Një tjetër skandal i blerjes së votave në këmbim të një vendi pune është denoncuar dje nga ish¬-Kryeministri Berisha. Në një postim në Facebook, Berisha ka publikuar sms-të e shkëmbyera nga drejtori i një kompanie private në qytetin e Korçës, me një qytetar, i cili i ka kërkuar punë. Berisha publikon mesazhet mes qytetarit të interesuar për punë dhe kushtet që i jep drejtori për punësimin kundrejt parave ose votës. Ai i thotë qytetarit se po e bën këtë meqë kishte njohje me kryetarin e Bashkisë.
“Në Narko-Republikën e Noriegës, një njeri i ndershëm, për t’u punësuar edhe tek kompani private serioze të huaja, duhet të paguaj para ose vota mafies siçiliste të përfaqësuar nga Tritani, nipi i bllokmenit Rita Marko! I bëj thirrje Prokurorisë së Shtetit të nisë menjëherë hetimin ndaj këtij banditi siçilist!”, shkruan Berisha, duke publikuar sms-të.
Në mesazhin e parë, qytetari që kërkon punë i shkruan drejtorit pse i ka mbyllur telefonin. “Zoti Dritan, më keni mbyllur telefonin vazhdimisht, pavarësisht se më dhatë fjalën që këtë javë do të filloja punë”, shkruan qytetari.
“Tritani jam unë, jo Dritani! Të kam dhënë fjalën, nëse plotësoje njërin nga dy kushtet që ende s’kam marrë një përgjigje”, i shkruan drejtori.
“Po unë aq lekë nuk i kam që të t’i jap, sepse jam hallexhi me 3 fëmijë në shkollë. As borxh nuk më jep njeri. Po më fute do të të jap rrogën e parë, më shumë si mund të bëj”, shkruan qytetari.
“Nuk të është vënë ndonjë kusht o lekë o s’ka. Të dhashë disa opsione. As njerëz s’i ke ti që t’i bësh të vijnë nga krahu jonë? Po të respektoj meqenëse më fute mik kryetarin dhe kam besim, por këto muhabete mos m’i bëj më. Zgjidh e merr dhe më jep t’i përgjigje mua një herë”, përgjigjet drejtori.
“Po nuk kam mundësi, mor burrë. Jam njeri me shkollë, njeri me karakter. Nuk zhytem dot për një vend pune të bëj fushatë se s’kam kohë e kam fëmijë për të mbajtur. Një vend pune po t’ia qaja hallin vetë francezit do ma jepte, pse po ma bie kaq mbrapsht”, shkruan qytetari.
“Të jetë për francezin, as të sheh fare me sy, as nuk merret me punësimet. I kam unë dhe kryetari në dorë. Nuk di ç’të them, më vjen keq”, shkruan drejtori.
“Mirëdita, më fal se po të shqetësoj prapë. Aman, bëj një përjashtim për mua se jam nevojtar. Do ta di për nder familjarisht. Edhe kryetari më tha po deshe ti e bën. Vër dorën në zemër”, i shkruan përsëri qytetari.
“Mirëdita Kastriot, më vjen keq. Unë jam burrë nuk bëj lojëra. T’i thashë mënyrat dhe opsionet, ti nuk plotësove as njërën as tjetrën. Epo më fal, po ka nevojtarë se ti që edhe vetë fitojnë vendin edhe neve na respektojnë. Nuk kam më asnjë vend të lirë për ty. Kalofsh mirë”, e mbyll mesazhin drejtori.
Në mesazhin e fundit kuptohet se drejtori i firmës private ka punësuar qytetarë të tjerë në këmbim të parave ose të votës për Partinë Socialiste. Qytetarët hallexhinj që nuk kanë asnjë mundësi jetese detyrohen, duke u kërcënuar me bukën e gojës, që të futen në punë me premtimin se do të votojnë për Partinë Socialiste më 25 qershor.
Ndonëse Parlamenti miratoi para pak ditësh me shumicë të cilësuar votash ndryshime të reja në Kodin Penal, të cilat sanksionojnë për herë të parë masa të rrepta të ndëshkimit për cilëndo që përfshihet në shitblerjen e votës, drejtorët e PS vijojnë të kërcënojnë punonjësit për të votuar për kandidatët e majtë. Në ligj thuhet se, për ata që do të tentojnë tjetërsimin e vullnetit të lirë të votuesve shqiptarë nuk do të ketë masa ndëshkimore si gjoba, por vetëm burg nga 1 deri në 7 vjet. Kjo vepër penale do të jetë e paamnistueshme. Ligji do të veprojë njëlloj për të gjithë ata që kërcënojnë qytetarët me vende pune në këmbim të votës.

R.POLISI

Ministri i Brendshëm, Dritan Demiraj, zhvilloi dje një inspektim në pikën e kalimit kufitar të Qafë Thanës. Sipas burimeve, ministri Demiraj është takuar me autoritetet e rendit dhe sigurisë, që punojnë në këtë pikë kufitare dhe i ka përgëzuar për kapjen e lëndës narkotike që u tentua të kalohej dy ditë më parë nga Shqipëria drejt Maqedonisë. Mësohet se Demiraj u ka kërkuar zyrtarëve të policisë, që të forcojnë masat e sigurisë në pikën kufitare, në mënyrë që të luftohet trafikimi i lëndëve narkotike.
Dy ditë më parë, Policia Kufitare në Qafë Thanë sekuestroi 77 kg kanabis në një automjet dhe arrestoi dy shtetas bullgarë, ndërsa një shqiptar është shpallur në kërkim. Në pranga u vunë dy shtetas bullgarë, që tentuan të kalojnë drogën drejt Maqedonisë, ndërsa u shpall në kërkim një shtetas shqiptar. Ministri Demiraj ka vlerësuar këtë rast, por ka kërkuar më shumë impenjim nga forcat e policisë për goditjen e trafikut të drogës.
Bëhet e ditur se, ministri Demiraj shoqërohej në këtë takim nga ministrja e Financave, Helga Vukaj. Gjatë takimit me efektivët e policisë dhe zyrtarët e doganës dy ministrat kanë kërkuar që të vendosen masa të rrepta për të parandaluar trafikun dhe kontrabandën.
Më herët, ditën e djeshme ministri Demiraj dhe ministrja Vukaj ishin për inspektim në Portin e Durrësit, ku takuan autoritetet dhe efektivët që punojnë në këtë pikë doganore. Edhe gjatë këtij takimi, dy ministrat kërkuan forcim të masave të sigurisë në këtë pikë, veçanërisht në luftën kundër trafikimit të lëndëve narkotike.
Ministri i Brendshëm Dritan Demiraj, menjëherë pas marrjes së detyrës, ka zhvilluar takime të rëndësishme me  Shefin e Shërbimit Informativ, Visho Ajazi, kryeprokurorin Adriatik Llalla si dhe me drejtuesit e policisë në qarqe.
Gjatë takimit me kryeprokurorin Llalla një ditë më parë, ministri Demiraj ka diskutuar për masat konkrete për neutralizimin e potencialit të blerjes së votave, ndjekjen penale të punonjësve të administratës të përfshirë në zgjedhje dhe luftën kundër drogës. Gjatë takimit kryeprokurori Llalla është shprehur se nuk do të lejohet asnjë shkelje e ligjit për fushatën zgjedhore. Sipas Llallës, do të zbatohet me përpikmëri ligji ndaj shitblerjes së votës.
Parlamenti miratoi para pak ditësh me shumicë të cilësuar votash ndryshime të reja në Kodin Penal, të cilat sanksionojnë për herë të parë masa të rrepta të ndëshkimit për cilëndo që përfshihet në shitblerjen e votës. Kushdo që do të guxojë të përfshihet në veprën penale të shitblerjes së votës do të përballet me burg deri në 7 vjet.
Edhe gjatë takimit me drejtuesit e Policisë së Shtetit në qarqe, ministri Demiraj ka kërkuar ruajtjen e sigurisë dhe rendit për zgjedhjet parlamentare dhe lufta kundër kultivimit të kanabisit. Ministri Demiraj u ka bërë të qartë drejtuesve të policive në qarqe, se cilido person me uniformë apo pa uniformë që përfshihet në fushatën zgjedhore do të largohet nga puna dhe do të ndiqet penalisht.
Ministri nënvizoi se, cilido person me uniformë dhe pa uniformë pjesë e strukturave të Ministrisë së Punëve të Brendshme, që përfshihet në fushata, duke shkelur parimet kushtetuese dhe ligjet që garantojnë procesin zgjedhor, do të mbajë përgjegjësi administrative dhe penale me largim nga detyra dhe ndjekje penale. Po ashtu, Demiraj ka paralajmëruar drejtuesit e policive në qarqe, që të mos bëjnë asnjë tolerim ndaj fenomenit të kultivimit të kanabisit, pasi do të penalizohet rreptësisht.

R.POLISI

Ish-Kryeministri Berisha i ka shprehur ngushëllime familjes dhe të afërmëve për ndarjen nga jeta të deputetit Xhovalin Kadeli. Në një postim në Facebook, Berisha shkruan se, ndarja nga jeta para kohe nga një sëmundje e rëndë e deputetit Xhovalin Kadeli, është një lajm i hidhur për familjen, të afërmit dhe miqtë e tij që humbën njeriun e tyre më të dashur, bashkëshortin, prindin, vëllain shembullor, por dhe për të gjithë ata që e kanë njohur atë si dhe për Lezhën dhe Parlamentin e vendit që humbën një përfaqësues dinjitoz.
“Me këtë rast, duke shprehur ngushëllimet e mia më të sinqerta familjes për humbjen e pakompensueshme, i lutem Zotit që shpirti i Xhovalinit të gjejë paqen e merituar! Ngushëllime”, shkruan Berisha.
Edhe Presidenti i Republikës, Bujar Nishani me anë të një mesazhi ka ngushëlluar familjarët për ndarjen nga jeta të deputetit të LSI-së, Gjovalin Kadeli. Kreu i Shtetit u bashkua me dhimbjen e fëmijëve dhe të afërmëve të deputetit të Lezhës.
Xhovalin Kadeli, deputet i Parlamentit të Shqipërisë nuk ia doli të fitonte betejën me sëmundjen e rëndë që vuante prej tre muajsh. Ai ka ndërruar jetë këtë të premte në një spital të specializuar në Itali, ku prej fundit të muajit mars kurohej nga pankreasi akut.
Më herët, ai ishte diagnostikuar dhe trajtuar në qendrën Spitalore Universitare “Nënë Tereza”, por përkeqësimi i gjendjes shëndetësore detyroi dërgimin e tij në shtetin fqinj, ku iu nënshtrua disa ndërhyrjeve kirurgjikale, por nuk mundi t’ja dalë mbanë.
Xhovalin Kadeli, i cili u shua në moshën 53-vjeçare do të mbahet mend për kontributin e tij në jetën parlamentare të Shqipërisë gjatë dy legjislaturave, ndërsa ka qenë edhe anëtar i Komisionit për Ekonominë dhe Financat.
Në legjislaturën 2009-2013 ka qenë deputet i Partisë Socialiste, ndërsa në zgjedhjet parlamentare të 23 qershorit 2013, ai nuk u përfshi më në listat për kandidatë të Partisë Socialiste.
Pas koalicionit PD-LSI po në këtë vit, ai votoi pro ndryshimeve në qeverinë e Partisë Demokratike. Vota e tij u vlerësua nga kjo force politike që e përfshiu Kadelin në listat e saj për kandidat nga ku u zgjodh deputet. Pas marrjes së mandatit në vitin 2013, ai iu bashkua Grupit parlamentar të LSI-së.
Për zgjedhjet e 25 qershorit të këtij viti, Gjovalin Kadeli ishte i dyti në listën e kandidatëve për deputetë të LSI në Qarkun e Lezhës. Kadeli la pas katër fëmijë, ndërsa para dy vitesh kishte humbur bashkëshorten.

Një tjetër ngjarje e rëndë ka ndodhur në spital, ku një grua 39-vjeçare gjatë një operacioni ka ndërruar jetë. Bëhet e ditur se ngjarja e rëndë ka ndodhur në Maternitetin “Mbretëresha Geraldinë” para dy ditësh, ndërsa janë vënë nën hetim disa mjekë. Bëhet e ditur se gruaja ndërroi jetë në orën 12:00 të së enjtes, afërsisht tri orë, pasi kishte hyrë në operacion. Materniteti nuk njoftoi policinë, por ajo u vu në lëvizje nga familja e gruas.
Ndërhyrja rezulton se është kryer nga drejtori i Maternitetit “Mbretëresha Geraldinë”, Blenard Nonaj. Bashkë me të kanë marrë pjesë në operacion, edhe asistenti i tij, Fatmir Kopani, dy mjekët reanimatorë, Vjoleta Todhe, Zef Velia si dhe një mjeke tjetër.
Po ashtu, të pranishëm kanë qenë edhe dy infermieret mami, Almira Azuni, si dhe Mirela Dervishi. Por skandali është më i rëndë, pasi këta persona nuk kanë njoftuar në kohë organet kompetente dhe kanë lejuar që të merrej kufoma nga të afërmit, pa iu nënshtruar ekzaminimeve në morg.
Nuk dihen shkaqet e vdekjes së gruas, por burimet e policisë thonë se, nga deklarimet e marra stafit të mjekëve që kanë marrë pjesë në operacion, gruaja ka pësuar hemoragji, pas operacionit.

768 kg kanabis u zbulua dje në një tunel në fshatin Piskovë. Mësohet se droga ishte e ndarë në 102 pako dhe thasë të përmasave të ndryshme. Operacioni është kryer nga Policia e Përmetit pas kërkesës së Prokurorisë. Policia bëri të ditur se, gjatë operacionit janë shoqëruar disa persona që mund të kenë lidhje me trafikun e drogës, por nuk jepen detaje, nëse janë poseduesit e saj apo janë banorë të zonës.
“Në bazë të informacioneve të marra në rrugë policore nga Seksioni i Hetimit të Narkotikëve në D.V.P Gjirokastër se në një tunel në fshatin Piskovë, Përmet kishte lëndë narkotike, menjëherë është organizuar e vijon operacioni “Piskova”, thuhet në njoftimin e policisë.
Si rezultat i operacionit nga kontrolli i ushtruar në tunel, shërbimet e policisë kanë gjetur 102 pako dhe thasë të përmasave të ndryshme, brenda të cilave kishte lëndë të dyshuar narkotike kanabis sativa.
Lënda narkotike u sekuestrua në cilësinë e provës, ku pas peshimit rezultoi se pesha totale është 768 kilogramë. Në vijim të operacionit janë shoqëruar disa persona në ambientet e Drejtorisë Vendore të Policisë Gjirokastër në lidhje me këtë ngjarje.
Specialistët për Hetimin e Narkotikëve në bashkëpunim me Prokurorinë po vijojnë hetimet për dokumentimin dhe vënien përpara përgjegjësisë ligjore të personave të implikuar në këtë veprimtari kriminale. Ende nuk dihet se ku do të transportohej sasia e drogës së fshehur në tunel.
Ndërkohë, Policia e Kosturit në Greqi ka asgjësuar dje një sasi të madhe droge, me origjinë nga Shqipëria. Bëhet fjalë për sasira drogash që janë sekuestruar gjatë katër muajve të fundit, në operacione ku kanë arrestuar trafikantë shqiptarë dhe grekë, raportojnë sot mediat helene. 459 kg kanabis, 16 kg heroinë dhe më shumë se një kilogram kokainë, janë djegur në furrnaltat e një termocentrali në qytetin Ptolemaida. Djegia u bë në prani të një komisioni që kryesohej nga zëvendësprokurori i Kosturit.
Mbillet kanabis në Vlorë, Policia: Ka mbirë vetë!
Policia e Vlorës ka asgjësuar 143 bimë narkotike të llojit kanabis sativa në dy fshatra pranë bregdetit të Adriatikut. Sipas të dhënave zyrtare gjatë kontrollit të ushtruar në zonën e Novoselës, shërbimet e policisë kanë konstatuar 95 bimë narkotike të llojit kanabis sativa, të mbjella në vendin e quajtur “Vërri e Poros”, fshati Poro (pronë publike).
Po kështu, gjatë kontrollit të ushtruar në fshatin Mërtiraj, pranë vendit të quajtur “Përroi i Kaminave”, u gjet një parcelë me 48 bimë narkotike të llojit kanabis sativa, të cilat dyshohet se kanë mbirë vetë përgjatë shtratit të përroit.
Policia bëri asgjësimin e tyre me shkulje dhe djegie. Vazhdojnë hetimet për zbulimin dhe kapjen e autorëve.

Gjykata e Lartë pritet të shprehet me vendim më 12 qershor në lidhje me dosjen në ngarkim të ish-anëtares së kësaj trupe gjyqësore Majlinda Andrea, bashkëshortit të saj dhe tre të pandehurve të tjerë. Ditën e djeshme, pasi dhe mbrojtja dha konkluzionet e saj u mbyll shqyrtimi gjyqësor dhe të hënën e 12 qershorit pritet vendimi. Në fillim të majit, Prokuroria në pretencën e saj kërkoi të paktën 16 vite burg për të pandehurit e dosjes, ku përfshihet edhe ish-anëtarja e Gjykatës së Lartë, Majlinda Andrea.
Prokurorët kërkuan 4 vite heqje lirie për ish-gjyqtaren Andrea si dhe 5 vite heqje të së drejtës për mbajtjen e funksioneve publike. Ndërsa për bashkëshortin e ish-gjyqtares, organi i akuzës kërkoi 5 vjet heqje lirie dhe 5 vjet heqje të së drejtës për ushtrimin e detyrave publike. Për tre të bashkëakuzuarit e tjerë të kësaj çështje, Prokuroria kërkoi përkatësisht: 4 vjet heqje lirie për Petraq Dashin, 2 vjet për Ilia Çabirin dhe 1 vit heqje lirie për Eleni Linon.
Gjithashtu në pretencën e Prokurorisë është kërkuar edhe konfiskimi i shumës prej 50 mijë euro, shumë të cilën tre personat: Dashi, Çabiri dhe Lino dyshohet se i kanë paguar në formë korruptive bashkëshortit të ish-anëtares së Gjykatës së Lartë, Majlinda Andreas, në mënyrë që kjo e fundit t’i favorizonte në një çështje pronësie në gjykim pranë Gjykatës së Lartë.

“ABC News” ka siguruar fotot e makinës ku ndodhet pajisja e sjellë në Shqipëri në mënyrë të paligjshme dhe që është shfrytëzuar disa muaj nga Forcat Operacionale së Policisë së Shtetit për përgjime dhe identifikim të telefonatave të ndryshme. Për shkak të kësaj paligjshmërie, Prokuroria e Tiranës ka nisur hetimet kryesisht këtu e 12 muaj më parë, por hetimet kanë ngecur. Kjo për faktin se, institucioni i akuzës nuk ka gjetur ekspert privat për të ekzaminuar kompjuterat personale të sekuestruara në zyrën e ish-drejtorit të Operacionales dhe vartësit të tij, Entiol Xhelilaj.
Edhe në dosjen e Prokurorisë, ku po hetohej drejtori i Përgjithshëm i Policisë së Shtetit, thuhet se makina BMW X3 gjatë kohës që përdorej nga punonjësit e policisë ka qarkulluar me targa shqiptare false. Por që në të vërtetë, këto janë targat me të cilat edhe ka hyrë në Shqipëri kjo makinë bashkë me pajisjen e gjurmimit dhe identifikimit të aparateve celular. Nga hetimet e Prokurorisë, thuhet se makina ka hyrë në territorin shqiptar nga dy shtetas italian, të cilët nuk e kanë deklaruar në doganën shqiptare dhe më pas, ia kanë dorëzuar makinën bashkë me pajisjen punonjësve të Forcave Operacionale të Policisë së Shtetit, të cilat dyshohet se kanë kryer përgjime të paligjshme.
Këto dyshime, vet drejtuesit e policisë i kanë hedhur poshtë gjatë marrjes në pyetje, duke pretenduar se kanë bërë vetëm trajnime për agjentët shqiptar të policisë. Por, ajo që vazhdon të jetë enigmatike për prokurorin, është fakti se ditën që organi i akuzës ka shkuar për të sekuestruar makinën bashkë me pajisjen e përgjimit brenda ambienteve të policisë, Entiol Xhelilaj e ka larguar atë nga ambientet e policisë, duke shmangur kështu bllokimin e pajisjes. Ky veprim, është regjistruar nga oficeri i rojes së policisë, i cili e ka pasqyruar në regjistër largimin e mjetit bashkë me drejtuesin Xhelilaj, i cili në asnjë moment nuk ka pranuar se ka kryer përgjime të paligjshme. Edhe pse është provuar se me këtë makinë Xhelilaj dhe agjentë të tjerë kanë kryer veprime proceduriale në ambiente të burgjeve pa lejen dhe miratimin e Prokurorisë.

Ekspertët kriminalistë kanë gjetur gjurmë dhe mbetje biologjike, në automjetin që dyshohet se është përdorur nga autorët e atentatit të dyfishtë në Vlorë mbrëmjen e së mërkurës. Burime pranë Policisë së Shtetit i thanë “Televizionit Klan” se, gjurmët dhe provat e gjetura janë fije flokësh që mund të çojnë në identifikimin e autorëve, që qëlluan mbi biznesmenin Mirvjen Hyseni dhe drejtorin e OSHEE- së së Vlorës, Roland Saliu.
Me mbetjet biologjike, pritet që ekspertët të ndërtojnë edhe profilet gjenetike të autorëve, për t’i krahasuar më pas me ato të personave të dyshuar. Në Institutin e Policisë po ekzaminohet edhe kallashnikovi i gjetur në mjetin u djegur në dalje të fshatit Panaja.
Autorët kanë qenë dy persona të maskuar që më pas hapën zjarr drejt tavolinës ku ndodheshin Hyseni dhe Saliu. Lëvizjet e tyre mësohet se janë regjistruar nga kamerat e sigurisë së disa bizneseve të zonës. Ndërsa kamerat e barit të hotel “Vlorës”, ku ndodhi krimi nuk ishin funksionale.
Tre grupe hetimi po veprojnë në terren, thonë zyrtarë të lartë të Policisë së Vlorës. Janë marrë në pyetje jo vetëm dëshmitarë në vendngjarje, por edhe të njohur, familjarë të viktimave dhe persona me percedentë të mëparshme kriminale. Të njëjta burime thanë se po hetohet në disa pista, dhe nuk përjashtohet mundësia që lidhet me aktivitetin e biznesmenit kohët e fundit. Megjithatë informacionet mbahen të rezervuara për shkak se grupet e hetimit po vazhdojnë të marrin në pyetje persona që dyshohet se mund të kenë informacion rreth atentatit. Ekzekutimi ndodhi mbrëmjen e mërkurë në qendër të Vlorës. Mirvjen Hyseni ishte ulur dhe po pinte kafe në verandën e hotelit të tij, dhe më pas i është bashkuar dhe Saliu. Atentati ndodhi vetëm pak minuta më vonë. Në drejtim të tyre u qëllua me breshëri, ndërsa makina e autorëve ishte ndaluar vetëm pak metra larg tavolinës ku ndodheshin viktimat.