Jared Kushner, dhëndër dhe këshilltar i afërt i Presidentit Donald Trump, thotë se ai është takuar katër herë me zyrtarë rusë gjatë dhe pas fushatës zgjedhore, por se nuk ka bashkëpunuar në fshehtësi me Rusinë apo ndonjë qeveri tjetër të huaj.
Zoti Kushner bëri publike dje një deklaratë me shkrim prej 11 faqesh, përpara se të paraqitej për t’iu përgjigjur pyetjeve në një seancë me dyer të mbyllura të Komisionit të Senatit për Zbulimin. Gjithashtu, një tjetër seancë dëgjimore është planifikuar për ditën e sotme tek Komisioni për Zbulimin i Dhomës së Përfaqësuesve, si pjesë e hetimeve për ndërhyrjen e Rusisë në zgjedhjet e vjetshme në Shtetet e Bashkuara.
Zoti Kushner shkruan se: “Dokumentet dhe të dhënat që ofroj provojnë se unë kam patur ndoshta katër herë kontakte me përfaqësues të Rusisë, ndër mijëra kontakte të zhvilluara gjatë fushatës elektorale dhe periudhës së tranzicionit të qeverisë; asnjë nga këto kontakte nuk patën ndikim në asnjë mënyrë tek zgjedhjet apo ndonjë vlerë për t’u mbajtur mend”.
Ai përshkruan në vazhdim disa takime të shkurtra me ambasadorin e Rusisë në Shtetet e Bashkuara, gjatë të cilave ai thotë se diskutuan rreth dëshirës për të përmirësuar marrëdhëniet SHBA–Rusi, por ai mohon raportimet nga mediat se ka patur edhe biseda të mëtejshme telefonike me ambasadorin rus, Sergey Kislyak.
Komisionet e Kongresit pritet të kërkojnë informacion të mëtejshëm për konktatet e zotit Kushner me Rusinë, ndër to edhe për një takim të zhvilluar në muajin qershor të vitit të kaluar me një avokate ruse dhe personazhe të tjera të lidhura me Moskën.
Takimi në fjalë është vendosur në qendër të vëmendjes që kur i biri i Presidentit, Donald Trump Jr., bëri publike e-mail-e ku shprehej padurimi i tij për të dhënat që ai besonte se do të merrte nga juristja ruse, të dhëna të dëmshme për zonjën Hillary Clinton, rivalen e zotit Trump në zgjedhjet e vitit 2016.
Donald Trump Jr., dhe drejtori i fushatës Paul Manafort, i cili ishte gjithashtu i pranishëm në atë takim, u përfshinë fillimisht në axhendën e kësaj jave të Komisionit të Senatit për Gjyqësorin. Por, dëshmia e tyre është shtyrë, bazuar në mirëkuptimin se do të ofrojnë dokumente dhe informacion të mëtejshëm për komisionin.
Zoti Kushner shprehet në deklaratën e tij me shkrim se ndërsa ai ndodhej në takim, nuk u diskutua fare për fushatën elektorale dhe se ai pati vendosur menjëherë se koha po i humbte kot në këtë takim.
Ndërsa hetimet për Rusinë po shqyrtojnë tashmë njerëzit më të afërt të Presidentit Trump, janë ngritur pikëpyetje rreth mundësisë së faljeve nëpërmjet dekreteve presidenciale. Ekipi ligjor i Presidentit Trump vuri në dukje se Kushtetuta amerikane i jep Presidentit autoritet të gjerë për të falur, por nënvizoi se nuk po mendohet për një gjë të tillë.
Avokati i Presidentit, Jay Sekulow, i tha rrjetit “ABC” se “nuk po e shqyrtojmë këtë aspekt, pasi nuk shtrohet çështja e faljeve. Nuk ka asgjë për të cilën të falen persona”.
Por, Shtëpia e Bardhë këmbëngul se fokusi i mediave tek hetimet për Rusinë është në drejtimin e gabuar.
Zëdhënësja e Shtëpisë së Bardhë, Sarah Huckabee Sanders, i tha kanalit “ABC” se “tre çështjet kryesore për amerikanët janë emigracioni, sistemi i kujdesit shëndetësor dhe vendet e punës. Ndërsa tre çështjet kryesore për mediat janë Rusia, Rusia, dhe Rusia”.
Edhe ligjvënësit nga të dyja kahet politike po thonë mendimin e tyre. Kreu republikan i Komisionit të Senatit për Gjyqësorin, Chuck Grassley, kërkoi nëpërmjet Twitter-it botimin e plotë të një përgjimi të raportimit në Moskë të ambasadorit rus për një bisedë me ish-senatorin Jeff Sessions, atëherë mbështetës i fushatës Trump dhe tashmë Prokurori i Përgjithshëm i Shteteve të Bashkuara.
Po kështu, kreu i demokratëve në Komisionin e Senatit për Zbulimin, Mark Warner, ka kritikuar ashpër përmendjen e faljeve të mundshme presidenciale si masa parandaluese për personat që po hetohen në kuadrin e hetimeve për Rusinë.

Presidenti i Polonisë thotë se do të përdorë veton ndaj dy prej tri projektligjeve të miratuara kohët e fundit nga ligjvënësit për të reformuar sistemin gjyqësor të vendit.
Presidenti Andrzej Duda njoftoi vendimin e tij në televizion të hënën, ditë pas protestave masive në rrugë.
“Unë kam vendosur të kthej në Parlament dy ligjet, që do të thotë se do të vë veton ndaj ligjit për Gjykatën e Lartë dhe ligjit për Këshillin Kombëtar të Drejtësisë”, tha ai.
Të dy këto ligje përgjithësisht konsiderohen si sfida për pavarësinë e sistemit gjyqësor dhe janë pjesë e një rregullimi ligjor, të planifikuar nga Partia për Ligj dhe Drejtësi, që qeveris vendin.
Ligji i tretë riorganizon funksionimin e gjykatave lokale dhe presidenti Duda tha se do ta nënshkruante atë.
Projektligji për Gjykatën e Lartë do ta kishte vënë gjyqësorin nën kontrollin politik të partisë në pushtet, me ministrin e Drejtësisë, i cili është gjithashtu prokuror i Përgjithshëm dhe që ka fuqinë për emërimin e gjyqtarëve. Presidenti Duda ka kundërshtuar që një prokuror i Përgjithshëm të ketë kaq shumë kompetenca.
Në marrjen e vendimeve të tij, presidenti Duda doli hapur për herë të parë me Jaroslaw Kaczynskin, i cili është udhëheqësi i Partisë për Drejtësi, dhe udhëheqës de facto i vendit, por nuk mban post zyrtar.
Presidenti tha se besonte se Polonia ka nevojë për reforma të gjyqësorit, por nuk mendon se këto dy ligje do të ngrinin ndjenjën e sigurisë dhe drejtësisë në vend.

Punëtorët e gazetës opozitare turke, “Cumhuriyet”, përkatësisht 17 prej tyre, do të dalin në gjyq, pas disa muajve që kanë kaluar në paraburgim. Shumica e të dyshuarve ishin ndaluar në tetor të vitit 2016, periudhë në të cilën Turqia ishte në gjendje të jashtëzakonshme.
Gjendja e jashtëzakonshme në Turqi është shpallur pas tentimeve të dështuara për grushtshtet në korrikun e vitit të kaluar.
Autoritetet e fajësojnë klerikun Fethullah Gulen për këtë çështje. Gjykimi i gazetarëve dhe menaxherëve të gazetës “Cumhuriyet”, kanë rritur shqetësimet për lirinë e shtypit nën regjimin e presidentit Recep Tayyip Erdogan.
Të pandehurit mund të dënohen deri me 43 vite burgim.
Punëtorët e gazetës “Cumhuriyet” akuzohen për publikim të sekreteve shtetërore dhe bashkëpunim me Gulenin.
Përmes një deklarate të përbashkët, grupet që mbrojnë lirinë e shtypit kanë thënë se “rasti i punëtorëve të gazetës ‘Cumhuriyet’ ka për qëllim heshtjen e një prej zërave të paktë opozitarë në vend”.
Sipas grupit për mbrojtjen e lirisë së shtypit, P24, aktualisht në Turqi janë 166 gazetarë të burgosur, shumica e të cilëve të arrestuar në kohën e gjendjes së jashtëzakonshme në këtë vend. Mirëpo Erdogan ka insistuar këtë muaj se janë vetëm “ dy gazetarë të vërtetë” mbrapa grilave në Turqi.

Në Kosovë pothuajse për çdo vit, kompanitë private, konkretisht ato në sektorin e bujqësisë, ndërtimtarisë dhe lokalet shërbyese, përballen me problemin e punësimit sezonal të punëtorëve.
Ndonëse shkalla e papunësisë në Kosovë mbetet e lartë, sipas disa bizneseve private, shpesh ndodh që të papunët nuk janë të interesuar të punojnë në këta sektorë. Në anën tjetër, përfaqësues të punëtorëve, thonë se mosgatishmëria e qytetarëve për të punuar punë sezonale, paraqitet për shkak të kushteve të vështira në kompanitë private.
Një ndër kompanitë vendore që për çdo sezon përballet me mungesën e punëtorëve, është kompania “Pestova”, e cila merret me përpunimin e patates.
Bedri Kosumi, pronar i kësaj kompanie thotë për Radion Evropa e Lirë se gjatë kësaj periudhe për çdo ditë i nevojiten nga 20 punëtorë të rinj, por që, sipas tij, qytetarët po hezitojnë ta punojnë vjeljen e patates.
Ai tregon se paga mujore për punëtorët e interesuar është 450 euro, tetë orë punë dhe dy vakte ushqim gjatë ditës.
“Ne jemi në vlugun e punës, por punëtorë nuk po gjejmë. Nuk dëshirojnë të punojnë, edhe pse i kanë kushtet e mira. Ata dëshirojnë të punojnë në zyrë, në fabrikë, kurse në ara nuk janë të interesuar të punojnë”.
“Në Kosovë, po e them me mllef, nuk është e vërtetë se ka papunësi, por ka papunëtorë. Lokalet, kafenetë janë plot të rinj, e punë nuk dëshirojnë”, shprehet Kosumi.
Edhe sektori i ndërtimtarisë përballet po me këtë problem. Kryetari i Shoqatës së Ndërtimtarëve të Kosovës, Brahim Selimaj, thotë për Radion Evropa e Lirë se ky sektor me mungesë të punëtorëve përballet gjatë gjithë kohës dhe jo vetëm gjatë sezonit të verës.
Si problem kryesor, ai e përmend mungesën e punëtorëve të kualifikuar.
“Mungesë tjetër e punëtorëve në treg, janë ata të kualifikuar. Unë mendoj se është mungesë e gatishmërisë së të papunëve që të dalin në treg dhe të punojnë”, pohon ai.

Senati i kontrolluar nga republikanët do të bëjë javën e ardhshme një tjetër përpjekje për të shfuqizuar ligjin për kujdesin shëndetësor të administratës së ish-presidentit Obama, në përpjekje për të realizuar një nga premtimet kryesore të Presidentit Trump, gjatë fushatës. Ndërkohë që fati i reformës shëndetësore është i pasigurt, përkrahësit e zotit Trump, kundërshtarët dhe analistët po përpiqen të parashikojnë se çfarë do të ndodhë me programin e tij ambicioz të politikave të brendshme.
Protestat kundër planit republikan për kujdes shëndetësor vazhduan, ndërsa senatorët republikanë shkuan në Shtëpinë e Bardhë, ku Presidenti Trump bëri një apel të ri:
“Për shtatë vjet i premtuat popullit amerikan se do ta shfuqizonit Obamacare. Njerëzit po vuajnë. Mosveprimi nuk është alternativë”.
Në një moment, zoti Trump la të kuptohej se mund të ketë ardhur koha që Obamacare thjesht të lejohet të dështojë. Përpjekja e ardhshme republikane ka si synim vetëm shfuqizimin e ligjit, diçka që demokratët si senatori Chuck Schumer e kundërshtojnë.
Zhgënjimi me kujdesin shëndetësor është një dështim politik për presidentin, thotë Molly Reynolds:
“Veçanërisht për një president që e përqendroi një pjesë të konsiderueshme të fushatës tek fitorja, kjo është një humbje e thellë për të”.
Republikanët mbeten të ndarë për mënyrën e zëvendësimit të Obamacare.
Por shumë prej tyre duan të plotësojnë premtimet e fushatës, thotë udhëheqësi i tyre në Senat, Mitch McConnell:
“Ka një shumicë senatorësh republikanë që duan t’i tregojnë popullit amerikan se do ta mbajnë premtimin që kanë bërë në katër cikle zgjedhore për të shfuqizuar Obamacare”.
Disa konservatorë thonë se plani nuk e ndryshon sa duhet ligjin Obamacare, ndërsa disa republikanë të moderuar janë të shqetësuar se mbi 20 milionë amerikanë mund të humbin kujdesin shëndetësor.
Dështimi i reformës së kujdesit shëndetësor mund t’u kushtojë republikanëve kontrollin e Kongresit, vitin e ardhshëm, thotë Kyle Kondik:
“Veçanërisht nëse niveli i mbështetjes për presidentin mbetet 40 për qind ose bie më shumë, sepse historikisht presidentët me mbështetje të ulët kanë pësuar humbje në zgjedhjet për Dhomën e Përfaqësuesve”.
Nëse republikanët nuk i zgjidhin mosmarrëveshjet mes tyre, atyre mund t’u duhet të punojnë me demokratët për një kompromis, thotë eksperti i kujdesit shëndetësor, Matthew Fiedler:
“Nëse ky legjislacion dështon, do të kishte një interes për negociata dypartiake, në kërkim të disa ndryshimeve më të vogla”.
Përpjekja për kujdes shëndetësor ka vonuar punën për përparësi të tjera të politikës së brendshme të Presidentit Trump, përfshirë një tjetër premtim kyç të fushatës: reformën e sistemit të taksave.

Agjencia e zbatimit të ligjit e Bashkimit Evropian, Europol, ka njoftuar dje se 107 vetë janë arrestuar në kuadër të hetimeve të gjera për trafikim njerëzor dhe shfrytëzim seksual.
Në operacionin e udhëhequr nga policia e Austrisë, me përfshirjen e agjencive të zbatimit të ligjit nga 22 vende të Bashkimit Evropian dhe të palës së tretë, hetuesit i kishin marrë në shënjestër “grupet e krimit të organizuar për trafikimin e individëve të ndjeshëm për shfrytëzim seksual”, theksohet në kumtesën e Europolit, raporton agjencia “DPA”.
Kombësia e viktimave dhe e të dyshuarve sugjeron se numri më i madh i rrjeteve të trafikimit në BE është nga Nigeria, Amerika Jugore dhe Evropa Lindore, thotë Europoli.
Ky hetim ishte i një shkalle tejet të gjerë: janë kontrolluar mëse 125 mijë njerëz në afro 4 mijë lokacione, përfshirë edhe rajonet e prostitucionit, shtëpitë publike dhe sallonet e masazhit.
Europol thekson se “kujdes special” u është kushtuar shpalljeve në Internet ku janë vërejtur viktimat e shfrytëzimit seksual.

Volker Wagener

Mediat gjermane e kanë trajtuar çështjen e refugjatëve në periudhën 2015/16 jo në mënyrë të pavarur, por në favor të qëndrimit që kishte kancelarja Angela Merkel për këtë çështje. Madje mediat në vend që të sqaronin në mënyrë të pavarur këto zhvillimeve komplekse, kanë bërë politikë në favor të qeverisë duke u përpjekur ta bindnin popullin për kulturën e mikpritjes dhe madje pothuajse duke e udhëruar për një gjë të tillë.

Redaktorët si edukatorë dhe moralizues
Kjo akuzë nuk është e re. Por deri tani atë e bënte vetëm partia e djathtë AfD. Tani në këtë përfundim ka arritur një studim shkencor i Hamburg Media School dhe i Universitetit të Lajpcigut. Ato kanë analizuar artikujt e katër mediave më të mëdha gjermane  “Süddeutsche Zeitung” (SZ), “Frankfurter Allgemeine Zeitung” (FAZ), “Die Welt” dhe “Bild-Zeitung” dhe kanë arritur në përfundimin se gazetarët dhe redaktorët në vend që të raportonin dhe të shkruanin në mënyrë kritike, janë sjellë më tepër si edukatorë dhe moralizues. Në studim kritikohet në mënyrë masive mënyra e raportimit për krizën e refugjatëve.
Fjalët “kulturë e mikpritjes” dhe “mirëseardhje” u himnijëzuan prej mediave si fjalë magjike, thuhet në studim. Raportimi ka qenë tejet moralizues, dhe kush shprehej ndryshe, menjëherë damkosej si radikal i djathtë. Nga 35.000 artikujt e analizuar vetëm gjashtë për qind kanë qenë reportazhe apo artikuj që përbënin punë të mirëfilltë hulumtuese gazetareske. Pjesa dërrmuese e artikujve kanë qenë komente, konstaton drejtuesi i grupit studimor, Michael Haller.

Mungesë e distancës kritike
Sipas studimit 43 për qind e personave të cituar në artikujt e analizuar ishin përfaqësues të qeverisë federale gjermane, ministra apo deputetë. Po ashtu politikanët e partisë Ekologjike, që shpreheshin pro ardhjes së azilkërkuesve, janë marrë në intervista dy herë më tepër se ata të partisë E Majta. Kurse përfaqësues të partisë së ekstremit të djathë AfD, e cila është e përfaqësuar ndërkohë në shumë Parlamente landesh, thuajse nuk janë intervistuar asnjëherë.
Po ashtu pak janë marrë në intervista apo u është marrë mendimi edhe ekspertëve në lidhje me veçoritë etnike të azilkërkuesve. Thuajse fare nuk janë marrë në konsideratë në artikujt e analizuar vullnetarët që janë kujdesur për azilkërkuesit. Për ta është shkruar vetëm në 3,5% të artikujve.
Nga analiza del se 83% e artikujve janë shprehur pozitivisht ose shumë pozitivisht për çështjen e refugjatëve duke u bërë megafon i idesë së kulturës së mikpritjes të predikuar nga partitë në qeveri. Për ata që kishin rezerva ndaj politikës së qeverisë dhe të kancelares Merkel dhe argumentet e tyre, mediat kanë njoftuar vetëm në mënyrë periferike.

Shuplakë për mediat
Autorët kanë marrë në analizë edhe artikujt e shkruar pas sulmeve të migrantëve meshkuj ndaj vajzave dhe grave natën e Vitit të Ri në Këln. Në këto artikuj duket një lloj korrigjimi në qëndrimin ndaj temës së refugjatëve dhe sipas studiuesve të krijohet përshtypja, sikur gazetarët tani donin të përmirësonin në shkrimet e tyre ato që kishin lënë pas dore në shkrimet e mëparshme.
Kjo analizë – edhe pse vende-vende ka disa gjëra kontradiktore – është një shuplakë për mediat, sepse ato që konstatohen për gazetat, vlejnë në thelb edhe për raportimin në televizion, edhe pse kjo për arsye kohe nuk qe pjesë e posaçme e studimit.