Chelsea përgatit 120 milionë euro për merkaton e verës. Blutë e Londrës, janë duke kaluar një moment shumë pozitiv dhe për të vazhduar në këtë rrugë, ekipi ka nëvojë dhe për disa përforcime. Numri një i klubit londinez, Roman Abramovich ka vendosur t’i vijë në ndihmë teknikut Antonio Conte, në mënyrë që të realizojë objektivat që ka klubi.
Lajmi bëhet i ditur nga tabloidi britanik “Mirror”, sipas të cilit padroni i “Bluve të Londrës”, Abramovich ka vendosur të bëjë gjithçka për të plotësuar kërkesat e Antonio Contes për sezonin e ardhshëm. Besimi i manjatit rus në drejtim të italianit është përforcuar, duke parë rezultatet e arritura deri tani me Chelsea-n që kryeson Premier League-n angleze i shkëputur me 9 pikë nga Tottenhami i vendit të dytë.
Një prej futbollistëvë që kërkohet nga Antonio Conte është Alvaro Morata, i cili konsiderohet si zëvendësuesin më të mirë të Diego Costa-s, gjithnjë nëse ky i fundit vendos të dorëzohet përballë milionave të klubeve kineze dhe të pranojë kalimin në vendin e Lindjes së Largët.
Madje, gjatë janarit Chelsea tentoni ta transferonte atë në “Stamford Bridge” duke bërë një ofertë të majme, por palët nuk ranë dakord. Prioritet për Blutë e Londrës është edhe qendër mbrojtësi i skuadrës së Saomthampton, Virgil van Dijk. Holandezi shihet si një emër që mund të fali akoma dhe më shumë siguri për repartin e prapavijës.
Ndërkohë, sulmuesi i Real Madridit, Mariano Diazin, refuzoi 20 oferta gjatë kësaj merkatoje. E besoni apo jo, sulmuesi i Realit të Madridit për rekord. Gjatë merkatos së janarit ka pasur 20 oferta për të transferuar Mariano Diazin, por klubi madrilen dhe vetë futbollisti kanë vendosur t’i refuzojnë të gjitha. Ai dëshiron të qëndrojë në Madrid për të vazhduar ëndrrën e nisur disa vite më parë. Mediat spanjolle kanë arritur të zbulojnë disa nga skuadrat që kanë bërë ofertë.
Bëhet fjalë për ekipe nga Spanja, Italia, Anglia, Franca, por edhe Gjermania. Sevija, Gijoni, Malaga, Espanjoli, Vijareali, Lacio, Fiorentina, Xhenoa, Marseja, Frankfurti, Uest Hemi, Leiçesteri dhe Sauthemptoni, ishin disa nga ekipet që kërkuan me ngulm lojtarin nga Republika Domenikane.

Një penallti e Totit në minutën e 97’-të nga pika e bardhë i dha Romës derbin e kryeqytetit në gjysëmfinalet e Kupës. Verdhekuqtë dhe pse nuk luajtën mirë arritën të eliminojnë pas një fitore të vuajtur 2-1 Cesenën, që u dorëzua vetëm përballë fatit. Skuadra e Spallettit ndryshe nga zakonisht zhvilloi një lojë jo të mirë përballë një Cesene që sidomos në pjesën e parë dominoi vendasit, por i mungoi vetëm goli. Golin e parë megjithatë e gjeti Roma me Dzekon në të 67’-ën.
Gëzimi i vendasve megjithatë nuk zgjati shumë, sepse Cesena mundi të barazonte rezultatin me Garritanon. Skuadra nga Seria B provoi ta çonte ndeshjen në shtesë dhe për pak ja arriti qëllimit, por penalltia e akorduar nga gjyqtari që u kthye në gol nga Toti prishi planet e miqve, me Romën që në gjysmëfinale të Kupës do të ketë tashmë një derbi me Lazion.
Pescara regjistroi një tjetër humbje në Serinë A, pasi u mund në sekondat e fundit nga Fiorentina pas një ndeshje, ku ndoshta e kishte merituar ta merrte një pikë. Chiesa me golin e minutës së 95’-të i dha fitoren skuadrës vjollcë në një ndeshje shumë emocionuese, ku Pescara arriti të shkojë në avantazh në pjesën e parë pas një goli të Caprarit në të 15’-ën.
Fiorentina dhe pse kishte drejtimin e lojës ndryshe nga zakonisht, gaboi shumë përpara portës, duke mos arritur të konkretizojë dot rastet që ju paraqitën. Gjithsesi ekipi vjollcë presionin e pjesës së dytë arriti ta konkretizojë në të 68’-ën, kur Tello i dha barazimin të tijve.
Gjithsesi pikët që humbi në fund ndaj Geonas, Fiorentina i fitoi në ndeshjen e prapambetur me Pescarën, kur gjeti golin e fitores pikërisht në sekondat e fundit, falë Chiesës që ndëshkoi Pescarën, e cila është gjithmonë e më larg zonës së shpëtimit, ndërsa Fiorentina barazoi Milanin me pikë në vendin e 7-të.

Javë aspak e qetë te Milani. Përveç rezultateve të ndeshjeve të fundit, shqetësim për kuqezinjtë përbëjnë edhe dëmtimet. Në ndeshjen e fundit me Udinesen u dëmtuan De Sciglio dhe Bonaventura. Mesfushori udhëtoi drejt Finlandës, ku iu nënshtrua ndërhyrjes kirurgjikale prej lëndimit në tendinën e muskulit të kofshës së majtë.
I pranishëm në operacion ishte edhe përgjegjësi i stafit mjekësor të Milanit, doktor Rodolfo Tavana, i cili deklaroi se Bonaventura do të kthehet të luajë vetëm në sezonin e ardhshëm, pasi problemi muskulor i futbollistit është mjaft serioz. Më e mirë situata e De Sciglio-s, që ka nisur terapinë për problemin në kaviljen e djathtë dhe do të jetë në dispozicion të skuadrës pas një muaji.
Këto mungesa, kanë bërë që për ndeshjen ndaj Sampdorias në kampionat, të nxehin motorët dy blerjet e reja të “Djallit”, Ocampos dhe Deulofeu, që shpresojnë ta nisin sfidën në formacionin titullar.
Gerard Deulofeu u prezantua këtë të mërkurë si blerja e fundit e Milanit nga faqja e klubit në “Facebook”. Mesfushori katalan i huazuar nga Evertoni premtoi se do të luftojë për fanellën kuqezi, ndërsa i lëshoi një sinjal trajnerit Montella, duke deklaruar se preferon të aktivizohet në krahun e majtë, në mënyrë që të shënojë sa më tepër gola.

“Pas njëzet e një vjetëve të jashtëzakonshëm, vendosa t’i jap lamtumirën futbollit. Ka ardhur koha të nis një kapitull të ri në jetën time…”. Kështu nisi njoftimi i befasishëm i publikuar nga Frank Lampard në “Facebook”, për t’i zyrtarizuar botës tërheqjen nga futbolli i luajtur. 2 shkurti 2017 do të mbahet mend në histori si data e lamtumirës së një prej lojtarëve më të mëdhenj të futbollit.
Një mesfushor modern, në gjendje të shënojë gola, të japë asist, me klas të jashtëzakonshëm dhe personalitet e profesionalizëm të pashoq. Ndoshta mesfushori më i mirë anglez në histori, së bashku me Gerrard dhe Beckham.
Thjesht një legjendë, ashtu siç u cilësua me të drejtë edhe nga faqja zyrtare e Premier League në “Twitter”. Lampard është një prej lojtarëve të paktë që kanë luajtur mbi njëmijë ndeshje në karrierë, prej të cilave plot 607 vetëm në Premier League, ku numëron edhe 177 gola të realizuar dhe 102 asist.
Ai është shënuesi më i mirë në historinë e Chelsea-t, pavarësisht se renditet i treti në klasifikimin special për ndeshje të luajtura me blutë e Londrës. Ndërkohë, me përfaqësuesen angleze, Frank Lampard ka koleksionuar 29 gola në 106 ndeshje.
Në karrierën e jashtëzakonshme, mesfushori ka fituar dy Superkupa të Anglisë, dy Kupa të Ligës, 4 Kupa të Anglisë, një trofe të Europa League, por mbi të gjitha tre tituj kampion në Premier League dhe një trofe të Champions në sezonin 2011-2012.
Lampard shprehu gjithashtu mirënjohje për Federatën angleze që i dha mundësinë për të marrë pjesë në kurset për trajnerë, për të nisur një aventurë të re pranë futbollit, këtë herë në stol.

Është Egjipti skuadra e parë finaliste e këtij edicioni të Kupës së Afrikës, kompeticion që po zhvillohet aktualisht në Gabon. Të besuarit e trajnerit Hector Cuper, mposhtën në gjysmëfinale pas goditjes së penalltive Burkina Fason, teksa koha e rregullt dhe 30 minutat e shtesës përfunduan në barazim 1-1. Salah me një supergol u duk sikur i dha kualifikimin, Faraonëve, por Bance u përgjigj për Burkina Fason. Shtesa nuk prodhoi asgjë dhe u nevojit goditja e penalltive për të përcaktuar skuadrën fituese.
Falë dy pritjeve të portierit 44-vjeçar El Hadary, i cili u shndërrua papritur në heroin e mbrëmjes, Egjipti u kualifikua në finalen e madhe të Kupës së Kombeve të Afrikës për vitin 2017, aty ku ekipi i Hector Cuper do të synojë të fitojë për herë të 8 në histori këtë kompeticion. Në Liberville, rastin e parë për gol e krijoi Burkina Faso, por El Hadary devijoi në këndore goditjen me të djathtën të Blatit. E nisi shumë më mirë ndeshjen skuadra e trajnerit portugez Paulo Duarte, me Bance që në të 16-tën iu afrua ndjeshëm golit. Rastin e parë Egjipti e krijoi një minutë më pas me Trezeguet, por topi për fare pak përfundoi jashtë.
Në fillim të pjesës El Hadary që s’e ka aspak problem moshën, ishte sërish protagonist duke evituar një gol të sigurtë të Bertrand Traore. Në të 66-tën u zhbllokua më në fund sfida me Salah që shpiku një gol të bukur për avantazhin e Faraonëve. Por nuk vonoi shumë dhe në të 73-tën, Bance bëri gjithçka mirë duke mposhtur El Hadary-in dhe duke barazuar shifrat. Në minutat e mbetura, Burkina Faso provoi ta fitonte ndeshjen, por Egjipti rezistoi dhe sfida shkoi në shtesë. Edhe në 2 pjesët nga 15 minuta rastet më të mira i krijoi skuadra e trajnerit Duarte, por nuk ja doli të gjente dot golin e avantazhit.
Gjithçka u vendos nga penalltitë aty ku Egjipti nisi gjithçka keq sepse Koffi ndali tentativën e parë El Said, por Burkina pasi realizoi 3 goditjet e para humbi 2 të fundit me El Hadary-in që priti goditjet e Kouakou dhe Traore, duke i dhënë kualifikimin Faraonëve sepse në krahun tjetër Salah me shokë realizuan të gjithë me radhë. Falë këtij suksesi Egjipti skuadra më e titulluar e Kupës së Afrikës e sheh veten në finalen e madhe aty ku do të provojë ta fitojë për herë të 8 këtë kompeticion.

Antoine Griezman te Manchester United është pothuajse gjithçka e kryer. Sipas mediave franceze është arritur marrëveshja për kalimin e sulmuesit të Atleticos së Madridit te Djajtë e Kuq në verën e ardhshme. Ndaj Barcelonës në humbjen 1-2 të Los Colchoneros në gjysmëfinalen e parë të Kupës së Mbretit, 25-vjeçari realizoi golin e vetëm për skuadrën e Diego Simeones, por edhe pse për momentin ndihet mirë në “Vicente Calderon”, në korrik të këtij viti Griezman do të nisë një aventurë të re. Sulmuesi i përfaqësuesve së gjelave është i intriguar nga kampionati anglez dhe dëshiron ta vazhdojë karrierën pikërisht në ishull.
Te United Griezman do të luajë përkrah shokut të tij në kombëtare mesfushorit Paul Pogba, i cili ka patur një rol kyç që 25-vjeçari të pranonte ofertën e klubit nga “Old Trafford”, ndërkohë me shumë gjasa ish-lojtari i Real Sociedadit do të formojë një dyshe ëndrrash në sulm me gjigantin suedez Zlatan Ibrahimoviç. Me Manchester United, Griezman do të firmosë një kontratë 5-vjeçare nga e cila do të përfitojë plot 18 milionë euro në sezon, aq sa merr aktualisht edhe Paul Pogba. Për lojtarin interesohen edhe shumë klube të tjera të mëdha, si Bayern Munich, Chelsea dhe Interi, por Griezman ka zgjedhur skuadrën e Jose Mourinhos.
Ndërkohë për t’ia shkëputur Atleticos së Madridit sulmuesin francez drejtuesit e United do të paguajnë klauzolën e largimit të lojtarit nga Los Colchoneros që kap shifrën e plot 100 milionë eurove. Me Atleticon Griezman ka një kontratë deri në vitin 2021, por sipas të gjitha gjasave ky është sezoni i tij i fundit me Los Colchoneros.
Mançester Junajtid hodhi një tjetër hap të gabuar në misionin për një vend në Ligën e Kampioneve sezonin e ardhshëm. “Djajtë e Kuq” nuk shkuan dot përtej barazimit pa gola në shtëpi përballë Hall Sitit të vendit të parafundit. Ky rezultat e lë ekipin e Mourinhos në vendin e gjashtë me 42 pikë.
Në takimin tjetër të mbrëmjes, beteja e mesit të tabelës mes Stok Sitit dhe Evertonit u mbyll në barazim 1-1. Piter Krauç kaloi vendasit përpara pas shtatë minutash lojë, por autogoli i mbrojtësit Rajan Shaukros baraspeshoi rezultatin në pjesën e parë (39’). Pas këtij barazimi, Evertoni renditet i shtati me 37 pikë kurse Stok Siti dy shkallë më poshtë në kuotën 29.
Ndërkohë, Mançester Siti nuk gabon dhe në javën e 23-të të Premier Ligës fiton 4-0 në fushën e Uest Hemit. Skuadra e Pep Guardiolës iu rikthye lojës së bukur dhe rezultatit pozitiv pas zhgënjimeve në ndeshjet e fundit.
Miqtë nga Mançesteri mbyllën llogaritë që në pjesën e parë falë golave të De Brujnit (17’), David Silvës (21’) dhe Gabriel Zhezusit (39’). Për sulmuesin brazilian ky është finalizimi i parë me “Qytetarët”. “Pokerin” e vulosi Jaja Ture me një penallti në të 67-n. Kjo fitore e ngjit Sitin në pozitën e pestë me 46 pikë, aq sa ka edhe Liverpuli që renditet i katërti. Kurse Uest Hemi mbetet i 11-ti në kuotën 28.

“Juventusi është si Reali i Madridit, janë skuadra që të mësojnë të fitosh”. E thotë Gonzalo Higuain dhe ka arsye për t’i besuar, argjentinasi ka folur për mediat spanjolle duke krahasuar skuadrën e tij të parë dhe të fundit në Europë, Realin dhe Juven. Ka një diferencë të madhe sipas El Pipitas mes “Santiago Bernabeut” dhe “Juventus Stadium”. “Në Itali publiku nuk është aq kërkues sa te Reali. Nuk është në kulturën e tifozëve juventinë të vërshëllejnë lojtarët e tyre”, tha ai.
Për të thënë të vërtetën Higuain ka shkuar te Juventusi në një moment kur tifozët bardhezinj nuk është se kanë ndonjë gjë të madhe për t’u ankuar. Me Juven sipas tij, ishte dashuri me shikim të parë. “Fakti që një skuadër më kërkoi dhe pagoi një klauzolë kaq të lartë për të më marrë, më bën shumë krenar për atë që ndodhi”, tha Higuain.
Për sa i përket lojtarëve të klasit, Higuain i bën elozhe shokut të tij të skuadrës Dybala, për të cilin thotë se është një fenomen dhe i duhet vetëm të ruajë qetësinë, por nuk mungon komenti edhe për dy yjet e La Ligas.
“Nuk kam thënë kurrë që Messi dhe Ronaldo nuk do të shënonin aq shumë në Itali, kam thënë vetëm se kjo do të ishte një sfidë e bukur”. Asnjë dyshim ndërkohë për sa i përket lojtarit që është pika e referimit për Higuain. “Shikoj vazhdimisht videot e Ronaldo Nazaroi, fenomenit për të mësuar, për mua ka qenë më i miri i gjithë historisë”, përfundoi Higuain.

UEFA shpërndan rreth 333 mijë euro për klubet shqiptare. Përfitimet janë pjesë e fondit të solidaritetit me vlerë 150 milionë euro që Konfederata Europiane i ka shpërndarë klubeve të 54 vendeve pjesëmarrëse në kualifikueset e Kampionatit Europian “Francë 2016” dhe në fazën finale të turneut. Partizani është skuadra që arkëton më tepër, rreth 129 mijë euro. Të ardhurat janë përfituar nga grumbullimet e portierit Alban Hoxha me kombëtaren. Skënderbeu pozicionohet e dyta përsa i takon të ardhurave me afro 120 mijë euro, të përfituara nga prezenca në skuadrën kuqezi e portierit Orges Shehi.
Shifra e përfituar nga Partizani dhe Skënderbeu përbën pjesën më të madhe të përfitimeve, sepse dy portierët përveçse kanë qenë pjesë e ekipit të De Biasit në kualifikuese ishin edhe të vetmit lojtarë të kampionatit shqiptar, që morën pjesë edhe në finalet e Euro 2016. Tirana përfitoi diçka më tepër se 46 mijë euro nga UEFA, prej grumbullimeve të ish-kapitenit Ervin Bulku, ish-mbrojtësit Debatik Curri, ish-portierit Stivi Frashëri dhe kapitenit aktual Erando Karabeci.
Skuadra e katërt shqiptare që siguroi fonde nga Kampionati Europian është Flamurtari. Vlonjatët përfituan rreth 38 mijë euro nga ish-sulmuesi Nikoloz Gelashvili, që gjatë aktivizimit me kuqezinjtë ishte i angazhuar me përfaqësuesen e Gjeorgjisë në kualifikuese. Në total UEFA shpërndau 150 milionë euro, me shifrën që u rrit me 50 milionë euro në krahasim me Euro 2012. 100 milionë euro u përfituan nga klubet që kishin lojtarë në fazën finale të turneut, ndërsa 50 milionë euro mes skuadrave, lojtarët e të cilëve ishin grumbulluar gjatë kualifikueseve. Nga programi i pagesave të solidaritetit përfituan një numër rekord prej 641 klubesh europiane.
Klubet angleze janë ato që kanë përfituar më tepër, duke ndarë plot 38,3 milionë euro të ardhura nga UEFA. Në vendin e dytë pozicionohet Gjermania me rreth 18,5 milionë euro, e ndjekur nga Italia me afro 16 milionë. Vetëm në vendin e katërt Spanja me 10,4 milionë euro përfitime për klubet, që ndiqet nga Franca me 7,2 milionë euro.

Elseid Hysaj shuan 23 qirinj. Mbrojtësi shqiptar festoi për herë të dytë ditëlindjen te Napoli, me një dedikim special të klubit të Serisë A në faqet zyrtare në rrjetet sociale. Urimet për lojtarin që është një titullar i padiskutueshëm i kombëtares së drejtuar nga Gianni de Biasi dhe absolutisht një prej yjeve kuqezi, nuk munguan as nga Federata shqiptare e Futbollit.
23-vjetori i Hysaj ishte një ditë speciale, jo vetëm për festën, por edhe për momentin që po përjeton djaloshi i lindur në Shkodër. Protagonist i padiskutueshëm në dy sezonet e fundit të Napoli dhe një prej elementëve më të rëndësishëm të trajnerit Sarri, ai është konfirmuar si një lojtar i nivelit botëror dhe interesimi nga klubet më të mëdha europiane nuk mungon. Pas Chelsea-t dhe Arsenal-it në Premier League, që cilësohen si skuadrat angleze më të favorizuara, në garën për Elseid Hysajn janë edhe dy gjigantët e La Liga-s spanjolle.
Vetëm pak orë më parë Barcelona riktheu interesin për lojtarin shqiptar, sepse prej largimit të Dani Alves klubi katalan po vuan që të gjejë garanci në krahun e djathtë të mbrojtjes. Kuqeziu ka nxitur edhe një duel me rivalët e përjetshëm të “blaugranave”, pasi Hysaj figuron edhe në listën e dëshirave të Realit të Madridit.
Megjithatë, për momentin mbrojtësi është i përqendruar te Napoli, edhe sepse pak muaj më parë rinovoi me italianët deri në vitin 2021, ndërsa gjatë verës klubet e interesuara duhet të paguajnë klauzolën me vlerë 50 milionë euro për prishjen e kontratës.