Presidenti Bujar Nishani priti dje në një takim ministrin e Jashtëm të Italisë, Angelino Alfano, i cili po zhvillon një vizitë zyrtare në Shqipëri. Presidenti Nishani shprehu mirënjohjen e Shqipërisë dhe shqiptarëve për ndihmën e madhe e shumë dimensionale që Italia dhe populli italian i kanë dhënë, veçanërisht pas viteve ‘90, për rimëkëmbjen ekonomike e sociale të vendit, pas dekadash izolimi nga diktatura. “Marrëdhëniet dhe lidhjet mes dy vendeve tona janë sa historike aq edhe kulturore dhe partneriteti ynë strategjik i ka të gjitha mundësitë dhe hapësirat për t’u zhvilluar dhe pasuruar më tej, si në nivel dypalësh ashtu edhe në atë evropian”, u shpreh Presidenti Nishani. Kreu i Shtetit shprehu në mënyrë të veçantë, mirënjohjen për mbështetjen shumë domethënëse e përmbajtjesore që Italia i ka dhënë Shqipërisë në kuadrin e procesit të integrimit evropian. Duke theksuar se, integrimi evropian mbetet projekti strategjik më madhor i shqiptarëve, Presidenti Nishani u shpreh se, “Italia ka qenë dhe mbetet një nga avokatet më të mira të Shqipërisë në këtë proces dhe kam shumë besim se kjo mbështetje do të vijojë edhe në të ardhmen”. Presidenti Nishani vlerësoi dhe përshëndeti gjithashtu angazhimin e Italisë në kuadrin e ruajtjes së vëmendjes së Bashkimit Evropian ndaj të gjithë rajonit të Ballkanit Perëndimor, si dhe shprehu besimin se në Samitin e Triestes, procesi i Berlinit do të pasurohet me projekte konkrete zhvillimore. Në këtë kontekst, Presidenti e konsideroi vizitën e ministrit Alfano në Shqipëri dhe rajon, si shprehje e qartë e vëmendjes së lartë që Italia i kushton këtij rajoni anëtarësimit të tij sa më të shpejtë në BE.

A.Shahini

Pavarësia e Kosovës si dhe Marrëveshja e Ohrit kanë qenë dy kërkesat e Lulzim Bashës dje drejtuar ambasadorit rus Aleksandër Karpushin në një takim të zhvilluar gjatë ditës së djeshme në selinë e Partisë Demokratike. Gjatë takimit, Basha iu përgjigj interesit të ambasadorit Karpushin mbi zhvillimet politike në vend. Karpushin nga ana e tij nënvizoi se parimi bazë i politikës së jashtme të Rusisë, të cilit i qendron edhe Ambasada Ruse në Tiranë, është parimi i mosndërhyrjes në punët e brendshme të vendeve të tjera. Basha dhe Karpushin shkëmbyen opinione edhe mbi zhvillimet në rajon. Basha theksoi se, njohja e Pavarësisë së Kosovës dhe mbështetja për zbatimin e plotë të Marrëveshjes së Ohrit në Maqedoni përmes aplikimit të dygjuhësisë nga Federata Ruse do të rihapnin një kapitull të ri në marrëdhëniet bilaterale. Ambasadori Karpushin theksoi se, Federata Ruse vlerëson se ekzistojnë mundësi të pashfrytëzuara për të rritur bashkëpunimin ekonomik pragmatik mes dy vendeve tona dhe shpreson se në të ardhmen të punohet për të rritur nivelin e këtij bashkëpunimi. Zoti Karpushin shprehu besimin se një impuls të fortë shkëmbimeve dypalëshe ekonomike do t’i japë takimi në muajin prill në Tiranë i bashkëkryetarëve të Komisionit Ndërqeveritar Rusi-Shqipëri për Tregtinë, Bashkëpunimin Ekonomik dhe Tekniko-Shkencor, si dhe sesioni i ardhshëm i këtij Komisioni që pritet të mbahet në vjeshtë, kur të formohet qeveria e re shqiptare. Basha dhe ambasadori Karpushin vlerësuan si konstruktiv një komunikim të tillë dhe vlerësuan se pikëpamjet e ndryshme në disa çështje nuk duhet të pengojnë përpjekjet për të eksploruar fusha të bashkëpunimit reciprok.

Kryetari i Partisë Demokratike, Lulzim Basha bashkë me aleatët opozitarë zhvilloi një tjetër drekë punë me ambasadorë të vendeve të BE ku është diskutuar mbi gjendjen e rënduar politike që ka përfshirë vendin ashtu si edhe qendrimin e opozitës për të qendruar deri në fund në betejën për krijimin e një qeverie teknike që do të garantojë zgjedhje të lira dhe të ndershme.  “Diskutuam për gjendjen politike në vend dhe bashkë me përfaqësuesit e tjerë të koalicionit opozitar, bëmë të qartë vendimin tonë për të mos u tërhequr nga beteja qytetare, nga beteja popullore për zgjedhje të lira dhe të ndershme, deri në realizimin e kushtit të vetëm të opozitës që është; një qeveri teknike me vullnet të gjerë politik për të garantuar zgjedhje të lira dhe të ndershme”, tha Basha. Kreu i PD tha se nga ana e amabasdorëve të BE pati optimizëm në lidhje me kërkesat e paraqitura nga opozita. “Për sa kohë më njihni, edhe si ministër i Jashtëm, nuk kam folur në emër të ambasadorëve, e s’mund të flas sot në emër të ambasadorëve. Qëllimi ishte një bashkëbisedim dhe ishte shumë i frytshëm, dashamirës, mbështetës për qëllimet europiane dhe europianizuese të qendresës, të lëvizjes tonë popullore. Unë, besoj edhe kryetarët e partive të tjera të koalicionit, ndahemi edhe nga kjo drekë me shumë optimizëm dhe akoma me më shumë vendosmëri për t’i shkuar deri në fund kauzës tonë”, u shpreh Basha.

Kryedemokrati Basha uroi dje nga Elbasani festën e Ditës së Verës. “Elbasani është zemra e traditës së mrekullueshme të Ditës së Verës. Sot jam shumë i lumtur që jam në mes qytetareve dhe qytetarëve të Elbasanit, por edhe shumë qytetarëve të tjerë të Shqipërisë që ndodhen këtu për të festuar Ditën e Verës. Nga zemra, i uroj çdo shqiptari e në veçanti elbasanllinjve: Gëzuar Ditën e Verës! Sjelltë shpresë për një të ardhme më të mirë për çdo shqiptare dhe çdo shqiptarë”, i pyetur nga mediat në lidhje me deklaratën e Ramës se çadra e lirisë po i shërben qarqeve të huaja, Basha tha: “Nuk do të merrem me komente broçkullash, se është Dita e Verës. Por dua t’iu uroj të gjithë shqiptarëve: Gëzuar Ditën e Verës! Dhe qoftë fillimi i punëve të mbara dhe mbarimi i punëve të nisura si rruga e “Elbasanit” dhe i punëve të tjera të mira, të shumta, që do të bëjmë së bashku për Shqipërinë dhe për gjithë shqiptarët”.

Eurodeputeti gjerman Manfred Veber deklaroi se është shumë i shqetësuar për situatën aktuale në Maqedoni, Bosnje e Hercegovinë dhe Kosovë. Ai paralajmëroi se Bashkimi Europian nuk do të zgjerohet me të paktën dhe për disa vjet.
Partia Popullore Evropiane (PPE), grupimi më i madh në numër në Parlamentin Evropian është e shqetësuar për gjendjen në Maqedoni, Kosovë dhe Bosnjë e Hercegovinë, si dhe për tërë Ballkanin. Kështu deklaroi kryetari i PPE-së në dhomën ligjdhënëse evropiane, Manfred Veber në raportim me gazetarët-korrespondentë në Parlamentin Evropian në Strasburg.
Sipas politikanit gjerman në krye të partisë më të madhe evropiane, PPE është veçanërisht e shqetësuar, sepse punët po keqësohen, tensionet rriten në Ballkan, veçanërisht Bashkimi Evropian nuk mund të premtojë diçka më shumë, duke e pasur parasysh se zgjerimi i Unionit nuk do të ndodhë vitet e ardhshme dhe sipas tij, “as në dekadat e ardhshme”.
“Ne jemi jashtëzakonisht të shqetësuar për gjendjen e Ballkanit. Kohë më parë, isha në Kroaci dhe diskutova me presidentin e tyre dhe me kryetarin e Parlamentit për gjendjen në rajon. Alarmante janë situatat në Bosnje Hercegovinë, Maqedoni dhe Kosovë. Punët atje po përkeqësohen. Jemi të shqetësuar për Ballkanin, sepse e konsiderojmë si pjesë të Evropës”, theksoi Verber.
Sipas liderit të demokristianëve evropianë në Parlamentin Evropian, problem i madh për vendet e rajonit ballkanik është ajo që BE-ja nuk ka çka t’ju ofrojë. “Zgjerim nuk do të ketë në vitet në vijim e ndoshta edhe në dekadat e ardhshme”, paralajmëroi Manfred Veber. Në raportimin me gazetarët në Strasburg, eurodeputeti gjerman theksoi se, veçanërisht e shqetëson zhvillimi i ngjarjeve në Turqi dhe sulmet ndaj vendeve anëtare të BE-së dhe në tërësi të BE-së. Kjo spirale e përshkallëzimit, sipas Veber, duhet të ndalojë dhe theksoi se Unioni në tërësi qëndron pas Holandës, duke porositur se ngjarjet me dhe rreth Turqisë nuk do të arrijnë ta ndajnë Evropën. Në këtë pikëpamje, për shkak të ngjarjeve vendore në Turqi, Verber në emër të Partisë Popullore Evropiane kërkoi që BE-ja t’i ngrijë negociatat inkuadruese me këtë vend, edhe pse theksoi se duhet të respektohet marrëveshja për parandalimin e fluksit të emigrantëve.

Kreu i Shtetit priti sot në një takim disa përfaqësues aktivë të Shoqërisë Civile dhe dëgjoi me vëmendje shqetësimet e tyre për dy çështje madhore, problematikat madhore të shfaqura në zonën arkeologjike të Durrësit me zbatimin e projektit ‘Vela’, si dhe shqetësimin e thellë të mundësisë së kalimit dhe asgjësimit, në territorin e Republikës së Shqipërisë, të një sasie të konsiderueshme të lëndëve kimike. Presidenti Nishani nënvizoi se, ligji dhe vetëm ligji është garantuesi i mirëfunksionimit të strukturave shtetërore dhe i mbështeti aktivistët në vijimin e punës së tyre qytetare e demokratike për një vend më të mirë e një shoqëri më të zhvilluar.