Lajpcigu ka pësuar humbjen e dytë radhazi në Bundesligë, ndërkohë që shkon në tre ndeshje pa fitore. Surpriza e këtij sezoni në kampionatin gjerman u mposht në transfertë përballë Verder Bremenit me rezultatin e pastër 3-0. Skuadra që në fazën e parë rivalizoi seriozisht me Bajernin për vendin e parë duket se e ka humbur tashmë shkëlqimin dhe ndjekësit kanë filluar t’i afrohen në renditje. 3 austriakë që i japin një goditje të fortë ambicieve të një pronari austriak në Bundesliga. Ishin golat e Junuzoviç, Grillitzch dhe Kainz që i dhuruan Werder Bremen fitoren 3-0 ndaj Leipzig në “Weser Stadion”, me Bajernin e Mynihut që tani me një fitore të dielën ndaj Gladbah mund ta çojë në 13 pikë distancën nga vendi i dytë. Vendasit kaluan në avantazh me goditjen e tyre të parë, me Junuzoviç që lëshoi një harkim të ëmbël me topin që përfundoi në rrjetë në minutën e 34.
Mesfushori shqiptar i Frajburgut, Amir Abrashi, u aktivizua në minutën e 37 të ndeshjes së barazuar në transfertë ndaj Augzburgut me rezultatin 1-1. Futbollisti i kombëtares shqiptare e filloi si zakonisht nga stoli edhe takimin e sotëm, por dëmtimi i Hofler bëri që trajneri ta aktivizonte që në pjesën e parë.
Ndërkohë në ndeshjet e tjera, Hofenhajmi mposhti Leverkusenin, Këlni fitoi ndaj Hertës së Berlinit dhe Volfsburgu triumfoi ndaj Darmshtadit.

Real Madrid ka thelluar në 5 pikë avantazhin në kreun e renditjes së kampionatit anglez falë fitores 2-1 në fushën e Atletik Bilbaos, në një nga transfertat më të vështira që i kishin mbetur deri në fund të sezonit në La Liga.
Heronjtë e ndeshjes së sotme ishin Karim Benzema dhe Kasemiro, autorë të dy golave për këtë takim, por sidomos të paraqitjeve shumë bindëse, në një periudhë kur Kristiano Ronaldo dhe sidomos Garet Beil nuk janë duke u paraqitur mirë para portës. Nëse portugezi mund të justifikohet se ishte protagonist në aksionet e të dy golave, Beil ishte një lojtar më pak në fushë dhe duket qartësisht se është shumë larg formës së tij të zakonshme.
Gjithsesi, tre pikët në “San Mames” i japin më shumë forcë skuadrës së Zidan për të përballuar fundin e sezonit, ashtu si edhe ringjallja e Benzema. Ky i fundit sot ishte lojtari më i mirë në fushën e lojës, duke u kthyer shpesh edhe në ndihmë të shokëve të mesfushës apo duke vënë në rrezik prapavijën e Atletik Bilbaos sa herë që kishte topin në këmbë.

Titulli kampion vështirë se mund t’i shpëtojë nga duart një skuadre si Çelsi, e cila edhe kur gjendet në vështirësi, siç ndodhi sot ndaj Stouk, arrin të zgjidhë situatat në mënyra nga më të ndryshmet, falë elementëve cilësorë që ka në përbërje.
Londinezët e Kontes po barazonin në transfertë përballë Stouk deri pak minuta para fundit, pasi golit të Uillian i ishte përgjigjur në pjesën e parë Uollters me penallti. Por, kur dukej se dy ekipet do shkonin në dhomat e zhveshjeve me nga një pikë të siguruar, David Luiz gjeti në zonë Kahill pas një goditje këndi dhe mbrojtësi dërgoi topin me kokë në rrjetë për të shënuar një gol me shumë peshë.
Ky sukses i mundëson Çelsit të shkojë në +13 nga ndjekësit e Totenhem dhe Mançester Sitit, të cilët luajnë nesër, si dhe i jep një avantazh shumë të ndjeshëm ekipit londinez, kur kanë mbetur edhe 10 ndeshje për t’i luajtur në kampionat.
Ajo që ra në sy ishte edhe suksesi i Leisterit, që është kthyer në ritmin e vitit të kaluar dhe sot regjistroi fitoren e tretë radhazi në kampionat nën drejtimin e Kreig Shekspir. Golat e Mahrez, Huth dhe Vardi, i dhanë një avantazh të ndjeshëm kampionëve në fuqi të Anglisë, të cilët edhe pse i lejuan Uest Hemit të kthehej në lojë dhe t’i rrezikonte disa herë deri në vërshëllimën përfundimtare, i mbijetuan vrullit të vendasve dhe arritën të dilnin nga fusha e lojës me tri pikë.
Arsenali ka pësuar humbje 3:1 nga WBA-ja në kuadër të xhiros së 29-të në Premierligë, humbje kjo që momentalisht e lë jashtë zonës së Ligës së Kampionëve. Pavarësisht humbjes së Arsenalit, mesfushori shqiptar i “Topçinjve”, Granit Xhaka, është vlerësuar si më i miri i ndeshjes, duke marrë notën më të madhe (8.1). Paraqitje të mirë nuk bëri shqiptari tjetër, Shkodran Mustafi, i cili u vlerësua vetëm me notën 6:4.
Manchester City-Liverpool është supersfida e kësaj jave në Premier Leaguen angleze. Në “Ettihad Stadium” skuadra e Citizens do të kërkojë që të harrojë sa më shpejt eliminimin nga Liga e Kampioneve dhe mund t’ia dalë mbanë në rast të një fitoreje të mundshme ndaj The Reds. Trajneri i Manchester City, Pep Guardiola u kritikua shumë ditët e fundit dhe në median britanike po flitet se spanjolli mund të ndryshojë stilin e lojës në këtë sfidë, një hipotezë që u hodh menjëherë poshtë prej tij. “Nuk do ta ndryshojmë stilin e lojës, do të përpiqemi të fitojmë. Ajo që duhet të bëjmë është që të mbrojmë më mirë”, tha 46-vjeçari kur u pyet në lidhje me këtë çështje.
Guardiola më pas përgënjeshtroi edhe lajmin se po përgatit  një revolucion në skuadër që përfshin largimin e shumë futbollistëve. Tekniku katalanas deklaroi se është e pamundur që të nxjerrësh menjëherë në merkato 12 apo 13 futbollistë, pasi ata janë të lidhur nga kontratat që kanë me klubin. Manchester City për momentin ndodhet në vendin e tretë në Premier League me 56 pikë, 1 më shumë se Liverpool, që ka një ndeshje më shumë.

Goli i Ansi Nikës në të 78′, nxorri jo vetëm Laçin nga zona e ftohtë e renditjes, duke i dhënë fitoren kurbinasve ndaj Flamurtarit, por gjithashtu zhbllokoi dhe shkodranin që më në fund gjeti finalizimin e parë sezonal. Laçi fitoi 1-0 ndaj vlonjatëve në shtëpi, duke parakaluar në klasifikim kuqezinjtë, që tashmë e shikojnë veten më shumë se të rrezikuar për rrëzimin më poshtë. Në një sfidë shumë të rëndësishme, ku nuk mungoi dhe loja e ashpër, diferencën e bëri dëshira më e madhe e kurbinasve që u përpoqën të diktonin ritmin në një përballje të drejtpërdrejtë për mbijetesën. Rastet më të mira gjithashtu gjatë sfidës ishin për vendasit, me Nikën që rrezikoi dy herë në pjesën e parë në të 3-ën dhe në të 27-ën, ndërsa dhe Sergio Junior në të 25-ën u ndal vetëm nga Halilaj.
Flamutari, ndërkohë vuajti lojën e shpejtë të kurbinasve, dhe të vetmin rast në këtë fraksion e regjistroi me Galic në të 45-ën, por Selmani u shfaq gati. Dhe në pjesën e dytë nuk është se ndryshoi shumë, me Flamurtarin që pati disa raste sporadike si ajo e Alveshit apo dhe pretendimin për penallti të dy minutave më parë, ndërsa Laçi u tregua konkret me Nikën që shënoi me kokë, pasi nuk u mbulua nga Galiç. Vlonjatët madje rrezikuan të pësonin dhe golin e dytë, por Halilaj u tregua i zoti në dy raste në pritjet ndaj Sergio Junior dhe Gjonit. Reagimet e portierit të kuqezinjve mund të kishin shërbyer për diçka, nëse Dushku do të kishte shënuar në të 87-ën, por nga dy hapa gaboi golin e barazimit, duke lejuar Laçin të marrë një epërsi jo të vogël në garën për titullin.

Portieri i Spalit, Alex Meret, mbrojtësi i Atalantës, Leonardo Spinazzola dhe ai i Interit, Danilo D’Ambrosio, janë tre risitë e Italisë për sfidën kualifikuese të 24 marsit ndaj Shqipërisë në Palermo. 25 janë futbollistët e grumbulluar nga trajneri i përfaqësueses së kaltër, Giampiero Ventura, për takimin eliminator ndaj kuqezinjve të Gianni De Biasit dhe miqësoren ndaj Holandës që do të luhet në 28 mars në Amsterdam. Nuk mungojnë surprizat në listën e Venturës me mesfushorin e Juventusit, Claudio Marchisio, që është lënë jashtë për çështje teknike, ndërkohë që për arsye dëmtimi nuk është grumbulluar mbrojtësi i bardhezinjve Giorgio Chiellini.
Për sfidën ndaj Shqipërisë, Ventura ka rikthyer në kombëtaren italiane Manolo Gabbiaddinin, i cili po shkëlqen gjatë kësaj periudhe me fanellën e Southampton në Premier League. Nuk mund të mungonte kurrsesi në listën e të grumbulluarve, Lorenzo Insigne njeriu që po udhëheq Napolin me paraqitjet e tij fantastike në muajt e fundit. Ventura ka grumbulluar edhe mesfushorin e Interit, Roberto Gagliardini, ndërkohë që nga Juventusi janë thirrur 4 lojtarë, Buffon, Barzagli, Rugani e Bonucci.
Në portë përveç Buffon e Donurummës spikat grumbullimi i Alex Meret, portierit të Spal-it në Serinë B, skuadër që në mënyrë surprizë kryeson renditjen në këtë kampionat. Në mbrojtje, emra të tjerë të rëndësishëm janë Romagnoli, Astori, Darmian e De Scglio. Në mesfushë përveç Gagliardinit, Ventura ka besuar te përvoja e Daniele De Rossit, klasi i Marco Verrattit dhe forca e Marco Parolos. Te lojtarët e krahut Insigne është një nga ata që spikasin më shumë, sepse janë grumbulluar edhe Candreva, Bernardeschi e Sansone. Në sulm, ndërkohë të gjithë sytë do të jenë te Belotti e Immobile, dy nga sulmuesit italianë më rezultativë në Serinë A, gjatë këtij sezoni, ndërkohë që përveç Gabbiaddinit, Ventura ka grumbulluar edhe lojtarin e Interit, Eder.

Rei Manaj ka arritur të gjejë për të dytën javë radhazi golin me fanellën e Pizës. Sulmuesi i përfaqësueses shqiptare, kishte shënuar një javë më parë për ekipin e tij, por kishte parë se si ekipi i tij mundej edhe pse i kishte dhënë avantazhin.
Këtë radhë, sulmuesi i talentuar të paktën pa se si goli i tij pati vlerë pikësh, pasi i siguroi një të tillë Pizës, në barazimin 1-1 ndaj Latinës. Sulmuesi ishte titullar me skuadrën e tij në këtë sfidë dhe krijoi rrezikshmëri për portën kundërshtare disa herë derisa arriti të gjente rrjetën me një devijim me kofshë, kur regjistrohej minuta e 50-të e takimit.
Ai u zëvendësua në minutën e 67 dhe pa nga pankina se si ekipi i tij u arrit në fund nga Korvia. Në minutat e fundit të ndeshjes, në sulmin e Pizës u aktivizua Edgar Çani, por pa arritur të krijonte rrezikshmëri para portës kundërshtare. Për paraqitjen e sotme, sulmuesi shqiptar u vlerësua me notën 7 nga “TMW”.

Edhe pse u mposhtën në Itali nga Roma 2-1, francezët e Lionit u kualifikuan për në fazën çerekfinale të Europa League pas fitores 4-2 në ndeshjen e parë. Tifozët francezë që udhëtuan në Itali për të ndjekur ekipin e tyre kanë shprehur ankesa të mëdha me mënyrën se si janë trajtuar nga pala italiane. “Udhëtimi me autobus për në stadium ishte i tmerrshëm. Na bllokuan për një kohë të gjatë aty. Më pas kontrolle tejet të ekzagjeruara nga policia. Ishte qesharake dhe poshtëruese. Ne u trajtuam si kafshë”, tha një tifoz. Një tjetër tha se nuk i ishte bindur urdhrit të policisë për kontrollin e imtësishëm dhe ishte futur në stadium 20 minuta pasi ndeshja kishte nisur. Tifozët francezë kanë thënë se kurrë më nuk do të ndjekin një ndeshjen në Itali.

Goli i Pierre-Emerik Aubameyang i realizuar në minutën e 14-të të takimit ndaj Ingolstadit i mjaftoi Borussias së Dortmundit për t’u kthyer te fitorja në Bundesligë pas humbjes së një jave më parë në fushën e Herthës së Berlinit. Sulmuesi gabonez, i cili udhëheq listën e golashënuesve më të mirë në Bundesligë edhe në këtë sfidë rezultoi vendimtar për verdhezinjtë e Thomas Tuchel, që tashmë i bëjnë presion Liepzigut për vendin e tretë.
Në fakt Ingolstadi mbeti në lojë deri në fund për të marrë qoftë një pikë, por Matip në të 19-ën dhe Mathew Leckie në minutën e 27-të nuk arritën ta çonin topin në rrjetë. I pafalshëm në fakt edhe gabimi i Erik Durm, që në një distancë fare të afërt e dërgoi topin mbi tra. Edhe gjatë pjesës së dytë pati raste në të dyja portat, por rezultati mbeti i minutës së 14-të, pra 1-0 për Dormundin.

Kevin Prince Boateng i jep tri pikë shumë të rëndësishme Las Palmasit në sfidën e shtëpisë me Villarrealin. Në stadiumin “Gran Canaria”, vendasit festuan suksesin e 8 sezonal, që i largon edhe më shumë nga zona e ftohtë. Me 13 pikë më shumë se vendi i 18-të, qëndrimi në Primera Division për skuadrën ishullore duket mision i përmbushur. Një humbje e rëndë kjo për objektivat e Villarrealit, që komplikoi gjithçka vetë me daljen e Ruiz me karton të kuq në minutën e 19-të, kur Las Palmasi kryesonte 1-0.
Në superioritet numerik, Las Palmasi pati të tjera raste për të shënuar një fitore më të thellë, por që nuk u shfrytëzuan nga futbollistët vendas.

Juventus dhe Barcelona do të kenë fatin të përballen me njëra-tjetrën në fazën çerekfinale të Champions League, më 11 dhe 19 prill. Kjo është një nga supersfidat që mund të cilësohet edhe si finale e parakohshme, për vetë faktin se të dy ekipet janë nga pretendentët kryesorë për fitimin e trofeut. Hera e fundit që këto ekipe janë ndeshur bashkë, ka qenë pikërisht një finale e Champions League, ajo e 6 qershorit të 2015-ës, e fituar nga katalanasit, me rezultatin 3-1.
2 vite më pas, Barcelona ka bërë shumë pak ndryshime dhe Dani Alves është i vetmi futbollist që i mungon formacionit të katalanasve, nga finalja e para dy viteve. Mbrojësi brazilian u largua këtë verë nga Spanja, për t’u bashkuar pikërisht me Juventusin dhe do të rikthehet si kundërshtar në “Camp Nou”, më 19 prill. Por, nëse Barcelona vjen thuajse e njëjtë, nuk mund të thuhet e njëjta gjë për kampionët e Italisë.
Juventusi aktual ka pësuar ndryshime të mëdha nga ekipi finalist i 2015-ës, veçanërisht në mesfushë dhe sulm. Evra, Pirlo, Pogba, Vidal, Morata dhe Tevez, janë 6 futbollistët që i mungojnë Juventusit të sotëm, por edhe skema e ekipit të Allegrit, nuk është më e njëjta.
4-2-3-1 është rreshtimi që po aplikohet nga torinezët këtë sezon dhe duket se ekipi po funksionon më së miri.
Pjaniç, Khedira, Mandzukiç, Cuadrado, Higuain dhe Dybala janë titullarët dhe protagonistët kryesorë të këtij revolucioni bardhë e zi dhe do t’ju duhet të tregojnë se mund të triumfojnë në ligën e më të fortëve, ndryshe nga ekipi i para dy viteve. A do t’ia dalin dot?
Pavel Nedved, zëvendëspresident i Juventusit u shpreh se, kundër Barcelonës është një përballje magjepsëse. “Ato janë një nga skuadrat më të famshme në botë dhe ne duhet të përqendrohemi tek e tashmja, me bindjen se jemi ekip shumë i fortë dhe mund të përballemi. Mendoj se Juve është përmirësuar shumë që nga finalja e humbur më 2015-ën. Kjo skuadër mund të luajë pa frikë ndaj Barcelonës. Nuk besoj se ta luash brenda apo jashtë ndeshjen e parë përbën ndonjë avantazh në këto nivele. Duhet të jesh në maksimum për 180 minuta apo më shumë”, deklaroi Nedved.
Ndërsa Xhordi Mestre, zëvendëspresident i Barcelonës tha se, “kemi respektin më të madh për Juventusin. Për ta luan Dani Alvesh, një lojtar të cilin e kemi shumë përzemër”.