Trump konfimohet me 306 vota elektorale
Kolegji Elektoral ka konfirmuar zyrtarisht si President të Shteteve të Bashkuara të Amerikës, me 306 vota pro Donald Trump dhe 232 vota për Hillary Clinton. Ditën e hënë në çdo kryeqytet të shteteve rreth e rrotull Amerikës u mblodhën për të formalizuar rezultatin e zgjedhjeve presidenciale, një proces rutine tipike. Në këtë proces, Trump konfirmoi edhe njëherë se zërat për rrjedhje votash, edhe pse anëtarët republikanë të kolegjit elektoral ishin nën presion, ishin thjesht një propagandë e mbështetësve liberalë.
Trump konfirmoi 306 votat, të cilat i fitoi përmes votës popullore të 8 nëntorit të kaluar. Më pas është planifikuar një seancë e përbashkët e Kongresit Amerikan më datë 6 janar për të çertifikuar rezultatin e votimit në Kolegjin Elektoral, me zv/presidentin Joe Biden, që drejton si president i Senatit. Pasi rezultati është çertifikuar, fituesi, pra Donald Trump do të bëjë betimin në datën 20 janar. Kolegji Elektoral është vendosur që në Konventën Konstitucionale në vitin 1787.
Ishte rezultat i një kompromisi mes atyre që kërkonin votim popullor për presidentin dhe atyre që nuk dëshironin asnjë veprim të publikut në këtë proces. Kolegji Elektoral ka 538 anëtarë dhe për t’u zgjedhur president një kandidat duhet që të marrë të paktën 270 vota, pra gjysmën plus një.
Durrësi është kthyer në kryeqytetin e bandave
Deputeti demokrat Oerd Bylykbashi ngriti shqetësimin se qyteti i Durrësit është kthyer në kryeqytetin e bandave kriminale.
Referuar kërkesës së PD për shkarkimin e kryebashkiakut të Durrësit, Bylykbashi deklaroi në RTV Ora Neës se veprimi i Dakos në raport me Lulzim Berishën është një akt i paprecentë që nuk ndodh as në Palermo dhe Napoli.
“Është e shkruar e zezë mbi të bardhë, një akt i paprecedentë në gravitetin e vet. Dikush mund të pretendojë se janë procedura rutinë. Por as në Napoli dhe as Palermo nuk mund të ndodhë. Askush, as kryebashkiaku i Durrësit nuk ka të drejtë ta kthejë Durrësin në një nga ato qytete që janë simbol i krimit të organizuar. Për fat të keq, Durrësi është kthyer në kryeqytetin e këtyre bandave, por të paktën shteti nuk mund t’i japë dorë. Kjo ishte protestë e heshtur, simbolike.
Ne nuk kërkojmë më dorëheqjen e kreut të Bashkisë së Durrësit, i kemi kërkuar Kryeministrit ta shkarkojë për këtë shkelje të gjetur nga ekspertët ligjorë të PD. Të gjithë thonë se nuk do e bëjë si me kryetarin e Bashkisë së Kavajës që e mban në detyrë ndonëse është dënuar për përdhunim.
Ndërkohë që dhe ligji për dekriminalizim i jep mundësi për të shkarkuar. Kërkesa jonë për shkarkim është në tryezën e Kryeministrit, është detyrë e tij të ruajë një gram nga morali publik në lidhje me atë që para një viti u miratua në Parlamentin e Shqipërisë që është dekriminalizimi”, u shpreh Bylykbashi.
Ai thotë se Kushtetuta duhet ta vendosë në binarë këtë situatë. Bylybashi tha se është shumë i rëndësishëm zbatimi i dekriminalizimit, që së fundi sipas tij është paraqitur edhe si një kusht i panegociueshëm nga Brukseli dhe Uashingtoni.
Kushtetuta të vendosë në binarë situatën
Kjo i bie që për çdo të dënuar të ketë çertifikata të tilla pozitive, është një vendimmarrje. Si Presidenti që vendos të falë dikë dhe dikë jo, fal dikë që ka kushtet, por të tjerë nuk mund të lirohen. Po kështu dhe kryetari i Bashkisë nuk mund të pretendojë me një infantilitet, ta thjeshtojë, duke thënë se është procedurë rutinë. Për fat të keq me sa duket dhe nga lista e personave të tjerë për të cilët ka lëshuar vërtetime të tilla rezultojnë persona të dënuar për krime të rënda. Nëse është traditë e Bashkisë së Durrësit, duhet ndërprerë. Ta vendosë Kushtetuta në binarë këtë situatë.
Pushteti u implikua në lirimin e Lulzim Berishës
Në 2014 është marrë një vendim në gjyqësor, ndërkohë që në 2012 ishte marrë vendim tjetër. Në 2005-2007 të gjitha bandat përfunduan në burg, kjo ishte sjellja e PD. Në 2014, kur nuk ishim ne pushtet filluan shumë gjëra, por të arrihej deri aty sa vetë pushteti implikohet drejtpërdrejtë jo në ulje dënimi, por lirim, jemi përpara asaj që kemi denoncuar: pakti i Edi Ramës me krimin. Pakti për të ardhur në pushtet në një marrëveshje me të. Dikë ka bërë deputet, dikë kryetar bashkie apo i favorizon në forma të tjera, nuk është gjë tjetër vetëm produkte të këtij fakti. Këtë tentuam të thërrmojmë me dekriminalizimin. Më 17 dhjetor ky ligj bëri një vit, i miratuar me konsensus dhe fakti që kemi kriminelë në krye të bashkive apo Parlament, tregon se Edi Rama jo vetëm që e miratoi ligjin thjesht për farsë, por qëllimi i tij është krejt tjetër.
Ka një ligj që e vë me shpatulla pas muri, jo më kot Brukseli i kërkoi zbatimin e këtij ligji, që Edi Rama nuk i shpëton me asnjë lloj transformimi, kushte, kritere apo çfarëdolloj tentative për t’u kacavjerrë. Gjithë të tjerët, përfshirë kryebashkiakun e Durrësit, ekzekutojnë filozofinë e Edi Ramës.
Dekriminalizimi, kusht i panegociueshëm i SHBA-BE
Në këtë fazë të bëjë çtë dojë Kryeministri, e ka për detyrë vetëm ta zbatojë. Është kusht i panegociueshëm i Brukselit, Uashingtonit. I kërkojnë në mënyrë specifike të zbatojë dekriminalizimin. Zbatim do të thotë, personat e kriminalizuar ikin nga Parlamenti, personat e kriminalizuar ikin nga pushteti vendor dhe burgjet nuk zbrazen. Kemi një ligj për amnistinë. Nuk ka ndodhur kurrë që çdo vit të vijë një ligj për amnistinë, kjo është e paprecedente dhe me pasoja.
KQZ pengesë për dekriminalizimin
Bylykbashi akuzon KQZ se po bllokon dekriminalizimin në disa raste. “Ne dimë që KQZ ka çuar vetëm me kërkesën e Prokurorisë dy raste. Për fat të keq është bërë një nga organet që ka bllokuar funksionimin e ligjit, kur ka një kompetencë shumë të rëndësishme, të gjitha rastet që konstaton me pak problem t’i çojë në Prokurori për verifikim. Formularët janë publike, duhej që edhe të dhëna të tjera të viheshin në dispozicion, por nuk janë. Departamenti i Administratës Publike ka dërguar mbi 100 raste, por është e papranueshme dhe turp që kriminelë të gradave të ndryshme janë në administratë, por problemi më i madh është tek të zgjedhurit siç është Parlamenti, këshillat apo kryetarët e bashkive. Këtu po luftojmë dhe këtë po kërkojmë. Të mos fshihemi tek administrata. Ka instrumenta të tjerë që do ja shtrëngojnë më shumë lakun Edi Ramës, sa më afër zgjedhjeve të vijë aq më shumë do t’i rritet kostoja. Ligji ka vënë kufi, deputetët, qytetarët, mediat kanë të drejtën dhe detyrën morale të vënë në zbatim këtë ligj. Mediat kanë bërë rolin e tyre. Nëse dikush ka dhënë një deklaratë të bardhë, përveç faktit që zbulohen kanë kryer dhe një krim tjetër, falsifikimi i dokumentave. Personat përgjigjen penalisht”, tha Bylykbashi.
Terrorizmi godet Ankaranë dhe Berlinin
Një oficer i Forcave Speciale të Policisë turke që ishte kthyer në terrorist, hapi zjarr të hënën brenda një ekspozite arti në Ankara, duke vrarë ambasadorin rus në Turqi dhe duke plagosur të paktën tre persona të tjerë, pasi ai bërtiste shprehje xhihadiste përpara se të kryente vrasjen.
Aparate fotografik dhe video, kamera ishin drejtuar drejt ambasadorit rus, Andrei Karlov, i cili po mbante një fjalim në Qendrën për Artin Bashkëkohor në Ankara, kur një person i veshur me një kostum të zi papritur qëlloi Karlov pas shpine. Kamerat e kapën incidentin dhe tregojnë Karlov, i cili tregonte dhimbjen në fytyrë në momentin e parë e pastaj u rrëzua përdhe, ndërkohë që i armatosuri nisi të lëvizte drejt trupit të ambasadorit.
Mediat turke raportuan se, vrasësi ishte eliminuar. Zëdhënësja e Ministrisë së Jashtme ruse, Maria Zakharova, bëri një deklaratë se Karlov ishte vrarë gjatë një fjalimi të transmetuar direkt në televizion. “Çfarë ndodhi, ne e klasifikojmë si një akt terrorist”, ka deklaruar Zakharova. Ndërkohë nga Kremlini mësohet se, Presidenti rus Vladimir Putin ishte informuar menjëherë për ngjarjen.
Vrasësi është identifikuar si oficer i Forcave Speciale të Policisë turke. Këtë informacion e ka dhënë përmes një deklarate kryetari i Bashkisë së Ankarasë, Melih Gokcek. Gokcek gjithashtu tha se, sulmi synonte prishjen e marrëdhënieve mes Turqisë dhe Rusisë. Të dy vendet kishin nisur që t’i normalizonin lidhjet në qershor 2016. Këto përpjekje për normalizim erdhën pas një periudhe të tensionuar e krijuar, kur një avion luftarak turk rrëzoi një avion rus në nëntor 2015.
Ministri i Brendshëm turk, Suleyman Soylu deklaroi se vrasësi ishte 22-vjeçari Mevlut Mert Altintas dhe tha se ai kishte punuar për skuadrën kundër protestave të dhunshme për dy vjet e gjysëm deri në ditën që kreu krimin. Dëshmitarët thanë se, vrasësi kishte hyrë me dokument identifikimi të policisë.
Altintas është dëgjuar të thërrasë “Allahu akbar” dhe gjithashtu vargje popullore xhihadiste në gjuhën arabe.
“Mos harroni Aleppo-n, mos harroni Sirinë…ne vdesim atje çdo ditë… Ne nuk jemi të sigurt këtu nëpër rrugë, kur ata janë duke vdekur atje”, mësohet të ketë thënë ai.
“Ju kurrë nuk do të jeni të sigurtë, ndërkohë që nëna të tjera janë të pasigurta…Vazhdoni më filmoni, vetëm i vdekur kam për të dalë nga kjo ndërtesë”. Më pas, Altintas u kthye tek konflikti në Siri: “Kushdo që është përgjegjes për këtë (tirani) ka për të paguar”.
Menjëherë pasi sulmi përfundoi, Departamenti i Shtetit Amerikan përmes një mesazhi në tëeeter raportoi rreth një sulmi në zonën pranë ambasadës amerikane në Ankara dhe i paralajmëroi shtetasit amerikanë të qëndrojnë larg nga zona. Ishte sërish Departamenti Amerikan i Shtetit që sqaroi se i referohej vrasjes së ambasadorit Karlov e jo ndonjë incidenti të ri.
Sekretari i Shtetit, John Kerry e quajti vrasjen si një “sulm të shëmtuar”. Kerry tha se, vrasja ishte “një sulm mbi të drejtën e të gjithë diplomatëve, të cilët në mënyrë paqësore dhe të sigurtë të avancojnë në përfaqësimin e kombeve të tyre rreth e rrotull botës”.
Kerry tha se, SHBA është e gatshme që t’i ofrojë ndihmë Rusisë dhe Turqisë në hetimin e këtij sulmi. Karlov, 62 vjeç, ishte ambasador i Rusisë në Turqi që nga korriku 2013. Ai ka qenë ambasador i Rusisë në Korenë e Veriut në periudhën 2001-2006. Karlov la gruan dhe një djalë.
Putin: Vrasja, një provokim
Pas vrasjes së ambasadorit rus, Andrei Karlov në Turqi, ka reaguar presidenti i Rusisë, Vladimir Putin.
Ai ka thënë se kjo vrasje kishte shkas prishjen e raporteve ndërmjet Rusisë dhe Turqisë, transmeton Express.
Putin e ka quajtur sulmin ndaj ambasadorit rus një provokim të qartë, që ka synim të ndikojë në procesin e normalizimit të situatës në Siri.
“Kjo vrasje është qartë një provokim për të dëmtuar përmirësimin e raporteve ndërmjet Rusisë dhe Turqisë dhe dëmtimit të procesit për vendosjen e paqes në Siri, të drejtuar nga Rusia, Turqia, Irani dhe vendet e tjera të interesuar për normalizim të gjendje në Siri.” ka thënë presidenti rus.
Erdogan: Duan konfliktin tonë me Rusinë
Presidenti turk, Recep Tayyip Erdogan, ka folur për herë të parë për atentatin ndaj ambasadorit rus në Ankara, Andrei Karlov.
Erdogan, ashtu sikurse edhe Putin, ka thënë se i bashkohet homologut rus në qëndrime dhe se mes dy vendeve nuk ka asnjë përplasje për ngjarjen. Madje, ai ka qenë i mendimit njësoj si edhe Putin, se vrasja është një provokim i rëndë për të nxitur konflikt mes dy vendeve. “Ne të dy e dimë se ky provokim i rëndë nuk do të prekë marrëdhëniet mes Turqisë dhe Rusisë. Të dyja vendet nuk do bien në nivelin e këtij provokimi”, tha Erdogan.
“Dihet se kjo vrasje tashmë kërkon që të prishë procesin e paqes në Siri, të arritur me ndihmën e Rusisë dhe Turqisë”, tha Erdogan duke qenë në të njëjtën linjë me Putinin.
A ishte vrasësi një “ujk” i vetëm?
“Nuk është e qartë nëse vrasësi ishte një operator i vetëm”. Ky ka qenë qëndrimi i agjencisë së lajmeve “Reuters”.
Analistët thonë se, Mevlut Mert Altintas ndoshta mund të ketë qenë i motivuar nga pakënaqësia popullore ndaj veprimeve ruse në Siri. Moska është një aleat i fortë i presidentit Bashar al-Assad dhe ka mbështetur forcat siriane me fuqi ajrore – ose e lidhur me grupin e njohur si Shteti Islamik, i cili ka kryer nga një varg sulmesh me bomba në Turqi gjatë 12 muajve të fundit.
Edhe pse ndonjëherë është rasti, agjencia e lajmeve thotë se, incidenti ngre shqetësime për një forcë policore pas një grushti shteti të dështuar kundër presidentit Rexhep Tajip Erdogan në korrik.
Ambasadori Andrei Karlov u vra mbrëmjen e djeshme gjatë një fjalimi në një galeri arti në Ankara teksa po mbante një fjalim. Ai u ekzekutua nga Mevlut Mert Altintas, 22 vjeç, ish-pjesëtar i policisë turke, i cili ishte shkarkuar gjatë hetimeve lidhur me tentim puçin ushtarak që u zhvillua më 15 korrik.
Përgatiti: Redin Hafizi
Terrori godet Berlinin, 9 të shtypur nga kamioni
Së paku nëntë veta janë vrarë dhe rreth 50 të tjerë janë plagosur, pasi një kamion është futur në një treg të Krishtlindjeve, në qendër të Berlinit, njoftoi policia gjermane. Pamjet televizive nga vendi i ngjarjes tregojnë njerëz të shtrirë në tokë dhe tezga të rrëzuara.
Policia tha se dyshon se kamioni është përplasur qëllimisht për turmën. “Jemi duke hetuar nëse bëhet fjalë për sulm terrorist, por ende nuk e dimë”, tha një zëdhënës i policisë për agjencinë e lajmeve AFP. Steffen Seibert, zëdhënës i kancelares gjermane, Angela Merkel, ka reaguar në Twitter, duke thënë: “Jemi në zi për të vdekurit. Shpresojmë që të plagosurit t’ia dalin”. Sipas mediave gjermane, shoferi i kamionit është arrestuar.
“Kam dëgjuar zhurmë të madhe. Pastaj, kam shkuar në tregun e Krishtlindjeve dhe kam parë kaos. Shumë njerëz të plagosur. Vërtet traumatike”, ka përshkruar ngjarjen, për Televizionin CNN, Jan Hollitzer, zëvendës i kryeredaktorit në gazetën Berliner Morgenpost. Policia u ka bërë thirrje qytetarëve që të qëndrojnë në ambiente të mbyllura.
Facebook, ndërkaq, ka krijuar një faqe që u mundëson njerëzve në Berlin të lënë mesazhe dhe të tregojnë se janë mirë. Ngjarja ka ngjallur kujtimet e një sulmi në Nicë të Francës, në muajin korrik, kur Mohamed Lahouaiej Bouhlel, me prejardhje tuniziane, ka përplasur një kamion 19-tonelatash për një turmë njerëzish, buzë plazhit, duke vrarë 86 veta.
Policia ka qëlluar për vdekje sulmuesin, ndërsa përgjegjësinë për aktin e ka marrë grupi militant Shteti Islamik.
Në nëntor, Deparatamenti amerikan i Shtetit ka lëshuar një paralajmërim për “rrezik të lartë nga sulmet terroriste në Evropë, sidomos gjatë sezonit të festave të fundvitit”.
20 mijë lekë mbifaturim në muaj për çdo familje
Kastriot ISLAMI
Nga të dhënat e ERE rezulton se OSHE ka faturuar më shumë energji elektrike se ç’ka ofruar te konsumatorët. Kjo do të thotë që çdo familjeje shqiptare, mesatarisht, OSHE i ka faturuar 2 mijë lekë (20 mijë lekë të vjetra) më shumë në muaj se ç’ka konsumuar. Kjo del qartas nga llogaritë e kryera bazuar në të dhënat për bilancin energjetik dhe bilancin financiar të OSHE të ofruara nga ERE.
Diferencat mes bilancit financiar dhe energjetik
Në vitin 2015, OSHE ka faturuar për konsumatorët një energji në vlerën 61.780.665.000 lekë; kjo e dhënë del nga bilanci financiar i OSHE përmes të dhënave të ERE. Nëse kjo vlerë do të pjesëtohej me çmimin mesatar 10 lekë/kwh atëherë do të rezultonte se energjia e faturuar konsumatorëve do të ishte 6.178.066.000 kwh.
Ndërsa po t’i referohemi bilancit energjetik, pra sasisë së energjisë së shitur nga OSHE rezulton se OSHE ka shitur për vitin 2015 një sasi energjie në masën 4.459.444.000 kwh. Pra, vihet re një diferencë mes energjisë së faturuar dhe asaj të konsumuar, në vlerën 6.178.066 – 4.456.444 = 1.721.622.000 kwh.
Mënyrat e mbifaturimit
Janë për vitin 2015 rreth 100 mijë raste, kur qytetarët ankohen për mbifaturim. Nga një investigim përmes pyetjeve të bëra qytetarëve për fenomenin e mbifaturimit rezulton se ai kryhet përmes disa mënyrave i) përmes faturave aforfe (ndonëse kohët e fundit pretendohet se janë eliminuar); ii) përmes “xhirimit më të shpejtë të sahatave të matjes së energjisë”, të cilët kalibrohen qëllimisht në këtë mënyrë (OSHE e “rregullon” këtë veprim me Kompaninë e Kalibrimit përmes marrëdhënieve korruptive); iii) përmes një mekanizmi të fundit që është futur në veprim kur prishet aparati matës (në këtë rast, faturimi bëhet sipas vlerës mesatare të 3 muajve të fundit, por çuditërisht aparatet prishen në pranverë dhe mesatarja e konsumit merret për 3 muajt e dimrit kur qytetarët konsumojnë më shumë energji)
Përfundim…
Është e qartë nga këto llogaritje se konsumatorëve shqiptarë me shumë gjasa i është faturuar më shumë energji se ç’kanë konsumuar; kjo vlerë për vitin 2015 është 1.721.622.000 kwh. Nëse kjo do të përkthehej në lekë, do të ishte 17.216.220.000 lekë. Kjo do të thotë se çdo shqiptar është mbifaturuar në vitin 2015 me rreth 6000 lekë.
Ose çdo familje me katër vetë me vlerën 24000 lekë/vit. Ose për çdo muaj, familjet shqiptare janë mbifaturuar me rreth 2000 lekë (ose 20 mijë lekë të vjetra). Shqiptarët duhet të kuptojnë se atyre ju vidhen çdo muaj 2000 lekë nga OSHE.
Rama e pranon, 66% e pensionistëve nuk paguajnë dot rritjen e çmimit të energjisë
Kryetari i Partisë Demokratike, Lulzim Basha ka zbuluar gënjeshtrën e Edi Ramës për faljen e kamatëvonesave të energjisë elektrike.
Kryedemokrati thotë se më 2014 Kryeministri deklaroi që 98% e pensionistëve paguajnë rregullisht energjinë elektrike, ndërsa sot tha se mbi 66 mijë pensionistë nuk e përballojnë dot faturën e dritave.
“Edi Rama më në fund pranon dëmin e madh që u bëri shqiptarëve në nevojë me terrorin 3-vjeçar ndaj të varfërve që nuk paguanin dot dritat. Ai sot lajmëroi se do të falë kamatëvonesat, që është më minimalja që i kemi kërkuar të gjithë prej të paktën dy vitesh. Kjo është gjë e mirë për shumë familje në nevojë, sidomos tani që çmimi i dritave është rritur dhe fuqia blerëse e çdo familjeje shqiptare ka rënë.
Fatkeqësisht, falja vjen tepër vonë për Qamil Zelën që u vetëvra si pasojë e burgosjes së padrejtë për dritat e papaguara, për Arif Dodën dhe Llazar Nasin që u vetëvranë nga depresioni pasi OSHEE i shkëputi dritat, për Barbulla Pepën që vdiq nga i ftohti pasi OSHEE i shkëputi për 2 muaj energjinë në mes të acarit dhe për mijëra të tjerë që kaluan drama dhe tronditje psikologjike nga dhuna shtetërore ndaj tyre për më shumë se tre vjet.
Shqiptarët duhet t’i jenë mirënjohës faktit se po afrojnë zgjedhjet dhe tani që Edi Rama ka nevojë për votat e njerëzve do të përpiqet t’u hedhë edhe atyre ndonjë qokë të vogël, pasi tre vjet në pushtet ka menduar vetëm për pasuritë e tij dhe klientëve të tij duke grabitur paratë e qytetarëve.
Falja e detyroi Kryeministrin që të nxjerrë veten gënjeshtar: në nëntor 2014 ai pati deklaruar se 98 për qind e pensionistëve dhe 93 për qind e personave me aftësi të kufizuar e paguanin rregullisht energjinë elektrike. Sot ai u detyrua të pranojë se janë të paktën 67 mijë familje pensionistësh që nuk përballojnë dot pagesat në kohë, të energjisë dhe janë gjobitur me kamatëvonesa. Megjithatë më mirë vonë se kurrë”, shkruan në Facebook kryetari i PD, Lulzim Basha.
Kryeministri Edi Rama deklaroi dje se OSHEE do të falë kamatëvonesat e energjisë elektrike për mbi 66 mijë pensionistë.
Arrestohen 51 policë në Kosovë për korrupsion
Kryeshefi ekzekutiv i Inspektoratit Policor të Kosovës, Hilmi Mehmeti, tha të hënën se 59 zyrtarë të policisë, nga të cilët 35 shqiptarë, 23 të komunitetit serb dhe një boshnjak, janë marrë në pyetje “në cilësinë e të dyshuarve dhe ndaj tyre është kërkuar edhe masa e pezullimit nga puna”, për, siç tha, “shpërdorim detyre”.
Në një komunikatë për media të Policisë së Kosovës thuhet se të gjithëve u është caktuar masa e paraburgimit prej 48 orësh dhe për ta do të vendos prokuroria.
Kryeshefi i Inspektoratit Policor, Hilmi Mehmeti, tha se në mesin e të ndaluarve janë 20 zyrtarë policorë nga pjesa jugore dhe 15 të tjerë nga pjesa veriore e Mitrovicës, kurse një pjesë e të ndaluarve janë policë të njësitit për kontroll të autostradave.
Sipas tij, Prokuroria e Mitrovicës dhe ajo e Prizrenit kanë nisur hetimet prej më shumë se katër muajsh, pas “njoftimeve të qytetarëve se zyrtarët policorë kanë marrë ryshfet”.
Ndërkohë, në kumtesën e saj, Policia e Kosovës ka bërë të ditur se “Inspektorati Policor i Kosovës do të paraqes në Prokuroritë kompetente kallëzime penale ndaj 59 zyrtarëve policorë për veprën penale Keqpërdorim të pozitës zyrtare apo autoritetit zyrtar për marrje ryshfeti”.
Gjithashtu thuhet se IPK “do të paraqes kallëzim penal edhe ndaj 30 qytetarëve për veprën penale dhënie e ryshfetit”.
Ndërkohë, Qeveria e Republikës së Kosovës e ka përshendet aksionin e Inspektoratit Policor të Kosovës dhe organeve tjera shtetërore.
Në një komunikatë për media të Zyrës e Kryeministrit thuhet se “duke mos dashur që të ndikojë në asnjë formë në punën e organeve kompetente kushtetuese dhe ligjore, Qeveria e Kosovës vlerëson se këto veprime ligjore janë dëshmi e përkushtimit të pakompromis të institucioneve të Kosovës në luftën kundër krimit të organizuar dhe korrupsionit.”
Qeveria e Kosovës, thuhet ndër të tjera në komunikatë, konsideron se veprimet e ndërmarra nga Inspektorati Policor dhe organet tjera shtetërore ndaj zyrtarëve të Policisë nuk e zbehin besimin e qytetarëve te Policia, përkundrazi dëshmojnë profesionalizmin dhe përkushtimin e plotë të saj për luftimin e dukurive negative dhe ruajtjen e integritetit të Policisë së Kosovës.
Aksion i Policisë në Kosovë, ndalohen zyrtarë të policisë
Një operacion në shkallë të gjerë i Policisë së Kosovës, që ka ndaluar një numër të zyrtarëve të policisë, është shtrirë në disa rajone të Kosovës, ka bërë të ditur Inspektorati i Policisë.
Një numër i policëve në rajonin e Mitrovicës, në veri dhe jug të vendit, janë ndaluar dhe po merren në pyetje për, siç thuhet, “dyshime për shpërdorim të detyrës zyrtare”.
Zëdhënësi i Inspektoratit Policor të Kosovës, Arbër Beka, i ka konfirmuar Radios Evropa e Lirë ndalimin e policëve të Kosovës dhe ka shtuar se i “mbetet prokurorit të shtetit të vendos për masat e mëtejme ndaj zyrtarëve policorë”.
“Janë disa zyrtarë policorë të cilët janë ndaluar. [Janë] të disa drejtorive rajonale dhe jo vetëm nga veriu dhe jugu i Mitrovicës”, tha Beka, por nuk ka saktësuar numrin e policëve të ndaluar.
Inspektorati Policor i Kosovës (IPK), në bashkëpunim me Prokurorinë e Shtetit, ka bërë të ditur përmes një komunikate se “pas një hetimi disa mujor po zhvillon një operacion të gjerë lidhur me këtë hetim”. Inspektorati ka njoftuar se në kuadër të këtij hetimi të ndaluarit janë ftuar për intervistim.
Vuçiç: Avionë lufte nga Rusia
Serbia ka njoftuar se do të blejë aeroplanë luftarak rusë, një vendim ky që mund të nxisë tensionet në Ballkan në kohën kur janë rritur dyshimet për përpjekjet ruse që të bllokojë vendet e rajonit t’i bashkohen institucioneve perëndimore.
Kryeministri serb, Aleksandar Vuçiq ka thënë sot se ai do të udhëtojë drejt Moskës gjatë kësaj jave për të nënshkruar blerjen e gjashtë aeroplanëve MiG 29. Sipas tij, blerja e këtyre aeroplanëve bëhet “për të ruajtur lirinë dhe sovranitetin tonë”.
Megjithëse Serbia është në proces të afrimit me Bashkimin Evropian, Beogradi ka rritur bashkëpunimin edhe me aleatin e saj sllav, Rusinë. Analistët vlerësojnë se Moska ka rritur përpjekjet e saj propagandistike që ta mbajë Serbinë larg perëndimit.
Tensionet në rajon janë rritur sidomos pas raportimit të përpjekjeve për grusht shtet nga Serbia dhe nacionalistët rusë kundër qeverisë pro perëndimore të Malit të Zi, shtet ky që ka rritur përpjekjet t’i bashkohet NATO-s.
Gjoba 540 mijë euro, Shullazi-biznesmenit: Kështu je njësh ti
Prokuroria ka në dorë një tjetër dëshmi që pritet të “fundosë” Emiliano Shullazin dhe njerëzit e tij të besuar tashmë të vënë në pranga lidhur me akuzën e gjobvënies. Njëri prej dëshmitarëve kyç në procesin e pritshëm kundër bandës sëe Emiljano Shullazit, Ylvi Beqja në dëshminë e tij dhënë në Prokurori, ka rrëfyer se vetëm në një rast i ka dhënë Shullazit lekët e gjobvënies në dorë. Në raste të tjera ia ka dorëzuar njerëzve të tij.
Ylvi Beqja ka dëshmuar tashmë se nga rreth 540 mijë euro të paguara në formë gjobe Shullazit, 50 mijë euro ia ka dhënë vetë në dorë atij. Në dëshminë e tij biznesmeni Beqja ka treguar dhe momentin kur, pasi regjistrohet prona e ish-hotel “Vollgës” në emër të kompanisë arabe që ai përfaqësonte i është kërkuar takim nga Shullazi për të dorëzuar paratë. Beqja ka dëshmuar se nga një filial i një banke të nivelit të dytë ka tërhequr 50 mijë euro dhe më pas ka shkuar të takojë Shullazin në lokalin e këtij të fundit në Rrugën e “Kavajës”. Në momentin që i ka dorëzuar paratë, Beqja dëshmon se Shullazi i ka thënë: “Kështu je njësh ti”.
Biznesmeni Ylvi Beqja ka sqaruar edhe se rreth 250 mijë euro të tjera ia ka paguar mikut të Shullazit, Gilmando Danit, apo dhe dy prej njerëzve të besuar të tij, Endri Zelës dhe Endri Qyqes. Por, një material tjetër që pritet të fundosë Shullazin janë dhe çeqet e firmosura nga njerëzit e tij, pasi i ka paguar në dorë 50 mijë euro Shullazit, raporton “ABC News”.
Këtij të fundit pas pagesës kesh i ka sqaruar se kompania i kishte kërkuar do t’ia dorëzonte në çeqe bankare. Në këtë rast, përfshihen bashkëpunëtorët tashmë të arrestuar të Shullazit. Prokuroria ka arritur të provojë se, nipi i Shullazit, Endri Zela dhe shoku i tij, Endri Qyqja kanë tërhequr para të paktën në dy raste nga çeqet e kompanisë që përfaqësonte biznesmeni Ylvi Beqja.
Pak ditë më aprë, Kolegji Administrativ në Gjykatën e Lartë rihapi çështjen e pronësisë për ish-hotel “Vollgën” në Durrës, duke rikthyer për rigjykim në apel këtë çështje. Kolegji ka vendosur të rikthejë çështjen në Gjykatën e Apelit në Durrës, aty ku kompania “Saaudi Brothers” pretendon se është bërë dhe padrejtësia. Kolegji Civil ka gjetur shkelje në vendimin e Apelit dhe për këtë arsye, ka vendosur që procesi duhet gjykuar përsëri. Themeli i kësaj çështjeje do të jetë përsëri objekti i Apelit të Durrësit, që në vitin 2003 vendosi t’ia kalojë pronën Zanmir Hasës. Togat e zeza kanë lënë në fuqi vendimin për pezullimin e pronësisë së ish-hotelit dhe deri në përfundim të procesit nuk mund të kryhen transaksione me këtë pronë.
Për 11 vite kompania arabe “Saudi Brothers”, e cila e bleu ish-hotelin në vitin 1994 pretendonte pronësinë. Në vitin 2014, Gjykata e Lartë vendos pezullimin e regjistrimit të kësaj prone deri në përfundimin e procesit gjyqësor. Po gjatë 2014, Gjykata e Durrësit me një vendim të dyshimtë, sipas Prokurorisë, anashkalon Gjykatën e Lartë dhe prona regjistrohet në emër të kompanisë arabe. Pas këtij momenti 2/3 e pronës kalojnë tek shtetasit Fejzi dhe Marjeta Kodra për shumën e 671 mijë eurove. Pjesën tjetër kompania arabe me përfaqësues shtetasin Ylvi Beqja ia dhuron për mirënjohje Emiljano Shullazit.
Prokuroria ka dyshime se Fejzi dhe Marjeta Kodra nuk kanë mundësi financiare të paguajnë një shumë të tillë dhe ka dyshime se kanë pastruar para. Por, Fejzi Kodra thotë se paratë i ka marrë nga miku i tij Luan Leka. Veprimet e shitjes dhe dhurimit, thotë Prokuroria, janë kryer nga shtetasi Ylvi Beqja, i cili, pas arrestimit të Emiljano Shullazit mësohet të ketë deklaruar në Prokurori se dhurimin e kishte bërë nën kërcënim dhe se po nën kërcënimin e armëve i kishte dhënë edhe 540 mijë euro. Nga këto veprime shkruan Prokuroria në dosjen hetimore, dyshohet se është kryer një vepër penale tjetër në Hipotekën e Durrësit dhe Tiranës, siç është ajo e zhdukjes së origjinës së kësaj prone dhe regjistrimin e saj në emër të Emiljano Shullazit.
Kryesore
Continue to the category
