Presidenti rus, Vladimir Putin urdhëroi shkurtimin me 755 vetë të personelit diplomatik amerikan në Rusi si reagim ndaj sanksioneve amerikane për ndërhyrjen ruse në zgjedhjet presidenciale të vitit 2016. Departamenti amerikan i Shtetit e quajti urdhrin e Presidentit Putin “një veprim për të ardhur keq dhe të pajustifikuar” dhe thotë se po analizon se si do të reagojë. Presidenti Trump pritet t’i nënshkruajë sanksionet ndaj Rusisë, si dhe masa të reja ndaj Iranit dhe Koresë së Veriut të përfshira në legjislacion.
Zoti Putin i tha një rrjeti televiziv rus se, qeveria e tij mund të marrë edhe masa të tjera kundër Shteteve të Bashkuara, por se sot për sot ai “do të ishte kundër tyre”.
“Ne kemi një numër të madh alternativash. Po reagojmë tani sepse amerikanët ndërmorën këtë hap të paprovokuar drejt keqësimit të marrëdhënieve SHBA-Rusi, duke imponuar kufizime të paligjshme dhe duke u përpjekur të ushtrojnë ndikim tek vende të tjera, përfshirë aleatët e tyre që janë të interesuar në ruajtjen dhe përparimin e lidhjeve me Federatën ruse”.
Departamenti i Shtetit nuk pranoi të japë numrin e saktë të diplomatëve ose zyrtarëve amerikanë në Rusi, por mendohet që numri të jetë rreth 400, disa prej të cilëve kanë anëtarë të familjeve me pasaporta diplomatike.
Një numër i madh i mbi 1000 punonjësve të misioneve amerikane në Rusi, të cilat përfshijnë ambasadën në Moskë dhe konsullatat në Shën Petërsburg, Vladivostok dhe Jekaterinburg, janë punonjës vendas.
Kongresi amerikan i miratoi sanksionet e reja të enjten. Legjislacioni për sanksionet demonstroi diçka të rrallë në Kongres, një mbështetje dërrmuese nga të dyja palët.
“Ne nuk do të tolerojmë sulme ndaj demokracisë sonë. Ky është synimi i kësaj pakete”, tha senatori republikan John McCain.
Sanksionet vënë në shënjestër segmente të gjera të sektorëve më me rëndësi për Presidentin Putin.
“Sanksionet e detyrueshme që lidhen me sektorët e energjisë, financave, zbulimit dhe mbrojtjes”, tha senatori demokrat, Ben Cardin.
Ministria e Jashtme e Rusisë ishte e para që reagoi të premten duke propozuar reduktimin e personelit diplomatik dhe teknik amerikan në Rusi në të njëjtin nivel sa ç’është personeli rus në Shtetet e Bashkuara, në 455 vetë dhe shtoi se kjo duhet realizuar deri në fund të gushtit.
Megjithatë zëvendësministri i Jashtëm rus, Sergei Ryabkov tha të dielën se beson që ka fusha ku të dyja palët mund dhe duhet të punojnë së bashku, përfshirë mospërhapjen e armëve të shkatërrimit në masë, kundërterrorizmi, trafiku njerëzor, imgracioni i paligjshëm dhe ndryshimet e klimës.
Shtëpia e Bardhë tha se Presidenti Donald Trump do ta nënshkruajë legjislacionin për sanksionet.
Ndërsa Kongresi ishte angazhuar prej kohësh në negociatat për legjislacionin, këshilltarët e zotit Trump ishin shprehur kundër për shkak të një klauzole që u jep ligjvënësve 30 ditë kohë për të rishikuar dhe bllokuar çdo përpjekje të Presidentit për të lehtësuar sanksionet kundër Rusisë. Kjo përfshin vendimin e ish-Presidentit Barack Obama për të mbyllur dy komplekse ruse dhe për të dëbuar 35 diplomatë për shkak të ndërhyrjes ruse në zgjedhje.
Analistët politikë në Shtetet e Bashkuara kishin parashikuar se zoti Trump, në një përpjekje për të lehtësuar tensionet me Putinin, mund t’i shfuqizonte sanksionet e ish-Presidentit Obama kur të merrte detyrën në janar, por ai nuk e bëri këtë.
Që nga ajo kohë, muajt e parë të presidencës së zotit Trump janë shoqëruar nga hetime të shumta për ndërhyrjen ruse në zgjedhje, të përqendruara veçanërisht për të analizuar nëse ndihmësit e tij kishin bashkëpunuar me Moskën për ta ndihmuar atë të fitonte.
Hetimet kanë si synim gjithashtu t’i japin përgjigje pyetjes nëse zoti Trump pengoi drejtësinë kur shkarkoi drejtorin e FBI-së James Comey, që ishte në krye të hetimit për Rusinë.
Një tjetër ish-drejtor i FBI-së, Robert Mueller, u emërua për të drejtuar një hetim të posaçëm.
Moska e ka hedhur poshtë përfundimin e komunitetit amerikan të zbulimit se Presidenti Putin personalisht kishte orkestruar ndërhyrjen ruse në zgjedhje. Presidenti Trump i ka quajtur hetimet “gjueti shtrigash” dhe një justifikim që sipas tij kanë përdorur demokratët për të shpjeguar fitoren e tij të papritur ndaj kandidates Hillary Clinton.

Në komentet e bëra dje në Twitter, Presidenti Trump shkruante se tregu i aksioneve është në nivele të papara, shifrat ekonomike janë më të mirat, papunësia është më e ulëta në 17 vjet, pagat po rriten dhe kufiri është i sigurtë. “Në Shtëpinë e Bardhë nuk ka kaos”, shkruante ai.
Komentet e zotit Trump u bënë në prag të betimit të shefit të tij të ri të kabinetit, gjeneralit në pension John Kelly, i cili mori detyrën që deri tani mbahej nga Reince Priebus.
Në takimin me shefin e ri të kabinetit, Presidenti Trump tha se zoti Kelly do të bëjë “një punë spektakolare” në detyrën e re.
Gjatë javës së kaluar, drejtori i ri i komunikimit në Shtëpinë e Bardhë, Anthony Scaramucci, sulmoi ashpër zotin Priebus, duke përdorur edhe fjalë të papërshtatshme.
Ndërkohë, vetë zoti Trump u bë objekt kritikash për sulmet e tij publike ndaj prokurorit të Përgjithshëm, Jeff Sessions dhe për dështimin e republikanëve të Senatit për të ndryshuar ligjin e kujdesit shëndetësor.
Dje, Presidenti Trump pati një takim me prokurorin e Përgjithshëm në Shtëpinë e Bardhë.

Nënpresidenti amerikan, Mike Pence siguroi dje udhëheqësit e vendeve balltike se Shtetet e Bashkuara janë të angazhuara për mbrojtjen e rajonit. Në një konferencë të përbashkët për shtyp me presidentët e Estonisë, Lituanisë dhe Letonisë, zoti Pence tha se, “Rusia është një kërcënim i paparashikueshëm” ndërsa shfaqi shpresën për përmirësimin e marrëdhënieve me Moskën.
Nënpresidenti amerikan, Mike Pence, tha dje se nuk ka kërcënim më të madh për shtetet balltike se sa “spektri i agresionit” nga Rusia, ndërsa ai premtoi mbështetje për aleatët e NATO-s, Estoninë, Letoninë dhe Lituaninë.
“Në këtë moment Rusia përpiqet të ripërcaktojë kufijtë ndërkombëtarë me forcë, të dëmtojë demokracitë e vendeve sovrane dhe të përçajë vendet e lira të Evropës. Nën udhëheqjen e Presidentit Donald Trump, Shtetet e Bashkuara të Amerikës kundërshtojnë çdo përpjekje për të përdorur forcën, kërcënimet apo ndikimin keqdashës në shtetet balltike apo kundër çdo aleati të traktatit”.
Zoti Pence foli në Talin, kryeqyteti i Estonisë, pas takimit me presidentin estonez, Kersti Kaljulaid, presidentin e Letonisë, Raimonds dhe presidenten e Lituanisë, Dalia Grybauskaite.
Nënpresidenti amerikan tha se kërkesa e Moskës për të shkurtuar 755 anëtarë të personelit diplomatik amerikan nuk do ta pengojë angazhimin e Shteteve të Bashkuara ndaj aleatëve.
“Ne shpresojmë për ditë më të mira, për marrëdhënie më të mira me Rusinë, por veprimet e fundit diplomatike të ndërmarra nga Moska nuk do të pengojnë angazhimin e Shteteve të Bashkuara për sigurinë tonë, atë të aleatëve tanë dhe sigurinë e vendeve që duan liri në mbarë botën”.
Zoti Pence vlerësoi gjithashtu Estoninë për përmbushjen e angazhimit financiar ndaj aleancës së NATO-s duke shpenzuar të paktën 2 për qind të Prodhimit të Përgjithshëm të Brendshëm për mbrojtjen dhe tha se Letonia dhe Lituania do ta arrijnë këtë nivel vitin e ardhshëm. Presidenti Trump ka përsëritur thirrjet që vendet e NATO-s të shtojnë shpenzimet e mbrojtjes.
Estonia, Letonia dhe Lituania kanë kërkuar shprehje konkrete të mbështetjes ushtarake amerikane. Shqetësimet rreth ekspansionizmit rus janë rritur ndjeshëm në rajonin e Balltikut pas aneksimit të Krimesë nga Rusia në vitin 2014.
Nënpresidenti Pence do të shkojë në Gjeorgji ku trupat amerikane dhe të partnerëve të NATO-s kanë filluar manovra ushtarake të dielën dhe më pas ai shkon në Mal të Zi, anëtari më i ri i aleancës.
“Mesazhi im për shtetet balltike, mesazhi im kur të vizitoj Gjeorgjinë dhe Malin e Zi do të jetë i njëjtë. Për aleatët tanë këtu në Evropën Lindore: Ne jemi me ju, ne qëndrojmë përkrah jush për lirinë dhe është një nder i madh për mua që ndodhem këtu”, tha nënpresidenti.
Duke iu referuar perspektivës së shtimit të sanksioneve amerikane kundër Rusisë, që Kongresi miratoi javën e kaluar me shumicë dërrmuese, zoti Pence tha se ai dhe presidentit Trump “presin që sjellja e Rusisë të ndryshojë.
Zoti Pence tha se pret që Presidenti Trump të nënshkruajë projektligjin e sanksioneve, i cili vendos masa ndëshkuese ndaj Koresë së Veriut, Iranit, si dhe Rusisë.

Presidenti i Venezuelës, Nicolas Maduro e ka deklaruar si plotësisht të suksesshme votën e djeshme për hartimin e një Kushtetute të re, megjithë këmbënguljen e opozitës se kjo masë është një hap tjetër drejt vendosjes së një diktature socialiste në këtë vend të Amerikës së Jugut. Vota e djeshme është kritikuar gjerësisht nga vendet perëndimore si një akt që minon të drejtën për vetëvendosje të venezuelianëve.
Nicolas Maduro iu drejtua vendit me tone triumfi, pasi deklaroi se përpjekja për të krijuar një Asamble Kushtetuese kishte marrë një mbështetje të qartë në votën e djeshme:
“Populli venezuelian ka treguar se kur fati na vë në provë, kur oligarkë pa shtet na bëjnë sfidë, kur imperializmi na sfidon, ne dëshmojmë gjakun e liberatorit që rrjedh në damarët e çdo burri, gruaje dhe fëmije”, tha Presidenti Maduro.
Nicolas Maduro ndodhej në Karakas ku po festonte fitoren në votën e djeshme.
Sipas Këshillit Kombëtar Elektoral, mbi 8 milionë vetë votuan për t’i dhënë Partisë Socialiste në pushtet autoritetet thuajse të pakufizuar për të ngritur Asamblenë Kushtetuese. Shifrat zyrtare tregojnë një pjesëmarrje thuajse dy herë më të lartë se ç’kishin parashikuar opozita apo ekspertët e pavarur.
“Kemi regjistruar pjesëmarrjen e 41.5% të votuesve të regjistruar apo të 8.8 milionë venezuelianëve, të cilët dolën për të hedhur votën për një Asamble Kushtetuese. Ishte një pjesëmarrje shumë e lartë dhe e habitshme në njëfarë mase, kur mendon për kërcënimet, bllokimet, vështirësitë që kishin për të kapërcyer”, tha presidentja e Këshillit Kombëtar Elektoral.
Shifrat zyrtare u përcollën me tallje dhe komente përbuzëse nga pjesëtarët e opozitës që besojnë se pjesëmarrja ishte tek 2-3 milionë votues.
“Çdo konfirmim tregon se kjo ishte një ditë e rëndë, e frikshme dhe e mjerë; një proces ku vetëm qeveria mori pjesë. Sipas shifrave që kemi ne, 2.483 milionë vetë morën pjesë, pra 12.4% pjesëmarrje dhe 88% abstenim”, tha Henry Ramos Allup, një ndër udhëheqësit e opozitës.
Ai shtoi se populli venezuelian nuk do të dorëzohet.
“Ne nuk heqim dorë nga të drejtat tona kushtetuese. Do të vazhdojmë protestat në rrugë kundër qeverisë së korruptuar. Nuk do të heqim dorë nga e drejta për të deklaruar para të gjitha vendeve dhe organizmave ndërkombëtare se kemi një diktaturë të shëmtuar që po e shkatërron vendin”.
Një numër vendesh, ndër to Shtetet e Bashkuara, Argjentina, Kanadaja, Kolumbia, Meksika, Spanja dhe Britania kanë thënë se nuk do ta njohin votimin e djeshëm.
Departamenti amerikan i Shtetit tha se referendumi i së dielës “minoi të drejtën e popullit venezuelian për vetëvendosje”. Heather Nauert, zëdhënëse në Departamentin e Shtetit tha se Shtetet e Bashkuara do të vazhdojnë të ndërmarrin “masa të vendosura kundër arkitektëve të autoritarizmit në Venezuelë… si rezultat i këtyre votimeve problematike”.
Administrata e Presidentit Trump ka vënë sanksione ekonomike ndaj një numër anëtarësh të lartë të administratës Maduro.
Opozita venezueliane ka bërë thirrje për vazhdimin e protestave. Më shumë se 120 vetë kanë gjetur vdekjen gjatë protestave të organizuara në katër muajt e fundit.

Gazeta ruse, “Novaya Gazeta”, ka publikuar disa informacione shtesë për 24 persona që supozohet të jenë ekzekutuar pa ndonjë gjykim, pasi ishin arrestuar pas përleshjeve me policinë në rajonin e Çeçenisë, gjatë vitit të kaluar.
Në këtë raport ka detaje, duke përfshirë edhe fotografi të 24 personave, duke u bazuar në materiale të siguruara nga strukturat policore në rajonin e Kaukazit Verior, i cili udhëhiqet për një dekadë nga Ramzan Kadyrov, që ka mbështetjen e Kremlinit.
Në raport përfshihen të dhëna për një 18-vjeçare, e cila ishte arrestuar në dhjetor dhe është raportuar të ketë vdekur në rrethana të paqarta.
Në këtë listë përfshihen 67 persona për të cilët gazeta raporton se janë zhdukur.
“Novaya Gazeta” raporton se telefonat mobilë të disa prej personave që supozohet të jenë ekzekutuar janë dërguar në Siri nga zyrtarët çeçenë, në mënyrë që të ketë të dhëna se ata janë gjallë dhe u janë bashkuar militantëve të Shtetit Islamik.
Në këtë raport supozohet se të afërmit e çeçenëve të zhdukur janë detyruar të nënshkruajnë me forcë dokumente, sipas të cilave individët janë larguar nga Çeçenia, duke hequr mundësinë për të paraqitur kërkesa tek autoritetet e këtij vendi.
Kjo gazetë më parë ka raportuar edhe për një kampanjë të dhunshme, e cila kishte cak homoseksualët në këtë rajon.
Kadyrov dhe zyrtarë të tjerë të lartë në Çeçeni i kanë konsideruar këto raportime si “gënjeshtra”.