Persona të armatosur sulmuan një xhami në Quebec të Kanadasë duke vrarë gjashtë veta dhe plagosur tetë të tjerë.
Një zëdhënëse e policisë tha se dy veta janë arrestuar, por nuk ka dhënë më shumë hollësi rreth identitetit apo motiveve të tyre.
Kryetari i Qendrës Kulturore Islamike në Quebec, tha se njerëzit ishin mbledhur për lutjet e mbrëmjes në kohën kur ndodhi sulmi. Sipas policisë aty ishin 53 veta.
Kryeministri kanadez, Justin Trudeau, e dënoi ngjarjen si “sulm terrorist mbi myslimanët”, duke nënvizuar se vendi i tij vlerëson diversitetin dhe tolerancën fetare.
“Myslimanët kanadezë janë pjesë e rëndësishme e strukturës sonë kombëtare dhe aktet e tilla të pakuptimta nuk kanë vend në komunitetet tona, qytetet dhe vendin tonë”, tha kryeministri Trudeau.
Në qershor të vitit 2016 një kokë derri ishte lënë në dyert e së njëjtës xhami.
Pas sulmit të së shtunës, kryetari i New Yorkut, Bill de Blasio, tha se departamenti i policisë së qytetit po ofron masa të shtuara mbrojtëse për xhamitë në qytet.
“Bashkëqytetarët e mi njujorkezë që janë myslimanë: qyteti i New Yorkut do t’ju mbrojë. Departamenti i Policisë së New Yorkut do t’ju mbrojë. Ne do të luftojmë urrejtjen dhe paragjykimet”, shkroi ai në Twitter.

Presidenti amerikan, Donald Trump nënshkroi tri urdhra të tjerë ekzekutivë dje, përfshirë një plan për të mposhtur Shtetin Islamik, një riorganizim të Këshillit Kombëtar të Sigurimit dhe zgjatjen edhe për tre vjet të ndalimit për të lobuar për zyrtarët e administratës. Zoti Trump i nënshkroi urdhrat e fundit ekzekutivë në Zyrën Ovale, me pjesëmarrjen e këshilltarëve të tij. Plani për të luftuar ISIS-in i jep Shtabit të Përgjithshëm 30 ditë kohë për të dalë me një plan për të luftuar Shtetin Islamik.

Podgorica zyrtare beson se deri në qershor të këtij viti, Mali i Zi do të pranohet në NATO dhe në Samitin e këtij viti do të jetë i pranishëm si anëtar i plotë i saj. Përfaqësuesit e NATO-s dhe diplomatët e huaj, shprehin kënaqësinë me dinamikën e ratifikimit të protokollit për anëtarësimin e Malit të Zi në NATO. Kjo, sipas tyre, tregon gatishmërinë për ta mbështetur Malin e Zi, por edhe Ballkanin në rrugën e sigurisë dhe të paqes në rajon dhe Evropë.

Newt Gingrich ka thënë se ka një “admirim të madh” për ato që presidenti Donald Trump ka arritur gjatë ditëve të tij të para në pushtet dhe amerikanët do të shohin se si Trump do të vazhdojë ta ndjekë agresivisht axhendën e tij. Ai ka thënë se çdo konservator që nuk është i shqetësuar për faktin se Trump është tepër populist duhet të mbyllë sytë dhe të imagjinojë si do të ishte situata me Hillary Clintonin si presidente.
“Asgjë që ai do të bëjë gjatë dy viteve të ardhshme nuk do të ngjasojë me asnjë ditë të Hillary Clintonit nëse do të ishte presidente”, tha Gingrich. Ai shtoi se Trump mund të rezultojë të jetë presidenti “më efektiv kundër të majtës” në historinë moderne të Shteteve të Bashkuara. “Ai është kundër të majtës, kundër idiotësisë dhe është pro Amerikës”, tha Gingrich. “Cila nga këto vlera nuk e kënaq një konservator?”.
Hannity ishte dakord me të dhe tha se suksesi i Trumpit si president do të varet nga sa i aftë do të jetë të mbajë të gjitha premtimet e tij elektorale, përfshirë këtu kandidaturën “origjinale” për Gjykatën e Lartë, verifikimin ekstrem për refugjatët, sigurimin e kufijve dhe pavarësinë energjetike.

– Deutsche Welle: Zoti Wend, kryeministrja britanike, Theresa May po kërkon shanset për një marrëveshje të re tregtare me SHBA nën presidentin Donald Trump. A përbën kursi i ri britaniko-amerikan një rrezik për BE?
Ranier Wend: Një lidhje e veçantë mes dy vendeve ekziston prej kohësh dhe ka arsye historike. Mendoj, se nuk duhet të vështrojmë me frikë, se çfarë lidhjesh të reja po krijohen aty. Duhet të kthejmë sytë tek vetja, tek Europa, duhet të shohim gjithçka me vetëbesim. Forca jonë nuk varet nga ajo, se si sillen të tjerët, por se si ne veprojmë ndaj njëri-tjetrit.

– E saktë, por duket se ka kaq shumë probleme tani në BE. Britania e Madhe do të braktisë unionin, lëvizjet nacionaliste janë në rritje e sipër, ndoshta me sukses në Francë apo Holandë. BE është në situatën më të keqe në historinë e saj. A qëndron kjo?
Kam frikë, se këtu ka diçka të vërtetë. Po të shohësh Le Pen në Francë, Wilders në Holandë apo Poloninë e Hungarinë, sigurisht nuk biem dot në eufori. Por ajo që më bën optimist është se në Gjermani shumica e njerëzve ende i mbetet besnike idesë së Bashkimit Europian. Kemi një konsensus të gjerë shoqëror, që i thotë Po idesë europiane. Gjermania mbetet shtylla e Europës.

– Shumica e gjermanëve mendojnë si proeuropianë. Por edhe në Gjermani janë rritur tonet nacionaliste. Sa rrezik ka që në Gjermani të dështojë muri mbrojtës ndaj skeptikëve të BE-së?
Po të shohësh se çfarë ofron “Alternativa për Gjermaninë”, si nga ana e personelit ashtu edhe e përmbajtjes, atëherë unë them, se varet nga demokratët që të paraqitemi me vetëbesim dhe të bashkuar kundër populizmit dhe ekstremizmit të djathtë të kësaj partie.

– Në 60 vitet e fundit tandemi francezo-gjerman shërbeu si motor për bashkësinë europiane, sidomos në kohë të vështira. Edhe tani kur presidenti Hollande takohet me Merkelin kemi kohë të vështira. Çfarë sinjali mund të kuptohet nga këto takime?
Kemi nevojë për sinjalin, se pa lidhjen e ngushtë Gjermani-Francë, BE nuk do të funksionojë. Prandaj nga ana simbolike është shumë e rëndësishme, që të dyja palët takohen në situata të tilla. Por mund të apeloj tek të dyja palët: Tregoni më shumë vetëbesim dhe jo një qëndrim të devotshëm ndaj Trumpit e Britanisë së Madhe. Nuk mund të kërkosh të marrësh me të mirat e ta braktisësh BE-në.

– Çfarë mund të bëjnë institucionet europiane për të bashkuar sërish Europën?
Po, ato mund ta bëjnë këtë duke lënë mënjanë disa gjëra. Kur unë lexoj në gazetë, se Komisioni Europian do të vendosë me ligj, se çfarë lapsash duhet të përdorin fëmijët në shkolla, atëherë mund të them: Disa burokratë në BE nuk e kanë dëgjuar ende të shtënën. Nuk e kanë kuptuar, se nuk mund të merren me mikromenaxhim, por të përqendrohen tek çështjet kardinale. Tjetra që është e rëndësishme për mua. Duhet të shohim se çfarë arritëm me politikën e kursimit vitet e fundit. Sidomos në jugun europian ka mungesë perspektive. Prandaj duhet ta pyesim veten, nëse ky kurs ishte kursi i duhur.

– Do të ndikojë stili politik i Donald Trump tek ata që duan ta përçajnë Europën?
Sigurisht mund të jetë një inkurajim për Le Penët e Orbanët e Europës. Por edhe një stimulim për forcat demokratike, pro europiane që të kenë sërish guxim për të dalë nga situata e vetëm administrimit të Europës e me të gjithë forcën t’i kushtohen një politike të përbashkët europiane. Aty ku njerëzit e ndjejnë se kanë avantazhe, në aspektin social, atë të të drejtave të njeriut, vlerat. Krahas partive politike, duhet të ngrihet e gjithë shoqëria, vetëm atëherë nga kjo krizë do të dalë një shans i madh.

Që nga mbyllja e itinerarit të Ballkanit janë ngujuar në Serbi më shumë se 7.000 refugjatë. Shumë detyrohen të japin monedhat e fundit për kontrabandistët. Sa më e vështirë rruga drejt Europës, aq më i lartë çmimi. Çmimi arrin nga 200-300 euro. Për këtë çmim kontrabandistët të ofrojnë një shoqërim të vogël deri në kufirin kroat apo hungarez dhe të tregojnë rrugë pa rrugë që duhet të ndjekësh deri në kufirin hungarez. Në këtë çmim janë futur edhe gërshërët për prerjen e telave të gardhit me gjemba.
Qindra refugjatë përpiqen përditë të dalin nga “rruga qorre” në Serbi për të prekur tokë europiane. Shumica kapen nga policia, shpesh ata rrihen, iu vidhen paratë apo poshtërohen derisa kthehen sërish në Serbi. Këto informacione kanë ardhur nga raportimet e ditëve të fundit të reporterëve të “Deutsche Welle”-s pas bisedave me refugjatët. Edhe Shirsad Safi është njëri prej tyre, një afgan 17-vjeçar, i cili tregon për “ekskursionin” për një kohë shumë të shkurtër në Hungari.

Zbathur në dëborë
“Kur na kapi policia na detyroi të ecnim zbathur në dëborë, 6 orë rresht. Në grupin ku ndodhesha unë kishte edhe fëmijë. Na hodhën ujë të ftohtë”, rrëfen afgani. Ndërkohë 100 metra larg, në një park pranë stacionit të trenit në Beograd janë vënë në pozicion kontrabandistët, që presin klientë si Shirsadi. Në një depo të braktisur pas stacionit të trenit janë përqendruar më shumë se 1000 emigrantë. Kjo depo është kthyer në simbol të gjendjes së mjerueshme të refugjatëve në Europë. Refugjatët që kanë kohë që qëndrojnë këtu përmendin nofkat e kontrabandistëve si “sulltani”, “smaragdi” apo “Musai”.
Ministri i Brendshëm serb, Nebojsha Stefanoviç kundërshton. Sipas tij në dy-tre vitet e fundit janë kapur 2000 të dyshuar. “Statistikat tregojnë, se Serbia në këtë kategori mban rekordin në Europë”, thotë ministri i Brendshëm. Por kapja nuk do të thotë patjetër burg. Shumica e kontrabandistëve lirohen shpejt, vetëm në pak raste janë dënuar rreptë ndihmësit lokalë të rrjeteve kriminale.
Gordan Paunoviç, drejtues i “Info park” thotë se “arrestohen vetëm shoferë, ndihmës, këto janë pjesë këmbimi të zëvendësueshme për bandat”. Ai njeh qindra refugjatë që janë gënjyer apo janë vënë nën presion nga kontrabandistët. Paunoviç është i zemëruar edhe me qeverinë në Beograd. “Kontrabandistët tolerohen, sepse ata me mënyrat e tyre ndihmojnë për të larguar njerëzit nga vendi”. Kjo reflektohet edhe në shifra. Policia dhe Komisariati i OKB-së për Refugjatët flasin për rreth 200 migrantë që kalojnë kufirin çdo ditë për në Bullgari.

Nga refugjat në kontrabandist
Nuk ke nevojë të presësh gjatë për të dalluar një kontrabandist. Ata kanë pamjen e një afgani apo pakistanezi, si shumica e të ardhurve, por janë të veshur me rroba të pastra dhe këpucë të mira, mbajnë një celular rregullisht në veshë, disa kanë edhe makinë. Një i ri në parkun pas stacionit, thotë se për 2000 euro të premtojnë rrugë të lirë deri në Austri. Ligji i pashprehur thotë: Sa më e vështirë rruga, aq më i lartë çmimi. Paunoviç konfirmon “se në muajt e fundit gjithnjë e më shumë refugjatë, po veprojnë si kontrabandistë”. Ka shumë të rinj që përfshihen mes refugjatëve dhe ofrojnë çmime më të ulëta për refugjatët. Truket e tyre janë si tek magjistarët: kur zbulohen një herë nuk vlejnë më. Maunet e mëdha kontrollohen rreptë në kufi, edhe fshehja në vagonë trenash nuk funksionon më. Sigurisht thashethemet se kontrabandistët bashkëpunojnë me policë, nuk janë konfirmuar ndonjëherë.
Jelena Hrnjak e di shumë mirë se “çfarë mund të bëjnë njerëzit e dëshpëruar”. Ajo është punonjëse e organizatës humanitare, “Atina”, që trajton viktimat e trafikut njerëzor. Ajo rrëfen për njerëz që shesin veshkën, për gra që ofrojnë seks për të paguar apo fëmijë që janë keqpërdorur për pornografi. “Refugjatët nuk kanë mbështetje, ata shpesh janë pa dokumente. Ata kanë frikë nga arrestimi apo nga shtrimi i kërkesës për azil në Serbi, pasi nuk duan të qëndrojnë këtu”. Sipas Hrnjak kontrabandistët e vazhdojnë të papenguar punën e tyre, megjithëse itinerari i Ballkanit është mbyllur. “Aktualisht nuk ka kohë më të mira për kontrabandistët në Ballkan”, thotë ajo.

Trump ka telefonuar të shtunën edhe presidentë dhe kryeministra të tjerë. Ndër të tjera edhe me kancelaren gjermane Angela Merkel, të cilën e ka akuzuar rëndë gjatë fushatës elektorale, duke e quajtur politikën e saj ndaj refugjatëve si “katastrofale”.
Ndërsa presidenti i Francës, François Hollande e ka paralajmëruar presidentin Trump nga politika e përçarjeve dhe ndarjeve. Hollande ka folur edhe për pasojat e mundshme të politikës së proteksionizmit në ekonomi, u kumtua nga Pallati Elysee. Presidenti i Francës ka kërkuar edhe respektimin e parimeve demokratike, ndër to edhe gatishmërinë për pranimin e refugjatëve.
Trump të premten ka nënshkruar një dekret për ndalimin e futjes së refugjatëve në Amerikë. Ai ka nxjerrë nga fuqia edhe programin për refugjatë, për 120 ditët e ardhshme. Ndërsa futja e refugjatëve nga Siria në SHBA është ndaluar për një kohë të pacaktuar.