Diego Maradona rikrijoi edhe një herë golin “Dora e Zotit”, në të njëjtën mënyrë me të cilën shënoi ndaj Anglisë. Legjenda argjentinase ishte në Korenë e Jugut për të drejtuar shortin e Botërorit U-20, i cili do të luhet në maj. Gjatë promovimit të turneut, 56-vjeçari mori pjesë në një ndeshje minifutbolli 5 kundër 5.
Por gjatë lojës, ai nuk i rezistoi dot tundimit për të shënuar me dorë, një moment si në kopje karboni që u fiksua nga kamerat, duke u kujtuar anglezëve golin e famshëm që u theu zemrat në Botërorin e 1986-ës. Megjithatë, këtë herë topi nuk përfundoi në rrjetë dhe Maradona u ndëshkua me karton të verdhë.
“El Pibe De Oro”, i cili fitoi Botërorin e të rinjve në vitin 1979, ngriti edhe trofeun e kupës së vërtetë të botës në Meksikë 7 vite më vonë. Rruga e tyre drejt finales vazhdon të kujtohet edhe sot nga goli kontrovers me dorë i yllit të Argjentinës në portën e Piter Shiltonit, i cili eliminoi “Tre Luanët” në çerekfinale.
Maradona, të cilit iu bashkua edhe një tjetër ish-lojtar i kombëtares bardhekaltër, Pablo Aimar, gjatë shortit në Kore, zgjodhi goglat që përplasën pikërisht Anglinë dhe Argjentinën, së bashku me Guinenë dhe organizatorët e Koresë së Jugut në Grupin A. Kombëtarja angleze U-20 e drejtuar nga Pol Simpsoni do ta nisë botërorin pikërisht kundër Argjentinës në stadiumin “Jeonju Ëorld Cup”, më 20 maj.
Grupet e tjera vijojnë si më poshtë: Grupi B: Venezuelë, Gjermani, Vanuatu, Meksikë. Grupi C: Zambia, Portugali, Iran, Kosta Rikë. Grupi D: Afrikë e Jugut, Japoni, Itali, Uruguai. Grupi E: Francë, Honduras, Vietnam, Zelandë e Re. Grupi F: Ekuador, SHBA, Arabi Saudite dhe Senegal.

Njëmbëdhjetë vjet pas “Calciopolit” vjen edhe verdikti i fundit. Bëhet fjalë për një konfirmim, ose më saktë, për një apelim të rrëzuar. Këshilli i Shtetit, me një vendim të publikuar dje ka konfirmuar vendimin e drejtësisë sportive për ta përjashtuar përjetësisht Luçiano Moxhin nga çdo veprimtari që ka lidhje me futbollin italian.
Ish-drejtuesi i Juventusit qe përpjekur të dilte nga ombrella e drejtësisë sportive, duke e apeluar dënimin e marrë prej saj në shkallët civile të gjykatave italiane. Megjithatë Këshilli i Shtetit ka vendosur ta lërë në fuqi vendimin e dhënë më 11 maj 2012 nga Gjykata Federale e Federatës Italiane të Futbollit. Në këtë mënyrë, karriera në futboll e 79-vjeçarit Moxhi është përfundimisht e mbyllur.

Një tripletë në 56 vite arriti të fitonte Bajerni i Mynihut. Por, kur e fiton për herë të parë, çdokush e kërkon edhe për së dyti. Këtë gjë duan si lojtarët edhe stafi drejtues së bashku me fansat. Në fakt, nën drejtimin e Karlo Ançelotit, duket se gjithçka po shkon ashtu si para katër vitesh. Në krahasim me sezonin e tripletës dhe periudhën aktuale, ka shumë gjëra të përbashkëta si në Bundesligë, Kupën e Gjermanisë dhe Champions.
Shumë persona ishin skeptikë për arritjen e tripletës nga Bajerni i Ançelotit, duke u treguar më shumë nostalgjikë për lojën atraktive të Pep Guardiolës, si dhe lojën strategjike të Jup Hajnkes.
Por “babai” i Champions-it po dëshmon çdo ditë aftësitë e tij falë rezultateve dhe fitoreve spektakolare. Ai po menaxhon siç duhet çdo armë që zotëron.
Bundesliga është si buka e përditshme për Bajernin. Fitorja e saj është si provim i detyrueshëm. Ashtu si në 2013-ën dhe këtë sezon deri në javën e 24-t, si Hajnkes dhe Ançeloti kanë pësuar vetëm nga një humbje. Bajerni i tripletës në të njëjtën periudhë kishte 63 pikë dhe një golavarazh 64 gola të shënuar dhe 8 të pësuar, ndërsa sivjet kryesojnë me 59 pikë dhe golavarazh 60 të shënuar dhe 13 të pësuar.
Në Kupë, për çudi, është e njëjta rrugë. Para 4 vitesh mundi Augsburgun në 1/4-at, Volfsburgun në çerekfinale dhe Dortmundin në gjysmëfinale. Të njëjtët rivalë ka pasur në short Ançeloti. Në Champions, Bajerni i Hajnkes e mbylli në vend të parë me 13 pikë, ndërsa Ançeloti e mbylli i dyti me 12 pikë. Në finalet e 1/8-ve mundën Arsenalin 3-1 në transfertë dhe u mundën 0-2 në Mynih, duke përfituar nga rregulli i golave të shënuar në fushën kundërshtare.
Edhe Bajerni i Ançelotit u përball me Arsenalin, por e shkërmoqi 10-2. Hajnkes e respektonte së tepërmi ligjin e futbollit: Formacioni fitues nuk ndryshohet. Këtij përfundimi i bashkohet edhe Ançeloti. Heronjtë e tripletës janë boshti kryesor edhe i 2017-ës. Vetëm Gomez, Shvajni dhe Dante mungojnë nga heronjtë e tripletës, të cilët janë zëvendësuar me superheronj si Alonso, Humels, Lewandowski apo edhe Koman.
Pep Guardiola nuk mundi dot të shkonte më shumë sesa në gjysmëfinale të Championsit për tre vite radhazi në krye të Bajernit. Në fazat finale, ekipi i tij u copëtua nga dëmtimet, aq sa mjeku Myler-Volfart dha dorëheqjen, duke u fajësuar padrejtësisht. Televizioni sportiv “Sport1” ka bërë një krahasim të dëmtimeve të sezonit të kaluar me Pepin dhe të këtij viti me Ançelotin.
Sezonin e kaluar, organika e Bajernit bëri 782 ditë pushime nga dëmtimet muskulore, ndërsa këtë sezon me Ançelotin ka pasur 428 ditë pushim. Roben, Riberi dhe Martinez kanë zhvilluar deri tani më shumë ndeshje sesa në gjithë sezonin e kaluar. Edhe Tiago është kthyer në çelësin e Karletos. Ançeloti u beson më shumë veteranëve dhe eksperiencës.

“Duket sikur Gashi kishte tifozë personalë në New York. Faleminderit të gjithëve që udhëtuat për të na mbështetur”. Ky ishte postimi në faqen zyrtare në Facebook, i klubit amerikan të futbollit Colorado Rapids, ku aktivizohet sulmuesi i kombëtares shqiptare, Shkëlzen Gashi. Një flamur amerikan dhe një shqiptar mbyllnin postimin, i cili shoqërohej edhe me foto të sulmuesit kuq e zi, i rrethuar nga fansat shqiptarë.
Gjithçka ndodhi më 11 mars, kur Colorado Rapids luajti në transfertë, ndaj New York Red Bulls, takim të cilin e humbi me rezultatin 1-0 dhe Gashi u aktivizua vetëm në pjesën e dytë. Pas takimit, sulmuesi kuqezi u rrethua nga dhjetëra shqiptarë, të cilët nuk mund ta humbnin mundësinë për të bërë foto me të. Fansat shqiptarë të sulmuesit shpalosën edhe simbolet shqiptare në stadium, ndërsa nuk mungoi as flamuri i Kosovës.
Ndërkohë, Mërgim Mavraj shpreson të rikthehet të luaj në Kombëtare pas dëmtimit. Mbrojtësi kuqezi, me anë të një statusi në profilin e tij në “Facebook”, njofton se po bën maksimumin për të qenë prezent në këtë sfidë, por duket se është e vështirë. “Periudhë e vështirë pas dëmtimit në një moment shumë delikat si për klubin ashtu edhe për Kombëtaren. Po bëhet maksimumi për rikuperimim, por tepër e vështirë për t’u rikthyer në kohë për Kombëtaren”, shkruan Mavraj.

Është vetëm 20 vjeç, por aktualisht ai është një nga sulmuesit më të mirë që luan në Zvicër. Me transferimin nga Augsburgu te St Gallen në formë huazimi, Albian Ajeti po përjeton një moment të artë. Me rikthimin në Superligën zvicerane, vëllai i mbrojtësit të kombëtares shqiptare Arlind Ajeti ka shpërthyer përfundimisht dhe me meritë është shpallur nga “Blick” futbollisti më i mirë i muajit shkurt në kampionatin helvet. Me 3 gola të realizuara në 4 ndeshje me St Gallen në muajin e dytë të vitit, 20-vjeçari shqiptar ka mposhtur konkurencën e Elyounoussi të Baselit dhe talentit të Young Boys, Assale. Ajeti ka qenë i preferuari i tifozëve që kanë votuar në sondazhin e “Blick”, duke grumbulluar 10 mijë e 255 vota.
Sulmuesi i talentuar, i cili ka luajtur me të gjithë ekipet e moshave të Zvicrës, por që në të ardhmen pritet të përfaqësojë Shqipërinë në rang kombëtaresh, mori 24% të votave, 1 më shumë se Elyounoussi dhe 3% më tepër se Assale. Përpara ndeshjes ndaj Luzern-it, Ajetit iu dha edhe çeku prej 2 mijë frangash zvicerane që akordon “Blick” për fituesin e çmimit të lojtarit të muajit. Ndoshta edhe në muajin mars ky çmim prestigjioz mund të shkojë, për një tjetër futbollist shqiptar, duke parë ecurinë fantastike të Armando Sadikut me Luganon gjatë kësaj periudhe.

Maqedonia nuk do ta pranojë faktin që e ka humbur Taulant Seferin, edhe pse vetë mesfushori i Jong Bojs konfirmoi dje se ka zgjedhur të përfaqësojë Kombëtaren e Shqipërisë. Trajneri i Maqedonisë U-21, Boban Milevski, ka zbuluar se 20-vjeçarit i është dërguar ftesë për grumbullimin e radhës. “Me Taulant Seferin kam folur më 15 shkurt dhe ai më ka vërtetuar se është në dispozicion dhe dëshiron të luajë për Maqedoninë. Unë e kam në planet e mia, prandaj e kam përfshirë në listë, pasi nuk guxojmë të tërhiqemi lehtësisht nga futbollistë të caktuar, duke qenë se nuk kemi shumë alternativa.
Ftesa i është dërguar atij dhe klubit të tij, por ende nuk kemi përgjigje. Kam provuar të vë kontakte edhe me menaxherin e U-21, por s’kemi marrë asnjë përgjigje. Jemi paraqitur edhe te Federata e Zvicrës dhe tashmë nuk na mbetet gjë tjetër veçse të shohim se çfarë do të ndodhë”, tha Milevski.

Besart Berisha nuk ka dashur të diskutojë për lojtarët, të cilët nuk i janë bashkuar Kosovës. Pas arritjes në Kosovë, sulmuesi shqiptar Besart Berisha, mbajti një konferencë për media, ku u pyet për shumë gjëra para ndeshjes me Islandën. Mes të tjerash, Berisha u pyet edhe për lojtarët shqiptarë që kanë refuzuar të luajnë për Kosovën. Përgjigjja e 31-vjeçarit ishte e shkurtër.  “Çfarë iu thua lojtarëve që refuzuan Kosovën? Asgjë. Ata i kanë mendimet e veta”, u përgjigj Berisha, i cili premtoi gola dhe shpreson që Kosova do të nxjerrë rezultat pozitiv ndaj Islandës.
Sulmuesi në top formë, Besart Berisha, tashmë gjendet në Kosovë. Ai pritet të debutojë për Kombëtaren e Kosovës në sfidën kundër Islandës. Berisha u shpreh tejet i lumtur që do të përfaqësojë vendin e tij. “Nuk ia kisha fal vetës asnjëherë, nëse nuk do të luaja për Kosovën”, ka thënë Besarti. “Gjendem këtu se dua ta ndihmoj Kosovën. E dua këtë vend”, përfundoi Berisha.

I mërzitur dhe i dëshpëruar është shfaqur trajneri i Mançester Sitit pas ndeshjes. Pep Guardiola nuk ka qenë aspak i kënaqur me impenjimin e futbollistëve të tij, të cilët e morën seriozisht ndeshjen, vetëm në pjesën e dytë. “Në këto kompeticione nuk mund t’i dhurosh një pjesë loje kundërshtarit. Nuk patëm mentalitetin e duhur, ndaj u eliminuam”, tha trajneri spanjoll.
Gjithsesi, Guardiola dëshiron të lejë pas gjithçka dhe bën thirrje për të çuar para projektin e nisur me Sitin. “Jemi duke bërë një sezon të mirë. Kam një ekip me personalitet, që dëshiron t’i imponojë lojën e vet kundërshtarit, në çdo takim, por sot, në pjesën e parë nuk ia dolëm dot. Duhet të shikojmë përpara dhe të nxjerrim mësime nga kjo humbje, për t’u përmirësuar në sezonin e ardhshëm”, tha trajneri i Pep Guardiola.
Leonardo Zhardim është strategu i një Monakoje që po mahnit të gjithë Europën. Një ekip i ndërtuar me futbollistë të rinj, por që po dominon ndaj çdo kundërshtari. Tekniku portugez ka përgëzuar lojtarët e tij për kualifikimin, por e cilëson fitoren 3-1 ndaj Mançester Sitit një rezultat që e priste.
“E kam parë shumë herë ndeshjen e parë, ku u mundëm 5-3 dhe sinqerisht më dukej rezultat i padrejtë. Luajtëm mjaft mirë, por në fund nuk patëm fat. E dija që po të luanim me të njëjtën dëshirë, duke bërë presing të vazhdueshëm dhe të finalizonim saktësisht, do t’ia dilnim. Është një shpërblim për të gjithë punën e madhe që kemi bërë dhe nuk do të ndalemi me kaq”, deklaroi 42-vjeçari.
“Këta futbollistë janë të një niveli shumë të lartë, pavarësisht se kanë një moshë të re. Nuk është e rastësishme që luajmë në formacion dhe në klubin tonë. Për të arritur deri këtu, ka pasur një organizim të përsosur. E rëndësishme është që të argëtohemi. Më vjen keq që Mançester Siti nuk do të jetë më pjesë e Champions-it, pasi kanë dhuruar një futboll cilësor. Por, jemi me meritë në çerekfinale”, shtoi Zhardim.

Tjetër rezultat triller në fazën e 1/8-ve të Champions League. Francezët e Monakos bënë mrekullinë në stadiumin “Luigji II”, duke mundur 3-1 Mançester Sitin e Pep Guardiolës, që duhet t’i thotë lamtumirë kompeticionit me rezultat të përgjithshëm 6-6, me skuadrën nga Principata që favorizohet nga numri më i madh i golave të realizuar në fushën kundërshtare.
Edhe pse ishin mundur 5-3 në “Etihat Stadium”, kryesuesit e kampionatit francez arritën të fitonin me 2 gola diferencë, duke realizuar dy herë që në pjesën e parë. Në minutën e 8-të talenti i Monakos, Mbape devijoi në rrjetë në zonën e portierit një pasim të Bernardo Silvas. Pa u mbushur gjysmë ore lojë Fabinho shënoi të dytin për vendasit i shërbyer nga e majta e sulmit nga Mendy.
Mançester Siti u zgjua në pjesën e dytë dhe pasi shpërdori disa raste të pastra arriti të shkurtonte diferencën në 2-1 me Sane në minutën e 71-të. Ky gol do t’i vlente kualifikimin skuadrës së Pep Guardiolës, por Monako shfrytëzoi më së miri një goditje standarde me Bakayokon, që e çoi topin me kokë atje ku nuk mund ta arrinte Caballero. Një eliminim i turpshëm ky për Cityzens, që nuk mundën ta shfrytëzonin epërsinë e takimit të parë.
Monako shkon në çerekfinale, Mançester Siti kthehet në shtëpi. Është ky verdikti i ndeshjes së kthimit për 1/8-at e Ligës së Kampioneve. Në stadiumin “Luigji II” vendasit triumfuan 3-1 në fund të një 90-minutëshi fotokopje të atij të para tri javëve në Angli. Edhe pse pa të dëmtuarin Falkao, skuadra nga Principata e nisi me vrull dhe gjeti epërsinë që në minutën e tetë me të zakonshmin Mbape, i cili realizoi golin e 11-të në po kaq ndeshje radhazi në të gjitha garat.
Në të 29 Fabinjo shënoi edhe të dytin, që do të ishte i mjaftueshëm për ekipin e Leonardo Zhardimit pas humbjes 5-3 në takimin e vajtjes. Leroi Sane riktheu avantazhin në anën e Sitit në minutën e 71-të, mirëpo gëzimi i anglezëve zgjati pak, pasi Bakajoko i ndëshkoi në të 77-n.
Me rezultatin e përgjithshëm 6-6 Monako siguron biletën e kualifikimit, ndërsa të besuarit e Pep Guardiolës bëhen e para skuadër në historinë e Champions-it që del nga gara pasi shënon pesë gola në ndeshjen e parë. Trajneri spanjoll, ndërkaq, nuk e sheh veten në çerekfinale për herë të parë në karrierë.
Kualifikohet sikurse pritej në çerekfinale të Championsit Atletico e Madridit, që barazoi 0-0 në “Vicente Calderon” me Bayer Leverkusenin, me Los Colchoneros që vinin të avantazhuar nga fitorja 2-4 e sfidës së parë në fushën e Aspirinave.

Trajneri i Bosnje-Hercegovinës, Mehmed Bazhdareviç, ka shpallur dje listën me futbollistët e grumbulluar për miqësoren e 28 marsit përballë Shqipërisë në “Elbasan Arena”.
Sikurse pritej, boshnjakët do të udhëtojnë drejt tokës shqiptare me plot yje, mes të cilëve portieri i Çelsit, Asmir Begoviç; sulmuesi i Romës, Edin Xheko, mesfushori i Lacios, Senad Luliç apo ai i Juventusit, Miralem Pjaniç.
Në fakt, Luliç dhe Xheko do t’i bashkohen ekipit vetëm për duelin ndaj kuqezinjve, pasi nuk do të jenë të grumbulluar për takimin e 25 marsit kundër Gjibraltarit në kualifikueset e Botërorit 2018.
Në listë janë pesë lojtarë debutues: Dario Dumiç, Daniel Pavloviç, Amer Gojak, Riad Bajiç dhe Kenan Kodro, ndërkohë që mungon ish-kapiteni Emir Spahiç, i cili është pa skuadër pasi ndërpreu kontratën me Hamburgun në janar.
Lista e plotë:
Portierë: Asmir Begoviç (Çelsi), Ibrahim Shehiç (Karabag), Kenan Piriç (Zrinjski Mostar);
Mbrojtës: Ermin Biçakçiç (Hofenhaim), Toni Sunjiç (Palermo), Edin Çoçaliç (Meshelen), Ervin Zukanoviç (Atalanta), Dario Dumiç (Nijmegen), Sead Kolashinac (Shalke), Daniel Pavloviç (Sampdoria);
Mesfushorë: Miralem Pjaniç (Juventus), Mario Vrançiç (Darmshtad), Gojko Cimirot (PAOK), Sanjin Prçiç (Ren), Amer Gojak (Dinamo Zagreb), Edin Visha (Istanbul Bashakshehir), Avdija Vrshajeviç (Osmanlispor), Danijel Miliçeviç (Gent), Rade Kruniç (Empoli);
Sulmues: Riad Bajiç (Koniaspor), Vedad Ibiseviç (Herta Berlin), Armin Hoxhiç (Dinamo Zagreb), Kenan Kodro (Osasuna), Milan Djuriç (Bristol Siti);
Rezerva: Tomislav Tomiç (Zeljezniçar), Haris Duljeviç (Sarajevo), Miroslav Stevanoviç (Zeljezniçar), Samir Memisheviç (Groningen).
Për ndeshjen me Shqipërinë do të shtohen: Senad Luliç (Lacio), Edin Xheko (Roma), Ognjen Vranjes (AEK), Mato Jajalo (Palermo).