Turizmi është kthyer në një rrezik vdekje për pushuesit. Çdo ditë po mbyten njerëz të lënë në mëshirë të fatit. Sipas statistikave, në dy javë kanë humbur jetën 16 pushues në brigjet tona, ndërsa një ditë më parë, një restorant shpërtheu në plazhin e Velipojës, ku 2 nga 4 të plagosurit po luftojnë me vdekjen. Shpërthimi ndodhi, sepse askush nga strukturat shtetërore s’ka marrë mundimin për të kontrolluar kushtet që ofrohen nga turizmi. Qeveria harxhon miliona me broshurat e promovimit dhe bën llogje në ekrane, ndërsa nuk merr asnjë masë për sigurinë e jetës së njerëzve. Janë jetë njërëzish që ikin çdo ditë në kushtet e turizmit që ofron kjo qeveri.
Ngjarja më e rëndë është ajo e para dy javëve që ndodhi në Vlorë, ku 4 të rinj u mbytën, mes tyre edhe një djalë 24-vjeçar nga Tetova e Maqedonisë. Njëra prej viktimave, u mbyt në det dhe dy të tjerët kanë shkuar për ta ndihmuar e për pasojë kanë humbur jetën edhe vetë.
Po ashtu një 35-vjeçar nga Kosova u mbyt në plazhin e Velipojës. Ndërsa një ditë më pas u mbyt një 62-vjeçar po nga Kosova në plazhin e Durrësit. Ndërsa para dy ditësh u mbyt një tjetër pushues në Golem të Kavajës.
Mungesa e rojeve të plazhit dhe ndihmës së parë është kthyer vdekjeprurëse për shumë pushues. Në disa raste kanë qenë pushuesit që kanë ndihmuar të gjendurit në vështirësi, për shkak se kullat e vrojtimit mungojnë në çdo plazh të Shqipërisë. Vazhdimisht është ngritur shqetësimi nga qytetarët se mungojnë rojet e plazhit që do ta bënin bregdetin më të sigurtë dhe më me pak incidente.

Vdekja e dy turistëve

Dy turistë të huaj që kishin ardhur për të pushuar në vendin tonë u mbytën para një jave në det. Fillimisht u mbyt një 16-vjeçare ruse në Ksamil të Sarandës. Disa orë pas mbytjes së 16-vjeçares ruse, një tjetër turist i huaj humbi jetën në det, në një plazh në zonën e Kavajës.
Turistja ruse u godit nga një mjet lundrues në Ksamil. Nga kryerja e hetimeve rezultoi, se mjeti lundrues që drejtohej kishte kaluar me shpejtësi në hapësirën ujore ku po notonte shtetësja ruse dhe e ka goditur me helikë. Grupi hetimor konfirmon se turistja, e cila ishte duke notuar në det gjeti vdekjen si pasojë e goditjeve të forta me mjete prerëse në kokë dhe trup.
Ashtu si turistja ruse, mijëra pushues të tjerë rrezikojnë çdo ditë nga motorët e ujit që bëjnë xhiro me shpejtësi marramendëse mbi kokat e pushuesve pa u shqetësuar nga askush. Qeveria dështoi edhe këtë vit të disiplinojë këto mjete të rrezikshme që janë shqetësim dhe rrezik për jetën e mijëra pushuesve që frekuentojnë plazhet shqiptare. Edhe pse për përdorimin e motorëve të ujit janë të përcaktuar rregulla se ku duhet dhe si duhet të lëvizin në det, në të gjitha këto plazhe me dhjetëra mijëra pushues nuk gjen qoftë edhe një polic të vetëm që të monitorojë ashtu siç duhet zbatimin e këtyre rregullave thelbësore për të garantuar jetën.
Në çdo vend të botës janë zonat ku duhet të lëvizin motorët e ujit, por në Shqipëri jo vetëm mungojnë shenjat, por këto mjete nisen që nga bregu i detit me shpejtësi. Pushuesit shqiptarë i shohin këto motorë të ujit çdo ditë t’u rrezikojnë jetën, por ndihen të pafuqishëm e të pambrojtur, sepse policia që e ka për detyrë t’i mbrojë nuk ekziston.
Personat e papërgjegjshëm që përdorin motorët e ujit në pjesën ku lahen pushuesit rrezikojnë jetën edhe të tjerë turistë vendas apo të huaj, sepse inekzistenca e shtetit i bën plazhet shqiptare si të jenë xhungël ku mbizotëron logjika e më të fortit dhe jo rregulli. Pushuesit shprehen se, motorët e ujit qarkullojnë me shpejtësi skëterrë në një distancë më të afërt se 200 metra larg bregut, duke rrezikuar seriozisht jetën e qindra plazhistëve.

R.POLISI

Zbardhen detaje të reja nga vrasja makabre e guzhinierit në Borsh, ngjarje e ndodhur pak ditë më parë. Dëshmitari Enea Myftari ka rrëfyer para hetuesve se, kishte kërkuar ndihmë nga policia e Borshit, por i kishin thënë që të vinte nesër sepse ishte vonë. Në dëshminë e tij, Enea Myftari thotë se, pasi e kishin larguar nga Posta Policore në Borsh, kishte takuar edhe shefin e FNSH-së të cilit i kishte shpjeguar situatën, duke i thënë se kishin pasur një sherr me disa djem, të cilët ishin të armatosur.
Edhe ai i kishte thënë që të shkonte nesër në Komisariatin e Policisë në Himarë dhe të bënte denoncimin. Por kjo gjë nuk ka qenë e mundur, pasi vetëm disa metra më tutje do të shpërthente sherri i dyti, që do të sillte edhe pasoja të rënda, vrasjen e guzhinierit Premtim Bega.
“Pas sherrit të parë u shkëputa dhe u nisa për të kërkuar ndihmë në Postën e Policisë Borsh. Kur kam shkuar kam takuar policin e shërbimit Shefqet Toçi dhe i kam kërkuar që të bënte kallëzim, pasi ndihej i kërcënuar nga personat që e goditën.
Polici i shërbimit ka marrë në telefon komandantin e postës i quajtur Viktor dhe i ka sqaruar problemin dhe ai i kishte thënë që të shkonte të nesërmen e të bënte kallëzim.
Në këto kushte jam larguar nga posta e policisë, por në rrugë kam takuar komandantin e FNSH-së, të cilit i kam thënë se kisha problem me dy djem dhe ai më tha që të shkonte ditën tjetër e të bënte kallëzim në Himarë.
Dhe pasi u larguam disa metra nga policia, na kanë dalë para përsëri në drejtim të fermës, personat që e kishin goditur pak më parë, por që ishin me automjetin tjetër tip ‘Ford’ ngjyrë ‘blu’ i cili është në pronësi të shtetasit R. H., babait të Nasi Hodo.
Në automjet së bashku me ata dy persona kësaj herë ishte edhe Nasi Hodo. Këta persona kanë zbritur nga automjeti i tyre, duke mbajtur në dorë leva, kaçavida dhe thika dhe u drejtuan tek ata… Pas këtij sherrit të dytë, mbeti i vrarë me thikë kuzhinieri Premtim Bega”, ka rrëfyer në dëshmitari Enea Myftari.
Denoncimi i këtij skandali është bërë nga ish-Kryeministri Berisha që ditën e ngjarjes pas marrjes së një mesazhi nga një qytetar nga Borshi. Enea Myftaraj shkruante se kishte shkuar në rajonin e policisë në Borsh dhe kishte kërkuar ndihmë, pasi shoku i tij po kërcënohej me jetë nga disa persona, por oficeri i policisë i ka thënë: “Eja nesër se sot është vonë”. Viktima 30 minuta para vrasjes kërkoi ndihmën e policisë. Çunat e krimit i thanë “le të të vrasin ty sot se nesër do merremi me ta?!?!”, shkruante Berisha në një postim në Facebook.
Ndërkohë, tre të rinjtë që dyshohen si autorë të ngjarjes që ndodhi në fshatin Borsh disa ditë më parë dolën para Gjykatës së Sarandës për masën e sigurisë. Trupi gjykues vendosi arrest me burg për Ronaldo Shehun, Xhonatan Muçon dhe Thanas Hodon. Mësohet se asnjëri prej tyre nuk ka pranuar të flasë në Gjykatë. Ndaj tyre rëndon vepra penale “vrasje në rrethana të tjera cilësuese” kundër dy ose më shumë personave e kryer në bashkëpunim.
Ngjarja ndodhi më 26 korrik në rrugën kryesore të fshatit. Pas përplasjes verbale mes 7 personave konflikti degradoi deri në përdorimin e mjeteve prerëse, ku mbeti i vrarë Premtim Bega dhe u plagosën shokët e tij. Hetuesit janë përqendruar në pistën e një konflikti të mëparshem për pronësinë.

Drejtori i Shërbimit Zjarrfikës, Alfred Kristuli ka folur dje për ngjarjen tragjike në Velipojë ku si pasojë e shpërthimit të gazit në një restorant turistik u plagosën disa persona. Kristuli tha për “Neës24” se shërbimi zjarrfikës ka qenë në vendngjarje për 2 minuta, ndërsa për të shmangur këto ngjarje duhet të merren masa parandaluese. “Shërbimi zjarrfikës ka qenë në vendngjarje për 2 minuta. Zjarri u fik nga personeli që ishte dhe nuk u kërkua ndihmë. Përmasa tjetër ishte tek shpërthimi. Problemi tek gazi i lëngshëm është duke u trajtuar në dy shtylla. Kryesorja janë masat dhe parandalimi si dhe ndërhyrja. ISHTI nuk kishte pse lejonte 1 mijë litra gaz të lëngshëm në një resort. Pra kush janë këto masa parandaluese? Masat parandaluese duhet të respektohen nga kompanitë. Pra janë sinjalizuesit që të njoftojnë për çdo rrjedhje gazi dhe këto sinjalizues gjenden kollaj”,  tha Alfred Kristuli.
Ndërkohë përsa i përket situatës së zjarreve në vend, drejtori i Shërbimit Zjarrfikës tha se, operacionet më të vështira kanë qenë në zjarret që ranë në Tepelenë, Berat dhe Ibë. “Shërbimi zjarrfikës nga viti 2015 i është kaluar shërbimeve vendore dhe kjo është një reformë që është bërë në kohën e duhur. Por edhe sensibilizimi i komunitetit ka ndikim. Zjarri më i rrezikshëm nisi në Tepelenë ku janë përqendruar forca edhe nga shërbimi zjarrfikës nga Gjirokastra dhe Përmeti. Po ashtu kemi edhe rastin e zjarrit në Berat dhe në Ibë, ku përveç Forcave të Shërbimit Zjarrfikës dhanë ndihmëse edhe forcat e Armatosura”, tha ai.

Shpërthimi në Velipojë, Prokuroria: Hetimet do shtrihen deri tek ISHTI

Prokuroria e Shkodrës pritet të nisë procedim penal për shpërthimin e paradites të së premtes në një restorant në Velipojë, ku nga rrjedhja e gazit u plagosën rëndë 4 persona, dy prej të cilëve në gjendje kritike për jetën. Sipas organit të akuzës, hetimet do të shqyrtojnë faktet nëse ISHTI ka kryer kontrollin teknik dhe ka dhënë leje për subjektin që të instalonte cisternën e gazit.
Procedim penal pritet të nisë edhe për pronarin e restorantit, ku ndodhi shpërthimi që kishte vendosur cisternën poshtë pallatit. Sipas Inspektoriatit Shtetëror Teknik dhe Industrial, pronari Zenuni nuk ka pasur leje për vendosjen e cisternës, dhe në kundërshtim me ligjin nuk ka kërkuar asnjëherë leje për të. Faktet pritet të verifikohen nga Prokuroria, që e cilëson çisternën 1 mijë litërshe pa kushte dhe siguri.
Gjithashtu, pritet ekspertiza e shërbimit zjarrfikës për të zbardhur detaje të tjera që ndihmojnë në hetim. Ndërkaq, mbeten në gjendje kritike pronari 55-vjeçar Besnik Zenuni dhe djali i tij Hektor Zenuni 23 vjeç, të cilët ndodhen në Repartin e Djegieve në Tiranë me djegie të shkallës së dytë dhe të tretë në gati në 50% të trupit. “Kur dëgjova shpërthimin isha në banak dhe menjëherë zbrita të shikoj çfarë po ndodhte. Aty pashë babain të shtrirë dhe menjëherë e mora në krahë, për ta nxjerrë. Pas pak sekondash ndjeva një shpërthim tjetër që më shtyu përpara. Nga aty nuk mbaj mend më”, tregon i biri.
Ndërkaq, edhe e plagosura 19-vjeçare nga Kosova, Saida Spahija, e cila punonte  në banak është transportuar drejt Tiranës për shkak se ka paraqitur probleme me sytë. Mjekët në Shkodër e kanë dërguar vajzën në Tiranë për trajtim më të specializuar.
Mëngjesin e së premtes, rrjedhja e gazit nga cisterna 1 mijë litërshe solli shpërthime të fuqishme nga të cilat u plagosën katër persona, ndërsa kanë sjellë panik dhe tmerr mes banorëve dhe pushuesve në zonë. Kanë qenë të shumtë dëshmitarët e kësaj ngjarje të rëndë që kanë rrëfyer për atë çfarë ndodhi, por gjurmë të pashlyeshme nga pamjet e rënda të shpërthimit të ditës së djeshme ka rrëfyer dhe infermierja Vjollca Voci, e cila u asfiksua pas ndërhyrjes në lokalin që u përshi nga flakët. Infermierja e ka të pamundur të heq nga mendja lutjet e dy të djegurve që ndodheshin brenda në lokal që i drejtoheshin asaj për t’i shpëtuar.

Mjeku Besmir Grizhja ka rënë dje pre e dhunës në Spitalin e Shkodrës, ku është goditur me grushta nga bashkëshorti i një pacienteje. 45-vjeçari me iniciale A.K., ka pretenduar se mjeku  Grizhja nuk i ka shërbyer siç duhet gruas së tij, por kishte vendosur ta dërgonte drejt QSUT-së.
Por, pak muaj më parë, i njëjti mjek ka kryer një prej operacioneve të rralla në botë.
Kirurgët Besmir Grizhja, Lulëzim Lekaj, Luan Bajri, me mbështetjen e gjithë stafit të kolegëve, raportohet se realizuan në muajin shkurt të këtij viti, një intervent kirurgjikal vaskular (bypass femoro popliteal me graft PTFE 5mm) për një sëmundje shumë të rrallë. Nga viti 1964 deri në 2008, në botë janë regjistruar 168 raste në total.
Pacientja kishte Arterie ischiadike persistente aneurizmatike të trombozuar, me ishemi të këmbës (në rrezik amputacioni). Falë këtij interventi, pacientes iu shpëtua këmba. Kirurgët u shprehën pas këtij operacioni se “ndihemi krenar për këtë intervent të suksesshëm, për institucionin ku shërbejmë si dhe për profesionalizmin e mjekëve kirurgë e anestezistë”.

Grupi i cili trafikonte drogë nga Laguna e Vilunit ka qenë një ndër më të strukturuarit që ka hetuar Prokuroria e Krimeve të Rënda. Deri më tani në periudha të ndryshme kohore janë arrestuar 11 persona. Të premten pasdite dhe këtë të shtunë Gjykata e Apelit për Krimet e Rënda i ka miratuar Prokurorisë edhe 5 urdhër-arreste të tjerë. Këta persona janë shpallur në kërkim, pasi nuk janë gjetur në banesat e tyre.
Sipas Prokurorisë ata kanë patur rol aktiv në trafikimin e 700 kilogramëve kanabis, të cilat u sekuestruan në 2014 në Vilun. Identitetet nuk bëhen publike për shkak të sekretit hetimor, por sqarohet veprimet e tyre janë zbuluar nga përgjimet. Vlen për t’u sqaruar se Gjykata e Shkallës së Parë nuk i miratoi urdhër-arrestet, të cilat detyruan Prokurorinë t’i drejtohej Apelit.
Prokurorisë së Krimeve të Rënda iu deshën dy vjet hetime dhe bashkëpunim i ngushtë me autoritet italiane për të arrestuar 4 persona të tjerë, të cilët trafikonin kanabis drejt vendit fqinj nga Laguna e Vilunit. Tre vjet më parë u arrestuan 7 persona dhe u dënuan nga Gjykata e Krimeve të Rënda. Vazhdon të jetë në kërkim Bardhok Pllanaj i cilësuar një prej njerëzve të rëndësishëm të këtij rrjeti.
Ndërsa në qershor u arrestuan Andi Mita, Kasëm Piluri, Altin Rramolli dhe Andrea Çaushi. Ky i fundit u lirua më pas nga Gjykata e Apelit për Krimet e Rënda. Prokurorët thonë se këta persona kishin përgatitur trafikimin drejt Siçilisë të rreth 3.5 ton kanabis. Ky grup furnizonte familjet mafioze me kanabis në Siçili.

Detaje të reja janë zbardhur nga policia lidhur me ngjarjen e ndodhur një ditë më parë në periferi të Korçës, ku 2 persona kanë përfunduar në spital të plagosur me thikë. Burime zyrtare bëjnë me dije se, si autorë janë arrestuar at e bir, pasi në bashkëpunim mes tyre, plagosën rëndë me mjete të forta krushkun e tyre dhe djalin e tij. Në pranga janë vënë Petrit Çaushllari, 47 vjeç, si edhe djali i tij Emiljano Çaushllari, 21 vjeç, të dy banues në fshatin Buçimas-Pogradec.
Arrestimi i tyre u bë pasi, pas një konflikti për motive të dobëta, kanë goditur me mjete të forta në kokë dhe trup, shtetasit P.B, 60 vjeç, si edhe djalin e tij shtetasin S.B, 26 vjeç, në banesën e këtyre të fundit.
Nga hetimet e kryera rezulton se autorët e dyshuar të ngjarjes, kanë lidhje krushqie me dy të plagosurit, pasi vajza e Petrit Çaushllarit është nusja e djalit të shtetasit P.B dhe kunata e S.B. Shtetasi P.B, aktualisht ndodhet në Spitalin Rajonal të Korçës, nën kujdesin intensiv të mjekëve.
Katër shtetasit e mësipërm dyshohet të jenë përfshirë në këtë konflikt fizik mes tyre pas një debati për motive të dobëta, midis shtetasit P.B. dhe nuses të djalit të tij. Materialet për rastin i kaluan Prokurorisë të Rrethit Gjyqësor Korçë për veprën penale “Plagosja e rëndë me dashje, kryer në bashkëpunim”.