Lulzim Basha do të drejtojë Partinë Demokratike edhe për katër vitet e ardhshme. Basha është shpallur kryetar i Partisë Demokratike pasi ka fituar garën kundër Eduard Selamit, me 91% të votave. Gjithsej votuan 59834 anëtarë të PD-së. Basha ka marrë 59067 vota, ndërsa Selami 5136 vota. Të pavlefshme 767 vota

Lulzim BASHA

Partia Demokratike tregoi dje se është forca politike më vitale në vend, me afro 60 mijë anëtarë, të cilët dolën dhe votuan duke shënuar me pjesëmarrjen më të madhe deri më sot në Shqipëri, në zgjedhjet një anëtar një votë.
Kjo pjesëmarrje masive në zgjedhjen e kryetarit, është dëshmia e besimit të demokratëve tek partia jonë dhe vlerat e demokracisë.
Është shenjë se ata janë të fortë, se ata janë bashkë. Por është edhe tregues se demokratët janë të vendosur të punojnë për forcimin e Partisë Demokratike dhe të Shqipërisë. Është mesazhi se e ardhmja e Partisë Demokratike është e sigurtë.
Dua të falënderoj të gjithë anëtarët dhe drejtuesit e Partisë Demokratike që morën pjesë masivisht dhe aktivisht në bashkëbisedimin dhe debatin e fushatës për zgjedhjen e kryetarit të Partisë Demokratike në të 68-të degët e saj anembanë vendit.
Dua të falënderoj komisionerët, numëruesit, vëzhguesit dhe të gjithë anëtarët e familjes tonë politike që kontribuan me përkushtim dhe integritet në administrimin e procesit zgjedhor.
Dua të falënderoj Eduard Selamin që i vlerësoi demokratët dhe shkoi para tyre me një projekt, me një alternativë dhe ju bëri atyre thirrje të marrin pjesë e ta votojnë.
Sot jam i prekur dhe thellësisht mirënjohës ndaj të gjithë ju demokratëve për besimin që më dhatë. Vota juaj më bën të ndihem thellësisht i përunjur. Sepse unë i njoh shqetësimet tuaja për gjendjen ku jemi, i di brengat tuaja, i di vërejtjet dhe pritshmëritë tuaja ndaj meje, sikurse i njoh shpresat dhe dëshirat tuaja.
Ndaj dua t’ju them se vota juaj është për mua një borxh i madh, një detyrim shpirti ndaj çdo demokrati, borxh që do jua kthej duke punuar çdo çast, me përkushtim dhe vendosmëri, me ndershmëri dhe dinjitet, borxh që mund të shlyhet vetëm duke e kthyer Partinë Demokratike në drejtim të fateve të vendit.
Vota e 60 mijë demokratëve konfirmoi dje se kauza jonë e zgjedhjeve të lira, e çlirimit të vendit nga korrupsioni e droga, e kthimit të politikës tek qytetari, është kauza e drejtë e kohës, është kauza me më shumë mbështetës të lirë e të vendosur sot, dhe një kauzë që do të shkojë përpara pa u ndalur.
Gara dhe mënyra qytetare dhe europiane e votimit për kryetarin e Partisë Demokratike treguan para të gjithëve se Partia Demokratike është parti e madhe, parti perëndimore, parti europiane.
Ne demokratët vërtet humbëm zgjedhjet, por nuk humbëm besimin tek partia jonë dhe tek vetja. Ne nuk kemi humbur vlerat, nuk kemi humbur dinjitetin, nuk kemi humbur forcën dhe kurajon, nuk kemi humbur qytetarinë, nuk kemi humbur shpirtin tonë europian.
Me vlerat tona, me vendosmërinë dhe punën tonë, ne do të rifitojmë besimin e shqiptarëve dhe do të japim kontributin tonë të pazëvendësueshëm për të ardhmen e Shqipërisë.
Misioni ynë është mision kombëtar dhe Partia Demokratike është garancia për përparimin e Shqipërisë, është forca që do ta çojë përpara vendin.
Që të përmbushim aspirat dhe pritshmëritë që ne kemi për veten, dhe që gjithë shqiptarët kanë ndaj nesh, ne duhet të shohim përpara, duke u përmirësuar, duke u demokratizuar, duke u modernizuar.
Sot dua të garantoj të gjithë se:
Partia Demokratike do të jetë më demokratike, duke i dhënë pushtet anëtarëve të saj dhe duke e kaluar vendimmarrjen për çështjet kryesore tek anëtarët.
Dua të siguroj të gjithë anëtarët e Partisë Demokratike se vendimmarrja do të jetë në duart tuaja, se ju do të shpreheni, ju do të vendosni siç bëtë dje, çdo ditë në vijim, se kush do të jenë përfaqësuesit tuaj, të zgjedhurit tuaj.
Ju garantoj se asnjë prej jush nuk do të nëpërkëmbet, por do të pyetet e do të shprehet, dhe çdokush që do të marrë pushtet nga demokratët do ta dijë mirë këtë, e nuk do ta harrojë për asnjë çast.
Por po ashtu, akti i djeshëm, nuk është aspak një derë e mbyllur.
Përkundrazi tregon se çdokush që vendos Partinë Demokratike të parën, që zgjedh kauzën e drejtë të zgjedhjeve të lira e të ndershme, që zgjedh qytetarin e jo rehatinë personale, që vendos të luftojë drogën, krimin e korrupsionin, është i mirëpritur, është pjesë e jona dhe jemi të gëzuar ta kemi mes nesh edhe nëse për një moment ka humbur rrugën.
Vota dhe bashkimi i djeshëm është edhe një detyrë dhe kontratë e re, jo vetëm për demokratët, por për vendin, që na angazhon, e më angazhon mua shumëfish, me përgjegjësinë për ta bërë Shqipërinë një vend të mirë për të jetuar.
Një vend të sigurtë, të lirë, një vend ku sundon ligji, ku vendos qytetari, ku qeveria nuk shkel me këmbë, por shërben, ku paratë dhe instrumentet e shtetit janë për njerëzit, e jo njerëzit instrumente të pushtetarëve.
Për ta bërë Shqipërinë si gjithë Europa, siç kumton thirrja që lindi Partinë Demokratike. Ky projekt u konfirmua dje dhe do të vazhdojë me çdo kusht.

Zgjedhjet në Shqipëri nuk e bindin Europën. Kreu i grupit për Europën Juglindore në Parlamentin gjerman thotë se pjesëmarrja në votime është e ulët. Po përse kjo situatë? Për deputetin gjerman është mjaft e qartë se tek shqiptarët ka humbur besimi tek demokracia. Ai sheh si një nga detyrat kryesore të qeverisë së re të rrisë besimin e qytetarëve tek demokracia, ndonëse hapat e fundit të hedhur nga qeveria flasin për të kundërtën, për një pushtet autoritar që po ngrihet nga dita në ditë duke zëvendësuar institucionet me kultin e individit në krye të qeverisë.
Stefan Albani, anëtar i Partisë të Unionit Kristian Demokratik në Gjermani, deputet dhe kryetar i Grupit parlamentar Gjermani–Europa Juglindore, ka dhënë një intervistë dje për “European Western Balkans” përmes të cilës jep disa komente për vendet e rajonit tonë dhe perspektivën e integrimit.
Sipas tij ka një ngadalësim shqetësues në kursin e reformave dhe se Shqipëria është pak e besueshme. Me këtë rast ai ka theksuar, se Serbia si vendi me popullsinë dhe ekonominë më të madhe ka përgjegjësi kryesore në rajon. Albani thotë gjithashtu, se anëtarësimin në BE mund ta marrin vetëm vendet që përmbushin kriteret e Kopenhagenit. I pyetur për fitoren e socialistëve të Edi Ramës në Shqipëri, ai bën këtë koment:
“Gjatë fushatës elektorale, socialistët shprehën mbështetjen e tyre, për reforma të thella që do të hapin rrugën drejt BE-së. Këto përfshijnë për shembull, reformën e sistemit gjyqësor që vlerësohet si i korruptuar. Shumica absolute tani mori një mandat të qartë nga votuesit për të lëvizur në këtë drejtim.
Pavarësisht kësaj e konsideroj pjesëmarrjen e ulët në zgjedhje prej 46% që nuk ka precedent, si shqetësuese. Shpresoj shumë që qeveria e re të përmbushë premtimet e veta, duke përforcuar besimin e shqiptarëve te demokracia. Reforma në drejtësi ëshhtë një projekt kyç për anëtarësimin në BE. Shumë shpejt do të bëhet e qartë nëse bllokada e imponuar deri më tani nga PD-ja do të tejkalohet”.

Ahmet ZANI

Presidenti Nishani dekoron “Martirë të demokracisë” të 11 heronjtë antikomunistë (pas vdekjes) nga familja Lala (Qypi) dhe pishtari i demokracisë për ish-të burgosurin politik të komunizmit Mark Alija përbën një akt të reflektimit të shtetit shqiptar mbi të vërtetën historike deri tani të deformuar të historisë. Për familjet dhe banorët e Kurbinit ky është një moment krenarie legjitime, por efektet e këtij nderimi janë sigurisht më të mëdha. Këto dekorata të z. Nishani janë në fakt piketa për historiografinë zyrtare, e cila do të jetë e detyruar të shkruajë për ta dhe në mënyrë të drejtë e të vërtetë. Vrasja në luftë me armë në dorë kundër shtetit komunist të 11 pjesëtarëve të një familjeje më 1952 është një sakrificë mbinjerëzore, por edhe prova që në Shqipëri ka pasur një rezistencë të fortë antikomuniste, e cila deri tani nuk është vlerësuar drejt dhe në përmasat reale të saj. Shteti, politika, shoqëria shqiptare ka detyrim ndaj këtyre martirëve antikomunistë që i vunë gjoksin diktaturës dhe derdhën gjakun e tyre për lirinë e demokracinë kur të tjerët zgjodhën të përulen apo edhe më keq të bashkëpunojnë me krimin komunist. Kjo ngjarje këta luftëtarë martirë të lirisë meritojnë shumë më shumë se kaq. Një medalje qoftë edhe nga kreu i shtetit, të cilin gjej rastin ta përgëzoj është shumë pak me nderin që këta burra të Malit të Bardhë i bënë vetes duke u flijuar për lirinë, demokracinë dhe dinjitet njerëzor.
Në këtë ceremoni asistuan deputetë nga Qarku Lezhë, drejtues nga Partia Demokratike, si dhe të afërm nga familja Lala, të cilët në emër të atyre që u flijuan, morën dekoratat e akorduar nga Presidenti Nishani. Ndue Lala ka përshëndetur në emër të familjarëve të martirëve.

Reagimi i familjarëve

Jam shumë i kënaqur nga vendimi i Presidentit Bujar Nishani në dekorimin e dhjetë martirëve nga familja Lala (Qypi), kështu është shprehur Ndue Lala tashmë 67 vjeç, fëmija më i vogël i Pjetrit i rënë në betejën e famshme të Bushneshit. Ndueja ka ardhur posaçërisht nga Amerika e largët të asistojë në ceremoninë e dekorimit të martirëve nga kjo familje e nderuar në Kurbin.
Ndue Lala më pesë maj të këtij viti investoi nga ceremonia e organizuar në qytetin e Laçit në përkujtim të këtyre martirëve. Pas vizitave në varrezat e të rënëve në fshatin Mali i Bardhë, më pas do të sillnin në kujtesë heroizmin e këtyre burrave, të vendosur kundra regjimit famëkeq, nga përpjekjet e tyre dhe rezistencën ndaj veglave të ish-sigurimit të asokohe. Por Ndue Lala ka treguar më shumë se një mesazh të veprës së babait të tij Pjetër Lala dhe veprimtarëve, të cilët u flijuan për kauzën.
Teksa bisedon me Nduen ai të tregon historinë e babait dhe burrave nga fisi Lala, por dhe mesazhi i tij është i fortë. “Jo vetëm fisi ynë tashmë i zgjeruar, por çdo shqiptar duhet të ruajë harmoninë, të respektojmë vlerat, sikurse të sjellim në kujtesë patriotizmin e martirëve” burrave që u martirizuan vetëm për demokracinë e brishtë.
Më së fundmi presidenti tashmë i larguar në ditët e fundit nga mandati i tij tregoi vullnetin e madh duke dekoruar këta patriotë nga fisi Lala (Qypi) në ceremoninë e organizuar nën kujdesin e degës së PD Kurbin dhe familjes Lala. Ndue Lala i entuziazmuar, nga dekorimi i babait dhe familjarëve nga ky fis, tregon se ka gjetur qetësinë e 27 viteve të shkuara.

Lulzim Basha rikonfirmohet kryetar i Partisë Demokratike. Nga numërimi i të gjitha votave, Basha ka marrë 53931 vota kundrejt kandidatit Selami që ka marrë 5136 vota. Në procesin e votimit për zgjedhjen e kryetarit të ri të Partisë Demokratike morën pjesë 57.5 % e anëtarësisë, ose 59.766 anëtarë, nga 103.952 që ishin në listë. 767 vota ishin të pavlefshme.

Pas shpalljes së fitores, Basha falënderoi të gjithë demokratët për votën e tyre, duke shprehur mirënjohje edhe për rivalin e tij, Eduard Selami. “Demorkatet dolën dhe votuan duke shënuar rekord në zgjedhjet një anëtar një votë. Kjo pjesëmarrje masive është besim i demokratëve tek partia jonë. Kjo është shenjë që ata janë bashkë. Janë të vendosur të punojnë për forcimin e PD. Është mesazhi se e ardhmja e PD është e sigurt. Dua të falenderoj edhe Selamin për garën”. tha Basha.

Mes të tjerash kreu i PD-së theksoi se votat për të tashmë është borxh i madh për të, të cilin ai premtoi se do ua kthente. “Vota juaj për mua është një borxh i madh, Borxh që do ua ktheje për të pranuar në çdo çast, me vendosmëri dhe dinjitet. Borxh që mund të shlyet vetëm me kthimin e PD për fatin e vendit.

Kauza jon është që të ketë më shumë mbështet të lirë. pushteti tashmë është i juaj. Akti i djeshëm nuk është aspak një derë e mbyllur. Pro përkundrazi ai që zgjedh kauzën e drejtë, të zgjedhjeve të lira dhe të ndershme që vendos të luftojë drogës, është i mirëpritur, është pjesa e jonë. Jemi të gëzuar ta kemi mes nesh, edhe nëse ka humbur rrugën. Duam të bëjmë Shqipërinë një vend të lirë, të sigurt. Ku paratë janë për njerëzit dhe jo njerëzit instrumente të qytetarëve. Ky projekt u konfirmua dje dhe do vazhdojë me përmbushje. Zoti i bekoftë demokratët dhe Shqipërinë”, tha Basha.

Selami pranon humbjen e zgjedhjeve: I urova fitoren Bashës

Ish-kandidati për kreun e Partisë Demokratike, Eduart Selami pranoi sot në një dalje publike rezultatin e zgjedhjeve ku u mund thellë nga kandidati Lulzim Basha. Selami tha se do të vijojë të punojë për ringritjen e PD, ndërsa shtoi se ka telefonuar kryedemokratin Lulzim Basha dhe e ka uruar për fitoren. “Unë jam një demokrat krenar”, tha Selami teksa i kërkoi të gjithë demokratëve të bashkohen për të bërë më të fortë PD.

“Pavarsisht nga rezultati unë do të punoj për ringritjen e PD. Falenderoj të gjithë ata që u morën me zgjedhjet brenda PD. Kjo është demokracia, është bërë një votim dhe unë e pranoj. Kam telefonuar Bashën sot në mëngjes dhe e kam uruar për fitoren dhe dua t’i them demokratëve të bashkohemi dhe të ngremë Partinë Demokratike. PD ka dalë më e fortë dhe unë do të vazhdoj kontributin tim. Unë jam një demokrat krenar”, u shpreh Selami.