Ish-kryeministri Berisha ka ironizuar dje katër emrat e ministrave të rinj të emëruar nga Rama. Përmes një statusi në Facebook, Berisha ndalet tek skandalet që kanë shoqëruar emrat e ministrave të rinj apo çfarë fshihet pas emërimit të tyre. “Emërimet e reja në qeverinë e Kanabistanit! Të dashur miq, mediat njoftojnë se: Ministria e drogës i besohet Fatmir Drogës, që me vëllain e tij kryeekspert, trafikant ndërkombëtar droge, Agron Xhafa të dënuar në Itali, Venezuelë dhe Ekuador, do të sigurojë trafikun e drogave të forta në Shqipëri. Vëlla Agroni kontrollon për llogari të familjes trafikun e drogës në Vlorë, Fier! Fatmiri si ministër i Drejtësisë e lehtësoi para drejtësisë italiane duke mashtruar dhe paraqitur vëllaçkon si të infiltruarin e antidrogës shqiptare! Shëndetësia ju besua ndrikullës Manastirliu, asistentes me çizme në të gjitha vjedhjet të famozit Beqaj. Ministria e mëshirës dhe përdëllimit i besohet ndrikull Oltës, e cila thuajse është rritur në strehën varfnore të humanistes së famshme Shemsie Kadrisë, por që ngrihet në përgjegjësi sepse mami Neta e ka si dy herë çupën e saj!! Ministria e pushtetit vendor i besohet Shalsit, hajnit të betuar me zë dhe figurë se në pushtet do të vjedhim me lezet. Për kujtesë, Shalsi përjetoi një depresion të thellë, thuhet me tentativa suiçidale sepse krushka e parë nuk i dha asnjërin nga 8 apartamentet që Shalsi nënkryetar bashkie i kishte marrë me lezet si dhurata, por që i kishte vendosur në emra të krushkës dhe rrethit të saj. Shalsi është serioz, do të vjedhë me lezet”, shkruan Berisha në reagimin e tij.
New Europe: Saga e vilës shqiptare të Vlahutin vijon
11 pyetje iu dërguan Shërbimit evropian të Marrëdhënieve me Jashtë nga eurodeputetja Ingerborg Graessle, Presidente e Komitetit Evropian për Kontrollin e Buxhetit. 11 përgjigje u dërguan. Parlamenti megjithatë i konsideroi këto përgjigje si të paqarta dhe evazive. Të marrim për shembull pyetjen 9. Mendo se cili mund të ishte reagimi i hetuesve të OLAF nëse gjatë pyetjeve, ata do të merrnin përgjigje të tilla, e më pas gjykojeni vetë. Pyetje: A është EEAS në dijeni të ndonjë të afërmi apo anëtari të qeverisë shqiptare që punon për delegacionin e BE në Tiranë? Nëse po, a mund të na vini në dispozicion emrat e tyre? Përgjigje: EEAS konfirmon që nga njohjet tona më të mira asnjë anëtar që po punon për delegacionin e BE në Tiranë nuk është i afërm apo anëtar i lartë në qeverinë shqiptare. E njëjta gjë mund të thuhej edhe për Kim Jong-unin që “nga njohjet tona më të mira, Shkëlqesia e tij nuk është kriminel”. Sa për shpjegimet e dhëna me pagesë, përgjigjja është qesharake nëse e krahason me informacionin speficik e të mbipaguar (duket të jetë mbi 1 milion euro) i publikuar në Neë Europë më 5 shkurt 2017. Çështja e vërtetë, megjithatë, është sjellja politike e ambasadores së BE në Tiranë, Romana Vlahutin në këndvështrimin e zgjedhjeve të 18 qershorit. Kjo është diçka që Federica Mogherini duhet t’i kushtojë vëmendje, pasi duket se ambasadorja e saj është shumë aktive përsa i përket fushatës elektorale. Por mbi të gjitha, një nga çështjet e shumë përfolura në Tiranë është specifikisht lidhja e një partie politike me trafikun e narkotikëve.
7 milionë euro për të tërhequr dëshminë ndaj Shullazit, Prokuroria nis hetimet
Prokuroria për Krime të Rënda zgjeron hetimet për personat e tjerë të përfshirë në grupin e Emiljano Shullazit, pas dëshmisë së dhënë nga Ylvi Beqja në Gjykatë. Burimet nga organi i akuzës bënë të ditur se, hetimet kanë nisur ndaj personave, emrat e të cilëve ka përmendur Beqja gjatë dëshmisë së tij, në seancën e sigurimit të provës. Hetimet, thonë burimet, kanë nisur për Ervis Martinajn, i cili edhe pse në kërkim nga policia për një dënim me 3 vite burg, dyshohet se i ka bërë presion Beqajt për të tërhequr dëshminë ndaj Shullazit. Sipas biznesmenit Ylvi Beqaj gjatë një takimi, Martinaj i ka kërkuar të tërheqë dëshminë ndaj Shullazit kundrejt shpërblimit prej 7 milionë eurosh. Beqja ka rrëfyer para Gjykatës se, ky person e ka garantuar se, 1 milion euro ishin të gatshme për t’u dhënë direkt në dorë, ndërsa pjesa tjetër do t’i jepej me këste, vetëm që ai të hiqte dorë nga dëshmia kundër Shullazit. Por Beqja ka rrëfyer se kjo gjë nuk është pranuar nga ai.
Pas refuzimit të ofertës, Beqja ka pretenduar se është kërcënuar nga Martinaj, që tashmë po hetohet nga Prokuroria për Krime të Rënda. Në hetim, mësohet se janë edhe disa tregtarë, emrat e të cilëve nuk bëhen publike, por që kanë dalë në disa media, duke akuzuar Ylvi Beqajn, personin e mbrojtur nga drejtësia, se i ka para borxh. Tregtarët sipas biznesmenit Beqja, i kanë detyruar të dalin publikisht për ta akuzuar atë. Pretendime, të cilat po verifikohen nga Prokuroria e Krimeve të Rënda.
Nga ana tjetër, avokatët e Emiljano Shullazit dhe të akuzuarve si pjesëtarë të bandës së tij, kanë thënë se pretendimet e Ylvi Beqajt nuk janë të vërteta. Ata kanë thënë se do të ballafaqohen në seancë gjyqësore me dëshmitarin e mbrojtjes, për pretendimet e tija.
Ndërkohë, seanca e ballafaqimit midis Emiljano Shullazi dhe biznesmenit Ylvi Beqaj ka dështuar sërish ditën e djeshme. Shkak janë bërë sërish mungesa e avokatëve mbrojtës. Deri më tani janë më shumë se 15 seanca të dështuara dhe shkak kryesor për këtë gjë bëhen kryesisht avokatët, por edhe vetë Shullazi. Emiljano Shullazi është ndaluar me urdhër të Prokurorisë së Krimeve të Rënda Tiranë me akuzën për gjobëvënie.
Cali: Lagunën e shfrytëzon Armando Prenga edhe pasi fituam gjyqin
Anëtarët e familjes Cali kanë deklaruar dje në Gjykatë se pavarësisht se, kanë fituar gjyqin për shfrytëzimin e Lagunës së Patokut, sërish ajo shfrytëzohet nga ish-deputeti i PS, Armando Prenga. “Me një vendim të dytë, pezullim ekzekutimi na kanë komunikuar se nuk keni leje të përdorni. Aty e përdorin do pukjanë nën hijen e Armando Prengës. Armandi e ka fituar tenderin jo na”, u shpreh Gjergj Cali.
Pak muaj me parë, familja Cali paditi tenderin e Ministrisë së Bujqësisë, që i kish dhënë lejen Prengës për shfrytëzimin e Lagunës. Shkalla e Parë Administrative i dha të drejtë Calëve. Më pas, Ministria e Bujqësisë e apeloi duke e humbur procesin dhe vendimi mori formën e prerë. Por ekzekutimi i vendimit është pezulluar nga Gjykata e Lartë deri në përfundim të gjykimit edhe në këtë Gjykatë.
Gjykata e Lartë i vazhdoi lejën e shfrytëzimit të Lagunës së Patokut familjarëve të Armando Prengës, edhe pse kishte dy vendime kundër. Tre gjyqtarë të kësaj gjykate në dhomën e këshillimit mësohet se kanë vendosur të pezullojnë vendimin e formës së prerë të Gjykatës së Apelit Administrativ, që i heq të drejtën familjarëve të Prengës të shfrytëzojnë Lagunën. Argumentet e këtij vendimi ende nuk bëhen të ditur, pasi tre gjyqtarët nuk e kanë zbardhur vendimin e arsyetuar, që u hoqi të drejtën peshkatarëve të familjes Cali të shfrytëzojnë Lagunën e Patokut.
Në favor të familjes Cali, kanë vendosur dy gjykata, ajo e Shkallës së Parë dhe Apelit Administrativ. Këto gjykata, kanë shfuqizuar vendimin e Ministrisë së Bujqësisë, që i heq të drejtën e shfrytëzimit familjes Cali dhe ia kalon vëllait të ish-deputetit Armando Prenga. Por këtë vendim, familjarët e deputetit Prenga e kanë bërë rekurs në Gjykatën e Lartë, duke kërkuar njëherazi pezullimin e këtij vendimi deri sa dosja të shqyrtohet në themel nga Kolegji Administrativ i Gjykatës së Lartë. Tre gjyqtarët, në dhomë këshillimi pranuan rekursin e familjarëve të deputetit Prenga, duke i dhënë të drejtën të vazhdojnë shfrytëzimin e Lagunës deri sa Ministria e Bujqësisë të zhvilloi procedurat e tenderit të licencës së re.
Nga ana tjetër, procesi penal ndaj ish-deputetit Armando Prenga që akuzohet për armëmbajtje pa leje, kanosje dhe plagosje të rëndë, u shty për me datën 27 mars, pasi nuk u paraqitën avokatët mbrojtës. Pritet që Kolegji Penal i Gjykatës së Lartë, në seancën e ardhshme të vendosë transferimin e dosjes drejt Gjykatës së Kurbinit, pasi Prenga tashmë nuk ka imunitet. Me heqjen e mandatit të deputetit nga KQZ-ja, Armando Prenga nuk mund të gjykohet nga Gjykata e Lartë. Armando Prenga, akuzohet për dy plagosje me armë ndaj pjesëtarëve të familjes Cali, kanosjen e tyre dhe armëmbajtjen pa leje. Ngjarje e cila ka ndodhur mbrëmjen e 5 shtatorit të vitit 2015 para Komisariatit të Kurbinit.
Ndërkohë, Gjykata e Lartë pritet të shpallë mos kompetencën për gjykimin e çështjes ndaj ish-deputetit të PS, Armando Prenga, i akuzuar për kanosje dhe armëmbajtje pa leje. Seanca, e cila pritej të zhvillohej ditën e djeshme është shtyrë, pasi mungonte një prej anëtarëve të trupit gjykues.
Tropojë, banorët e 11 fshatrave peticion qeverisë për rrugën Kam-Qafë-Prush
Banorët e 11 fshatrave në Tropojë kanë protestuar dje kundër qeverisë Rama për shkak të gjendjes së mjerueshme të minierës së kromit në zonën e Kamit. Protestuesit kërkojnë nga qeveria që të asfaltohen 18 kilometra rrugë që lidh Kamin me Qafë-Prushin.
Janë mbi 300 mijë ton stok që nuk mund të transportohen për shkak të gjendjes së keqe të rrugës. Në këtë zonë nxirret rreth 200 mijë ton krom në vit, të cilat janë 2/3 e kromit që mblidhet në Shqipëri dhe shteti fiton rreth 40 milionë euro.
Janë të punësuar 250 punëtorë dhe pritet me shtimin e kapaciteteve të fronteve të punës të punësohen rreth 2000 punëtorë. 11 fshatrat e kësaj zone jetojnë nga puna që bëhet në këto miniera, por dëmtimi i rrugës së makinës po ul kapacitetin e nxjerrjes së kromit, e cila shoqërohet me uljen e numrit të punëtorëve.
Kërkesat e protestës së banorëve ishin asfaltimi i shpejtë i kësaj rruge, rregullimi i rrjetit vaditës dhe vënia në efiçencë e dy qendrave shëndetësore të fshatit Zogaj, të cilat nuk funksionojnë. Protestuesit i dërguan një peticion qeverisë, duke kërkuar realizimin e kërkesave të tyre ose përndryshe do të bllokojnë rrugën që lidh Tropojën e Hasin me Kosovën.
Plagosje me armë në Tiranë, pranë QSUT-së
Një plagosje me thikë ka ndodhur në orët e para të mëngjesit të djeshëm pranë QSUT-së në Tiranë. Sipas policisë, një sherr me thika ka ndodhur rreth orës 00:50, në rrugën “Kongresi i Manastirit”, përballë Spitalit të Fëmijëve. Për pasojë ka mbetur i plagosur 25-vjeçari me inicialet G.Q., i cili është dërguar në spital, në gjendje të rëndë për jetën. Ndërkohë, autori i kësaj ngjarjeje është ende i lirë. Policia bën të ditur se është duke u punuar për sqarimin e rrethanave të ngjarjes, identifikimin dhe kapjen e autorit. Ndërkohë, një 40-vjeçar nga Fieri është vetëhelmuar me fotoksinë. Policia njofton se ngjarja ka ndodhur ditën e djeshme, ku 40-vjeçari Sh.Z. edhe pse është dërguar me urgjencë në spital, nuk ka arritur t’i mbijetojë efektit të fotoksinës.
Roli i Fatmir Xhafës në kartelin e drogës
Agron Xhafa, vëllai i deputetit socialist dhe kreut të komisionit të Reformës në Drejtësi, Fatmir Xhafa është përgjuar nga policia italiane në lidhje me trafikun e drogës që ai bënte në zona të ndryshme të Italisë.
SYRI.net ka siguruar përgjimet e zbardhura nga policia italiane dhe të mbërritura në Shqipëri, ku i janë vënë në dispozicion policisë shqiptare, por kjo e fundit nuk ka vepruar.
Përmbledhje
Agron Xhafaj, vëllai i Fatmir Xhafës, u dënua nga Gjykata e Leçes në Itali, e cila gjykoi një grup kriminal shqiptarësh të përfshirë në trafik ndërkombëtar dhe shpërndarje e shitje lëndësh narkotike.
Hetimet për këtë grup kriminal janë zhvilluar në periudhën 2000-2001 nga Drejtoria e Antimafias në Leçe dhe janë zbuluar të paktën 7 raste, kur Agron Xhafaj është përfshirë me veprime aktive në furnizimin dhe shpërndarjen e lëndëve narkotike marijuanë, heroinë dhe kokainë në tregun italian.
Sipas hetimeve të Antimafias italiane, Agron Xhafaj vepronte në Bolonja. Ai ishte pjesë e një grupi që siguronte drogën kryesisht në Shqipëri dhe më pas e shpërndanin në qytete si Salento, Firenze, Bologna, Parma, etj.
Në këtë hetim ka qenë i përfshirë edhe Drejtoria e Antidrogës Amerikane (DEA), pasi grupi i shqiptarëve, ku Agron Xhafaj kishte rol kryesor, kryente trafik lëndësh narkotike nga Italia në Amerikë.
Rezulton se, Agron Xhafaj është përfshirë drejtpërdrejtë në një linjë trafiku lënde narkotike nga Italia për në Poloni. Por, kjo linjë nuk rezultoi produktive, pasi Agron Xhafaj siguroi një sasi lënde narkotike të cilësisë së dobët, e cila nuk i pëlqeu pritësve polakë.
Në vijim janë 7 rastet e evidentuara nga Antimafia Italiane, ku është përfshirë drejtpërdrejtë Agron Xhafaj në importimin, furnizimin, shpërndarjen dhe shitjen e lëndës narkotike në zona të ndryshme të Italisë.
Raste të konstatuara deri në dhjetor 2001.
Rasti i parë
Zonat e veprimtarisë kriminale: Në Leçe, Venezia, Bologna, Firenze dhe lokalitete të tjera.
Vepra penale: “Pjesëmarrje në një organizatë trafiku dhe shpërndarje lëndësh narkotike (heroinë, marijuanë dhe hashash)”; Shtetasi shqiptar Fadil Papa siguronte lëndë narkotike në Shqipëri, duke realizuar edhe transportimin e saj për në Salento (Itali). Pas qëndrimit të përkohshëm në zona të paidentifikuara salentine, lënda narkotike ndahej dhe shpërndahej tek persona të tjerë; në Venezia vepronte Besnik Murataj, i cili, në bashkëpunim me Tomasz Piekarniak i jepte vazhdimisht lëndë narkotike Rino Gerardit dhe Ervin Qezit, të cilët zhvillonin më tej aktivitetin e tyre në zonat e Venezias dhe Trevisos; në Bolonja vepronte Agron Xhafaj, (i cili administronte një rrjet në tijin shpërndarësish, në bashkëpunim me Orges Seferaj); në Parma vepronte Altin Maci dhe në Imperia vepronte Edison Sali;
Rasti i dytë
Zonat e veprimtarisë kriminale: Në Leçe, Venezia, Bologna, Treviso dhe lokalitete të tjera, të konstatuara deri në dhjetor 2001.
Vepra penale: Pjesëmarrje në bashkëpunim ndërmjet tyre dhe me persona të tjerë në organizatë për mbajtje, importim në territorin e dhtetit (Itali) dhe transportim të një sasie të papërcaktuar marijuane; konkretisht, Fadil Papa siguronte dhe importonte lëndë narkotike deri në brigjet e Salentos, ndërsa Agron Xhafaj ishte ngarkuar ta tërhiqte menjëherë, duke kërkuar bashkëpunimin e Besnik Murataj.
Rasti i tretë
Në provincën e Leçes, dt. 10.09.2000;
Besnik Murataj zotëronte dhe i jepte Agron Xhafaj, nëpërmjet Tomasz Piekarniak, sasi prej 125 gramë heroinë, për shpërndarje të menjëhershme;
Rasti i katërt
Në Bologna, dt 3.11.2000;
Besnik Murataj zotëronte dhe i jepte Agron Xhafaj, nëpërmjet Tomasz Piekarniak, sasi prej 40 gramë heroinë, për shpërndarje të menjëhershme;
Rasti i pestë
Në Bologna, dt 13.11.2000;
Besnik Murataj zotëronte dhe i jepte Agron Xhafaj, nëpërmjet Tomasz Piekarniak, një sasi të papërcaktuar hashashi, për shpërndarje të menjëhershme;
Rasti i gjashtë
Në Bologna, dt. 13.11.2000;
Besnik Murataj, në bazë të kërkesës së Paolo Lo Sasso, siguroi lëndën narkotike nga Agron Xhafaj dhe Orges Seferaj, që më pas iu dha një agjenti të DEA-s (agjent i infiltruar, i cili i ishte atashuar grupi amerikan që bashkëpunonte me personat e mësipërm)
Rasti i shtatë
Në Firenze dhe lokalitete të tjera, dt. 13.06.2001;
Besnik Murataj dhe Agron Xhafaj kanë pasur në posedim dhe kanë tentuar t’i japin Rino Gerardi dy kg lëndë narkotike hashash, e cila transportohej nga Orges Seferaj. Por, dorëzimi nuk u realizua, pasi Seferaj u arrestua në flagrancë, në Venezia, dt. 1.7.2001;
Arrestimii i Orges Seferaj dhe sekuestrimi i 2 kg hashash
DT. 1.7.2001
Në vijim të bashkëpunimit ndërmjet personave të hetuar, në dt. 1.7.2001, Agron Xhafaj, nëpërmjet korrierit të tij, Orges Seferaj, do i dërgonte Besnik Muratajt 2 kg hashash, e cila do i dorëzohej Rino Gerardit, njeri i besuar i Muratajt në furnizimin me heroinë. Pas mbërritjes në Venezia (nga Vlora) të Seferajt, ai u arrestua në flagrancë, pasi ishte në ndjekje nga punonjësit e policisë. Në momentin e arrestimit, atij iu gjet sasia e lëndës narkotike (Raporti Informativ i Skuadrës Operative të Venezias, nga nr. 11 te nr. 11/A)
Në dt. 30.06.2001 janë regjistruar telefonatat e kryera për këtë ngarkesë.
Fillimisht, Besnik Murataj diskutonte me Agron Xhafaj:
Besnik: Do vish të shohësh ti për punën?
Goni: Ëhë, ëhë.
Besnik: Që të shohësh se për çfarë pune bëhet fjalë dhe për të shkuar te pronarët, kupton?
Goni: Të kuptova. A të marr edhe Gesin (Orges Seferaj)?
Besnik: Eh…
Goni: Të nisem unë?
Besnik: Eh, eh!!
Goni: Në rregull, Ku do të takohemi më pas?
Besnik: Mbaj shënim diku, që të të them se ku është restoranti.
Goni: Prit një minutë
Besnik: Ke ndonjë laps aty?
Goni: Prit sa të gjej një. Alo…
Besnik: Hum..
Goni: A të niset Gesi sot për andej?
Besnik: Eh?
Goni: Gesi, Gesi, po të them
Besnik: Eh..
Goni: Mund të vijë sot.
Besnik: Mirë, të vijë.
Goni: Ai duhet të shkoj pak deri në Firenze
Besnik: Ai do që të vij nesër, thua ti?
Goni: Jo, jo. Ai duhet të takojë atë djalin në Firenze, për atë makinën
Besnik: Hum..
Goni: Pastaj, ti e di mirë.
Besnik: Tani, ai e ka parasysh. Ai mund të jetë atje pasdite, rreth orës 4-5. Kupton?
Goni: Hum, hum.
Besnik: Në 6.
Gosni: Në rregull. Më thuaj atëherë
Besnik: Ajo…po të them ku është Restorant “Rialto”
Goni: Ku?
Besnik: Në Rialto.
Goni: Ri…
Besnik: Rialto.
Goni: Alto.
Besnik: Rialto, aty është edhe një tabakeri. Është fiks aty. E ka numrin? Se ia kam dhënë unë numrin e restorantit.
Goni: Po, e ka!
Besnik: Para se të mbërrij aty, t’i thotë që “për një minutë jam aty”. Ai do të jetë aty dhe do t’i thotë “për një sekondë jam aty”. Pastaj, aty është edhe pronari, kupton?
Goni: Në rregull!
Besnik: ky do të shkoj dhe do t’i thotë që jam te tabakeria, kupton?
Goni: Po, po
Besnik: Dhe ky do të presë afër tabakerisë, kupton?
Goni: Po…
Pasdite, Besnik Murataj njoftoi Rino Gerardin lidhur me korrierin:
Besnik: Do të shihemi nesër..
Rino: Joo! Pra jo sot?
Besnik: Po, po, nesër. Do të shihemi nesër. Kur të vij unë atje, do të jem te tabakeria…më kupton?
Rino: Po!
Besnik: Sa të të telefonoj unë, ti vjen për 10 minuta, aq të duhet deri te tabakeria, kupton?
Rino: Mirë! Por…
Besnik: Më pas do të shkojmë te restoranti për të folur për atë punën, kupton?
Rino: Po!!
Besnik: Në rregull!
Rino: Po për nesër, a është në rregull puna?
Besnik: Po, po
Rino: A është çdo gjë në rregull? Në çfarë orë?
Besnik: Në rregull janë gjërat. Nuk e di në cilën orë, po nga dreka, nga pasditja mendoj, rreth orës një, orës dy. Kupton? Në atë orë do të takohemi, në rregull?
Rino: Në rregull!!
Besnik: Në rregull atëherë!
Rino: Ki kujdes!
Besnik: Mos u shqetëso!
Rino: Ciao!
Besnik: Ciao!
(Tel. n.166 dt. 30.6.2001, ora 17,23):
Të nesërmen në mëngjes, Murataj informon Gerardin për orarin e mbërritjes së korrierit, si edhe i shpjegon disa karakteristika fizike të tij. Në raportin e Skuadrës Speciale, i bëhet një përmbledhje e telefonatës dt. 1.7.2001, ora 10:50.
“Besniku informon Rinon se kushëriri i tij mbërrin pas dy ose tre orësh dhe ai duhet ta shoqërojë deri te restoranti. Do të takohen pranë Tabakerisë. Kushëriri i tij është rreth 1 metër e 80, ka një vesh, është i dobët. Rino i thotë që kuptoi dhe po e pret”.
Në orarin e caktuar, Gerardi nuk po takonte korrierin dhe i kërkon në mënyrë të vazhdueshme të dhëna shqiptarit.
“Rino i kërkon Besnikut që ta telefonojë sa më shpejtë. Pas 8 minutash, i kërkon sërish ta telefonojë. Besniku i thotë që të presë edhe pak se po vjen”. Këto telefonata zhvillohen ndërmjet orës 13:10-13:18 të dt. 01.07.2001.
Në orën 16:38, Besniku e pyet Gerardin nëse e ka takuar Orges Seferajn, meqë nuk ka marrë asnjë lajm prej tij. Rino Gerardi i jep përgjigje negative.
Në orën 17:39, Besnik Murataj i thotë Gerardit që të largohet, pasi diçka duhet të ketë shkuar keq.
Dhe në fakt, Orges Seferaj kishte mbërritur në Venezia, ashtu siç e kishte njoftuar Besnikun në sekretarinë telefonike (ora 14:30). Por, menjëherë ishte arrestuar në flagrancë nga policia në Venezia, pasi iu gjetën në posedim 2 kg hashash (ndarë në 8 pjesë) dhe 3 gramë marijuanë. Gjithashtu, Seferajt iu gjet edhe një telefon celular me nr. 0333/7528189. Bëhej fjalë për të njëjtin numër, me të cilin ai kishte komunikuar me Agron Xhafaj dhe Besnik Murataj një ditë më parë.
Sapo kanë mësuar se Orgesi u arrestua, Besnik Murataj dhe Agron Xhafaj janë përgjuar, nga ku ka rezultuar se ata po bëjnë përpjekje që t’i gjejnë një avokat Seferajt.
Trafikim heroine e hashashi në tregun e Trevizos nga Xhafaj
Në orën 10:17, Besniku njoftonte Agron Xhafaj që, “ai” sapo ishte nisur; në orën 13:16 qartësohet që personi që po vinte ishte Tomasz Piekarniak, pasi ky i fundit, pasi kishte mbërritur në Bologna, informon Besnik Murataj se kishte takuar mikun dhe ishte gati për t’u kthyer; në orën 17:10, edhe Agron Xhafaj njofton bashkëkombasin e tij që korrieri sapo ishte nisur për t’u kthyer; në orën 18:19, Tomasz Piekarniak siguron Besnik Murataj se kishte mbërritur në shtëpi. Në të njëjtën mbrëmje, Agron Xhafaj i ankohet Besnik Murataj se përse sasia që kishte mbërritur nuk korrespondonte me atë për të cilën kishin rënë dakord. Agroni thotë që sasia e sjellë nga Tomasz ishte 125 gramë (heroinë).
Goni: Sa….ishte… ai numri që më kishe nisur?
Besnik: njëqind e tridhjetë
Goni: Jo…është më pak. Është njëqind e njëzet e pesë.
Besnik: Jo, nuk është e mundur.
(tel.n.1421 dt. 3.11.2000, ora 20:24).
Pak më vonë, pasi kishin bërë biseda të tjera.
Goni: Unë e peshova vetë me saktësi.
Besnik: Edhe unë me saktësi vëlla (e pakuptueshme). E pashë vetë në gazetë, dy herë, që ishte njëmijë e nëntëqind e tridhjetë. Ndoshta një ose dy, edhe mund….
Goni: Çfarë të bëj. Ta lëj apo ta prek?
Besnik: Është djalë i mirë…
Goni: Unë nuk e di. Unë sa e hapa, e hapa sapo e takova.
Besnik: Dëgjo…vazhdo bëj punën tënde.
(tel.n.1424 dt 3.11.2000, ora 20.35)
Besnik Murataj, ndërkohë që furnizonte Agron Xhafaj në Bologna, merrte nga bashkëpunëtorë shqiptarë sasi të llojeve të ndryshme narkotikësh, të cilat i shpërndante në tregun trevinjian, nëpërmjet bashkëkombasit të tij, Ervin Qezi.
Ndërkohë, më 13.11.2000, në bazë të disa telefonatave, Besnik Murataj i dërgon edhe 40 gramë heroinë Agron Xhafajt, nëpërmjet Tomasz Piekarniak dhe, njëkohësisht, tërhiqte një sasi hashashi, të cilën një ditë më pas ia dorëzon “Vinit”, identifikuar si Ervin Qezi.
Në dt. 12.11.2000 janë regjistruar bisedat e marrëveshjes paraprake ndërmjet Besnik Murataj dhe Agron Xhafaj:
Goni: A do e dërgosh ti atë?
Besnik: Po, do e dërgoj nesër…
Goni: Rreth 40 mijë lireta mund t’i (..e pakuptueshme) Gesi
Besnik: Sa?
Goni: Dyzetmijë lireta për tre ose katër ditë. Më pas nuk ka problem, se do të vij vetë aty
(tel.n.1693 dt 12.11.2000).
Importimi i drogës të datës 14.10.2000
Në vjeshtën e vitit 2000, u regjistruan shumë telefonata në gjuhën shqipe, në bazë të cilave kuptohej se Besnik Murataj, krahas faktit që furnizonte me lëndë narkotike Paolo Lo Sasson, ai kishte ngritur dhe drejtonte një rrjet të tijin, të përbërë nga bashkëkombës të tij, për shpërndarjen e drogës në Itali dhe Poloni.
Hetimet treguan se Besnik Murataj, pasi kishte dërguar në fillim të shtatorit sasi të ndryshme lëndësh narkotike marijuanë dhe hashash për në Poloni, nëpërmjet Tomasz Piekarniak, ai kishte vendosur që, në bashkëpunim me këtë të fundit, të angazhohej në shpërndarjen e hashashit dhe heroinës në zonën e Venetos dhe Emilia Romagna, në Itali.
Në 14.10.2000, në bazë të përgjimeve, u dokumentua importimi në Salento i një sasie droge nga ana e Fadil Papa, i cili do ia dorëzonte Besnik Murataj nëpërmjet Agron Xhafaj. Nga ana tjetër, Besniku priste të furnizohej nga Altin Maci, i cili vepronte në Parma, nëpërmjet Edison Salit. Në vijim të përgjimeve, u arrit të kuptohej se bisedat ndërmjet tyre i referoheshin lëndës narkotike heroinë.
Në orën 06.45 të dt. 14.10.2000, Fadil Papa (i njohur edhe si CIMI), mbërriti në bregun e Salentos dhe kontaktoi me kunatin e tij, Besnik Murataj, të cilit i kërkoi të dërgonte një korrier:
Besnik: Arrite?
Çimi: Eh!… Çfarë duhet të bëj tani? Kush do të vijë?
Besnik: Ja, t’i them Agronit
(tel.n.944 dt. 14.10.2000).
Pasdite, Besnik Murataj telefonoi Agron Xhafaj. Ky i fundit i thotë që nuk mund të shkonte të merrte drogën, pasi kishte probleme me makinën. Kjo telefonatë i shërbeu policisë italiane për të identifikuar plotësisht Agron Xhafaj. Dhe në fakt, ashtu rezultoi, pasi Besnik Murataj në atë rast (si edhe në shumë raste të tjera) e kontantonte në nr. e 0338/1015650, i cili ishte në përdorim nga Agron Xhafaj (dokument i kompanisë telefonike, TIM):
Besnik: Oh, Goni!…Ka ardhur Çimi. Si t’ia bëjmë?
Goni: Po çfarë të them, nuk e di. Unë po vazhdoj të kërkoj, se mbeta kështu, pa makinë…Çfarë të të them unë?
(tel.n.997, dt. 14.10.2000, ora 16.21).
Një orë më vonë, Besnik Murataj i telefonon kunatit të tij, Fadil Papa (në të njëjtin numër, me të cilin kishin komunikuar në mëngjes), ku i shpjegon se takimi duhet të shtyhet, pasi Agron Xhafaj kishte një problem me makinën.
Komunikimi telefonik vijon me një bashkëpunëtor të Fadil Papa, me emrin Bledi, i cili sqaronte se “ÇIMI” (Fadil Papa) kishte sjellë në Itali një sasi droge, e cila duhej dorëzuar:
Besnik: Do të nisesh sot?
Bledi: Eh!… Nuk e di nëse Çimi do të vij sot apo jo.
Besnik: Po atë muhabetin…atë muhabetin, e ka fshehur në ndonjë vend?
Bledi: Eh!..Është akoma këtu!
Besnik: Po mirë atëherë, le të iki ai. Kur të vij prapë, në mënyrë që….edhe unë të organizohem më mirë, pasi….nuk ka makinë ky miku, kështu që…i thuaj që të mos presë…miku është në Bologna (tel.n.1013 dt. 14.10.2000, ora 17.30).
Në 29.10.2000, nga një komunikim telefonik i përgjuar, ndërmjet Besnik Murataj dhe Agron Xhafaj, kuptohet që, gjatë një takimi të zhvilluar në Parma, Besniku kishte rënë dakord me Altin Macin. që droga të dërgohej në datë 30 tetor.
Në vijim të bisedave telefonike lidhur me këtë transportim, Besnik Murataj i kërkon ndihmë Agron Xhafaj për të ndarë sasinë e heroinës që do të merrnin.
Besnik: Dje isha në Parma…takova një mik…për atë muhabetin që të kam folur…Çdo gjë është në rregull.
Goni: Dakord…Ti…unë nuk e di se si e ke bërë muhabetin.
Besnik: Është djalë i mirë….i vitit 1985….më kupton?
Goni: E cilit vit është makina?
Besnik: 1985
Goni: 85
Besnik: Eh!…Është e vitit 1985, por unë nuk e di nëse mund të marr një makinë kështu…Makina duhet rregulluar disi…më kupton?
Goni: Të kuptoj…
Besnik: A merr vesh Gesi (Orges Seferaj)?
Goni: Marr vesh unë.
Besnik: Unë nesër do të shkoj deri atje. Nesër do e mbaroj atë muhabet.
Goni: Nesër do e marrësh atë makinën…?
Besnik: Eh!
Goni: Nesër është e hënë. Të martën në darkë jam aty.
(tel.n.1295, dt. 29.10.2000, ora 15:51).
Disa sasi heroine të siguruar nga Altin Maci në dt. 30.10.2000 i jepen Besnik Murataj dhe Agron Xhafaj në Verona: një sasi prej 125 gramësh iu dhanë në dt. 3.11.2000 dhe 40 gramë të tjera iu dhanë në dt. 13.11.2000. Në të dy rastet, dorëzimi i lëndës narkotike realizohej nga korrieri polak, Tomasz Piekarkian. Disa telefonata të përgjuara në 3.11.2000 dokumentojnë qartësisht qëllimin e udhëtimit të Tomasz Piekarniak në Bolonja.
“Syri.net”
Abuzimet 590 mijë USD, KLSH kërkoi shkarkimin e ministres së re
Kontrolli i Lartë i Shtetit i ka kërkuar (në vitin 2016) kryeministrit Edi Rama, shkarkimin nga detyra të drejtoreshës së Qendrës Spitalore “Nënë Tereza”, znj. Ogerta Manastirlliu, e cila u emërua dje ministre e Shëndetësisë.
Ky propozim erdhi pas një kontrolli që zbuloi se drejtoresha Manastirlliu kishte shpenzuar rreth 795 mijë dollarë duke lidhur dy kontrata mirëmbajtjeje me kompani private shqiptare për disa aparatura mjekësore që ishin sjellë në Shqipëri në përdorim nga kompania “Siemens”.
Por audituesit kanë zbuluar se sipas kontratës fillestare të QSUT-së me “Siemens”, i takonte vetë QSUT-së të realizonte mirëmbajtjen.
Dokumentet kanë zbuluar se drejtoresha Manastirlliu i ka dhënë dritë jeshile, hapjes së një tenderi për mirëmbajtjen, duke nënkontraktuar dy kompani shqiptare në vlerën e 795 mijë dollarëve. Ndërsa dëmi neto i konstatuar nga KLSH-ja është në vlerën e 590 mijë dollarëve.
Ministrja e re e Shëndetësisë, Ogerta Manastirliu ka një CV të mbushur me skandale të rënda financiare, gjatë kohës që ka drejtuar Qendrën Spitalore Universitare “Nënë Tereza”.
Njeriu, që tashmë do të drejtojë shëndetësinë shqiptare është akuzuar zyrtarisht nga Kontrolli i Lartë i Shtetit, për abuzime në tendera publikë, por edhe mashtrim financiar duke kryer pagesa fiktive për spitalet private nga buxheti i QSUT.
Pagesat fiktive për hemodializën
Vitin e kaluar një raport auditimi i Kontrollit të Lartë të Shtetit gjeti se Manastirliu ka bërë pagesa fiktive tek dy spitale private, ku QSUT kishte nënkontraktuar shërbimin e dializës.
“Nga auditimi konstatuam se nuk ekzistonte asnjë regjistër apo qoftë dhe ndonjë evidencë ku të evidentohej numri i pacientëve dhe të dhënat mbi gjendjen e tyre, e domosdoshme për të ndjekur nivelin e seancave të realizuara dhe faturimin e shërbimit nga spitalet e kontraktuara”, denoncon KLSH.
Në vitin 2012 për shkak të mungesës së kapaciteteve në spitalin shtetëror, QSUT nënshkroi një kontratë me dy spitale private, Spitali Amerikan dhe Hygea, të cilët duhet të ofronin shërbimin e dializës për 166 pacientë. Deri në vitin 2013, spitalet private kanë ofruar shërbimin e dializës për 166 pacientë ashtu sikurse parashikohej në kontratën fillestare. Por pas këtij viti, kur në krye të QSUT erdhi Manastirliu numri i pacientëve është rritur me shpejtësi.
“Nga auditimi konstatohet se deri muajin maj 2014 janë trajtuar jashtë numrit të përcaktuar në kontrata dhe të pa miratuara gjithsej 166 pacientë ose në vlerë mesatare 24.178.232 lekë mbi vlerat aktuale të kontratave”, thotë KLSH.
Tenderi i mirëmbajtjes
Por ai i pagesave fiktive nuk është denoncimi i vetëm ndaj Manastirliut. Një tjetër skandal i denoncuar nga KLSH është dhe ai i tenderit për mirëmbajtjen e aparaturave mjekësore në QSUT të sjella nga kompania “Siemens”.
Sipas KLSH mirëmbajtja e aparaturave duhet të kryhej nga vetë QSUT, por në vend të kësaj Manastirliu e nënkontraktoi këtë shërbim tek një kompani private duke paguar rreth 800 mijë dollarë.
“Si rezultat i këtij veprimi/mosveprimi, QSUT rezulton të ketë shpenzuar fonde publike pa efektivitet deri në përfundim të auditimit në vlerën 59 milionë e 751 mijë lekë”, shkruhet në raportin e KLSH.
Institucioni më i lartë auditues fillimisht kërkoi ndjekje penale për Manastirliun, por më pas masa u ndryshua në kërkesë për largim nga puna drejtuar kryeministrit Edi Rama. Por në vend të shkarkimit, Rama po i beson Manastirliut një nga sektorët më të rëndësishëm të ekonomisë, atë të shëndetësisë.
Video skandali dhe mashtrimi
E parë me skepticizëm nga komuniteti i mjekëve, si një njeri që kish profil menaxhereje dhe nuk e njihte fushën e tyre, Ogerta Manastirliu e mori detyrën duke shpallur publikisht një kredo: “Kthimin e besimit tek shërbimi publik”. Por një vit e gjysmë më pas drejtimi i saj u trondit ndjeshëm citon “Lapsi.al” në një profil për ministren e re. Në ditët e para të vitit 2015 në rrjetet sociale u publikua një video skandal kur dy djem të rinj abuzonin seksualisht me një vajzë të shtruar në spital. Ngjarja qe e rëndë. Ajo i nxirrte kallajin reformave të rilindjes që e kish shpallur prioritetin e prioriteteve shëndetësinë. Dhe “Lapsi.al” e hetoi atë deri në detaje. Por, e keqja nuk qe vetëm tek ngjarja, por edhe tek qëndrimi që drejtoresha e re mbajti për të. Në vend që me përunjësi të kërkonte të falur ajo gënjeu publikisht duke thënë se ngjarja ishte xhiruar gjatë kohës së qeverisjes Berisha. Pra, ajo mashtroi sipas modelit aq shumë të përhapur mes zyrtarëve të asaj kohe: të gjitha fajet i ka qeveria e shkuar. Në vend që të kërkonte ndjesë se si ishte e mundur që një paciente pa ndjenja mund të molestohej seksualisht, kur është shtruar për kurim, se si është e mundur që as rojet, as infermieret dhe askush nga personeli nuk kanë pikasur gjë, se si është çështja e sigurisë në spital dhe si duhet rregulluar ajo, kjo ish-punonjëse e bashkisë së Edi Ramës, rendi tek gazetarët për të thënë se kjo ngjarje kishte ndodhur në kohën e pushtetit të kaluar. Ajo rrëfeu para kamerave edhe mjediset e rilindura të pavijonit, si një provë të alibisë së saj. Dhe si për ta bërë ngjarjen më të besueshme ajo u shfaq përkrah njeriut që po zëvendëson sot, vetë ministrit të Shëndetësisë, i cili miratonte në heshtje ato që thoshte drejtoresha. Por, gënjeshtra nuk zgjati as 24 orë. Dëshmitë në polici të vetë të dëmtuarës dhe më tej të personit të parë të ndaluar, hodhën dritë mbi një të vërtetë tjetër. Ngjarja kishte ndodhur në shkurt të vitit 2014, pra në një kohë kur pushteti qendror ish instaluar prej muajsh, kur Ministria e Shëndetit të rilindjes ishte vënë në punë, dhe kur vetë Manastirliu kishte shkulur kioska e kish mbjellur pemë para spitalit, pa pasur fare haberin se çfarë ndodhte brenda mureve të tij.
Ish-zv.ministri i Ramës i bashkohet protestës
Protesta e opozitës njohu ditën e 24 të qendresës qytetare, ndërsa mbështetja për të ka ardhur duke u rritur tani jo më vetëm nga pjesa e elektoratit të djathtë, por edhe nga të majtët dhe personalitete të politikës dhe medias afër saj.
Ish-zv.ministri i Mbrojtjes të Ramës dhe një nga analistët mediatikë i është bashkuar dje protestës në çadrën e lirisë, duke dhënë një mesazh kuptimplotë se më e rëndësishme se rreshtimi në kampe është ngritja e zërit të ndërgjegjes qytetare.
“Sot mes jush, si çdo ditë, ka jo vetëm demokratë dhe mbështetës të opozitës, por edhe qytetarë, madje edhe mbështetës të Partisë Socialiste, të cilët ndajnë me ne kauzën e zgjedhjeve të lira dhe të ndershme, ndajnë me ne kauzën e dekriminalizimit.
Sot, këtu na nderon me praninë e tij një përfaqësues i spikatur i mendimit dhe veprimit politik të së majtës, që është gazetari Dritan Hila.
Ju e mirëpritët dhe ndoqët çdo mesazh të tij dhe reaguat me inteligjencën, me mençurinë dhe me vetëdijen politike që karakterizon qytetarët shqiptarë dhe kjo është e pamanipulueshme nga çdo politikan apo çdo media manipulatore.
Duartrokitët dhe mbështetët mesazhet e z. Hila dhe ju të gjithë e kuptoni që ai nuk është këtu për të mbështetur Partinë Demokratike, ai nuk është këtu për të mbështetur thjesht dhe vetëm opozitën apo aksionin opozitar në vetvete, nuk është këtu aspak për të mbështetur Lulzim Bashën, por është këtu për të mbështetur kauzën kombëtare dhe europiane të zgjedhjeve të lira dhe të ndershme, kauzën e dekriminalizimit të politikës”, tha Basha.
Për kryetarin e opozitës, prania e një politikani dhe analisti si Hila në çadrën e protestës vetëm se provon se kjo çadër i ka kaluar tashmë kufijtë e saj. “Unë dua ta falënderoj me shumë mirënjohje. Dua t’i them se me praninë e tij sot këtu dëshmon shpirtin e vërtetë të këtij sheshi të lirisë, të kësaj tende të lirisë, shpirtin e vërtetë të këtij themeli, të Republikës së re.
Në këto 24 ditë, ne kemi parë e kemi takuar shumë qytetarë dhe anëtarë të Partisë Socialiste të Shqipërisë.
Në këto 27 vite të pluralizmit politik, socialistët shqiptarë kanë qenë kundërshtarët tanë në çdo palë zgjedhje.
Në çdo palë zgjedhje jemi ndeshur me ta dhe kemi fituar ose kanë fituar ata. Por ne nuk kemi harruar për asnjë çast se pavarësisht prej përplasjeve apo platformave politike, na bashkonte shqetësimi i drejtë se: ku po shkonte vendi. Pavarësisht prej zgjidhjeve që shikonim për problemet e vendit, na bashkonte të qenit shqiptarë.
E pra sot, socialistët shqiptarë që kanë patur dhe kanë guximin të jenë pjesë e këtij bashkimi të madh popullor dhe nuk janë të paktë në numër, por janë shumë dhe janë këtu ditë për ditë, dhe demokratët shqiptarë, dhe çdo qytetar shqiptar, i bashkon një shqetësim shumë i madh. Dhe ky është shqetësimi i kriminalizimit total të politikës. Ky është shqetësimi i kriminalizimit total të vendimmarrjes së institucioneve shqiptare”, tha Basha.
Basha: As Basha nuk e ndal dot më protestën
Kryetari i opozitës deklaroi se tashmë as ai vetë nuk do të mund të ndalë protestën në sheshin e lirisë. Ai ka rrëzuar të gjitha dyshimet se largimi i ministrave të Ramës mund të ndikojë tek protestat. Ai u shpreh se kjo lëvizje nuk do të ndalet deri në garantimin e plotë të zgjedhjeve të lira përmes qeverisë teknike.
“Ne e dimë se Saimir Tahiri shërbeu denjësisht për kriminalizimin e kupolës drejtuese të Policisë së Shtetit, çka solli kanabizimin e vendit dhe ngritjen e kriminelëve në fron. Ne e dimë se, Ilir Beqaj, shërbeu përulësisht për krimin më të rëndë, shpenzimin e parave të taksapaguesve shqiptarë që duhet të shkonin për shëndetin e të sëmurëve, e pacientëve, e familjarëve tanë, e fëmijëve tanë në xhepat e dy apo tri oligarkëve të lidhur drejtpërdrejtë me pushtetin.
Por ne po kështu, të gjithë e dimë se këta të dy dhe ata dy të tjerët janë shërbëtorë të njeriut që është në krye të kupolës së krimit dhe korrupsionit në këtë vend.
Ndaj flijimi i tyre, largimi i çirakëve, jo vetëm nuk na shtendos nga qëndrimi që kemi mbajtur, por na inkurajon për t’i shkuar deri në fund betejës që kemi nisur. Tani në teorinë e konspiracionit, të shkarkuarit, ju kanë thënë disa gazetarëve dje se na shiti Ed Rama ke Lul Basha, na shiti te Lul Basha, që Lul Basha të ndalë protestën.
E kuptoni se sa mbrapa janë apo jo?
Kujton se Lul Basha është në gjendje të ndalë këtë protestë? Nuk e kuptojnë që kjo lëvizje nuk ndalet e nuk do të ndalet, derisa Republika e vjetër e krimit, e korrupsionit, e drogës, e paligjshmërisë, e antikushtetueshmërisë, Republika e vjetër që i trajton zgjedhjet si një mundësi për të kapur pushtet dhe jo si tempullin e shenjtë të demokracisë, do të bjerë deri në kullën e fundit.
Republika e re, për të cilën jemi mbledhur këtu, është në fakt integrimi i vërtetë europian i Shqipërisë, sepse Republika e re, është dhe do të jetë e tillë, vetëm kur të kemi demokraci të vërtetë, që do të thotë, zgjedhje vërtet të lira dhe të ndershme dhe Po, z. Hila, Po, të gjithë ju qytetarë që doni një sistem zgjedhor që ju përfaqëson ju dhe jo kryetarët e partive në Parlamentin e ardhshëm shqiptar, fuqizimi i qytetarit, kufizimi i pushtetit, janë parime të shenjta, mbi të cilat janë ndërtuar vendet e Europës Perëndimore, vendet e Shteteve të Bashkuara të Amerikës, janë ndërtuar mbi këto parime dhe garantojnë progres, pikërisht sepse në këto vende, qytetari është Zot i fateve të tij, brenda Kushtetutës dhe ligjit dhe pushtetari është shërbëtor i qytetarit, brenda Kushtetutës dhe ligjeve”, tha Basha.
Kapja e shtetit nga krimi i organizuar
Ajo çfarë ka ndodhur në Shqipëri me kapjen e shtetit nga krimi i organizuar është një rast i paprecedent për rajonin e Ballkanit. “Kjo është gjëma e madhe dhe unike në Ballkan e kapjes së shtetit nga krimi i organizuar. Nga krimi i organizuar që duke kapur shtetin, duke kapur qeverinë e Edi Ramës, duke kapur Partisë Socialiste përmes të ashtuquajturës ‘Rilindje’, që nuk është gjë tjetër veçse maska e krimit mbi një formacion politik shqiptar, ka agjësuar procesin politik dhe bashkë me të edhe mundësinë e qytetarëve për vendimmarrje.
Pasojat e kësaj ndihen kudo. Ndihen në radhë të parë në institucionet shqiptare, në bankat e Parlamentit që duhet të përfaqësojnë interesat e shqiptarëve, por kur janë ulur tash katër vjet, njerëz, që nuk përfaqësojnë jo nivelin më të lartë siç duhet të përfaqësojnë, jo nivelin mesatar, por as nivelin më të ulët. Janë njerëz që përfaqësojnë llumin e shoqërisë, njerëz të dënuar për trafiqe, për drogë, për prostitucion, për vrasje. Njerëz që nuk i lidh asgjë me politikën, njerëz që madje nuk i lidh asgjë as me Partinë Socialiste të Shqipërisë, kundërshtarin historik të Partisë Demokratike të Shqipërisë.
Ata njerëz janë sot në bankat e Parlamentit dhe janë sot kryetarë bashkish sepse i solli Edi Rama për pushtetin e tij dhe për fatin e tij personal. Për të marrë pushtetin politik u lidh me krimin e organizuar. Për të mbajtur pushtetin politik është gati që bashkë me krimin e organizuar dhe drogën të prishë institucionin fondamental të demokracisë, zgjedhjet e lira dhe të ndershme.
Ju e dini këtë fare mirë, shqiptarët e dinë këtë fare mirë.
Ndaj u mblodhën më 18 shkurt në bashkimin më të madh popullor, në lëvizjen më të madhe, për të marrë një vendim të madh, një vendim të rëndësishëm. Vendimin për të mos u larguar nga ky shesh, derisa të garantojmë zgjedhje të lira dhe të ndershme, përmes një qeverie teknike me mbështetje të gjerë politike, që do të thotë domosdoshmërisht dhe pa asnjë kusht, largimin e Edi Ramës si kryeministër i qeverisë shqiptare”, tha Basha.
Garanci për Republikën e re
Ato nuk mund të shartohen me njëra-tjetrën. Duhet të vdesë njëra, që të lindë tjetra. Nuk mund të qëndrojnë përbri njëra-tjetrës. Po kështu, në Republikën e re, mazhoranca dhe opozita do të kenë të drejta dhe detyrime të reja. Në Republikën e re, opozita e re do të ketë rolin e shenjtë të kontrollit dhe kufizimit të pushtetit të mazhorancës së re, përmes të drejtave institucionale, përmes një Parlamenti që funksionon, përmes një Kushtetute që mundëson kontrollin dhe balancën reale të pushtetit, përmes një përfaqësimi të vërtetë të qytetarëve që do të thotë; jo noter i kryeministrit, por noter i qytetarëve dhe ditë për ditë, përballë kryeministrit e përballë ekzekutivit. Kjo është detyra e Parlamentit të ri në Republikën e re. Përndryshe, papërgjegjshmëria, makutëria dhe korrupsioni do të bënin në atë Republikë të re, të njëjtën që kanë bërë me Republikën e vjetër.
E kanë mbuluar vendin me drogë, kanë shkatërruar ekonominë, kanë shkatërruar shpresën e shqiptarëve, duke shkatërruar konkurrencën në ekonomi dhe tashmë konkurrencën në politikë. Sot, në këtë ditë të bukur, në këtë vend të bekuar nga Zoti, po shpaloset një skandal i mynxyrshëm, që tregon çfarë ndodh kur vendi i dorëzohet qeverisjes së papërgjegjshme të lidhur me krimin dhe mafian.
Megaskandali që fshin Ramën, Basha: Genocid
Kryetari i opozitës ka paralajmëruar se një investigim i mediave amerikane do të provojë gjatë ditëve të ardhshme se 32 mijë tonelatat e plehrave janë groposur në Shqipëri. Ai deklaroi dje nga sheshi i protestës se në rast se kjo do të jetë e vërtetë atëherë ai do t’i bëjë thirrje popullit të reagojë ndaj një gjenocidi që po ushtrohet ndaj tyre prej kreut të qeverisë.
“Kam qenë i kujdesshëm këto dy javë të shpërthimit të skandalit, për të mos arritur në konkluzione të parakohshme. Kjo javë do të jetë përcaktuese për transparencën e këtij megaskandali. Në qoftë se është e vërtetë, kjo nuk është asgjë më pak se gjenocid ndaj shqiptarëve. Të sjellësh mbetjet e rrezikshme kundër ligjit, ta mbash të fshehtë, t’i depozitosh në tokën e qytetarëve të tu, pa u marrë asnjë autorizim apo leje, në kundërshtim total me ligjin, kjo do të thotë të jesh bashkëpunëtor për gjenocid kundër popullit tënd dhe në qoftë se kjo është e vërtetë, Edi Rama, unë do t’i bëj thirrje popullit të të trajtojë siç trajtohen ata që bëjnë gjenocid kundër qytetarëve të vet”, tha Basha.
Kreu i opozitës tha se lajmin për depozitimin e plehrave në Shqipëri e kishte marrë nga disa gazetarë amerikanë me të cilët kishte biseduar të dielën në mbrëmje. “Mbrëmë, natën vonë, miq gazetarë nga SHBA, kanë njoftuar se janë shumë pranë zbulimit të dimensionit të vërtetë të skandalit të plehrave, që mafia ndërkombëtare ka depozituar në Shqipëri. Bravo për gazetarët. Nëse këto fakte, shpalosen, ashtu siç jam njoftuar, atëherë ai që qëndron prapa kësaj fasade në zyrën e tij do të duhet të zbresë e t’u shpjegojë shqiptarëve se pse i hapi dyert mijërave tonë mbetjeve të rrezikshme që sot mund të gjenden në truallin tonë, pranë burimeve tona ujore, e mund të kenë filluar që tani të helmojnë, tokën, bukën, ujin dhe ajrin e shqiptarëve dhe fëmijëve tanë”, tha Basha.
Basha i ka bërë thirrje Ramës të bëjë transparencë të plotë për këtë helmim masiv të shqiptarëve përmes plehrave dhe të mos fshihet pas lëvizjeve në qeveri. “Nuk mjaftoi që i drogoi shqiptarët, tani po i helmon shqiptarët. Ju e dini. Ndaj, sa nuk është vonë, mos u fshih pas dorëheqjeve dhe shkarkimeve fasadë të shërbëtorëve të tu. Sa nuk është vonë, bëj transparencën e plotë për këtë megaaferë skandaloze dhe të tmerrshme të plehrave, sqaroji gjërat sot, sepse nesër do të jetë vonë”, tha Basha.
Kreu i opozitës deklaroi se opozita nuk do të tërhiqet nga protestat sepse kauza e zgjedhjeve të lira është jetike për demokracinë. “Ndërkohë, ne jemi e do të jemi këtu të bashkuar, më të vendosur, më të shumtë në numër, çdo ditë, sepse kauza e zgjedhjeve të lira dhe të ndershme, nuk mund të dështojë, nuk mund të tërhiqet. Demokracia nuk mund e nuk do të largohet nga ky vend. Ajo që do të largohet nga ky vend, është oligarkia e lidhur me krimin dhe pushtetin që e solli në zyrat e shtetit.
Media ka një rol të jashtëzakonshëm për t’i dhënë shqiptarëve transparencën dhe informacionin e plotë.
Sot në këtë muzg të Republikës së vjetër dhe në këtë agim të Republikës së re, thirrja ime ndaj pronarëve të medias është, të shqyrtojnë përgjegjësitë e tyre si përfaqësues të pushtetit të katërt.
Dy rrugë ka, ne e dimë që gazetarët, operatorët, punonjësit e medias janë me interesin publik, janë me popullin e tyre, me qytetarët e tyre, ndërsa pronarët e medias sot kanë mundësinë, pavarësisht se çfarë kanë bërë deri më sot, të tregojnë qartë se a do të rreshtohen në anën e Republikës së vjetër të elitës kriminale, politike dhe ekonomike, që i ka pirë gjakun shqiptarëve në këto katër vite dhe sot po i drogon dhe po i helmon apo do të rreshtohen në interesin publik, në krahun e Republikës së re dhe shumicës dërrmuese të qytetarëve shqiptarë?”, tha Basha.
Kryesore
Continue to the category
