Zinedine Zidane uron Alvaro Moratën për aventurën e tij të re. Tekniku i “Los Blancos” në një intervistë të dhënë i ka uruar sulmuesit suksese tek Chelsea. Më tej francezi deklaroi se vendimi për t’u larguar ishte i 25-vjeçarit, gjithsesi Zidane shtoi se dyert e Reali të Madridit do të jenë gjithmonë të hapura për Alvaron.
Sevilla shumë pranë transferimit të Simon Kjaer. Mbrojtësi aktualisht aktivizohet tek Fenerbahçe, kampionat të cilin ai kërkon ta braktisë. Andaluzianët kanë marrë konfirmimin e Kajer, ndërkohë që mes klubeve ende nuk është arritur gjuha e përbashkët.
Alvaro Negredo  i jep lamtumirën Valencias. Sipas asaj që raportojnë mediat spanjolle, sulmuesi nuk është më në planet e teknikut Marcelino, nisur nga ky fakt, Negredo duke nisur që nga sezoni i ardhshëm do të luajë tek Besiktas.
Ernesto Valverde i kënaqur me skuadrën e tij të re. Tekniku i Barcelonës edhe pse pak ditë në krye të stolit katalanas është shprehur i lumtur për organikën që ai ka në dispozicion, gjithashtu ai shtoi se skuadra i ka të gjitha mundësitë për të arritur gjëra të mëdha këtë sezon në La Liga.

Nuk do të ketë lamtumirë të dhembshme. “Los Blancos” mbetet në të ardhmen e Cristiano Ronaldos. Sulmuesi është i përqendruar vetëm te Reali i Madridit dhe pavarësisht se vazhdon periudhën e pushimeve e do t’i bashkohet ekipit vetëm në fund të korrikut, mbetet i lidhur me projektin në “Santiago Bernabeu”. Lajmin e mirë për tifozët madrilenë e dha e përditshmja “Marca”, që përdorte titullin e madh “Do të qëndrojë”, ndërsa citon edhe fjalët e lojtarit. “Fitimi i trofeve të rëndësishëm gjatë vitit të kaluar me klubin tim ishte një arritje fantastike. Do të ishte e bukur t’i përsërisnim sukseset”.
Kjo ishte deklarata e Cristiano Ronaldos rreth së ardhmes së tij, duke konfirmuar se dëshiron të qëndrojë te kampionët e Europës dhe të vazhdojë të fitojë trofe në Madrid. Pas problemeve me tatimet dhe akuzat për evazion fiskal në vlerën e disa miliona eurove, fillimisht Reali u trondit nga zërat se 4 herë fituesi i Topit të Artë do të largohej nga “Santiago Bernabeu”, ndërsa mes skuadrave të interesuara për ta blerë ishin Paris Saint-Germain dhe Manchester United.
Ronaldo e udhëhoqi Realin e Madridit drejt fitimit të katër trofeve gjatë sezonit të kaluar, duke përfshirë këtu edhe suksesin në Champions dhe titullin e parë në La Ligan spanjolle prej vitit 2012. Me portugezin që do të qëndrojë në skuadër, “Los Blancos” vazhdojnë të ëndërrojnë.

Real Madridi është shumë pranë realizimit të një transferimi historik në botën e futbollit. Prestigjiozja spanjolle “Marca” ka raportuar se klubi i drejtuar nga Florentino Perez ka gjetur në parim akordin me Monakon për transferimin e sulmuesit francez 18-vjeçar, Kilian Mbape. Shifra e marrëveshjes thyen çdo rekord në tregun e transferimeve, teksa bëhet fjalë për një operacion me kosto 180 milionë euro. Sipas raportimeve, kjo shumë përbëhet nga 150 ose 160 milionë që do të paguhen menjëherë dhe pjesa tjetër në varësi të klauzolave në kontratë.
Duke parë se edhe PSG po përflitet gjithnjë e më shumë për një blerje me shifra stratosferike për Nejmarin, rekordi i Mançester Junajtidit me 105 milionë eurot e paguara për Pogbanë në verën e shkuar nuk do të rezistojë gjatë.
Presidenti i Real Madridit, Florentino Perez ka vendosur të shesë sulmuesin francez Karim Benzema, pas tetë viteve të kaluara në “Santiago Bernabeu”. Perez beson se koha e Banzema ka përfunduar dhe më e mira për skuadrën do të ishte që ai të largohet, shkruan “Diario Gol”. Me paratë e Benzemasë, Danilos dhe Alvaro Moratës, Real Madrid do të transferojë sulmuesin e Monakos, Kylian Mbape. Për Benzemanë tashmë interesim kanë shprehur shumë skuadra si Arsenal, PSG dhe Milan.
Reali shfaq interes për Marcus Rashford. Kampionët e Spanjës, pas largimit të Alvaro Moratës po kërkojnë të gjejnë zëvendësuesin e tij. Si alternativë shihet sulmuesi i Man.United, Marcus Rashford. Pavarësisht dëshirës, klubi “Los Blancos” nuk do ta ketë aq të lehtë të arrijë akordin, pasi talenti i “Djajve të Kuq” cilësohet si një garanci më shumë për United në vijën e parë të sulmit.
Monako është momentalisht klubi numër një në botë për sa i përket të ardhurave të arkëtuara nga merkatoja e këtij sezoni. Futbollisti i fundit që u largua ishte mbrojtësi Mendi, i cili kaloi te Mançester Siti për 52 milionë paund, duke u bërë mbrojtësi i dytë më i shtrenjtë në botë pas Kajl Uolkerit.
Vetëm në këtë sezon arkat e klubit nga principata janë mbushur me 167 milionë euro. Bernardo Silva (50), Bakaioko (40), German (8), Dialo (5) Xhen (3.5) dhe Dirar (3.5) janë lojtarët e larguar në këtë sezon nga klubi francez. Por transferimet nuk pritet të mbarojnë këtu, pasi në treg janë edhe “xhevahirët e mëdhenj” si Lemar, Fabinho dhe Kilian Mbape. Oferta marramendëse kanë mbërritur në drejtim të tyre dhe klubi e ka mjaft të vështirë t’i refuzojë. Pas Monakos, në vendin e dytë përsa i përket të ardhurave nga transferimi i lojtarëve ndodhet Reali i Madridit me 45.5 milionë më pak.

Pasi rinovoi kontratën duke vendosur të vijojë me projektin e Chelsea-t, Antonio Konte po projekton afrimet e reja në merkato. 80 milionë eurot e shpenzuara për Alvaro Moratën janë vetëm fillimi i një merkatoje në hyrje për Blutë e Londrës. Trajneri italian ka qëndruar me synimin për të mbrojtur titullin kampion, teksa kushti i parë ishte përforcimi i skuadrës, duke qenë se këtë sezon Chelsea rikthehet të luajë në Europë pas një viti mungesë. Sipas shtypit anglez, në dispozicion të Kontes janë plot 280 milionë euro për të përforcuar ekipin, ndërsa vetë trajneri ka piketuar emrat që dëshiron të afrojë. Nuk është më një mister që mbrojtësi brazilian i Juventusit, Alex Sandro është një preferencë e Kontes teksa mbyllja e marrëveshjes me klubin torinez nuk duket e pamundur.
Një tjetër emër që përflitet prej javësh është ai i Fernando Llorentes, sulmuesi i Swansea, një njohje e vjetër e trajnerit italian. Për të përforcuar mbrojtjen Konte kërkon me ngulm Virgil van Dijk të Southampton, madje holandezi nuk stërvitet me ekipin prej disa ditësh, pasi ka kërkuar të largohet. Emri i fundit në listën e 48-vjeçarit italian është bashkëkombasi i tij, mesfushori i Interit, Antonio Candreva. Ditët e fundit ka qenë menaxheri i futbollistit të kombëtares italiane ai që ka hapur një dritare për largimin e mesfushorit, që me shumë mundësi mund t’i bashkohet londinezëve për një aventurë të re. Për të 4 këta futbollistë Konte ka një buxhet prej 280 milionë eurosh dhe tashmë ka nisur tratativat për t’i veshur me fanellën e Chelsea-t, në mënyrë që kampionët të nisin sezonin të kompletuar me objektivin për të mbrojtur titullin, por edhe për të shkuar sa më larg në Champions League.

Marco Asensio dëshiron të shpërblehet nga Real Madrid. Talenti spanjoll, Marco Asensio ka refuzuar skuadrat angleze, Liverpool, Arsenal dhe Manchester United për të qëndruar në Real Madrid.
Ai tashmë dëshiron të shpërblehet nga Real Madrid, duke e vendosur të luajë më shpesh këtë sezon se sa sezonin e kaluar. Për më shumë, Asensio ka kërkuar edhe vazhdimin e kontratës, duke përfituar aq sa i kishin ofruar skuadrat angleze.

Skënderbeu dhe Shkëndija, dy skuadrat shqiptare të mbetura në arenën ndërkombëtare, njohin arbitrat për sfidat e turit të tretë kualifikues të Europa League. Duelin e kësaj të enjteje të Skënderbeut në fushën e Mlada Boleslav do ta drejtojë gjyqtari maltez Alan Mario Sant. Bëhet fjalë për një arbitër të ri në moshë, por që ka mjaft eksperiencë ndërkombëtare, pasi mban stemën e FIFA-s prej 7 vitesh. 36-vjeçari njihet si një prej më të mirëve në Maltë, ndërsa është një gjyqtar që lejon edhe luftën e fortë sportive në fushë, duke dhënë mesatarisht vetëm 3 kartonë të verdhë për ndeshje në duelet ndërkombëtare. Ai arrin t’i menaxhojë mjaft mirë situatat në fushë, edhe prej profesionit si menaxher i burimeve njerëzore në vendlindje.
Alan Mario Sant nuk ka asnjë precedent me ekipet shqiptare, ndërsa në një rast që ka drejtuar Mlada Boleslav i ka sjellë fat ekipit çek. Kjo ka ndodhur në turin e dytë kualifikues të Europa League në sezonin 2014-2015, me Mladan që fitoi 4-0 në fushën e boshnjakëve të Siroki Brijeg. Për sfidën e kësaj të enjte, në orën 18:00 asistentë të Sant në stadiumin “Mestsky” do të jenë Roberto Vella dhe Luke Portelli, ndërsa arbitër i katërt Malcolm Spiteri, të gjithë nga Malta.
Ndërkohë, ndeshja e Shkëndijës përballë Trakait në Lituani do të arbitrohet nga irlandezi Neil Doyle. Një emër i njohur për shqiptarët, edhe sepse më 10 korrik 2014 ai drejtoi sfidën e turit të parë kualifikues të Europa League, ku Kukësi barazoi 0-0 ndaj Kairat Almaty. Më 12 tetor 2012 Doyle ka drejtuar edhe ndeshjen kualifikuese ndërmjet përfaqësueses së 19-vjeçarëve të Italisë dhe Shqipërisë, e cila u fitua 3-0 nga të kaltërit, ndërsa mes gjashtë kartonëve të verdhë, arbitri irlandez largoi me karton të kuq nga fusha edhe një futbollist shqiptar.
Katërshja e gjyqtarëve është e gjitha nga Irlanda, me Neil Doyle që në sfidën në Vilnius në orën 18:30 do të ketë si asistentë Emmet Dynan dhe Dermot Broughton, ndërsa gjyqtar i katërt është Rob Harvey.

Shkëndija ka nisur përgatitjet për ndeshjen e raundit të tretë të Europa League ndaj lituanezëve të Trakait. Pas eliminimit të JHK Helsinki dhe kthimit në Tetovë, futbollistët kuqezi nën drejtimin e trajnerit Qatip Osmani po përgatiten për të synuar kalimin për në raundin e play off përballë një kundërshtari që mund të konsiderohet si një surprizë e këtij turneu deri në këto momente, duke qenë se në raundet paraardhëse ka mundur të eliminojë një skuadër skoceze dhe një suedeze.
Atmosfera në kampin e Shkëndijës ka qenë shumë pozitive dhe tetovarët do të stërvitjen në qytetin e tyre deri në nisjen e ekipit për në Lituani në orët e para të mëngjesit të së mërkurës. Stafi teknik është bazuar kryesisht në stërvitjet me një ngarkesë të lehtë fizike e lojën me top, ndërsa me skemat pritet të punohet në stërvitjen që do të zhvillojnë në Lituani gjatë së mërkurës pasdite. Ndeshjen e parë me Trakain, skuadra tetovare do ta luajë në transfertë të enjten në orën 18:30 me synimin për të arritur kualifikimin në fazën e play off, ku ishte e pranishme dhe vjet teksa u eliminua nga belgët e Gentit.