Ish-Kryeministri Berisha e ka cilësuar zjarrin në Bibliotekën Kombëtare si zjarrin e shekullit. Në një postim në rrjetin social Facebook, Berisha shkruan se, për këtë ngjarje të rëndë ka një mungesë të plotë informacioni. “Të dashur miq, prej dy ditësh mediat njoftojnë për zjarrin që ra në katet nëntokësore të Bibliotekës Kombëtare, këtij institucioni 100-vjeçar që ruan në raftet dhe skedat e veta diamantet e trashëgimisë tonë, por dhe botërore të etnogjenezës, gjuhës, historisë, kulturës dhe fushave të tjera. Në Bibliotekë punojnë punonjës me shkallë të lartë kualifikimi dhe integriteti, për të cilët unë ushqej një respekt të veçantë”, shkruan Berisha.
Më tej, Berisha shkruan se, zjarri në Bibliotekë përbën për mua zjarrin e shekullit në kuptimin e dëmit të jashtëzakonshëm që mund të kenë shkaktuar ose mund të shkaktonin flakët e tij. “Në Luftën e Parë Botërore, gjermanët rrafshuan dhe dogjën Luvenin, por botën e tronditi më shumë se çdo gjë djegia e Bibliotekës së këtij qyteti.
Lajmet e dhëna nga dje deri sot, ndryshimi i varianteve tre herë, se një herë është djegur fondi rus, herë tjetër libra të pas viteve ‘90 dhe së fundi të pas viteve 2000, dëshmojnë për një mungesë të plotë transparence. Kjo, sepse kriteret e vendosjes së librave dhe dokumentave në raftet e Bibliotekës nuk jane gjuha as dhe viti”, shkruan Berisha.
Berisha shkruan se, në vitin 2010 Bibliotekës iu vendos sistemi më i përsosur. “Së dyti, në vitin 2010 me një financim të veçantë është vendosur rrjeti i ri elektrik (që pas vitit 1967) sipas të gjitha standardeve të sigurisë. Por mbi të gjitha në fondin e librave të të gjithë Bibliotekës u vendos sistemi më i persosur, më i ndjeshëm i alarmit për zjarrin e madje për çdo lloj lëvizje tjetër, sistem që funksiononte në mënyrë perfekte. Me gjithë këto, unë nuk përjashtoj zjarrin elektrik, por dora në zjarr nuk mund të vihet edhe për zjarrvënie për qëllime vjedhje apo shkatërrimi të fondit tejet të çmuar”, shprehet ish-Kryeministri Berisha.
Berisha i bën thirrje Prokurorisë të nisë menjëherë hetimet dhe të vendosë përgjegjësit para ligjit. “Për të sqaruar të gjitha këto, i bëj thirrje Prokurorisë që në mënyrën më urgjente të bllokojë çdo lloj lëvizje hyrje-dalje në zonën e djegur dhe më gjerë. Të hetojë me përgjegjësi të lartë shkaqet e mundshme të zjarrit elektrik, të qëllimshëm apo nga pakujdesia, dhe të vendosë përgjegjësit para ligjit. Të hetojë funksionimin e sistemit të alarmit dhe zbatimin ose moszbatimin e detyrave të lëna nga KLSH në vitin 2014. Të hetojë të gjitha CV e militantëve të mundshëm partiak të marrë në punë gjatë viteve të “Rilindjes”, të cilët në shumë raste në institucione të tjera provohen se kanë qenë kontigjente malavite dhe që për të vjedhur dhe mbuluar vjedhjet e tyre janë të gatshëm të djegin të gjithë Bibliotekën.
Së fundi, procesverbali për librat dhe dokumentat e djegura duhet të bëhet nën vëzhgim të fortë ligjor dhe nga grupe punonjësish dhe ekspertësh, duke përjashtuar në çdo rast konfliktin e interesit!”, përfundon Berisha.
Të mërkurën rreth orës 10:00 ra një zjarr me përmasa të mëdha në katin e tretë të nëndheshëm në Bibliotekën Kombëtare. 24 orë pas zjarrit, ende nuk ka një bilanc përfundimtar të dëmit, që i është shkaktuar pasurisë kombëtare, librit. Në një njoftim të shpërndarë nga Biblioteka Kombëtare, thuhet se janë dëmtuar 3 rafte, pa sqaruar sa libra përmbajnë këto tre rafte. Pohohet se një pjesë e krijimtarisë së djegur është e pas vitit 2000.
Nga hetimet ende të pambyllura, burimet thanë se shkak është bërë vendosja e librave deri në tavan. Kjo ka bërë që disa prej tyre të afrohen me llampat dhe të bien në flakë. Ky dyshohet paraprakisht të jetë edhe shkaku që i vuri flakën shtëpisë së librit.

R.POLISI

Një tjetër sasi e konsiderueshme droge është sekuestruar nga policia italiane, ndërsa vinte nga Shqipëria. Mediat vendase shkruajnë se, marijuana “vazhdon të derdhet në sasi të madhe në brigjet e Brindisit, madje edhe kur kushtet e motit nuk janë ideale për qarkullimin e anijeve”.
“Marijuana me prejardhje nga Shqipëria vazhdon të vërshojë me sasi të mëdha drejt brigjeve të Brindizit, edhe kur kushtet atmosferike, siç është rasti për disa ditë më parë, nuk janë ideale për kalimin e një gomoneje (ose motoskafi). Sekuestrimi i fundit i rëndësishëm është bërë natën vonë të datës 15 mars, në rrethinat e Savelletri-t, marina e Fasano-s, nga Karabinierët e Fasano-s nën komandën e kapitenit Pierpaolo Pinnelli”, shkruan “Brindisi.it”.
Janë plot 655 kilogramët e substancës narkotike, të cilët ishin të ndarë në pako të mbështjellë në formë ruloni, të cilët u identifikuan nga ushtria si rezultat i një kontrolli, i cili iu nënshtrua një furgoni Transit me dy persona në bord. Vendimtare ishte mendjemprehtësia e hetuesve të patrullës operative e angazhuar në një shërbim kontrolli në territorin bregdetar. Duke dyshuar mbi praninë e një furgoni në afërsi të qytetit të Savelletri-t në një kohë kur të gjitha bizneset ishin të mbyllura, karabinierët kanë urdhëruar ndalimin e automjetit.
Dy personat në bord të furgonit kanë ndaluar menjëherë dhe më pas janë zhdukur nëpër fshat, duke u arratisur nga forcat e rendit. Brenda furgonit janë gjetur 348 kilogramë marijuanë në 19 pako të mbyllura ne celofan. Në këtë pikë karabinierët ka shtrirë kërkimet në vijën bregdetare, duke gjetur edhe 19 pako të ngjashme, të fshehura në pika të ndryshme të plazhit në zonën e “Cala Pescatore”.
Verifikimet për furgonin e bllokuar po vazhdojnë. Nga kontrolli i parë mjeti nuk rezulton i vjedhur. Rikujtojmë se karabinierët e Fasanos, rreth një muaj më parë, kanë sekuestruar 56 kilogramë të tjera marijuanë në rrethinat e fshatit turistik Rosa Marina. Mënyra e paketimit ishte identike me ato të sekuestruara më 15 mars. Vlera e 655 kilogramëve marijuanë, me pakicë i kalon 3 milionë euro.
Një sasi e madhe droge që vinte nga Shqipëria u sekuestrua para dy ditësh nga Guardia Di Finanza në Pulia, ndërsa në pranga përfunduan dy shqiptarë. Në sajë të operacionit ‘Triton’ dje u bë e mundur kapja e një gomoneje me 814 kg marijuanë. Mjeti i dyshimtë i lundrimit është pikasur nga policia italiane në liqenin e Gargano-s dhe më pas është ndjekur, skena të ngjashme- sipas mediave italiane, si ato të filmave aksion. Guardia Di Finanzan ka publikuar edhe videon nga momenti i ndjekjes në det të hapur, të gomones me dy shqiptarët në bord.
“Ansa” shkruan se sapo vërejtën se ishin pikasur nga policia, dy shqiptarët, D.B., 31 vjeç dhe V.T., 18 vjeç, nisën të hidhnin drogën në det, ndërsa u kapën 20 milje larg Viestes, në Foxhia. Të njëjtat burime theksojnë se, marijuana ishte ndarë në 42 pako, ndërsa nëse do të hidhej në treg për shitje, kapte vlerën e 8 milionë eurove.
Vetëm në dy muajt e parë të këtij viti, janë rreth 11 ton kanabis sativa që janë transportuar nga Shqipëria nëpërmjet detit dhe që janë kapur në det nga Guardia di Finanza në Puglia. Ajo që e bën të frikshme këtë shifër është fakti, se gjatë gjithë vitit 2016, në Puglia janë trafikuar më pak se gjysma e kësaj shume.
Pikërisht për këto arsye, për rritjen e trafikut të drogës ka nisur dhe është në vazhdim një hetim që po bëhet nga Guardia di Financa në Marittima, hetim që ka përfshirë edhe Zyrën e Bashkëpunimit Ndërkombëtar në Ministrinë e Brendshme në Itali.

Kanabisi shqiptar ‘mbyt’ Greqinë, 13 ton në 1 vit

Plot 13 ton kanabis sativa me origjinë nga Shqipëria janë kapur përgjatë një viti në Greqi. Ky është raporti i fundit i Antidrogës greke, që i përket periudhës shkurt 2016 – shkurt 2017. Për çështje që lidhen me trafikun e drogës janë arrestuar në të njëjtën periudhë më shumë se 12 mijë persona. Sa i përket nacionalitetit të të arrestuarve, dominojnë shqiptarët dhe grekët. Këta të fundit po përfshihen përherë e më shumë në transportimin e drogës, të joshur nga pagesa prej 1000 eurosh për çdo rrugë.
Autoritetet greke thonë se përfshirja e shtetasve vendas shpjegohet me vështirësitë që ka krijuar kriza ekonomike, duke duke bërë mjaft prej tyre që të përpiqen për të siguruar të ardhura nëpërmjet veprimtarive të paligjshme. Policia greke publikoi të enjten pamje nga asgjesimi i rreth 2,5 tonë kanabis, si dhe 58 kg heroinë të kapur dy muajt e fundit.
Asgjesimi u bë me mënyrën e djegies në furrnaltë, në një zonë e cila nuk bëhet e ditur, por në prani të prokurorit dhe të oficerëve të drejtorisë së sigurimit publik të Athinës. Bashkë me pamjet filmike dhe fotografitë nga aksioni i djegies së drogës, drejtoria e përgjithshme e policisë greke ka publikuar edhe shifrat konkrete, të një periudhe kohore që e quan si shumë të suksesshme.
Kështu, në periudhën nga janari 2016 deri në shkurt 2017, janë sekuestruar:
12,8 ton kanabis
200,2 kg heroinë
125,4 kg kokainë,
55.470 fidanë kanabisi
76.357 pilula me përmbajtje narkotike.
Në komunikatën e policisë greke thuhet se vetëm në dy muajt e parë të 2017-ës janë sekuestruar më shumë se 3 tonë kanabis, dhe mbi 106 kg heroinë. Autoritetet thonë se rastet e kapjes së kanabisit që vjen nga Shqipëria janë bërë thuajse të përditshme në Greqi vitin e fundit.
Kjo rritje impresionuese nuk shpjegohet vetëm me kërkesën nga tregu vendas, por sidomos me shfrytëzimin e rrugëve detare dhe porteve të Greqisë, për ta kaluar kanabisin në Europë.

Raporti i Guardia di Finanza: Droga nga Shqipëria është dyfishuar

Roja bregdetare italiane, (Guardia di Finanzia) publikoi dje Raportin Vjetor 2016, ku bëhet një bilanc i operacioneve në hapësirën detare mes Shqipërisë dhe Italisë në luftën ndaj trafikut të narkotikëve. Sipas raportit, gjatë operacioneve nga ajri dhe në det gjatë vitit 2016 janë bllokuar nga forca aeronavale e “Guardia di Finanza” rreth 32,8 tonë marijuanë. Raporti vlerëson se rreth 1900 persona janë arrestuar gjatë operacioneve të rojes bregdetare italiane.
“Për sa i përket luftës kundër krimit të organizuar, i rëndësishëm është bashkëpunimi me Shqipërinë”, vlerëson raporti. Ky bashkëpunim sipas autoriteteve italiane, ka nisur nga viti 1997, me marrëveshjen mes Ministrive të Brendshme të të dy vendeve dhe përmes krijimit të një bërthame Kufitare Detare në dy reparte të bazuar në Durrës dhe Vlorë.
Në vitin 2007, bashkëpunimi me “Guardia di Finanzia” është thelluar, duke bërë të mundur forcimin e bashkëpunimit dypalësh në identifikimin, raportimin dhe asgjësimin e plantacioneve të kanabisit në territorin shqiptar.
Raporti vëren më tej se me një protokoll të veçantë shtesë, nënshkruar në Tiranë në vitin 2012, midis Departamentit të Sigurimit Publik të Ministrisë së Brendshme italiane dhe Drejtorisë së Përgjithshme të Policisë së Shtetit shqiptar, është përfshirë edhe mbikëqyrja ajrore në territorin shqiptar e vatrave me kanabis.
Një ditë më parë, roja bregdetare italiane tha se, bllokoi në brigjet e Pulias 816 kilogramë marijuanë dhe arrestoi dy skafistë shqiptarë.
“Nëse lënda narkotike do të tregtohej në tregun e paligjshëm të marijuanës, organizatat kriminale do të përfitonin rreth 8 milionë euro”, vlerësoi roja bredgetare italiane.
Sipas saj, “që nga fillimi i vitit 2017, janë rreth 11 tonë marijuanë që janë sekuestruar nga Guardia di Finanza vetëm në Pulia, gati sa gjysma e sasisë së bllokuar gjatë gjithë vitit 2016 në këtë zonë detare në kufi me Shqipërinë”.

Prokuroria i kërkoi Gjykatës, të shpallë fajtor ish-deputetin e mazhorancës, Mark Frroku dhe ta dënojë atë me 25 vite burg. Po ashtu, Prokuroria kërkoi që për 10 vitet e tjera, Frroku të mos ushtrojë asnjë funksion publik. Dy përfaqësuesit e akuzës, lexuan konkluzionet përfundimtare para tre gjyqtarëve të çështjes, duke kërkuar që ish-deputeti Frroku të shpallet fajtor për 4 akuza, atë të “vrasjes me paramendim”, “fshehjes së pasurisë”, “pastrimit të parave” dhe akuzën e ndërtimit të paligjshëm. Sipas Prokurorisë, gjatë fazës së hetimit dhe gjykimit, u provua se i pandehuri Mark Frroku, ka marrë pjesë në vrasjen e Aleksandër Kurtit dhe për këtë fakt, kërkohet dënimi i tij me 17 vjet burg. Për akuzën e pastrimit të parave të ardhur nga një krim, Prokuroria i kërkoi Gjykatës dënimin me 15 vjet burg për ish-deputetin.
Në lidhje me akuzën e fshehjes së pasurisë dhe mos deklarimit të saj në ILDKPKI-Prokuroria kërkoi një dënim me 3 vjet heqje lirie. Ndërsa për akuzën e ndërtimit të paligjshëm, sipas Prokurorisë ish-deputeti duhet të dënohet me 4 vite burg. Përfundimisht, sipas akuzës, ish-deputeti Mark Frroku në bashkim të dënimeve, duhet të dënohet nga Gjykata e Tiranës me 25 vite  burg.
Në sallën e gjyqit nuk ishte i pranishëm ish-deputeti Frroku, i cili u përfaqësua nga dy avokatë mbrojtës, të cilët nuk pranuan të komentojnë kërkesën e Prokurorisë. Më datë 30 mars, Gjykata caktoi ditën kur avokatët të lexojnë pretendimet e tyre përfundimtare për akuzat e Prokurorisë. Ndërkohë, bashkë i pandehuri i këtij procesi Kristjan Marinaj, dosja ndaj të cilit u gjykua nga një trup tjetër gjykuese, u deklarua i pafajshëm për akuzën e vrasjes së Aleksandër Kurtit, për të cilën akuzohet edhe ish-deputeti Frroku.
Ngjarja për të cilën akuzohet ish-deputeti i mazhorancës, Mark Frroku ka ndodhur më 05 mars të vitit 1999 në Bruksel. Vëllai i viktimës i ka thënë Prokurorisë belge se Arben Frroku, kishte paguar 10 mijë dollarë për vrasjen e Aleksandër Kurtit e kryer nga vëllai i tij, Mark alias Besnik Morina. Sipas këtij dokumenti, motivi i vrasjes ishte: “Raporti midis viktimës dhe shtetases L. po bëhej më shumë se profesional dhe mund të vinte në rrezik organizatën e shfrytëzimit të qenieve njerëzore shqiptare nga Italia, Brukseli deri në Londër”.
Në datë 05.03.1999, viktima Aleksandër Kurti, lindur me 03.01.1975, u qëllua me thikë për vdekje nga 4 autorë, ndërmjet të cilëve shtetasi Besnik Vuka, në hyrje të stacionit “Midi” në Saint-Gilles, Bruksel. Autor i kësaj ngjarje besohet të jetë shtetasi Mark Frroku, i njohur ndryshe si Besnik Morina, i njohur ndryshe si Dritan Frroku, i njohur si Piro Sofrani. Sipas disa dëshmitarëve, shtetasi Besnik Vuka ishte autori i goditjeve me thikë. Viktima kishte rënë në dashuri me një prostitutë, me emrin L.S. Kjo vrasje e paramenduar shtrihet brenda fushës së vrasjes mafioze e organizuar nga qarqet e tutorëve. Shtetasja L.S kishte lënë takim me viktimën në ditën e ngjarjes. Aleksandër Kurti kishte menduar se do të takonte prostitutën, por ai ra në grackë, e cila rezultoi fatale për të. Kristian Marinaj, i njohur si Arjan Bytyçi, si dhe Lek Bib Djafa ishin bashkëpunëtorë të Besnik Vukës. Dëshmitarët kishin përmendur numrin e autorëve. Ata u arratisen jashtë vendit, disa ditë pas ngjarjes.

“Rilindja” vazhdon spastrimet politike edhe tek punonjësit e thjeshtë. Izet Kamani ka punuar për 30 vjet rresht shofer ambulance në Fushë-Krujë, por “Rilindja” e ka hedhur në rrugë për ta zëvendësuar me një militant socialist. Edhe pse Izeti ka qenë i përkushtuar në punën e tij, papritur i ka ardhur një letër nga drejtori i institucionit, Bashkim Xhafa, i cili e njofton “për ndërprerje të marrëdhënieve juridike dhe financiare të punës”, pa asnjë shkak vetëm pse në vend të tij do të emërohet një militant dhe njeri i afërt i drejtorit.
Dhe për të justifikuar pushimin nga puna “specialistët” e ‘Rilindjes’ nxjerrin lloj-lloj justifikimi. Ja si e justifikon drejtori Bashkim Xhafa pushimin nga puna të shoferit të ambulancës, Izet Kamani.
“Në zbatim të strukturës së miratuar me shkresë të ministrit të Shëndetësisë Nr.637/1 prot, datë 21.02.2017 dhe njoftimin për ndryshimin e marrëdhënieve të punës nr.38 prot datë 24/02/2017, në vijim të takimit të zhvilluar më datë 01.03.2017 bazuar në nenin 144 të Ligjit 7961 datë 12.07.1995 “Kodi i Punës” të ndryshuar ju njoftoj për ndërprerjen e marrëdhënieve juridike dhe financiare të punës dhe njëkohësisht:
* Bazuar në nenin 94/5 të Ligjit 7961 datë 12.7.1995 “Kodi i Punës” ju takon një pagesë e barabartë me pagën e pushimeve të pamarra të vitit 2016 (28 ditë) dhe të vitit 2017 (12 ditë).
* Bazuar në nenin 143/1 të Ligjit 7961 datë 12.7.1995 “Kodi i Punës” të ndryshuar, afati i njoftimit do të jetë tre muaj, duke qenë se keni vjetërsi më shumë se 5 (pesë) vjet ndërprerja e marrëdhënieve juridike dhe financiare të punës do të bëhet më datë 11.6.2017 (sipas nenit 143/1 shtyhet deri në fund të javës, duke qenë se marrëdhëniet duhej të shkëputeshin më datë 4.6.2017).
* Bazuar në nenin 143/1 të Ligjit 7961 datë 12.7.1995 “Kodi i Punës” i ndryshuar gjatë periudhës së njoftimit, përfitoni 20 orë leje të pagueshme në javë për të kërkuar punë të re.
* Bazuar në nenin 145 të Ligjit 7961 datë 12.7.1995 “Kodi i Punës” i ndryshuar ju takon një shpërblim për vjetërsi sa paga e një 15-ditëshi, për çdo vit pune të plotë, të kryer pranë të njëjtit punëdhënës. Brenda datës 11.06.2017 duhet të bëni dorëzimet e aktiveve (materialeve, dokumentave etj), që keni në ngarkim”, thuhet në shkresën e drejtorit Xhafa.

Pas një fabrike këpucësh në qytetin e Lezhës, “Fiks Fare” ishte edhe në qytete të tjera si Shkodër, Berat, Fier e Durrës, në disa kompani fasone, në të cilat shfrytëzohet krahu i punës dhe punësohen minorene. Investigimi dyvjeçar i “Fiksit” tregoi se, nga viti në vit gjendja nuk ndryshon, krahu i punës shfrytëzohet, punësohen minorene dhe pagesat e këtyre punëtoreve janë shumë herë më të vogla sesa paga minimale e vendosur nga ligji.
Punëtorë, roje dhe përgjegjës tregojnë për oraret, pagat dhe siguracionet në punë, të treja këto pika të Kodit të Punës që shkelen nga kompanitë që operojnë në këtë fushë. Në të gjitha këto kompani, kohëzgjatja ditore në punë është nga 9-10 orë, ndërkohë që në bazë të Kodit të Punës, një punëtor duhet të punojë 8 orë në ditë. “Për orët shtesë duhet të ketë pagesa shtesë”, thotë për “Fiksin” përgjegjësja e punësimit në Inspektoriatin Shtetëror të Punës.
Por në realitet nuk ndodh kështu. “Fiksi” transmetoi rrëfime të punëtoreve, që pohojnë se punojnë edhe të dielave. Nuk mungojnë edhe ekstremet, ku ka punëtorë paga mujore e të cilëve është 10.000 lekë. Një pikë tjetër e shkelur në Kodin e Punës, i cili parashikon pagën minimale 22.000 lekë në muaj, pa përfshirë orët shtesë.
Në një fasoneri në Shkodër, gazetarja e “Fiksit” gjen punëtore të moshës 15 dhe 16 vjeç, të cilat tregojnë se aty punojnë edhe më të vogla sesa ato. “Ne punojmë 8 orë në ditë edhe të shtunave. Këtu ka edhe 14-vjeçare që punojnë sa ne”, shprehen vajzat e mitura. Ndërkohë, përgjegjësit dinë si të jenë në rregull me shtetin.
Në një tjetër kompani po në Shkodër, përgjegjësja pohon se punësohen minorene 16-vjeçare, por i deklarojnë sikur punojnë me orare të reduktuara. “E mësojmë ne sesi të thotë nëse vjen shteti, duhet të thotë punoj pak, ndërkohë ajo do t’i bëjë të gjitha orët”, thotë përgjegjësja.
E njëjta panoramë paraqitet edhe në Fier, Durrës dhe Berat. Madje në Berat, sipas rojes së një kompanie fason, mund të merrje edhe 200 lekë në ditë. “Sa punon, aq merr. Mund të marrësh edhe 200 lekë në ditë, pasi nuk e arrin normën, edhe pse punon 8 orë, ndërsa kur marrin këto vërtetimet e punës ua shkruajnë sikur e kanë rrogën 22.000 lekë”, thotë roja.
Në një tjetër kompani simotër, po në Berat, gazetarët mësojnë se punohet mesatarisht 9 orë në ditë. Një përgjegjës kompanie në Durrës është i ndërgjegjshëm se e shkel Kodin e Punës për punësimin e minorenëve, duke pohuar se kishte marrë në punë shpeshherë 16-vjeçarë me kohë të plotë.
“E di që e ka Kodi i Punës të mos punojnë mbi 8 orë, por unë nuk do i paguaj nga xhepi nëse ato punojnë 6 orë”, thotë përgjegjësi.
Ndërsa në Fier haset një tjetër problem. Duhet ta bësh mend mirë që të sjellësh në jetë një fëmijë, pasi e ke të sigurtë largimin nga puna. Punëtoreve që marrin lejen e lindjes iu zihen menjëherë vendet e punës. “Ka marrë leje një punonjëse se ishte shtatzënë. Kur u kthye ia kishin zënë vendin dhe tani është pa punë”, tregon roja i objektit të kompanisë.

Pas protestes në qendër të fshatit, banorët e Trushit kanë zgjedhur që të kundërshtojnë brenda institucioneve dhënien e 264 ha tokë me qira një firme turke. Ata u pritën në një takim me dyer të mbyllura nga prefekti Radovani, duke i kërkuar këtij të fundit që të ndërhyjë për të ndaluar dhënien e kësaj sipërfaqe toke, pasi me të ato mbajnë familjet. Banorët këmbëngulin që ajo tokë ka qenë në pronësi të të parëve dhe nuk kanë patur dijeni për shpalljen e ankandit nga Ministria e Bujqësisë.
Ndërkohë, prefekti Radovani ka sqaruar se deri më tani asnjë banor nuk ka paraqitur një çertifikatë pronësie për tokën dhe largimi i firmës mbetet i vështirë, pasi mund të shoqërohet me penalizime. Megjithatë, ai shton se do të shihet mundësia e pezullimit të lejes, duke sqaruar se është dashur që për ankandin të ishin njoftuar edhe vetë komuniteti.
Para pak ditësh, banorët e Trushit kanë zhvilluar një protestë për këtë problem. Tokat bujqësore të pozicionuara në dy krahët e rrugës Shkodër-Velipojë janë të vetmet që sigurojnë jetesën e këtyre familjeve që merren me bujqësi dhe blegtori.

Rikthehen në protestë punonjësit e rafinerisë në Fier. 150 punonjës të rafinerisë së naftës në Fier i janë rikthyer protestuesve sot në hyrje të uzinës. Shkaku i kësaj proteste është mosmarrja e pagave për dy muaj, ndërkohë ata ankohen edhe për mos pagimin e sigurimeve shoqërore që prej 21 muajsh.
“Me ne kanë lozur të gjithë”, thonë punëtorët. “Askush nuk na jep në rrugëzgjidhje dhe nuk dimë se çfarë do bëhet me ne, ende nuk dimë se si do të zgjidhet problemi jonë, jemi bërë më keq se Zharrëza. Nuk kemi mundësi në këto kushte të ushqejmë familjen. Jemi të sëmurë dhe nuk marrim do ilaçe se nuk jemi të siguruar. Nuk kërkojmë gjë tjetër, veçse bukën e gojës dhe hakun e punës”, shprehen ata.