore, në kundërshtim me ligjet në fuqi. Për këto shkelje dhe për shumë të tjera, me shkresën Nr. 222/9, datë 06.07.2017 KLSH ka kryer kallëzim penal në Prokurorinë e Rrethit Gjyqësor Korçë për I.B., me detyrë ish-drejtor, N.L., ish-përgjegjës i sektorit të hartografisë dhe sektorit të legalizimit, si dhe për T.K., dhe D.Q., ish-përgjegjësa të sektorit të legalizimit, për konsumim të elementëve të veprës penale të “Shpërdorimit të detyrës”, neni 248 i Kodit Penal. Kontrolli i Lartë i Shtetit, në zbatim të programeve të auditimit nr. 285/1, datë 15.03.2017 dhe 702/2, datë 15.10.2015 ka përfunduar auditimin në Zyrën Vendore të Regjistrimit të Pasurive të Paluajtshme (ZVRPP) Korçë, për periudhën janar 2014–dhjetor 2016 të aktivitetit të këtij institucioni. Nga auditimi rezultuan një sërë shkeljesh të ligjeve dhe dispozitave nënligjore në fuqi. Në 5 raste, në Zonat Kadastrale (ZK) ZK 8561, ZK 2307 dhe ZK 3819, fshati Voskopojë janë regjistruar toka sipas Akteve të Marrjes së Tokës në Pronësi (AMTP) dhe AMTP-ve u mungon njëra nga vulat, për të cilat, nuk janë verifikuar elementët e formës dhe të përmbajtjes së Aktit Administrativ. Në 3 raste, ZVRPP Korçë ka regjistruar pasuritë e paluajtshme për poseduesit e AMTP-ve përkatëse, të cilët kanë përfituar më tepër tokë, se sipërfaqja e përcaktuar në AMTP, në total sipërfaqen prej 7230 m2, e llojit arë. Në 2 raste, në ZK 2631 “Mborje”, kanë regjistruar pasuri “Reparti i parafabrikateve i poligonit të ndërtimit”, me sipërfaqe të përgjithshme 15035 m2 të përfituar nga privatizimi, në mungesë të kontratës së marrëdhënieve me truallin (kontrata e qirasë) ose dokument tjetër si vendim i KKK Pronave, etj., për sipërfaqen 5035 m2 nuk kanë likuiduar vleftën e objektit, si dhe qiranë për 5035 m2, për periudhën 3-vjeçare të përdorimit në vlerën 16,714 mijë lekë, për të cilën nuk është paraqitur asnjë dokument financiar vërtetues, që përbën dëm ekonomik për buxhetin e shtetit. Kanë regjistruar pasurinë “Arë” me sipërfaqe 15675 m2, ZK 2631 “Mborje”, bazuar në vendimin nr. 231, datë 26.10.2007 të ZRKK Pronave, Qarku Korçë, nga ku rezulton se për sipërfaqen 15030 m2 është ndryshuar zëri kadastral “Pyll” në zërin “Arë”. Në 5 raste për sipërfaqe 2733 m2, kanë kryer kalimin nga sistemi hipotekor në sistem regjistrimi, duke lëshuar çertifikata pronësie, edhe pse ka rezultuar se ka rritje të sipërfaqes së truallit në + 449 m2, e pa mbështetur me dokumentacion pronësie. Në 1 rast, në ZK 1538 “Drenovë”, kanë regjistruar pasuri “Stalla komplekse të ndodhur tek ish-Fusha e Aviacionit”, me sipërfaqe “Ndërtesë” 4545 m2 dhe “Truall” 10067 m2, të përfituar nga privatizimi, sipas Ligjit nr. 7512, datë 10.08.1991, ku sipërfaqja rrjedh nga bashkimi i 5 pasurive, ndërmjet të cilave pasuritë “Rrugë”, “Kanal”, “Shesh”, për një sipërfaqe prej 5003 m2. Kanë regjistruar vendimin nr. 56, datë 13.01.2016 të Gjykatës së Rrethit Korçë, për pasurinë 719/1 me sipërfaqe 4,400 m2, duke ndryshuar zërin kadastral nga shkëmb në arë, duke vepruar në kundërshtim me vendimin nr. 33, datë 08.12.2005 të Gjykatës Kushtetuese, Ligjin nr. 9385, datë 04.05.2005 “Për pyjet dhe shërbimin pyjor”, i ndryshuar. Për këto shkelje dhe për shumë të tjera, me shkresën Nr. 285/9 datë 07.07.2017 KLSH ka kryer kallëzim penal në Prokurorinë e Rrethit Gjyqësor Korçë për SH.V., AK., DH.Ç., K.B., dhe E.R., ish-regjistrues të ZVRPP Korçë, si dhe për A.D., dhe E.N., nëpunës të këtij institucioni, për konsumim të elementëve të veprës penale të “Shpërdorimit të detyrës”, neni 248 i Kodit Penal.
Zhgënjimi i Shpëtim Saraçit dhe largimi i tij
Shpëtim Saraçi dhe bashkëshortja e tij, Mira Konçi, janë dy nga ikonat e muzikës së lehtë shqiptare, emrat e të cilëve janë gdhendur jo vetëm në mendjen e artdashësve shqiptarë, por edhe historisë së muzikës dhe skenës në Shqipëri. Pas largimit të tenorit shqiptar me famë botërore, Agim Hushi, një tjetër lajm mbushi gjithë portalet e agjencitë informative: Shpëtim Saraçi dhe Mira Konçi lënë Shqipërinë, nisin jetën në SHBA. Në një rrëfim të shkurtër mbi lajmin për largimin e tij, në fjalët e Shpëtim Saraçit dukshëm përcillet zhgënjimi i madh që ai ka marrë pas 30 vitesh pune të palodhur, përkushtimi e dedikimi për skenën dhe muzikën shqiptare. Ai shprehet se tashmë është duke e menduar largimin dhe se këtë hap, nëse do ta ndërmarrë, do ta bëjë për të ardhmen e fëmijëve, për shkollimin e tyre në një sistem të konsoliduar arsimor. “Ajo që është e sigurt, është që po mundohemi të ndihmojmë fëmijët të shkollohen në një sistem arsimor të konsoliduar dhe jemi në kohën kur çdo familje në botë e bën këtë gjë… Për të tjerat, çdo gjë është fakultative. Di që departamentin e punës në RTSH që drejtoja, na e shkrinë (një redaksi me traditë 55-vjeçare) në emër të krijimit të ca strukturave të reja që nuk ekzistojnë në asnjë vend të botës. Di që megjithëse punova me gjithë shpirt e pasion, për rreth 30 vite në Shqipëri (ku pësova edhe trauma shëndetësore, që mund të më kushtonin edhe jetën) prapë se prapë përfundova duke mbrojtur të drejtën time nëpër gjyqe. Megjithatë, njerëzit e vendit tim i dua dhe i respektoj pafund”, u shpreh Saraçi, teksa shpreh keqardhjen që i duhet të diskutojë të qëndrojë apo të largohet nga vendi i tij, ku ndërtoi një karrierë të gjatë e të suksesshme.
Siguria në plazhe, Romeo Gurakuqi: Edhe sa njerëz duhet të vdesin që të ndërhyhet?
Deputeti i Partisë Demokratike në Qarkun Shkodër, Romeo Gurakuqi përmes një statusi në “Facebook” ngre disa pyetje rreth plazhit të Velipojës lidhur me sigurinë dhe praninë e autoritetit shtetëror. Ngjarjet e rënda në bregdetin shqiptar ku dhjetëra njerëz kanë humbur jetën kanë bërë Gurakuqin t’i kërkojë llogari shteti përmes pyetjes: Edhe sa njerëz duhet të vdesin që të ndërhyhet?
“Si dhe sa është i pranishëm autoriteti shtetëror, qendror dhe krahinor, në Plazhin e Velipojës: në respektimin e standardeve të sigurisë njerëzore? Në kontrollin e parametrave në shërbimet publike? Në kushtet e krijuara pas dhënies së lejeve, nga çadrat deri tek bizneset? Si monitorohet kontrolli i çmimeve nga monopolistët e çadrave, hotelerisë etj? A japin faturë “tagrambledhësit” çadravënës dhe dhomalëshues? A ka frena ambicja e tyre për çmime tej nivelit të arsyes dhe tregut? A plotësojnë kushtet etike dhe moshore shitësit e shërbimeve? Si respektohen kushtet e higjenës? Cili është niveli i ndotjes akustike në plazh?
A parashikohet një kod i respektimit të repertorit muzikor, tipit të muzikës, në momentin e dhënies së licencës?! Sinjalistika dhe vijëzimi i rrugëve, shtrimi i tyre dhe sheshet? A vazhdojnë të jenë të lira sheshet publike në Velipojë? Cili është roli paraprirës edukativ qytetar i shtetit? Besoj se ky rregullim nuk duhet lënë për vitin e ardhshëm. Thirrje për emergjencë në kthimin e autoritetit. Sa njerëz duhet të vdesin që të ndërhyhet për të vendosur rregullin civil? Sa vite duhet të presim që Plazhi i Velipojës të operojë me standardet turistike të pjesës pararojë të Shqipërisë bregdetare? Edhe sa kohë duhet të kalojë dhe sa mijëra vota ë tjera duhet të tregtohen, që të ketë një përshkrim tipologjik dhe profesional të liderit biznesbërës që aplikon për licencë?!” shprehet deputeti demokrat.
Më i madhi në Tiranë është Noriega, të tjerët janë më të vegjël se ai!
Ish-Kryeministri Berisha ka reaguar pas zbardhjes së përgjimeve italiane mbi rrjetin e trafikut të drogës në Shqipëri dhe lidhjet me krerët e lartë të pushtetit. Në përgjime flitet për shuma parash që kalojnë për llogari të të “madhit në Tiranë”. Për Berishën nuk ka dyshim se më i madhi është Noriega, duke iu referuar Ramës, sepse të tjerët janë më të vegjël se ai, thotë Berisha
Statusi
“Përgjimet e fundit të shërbimeve inteligjente, të trafikantëve të lumit të drogës që vërshon drejt Italisë, kanë zbuluar se ata, shuma të mëdha parash ndajnë me të “mëdhenjtë” pra me narko-çakot dhe me “më të madhin fare” në Tiranë, i cili është një dhe vetëm një; Noriega dhe vetëm Noriega!
Më poshtë keni shkrimin dhe tekstin e zbardhjes së përgjimeve të trafikantëve! sb
“Trafikonin tonelata drogë me avion: Këto pako me para, janë për më të madhin në Tiranë!
11:25, 07/08/2017
Dhjetëra tonelata drogë që kapet në Itali, Greqi, e shtete të tjera, të cilat kanë si pikënisje Shqipërinë ashtu siç kanë deklaruar edhe shërbimet inteligjente ndërkombëtare, trafikantët kanë bashkëpunimin e zyrtarëve të lartë shqiptarë.
Gati në të gjitha përgjimet e trafikantëve të kanabisit në bisedat e tyre flitet për lidhje me zyrtarë të lartë në Tiranë, apo drejtues kryesorë të policisë. Rasti më i fundit është ai i grupit të trafikantëve të Vlorës, që u kapën në vitin 2015, pasi u zbulua se përdornin një avion sportiv, për ta trafikuar hashashin nga Shqipëria drejt Italisë.
Në trafik rezultoi i përfshirë edhe një shef policie, por trafikantët flasin për njerëz “të mëdhenj”, madje për “të madhin fare” në Tiranë.
Përgjimet janë kryer me anë të një aparati të vendosur në makinën e Sokol Burhamajt, organizatorit të trafikut, por edhe me metoda të tjera. Një pjesë e tyre, që është zbardhur tregon pikërisht lidhjet e trafikantëve me zyrtarë të lartë që u garantonin qetësinë për të kultivuar plantacione të tëra me kanabis.
Ky grup trafikantësh u zbulua falë një hetimi të policisë italiane për dy familje shqiptare, Lamaj dhe Hametaj, që trafikonin drogë me avionë nga Vlora në Brindisi”. Familja Lamaj përdorte një avion “Aeropakt A22S”, në të cilin autoritetet italiane arritën të vendosin një përgjues.
Mjete përgjimi u vendosën edhe në tre makina tip “Audi” që përdoreshin nga trafikantët.
Operacioni i koduar me emrin “Fluturimi i Lirë” nisi më 24 gusht me arrestimin nga autoritetet italiane të Vilson Lamajt dhe të italianit Italo Loreto. Ata po zbrisnin në një pistë të braktisur në komunën e Ostunit avionin me 128 kilogram kanabis që e kishin marrë në zonën e Lumit të Vlorës.
Shqipëria në flakë, Rama plazh dhe luks në vilën qeveritare në Dhërmi
E ndërsa Shqipëria i është dorëzuar pushtetit të flakëve, Kryeministri Edi Rama vijon prej një jave të freskohet në vilën luksoze qeveritare në Dhërmi. Në fakt e gjithë qeveria është me pushime. As kryeministri dhe asnjë ministër nuk ka reaguar as edhe një herë të vetme në lidhje me situatën në vend, ndonëse do të duhej të ishte shpallur që prej një muaji gjendja e emergjencës civile. Prej një muaji, Shqipëria nga veriu në jug është përfshirë nga zjarret masive, mijëra sipërfaqe pyjesh e kullotash janë bërë shkrumb e hi, ashtu si edhe mijëra sipërfaqe ullishtash, vreshtash, dru frutorë e kulturash bujqësore janë asgjësuar tërësisht.
Por flakët nuk po kërcënojnë vetëm sipërfaqet e pyjeve dhe kulturat bujqësore. Për shkak të përmave të mëdha të zjarreve, flakët po kërcënojnë seriozisht banesat dhe jetët njerëzore. Janë me dhjetëra rastet e ndihmës së kërkuar nga banorë të zonave të ndryshme, të cilët i drejtohen mediave për të kërkuar ndihmë, ndërsa qeveria vijon pushimet, inekzistente për të përmbushur detyrimet e saj.
Por ndërsa banorët thërrasin për ndihmë dhe apeli i tyre shkon në vesh të shurdhët, Rama vijon i qetë pushimet e tij luksoze në vilën qeveritare të restauruar tërësisht nën kujdesin e tij, pa e vrarë fare për situatën emergjente me të cilët po përballet vendi dhe banorët e zonave të prekura.
Edi Rama e ka rikonstruktuar vilën e pushimit duke e kthyer në një vilë në stil modern, me ngjyra të lehta dhe i ka shtuar edhe disa piktura, ndërsa duken karriget e markës Kartell, një prej më të njohurave për mobilimin e shtëpisë. Por ndërsa ka shpenzuar qindra mijëra euro për disa ditë pushime luksoze në Dhërmi, Rama ka zhdukur fondet e emergjencave civile duke lënë vendin të shkrumbohet derisa zjarret të shuhen vetë.
Dje, një zjarr i përmasave të mëdha rrezikoi disa familje në fshatin Trodhen në Bushkash. Banorë të zonës kanë ngritur shqetësimin e tyre për situatën e krijuar, pasi flakët po u afroheshin shtëpive të tyre. Duke folur për “News 24”, një nga banorët thotë se nga zjarri rrezikohen jo vetëm banorët, por edhe disa stane në zonë dhe bagëtitë e tyre. Banorët e zonës bëjnë apel për ndihmë në “News24”, pasi deklaronin se ndihen tejet të rrezikuar, pasi flakët po u mbërrinin afër shtëpive. Ndërhyrja nga toka është e vështirë për shkak të terrenit të vështirë, ndaj banorët bëjnë apel që të dërgohen helikopterë për të shuar zjarrin.
Ndërkohë të gjitha qarqet e vendit vijojnë të vuajnë zgjerimin e vatrave të zjarrit. Shtabi i emergjencave civile ka ngritur duart lart duke deklaruar se e ka të pamundur të përballojë situatën duke kthyer sytë në drejtim të paditur.
Zjarret, papërgjegjshmëria totale po shokon çdo shqiptar
Ministria e Mjedisit e ministrit Lefter Koka nuk duket gjëkundi. Atyre nuk “u bën” aspak përshtypje situata dhe po merren me pastrimin e mjedisit, edhe këto ditë që u kanë mbetur. Deputetja demokrate, Dhurata Çupi ka reaguar për zjarret në Qarkun e Dibrës, ndër të tjera ka thënë se qeveria ka edhe një ministri për mirëmbajtjen e pyjeve, teksa nënvizon se qeveritarët po pushojnë nëpër plazhe duke mos u shqetësuar për zjarret. Në këtë rast, Çupi i referohet ministrit të Mjedisit, Lefter Koka, nga radhët e LSI. “Ta mendosh që shqiptarët paguajnë edhe një ministri për mirëmbajtjen e pyjeve e kullotave. E kjo ministri nëse do të ishte sadopak e kujdesshme duhet të merrte masa për dëmet ekologjike dhe mjedisore që po i shkaktohen vendit tonë nga djegia e pyjeve… Strukturat për mbrojtjen e pyjeve dhe kontrollin është minimalist. Në Bulqizë ka vetëm 3 specialistë në mijëra hektarë pyje. Edhe në Dibër e në Mat e njëjta situatë. Mungesa e theksuar e ndërgjegjes nuk justifikon papërgjegjshmërinë totale, e cila shokon çdo shqiptar”, shkruan ajo.
Zjarret djegin Shqipërinë, pushteti vendor merr pushime
Zv.ministri i Mbrojtjes, Petro Koçi, ka folur për situatën e krijuar nga vatrat e zjarrit në vend, ndërsa tha se forcat e ushtrisë janë të angazhuara maksimalisht në vënien në kontroll të situatës. Ndërkohë që ka evidentuar edhe problematikën që është evidente me Emergjencat Civile dhe kalimin e tyre në kompetencat e pushtetit vendor. Petro Koçi ka kritikuar ashpër drejtuesit e pushtetit vendor në lidhje me menaxhimin dhe funksionimin e sistemit zjarrfikës. “Pjesa e Emergjencave Civile është për t’u riparë, ka nevojë për ristrukturim, për menaxhim më të mirë të burimeve njerëzore. Është pa kuptim që forca e armatosur ndërhyn, ndërsa titullarët e pushteti vendor janë me pushime apo ata të mjedisit”, tha Petro Koçi. Kujtojmë se nga 61 bashki në vend, shërbim zjarrfikës ofrojnë vetëm 38 prej tyre, ndërsa në 23 bashki shërbimi zjarrfikës nuk ekziston.
Zjarret, Berisha: Rama nuk ka kohë të lërë pushimet
Ish-kryeministri Berisha denoncon “papërgjegjshmërinë” e kryeministrit Rama, i cili në këtë situatë emergjente, kur Shqipëria digjet, ai gjen kohë të lahet e të pushojë. “Rama ndërron vendpushimet e tij Durrës, Dhërmi etj., etj., duke thënë kështu se ai nuk ka kohë për të lënë pushimet dhe për t’u marrë me problemin e zjarreve”, shkruan Berisha. “Shqipëria në flakë, Noriega: Nuk kam kohë të lë pushimet! Të dashur miq, thatësira e zgjatur, temperaturat e larta të verës, kanabistët që kërkojnë parcela të reja, masat tejet të dobëta sa për sy e faqe antizjarr të qeverisë kanë bërë që këtë verë të digjen qindra dhe mijëra hektarë pyjesh në të katër anët e vendit. Përkundrejt thirrjeve të drejta për të shpallur gjendjen e jashtëzakonshme si Maqedonia, angazhuar helikopterët e ushtrisë dhe kontraktuar avionë të mëdhenj për shuarjen e zjarreve, Rama ndërron vendpushimet e tij Durrës, Dhërmi etj., etj., duke thënë kështu se ai nuk ka kohë për të lënë pushimet dhe marrë me problemin e zjarreve. Fundi i fundit edhe ato do t’i shuajë me dy-tre mexhlisë! sb”.
Vendi në emergjencë të pashpallur
Situata me zjarret në vend vijon të jetë shumë problematike. Vetëm në 24 orët e fundit në të gjithë vendin janë shënuar 10 vatra zjarri, në Vlorë, Elbasan, Dibër, Durrës, Tiranë dhe Tepelenë. Ndërkohë që pasditen e kësaj të hëne u riaktivizua vatra e zjarrit në Njësinë Administrative Ulëz të Matit. Mësohet se zjarri u është afruar shtëpive çka ka bërë që banorët të alarmohen dhe të kërkojnë ndërhyrjen e shërbimit zjarrfikës. Pavarësisht nga përpjekja e zjarrfikëseve, era dhe terreni i vështirë malor, favorizon përhapjen e flakëve.
Dibër, zhduken sipërfaqe me pisha dhe lisa
Në vendin e quajtur “Gurra e Sllatinës” në fshatin Sllatinë, Njësia Administrative Sllovë, Bashkia Dibër, u kryen operacione nga ajri për shuarjen e zjarrit. Si pasojë e zjarrit u përshkrua një sipërfaqe rreth 20 ha me pemë pishe. Si pasojë e zjarrit është djegur një sipërfaqe rreth 6 dynym me dushk të ulët dhe pemë lisi.
Fshatrat e Vlorës prej një jave nën zjarr
Zjarri i rënë disa ditë më parë, në një sipërfaqe me shkurre, në fshatin Tragjas, Njësia Administrative Orikum, Bashkia Vlorë ka vazhduar edhe ditën e djeshme. Shërbimi i MZSH Vlorë nuk ka mundur të shkojë në vendngjarje për shkak të terrenit të vështirë. Zjarri u vu nën kontroll pasi në ndihmë kanë ardhur 2 avionë nga Greqia, të cilët sipas komunikimeve të bëra në QKOEC, kanë kryer 2 hedhje me ujë në vatrat e zjarrit që ishin shumë problematike. Si pasojë e zjarrit u dogj një sipërfaqe e konsiderueshme me shkurre.
Elbasan, operacionet për shuarjen e zjarreve dështojnë
Në Liqenin e Dushkut, Njësia Administrative Lenie, Bashkia Gramsh, ka rënë zjarr në një sipërfaqe me shkurre dhe pisha. Shërbimi vendor i MZSH Gramsh, ka shkuar në vendngjarje, por e ka pasur të pamundur për të vepruar me automjet zjarrfikës për shkak të terrenit të thyer malor. Forcat ushtarake kanë shkuar në vendngjarje dhe kanë punuar, por nuk kanë arritur të shuajnë zjarrin. Operacioni për shuarjen e zjarrit po vazhdojnë, por pa sukses. Si pasojë e zjarrit është djegur një sipërfaqe e kosiderueshme me shkurre dhe pisha.
Berat, zjarret fitojnë terren
Tek Parku i Rezervatit të Bogovës, Njësia Administrative Bogovë, Bashkia Skrapar, ka rënë zjarr në një sipërfaqe me shkurre dhe pisha. Shërbimi i MZSH Skrapar nuk ka mundur të shkojë në vendngjarje për shkak të terrenit të thyer malor. Si pasojë e zjarrit u dogj një sipërfaqe e konsiderueshme me pisha dhe shkurre.
Durrës, digjen sipërfaqet me ullinj
Në fshatin Zgërdhesh, Njësia Administrative Fushë-Krujë, Bashkia Krujë, ka rënë zjarr në një sipërfaqe me ullinj. Si pasojë e zjarrit u dogjën rreth 200 rrënjë ullinj.
Tiranë, forcat ushtarake nuk shuajnë dot zjarrin
Në afërsi të tunelit të aksit nacional Tiranë-Elbasan, Njësia Administrative Krrabë, Bashkia Tiranë, ka rënë zjarr në një sipërfaqe me shkurre. Shërbimi vendor i MZSH të Bashkisë Tiranë ka dërguar në vendngjarje 2 automjete zjarrfikëse me personelin shoqërues. Forcat ushtarake kanë shkuar në vendngjarje dhe kanë punuar, por nuk kanë arritur të shuajnë zjarrin. Si pasojë e zjarrit është djegur një sipërfaqe e kosiderueshme me shkurre. Në afërsi të Repartit të Gardës, në Malin e Dajtit, Bashkia Tiranë, ka rënë zjarr në një sipërfaqe me shkurre dhe pisha.
Policia i dorëzon krimit autorin e videos së atentatit
Tre ditë më parë në Tiranë rreth orës 19:40, në rrugën “Sulejman Delvina”, katër persona të armatosur tentuan të vrisnin të riun Lorenc Hoxha.
E gjithë kjo ngjarje e cila tronditi kryeqytetin është sjellë nëpërmjet një kamere amatore, ku makina që ndodhej pas autorëve ka filmuar të gjithë skenën, duke u bërë një ndihmesë shumë e madhe për Policinë për identifikimin e autorëve.
Në pamje duken 4 të rinjtë, mes tyre atentatori Dejvis Rustemaj, i cili i afrohet mjetit të Lorenc Hoxhës, hap derën e makinës dhe e qëllon me armë zjarri, ndërsa ky i fundit manovron me shpejtësi, duke u larguar. Menjëherë pas tij largohen me shpejtësi dhe autorët e krimit.
Pak ditë më vonë edhe Policia publikoi një tjetër video nga një tjetër pozicion, marrë nga kamerat e Bashkisë të vendosura në kryqëzime. Në këtë video, policia është siguruar që të fshehë targat e makinave të autorëve dhe objektivit të atentatit, si dhe fytyrat e tyre, por me ose pa qëllim targa e makinës që ka filmuar të gjithë ngjarjen nuk është fshirë nga pamjet, duke e nxjerrë atë zbuluar përballë atentatorëve të Lorenc Hoxhës.
Ndoshta nga nxitimi për të publikuar sa më shpejt videon e ngjarjes për t’u treguar të gjithëve se kanë bërë punën e tyre në një kohë rekord, ajo nuk është kujdesur aspak për personin që i ndihmoi ato për të identifikuar autorët.
Dhe në këtë rast, ndodh ajo që nuk ishte menduar të ndodhte. Policia është bërë shkak ndoshta për ndezjen e një konflikti të ri mes katër të rinjve Dejvis Rustemajt, Klajdi Kodrës, Igler Qoses, Ardit Xheferrit dhe personit që i flimoi ato.
E ndërsa në shumë vende të tjera të botës, Policia i mbron persona të tillë, madje u jep edhe shpërblime, Policia shqiptare i lë zbuluar ato, duke vënë në rrezik jetën e tyre.
Policia fatkeqësisht, pasi i dekonspiron shpesh kërkon publikisht edhe bashkëpunimin e qytetarëve për të zbuluar autorët e ngjarjeve kriminale, por në fakt është vetë ajo që i nxjerr zbuluar përballë autorëve të krimit.
Kryesore
Continue to the category
