Presidenti Donald Trump hodhi përsëri kritika të mërkurën kundër prokurorit të Përgjithshëm, Jeff Sessions, zyrtari më i lartë i zbatimit të ligjit në vend.
Në komentet e bëra në Twitter, zoti Trump pyeste se përse prokurori i Përgjithshëm nuk e zëvendësoi shefin në detyrë të FBI-së, Andrew McCabe, të cilin presidenti e quan mik të zotit James Comey, ish-shefit të FBI-së të shkarkuar prej tij në muajin maj.
Në atë kohë zoti Comey drejtonte hetimet rreth ndërhyrjes ruse në zgjedhjet presidenciale të vitit të kaluar, ndërhyrje e cila synonte të ndihmonte në humbjen e rivales së zotit Trump, Hillary Clinton.
Presidenti Trump shkruante në Twitter se ishte zoti McCabe që vitin e kaluar kreu hetimin që e pastroi zonjën Clinton nga shkeljet në përdorimin prej saj të një serveri privat kur ajo ishte sekretare Shteti nga viti 2009 më 2013.
Zoti Trump shkruante se McCabe “mori një shumë të madhe parash (700 mijë dollarë)” nga Hillary Clinton dhe përfaqësuesit e saj.
Financimi për të cilin bën fjalë zoti Trump, lidhet me fondet që një aleat i zonjës Clinton, guvernatori i Virxhinias, Terry McAuliffe, i kaloi zonjës Jill McCabe në fushatën e saj të pasuksesshme për një vend në Senatin e Virxhinias.
Sipas mediave amerikane, ndihmësit e Shtëpisë së Bardhë i kanë kërkuar zotit Trump t’u japë fund sulmeve pothuajse të përditshme kundër zotit Sessions, figurës së parë politike në vend që shprehu mbështetje për zotin Trump vitin e kaluar, kur ai filloi garën e gjatë, por përfundimisht të suksesshme për Shtëpinë e Bardhë.

Kritikat e Presidentit dhe reagimet

Jeff Sessions, si një senator republikan konservator me ndikim, ishte një mbështetës i hershëm dhe i fuqishëm i fushatës presidenciale të Donald Trumpit.
Por ditët e fundit Presidenti e ka sulmuar zotin Sessions për tërheqjen e tij nga hetimet për Rusinë, duke e quajtur atë “të dobët”.
“Është e qartë se Presidenti Trump po përpiqet ta detyrojë prokurorin e tij të Përgjithshëm të largohet nga detyra”, thotë senatori Chuck Schumer.
Disa ligjvënës republikanë po flasin në mbështetje të kolegut të tyre.
“Jeff ka qenë shumë besnik ndaj Presidentit dhe mendoj se ai meriton të njëjtën besnikëri”, thotë senatori Orrin Hatch.
Sessions – ashtu si të gjithë të emëruarit e kabinetit – është një zyrtar që varet nga Presidenti:
“Është në dorën e Presidentit të vendosë për anëtarët e kabinetit dhe për çdo pasojë që vjen nga kjo”.
Presidenti Trump mohoi të martën se po e lë zotin Sessions në një situatë të vështirë, por nuk bëri ndonjë lëvizje për ta shpëtuar prokurorin e Përgjithshëm:
“Jam shumë i zhgënjyer nga prokurori i Përgjithshëm. Të shohim çfarë do të ndodhë. Koha do ta tregojë”.
Presidenti mund të paguajë një çmim të lartë politik mes konservatorëve duke braktisur një besnik si Sessions:
“Shumë prej tyre mendojnë, për sa kohë do të mund të vazhdojnë të balancojnë marrëdhënien e tyre me Presidentin dhe nevojën për të përmbushur politikat që duan të arrijnë duke patur parasysh se Shtëpia e Bardhë dhe të dyja dhomat e Kongresit kontrollohen nga republikanët”.
Duke formuluar presidencën e tij, Donald Trump, miratoi shumë politika të zotit Sessions si ato për imigracionin, duke i përdorur ato për të fituar mbështetjen e bazës së zhgënjyer konservatore, gjë që e ndihmoi zotin Sessions të merrte këtë post.

Senati amerikan i kontrolluar nga republikanët pritet të votojë mbi një projektligj që do të shfuqizonte ligjin për kujdesin shëndetësor të ish-Presidentit Barack Obama.
Të martën, Dhoma e Përfaqësuesve hodhi poshtë një projektligj që synonte ndryshimin e ligjit të deritanishëm, të njohur si Akti për Kujdesin e Përballueshëm Shëndetësor, i cili ka siguruar mbulimin e miliona amerikanëve.
Legjislacioni i ri do të shfuqizonte ligjin e ish-Presidentit Obama, por pa garantuar zëvendësimin e tij me një tjetër.
Disa republikanë janë të shqetësuar se shfuqizimi i ligjit të deritanishëm pa e zëvendësuar atë do të bënte që shumë amerikanë të humbisnin sigurimet shëndetësore, prandaj kjo qasje duket se nuk ka mbështetje të mjaftueshme në Senat.
Senati shpreson të zhvillojë këtë javë një votim përfundimtar mbi një projektligj për kujdesin shëndetësor. Udhëheqësit republikanë të Senatit po shqyrtojnë gjithashtu një të ashtuquajtur “variant të zbutur” që do të shfuqizonte disa dispozita kryesore të ligjit aktual siç janë ndëshkimet financiare për njerëzit që refuzojnë të blejnë sigurim shëndetësor apo për bizneset që nuk ofrojnë sigurime për punëtorët.
Edhe nëse ligjvënësit miratojnë një projektligj, problemet e kujdesit shëndetësor të vendit nuk do të zgjidhen në të ardhmen e afërt, tha të mërkurën në “CNN” drejtori i ri i komunikimit i Shtëpisë së Bardhë Anthony Scaramucci.
“Nëse presim një zgjidhje të menjëhershme ose një ilaç çudibërës, këtë nuk e ofron askush këtu në Uashington”, tha zoti Scaramucci.
Të martën, ligjvënësit hodhën poshtë një variant të hartuar nga udhëheqësi i shumicës së Senatit, Mitch McConnell. Varianti në fjalë parashikonte dhënien fund të masave për zgjerimin e programit Medicaid, që siguron sigurimin shëndetësor për amerikanët me të ardhura të ulëta.

Presidenti i Turqisë, Rexhep Tajip Erdogan tha se Turqia ka rënë dakord të blejë sistemin rus të raketave S-400, pavarësisht nga shqetësimet e NATO-s. Blerja vjen ndërkohë që Ankaraja përpiqet ta afrojë Moskën, pas rrëzimit nga Turqia të një bombarduesi rus në vitin 2015.
“Tani kemi ndërmarrë hapa me Rusinë për këtë blerje. Marrëveshjet janë nënshkruar”, u tha zoti Erdogan deputetëve të tij. “Me vullnetin e Perëndisë, do të shohim ardhjen e raketave S-400 në vendin tonë dhe do të vazhdojmë pastaj me prodhimin e përbashkët”, tha Presidenti turk.
Zoti Erdogan u përpoq ndërkohë të zbutë shqetësimet e partnerëve të tij të NATO-s, “Përse do të shkaktojë kjo tensione? Një vend duhet të jetë në kërkim të mënyrave ideale për sigurinë e vet”, tha ai.
Ankaraja ka mosmarrëveshje me aleatët e saj perëndimorë lidhur me mbështetjen që ata u japin grupeve siriane kurde që luftojnë kundër Shtetit Islamik, grupe që shihen si terroriste nga Turqia. Një çështje tjetër janë kritikat perëndimore në rritje ndaj Turqisë mbi të drejtat e njeriut.
Partnerët e Ankarasë në NATO kanë shprehur shqetësim rreth përputhshmërisë së sistemit raketor rus me teknologjinë e Aleancës, së bashku me frikën se Moska mund të përdorë sistemin S-400 si një kalë troje për të komprometuar sistemet e NATO-s.
Kjo çështje pritet të shtojë pikëpyetjet rreth besnikërisë së Ankarasë.
Zaur Gasimov, analist i në Fondacionin Max Webber që merret me marrëdhëniet ruso-turke, thotë se blerja e sistemit S-400 është një hap i kushtueshëm i palës turke për të demonstruar sovranitetin e saj dhe një sinjal për SHBA, BE dhe Gjermaninë. “Duke blerë sistemin S-400, Ankaraja tregon se është e gatshme të afrohet më shumë me Moskën”, thotë analisti.
Ankaraja këmbëngul se sistemi raketor prej 2.4 miliardë dollarësh, i cili njihet si një nga më të efektshmit në treg, përfaqëson çmimin më të ulët në treg. Shitja mbështetet me angazhimin e Rusisë për të transferuar edhe teknologjinë, që gjithashtu është një përparësi e qeverisë turke.
Por, pas blerjes së raketave, qëndrojnë ndoshta arsye të tjera, jo thjesht nevojat për mbrojtje. Ankaraja po përpiqet të bindë Moskën për t’i dhënë fund të gjitha sanksioneve ekonomike të vendosura ndaj Turqisë pas rrëzimit të avionit rus.
Disa nga këto sanksione janë reduktuar pas një sërë takimesh midis Presidentit Erdogan dhe homologut të tij rus, Vladimir Putin.

Shefi i zbatimit të ligjit në Shtetet e Bashkuara është në një pozitë të rrezikuar. I kritikuar ditët e fundit nga Presidenti Donald Trump – i cili e emëroi atë si prokuror të Përgjithshëm – Jeff Sessions e gjen veten nën presion për të dhënë dorëheqjen.
Jeff Sessions, si një senator republikan konservator me ndikim, ishte një mbështetës i hershëm dhe i fuqishëm i fushatës presidenciale të Donald Trumpit.
Por ditët e fundit Presidenti e ka sulmuar zotin Sessions për tërheqjen e tij nga hetimet për Rusinë, duke e quajtur atë “të dobët”.
“Është e qartë se Presidenti Trump po përpiqet ta detyrojë prokurorin e tij të Përgjithshëm të largohet nga detyra”, thotë senatori Chuck Schumer.
Disa ligjvënës republikanë po flasin në mbështetje të kolegut të tyre. “Jeff ka qenë shumë besnik ndaj Presidentit dhe mendoj se ai meriton të njëjtën besnikëri”, thotë senatori Orrin Hatch. Sessions – ashtu si të gjithë të emëruarit e kabinetit – është një zyrtar që varet nga Presidenti:
“Është në dorën e Presidentit të vendosë për anëtarët e kabinetit dhe për çdo pasojë që vjen nga kjo”.
Presidenti Trump mohoi të martën se po e lë zotin Sessions në një situatë të vështirë, por nuk bëri ndonjë lëvizje për ta shpëtuar prokurorin e Përgjithshëm:
“Jam shumë i zhgënjyer nga prokurori i Përgjithshëm. Të shohim çfarë do të ndodhë. Koha do ta tregojë”. Presidenti mund të paguajë një çmim të lartë politik mes konservatorëve duke braktisur një besnik si Sessions: “Shumë prej tyre mendojnë, për sa kohë do të mund të vazhdojnë të balancojnë marrëdhënien e tyre me Presidentin dhe nevojën për të përmbushur politikat që duan të arrijnë duke patur parasysh se Shtëpia e Bardhë dhe të dyja dhomat e Kongresit kontrollohen nga republikanët”.
Duke formuluar presidencën e tij, Donald Trump, miratoi shumë politika të zotit Sessions si ato për imigracionin, duke i përdorur ato për të fituar mbështetjen e bazës së zhgënjyer konservatore, gjë që e ndihmoi zotin Sessions të merrte këtë post.

Grupet e milicive rebele siriane dhe Turqia duket se po përgatiten të shtojnë operacionet e tyre ushtarake në veri të Alepos që synojnë kryesisht rimarrjen e qyteteve dhe fshatrave arabe, të pushtuara në vitin 2015 nga Njësitë kurde të Mbrojtës së Popullit ose YPG.
Luftimet janë një tregues i ri se Shtetet e Bashkuara, Turqia, Rusia dhe Irani po zhyten më thellë në një konflikt shumëdimensional në Siri.
Forcat kurde siriane janë aleatët kryesorë të Shteteve të Bashkuara në Sirinë Veriore. Intensifikimi i përplasjes arabo-kurde, do të ndërlikonte planet e forcave demokratike siriane të udhëhequra nga kurdët për të sulmuar Rakën, kryeqytetin e vetëshpallur të grupit terrorist të Shtetit Islamik.
Situata në Sirinë Veriore po bëhet gjithnjë e më komplekse, duke nxjerrë në pah mozaikun e mikrokonflikteve që përfshijnë grupe të ndryshme milicësh, ndërsa është rritur intensiteti i luftimeve mes rebelëve arabë të mbështetur nga Turqia me kurdët.
IS-is është përpjekur të fitojë terren në provincën e Idlib-it në perëndim të Alepos, gjë që i ka çuar edhe në përplasje me xhihadistët kundërshtarë të grupit të Al-Kaidës.
Lufta mes të gjitha grupeve të përfshira në konflik zhvillohet për territore.
Luftimet në Sirinë Veriore ndërmjet rebelëve të mbështetur nga Turqia, një vend anëtar i NATO-s dhe kurdëve rrezikon të minojë betejën kundër grupit të Shtetit Islamik.

Qeveria maqedonase po vlerëson se vetëm përmes ndërtimit të fqinjësisë së mirë dhe përmbushjes së kritereve evropiane do të mund të përshpejtohet procesi i integrimit të vendit në Bashkimin Evropian dhe në NATO. Në mbledhjen e fundit qeveria e Maqedonisë ka miratuar tekstin e Marrëveshjes për Fqinjësi dhe Bashkëpunim me Bullgarinë.
“Marrëveshja për fqinjësi të mirë me Bullgarinë është në pajtim me interesat nacionale të Maqedonisë. Do të nënshkruhet në gjuhën maqedonase dhe në gjuhën bullgare. Marrëveshja hap perspektiva të mëdha për bashkëpunim edhe për zgjidhjen e jo për krijim të problemeve”, deklaroi kryeministri Zoran Zaev. Sipas tij nënshkrimi i kësaj marrëveshjeje është pasqyrë e një gjenerate të politikanëve, të cilët ndërtojnë ura dhe zgjasin dorën.
Dokumenti do të ndihmojë për intensifikimin e bashkëpunimit të përgjithshëm mes dy vendeve, shkëmbimi aktual tregtar mes dy vendeve arrin mes 500 dhe 600 milionë euro dhe në të ardhmen pritet të arrijë deri në një miliard euro. Kryeministri Zaev tha edhe se pret që opozita e Maqedonisë ta mbështesë marrëveshjen për fqinjësi të mirë me Bullgarinë. Është parashikuar që marrëveshjen për fqinjësi të mirë mes Maqedonisë dhe Bullgarisë ta nënshkruajnë kryeministrat e dy vendeve Zoran Zaev dhe Bojko Borisov më 1 gusht në Shkup.

VMRO-DPMNE: Marrëveshja është në dëm të Maqedonisë
Paralajmërimi i nënshkrimit të marrëveshjes për fqinjësi të mirë midis Maqedonisë dhe Bullgarisë shkaktoi reagime të shumta në opinion. VMRO-DPMNE-ja opozitare kërkon nga qeveria transparencë për të gjitha çështjet me interes shtetëror, përfshirë këtu edhe nënshkrimin e marrëveshjes për fqinjësi të mirë me Bullgarinë.
Grupi i deputetëve të VMRO-DPMNE-së kërkon seancë publike dhe urgjente lidhur me paralajmërimin për nënshkrim të marrëveshjes për fqinjësi të mirë me Bullgarinë. Parlamenti, thotë koordinatori i grupit parlamentar të VMRO-DPMNE-së, Ilija Dimovski duhet ta shqyrtojë marrëveshjen dhe të sjellë konkluzione se nëse duhet ose jo të nënshkruhet. Marrëveshja, sipas VMRO-DPMNE-së është e dëmshme për Maqedoninë.

Presidenti Ivanov kërkon elaborim të marrëveshjes
Presidenti i Maqedonisë, Gjorge Ivanov i bën thirrje qeverisë që ta elaborojë tekstin e marrëveshjes për fqinjësi të mirë me Bullgarinë para nënshkrimit të saj.
“Mungesa e transparencës shkaktoi komente negative dhe shqetësim në opinion, i cili duhet të tejkalohet me publikimin e tekstit të marrëveshjes para marrëveshjes së saj. Çdo herë duhet të merren parasysh interesat kombëtare dhe shtetërore të Maqedonisë dhe se çfarëdolloj marrëveshje ndërshtetërore nuk guxon të jetë në dëm të interesave kombëtare të Maqedonisë”, thuhet në komunikatën e presidencës.