“Liria e lëvizjes do të marrë fund në mars 2019”, deklaroi kryeministrja britanike, Theresa May përmes zëdhënësit të saj. Pas daljes nga BE do të ketë rregulla të reja dhe një sistem regjistrimi për migrantët nga Bashkimi Evropian. Që të spekulosh tani për detajet do të ishte gabim, theksoi zëdhënësi. Ai shtoi se qeveria tashmë i ka hartuar propozimet e saj për të drejtat e qytetarëve të shteteve të BE pas marsit 2019.
May ndërhyri në këtë mënyrë, që nga pushimet, në një grindje në kabinetin e saj. Sepse kohët e fundit aty janë dëgjuar deklarata të ndryshme për temën e migrimit.
Kështu, ministri i Financave, Philip Hammond u shpreh që pas daljes së Britanisë së Madhe nga Bashkimi Evropian të mos ndryshohen menjëherë rregullat e imigrimit. Politikani konservator Hammond konsiderohet si përfaqësues i një Brexiti të butë, mundësisht pa pasoja – dhe si kundërlojtar i May-t.

Brexit i fortë apo i butë?
Edhe ministrja e Brendshme, Amber Rudd u ngjalli shpresa sipërmarrësve dhe qytetarëve të BE pak ditë më parë, me një artikull për gazetën “Financial Times”. Në të ajo shkroi se nuk do të ketë një fund të menjëhershëm të përcaktimeve aktuale për migrimin.
Ministri i Tregtisë, Liam Fox bëri të ditur pas kësaj pozicionin e tij. Sipas tij, është në kundërshtim me frymën e votës britanike të 23 qershorit 2016, po të ruhet liria e lëvizjes pas Brexit-it. Me këto fjalë ai mbron pozicionin e përfaqësuesve të vijës së fortë, të cilët pretendojnë të vendosin kontroll të plotë për migrimin. Që prej votimit për Brexit-in, të drejtat e rreth 3.5 milionë qytetarëve të BE që jetojnë në Mbretërinë e Bashkuar dhe të drejtat e 1.5 milionë britanikëve që jetojnë në BE janë kthyer në një çështje qendrore të negociatave të Brexit-it.
Brukseli ka bërë të ditur se çdo marrëveshje tranzitore që do të pasojë Brexit-in, do të bëjë që Britania e Madhe t’i humbasë të drejtat e votës në BE, por në të njëjtën kohë do të nevojitet që Britania e Madhe të qëndrojë nën juridiksionin e Gjykatës Evropiane të Drejtësisë dhe të pranojë lëvizjen e lirë të qytetarëve. Por këtë e ka kundërshtuar May, e cila dëshiron t’i japë fund juridiksionit të gjykatës me qendër në Luksemburg.
Kryeministrja britanike, Theresa May ndodhet nga të gjitha palët nën presion të fortë – më e vonta që kur konservatorët e humbën shumicën absolute në zgjedhjet e parakohshme në qershor. Në Mbretërinë e Bashkuar ka javë që spekulohet, për sa kohë do të qëndrojë dot në pushtet May.

Ambasada ukrainase në Beograd i dërgoi një letër të hapur Kusturicës të martën, duke paralajmëruar se kushdo që shkel Ligjin e vendit për Territoret e Pushtuara Përkohësisht duke vizituar Krimenë e aneksuar nga Rusia do të ndiqet penalisht.
“Një nga ndëshkimet për shkeljen e ligjit është ndalimi i hyrjes në territorin ukrainas për një periudhë pesëvjeçare”, tha ambasada në letër.
Më 23 korrik, Kusturica mbajti një koncert në Yalta, në gadishullin e Krimesë, me grupin e tij muzikor “No Smoking Orchestra”.
Para koncertit, ai citoi se bashkimi i Krimesë dhe Rusisë ishte një “proces natyral organik” dhe i bëri thirrje qytetarëve të Krimesë ta zhvillojnë gadishullin si “pjesë të Rusisë të madhe”.
Ambasada tha se i vinte keq për faktin që Kusturica “mbështeste agresorin, Rusinë”, duke shtuar se 11,000 njerëz, përfshirë artistë të famshëm, kanë vdekur gjatë konfliktit midis Ukrainës dhe Rusisë.
Kusturica nuk qe i disponueshëm për një koment të martën.
Rusia e aneksoi Krimenë në vitin 2014, pas një referendumi tepër të diskutuar në të cilin njerëzit votuan se gadishulli ukrainas duhej t’i bashkohej Rusisë.
Si Ukraina ashtu edhe Perëndimi e konsiderojnë të paligjshëm referendumin dhe aneksimin si pushtim të territorit ukrainas nga ana e Rusisë.
Në letrën e saj, ambasada ukrainase shtoi se Kievi ende e mbështet fuqimisht Beogradin në lidhje me politikën e Kosovës dhe nuk e ka njohur pavarësinë e kësaj të fundit.

Maqedonia dhe Bullgaria nënshkruan të martën në Shkup marrëveshjen për miqësi, fqinjësi të mirë dhe bashkëpunim me të cilën, dy vendet pretendojnë se i jepet fund mosmarrëveshjeve që kanë ekzistuar që nga pavarësia e Maqedonisë lidhur me gjuhën, kulturën dhe historinë e ndërsjelltë.
Marrëveshja, e cila është vlerësuar si historike, është nënshkruar nga kryeministrat Zoran Zaev dhe Bojko Borisov, i cili udhëheq delegacionin e lartë shtetëror bullgar në vizitën dyditore në Shkup. Vizita korrespondon me 2 gushtin, festën shtetërore të Maqedonisë, ndërsa data ishte zgjedhur me qëllim që dy delegacionet shtetërore të shprehin mirënjohje për personalitetet historike të kësaj date e që ndërlidhen me historitë e dy vendeve.
“Marrëveshja për miqësi, fqinjësi të mirë dhe bashkëpunim tregon qartë se atje ku ka vullnet politik, ide për progres, çështjet e hapura do të zgjidhen. Maqedonia dhe Bullgaria kanë bërë një hap historik, duke e përdorur të kaluarën si themel për të ardhmen, stabilitetin dhe zhvillimin jo vetëm të dy vendeve, por edhe për rajonin ballkanik…. Maqedonia dhe Bullgaria me këtë marrëveshje treguan përgjegjësi ndaj shtetasve të tyre. Kjo marrëveshje është shembull se si frenimi shumëvjeçar mund të shndërrohet në motor të bashkëpunimit dhe lidhjes mes popujve”, deklaroi kryeministri i Maqedonisë, Zoran Zaev, duke shtuar se me këtë marrëveshje, Sofja dhe Shkupi i kanë dërguar një mesazh të fuqishëm Bashkimit Evropian, se dy vendet janë të përcaktuara për paqe dhe stabilitet.
“Vëmendja e NATO-s dhe e BE-së është e drejtuar nga përcaktimi i shteteve të rajonit për bashkëpunim, pasi çështja e raporteve të fqinjësisë së mirë është çështje e kapaciteteve të pjekurisë për kapërcimin e mosmarrëveshjeve me mirëkuptim, si vlera të larta demokratike”, deklaroi Zaev.
Kryeministri bullgar, Bojko Borisov, tha se dy vendet kanë dëshmuar se mosmarrëveshjet mund t’i zgjidhin edhe pa ndërmjetësim nga jashtë, nëse drejtuesit e tyre shtetërorë udhëhiqen nga interesat e fqinjësisë së mirë.
“Pa ndërmjetësues, pa moderator apo pa ndikime të tjera ne arritëm këtë marrëveshje, pasi vlerësuam se paqja, miqësia dhe fqinjësia e mirë janë më të rëndësishme se gjithçka tjetër. Me këtë marrëveshje, ne vendosim të lëmë pas të kaluarën dhe të shohim përpara, drejt të ardhmes së dy vendeve tona”, tha Borisov, duke e vlerësuar si shumë të rëndësishme marrëveshjen për zhvillimin ekonomik jo vetëm të dy vendeve, por edhe të rajonit në përgjithësi.
Marrëveshja është nënshkruar në dy gjuhë, maqedonisht dhe bullgarisht, me çka Sofja e njeh edhe zyrtarisht gjuhën maqedonase. Dokumenti i jep të drejtën dy vendeve që të kujdesen për pakicat e tyre në shtetet respektive, në përputhje me marrëveshjet dypalëshe dhe shumëpalëshe.
Në nenin 11 të marrëveshjes thuhet se “Maqedonia konfirmon se në Kushtetutën e saj asnjë nen nuk mund dhe nuk duhet të interpretohet si përzierje në punët e brendshme të Bullgarisë, me qëllim mbrojtjen e statusit të personave që nuk janë shtetas të Maqedonisë”.
Në marrëveshje, veç të tjerash qëndron se Bullgaria do të ndihmojë Maqedoninë në procesin e integrimit në Bashkimin Evropian dhe në NATO, pa vendosje të kushteve paraprake. Një nen tjetër i marrëveshjes parasheh formimin e një komisioni të përbashkët, i cili duhet të kontribuojë në interpretimin objektiv dhe shkencor të ngjarjeve historike dhe se Bullgaria e Maqedonia do të marrin pjesë në shënimin e ngjarjeve historike.
Marrëveshja, ndërkohë nuk është mbështetur nga VMRO-DPMNE-ja, partia më e madhe opozitare e udhëhequr nga ish-kryeministri Nikolla Gruevski. Në një komunikatë të kësaj partie thuhet se marrëveshja nuk pranohet nga ana e saj, meqë nuk ishte pranuar asnjë nga vërejtjet e saj. Ajo i kishte bërë thirrje qeverisë që deri në nënshkrimin e dokumentit të ndryshojë pjesët kontestuese, që sipas VMRO-së mund të kenë pasoja afatgjata ndaj interesave shtetërore dhe kombëtare të Maqedonisë, si dhe për gjuhën, historinë dhe popullin maqedon.
Marrëveshja kishte nxitur edhe disa protesta para Ministrisë së Punëve të Jashtme, por ato më tepër ishin simbolike. Pas nënshkrimit, marrëveshja duhet të ratifikohet edhe nga ana e Kuvendit të Maqedonisë.

Janë regjistruar në Kuvendin e Kosovës të gjithë deputetët e kësaj legjislature e dalë nga zgjedhjet e 11 qershorit 2017. Seanca konstituuese e caktuar nga Presidenti i Kosovës mbahet këtë të enjte (3.08) ku dhe do të zgjidhet kryetari i Kuvendit. Sipas përfaqësuesve të koalicionit PAN, ata synojnë që të njëjtën ditë të votohet edhe për qeverinë e Kosovës. Ndonëse ende nuk është njoftuar zyrtarisht, kandidati i vetëm për kryetar të Kuvendit i koalicionit PAN (Partia Demokratike e Kosovës PDK, Aleanca për Ardhmërinë e Kosovës AAK dhe Nisma) është Kadri Veseli, kryetar i PDK-së.
“Ju e dini se mbështetja e plotë e PDK-së është për Kadri Veselin. Por, tash për tash nuk mund ta them se është fakt i kryer, por për këtë do të vendoset me kohë”, tha Memli Krasniqi, deputet i PDK-së.
Ndonëse në bazë të Kushtetutës së Kosovës, posti i kryetarit të Kuvendit i takon fituesit të zgjedhjeve, në këtë rast koalicionit PAN. Subjektet e tjera politike, që u renditën e dyta dhe e treta në zgjedhje, LAA dhe Vetëvendosja, tashmë janë deklaruar se nuk do ta votojnë Kadri Veselin për kryetar të Kuvendit, sikundër që nuk do ta votojnë as të nominuarin për kryeministër Ramush Haradinaj. Për zgjedhjen e tyre në këto dy poste nevojitet shumica e thjeshtë prej 61 votave, nga 120 deputetë sa i ka Parlamenti i Kosovës.
Lëvizja Vetëvendosja dhe koalicioni LAA thonë, se në mënyrë që procesi i formimit të institucioneve të mos bllokohet, koalicioni PAN, si zgjidhje mund të propozojnë një kandidat tjetër për kryetar të Kuvendit.
“Lëvizja Vetëvendosje do të votojë kundër Kadri Veselit për kryetar të Kuvendit, por ne jemi të gatshëm që t’i shqyrtojmë emrat e tjerë, të cilët do të mund të propozoheshin”, thotë Glauk Konjufca deputet i Vetëvendosjes.
Edhe kryetari i LDK-së, Isa Mustafa, është shprehur qartë se partia e tij nuk do ta votojë Kadri Veselin për kryetar Kuvendi, sepse, sipas tij, “Veseli ishte njëri nga iniciatorët e prishjes së koalicionit PDK-LDK”.
“Ne e kemi qëndrimin që në asnjë rast nuk bëjmë koalicion me PAN-in dhe po ashtu nuk e votojmë Kadri Veselin për kryetar të Kuvendit. Konsiderojmë se ai ishte njëri nga njerëzit që e prishi marrëveshjen dhe i ka vënë interesat personale para shtetit”, thotë Isa Mustafa.
Nga ana tjetër përfaqësues të koalicionit PAN thonë, se ata e kanë numrin e mjaftueshëm të deputetëve që do ta bëjnë kryetarin e PDK-së, Kadri Veselin, kryetar Kuvendi dhe Ramush Haradinajn kryeministër.
Muharrem Nitaj, zëdhënës i Ramush Haradinajt, thotë se në zgjedhjet e 11 qershorit koalicioni PAN ka fituar më së shumti mandate dhe sipas Kushtetutës i takon këtij koalicioni që ta propozojë dhe ta zgjedhë kryetarin e Kuvendit dhe kryeministrin e Kosovës.
“Ka një Kuvend të Kosovës që përbëhet nga deputetë të zgjedhur dhe gjithçka varet nga vota e tyre. Ne jemi të bindur se koalicioni PAN nuk do të ketë telashe as në krijimin e qeverisë dhe as në zgjedhjen e kryetarit të Kuvendit”, thotë Muharrem Nitaj.
Mirëpo, dy subjektet e tjera politike lëvizja Vetëvendosja dhe LAA thonë, se koalicioni PAN nuk i ka numrat e votave të mjaftueshme. Lëvizja Vetëvendosja dhe LAA së bashku kanë 61 deputetë dhe pikërisht për këtë ata janë të bindur se koalicioni PAN, edhe nëse i bashkohen pakicat kombëtare, mund të arrijë vetëm në 59 deputetë, numër ky jo i mjaftueshëm për zgjedhjet e kryetarit të Kuvendit dhe kryeministrit. Mirëpo, rreth çështjes së numrave, Memli Krasniqi nga koalicioni PAN, thotë se kjo çështje është devalvuar deri në atë masë saqë deputetët tashmë po quhen “numra”.
“Mendoj se asnjëherë nuk është dashur që t’i devalvojmë deputetët dhe t’i quajmë numra. Ne e kemi mbështetjen e mjaftueshme për formimin e qeverisë dhe për konstituimin e Kuvendit”, thotë Memli Krasniqi.
Përfaqësues të dy subjekteve politike LAA dhe Vetëvendosja thonë, se qeverinë duhet ta krijojnë këto dy subjekte politike, sepse ato kanë numër të mjaftueshëm të votave.
Vjosa Osmani, deputete nga LDK, thotë, se qeverinë duhet ta formojnë Vetëvendosja dhe LDK-ja, pasi koalicioni PAN, sipas saj, “do të dështojë në përpjekjen e parë për formimin e qeverisë”.
“Ka vullnet të mirë tek të dyja subjektet politike që të arrihet një marrëveshje për bashkëqeverisje. Koalicioni PAN do të dështojë me arritjen e numrave të nevojshëm për formimin e qeverisë. Dhe së dyti, kemi edhe një mision që na bashkon me Vetëvendosjen, që PDK-në ta dërgojmë në opozitë”, thotë Vjosa Osmani.
Sidoqoftë tash për tash akoma është e paqartë sesi do të rrjedhë seanca konstituuese e Parlamentit të Kosovës më 3 gusht. Kjo për faktin që rezultati i zgjedhjeve të 11 qershorit nuk nxori asnjë subjekt politik fitues, që do të mund ta krijonte vetëm qeverinë. Analistët politikë parashohin krizë institucionale, ndërkohë që prania ndërkombëtare në Kosovë bën thirrje për krijim të shpejtë të institucioneve, në mënyrë që vendi të vazhdojë me integrimet evropiane dhe reformat e kërkuara.

Ministrja gjermane e Ekonomisë, Brigitte Zypries, i ka bërë thirrje Bashkimit Evropian të kundërpërgjigjet ndaj legjislacionit për sanksionet e reja të Shteteve të Bashkuara kundër Rusisë, pasi mund të dëmtohen çështje biznesi të kompanive perëndimore me Rusinë.
Në legjislacionin e ri që u miratua me shumicë votash nga Kongresi në SHBA, sanksionet përfshijnë edhe disa firma ruse të energjisë. Ky legjislacion pritet të nënshkruhet nga presidenti Trump.
Liderët evropianë kanë thënë se sanksionet e reja do të dëmtonin ekonomitë e tyre.
Dispozitat mund të ndikojnë në Evropë, ashtu që mund t’i lejojnë presidentit Trump të vendosë sanksione ndaj bizneseve të Perëndimit, të cilat punojnë me Gazpromin e Rusisë.
“Shumë thjesht, ne këto sanksione i konsiderojmë kundër ligjit ndërkombëtar”, ka thënë ministrja gjermane e Ekonomisë, Brigitte Zypries, në një intervistë për gazetën “Funke Mediengruppe”.
“Amerikanët nuk mund të ndëshkojnë kompanitë gjermane sepse kanë interesa të biznesit në shtete të tjera”, ka shtuar ajo.
“Sigurisht që ne nuk duam luftë tregtare. Mirëpo është e rëndësishme që Komisioni Evropian të marrë masa”, ka thënë ndër të tjera, Zypries.
Sipas saj, Berlini i ka kërkuar disa herë Uashingtonit të mos përfshijë dispozita që prekin kompani evropiane, në kuadër të legjislacionit për sanksionimin e Rusisë, pas supozimeve se ky vend ka ndërhyrë në zgjedhjet presidenciale të vitit 2016 në SHBA, për agresionin në Ukrainë dhe çështje të tjera.