Të enjten, në një fjalim para Shtëpisë së Bardhë, Presidenti Trump njoftoi vendimin për tërheqjen e Shteteve të Bashkuara nga Marrëveshja e Parisit për Klimën, duke thënë se marrëveshja do të shkaktonte humbjen e mijëra vendeve të punës në vend. Ai tha se marrëveshja do të pengonte rritjen ekonomike në Shtetet e Bashkuara dhe do të dëmtonte familjet amerikane.
Presidenti theksoi se Shtetet e Bashkuara do të fillojnë menjëherë përpjekjet për arritjen e një marrëveshjeje të re mbi ndryshimet klimatike që do të jetë më e mirë për popullin amerikan.
“Marrëveshja e Parisit për Klimën është një shembull i hyrjes së Uashingtonit në marrëveshje që dëmtojnë Shtetet e Bashkuara”, tha presidenti Trump, duke shtuar se, “që nga ky moment ne do t’i japim fund zbatimit të marrëveshjeve të padetyrueshme”.
Marrëveshja e nënshkruar nga parardhësi i presidentit Trump, ish-presidenti Barack Obama në vitin 2015, e cila synon të reduktojnë çlirimin e gazeve karbonike në atmosferë, ka aktualisht mbështetjen e 194 vendeve.
Vendimi për tërheqjen nga Marrëveshja e Parisit, vjen disa ditë pas debateve mbi atë nëse Presidenti Trump do të përmbushte premtimin e tij elektoral për tërheqje nga kjo marrëveshje.
Më parë të mërkurën, pas një takimi me Kryeministrin vjetnamez, Nguyen Xuan Phuc, zoti Trump tha se po dëgjonte mendimet e “shumë njerëzve nga të dyja skajet e debatit” për të analizuar opsionet.
Zëdhënësi Sean Spicer tha se personat me të cilët është konsultuar presidenti përfshijnë drejtues biznesi dhe krerë shtetesh të huaja.
Tërheqja e Shteteve të Bashkuara nga Marrëveshja e Parisit, shënon një hap prapa në politikat ambientaliste të ndjekura nga administrata e mëparshme amerikane, nën Presidentin Barak Obama. Tërheqja do të entuziazmojë bazën republikane të presidentit, por do të revoltonte ambientalistët dhe aleatët e Amerikës.
Njoftimet se Amerika mund të tërhiqet nga Marrëveshja e Parisit u përcollën me kundërshti nga komuniteti i organizatave dhe aktivistëve për mjedisin, si dhe nga kryebashkiakët e qyteteve më të mëdha amerikane, të cilët u zotuan t’i përmbahen marrëveshjes, pavarësisht nga vendimi që merr presidenti.
“Nëse Shtëpia e Bardhë tërhiqet nga Marrëveshja e Parisit për Klimën, ne do ta zbatojmë marrëveshjen në Los Anxhelos”, u shpreh përmes një postimi në Twitter, kryebashkiaku i Los Anxhelosit, Eric Garcetti.
Kryetari i Bashkisë së Nju Jorkut, Bill de Blasio postoi këtë koment në Twitter: “Do ta marrim situatën vetë në dorë. Kam në plan të nënshkruaj një urdhër ekzekutiv për të ruajtuar angazhimin e qytetit të Nju Jorkut ndaj Marrëveshjes së Parisit”.
Aktivistët për klimën shprehën revoltim, duke kritikuar Presidentin Trump:
“Donald Trumpi ka bërë një gabim historik, të cilin nipat tanë do ta gjykojnë të shtangur dhe të pezmatuar duke pyetur veten se si mundet një udhëheqës botëror të jetë aq i shkëputur nga realiteti dhe morali”, tha përmes një deklarate për “Zërin e Amerikës” Michael Brune, presidenti i Klubit Sierra, një organizatë e fuqishme ambientaliste.
Një deklaratë të ngjashme nxorën edhe anëtarët e grupit Votuesit e Ligës së Mbrojtësve të Mjedisit, ku thoshin: “Me një vendim tepër të papërgjegjshëm, Presidenti Trump do të rrezikonte jo vetëm shëndetin dhe sigurinë e komuniteteve amerikane, por do të minonte edhe pozitën e Amerikës si udhëheqëse globale në një numër çështjesh”.
Elon Musk, miliarderi që zotëron kompanitë Tesla dhe Space X, ka thënë se nëse presidenti tërhiqet nga Marrëveshja e Parisit, ai do të japë dorëheqjen nga tri grupe shkencore që ofrojnë konsulencë për Shtëpinë e Bardhë.
Ekonomisti Gary Hufbauer i Institutit Peterson me seli në Uashington tha për “Zërin e Amerikës” se, parashikon që vende të tjera do të mbeten pjesë e marrëveshjes dhe se vendimi i zotit Trump për t’u tërhequr do ta vinte Amerikën në një pozitë jo të mirë.
“Një deklaratë nga Presidenti Trump se Amerika po tërhiqet nga Marrëveshja e Parisit nuk do të sjellë medoemos vendime të ngjashme nga vende të tjera. Ajo është më tepër një deklarim synimesh se sa një akt konkret tërheqjeje”, thotë ekonomisti.
Në pritje të vendimit të qeverisë amerikane, aleatët evropianë dhe të tjerë kanë shprehur shqetësimin e tyre.
“Unë po vazhdoj të loboj pranë autoriteteve amerikane në të gjitha nivelet për t’i marrë shumë seriozisht ndryshimet klimatike dhe për të treguar udhëheqjen që Amerika ka treguar në të kaluarën”, tha sekretari i Jashtëm britanik, Boris Johnson për televizionin “Sky News”.
Zëdhënësi i presidentit rus, Dmitri Peskov tha se marrëveshja ka një rëndësi të madhe, por se nuk do të jetë shumë e efektshme pa pjesëmarrjen e faktorëve kryesorë.
Kryeministri i Kinës, Li Keqiang tha se Kina do të respektojë angazhimin që ka marrë për të zbatuar marrëveshjen.
Llogaria zyrtare e Kombeve të Bashkuara në Twitter kishte mesazhin: “Ndryshimet klimatike nuk mund të vihen në dyshim. Mobilizimi për klimën është i pandalshëm. Zgjidhjet për klimën ofrojnë mundësi të pakrahasueshme”.
Ambasadori i Francës në SHBA, Gerard Araud, shkruante në Twitter: “Korporata të mëdha amerikane kanë shprehur mbështetje për Marrëveshjen e Parisit”.
Presidenti i Komisionit Evropian, Jean-Claude Juncker tha se Presidenti Donald Trump “nuk i kupton në tërësinë e tyre” termat e Marrëveshjes së Parisit. Zoti Juncker tha se udhëheqësit evropianë janë përpjekur t’ia shpjegojnë zotit Trump procesin e tërheqjes nga marrëveshja “me fjali të thjeshta dhe të qarta” gjatë takimeve të javës së kaluar.
Jean-Claude Juncker, një ndër udhëheqësit me të cilët u takua zoti Trump javën e kaluar, theksoi se duhen disa vjet për t’u tërhequr nga një pakt i ri ndërkombëtar. “Ky nocioni se: ‘Unë jam Trumpi; Unë jam amerikan; Amerika mbi të gjitha; dhe Unë do të tërhiqem’ nuk ka për t’u realizuar”, tha zoti Juncker.
Por nuk ka pasur vetëm reagime negative.
Një grup prej 22 senatorësh republikanë i kanë bërë thirrje zotit Trump të tërhiqet nga Marrëveshja e Parisit për të shmangur rrezikun e padive gjyqësore që mund të ndërlikojnë përpjekjet e administratës aktuale për të anuluar projektet për energji të pastër të administratës së mëparshme.
Organizata Freedom Works, e cila punon drejt një synimi për një burokraci sa më të vogël qeveritare, arsyetonte në një deklaratë se respektimi i marrëveshjes do të shoqërohej me një kosto shumë të lartë për Amerikën, duke i kushtuar ekonomisë së vendit mbi 2 trilionë dollarë dhe mbylljen e afro 400 mijë vendeve të punës.

Presidenti Donald Trump njoftoi se ambasada amerikane në Izrael do të qëndrojë në Tel Aviv edhe pse kishte premtuar se do ta transferonte atë në Jeruzalem.
Gjatë fushatës së tij presidenciale, zoti Trump kishte premtuar zhvendosjen e ambasadës amerikane në Jeruzalem duke u pajtuar me preferencën e kahershme të qeverisë izraelite. Por çështja është pjesë e një debati të gjatë mbi krijimin e shteteve të ndara hebraike dhe palestineze, kur si izraelitët ashtu dhe palestinezët pretendojnë se Jeruzalemi është kryeqyteti i tyre.
Të enjten Shtëpia e Bardhë tha se vendimi i presidentit Trump për të mbajtur ambasadën në Tel Aviv, atje ku shumica e qeverive të tjera të huaja kanë përfaqësitë e tyre diplomatike, nuk duhet të konsiderohet “në asnjë mënyrë si një tërheqje nga mbështetja e fortë e presidentit për Izraelin dhe aleancën SHBA-Izrael”.
Në deklaratën e Shtëpisë së Bardhë thuhet se, zoti Trump bëri këtë zgjedhjen “për të rritur shanset për të negociuar një marrëveshje të suksesshme mes Izraelit dhe palestinezëve”.
“Ndërsa ai ka shprehur në mënyrë të përsëritur qëllimin e tij për të zhvendosur ambasadën”, sipas zyrtarëve të Shtëpisë së Bardhë, “pyetja nuk është nëse kjo lëvizje ndodhi apo jo, por kur do të ndodhë?”.
Kryeministri izraelit, Benjamin Netanjahu u shpreh i zhgënjyer me vendimin e zotit Trump. Megjithatë, ai tha se shpreson që ambasada amerikane do të shkojë përfundimisht në Jeruzalem. Kryeministri izraelit Netanjahu vlerësoi ndërkohë shprehjen e miqësisë nga ana e presidentit amerikan.
“Pozita e vazhdueshme e Izraelit është që ambasada amerikane, si dhe ambasadat e të gjitha vendeve me të cilat kemi marrëdhënie diplomatike, të jenë në Jeruzalem, kryeqyteti ynë i përjetshëm”, tha zoti Netanyahu.

Terrorizmi në botë ka shënuar një nivel rekord. Vitin e kaluar dhuna i kushtoi ekonomisë botërore 14.3 trilionë dollarë, me një kosto prej 2.5 trilionë dollarësh vetëm në Shtetet e Bashkuara.
Shifrat e reja të raportit mbi konfliktet dhe sigurinë të Indeksit mbi Paqen në Botë, tregojnë se gjatë dekadës së fundit kushtet për paqe po përkeqësohet nxitur kryesisht prej terrorizmit dhe konflikteve në Lindjen e Mesme dhe Afrikën Veriore.
Sipas raportit kjo ka ndërprerë procesin e masave përmirësuese afatgjata që bota kishte ndërmarrë prej fundit të Luftës së Dytë Botërore.
Gjithashtu thuhet se numri vjetor i ngjarjeve me sfond terrorizmin është pothuajse trefishuar që nga viti 2011.
Vdekjet nga terrorizmi janë rritur me më shumë se 900 për qind që nga viti 2007 në të 35 vendet anëtare të Organizatës për Bashkëpunim Ekonomik dhe Zhvillim.
Gjatë vitit të kaluar, në 23 prej tyre përfshirë Danimarkën, Suedinë, Francën dhe Turqinë, u shënuan vdekje të lidhura me terrorizmin.

Më 31 maj të vitit 2005, 31 vite pas dorëheqjes së Presidentit Richard Nixon, personi kryesor, që në mënyrë anonime i kishte dhënë informacione shtypit mbi skandalin “Watergate”, i njohur me nofkën “Zëri i Thellë”, “Deep Throat” zbuloi identitetin e tij në një artikull të botuar në revistën “Vanity Fair” (“Vanity Fair magazine”).
Veprimi i zotit Mark Felt shtangu gazetarët Bob Woodward dhe Carl Bernstein, të cilët përmes raportimeve të tyre në gazetën “The Washington Post” çuan në rrëzimin e Presidentit Richard Nixon. Dy gazetarët bënë përpjekje maksimale për të ruajtur identitetin e zotit Felt dhe kishin premtuar ta ruanin sekretin deri në vdekjen e tij.
Megjithëse, emri i tij u përfol në vitet pas dorëheqjes së Presidentit Nixon, Felt vazhdimisht i mohoi njoftimet se ai ishte burimi me nofkën “Deep Throat”.
“Unë kurrë nuk u kam dhënë informacione gazetarëve Woodward dhe Bernstein ose të tjerëve”, shkroi ai në shënimet e tij biografike të vitit 1979.
Në vitin 1999, gjashtë vjet para se të pranonte rolin e tij në rrjedhjen e informacionit rreth skandalit “Watergate”, Felt është cituar të ketë thënë se, “Rrjedhja e informacioneve do të ishte në kundërshtim me përgjegjësitë e mia si një punonjës besnik i FBI-së”. Mark Felt ishte zëvendësdrejtor i FBI-së në kohën kur shpërtheu skandali “Watergate”.
Në disa takime në mesnatë në një vendparkim në qytetin e Arlingtonit në Virxhinia, Felt u ka konfimuar gazetarëve njoftimet që lidhnin ekipin elektoral për rizgjedhjen e Presidentit Nixon me vjedhjet në “Watergate” (selia e atëhershme e Partisë Demokrate) dhe hetimet e paligjshme ndaj Partisë Demokrate.
Ai gjithashtu njoftoi gazetarin Woodward mbi natyrën e thellë të skandalit, duke aluduar se gjurmët e skandalit mund të çonin në nivele të larta të qeverisë, duke përfshirë edhe vetë Presidentin Nixon.
Nixon dha dorëheqjen, duke u bërë presidenti i parë amerikan që bëri një veprim të tillë, ndërkohë që ndaj tij ishin ngritur akuza për pengim të drejtësisë nga Kongresi. Këshilltarët e tij kryesorë, H.R. Haldeman, John Erlichman dhe konsulli i Shtëpisë së Bardhë, John Dean u dënuan me burg për rolin e tyre në skandalin “Watergate”.
Në mesin e zyrtarëve të tjerë të burgosur për rolin e tyre në këtë skandal ishin edhe Prokurori i Përgjithshëm, John Mitchell, anëtarët e personelit të Shtëpisë së Bardhë Howard Hunt dhe G. Gordon Liddy dhe këshilltari special i presidentit, Charles Colson.
Edhe pesë personat që u kapën në selinë e Partisë Demokrate në hotelin “Watergate”, duke vjedhur dokumente, u burgosën nga autoritetet.
Në vitin 1973, gazeta “The Washington Post” fitoi çmimin Pulitzer për mbulimin e ngjarjeve rreth skandalit “Watergate”. Hollivudi, në vitin 1976 realizoi një film të quajtur “All the President’s Men”, (Njerëzit e Presidentit) në të cilin rolet e personazheve kryesorë u luajtën nga aktorët e njohur Robert Redford dhe Dustin Hoffman.

Presidenti rus, Vladimir Putin ka kërkuar nga përfaqësues të biznesit amerikan të punojnë me administratën e presidentit Donald Trump, për të përmirësuar marrëdhëniet mes dy vendeve.
Duke folur në ngjarjen “Dialogu i Biznesit Rusi-SHBA” në margjinat e Forumit Ekonomik Ndërkombëtar në Shën Petersburg, Putin u kërkoi udhëheqësve të pranishëm të SHBA-ve, “të ndihmojnë në rivendosjen e një dialogu normal politik”.
Ai ka deklaruar se Moska është duke punuar për të “normalizuar” marrëdhëniet dypalëshe. Rusia dhe Moska kishin nivel të ulët të bashkëpunimit gjatë udhëheqjes së ish-presidentit amerikan, Barack Obama.
Disa nga çështjet problematike ishin, aneksimi i rajonit ukrainas të Krimesë nga Rusia, mbështetja aktive e Moskës ndaj separatistëve në Ukrainën Lindore dhe mosmarrëveshjet mbi konfliktin në Siri.
Putin shtoi se Moska mbështet projekte të përbashkëta midis bizneseve ruse dhe amerikane.
“Shtetet e Bashkuara gjithmonë kanë qenë një partner tregtar i rëndësishëm për ne”, ka thënë Putin.

Themeluesi i agjencisë së lajmeve të grupit militant Shtetit Islamik është vrarë, së bashku me të bijën, gjatë një sulmi ajror javën e kaluar në Siri. Lajmin e ka konfirmuar i vëllai i tij dhe disa aktivistë opozitarë në Siri.
Vetë IS-i nuk ka njoftuar mbi vdekjen e themeluesit të agjencisë “Amaq”, Baraa Kadek, i njohur gjithashtu edhe si Reyan Meshaal.
Aktivistët thanë se Meshaal ishte i afërt me lidershipin e IS-it dhe thuhet të jetë takuar me liderin enigmatik të grupit, Abu Bakr al-Baghdadi.
Vëllau i Meshaalit, Hozaifa, ka thënë në rrjetin social Facebook se ai ka vdekur gjatë një sulmi ajror nga Shtetet e Bashkuara, në qytetin Mayadeen, në provincën Deir el-Zour.
Agjencia e lajmeve “Amaq”, e themeluar në vitin 2014, konsiderohet si promotore e grupit militant dhe është shfrytëzuar nga IS-i për të marrë përgjegjësinë mbi disa sulme terroriste në botë.

Autoritetet e Serbisë i ndaluan ish-Presidentes Atifete Jahjaga pjesëmarrjen në një aktivitet të shoqërisë civile, në Beograd. Ish-Presidentja e Kosovës, ishte e ftuar të merrte pjesë në Beograd në promovimin e librit “Unë dua të dëgjohem”, në kuadër të festivalit “Mirëdita, dobar dan!” që dy ditët e fundit po zhvillohet në kryeqytetin e Serbisë.
Jahjaga, ishte e ftuar të mbante fjalim për viktimat e dhunës seksuale gjatë luftës në Kosovë. Mirëpo, autoritetet serbe, në përgjigjen e tyre dërguar zyrës së ish-Presidentes Jahjaga, thonë se ata nuk mund t’i ofrojnë siguri në Serbi ish-Presidentes së Kosovës. Dy netët e para të festivalit në Beograd, janë shoqëruar me protesta të serbëve, të cilët kundërshtonin pjesëmarrjen e ish-Presidentes së Kosovës. Jahjaga në një postim në Facebook, thotë se “hyrja e saj në shtetin e Serbisë u pamundësua me një arsyetim absurd”.

“Shpjegimi absurd” i Serbisë
“Përgatitjet për vizitën janë bërë në përputhje me Marrëveshjen e Brukselit për vizita të zyrtarëve të lartë. Autoritetet e Kosovës i kanë njoftuar me kohë dhe me përpikmëri autoritetet e Serbisë, siç është e paraparë në marrëveshje. Por zyrtarët në Beograd kanë dështuar t’i përmbahen kësaj marrëveshjeje, duke e shkelur atë me qëllim që të ndalojnë vizitën time”, thotë Atifete Jahjaga.
Sipas saj, “pranimi i së vërtetës mbi krimet e luftës në Kosovë është e vetmja mënyrë që shoqëritë e dy vendeve të ecin përpara”.
“Unë nuk kam iluzione që zyrtarët e sotëm të Serbisë do ta ndryshojnë qasjen ndaj Kosovës, sepse ata po e vazhdojnë politikën e viteve të ‘90-të, kur kanë qenë edhe protagonistë. Por dua të shpreh respektin tim për organizatorët e festivalit, një grup të rinjsh dhe aktivistë, që nuk do të lejojnë që e ardhmja e tyre dhe e tërë rajonit të mbahet peng nga këta udhëheqës që duan ta fshehin të vërtetën. E vërteta nuk njeh kufij”, thotë në reagimin e saj, ish-presidentja e Kosovës, Atifete Jahjaga.

Serbia nuk është e gatshme të përballet me të kaluarën
I menjëhershëm ishte edhe reagimi i ministres në detyrë për Dialogun me Serbinë, Edita Tahiri. Ajo thotë se ka njoftuar Bashkimin Evropian për ndalesën e vizitës së ish-presidentes, Atifete Jahjaga, në Beograd nga ana e autoriteteve të Serbisë duke theksuar se me këtë akt refuzimi, “Serbia ka shkelur marrëveshjen e Brukselit për lirinë e lëvizjes dhe atë për vizita zyrtare midis dy shteteve”. “Akti i refuzimit nga Serbia tregon qartë se Serbia nuk është e gatshme të përballet me të kaluarën e saj agresore dhe gjenocidale ndaj shqiptarëve dhe kjo po ashtu tregon se ata nuk janë të gatshëm për paqe, drejtësi dhe marrëdhënie fqinjësore midis dy shteteve, Kosovës dhe Serbisë, e cila është një objektiv kryesor i dialogut të lehtësuar nga BE”, thuhet në reagimin e Edita Tahirit.
Ndërkohë, nga Serbia aktivistja për të drejtat e njeriut, Natasha Kandiç, akuzon rëndë qeverinë e Serbisë që nuk ia mundësoi hyrjen në Serbi ish-Presidentes së Kosovës, Atifete Jahjaga.
“Ish-Presidentja e Kosovës nuk ka marrë leje për hyrje në Serbi. Qeveria preferon shqiptarët në varreza masive, nën këmbët e gjeneral Dinkoviç”, shkruan Natasha Kandiç.

Lunaçek: Sjellja e Beogradit, e papranueshme

Ish-Presidentja e Kosovës, Atifete Jahjaga ishte e ftuar për të promovuar librin “Unë dua të dëgjohem”, kushtuar rreth 20.000 femrave të dhunuara nga forcat serbe, gjatë luftës së Kosovës. Libri u prezantua dje në Beograd, në kuadër të Festivalit “Mirëdita, dobar dan!”, i cili po mbahet në kryeqytetin e Serbisë. Nënkryetarja e Parlamentit Evropian dhe raportuese e posaçme për Kosovën, Ulrike Lunaçek e ka dënuar ashpër sjelljen e autoriteteve serbe.
“Është plotësisht e papranueshme që ish-Presidentes së Kosovës, Atifete Jahjaga, t’i pamundësohet nga autoritetet serbe pjesëmarrja në Festivalin ‘Mirëdita, Dobar Dan’”, thotë Lunaçek në një prononcim për “Deutsche Wellen”.

Autoritetet serbe të lejojnë futjen e Jahjagës
Ish-Presidentja Jahjaga kishte për qëllim të prezantonte atje librin “Unë dua të dëgjohem”, për femrat e dhunuara dhe keqtrajtuara në Kosovë gjatë kohës së luftës. “Kjo sjellje e autoriteteve serbe është edhe një kundërshtim tjetër i marrëdhënieve të mira fqinjësore, për të cilat Beogradi është obliguar në dialogun e Brukselit me Kosovën të ndëmjetësuar nga Bashkimi Evropian”, pohon Lunacek, e cila kërkon që “autoritetet e Serbisë menjëherë të mundësojnë hyrjen e ish-Presidentes Jahjaga në Serbi me qëllim që sonte të mund të marrë pjesë në takimin ku është ftuar”.