Vendimi për të nënshkruar me Interin në janar të 2015 ishte thjesht një gabim. Xherdan Shaqiri, i cili po luan sezonin e tij të dytë te Stoke City në Premier League, sulmon në mënyrë të drejtpërdrejtë klubin ziklatër si joprofesionist dhe me një infrastrukturë për të ardhur keq.
“E diskutoj edhe sot me vëllain tim Erdinin. Mançini më kërkoi me çdo kusht, por ne duhet të kishim marrë më shumë informacione për mënyrën sesi funksiononte klubi. Por nuk kishim kohë, sepse ditën që u zyrtarizova tek Interi, po ndërhynin edhe dy klube të Premier Legues. Në atë kohë isha i paduruar, kërkoja ta mbyllja sa më shpejt transferimin, sepse kampionati kishte nisur. Tek Interi, sinqerisht e them, infrastrutkura ishte për turp. Në Angli gjithçka është më profesionale: në ushqim, stërvitje dhe analizat e ndeshjeve. Në Itali, koha ishte e bukur, por bari gjithmonë ishte i gjatë. Këtu si në fushat stërvitore ashtu edhe në ndeshjet zyrtare tapeti është gjithmonë perfekt, sepse përkujdesja është e përditshme”, u shpreh Shaqiri.
Emri i tij së fundi është lidhur me Romën, por nga fjalët e veta 25-vjeçari kuptohet se rikthimi  në Serinë A për momentin nuk është një opsion për të. “Futbolli italian nuk më ka pëlqyer, është shumë i ngadaltë dhe taktik. E kisha të vështirë që të spikasja me shpërthimet e mia. Një herë gjatë stërvitjes më është dashur të ekzekutoj 200 goditje këndi nga e majta dhe në të djathtë. S’më kishte ndodhur më parë një gjë e tillë”, tha ai.
Megjithatë, kur pyetet për marrëdhëniet e tij me ish-trajnerin zikaltër Roberto Mançini, Shaqiri mundohet t’i zbusë kritikat. “Me Mançinin nuk kam patur kurrë probleme. Edhe ai ndryshonte çdo fundjavë, kurrë nuk kishte një formacion fiks. Në të njëjtën mënyrë kishte vepruar edhe të Manchester City apo Gallatasaray. Nuk ndihesha më mirë, ndaj kërkuam një zgjidhje”, përfundoi Shaqiri.

Çelsi vazhdon të marshojë në kampionatin anglez të futbollit me sigurinë, se do të jetë i pari në renditje për Krishtlindje sido që të shkojnë gjërat në derbin mes Liverpulit dhe Evertonit. Një ndryshim radikal në krahasim me kampionatin e kaluar, ku shihet dora e teknikut Antionio Konte që i ka kthyer në një makineri të mirëfilltë që për momentin ka realizuar 11 fitore radhazi dhe nuk duket se do të ndalet. Më poshtë, disa nga arsyet pse londinezët e meritojnë plotësisht vendin e parë.
Në serinë prej 11 ndeshjesh, Çelsi ka shënuar 25 gola e pësuar vetëm 2, ato në ndeshjet ndaj Totenhemit e Mançester Sitit, ku arriti të përmbyste rezultatin për të fituar ndeshjet. Antonio Konte bën diferencën. Në fillim u ankua se nuk po përshtatej dot me jetën në Angli, por Antonio Konte ka fituar 14 nga 17 ndeshjet e tij të para në Premier Ligë, si askush tjetër para tij.
Sipas faqeve të statistikave, Çelsi kryen 13,8 driblime për ndeshje, duke dominuar kampionatin edhe në këtë aspekt. Liverpuli, një rival për titullin kryen vetëm 11,6 për ndeshje, ndërsa shifra e Mançester Junajtid është edhe më e ulët, 10.
Aktualisht flitet për një skuadër që ka pësuar vetëm 2 gola në 11 ndeshje, ndërsa një vit më parë, në të njëjtën pikë të sezonit, skuadra e drejtuar nga Zhoze Murinjo kishte pësuar 27 gola dhe kishte mbrojtjen e 14-të në kampionatin anglez.
Shumë diferencë me ndjekësit
Po të merret parasysh vetëm periudha e serisë së fitoreve të Çelsit, duket qartësisht se londinezët kanë një ecuri mbresëlënëse në krahasim me të tjerët. Blutë kanë regjistruar 33 pikë, plot 12 më shumë se Liverpuli e Arsenali, të cilat janë skuadrat që ndajnë vendin e dytë në këtë klasifikim të pjesshëm, me 21 pikët e tyre.
Tibo Kurtua, por sidomos prapavija kanë qenë të pakalueshëm dhe në këtë seri pozitive, porta ka mbetur e paprekur në 9 ndeshje. Ndërkohë, skuadra e cila mban vendin e dytë në kampionat për ndeshje pa gola të pësuar, në të 17 ndeshjet, është Sauthempton me 7 të tilla.
Diego Kosta, kthehet “bisha”
Pas sezonit zhgënjyes 2015-2016, shumëkush e shihte Diego Kostën të largohej nga Çelsi. Por nëse londinezët marshojnë të pandalshëm, është edhe meritë e tij. Sulmuesi spanjoll ka shënuar 8 gola në këto 11 ndeshje, ndërsa në të gjithë sezonin ka çuar në 13 shifrën e rrjetave të tundura.
Nëse Kurtua është portieri që ka pasur më pak gjuajtje në kuadrat gjatë kësaj periudhe, 26 të tilla, edhe në fazën ofensive Çelsi renditet shumë mirë. Gjatë serisë së 11 ndeshjeve të fundit, i kalon vetëm Totenhemi me 76 tentativa drejt portës, ndërsa blutë janë të dytët me 63 të tilla.

Viti 2016 po rezulton thjesht spektakolar për Cristiano Ronaldon. Pas Topit të Artë dhe Botërorit të Klubeve, në palmaresin e luzitanit do të shtohet një tjetër trofe. Sipas gazetës “Mundodeportivo”, sulmuesi madrilen ka thyer gjithë konkurrencën në garën për çmimin “Lojtari më i mirë i vitit” që dorëzohet nga FIFA. Numri 7 do ta marrë çmimin në një ceremoni gala që do të zhvillohet në Zyrih në datën 9 janar. Kjo është hera e parë që Ronaldo do të fitojë këtë çmim, pasi gjatë 5 viteve të fundit, FIFA nuk e akordoi për shkak të marrëveshjes me “France Football” për Topin e Artë. Sipas mediave iberike, në Zyrih, Ronaldo do të udhëtojë bashkë me familjen, ndërsa presidenti i Realit të Madridit, Florentino Perez do të jetë i pranishëm në ceremoni.
Ronaldo është 4 herë fitues i Topit të Artë, ndërsa në vitin 2005 u rendit në vendin e dytë për çmimin e FIFA-s. Gjatë këtij viti ai ka fituar edhe një UEFA Champions League, Superkupën e Europës dhe titullin europian me Portigalinë. Në garë për një tjetër çmim është edhe Zinedine Zidane, por Claudio Ranieri mbetet i favorizuar për trofeun “Trajneri i Vitit”. Votimi është mbyllur në datën 22 nëntor, por edhe pse të dhënat nuk janë zyrtare, mendohet se Lionel Mesi ka arritur të zejë vendin e dytë, i ndjekur nga një tjetër lojtar i Primera Division, sulmuesi i Atletico Madrid, Antoine Griezmann. Francezi është i shkëputur ndjeshëm nga dy të parët, sepse pavarësisht sezonit spektakolar në aspektin individual, ai nuk arriti të triumfonte në asnjë nga dy finalet e vitit 2016.

Skuadrat europiane kanë fituar fansa në çdo cep të globit dhe tashmë në Brazil kërkojnë që të bëjnë të njëjtën gjë. Mënyra që Santos ka zgjedhur për ta arritur një gjë të tillë, është duke i propozuar legjendave të futbollit botëror, të cilët janë në vitet e fundit të karrierës, që të vijnë ta mbyllin atë në Brazil.
Prej disa javësh qarkullojnë zëra për një ofertë konkrete të klubit brazilian drejtuar mesfushorit gjerman, Bastian Shvajnshtajger, i cili nuk po aktivizohet rregullisht te Mançester Junajtid. Por ai nuk është i vetmi në listën e Santos, ku ka emra shumë të njohur.
“Riberi mund të jetë një emër, te Mançester Siti është Jaja Ture. Toti është një tjetër që do të tërhiqte vëmendjen e të gjithëve. Po diskutojmë disa emra, shpesh është vetë lojtari ai që kërkon një sistemim të ri dhe kushte të reja financiare”, deklaroi sot trajneri i Santos, Dorival Zhunior.

Rrugëtimi i Milanit drejt Katarit ku do të luajë Superkupën e Italisë ndaj Juventusit nuk ka nisur ashtu siç duhet, ose më saktësisht, është shtyrë për nesër. Ekipi italian duhej të udhëtonte sot drejt Dohas, por problemet me avionin kanë bërë që ky udhëtim të shtyhet dhe të shkurtojë në vetëm një ditë e gjysmë kohën e përgatitjes së skuadrës për ndeshjen në fjalë.
Sipas Ligës së Serisë A, që organizon aktivitetin, avioni çarter pritej të vinte nga Londra, por një problem teknik kishte shtyrë nisjen e tij drejt Italisë për të marrë kuqezinjtë. Duke llogaritur se kjo vonesë do të shtynte ndjeshëm edhe udhëtimin e skuadrës nga Milano, duke bërë që ajo të mbërrinte në mesnatë në Katar, është vendosur që ekipi të udhëtojë nesër.
Montela kishte zhvilluar një seancë përgatitore gjatë ditës së sotme, duke provuar formacionin bazë për ndeshjen ndaj bardhezinjve, ku sipas të gjitha gjasave do të luajë nga minuta e parë Baka dhe jo Lapadula, ndërsa Bonaventura është preferuar para Niang.

Zllatan Ibrahimoviç del kundër zërave që i sugjerojnë se ka nevojë për pak pushim, duke thënë se ndihet “si një djalosh 20-vjeçar”. Shtatlartit suedez i mjaftuan vetëm pesë minuta për të shënuar golin e nëntë në po kaq ndeshje të fundit, duke i dhënë Mançester Junajtidit kryesimin kundër Uest Bromuiçit të shtunën mbrëma, para se të vuloste fitoren 2-0 në pjesën e dytë.
Para ndeshjes në media u tha se, Zhoze Murinjo mund ta linte pushim 35-vjeçarin, për të mos rrezikuar ndonjë dëmtim të mundshëm nga tejlodhja. Mirëpo trajneri portugez tha se e kishte të pamundur të hiqte dorë nga sulmuesi, të cilin e quajti “një shembull të shkëlqyer” për lojtarët e tjerë të ekipit.
Vetë Ibra është në një mendje me vendimin e “Special One”, duke thënë se ndihet i lumtur, nëse vazhdon të luajë si titullar me “Djajtë e Kuq”. “Jam këtu dhe jam për të luajtur. Dua të luaj”, deklaroi Ibrahimoviç për rrjetin “BT”. “Si futbollist, shpeshherë verbohesh, sepse duhet të dëgjosh trupin. Në mendjen time unë jam i freskët. Jam si një djalosh 20-vjeçar. Ndihem mirë dhe do të vazhdoj. Për sa kohë trajneri dhe skuadra kanë nevojë për mua, unë do të jem gati”, u shpreh Ibra.

Viktor Lindelof pritet të jetë përforcimi i Manchester Unitedit në afatin dimëror të transferimeve.
Trajneri Zhoze Murinjo e cilëson 22-vjeçarin e Benfikës si njeriun e duhur për të blinduar repartin e tërhequr. Sipas mediave angleze, presidenti i klubit portugez, Luis Filipe Vieira, të hënën udhëtoi vetë drejt Manchesterit për të diskutuar hollësitë e fundit të marrëveshjes.
Mësohet se “Djajtë e Kuq” do të derdhin në arkat e Benfikës plot 45 milionë euro për futbollistin e përfaqësueses suedeze. Lindelof luan në qendër të mbrojtjes, por mund të përshtatet edhe në krahun e djathtë. Ai është aktivizuar si titullar në 13 nga 14 ndeshjet me Benfikën në kampionat, si dhe të gjashta në Ligën e Kampioneve. Për të siguruar shërbimet e 22-vjeçarit, mësohet se United ka mposhtur konkurrencën e PSG-së dhe Interit.
Jurgen Klopp ishte i shqetësuar për soliditetin që tregojnë në mbrojtje kundërshtarët kur ndeshen me “The Reds”. “Të gjitha skuadrat transformohen në repartin e tërhequr kur përballen me ne. Po punojmë shumë për ta zgjidhur këtë problem sepse duhet të gjejmë sa më shumë zgjidhje në sulm”, u shpreh Klopp.
Në dispozicion të Klopp për këtë duel ishte edhe mesfushori Milner, i cili do të ketë një rol kyç për të prishur aksionet e kundërshtarëve. “E njoh shumë mirë si lojtar, ai është një profesionist i vërtetë. Përsa i përket Sturridge, mund të them se nuk është ende gati për të luajtur gjithë ndeshjen, ndoshta 20 minuta për të do të ishte vendimi i duhur”. Ashtu si Sturridge, edhe Emre Can e nisën këtë duel nga stoli për shkak të një problemi me ligamentet e gjurit.

Shumë emocione dhe një fitues në “Goodison Park” për derbin e “Merseyside” mes Evertonit dhe Liverpulit. Sadio Mane i dhuroi një gol të artë Liverpulit në minutat shtesë në ndeshjen e fundit e javës së 17 të Premier League. Pak emocione në fillim të sfidës ku të dyja skuadrat nuk pranuan të rrezikonin. Ishte Lukaku rreziku kryesor për skuadrën e Klopp, por sulmuesi belg gjeti pak hapësira në mbrojtjen kundërshtare. Në krahun tjetër, treshja Mane-Origi-Firminho tregoi pak fantazi në sulmin e “The Reds”. Për të veçuar rastin e artë të vërtetë duhej të kalonin 37 minuta.
Në aksionin e Liverpulit ishte Origi ai që kishte mundësinë e artë për të kaluar në avantazh “The Reds”, por talenti belg nuk arriti të shënjestronte kuadratin e Stekelenburg. Në krahun tjetër, Funes Mori 1 minutë përpara fundit të kësaj pjese, arriti të gjente hapësira në goditjen e këndit, por goditja e ish-lojtarit të River Plate përfundoi jashtë. Liverpuli doli i transformuar nga dhomat e zhveshjes duke hedhur më shumë vështrimin nga sulmi. Në të 50-ën, Firminho nuk arriti të kalonte Stekeneburg, ndërsa 6 minuta më pas Mane u shfaq sërish në portën e holandezit, por pa arritur të shënojë.
Everton në krahun tjetër replikoi me një goditje me kokë të William, por finalizimi i tij ishte shumë i dobët dhe topi përfundoi në duart e Mignolet. Vetëm kaq ishte Evertoni i pjesës së dytë sepse Liverpul dominoi dhe një tjetër rast të pastër e pati në minutën e 75 me Origin. Ishte sërish Liverpuli që tentoi në të 80-ën, por Robles nuk u kap në befasi, ndërsa në minutën e 5 shtesë, Sadio Mane shtyu topin në rrjetë pas një aksioni që përfundoi me golin e “Të kuqve”.
Deri në vërshëllimën e fundit të gjyqtarit shifrat nuk ndryshuan, Liverpul ngjitet në vendin e tretë me 37 pikë, 6 më pak se Chelsea kryesues, ndërsa Everton mbetet në pozicionin e 9 me 23 pikë.
Ndërkohë, Manchester City ka gjetur ritmin e duhur në Premier League duke mundur në një sfidë direkte Arsenalin, që epërsinë e pjesës së parë nuk arriti ta ruajë duke u mundur 2-1. Një fitore me përmbysje për formacionin e Guardiolës, që e gjen veten tashmë i vetëm në vendin e dytë në ndjekje të Chelsea-t të rekordeve. Ky ishte suksesi i dytë radhazi për formacionin e Guardiolës në një ndeshje që nuk nisi aspak mirë, pas golit të Theo Walcott që në minutën e 5-të.
Ashtu siç na ka mësuar në këtë sezon, Topçinjtë në pjesën e parë vazhduan të ruanin pathyeshmërinë e tyre duke treguar se 45 minutat e para i kanë gjithmonë shumë të mira, problem është se ndeshja luhet 90 minuta dhe në fraksionin e dytë formacioni i Wenger ia fali sfidën City-t, që pati meritën që gjeti një gol të shpejtë me Sane.
Nga ky moment Arsenali u tërhoq në mbrojtje të rezultatit, me lojën që ishte shumë kontroll topi nga City deri në çastin kur Sterling krijoi vetë golin e fitores. Dhe pse deri në fund duheshin dhe 18 minuta, Arsenali nuk bëri asgjë për të kërkuar barazimin, madje vuajti City-n që goditi dhe shtyllën me De Bruyne. U mbyll 2-1 për City-n që mori fitoren e dytë radhazi duke u ngjitur kështu në vendin e dytë në renditje, ndërsa Topçinjtë zbritën te vendi i katërt i përhershëm.

Ishte ai “Bekimi” i Shqipërisë. Lojtari që me golin në Portugali i hapi rrugën kualifikimit të Shqipërisë në Europianin 2016, ndërsa përpara turneut në Francë u transferua te Terek Grozni. Ambientimi në futbollin dhe të ftohtin rus nuk ishte aspak i vështirë për Balajn, që u kthye menjëherë në protagonist. “Më vjen mirë që u ambientova shumë shpejt te ekipi i ri, sepse u bëra pjesë e Terekut para Europianit. Kam dhënë një kontribut me vlerë deri më tani. Si unë në aspektin personal, por edhe ekipi jemi në pozicion të favorshëm. Shpresoj të vazhdoj kështu: të shënoj sa më shumë gola dhe të ndihmoj edhe ekipin për të arritur objektivat. I kam luajtur të gjitha ndeshjet dhe kur luan nxehesh dhe përshtatesh edhe me klimën dhe të gjitha aspektet jashtë futbollit. Po ndihem shumë mirë aty”, u shpreh Balaj.
Bekim Balaj shënon, ndërsa Terek Grozni fluturon drejt objektivit për kupat e Europës. Me 8 gola të realizuar në këtë sezon, sulmuesi shkodran është i dyti në garën për golashënuesin më të mirë në Premierligën ruse, ndërsa për vazhdimësinë përpara portës nuk vendos kufij. “Të them të drejtën asnjëherë nuk i vendos vetes kufij. E rëndësishme është të shënoj, më e rëndësishme është të luaj ashtu si kam bërë, të vazhdoj me këtë rritëm, por kufij nuk i vendos vetes”, tha Balaj.
Diskret dhe me këmbë në tokë edhe kur flitet për kombëtaren. Sipas Balajt, kuqezinjtë duhet që fillimisht të përqendrohen te rikthimi në vendin e tretë në grupin kualifikues të Botërorit 2018, ndërsa nuk preferon të bëjë premtime apo parashikime për sfidën e 24 marsit 2017 në fushën e Italisë. “Ndoshta pas humbjes me Izraelin, ajo pritshmëria jonë e lartë për të kapur vendin e dytë u zbeh disi. Megjithatë jemi ende në valle, të arrijmë fillimisht vendin e tretë. Kemi shumë ndeshje të vështira, duke nisur nga sfida me Italinë. Për rezultat në Palermo? Në futboll është mirë të mos bësh parashikime, sepse në shumë ndeshje e kemi parë që parashikimet nuk dalin në fushë. Të japim më të mirën dhe më pas të shohim”, përfundoi Balaj.

Lojtari i vitit 2016 në kampionatin shqiptar. Hamdi Salihi fitoi votimin e trajnerëve dhe kapitenëve të dhjetë skuadrave elitare, duke i shtuar koleksionit një tjetër trofe. Një çmim, që bomberi shpreson të mos jetë i fundit. “Është një vlerësim jashtëzakonisht i madh, sidomos që merret në këtë vit që është tepër i rëndësishëm për futbollin shqiptar. Janë vlerësime dhe trofe që të bëjnë me përgjegjësi, për t’u justifikuar dhe për t’u rritur edhe më tepër. I falënderoj të gjithë dhe shpresoj të mos jetë trofeu i fundit”, u shpreh Salihi.
Ngërçi i këtij sezoni përpara portës nuk e shqetëson sulmuesin e Skënderbeut, që beson se kjo situatë do të kalojë. “Pavarësisht asaj që ndodh në fushë çdo fundjavë, unë jam po i njëjti. Stërvitem çdo ditë dhe mbaj të njëjtin regjim. Pastaj ato janë pjesë e futbollit, një herë shënon dhe një herë jo. Çështja është që brenda vetes të mos ndryshosh asnjëherë”, tha Salihi.
Lufta për titullin kampion premton rivalitet deri në fund. Edhe pse prej startit të kampionatit i kishte të qarta vështirësitë, Salihi shprehet i bindur se Skënderbeu do të triumfojë sërish.
“Titullin asnjëherë nuk e kemi menduar të thjeshtë. Prej fillimit e dinim që do të ishte e vështirë. Por, vazhdojmë të jemi të bindur se jemi ata që e meritojmë dhe besoj se do ta fitojmë”, përfundoi Salihi.