13.9 C
Tirana
E enjte, 15 Maj, 2025
type here...

Një libër për “çadrën e lirisë

Ky libër, qoftë kontributi im modest për çadrën e lirisë

Ndriçim KULLA

Një libër mund të shkruhet edhe shpejt, i frymëzuar nga një ngjarje e caktuar. Por mund të shkruhet edhe ngadalë, për shkak të rëndesës së temës që shtjellon. Në rastin e këtij libri, që merr për trajtim raportet dhe evoluimin e lirisë dhe demokracisë shqiptare, përgjatë gjithë këtyre viteve të tranzicionit, së bashku me të gjitha lidhjet shoqërore dhe sociale të sistemit tonë në vend, puna bëhet akoma dhe më e përgjegjshme. Janë në fokus dy prej fitoreve më të mëdha që mund të kemi arritur ndonjëherë si shtet, liria dhe demokracia. Kjo ka qenë ideja dhe nisma e vendosur përpara meje rreth dy-tre vite më parë, pikërisht atëherë kur në rendin e ditës ishte shtruar procesi i dekriminalizimit të politikës shqiptare. Askush nuk mund ta mendonte, e jo më ta besonte, se pas kaq shumë vitesh në liri, jeta jonë parlamentare të shfaqej kaq e njollosur nga krimi. Kishte vite të tëra që lëngonte nga intelektualiteti, ndershmeria dhe integriteti, por një prapakthim i tillë i frikshëm, të shtynte të vije në qendër të trajtimit edhe vetë demkracinë tonë parlamentare dhe partiake. Ishte më pas “legjitimimi”  i këtij regresi të madh nëpërmjet ligjit të miratuar të dekriminalizimit, shtysa e sprovave të para të tij. Kjo qe vërtet njëra nga “dhuratat” më të mëdha që Partia Demokratike mund t’i bëntë jetës politike dhe shoqërore shqiptare në tërësi, por njëherësh edhe pikënisja  e pikëpyetjeve të mëdha rreth mënyrës dhe mekanizmit të veprimit të atyre forcave që e sollën krimin në Parlament. Dyshimet të mëdha hodhën më pas filmimet e avionëve të rrëzuar në buzë të detit, se diçka ishte krisur rëndë edhe në mënyrën e funksionit të shtetit. Në një kohë që kudo trumbetohej për cikle reformash apo reformizëm të një lloji të paparë këtu e 25 vjet, imazhet e dhimbshme të të varfërve të burgosur e ngandonjëherë të vetë vrarë, më nxiti t’i zbërtheja në bazë të parimeve më të shëndosha të filozofisë politike dhe sociologjisë, gjithë përmbajtjen e këtyre reformave. Rezultati qe një Shqipëri e udhëhequr nga “njerëz pa cilësi”, me një gjuhë hipnotizuese si ajo që përshkruan Oruelli në librat e tij, dhe reformat e pambështetura në fillimet e tyre nga asnjë platformë intelektuale dhe të lëna më pas në fatin e tyre pa asnjë mbështetje sociale. Sprova të tjera u bashkuan me të parat në lidhje me reformën e aq shumë përfolur të drejtësisë, këtij guri themeli për të spastruar gjithë aparatin e sistemit të korruptuar shqiptar të drejtësisë, ndërkohë që prapa perdes së pushtetit vinin lajme të tmershme koncensionesh e tenderash pa garë dhe inskenime deputetësh që donin “të vrisnin” apo imagjinonin të vrisnin njëri-tjetrin. Padyshim, që tashmë demokracia parlamentare kishte marrë, e kishte rrokullisur pas vetes edhe demokracinë partiake, por intensiteti i zbulimit gati të përditshëm të ngjarjeve dhe të vërtetave deri atëherë të fshehura, e vendosi lirinë dhe demokracinë shqiptare që unë po trajtoja, në një krizë të thellë e të gjithanshme. Ishte pikërisht ai buletin i zi i lajmeve të kanabizimit kapilar të Shqipërisë, ky sistem piramide sociale, që mund të shkërmoqet akoma dhe më frikshëm se sa piramidat e dikurshme shqiptare, ajo që i vuri vulën dëshirimit tim për një analizë më të thelluar të një “quo vadios” jo vetëm të sistemit, por parësisht të njeriut shqiptar dhe ndërgjegjjes së tij. Kriza e tij e varfërisë, skamjes, por edhe e klientelizmit apo nepotizmit, u shfaq hapur edhe si krizë e besimit tek e sotmja dhe tek e ardhmja, sidomos në zgjedhjet lokale të Dibrës. Droga dhe fijet e saj të shumta qenë tendosur aq fort aq sa i  kishin zënë frymën edhe atij dinjiteti e ndërgjegjie kritike që gjithmonë e pat mbajtur gjallë individin shqiptar. Kriza, pra, e njeriut shqiptar dhe e tërësisë së “botëve të vogla” të njerëzve tanë kudo, në çdo vend, më solli në përfundimin se i gjithë sistemi ynë gjendet në një krizë mbi krizë, ndaj duhej hedhur edhe një kushtrim të argumentuar, intelektual, pse vallë liria dhe demokracia jonë janë në rrezik nëse në fron qëndrojnë ende krimi dhe kanabizimi i lidhur me politikën.
Ishte pikërisht “kauza e çadrës së lirisë”, që  vendos në fokus krijimin e një “republike të re”, që nis pikërisht me gurin e qoshes së ndërtesës së saj, zgjedhjet e lira e të ndershme, ajo që e përligji gjithë arsyetimin e këtij libri, se jemi në një periudhë vendimtare. Ka ardhur koha që shqiptarët të bëjnë atë që se kanë bërë ndonjëherë gjatë këtyre dy dekadave, pas rrëzimit të komunizimit. Ta shkruajnë vetë historinë, me dorën e votës së tyre. Nuk ka më as ekonomi e sistem shoqëror të udhëhequr nga parimi i durimit, por përkundrazi nga parimi i shpresës. Nuk duam më as udhëheqës, intelektualë apo Shoqëri Civile për të cilët njerëzit tanë të thonë që “s’kemi pasur fat që jemi drejtuar nga të tillë. Duam që ata të jenë kuintesenca e shpirtit të popullit shqiptar, i cili në thelb do liri e demokraci të vërtetë, integrim dhe ekonomi që të mos mbjellë aq shumë skamje çdo vit.
Do të doja të isha edhe më i shpejtë në të gjitha ato trajtime që kam përmbledhur në këtë libër, sidomos i nxitur nga intensiteti dhe qëndresa e përditshme e atyre njerëzve që tashme po mbush muajin. Veçse doja të isha edhe i paanshëm, aspak i skajshëm në gjykim, pavarësisht se rëndesa dhe fortësia e ligjërimit që kam shprehur mund të duket jo i tillë. Ka qenë pikërisht ky meraku im kryesor. Mos vallë jam shumë pesimist? Mos vallë gjërat nuk janë edhe aq keq sa thuhen? Çadra e lirisë m’i hoqi të gjitha dyshimet. Jemi në rrezik lirie dhe demokracie, vetëm se kjo thirrje e së vërtetës nuk është aspak diçka që e mbyt, por përkundrazi që e ngjall dhe e forcon shpresën. Ndaj, do të doja të përfundoja me shprehjen, “udhë të mbarë, o rrugëtim i shpirtit të lirë shqiptar kah realizimit të kësaj kauze”. Ky libër, qoftë kontributi im modest për këtë çadër.

Rama e Veliaj presin shiritat e projektit-Basha me Pazarin e Ri

Më 16 prill të 2015, Lulzim Basha dhe Michael Granof – Presidenti i Fondit shqiptaro-amerikan të Ndërmarrjeve, në një konferencë shtypi, lajmëruan përfundimin e projektit të Pazarit të Ri, duke publikuar dhe fotot përkatëse se si do të transformohej kjo hapësirë tregtare dhe publike.
Një projekt të rëndësishëm transformues dhe me financim të siguruar dhe parashikuar nga administrata Basha. Ky ishte vetëm njëri prej tyre, një tjetër ishte Bulevardi i ri e Lumi i Tiranës, terminali multimodal, dhjetëra rrugë, shkolla, kopshte e çerdhe.
Kjo natyrisht është mendësi dhe praktikë e re mbi bazën e të cilës duhet të punojë çdo qeverisje vendore apo qendrore që ka në fokus qytetarin dhe zhvillimin.
Në fakt deri tani, “Rama Junior” s’po bën gjë tjetër vetëm zbaton projektet e administratës Basha dhe po përfundon ato që u bllokuar turpshëm gjatë dy viteve të qeverisjes së Rilindjes.
Në kontrast me këtë, Kaposhi Rama që kapardiset sot, iku si bandit nga Bashkia: nuk la as edhe një copë letër të bardhë në tavolinat e punës, se për projekte, investimet, punë në proces apo fonde të siguruara e financime nga arka e Bashkisë, nuk bëhej fjalë. Iku dhe la pas gropën në Sheshin Skënderbe që ishte kthyer në makth për qytetarët, la tonelata plehra nëpër hapësira publike siç ishte ajo pas Pallatit të Kulturës, e cila u shndërrua në një lulishte për qytetarët apo hapësira e mbetjeve tek Policia Bashkiake tejet e rrezikshme për jetën qytetare, hapësirë e shndërruar po kështu në lulishte nga administrata Basha.
Kontrasti sot është i qartë mes njeriut që punon për qytetarët dhe atij që punon për vete. Rama iku nga Bashkia me një pasuri të pallogaritshme për vete, Basha u largua duke lënë pas investime të kryera, të nisura, në proces, të projektuara dhe me sigurim të financuar që do të ndryshojnë të sotmen dhe të ardhmen e kryeqytetit të shqiptarëve.
Gëzuar Ditën e Verës, edhe për gënjeshtarët!

Mbetjet toksike, sëmundjet kancerogjene janë dyfishuar

Lulzim Basha, kreu i Partisë Demokratike bëri dje një paralajmërim serioz: “Miq, gazetarë nga SHBA, mbrëmë njoftuan se janë shumë afër zbulimit të skandalit të plehrave që mafia ka zbuluar në Shqipëri. Nëse këto fakte shpalosen ashtu siç janë zbuluar, nëse këto fakte janë të vërteta, atëherë ai atje duhet të zbresë dhe t’u shpjegojë shqiptarëve përse zbritën këto mijëra tonë helme që mund të kenë filluar që tani të helmojnë bukën, ajrin e shqiptarëve”, tha ai. Më tej shtoi, se në ditët dhe javët në vazhdim do të jenë përcaktuese për zbardhjen e këtij megaskandali siç e quajti ai, dhe se kemi të bëjmë me një genocid ndaj shqiptarëve. Dhe s’kish si ndodhte ndryshe. Rama nuk mund të lerë pa hyrë në një industri që qarkullon më shumë se 213 miliardë euro në vit, siç është ajo e depozitimit të mbetjeve toksike. Nga ky trafik vendi fqinjë Italia përfiton rreth 22 miliardë. Në Shqipëri, sipas mediave italiane janë groposur apo djegur diku mes 28-32 mijë ton mbetje toksike, ku për një sipërfaqe sa kjo e jona është një shifër vërtet e frikshme.

Dyfishimi i sëmundjeve kanceroze

Në rast se skandali vërtetohet atëherë, zbardhet dhe misteri përse shqiptarët po sëmuren çdo ditë e më shumë nga kanceri. Një kancer i një lloji të veçantë të ngjashëm me simptomat që zbulohen tek ata persona që jetojnë dhe punojnë në vende me përqendrim të lartë rrezatimi. Raportime vijnë ngado dhe duket sikur kanceri është shndërruar në një epidemi. Aq shumë është shtuar ky fenomen, sa pritet të kalojë dhe numrin e vdekjeve që vijnë si pasojë e sëmundjeve kardiovaskulare të zemrës. Nga të dhënat e hulumtuara nga gazeta “Shëndeti”, rezultonte se në vitin 2015, numri i personave që prekeshin nga sëmundjet kanceroze kish kaluar shifrën 5 mijë, ose rreth 2 mijë persona më shumë se në vitin 2013. Atëherë çfarë ka ndodhur që shqiptarët, po vdesin me ritme të shpejta. Çfarë ka ndodhur që, spitalet tona po diagnostikojnë çdo ditë e më shumë të prekur nga sëmundjet kanceroze? Shifrat tregojnë vetëm rritje, ndërkohë që duhet të ishte e kundërta. Industria po mbyll dyert çdo ditë e më shumë, pra ndikimi i tymrave në ajër po reduktohet jo për meritë të qeverisë, por për shkak të krizës! Gjithsesi frika e sëmundjeve të këtij lloji vazhdon të rrethojë shqiptarët.

Rastet e leuçemisë

Veç të tjerave provë është dhe shtimi me ritme të shpejta të sëmundjes së leuçemisë. Mjekët akuzojnë faktorët ambjentalë për shtimin e përvitshëm të sëmundjeve malinje të gjakut. Sipas tyre një qytetar që jeton pranë zonave urbane, industriale dhe atyre minerare të ndotura nga çlirimet e gazrave, është më i riskuar të preket nga sëmundjet kanceroze të gjakut, se ai që jeton në zona të qeta rurale. Kjo demonstrohet edhe në Pavionin e Hematologjisë në QSUT, ku të prekurit vijnë nga 10 pikat më të ndotura të Shqipërisë. Faktorët e riskut që akuzohen më shumë për sëmundjet malinje të gjakut janë ndotja ambjentale. Një përqendrim më  i madh haset në zonat që kanë afër industrinë e përpunimit të naftës të pasura me benzin apo ato që kanë hidrokarburet, zonat pranë minierave, si psh në Elbasan, Laç ku ka qenë Uzina e Superfosfatit, në Pogradec, ku kanë qenë 50 miniera. Vargu i Dibrës dhe Kukësit, si zonë minerare, Fieri dhe Lushnja si zona naftëmbajtëse. Incidencën më të madhe e ka Tirana, por kjo është relative, pasi shumica kanë migruar në Tiranë. Në zyrën e statistikave të QSUT, për shërbimin e Hematologist, të prekurit nga sëmundjet malinje të gjakut kanë si vendlindje 10 pikat më të ndotura të Shqipërisë, ndërsa vendbanim Tiranë. Brenda një viti regjistrohen rreth 200 raste të reja me sëmundje malinje të gjakut dhe incidenca shkon nga 3 deri në 5 për 100 mijë banorë. Nga këto vetëm 5% i përkasin trashëgimisë genetike shpesh pacientët të mbeten pa trajtimin e duhur sipas protokollit.

Pasojat katastrofike

Specialistët thonë se në rast se 32 mijë tonë mbetje kimike, do të groposeshin apo asgjësoheshin në një vend me sipërfaqe 28 mijë kilometra katrore, atëherë pasojat do ishin katastrofike. Një sasi e tillë helmi, qoftë nga asgjësimi me djegie, qoftë me groposje do sillte pasoja të parikuperushme në organizëm. Shqipëria është jo pak e ndotur dhe pa marrëveshjet me mafian e plehrave. Prokuroria e Përgjithshme ka nisur një hetim për këtë çështje, nëse ato 1300 konteinerë kanë kaluar nëpër Shqipëri. Lajmi i nxjerrë nga “Pianeti Italia”, u mundua që fillimisht të injorohej nga mediat pranë Ramës, më tej konsullja jonë në Milano, do të shantazhonte gazetën. Por, pas “Pianeta Italia” investigimet i kaluan gazetës më të vjetër  italiane “Roma”, ndërsa më pas, lajmi do jepej dhe në CNN apo Reuters, megjithë pretendimet Ramës, apo zyrës së tij të shtypit të cilët mundoheshin ta injoronin apo kundërshtonin këtë fakt. Gjithsesi hetimet në shtetin fqinj kanë filluar dhe tashmë mbetet të shihet se sa i shtrirë është ky fenomen, dhe ku janë zonat që janë groposur mbetjet kimike.

Denis Dyrnjaja ngre alarmin: Kush po i vret shqiptarët

Duke folur për sëmundjen e kancerit dhe problemet e shëndetësisë në Shqipëri, gazetari i Denis Dyrnjaja ka rrëfyer një histori. Një 40-vjeçar i cili nuk mundi të fitonte betejën me sëmundjen e tmerrshme, kancerin. Sipas gazetarit, mjekët onkologë italianë ndërsa përpiqeshin të ndryshonin fatin e jetës së tij kishin konstatuar se ai kishte rrezatim të lartë radioaktiv në trup.
“Ishte te 40-at. Ndoshta kishte arritur të fitonte betejat më të rëndësishme në jetë, por nuk fitoi dot betejën më të rëndësishme, atë për jetën. Jo për fajin dhe shkakun e tij në fakt. Kanceri e mundi. Por ky nuk është më lajm për shqiptarët. Mjekët onkologë italianë, ndërsa përpiqeshin të ndryshonin fatin e jetës së tij kishin konstatuar se ai kishte rrezatim të lartë radioaktiv në trup.
Dhe e pyetën: punon në ndonjë fabrikë apo jeton pranë ndonjë zone me rrezatim dhe përgjigja që morën i habiti. Punoj në një bankë në qendër të Tiranës. Ata thanë se nga Shqipëria po kurojnë raste me lloje të rrallë kanceri. Kush po i vret shqiptarët, pa luftë, por me një bilanc lufte çdo vit? Ushqimet, ajri i ndotur, uji i pijshëm, produktet e tjera të konsumit të përditshëm, ilaçet e dyshimta, materialet që përdoren për ndërtimin e banesave ku jetojmë, antenat celulare që na rrethojnë ngado?! Por derisa s’ka kush t’iu japë një përgjigje të bazuar dhe provuar siç duhet këtyre pyetjeve do vazhdojmë të presim e të shohim njëri-tjetrin si vdesim”, shkruan gazetari.

Ku mund të jenë fshehur mbetjet toksike?

Në Shqipëri numërohen rreth 700 mijë bunkerë dhe tunele të kohës së komunzimit. Shumë prej tyre, janë përdorur nga diktatura, për të magazinuar LHL (Këndë helmuese luftarake), por sërish këto sdo të mjaftonin për të depozituar të gjithë arsenalin prej 28  mijë tonësh. Ish-Kryeministri Berisha në dy statuse të tij ka dhënë dhe dy versione ku mund të jenë groposur mbetjet, për të cilat flet media italiane. “Tronditje e madhe e banorëve të fshatrave rreth malit Shpirag, pasi ata kanë të dhëna se: – në tunelet, bunkerët dhe galeritë e asaj zone dhe zonave përreth janë groposur helmet kimike dhe lëndët radioaktive të ardhura nga Italia – banorët e zonës kanë parë në fundin e gushtit fillimin e shtatorit 2016 autokollona kamionësh të shoqëruara nga ushtria! I bëj thirrje Prokurorisë së Shtetit të hetojë me përgjegjësinë më të madhe këto informacione tronditëse “Përshëndetje zoti Berisha. Unë jam pedagog universiteti desha të ju informoj se banorët e fshatrave pranë malit Shpirag janë shumë të tronditur mbasi ata kanë dyshime shumë të forta që një pjesë e konteinerëve me helme kimike dhe radioaktive nga fundi i gushtit dhe fillimi i shtatorit mund të jenë futur në tunelet e komunizmit. Po në këtë periudhë ka banorë që thonë se kanë konstatuar lëvizje shumë të dyshimta komionash të huaj dhe autokollonash të shoqëruara nga ushtria”, shkruan kryeministri në postimin e tij të datës 9 mars 2017. Më vonë në një tjetër postim, Berisha shpreh shqetësimin e një banori të Prrenjasit, i cili flet për lëvizje konteinerësh në galeritë e braktisura të krimit atje.

Erjona Rusi: Çfarë dreqin po na vret

Është kjo pyetja që na lind të gjithëve, kur dëgjojmë për aq shumë raste të sëmundjeve me kancer. Të njëjtën pyetje ka shtruar edhe gazetarja Erjona Rusi, e cila, duke marrë shkas nga rrëfimi i kolegut të saj, Denisa Dyrnjaja për ndarjen nga jeta të mikut të tyre të përbashkët, ngre të njëjtin shqetësim: çfarë dreqin po na vret? Dje, takova pas kaq vitesh shokët e gjimnazit, por nuk u mblodhëm për mirë, por për mort, sepse përcollëm Ilirin, një shok, një djalë të mrekullueshëm, gjithmonë buzagaz e të çiltër që kanceri i mori jetën ende pa e filluar mirë e pa i dhënë mundësinë as të shohë dy fëmijët e tij që po vijnë në jetë. Një tragjedi nga ato që të lë të mekur. Por pse po e ndaj me ju që nuk patët fatin ta njihnit Ilirin? Sepse ka diçka që po na vret pak nga pak të gjithëve. Mjekët në Itali janë të çuditur me rastet e sëmundjeve kancerogjene që mbërrijnë nga Shqipëria. Sot lexova shkrimin e kolegut Dyrnjaja dhe kuptova se kam njësoj si ai një pyetje: çfarë dreqin po na vret? Flitet për rrezatim të lartë, për miell jashtë standardeve e për shumë e shumë të tjera. Po a s’kemi të drejtë të dimë vërtetë se çfarë po ndodh me jetët tona? Përse nuk flasin ekspertët, përse ka vdekur kërkimi shkencor që të tregojë arsyet e vdekshmërisë së lartë tek moshat e reja dhe llojet e sëmundjeve kancerogjene që po na vrasin, që të kuptojmë shkaqet e të dimë të ruhemi, apo të paktën të ruajmë fëmijët tanë?

202 euro taksë për çdo fluturim nga Rinasi, çmimi i biletave drejt rritjes

Jo vetëm që aeroporti i Rinasit nuk ka konkurrent, pra është i vetmi operator në vend, por edhe shteti vetëm i rrit taksat nga viti në vit. Kështu, Albcontol ka nisur nga janari të vjelë tarifë fikse më të lartë për çdo fluturim, që niset nga Aeroporti Ndërkombëtar i Tiranës. Sipas njoftimit të publikuar nga Eurocontol vihet re se pagesa është dukshëm më e lartë se ajo që është aplikuar gjatë vitit 2016. “Taksimi për pagesën mbi terminalin për çdo fluturim që niset nga Aeroporti Ndërkombëtar i Tiranës për vitin 2017 është 202 euro. Norma e interesit për pagesat e vonuara të detyrimeve të terminalit është 9.88%. Pagesat duhet të bëhen vetëm në euro. Organizata Eurocontol është e ngarkuar në mbledhjen e pagesave të terminalit në emër të Albcontol”, thuhet në njoftimin e Eurocontol. Kjo tarifë vitin e kaluar ishte 158.7 euro, ndërkohë që norma e interesit për pagesat e vonuara ka qenë më e lartë, konkretisht në 10.06 për qind. Edhe pse 1 vit më parë ndryshoi marrëveshja e TIA me qeverinë shqiptare dhe u lejua të ndërtohej një aeroport i ri në Kukës, ende nuk është bërë asnjë hap nga qeveria në këtë drejtim. Me ndërtimin e një aeroporti të ri në vend, do të rritej konkurrenca dhe për pasojë do të kishim bileta më të lira. Aksionet e Aeroportit Ndërkombëtar të Tiranës (TIA) që nga tetori i 2016 janë blerë nga një kompani kineze me bazë në Hong Kong.

Çmimi i biletave 4-fish më i lartë se vendet e rajonit

Të udhëtosh me avion nga Shqipëria drejt Europës të kushton jo vetëm shumë më shtrenjtë se nga Maqedonia apo Mali i Zi, por edhe alternativat janë më të pakta. “Monitor” ka bërë një “udhëtim virtual” nëpër Europë, duke krahasuar biletat vajtje-ardhje për disa destinacione kryesore. Për krahasim janë marrë variantet më të lira të biletës, të rezervuara në faqet përkatëse të internetit të kompanive ajrore (pa bagazh dhe opsione të tjera shtesë).
Nga Shqipëria drejt Evropës, biletat janë minimalisht 50% më të shtrenjta, edhe kur bëhet fjalë për të njëjtët operatorë, për shembull, me Austrian Airlines. Në destinacionet që në aeroportet e Shkupit e Podgoricës operohen nga kompani low cost, si Milano, Venecia, Londra, qytetet e Gjermanisë, çmimet nga Rinasi janë disafish më të shtrenjta. Sidomos në Maqedoni, biletat janë të lira për disa arsye. Në të ka operatorë low cost si Wizz Air; shteti subvencionon kompanitë; dhe taksat aeroportuale janë më të lira se në Shqipëri. Nga Shkupi për shembull, mund të gjesh biletë vajtje-ardhje edhe më pak se 100 euro për disa destinacione (65 euro në Milano e Bruksel, Berlin 70 euro apo 85 euro në Paris e Venecia), ndërsa në Shqipëri tarifa minimale për një biletë tashmë është mbi 150 euro nga operatorët low cost (Blue Panorama) dhe mbi 250 euro nga operatorët e tjerë, AlItalia, Austrian Airlines, Lufthansa, që ofrojnë pjesën më të madhe të destinacioneve. Në Podgoricë veprojnë dy operatorët low cost, Ryan Air dhe Easy Jet, nga të cilët mund të gjesh alternativa të lira, sidomos për kthimin nga Londra (më pak se 50 euro).

Varfëria, s’ka para, bie konsumi, janë 57 miliardë lekë më pak

Të ardhurat në buxhet nga Tatimi mbi Vlerën e Shtuar, një tregues direkt i qarkullimit të mallrave në ekonomi dhe tendencës së konsumit, kanë shënuar rënie në janar të këtij viti.
Sipas statistikave fiskale të janarit, të publikuara nga Ministria e Financave, TVSH solli në buxhet 10.1 miliardë lekë me një rënie prej 135 milionë lekësh ose 0.5% më pak se e njëjta periudhë e një viti më parë.
Rënia ka ardhur tërësisht nga TVSH që mblidhet në tregun e brendshëm të ardhurat nga e cila ishin 264 milionë lekë ose 4.4% më pak se e njëjta periudhë e një viti më parë, duke zbritur në 5.77 miliardë lekë. Në të kundërt, TVSH në dogana (nga mallrat e importit) u rrit me gati 8%.
Në total, të ardhurat tatimore në janar ishin 30.9 miliardë lekë, me një rritje prej 3.8% në raport me muajin e parë të vitit të kaluar. Zëri që ka “shpëtuar” tatimet e doganat është ai i taksave nacionale dhe të tjera, që është zgjeruar me 28% apo 858 milionë lekë (si rrjedhojë e rritjes së çmimeve të karburanteve e të tjera në tregjet ndërkombëtare), duke neutralizuar rënien e të ardhurave nga TVSH dhe sidomos nga tatimi mbi të ardhurat personale (këto të fundit ranë me 160 milionë lekë apo gati 5%). Edhe tatim fitimi, që vitin e kaluar kishte një rritje të ndjeshme dyshifrore, në janar kishte një zgjerim minimal prej 4%.
Të ardhurat në total në buxhet për janarin u rritën minimalisht me vetëm 0.2% si rrjedhojë e performancës së dobët të të ardhurave jo tatimore, teksa institucionet buxhetore derdhën gati 700 milionë lekë në buxhet. Të ardhurat nga fondet speciale (kryesisht sigurime shoqërore e shëndetësore) u rritën dhe ato minimalisht me 2.8%.
Në raport me planin, të ardhurat në total ishin 1.7 miliardë lekë më shumë, megjithatë plani i janarit 2017 ishte më i ulët sesa fakti i 2016.
E ndryshme ka qenë sjellja në kahun e shpenzimeve. Teksa vitin e kaluar financat e mblodhën dorën, duke rritur të ardhurat me ritme më të larta se shpenzimet, në janar shpenzimet u rritën me 5.1%, si rrjedhojë e harxhimeve më të larta për fondin e pensioneve dhe zgjerimin e investimeve kapitale me 27%.
Pavarësisht se shpenzimet u rritën me ritme më të larta se të ardhurat, financat sërish rezultuan me një sufiçit buxhetor prej 7.8 miliardë lekësh, ndonëse ai ishte 1.1 miliardë lekë më i ulët se janari 2016.

Raporti: Integrimi për Ballkanin Perëndimor, i vështirë

“Pa besimin te sundimi i ligjit, investitorët e huaj do të ngurrojnë që të investojnë”. Kështu thuhet në raportin e hartuar për Ballkanin Perëndimor (referuar Shqipërisë) sa i përket ndërlidhjes me Bashkimin Europian të realizuar nga “Friends of Europe”. Në këtë dokument thuhet se për vendet e Ballkanit Perëndimor integrimi në BE do të jetë një proces më i gjatë dhe më i vështirë në krahasim me vendet e tjera të Ballkanit edhe pse do të shoqërohet me aspekte pozitive siç është anëtarësimi, modernizimi i ekonomive, qeverisjeve dhe shoqërisë. Sipas raportit, tre duhet të jenë aspektet ku duhet të fokusohen gjashtë vendet e Ballkanit Perëndimor. E para që ka të bëjë më shumë me qeverinë ka të bëjë me reformën në drejtësi dhe te institucionet qeverisëse. Mungesa e të cilave, thuhet në raport “bizneset e huaja do të ngurronin të investonin”. Në këtë dokument thuhet se biznesi ka nevojë për lidhje më të mirë të transportit, për përmirësim të IT-së, gjë e cila do të përmirësonte ndërlidhjen mes vendeve të Ballkanit, do të rriste vendet e punës te të rinjtë, të cilët vuajnë normën e lartë të papunësisë. Edukimi, thuhet në raport duhet të jetë një tjetër prioritet për t’u mundësuar të rinjve aftësimin, si dhe të angazhohen më shumë në ekonominë globale.

Rama në panik: Po humbëm na pret burgu

Rama ka kërkuar fitore me çdo kusht në zgjedhje duke paralajmëruar se në rast të kundërt i “pret burgu”. I trashur nga zullumet e shumta në këto tre vite dhe i trembur nga ajo se çfarë mund ta presë nga një drejtësi e pakapur prej tij, Rama ka shfaqur dje në mbledhjen e Kryesisë shenja paniku. Ndryshe nga arroganca e fjalimeve të mëparshme, Rama ka filluar të belbëzojë. Fjalët nuk janë të plota, goja i dridhet, batutat ofenduese dhe arroganta i ka harruar. Të gjithë këto shenja jo vetëm të një pasigurie që Rama ka, por edhe  të një dëshpërimi. Kreu i qeverisë kërkon mbajtjen e pushtetit me çdo kusht vetëm që të mos përballet me drejtësinë. Korrupsioni i përhapur në të gjithë sektorët, sikurse thotë Departamenti i Shtetit, koncesionet qindramiliona euro për klientelën dhe vëlla Olsin, tenderat me prokurim të drejtpërdrejtë dhe me fondin limit janë aty dhe Rama e di këtë. Janë aty për t’u gjykuar nga Drejtësia e Republikës së Re, e cila do të funksionojë e pakapur nga lobingjet që tashmë mund të konsiderohen të dështuara të Ramës. Kreut të organizatës kriminale i ka rënë projekti për të kapur drejtësinë dhe tani ka mbetur si peshku pa ujë. Ai është afër ngordhjes. Deklarata e tij e djeshme në mbledhjen e Kryesisë së PS janë të mjaftueshme për të kuptuar se përse ai nuk pranon të lërë pushtetin me zgjedhje të lira. Atë e trembin zullumet dhe e di që e pret burgu.

Raporti për mbledhjen e PS

Kryeministri Rama në mbledhjen e djeshme të Kryesisë së PS-së ka kërkuar mobilizim nga të gjithë anëtarët e kryesisë, për fushatën që pritet të nisë pas pak javësh. Siç raporton “GSH.al”, Rama ka bërë një deklaratë të fortë për të trembur ministrat e tij. “Krahu tjetër nuk e do reformën, e ka treguar edhe përmes çadrës që ka vendosur aty në bulevard. Mos u habisni që edhe para zgjedhjeve edhe pas zgjedhjeve të ketë sulme dhe hakmarrje të prokurorëve dhe gjyqtarëve. Dihet që ata nuk e duan reformën”, thonë burimet e kryesisë së PS për “GSH”. “Nëse nuk do të jemi në drejtim të vendit edhe pas 18 qershorit, ta dini se ju do të jeni të parët që do të paguani hakmarrjen e gjyqtarëve dhe prokurorëve. Ne e kemi ndërtuar filozofinë tonë të drejtimit mbi reformën në drejtësi dhe do të bëjmë çmos që ajo të realizohet e zbatohet”, mësohet të ketë thënë Rama. Kjo fjali është interesante se tregon pozicionin ku e ka vendosur veten mazhoranca përballë sistemit të drejtësisë. Duke qenë se ajo synon të shkundë nga themelet të gjithë sistemin, është e ndërgjegjshme se të gjithë prokurorët dhe gjyqtarët aktualë do ta shohin “me lupë” punën e saj, nëse nuk do të jetë në ekzekutiv. Kjo frazë dëshmon gjithashtu edhe ndërgjegjësimin se drejtësia sot është e mefshtë sepse ka frikë nga ekzekutivi dhe se në një situatë tjetër ajo do ta bënte ndryshe punën e saj. Burimet shtuan se kryeministri është shprehur në mbledhjen e kryesisë që çadra le të merret me 18 shkurtin, ne do të merremi me 18 qershorin. Po kështu, kreu i qeverisë ka kritikuar një pjesë të faktorit ndërkombëtar që sipas tij “kanë ngrehur çadrën e opozitës dhe që nuk janë miq të qeverisë e Shqipërisë”.

Rama në hotelin e Klement Balilit, i filmuar nga kamerat

Edi Rama është filmuar në skena erotike në ambientet e Santa Quarantës! Ka qenë kjo dëshmia e gazetarit Artan Hoxha menjëherë pas shkarkimit të Saimir Tahirit nga ministër i Brendshëm, deklaratë që është mbështetur më pas dhe nga ish-Kryeministri Sali Berisha. Në statusin e tij, gazetari Hoxha shprehet se në serverin e kamerave të sigurisë të Santa Quarantës nuk do të dalë askush prej ministrave të shkarkuar, por do të dalë pikërisht kreu i qeverisë Edi Rama. Artan Hoxha njihet për lidhjet e tij të ngushta me Policinë e Shtetit. Menjëherë pas kësaj deklarate, me anë të një postimi ka reaguar dhe ish-Kryeministri Sali Berisha, i cili është shprehur: “Të dashur miq, sonte (të dielën) në darkë Saje qorri, nëpërmjet një gazetari me afinitet të madh me policinë, denoncoi, pa kaluar 24 orë nga shkarkimi, Edvin Kristaq Ramën si personin që është filmuar në skena erotike në Santa Quaranta dhe për rrjedhojë është peng i Balilit. Qytetarë, ky denoncim klamoroz i Saje qorrit ndonëse pas shkarkimit të tij, dëshmon se Ediskobari është peng i Eskobarit të Ballkanit dhe kjo përbën dëshminë më të rëndë të gjendjes katastrofale ku është katandisur Shqipëria! Vetëm revolucioni demokratik që vazhdon fitimtar prej 22 ditësh do të shpëtojë Shqipërinë”, thotë Berisha. Skandali i hyrje-daljeve të krerëve të qeverisë në hotelin e Klement Balilit me të dashurat e tyre u denoncua fillimisht nga ish-ministri i Drejtësisë, Ylli Manjani, menjëherë pas shkarkimit të tij nga detyra. Por në rast se është e vërtetë ajo që thotë Hoxha, atëherë kjo tregon jo vetëm anën morale të qeverisë, por edhe diçka tjetër, faktin që Edi Rama i mban kontaktet të drejtpërdrejta me krerët e drogës. Po ashtu dhe trafikantët në krye të dikastereve janë vendosur me urdhër të tij direkt dhe kjo dëshmon dhe pafuqinë e organeve shtetërore për të goditur këtë fenomen. Pra, është e qartë se heqja e Saimir Tahirit nuk zgjidh asgjë në këtë mish mash droge të sajuar nga vetë kreu i qeverisë. Aq më pak vendosja në krye të një tjetër personi, të lidhur ngushtë me narkotrafikun pritet t’i japë një hov akoma më të madh kultivimit dhe trafikimit të saj në këto prag zgjedhjesh. Nga ana e tij ish-Kryeministri ka bërë publik dhe një tjetër fakt në lidhje me ministrat e shkarkuar. Sipas tij shkarkimi ka ardhur pikërisht për t’u mbyllur gojën, pasi në rast se ata bëjnë publike dosjet e korrupsionit që kanë në dorë rreth tij, atëherë denoncimet e Manjanit do të ishin “thjesht një kafe” përpara skandalit që do të plaste.

Hakmarrja për Drejtësi hoqi Tahirin si ministër

Kryetari i Partisë Demokratike, Lulzim Basha deklaroi mbrëmë në një intervistë në “Opinion” se largimi i Tahirit si ministër i Brendshëm ka ardhur pas një lufte mes krimit në qeveri. Rama ka larguar Tahirin për t’i dhënë Ministrinë e Brendshme terroristëve të Hakmarrjes për Drejtësi.
Basha deklaroi se opozita nuk lëviz nga vendimi i saj i deklaruar, ajo kërkon qeveri teknike dhe jo kokën e disa ministrave.
Kreu i opozitës, tregoi se largimi i atyre ministrave ka ardhur si pasojë e qeverisjes së Shqipërisë nga rivaliteti mes bandave.
Basha tha se është fakt se në Shqipëri nuk qeveriset nga politikanë të mirë dhe të këqinj, por nga bandat rivale mes tyre.
Ai tregoi se Edi Rama nuk qeveris me platformë politike, por me një filozofi bandash.
“Është zëvendësuar përfaqësuesi i një bande me një bandë tjetër. Është zëvendësuar me bandën e Hakmarrjes për Drejtësi”, tha Basha.
Basha theksoi se nuk ka pasur asnjë marrëveshje për t’u tërhequr nga protesta, e vërteta e hidhur është se largimi i ministrave të kabinetit ishte rezultat i përplasjes mes bandave, dy ministrat Klosi dhe Çuçi, erdhën si pasojë e konfliktit mes dy bandave që përfaqësohen nga Tahiri dhe Xhafaj, dy ministrat e tjerë janë gjethe fiku.
Teksa Rama ka deklaruar se protesta e Opozitës po mbështet nga disa  qarqe të huaja të cilat sipas tij nuk janë miq të Shqipërisë, Basha në një lidhje direket në emisionin Opinion, i është përgjigjur, duke i konsideruar këto përralla. Ai ka mohuar se PD ka kontakte me qarqe Ruse për të diskutuar fatet e Shqipërisë.“Këto i thotë njeriu që deshi të bëhej diktator por që shqiptarët ja prishën ëndrrën. Në këtë çadër kanë qenë përfaqësues të partive tona simotra të Kristian Demokratve të Angela Merkel, të republikanëve të Donald Trump, të partive të djathta  italiane, prandaj përrallat me armiq të jashtëm ti bëj përshesh dhe ti haj vetë. Unë sot kam patur një takim me ambasadorin e Rusisë, një takim publik, është një takim në kuadrin e një kontakti normal që PD ka me gjithë përfaqësuesit e huaj në Shqipëri. Kontakte me qarqe të huaja që të diskutoj fatet e Shqipërisë PD nuk ka dhe nuk do të ketë”, është shprehur Basha.

Blendi Fevziu: A ishit në dijeni ju se Rama do zëvendësonte Tahirin dhe më pas tre ministra të tjerë?
Lulzim Basha: E mora vesh në momentin kur filloi të qarkullojë lajmi.
B.F: Ka pasur një lajm se mes jush dhe zotit Rama ka pasur një marrëveshje, që Rama të largonte Tahirin dhe Beqajn dhe ndoshta dy-tre ministra të tjerë dhe ju të ngrinit çadrën e protestës?
L.B: Të ngrejmë çadrën e protestës për t’u futur në Kryeministri, e ke fjalën?
B.F: Si për t’u futur në Kryeministri?
Çadra e protestës nuk ngrihet pa qeveri teknike dhe pa largimin e Edi Ramës. Ky është një vendim i marrë dhe i shpallur. Këto që thuhen janë broçkulla dhe jo lajme. Këto nuk fshihen me ndryshimet në qeveri.
B.F: E thënë ndryshe, a ja u solli kokën e Tahirit dhe Beqajt në tavolinë që të mbyllnit protestën?
L.B: Janë broçkulla. E thashë njëherë këtë.

Faqja e pare

Prokuroria kërkesë KQZ: T’i hiqet mandati i Kryebashkiakut Tërmet Peçi dhe Zotkës

Kryeprokurori Adriatik Llalla i ka bërë kërkesë KQZ-së për heqjen e mandatit të kreut të Bashkisë së Tepelenës, Tërmet Peçi dhe kreut të Bashkisë së Poliçanit, Adriatik Zotkaj. Këtë deklaratë, Prokurori i Përgjithshëm e bëri nga Gjirokastra ku ishte i pranishëm në analizën vjetore të Prokurorive. Llalla u shpreh për mediat se, rezulton se, këta dy drejtues bashkish nuk kanë deklaruar dënime, të cilët mund t’u hiqnin atyre të drejtën për ushtrimin e profesionit, në kuadër të ligjit për dekriminalizimin.
“I janë dërguar KQZ-së vendimet e konstatimit për ndërprerjen e mandatit për kryebashkiakët e Tepelenës dhe Poliçanit, pasi rezulton se nuk kanë deklaruar dënimet, të cilët përfshihen në sferën e ndalimit për ushtrimin e funksionit, në kuadër të ligjit për dekriminalizimin”, u shpreh Llalla.
Kryeprokurori tha më tej se, ndaj Tërmet Peçit dhe Adriatik Zotkajt, ka nisur tashmë procedimi për falsifikim dokumentesh. “Dekriminalizimi duhet të zbatohet para fushatës zgjedhore të qershorit 2018”, tha Llalla. Nga ana tjetër, ai lëshoi një mesazh të qartë për zbatimin e ligjit të dekriminalizimit, se çdo zyrtar i inkriminuar do të goditet.
Në fjalën e tij para prokurorëve të Gjirokastrës, kryeprokurori Llalla ngriti shqetësimin për fenomenin e kultivimit të kanabisit dhe trafikimit të lëndëve narkotike. Kryeprokurori tha më tej se, një ndër temat më shqetësuese vijon të mbetet kultivimi dhe trafikimi i lëndëve narkotike. “Procedimet penale për korrupsion dhe shpërdorim detyre dhe referime për këtë grup veprash penale është shumë i ulët. Ne do të bashkëpunojmë me mediat dhe qytetarët për këto lloj veprash”, tha Llalla.
Llalla pohoi se, shkak i rënies së punës në Prokurorinë e Gjirokastrës është kostoja financiare. “Ka rënie të volumit të punës në Prokurorinë e Gjirokastrës, kjo pasi problematika për shkak të kostos financiare. Konstatohet një rënie e volumit të punës në Prokurorinë e Qarkut gjirokastrit, problematika që ndeshet në gjithë prokuroritë e vendit për shkak të boshllëqeve të krijuara ka sjellë pamundësinë e prokurorëve të rinj, problematikë që nuk ka gjet zgjidhje për shkak të kostos financiare”, u shpreh Llalla.

Tërmet Peçi e Adriatik Zotkaj, të dënuar me 5 vjet burg dhe gjobë

Tërmet Peçi, dënim të formës së prerë për falsifikim dokumentash
Sektori i Dekriminalizimit në Prokurorinë e Përgjithshme ka konstatuar se subjektit Tërmet Peçi i duhet ndërprerë mandati i kryetarit të Bashkisë, pasi rezulton se:
– Subjekti deklarues Tërmet Peçi, referuar Ligjit nr. 138/2015, ka dorëzuar një formular vetëdeklarimi të dorëzuar në datë 21.04.2016, të plotësuar në datë 10.04.2016, pra, brenda afatit ligjor të përcaktuar në vendimin nr. 17/2016, të Kuvendit të Shqipërisë.
Më pas në datë 10.06.2016 subjekti ka dorëzuar dhe një formular vetëdeklarimi dhe Komisioni Qendror i Zgjedhjeve ka pranuar ta administrojë, në shkelje të afateve ligjore.
Sektori i Verifikimit të Integritetit ka verifikuar vetëm të dhënat e formularit të datës 10.04.2016, pasi sipas Ligjit 138/2015 dhe vendimit 17/2016 të Kuvendit të Shqipërisë, ky formular është i vetmi formular që është plotësuar duke respektuar afatet ligjore. Çdo formular tjetër apo materiale të tjera, nuk mund t’i nënshtrohen verifikimit pasi bien në kundërshtim të hapur me ligjin.
Në formularin e parë të përcjellë për verifikim nga ana e sektorit është konstatuar se nuk është pasqyruar asnjë e dhënë në lidhje me vendime penale përfundimtare apo jo, masa sigurimi, dëbime apo hetime brenda apo jashtë territorit të Republikës së Shqipërisë.
Komisioni Qendror i Zgjedhjeve ka kryer verifikimet paraprake në zbatim të Ligjit 138/2015 dhe vendimit 17/2016 të Kuvendit të Republikës pranë Drejtorisë së Burgjeve dhe informon se ky subjekt është dënuar me vendim të formës së prerë, nr. 21, datë 27.04.2004 nga Gjykata e Rrethit Gjyqësor Tepelenë, për veprën penale të “Përdorimit të dokumenteve të falsifikuar”, parashikuar nga neni 186/1 i Kodit Penal me 150 000 lekë gjobë. Këto të dhëna gjenden të pasqyruara dhe në dëshminë e Gjendjes Gjyqësore datë 30.05.2016, përcjellë nga Komisioni Qendror i Zgjedhjeve dhe shkresës datë 01.06.2016 të Drejtorisë së Përgjithshme të Burgjeve, me anë të së cilës informohet Komisioni Qendror i Zgjedhjeve se subjekti vetëdeklarues, Tërmet Peçi, ka një vendim dënimi.
Sektori i verifikimit të Integritetit në Prokurorinë e Përgjithshme me shkresën nr. 454/2 prot., datë 17.02.2017 dhe nr. 451/4 prot., datë 21.02.2017, i është drejtuar me kërkesë Drejtorisë së Përgjithshme të Burgjeve dhe Gjykatës së Shkallës së Parë Gjirokastër. Drejtoria e Përgjithshme të Burgjeve me shkresën nr. 679/1 prot., datë 27.02.2017 na ka vënë në dispozicion dëshminë e Gjendjes Gjyqësore të subjektit, nr. 11 prot., datë 23.02.2017, ku konfirmon të dhënat se subjekti z. Tërmet Peçi realisht ka një dënim penal të formës së prerë.
Gjykata e Shkallës së Parë Gjirokastër ka vënë në dispozicion vendimin penal të formës së prerë, nr. 21, datë 27.04.2004, në emër të z. Tërmet Peçi, i cili është i dënuar për veprën penale të “Përdorimit të dokumenteve të falsifikuar”, parashikuar nga neni 186/1 i Kodit Penal me 150 000 lekë gjobë.
Subjekti rezulton se nuk e ka deklaruar këtë vendim gjyqësor të formës së prerë, edhe pse ka pasur detyrimin ligjor për ta pasqyruar në pyetjen 1 të formularit të vetëdeklarimit. Ai i është përgjigjur me “Jo”, pyetjes nëse ka qenë ndonjëherë i dënuar me vendim të formës së prerë nga një autoritet gjyqësor shqiptar apo i huaj.

Adriatik Zotkaj, i dënuar 3 herë me 4 vjet e 10 muaj burg në total
Sektori i Dekriminalizimit në Prokurorinë e Përgjithshme ka konstatuar se subjektit Adriatik Zotkaj i duhet ndërprerë mandati i kryetarit të Bashkisë, pasi rezulton se:
Subjekti deklarues Adriatik Zotkaj, referuar Ligjit nr. 138/2015, ka dorëzuar një formular vetëdeklarimi të administruar nga Komisioni Qendror i Zgjedhjeve, në datë 26.04.2016, të plotësuar në datë 22.04.2016, pra, brenda afatit ligjor të përcaktuar në vendimin nr. 17/2016, të Kuvendit të Shqipërisë.
Më pas, në datë 10.06.2016, subjekti ka dorëzuar një formular vetëdeklarimi të dytë bashkë me një deklaratë të firmosur nga vetë ai dhe Komisioni Qendror i Zgjedhjeve ka pranuar ta administrojë, në shkelje të afateve ligjore.
Në datë 04.01.2017, përsëri Komisioni Qendror i Zgjedhjeve ka administruar një kërkesë të subjektit Adriatik Zotkaj, të cilit i ka bashkëlidhur vërtetimin e gjendjes gjyqësore nr. 1 prot., datë 24.11.2016.
Gjithashtu në datë 14.02.2017, datë në të cilën është përcjellë dhe kërkesa për verifikim të thelluar, Komisioni Qendror i Zgjedhjeve ka protokolluar dhe administruar një vërtetim datë 14.02.2017, të lëshuar nga Gjykata e Rrethit Gjyqësor Berat. Këtij vërtetimi i janë bashkëlidhur dy vendime gjykate, me kërkues subjektin Adriatik Zotkaj.
Sektori i Verifikimit të Integritetit ka verifikuar vetëm të dhënat e formularit të datës 22.04.2016, të administruar më 26.04.2016 nga Komisioni Qendror i Zgjedhjeve, pasi sipas Ligjit nr. 138/2015 dhe vendimit nr. 17/2016 të Kuvendit të Shqipërisë, ky formular është i vetmi formular që është plotësuar duke respektuar afatet ligjore. Çdo formular tjetër apo materiale të tjera, nuk mund t’i nënshtrohen verifikimit pasi bien në kundërshtim të hapur me ligjin.
Në formularin e parë të përcjellë për verifikim, nga ana e sektorit është konstatuar se subjekti ka deklaruar, një vendim penal të formës së prerë të Gjykatës së Rrethit Korçë, për veprën penale të “Shkeljes së rregullave të qarkullimit rrugor” ku është dënuar me 3 vjet burg, një vendim të Gjykatës së Rrethit Skrapar për “Kundërshtimin e punonjësve të policisë së rendit publik”, dënuar me 10 muaj burg dhe një vendim të Gjykatës së Rrethit Tiranë, për veprën penale të parashikuar nga neni 250 dhe 187 i Kodit Penal, dënuar me 1 vit burgim. Gjithashtu ka deklaruar nën pyetjen 4 të formularit se ka qenë i arrestuar/ndaluar dhe ndaj tij ka pasur dy masa sigurie “arrest në burg” nga Prokuroria e Rrethit Korçë dhe ajo e Rrethit Skrapar, për veprat penale për të cilat është dënuar më pas me vendime të formës së prerë.
Komisioni Qendror i Zgjedhjeve ka kryer verifikimet paraprake në zbatim të Ligjit 138/2015 dhe vendimit 17/2016 të Kuvendit të Republikës pranë Drejtorisë së Burgjeve, konfirmon vendimet e mësipërme dhe vlerëson se subjekti nuk përfshihet brenda fushës së ndalimeve të nenit 2 të Ligjit 138/2015, pasi sipas nenit 4, të Ligjit nr. 138/2015, për këto dënime kanë kaluar afatet e rehabilitimit.
Sektori i Verifikimit të Integritetit në Prokurorinë e Përgjithshme i është drejtuar me kërkesa përkatësisht, Drejtorisë së Përgjithshme të Burgjeve, Gjykatës së Shkallës së Parë Berat, Gjykatës së Shkallës së Parë Tiranë dhe Gjykatës së Shkallës së Parë Korçë.
Drejtoria e Përgjithshme e Burgjeve ka vënë në dispozicion Dëshminë e Gjendjes Gjyqësore të subjektit, datë 23.02.2017. Gjykata e Shkallës së Parë Berat ka vënë në dispozicion vendimet penale të formës së prerë, datë 29.07.1985; datë 01.02.2001; dhe datë 29.12.2006. Gjykata e Shkallës së Parë Korçë ka vënë në dispozicion vendimin datë 19.03.1992. Gjykata e Shkallës së Parë Tiranë ka vënë në dispozicion vendimin penal të formës së prerë, nr. 370, datë 21.05.2002 në emër të subjektit deklarues Adriatik Zotkaj.
Subjekti, nga përgjigjet dhe verifikimet e kryera, rezulton se nuk ka deklaruar vendimin gjyqësor të formës së prerë dhënë nga Gjykata e Shkallës së Parë Skrapar nr. 20, datë 29.07.1985, edhe pse ka pasur detyrimin ligjor për ta pasqyruar në pyetjen 1 të formularit të vetëdeklarimit, njëjtë siç ka deklaruar dhe vendimet e tjera penale dhënë nga Gjykatat e Shkallës së Parë Skrapar, Korçë dhe Tiranë.

1...7 1397 1407 141...8 306Faqja 7 140 nga 8 306

Kryesore

Continue to the category
Më shumë
© 2024 Rilindja Demokratike Euroatlantike