Kryedemokrati Lulzim Basha bashkëbisedoi dje tek sheshi i lirisë mbi situatën urbanistike dhe fasadat e Edi Ramës në infrastrukturë. Pedagogë, inxhinierë, arkitektë dhe qytetarë të thjeshtë, bashkëbiseduan për një nga problemet e mëdha të qeverisjes sot: fasadat. Lulzim Basha i quajti fasadat jo thjesht propagandë, por instrumentin e kësaj qeverie për të vjedhur shqiptarët përmes projekteve pa vlerë, jo cilësore dhe të rënda për xhepat e lodhur të shqiptarëve, të cilët kërkojnë cilësi në jetën e përditshme. Urbanisti Besnik Aliaj u shpreh se zgjedhjet e vitit 2014 nuk sollën ndryshim, por putinizëm. Ai denoncoi projektet klienteliste të Parkut të Liqenit, të stadiumit, si dhe të Sheshit Skënderbej. Në mënyrë të veçantë ai denoncoi shkeljen e ligjeve të informimit të publikut dhe të pjesëmarrjes së tij në vendimmarrje. “Planet rregulluese nuk u diskutuan kurrë me njerëzit, ndërkohë që ligji thotë minimalisht tre muaj konsultim. Vetëm 48 orë përpara kërkoi të bënte një proces konsultimi sa për t’i hedhur hi syve të njerëzve. Ky është shteti i hipokrizisë që mbahet me fasada. Ne kemi nevojë për një qeveri teknike e Shqipëri teknike”. Urbanistja Kreuza Leka u shpreh se, “Rama e tregoi se arsyeja që donte të bëhej kryeministër ishte interesi i tij për lejet e ndërtimit. Ajo që u bë me Rilindjen, ishte shkelja e ligjit dhe korrupsion masiv duke nisur me prokurimet e duke përfunduar tek lejet e rezervuara për oligarkët”. Përfaqësuesi i Unionit të Arkitektëve dhe Urbanistëve të Shqipërisë, Enver Bregasi kritikoi mënyrën e përzgjedhjes së projekteve të mëdha arkitekturore që përqendrohen në qendër duke i lënë ato të paarritshme nga shumica e popullsisë. Pedagogia Etleva Dobiani, denoncoi shkatërrimin e trashëgimisë kulturore në Shqipëri, veçanërisht projektin e by pass-it të Gjirokastrës, projekti fitues i të cilit nuk ishte as në nivelin e studentëve të arkitekturës. Arkitekti Ervin Minarolli tha se edhe propaganda e humbet efektin e saj kur në katër vite kjo qeveri nuk ndërtoi asnjë kilometër rrugë. Elisabeta Susaj foli për fasadën mjedisore. “Jam e indinjuar me betonizimin që i bëhet qytetit tim. Betonizimi i qendrës 40 mijë metër katrorë është diçka që nuk ndodh në asnjë vend tjetër të botës. Ajo qendër do të shërbejë si panel diellor dhe do të kemi efektin serrë dhe nxehtësia do të përhapet kudo. Ashtu si edhe në dimër ku do të ketë rrëshkitje dhe akuj pasi mungon edhe infiltrimi i ujërave të rreshjeve”. Inxhinieri Endrin Gjipali, kritikoi ligjin e prokurimeve publike, i cili në gjendjen siç është nuk zgjidh ofertën më të mirë, por sjell fasada. Lulzim Basha tha se fasadat për të cilët të ftuarit ngritën shqetësimet e tyre, janë e vërteta e hidhur me të cilën përballen gjithë shqiptarët sot. “Çfarë është qeverisja fasadë? Është kjo që ka bërë të mundur në vetëm 4 vite shndërrimin e Shqipërisë në një hambar droge, në një Republikë të sunduar nga krimi, në një ekonomi të shkatërruar dhe një shoqëri civile dhe media të kthyer tërësisht në funksion të fasadës. Demokraci fasadë, Parlament fasadë, qeverisje fasadë dhe tani duan zgjedhje fasadë, zgjedhje të kapura, zgjedhje të diktuara nga krimi”. Fasadat e kësaj qeveri nuk shkatërrojnë vetëm cilësinë e jetesës së qytetarëve, por edhe ekonominë dhe të ardhmen e saj, si instrument vjedhjeje në dorën e pushtetit, sipas Bashës. “Por fasada nuk është vetëm simboli i gënjeshtrës, fasada është edhe instrumenti i vjedhjes së shqiptarëve. Sepse prapa fasadës nuk është se nuk ka asgjë, por ka një tavolinë ku bashkohen pushtetarë të korruptuar, kriminelë, oligarkë dhe media të bëra njësh me qeverinë, me një qëllim, të vjedhin Shqipërinë dhe shqiptarët dhe të mashtrojnë dhe të gënjejnë nga mëngjesi në darkë. E pra, shikoni se çfarë ka bërë për 4 vite, e tregon buxheti i Edi Ramës në 4 vite, ka harxhuar 500 milionë euro për projekte fasadë”. Basha tha se përtej fasadës “po bëjmë shtet”, ndodhet e vërteta e shtetit të dështuar dhe të falimentuar të Edi Ramës, shtetit më të kriminalizuar në mes të Evropës. “Pas uniformave të reja të policisë, po kështu një fasadë me anë të së cilës Rama-Tahiri kanë vjedhur milionat e taksapaguesve shqiptarë, ndodhet mafia më e rrezikshme në Evropë, narkomafia e cila ka shndërruar Shqipërinë në hambar droge. Kjo fasadë ka qenë dhe mbetet thelbi i propagandës së Edi Ramës, propagandë që paguhet me këto para dhe paguhet shtrenjtë shumë. Dje, EUROPOL-i, ka bërë publik raportin për gjendjen e narkotikës në Europë. Fasada e Edi Ramës: Ku është droga? EUROPOL-i për fat të keq e thotë fare qartë. Shqipëria është numër një për kanabisin në Europë dhe vend kryesor për trafikun e drogës”. Kryedemokrati Basha i bëri edhe një herë thirrje qëndresës popullore në ditën e saj të 26 të ngrihet bashkë edhe për vlerat e përbashkëta evropiane dhe euroatlantike.

Trafikim prostitucioni, ushtrim dhune, falsifikim të dokumentacioneve, kundërshtim të forcave të rendit e shkelje të rregullave të qarkullimit rrugor. Janë  këto pesë akuzat që rëndojnë ndaj kryebashkiakut socialist të Poliçanit, për të cilin tashmë Prokuroria zyrtarisht kërkon heqjen e mandatit. Dje mediat kanë zbardhur dëshminë e penalitetit të  kryetarit të Bashkisë së Poliçanit Adriatik Zotkaj. ABC News ka publikuar dje dëshminë e penalitetit, ku janë pasqyruar me detaje 5 dënimet penale të formës së prerë. Veç dëshmisë së penaliteti është dhe dokumenti për shkurtimin e vendimit të Gjykatës së Skraparit që mban vitin 1985, ku Zotkaj është dënuar për 4 muaj në riedukim për të kryer punë publike.
Pikërisht këtë vendim, Zotkaj nuk e ka pasqyruar në formularin e parë të “Dekriminalizimit”, duke u bërë shkak që Prokuroria t’i kërkojë KQZ ndërprerjen e mandatit të Zotkajt.
Sipas Prokurorisë, mospasqyrimi i këtij dënimi në formular ka bërë që kreu i Bashkisë së Poliçanit të ketë konsumuar veprën penale të “falsifikimit të formularëve”, akuzë për të cilën tashmë edhe po hetohet nga Prokuroria.
Nga ana tjetër, në kërkesën drejtuar Komisionit Qendror të Zgjedhjeve, ku kërkohet ndërprerja e mandatit të kreut të Bashkisë së Poliçanit, organi i akuzës argumenton se formulari i dytë, i korrigjuar nga Adriatik Zotkaj dhe i pranuar nga KQZ-ja nuk ka vlerë ligjore.
Sipas akuzës, vetëm formulari i parë, i dorëzuar më 26 prill 2016 është i vlefshëm dhe brenda afatit ligjor. Çdo formular tjetër apo material, thuhet nga prokurori, i dorëzuar pas datës 26 prill 2016 në KQZ nuk mund t’i nënshtrohet verifikimit, pasi është marrë dhe administruar në kundërshtim të hapur të ligjit dhe është formular i pavlefshëm.
Për këtë fakt, thonë prokurorët, kanë nisur edhe hetimet ndaj zyrtarëve të KQZ-së, pasi kanë pranuar korrigjimin e 29 formularëve të parë, në kundërshtim të ligjit.
Ndërkohë Adriatik Zotkaj, sipas dëshmisë së penalitetit, është dënuar 5 herë me vendime penale.
Në vitin 1985 nga Gjykata e Skraparit për akuzën e “fyerjes dhe goditjes për shkak të detyrës”.
Në vitin 1992 Gjykata e Korçës e ka dënuar me 3 vjet burg për akuzën e “shkeljes së rregullave të qarkullimit rrugor”.
Në vitin 2001 po Gjykata e Skraparit e ka dënuar me 10 muaj burg për kundërshtim të forcave të rendit.
Në vitin 2002 Gjykata e Tiranës e ka dënuar me 12 muaj burg për veprime arbitrare dhe falsifikim të dokumenteve.
Një vendim tjetër i Gjykatës së Beratit që mban vitin 2006.
Sipas Prokurorisë, e cila kërkon heqjen e mandatit të tij si kryebashkiak, citohet se Komisioni Qendror i Zgjedhjeve ka kryer verifikimet paraprake në zbatim të Ligjit 138/2015 dhe vendimit 17/2016 të Kuvendit të Republikës pranë Drejtorisë së Burgjeve, konfirmon vendimet e mësipërme dhe vlerëson se subjekti nuk përfshihet brenda fushës së ndalimeve të nenit 2 të Ligjit 138/2015, pasi sipas nenit 4, të Ligjit nr. 138/2015, për këto dënime kanë kaluar afatet e rehabilitimit. Sektori i Verifikimit të Integritetit në Prokurorinë e Përgjithshme i është drejtuar me kërkesa përkatësisht, Drejtorisë së Përgjithshme të Burgjeve, Gjykatës së Shkallës së Parë Berat, Gjykatës së Shkallës së Parë Tiranë dhe Gjykatës së Shkallës së Parë Korçë. Drejtoria e Përgjithshme e Burgjeve ka vënë në dispozicion Dëshminë e Gjendjes Gjyqësore të subjektit, datë 23.02.2017. Gjykata e Shkallës së Parë Berat ka vënë në dispozicion vendimet penale të formës së prerë, datë 29.07.1985; datë 01.02.2001; dhe datë 29.12.2006. Gjykata e Shkallës së Parë Korçë ka vënë në dispozicion vendimin datë 19.03.1992. Gjykata e Shkallës së Parë Tiranë ka vënë në dispozicion vendimin penal të formës së prerë, nr. 370, datë 21.05.2002 në emër të subjektit deklarues Adriatik Zotkaj. Subjekti, nga përgjigjet dhe verifikimet e kryera, rezulton se nuk ka deklaruar vendimin gjyqësor të formës së prerë dhënë nga Gjykata e Shkallës së Parë Skrapar nr. 20, datë 29.07.1985, edhe pse ka pasur detyrimin ligjor për ta pasqyruar në pyetjen 1 të formularit të vetëdeklarimit, njëjtë siç ka deklaruar dhe vendimet e tjera penale dhënë nga Gjykatat e Shkallës së Parë Skrapar, Korçë dhe Tiranë.

Akuza për trafikimin e tetë vajzave në Itali

Prokuroria e Krimeve të Rënda ka nisur hetimet për kryetarin e Bashkisë së Poliçanit, Adriatik Zotkaj pas dëshmisë së një të pandehuri, i cili e ka përmendur emrin e tij. Procesi kundër Leonard Muçajt ka marrë një kthesë tjetër, pasi i pandehuri nën akuzë për trafik të të miturve i ka kërkuar llogari akuzës se përse hetojnë atë dhe jo Zotkën. “Pse më hetoni mua për një rast?! Hetoni Adriatik Zotkën. Ai ka trafikuar tetë vajza në Itali”, ka thënë ai. Në këto kushte, prokurorët e dosjes kanë përcjellë procesverbalet e seancës gjyqësore tek eprorët, të cilët nga ana e tyre kanë urdhëruar fillimin e hetimeve. Zotkaj i ka fshehur të gjitha dënimet e tij në formularin e dekriminalizimit.

Zoktaj fshehu dënimet në formularin e dekriminalizimit

Sektori i Dekriminalizimit në Prokurorinë e Përgjithshme ka konstatuar se subjektit Adriatik Zotkaj i duhet ndërprerë mandati i kryetarit të Bashkisë, pasi rezulton se: Adriatik Zotkaj, referuar Ligjit nr. 138/2015, ka dorëzuar një formular vetëdeklarimi të administruar nga Komisioni Qendror i Zgjedhjeve, në datë 26.04.2016, të plotësuar në datë 22.04.2016, pra, brenda afatit ligjor të përcaktuar në vendimin nr. 17/2016, të Kuvendit të Shqipërisë.
Më pas, në datë 10.06.2016 subjekti ka dorëzuar një formular vetëdeklarimi të dytë bashkë me një deklaratë të firmosur nga vetë ai dhe Komisioni Qendror i Zgjedhjeve ka pranuar ta administrojë, në shkelje të afateve ligjore.
Në datë 04.01.2017, përsëri Komisioni Qendror i Zgjedhjeve ka administruar një kërkesë të subjektit Adriatik Zotkaj, të cilit i ka bashkëlidhur vërtetimin e gjendjes gjyqësore nr. 1 prot., datë 24.11.2016.
Gjithashtu në datë 14.02.2017, datë në të cilën është përcjellë dhe kërkesa për verifikim të thelluar, Komisioni Qendror i Zgjedhjeve ka protokolluar dhe administruar një vërtetim datë 14.02.2017, të lëshuar nga Gjykata e Rrethit Gjyqësor Berat. Këtij vërtetimi i janë bashkëlidhur dy vendime gjykate, me kërkues subjektin Adriatik Zotkaj. Sektori i Verifikimit të Integritetit ka verifikuar vetëm të dhënat e formularit të datës 22.04.2016, të administruar më 26.04.2016 nga Komisioni Qendror i Zgjedhjeve, pasi sipas Ligjit nr. 138/2015 dhe vendimit nr. 17/2016 të Kuvendit të Shqipërisë, ky formular është i vetmi formular që është plotësuar, duke respektuar afatet ligjore. Çdo formular tjetër apo materiale të tjera, nuk mund t’i nënshtrohen verifikimit, pasi bien në kundërshtim të hapur me ligjin.
Në formularin e parë të përcjellë për verifikim, nga ana e sektorit është konstatuar se subjekti ka deklaruar, një vendim penal të formës së prerë të Gjykatës së Rrethit Korçë, për veprën penale të “Shkeljes së rregullave të qarkullimit rrugor” ku është dënuar me 3 vjet burg, një vendim të Gjykatës së Rrethit Skrapar për “Kundërshtimin e punonjësve të Policisë së Rendit Publik”, dënuar me 10 muaj burg dhe një vendim të Gjykatës së Rrethit Tiranë, për veprën penale të parashikuar nga neni 250 dhe 187 i Kodit Penal, dënuar me 1 vit burgim. Gjithashtu ka deklaruar nën pyetjen 4 të formularit se ka qenë i arrestuar/ndaluar dhe ndaj tij ka pasur dy masa sigurie “arrest në burg” nga Prokuroria e Rrethit Korçë dhe ajo e Rrethit Skrapar, për veprat penale për të cilat është dënuar më pas me vendime të formës së prerë.