Xheimi Vardi nuk po arrin të shkëlqejë si në sezonin e kaluar me fanellën e Leisterit dhe sikur të mos mjaftonte mungesa e golave në kampionat, sot ka lënë në baltë skuadrën e tij me një karton të kuq mëse të evitueshëm.
Një faull i tij në minutën e 28-të të ndeshjes ndaj Stouk, solli largimin me karton të kuq të sulmuesit anglez. Stouk përfitoi dhe shënoi dy gola me Bojan dhe Alen, para fundit të pjesës së parë, ndërsa dukej sikur po u merrte tri pikë kampionëve për t’i zhytur më shumë në krizë.
Por skuadra e Ranierit reagoi pas pushimit dhe me Ulloa e Amartei në minutat e fundit, vendosi barazinë në shifra, duke siguruar një pikë shumë të vyer për objektivin që ka në këtë sezon, mbijetesën.

Chelsi i Antonio Kontes është kthyer në një makineri të pandalshme që regjistron sukses pas suksesi, duke vazhduar kryesimin e shkëputur të kampionatin anglez të futbollit. Ashtu siç ka ndodhur shpesh në ndeshjet e fundit, ka qenë i zakonshmi Diego Kosta, ai që ka gjetur rrugën e rrjetës për t’u dhënë një sukses minimal londinezëve përballë Kristal Palas.
Takimi ka qenë i ekuilibruar dhe Kristal Palas krijoi raste të rrezikshme para portës së Çelsit po aq sa kjo e fundit. Por qetësinë e prishi goli i Diego Kostas në minutën e 43-të, që mjaftoi për t’i dhënë suksesin minimal skuadrës së tij.
Ky ishte goli i 13-të i sulmuesit spanjoll në këtë edicion në Angli, ndërsa ndihmoi të sigurojë fitoren e 11-të radhazi për klubin e tij. Londinezët barazuan këtë seri rekord për klubin, regjistruar për herë të parë në shtator 2009. Ndërkaq, Antonio Konte bëhet trajneri i parë, i cili fiton 14 nga 17 ndeshjet e para në kampionatin anglez të futbollit.

Zlatan Ibrahimoviç provoi edhe një herë të mërkurën se mosha është vetëm një numër kur shënoi dhe asistoi dy golat e Mançester Junajtid në fitoren në “Selhurst Park”. Është 35 vjeç dhe po ecën ende fort në karrierë. Kristal Palasin e gjunjëzoi dy minuta nga fundi dhe për Junajtid janë 3 pikë më tepër dhe fitorja e dytë në Premier Ligë në harkun e 4 ditëve. “Djajtë” kanë 8 pikë më shumë në klasifikim falë golave të tij këtë sezon.
Për të shënuar 14 golat, suedezit i janë dashur 24 ndeshje me Junajtid, ndërkohë që 6 prej këtyre golave i ka shënuar në po kaq ndeshje të fundit. Golat e tij i kanë dhuruar pikë skuadrës së Murinjos edhe në ndeshjet ndaj Hull Sitit, Sauthemptonit, Uest Hemit, Evertonit dhe Suonsit. Prandaj nuk ka dyshime përse në këtë moshë ai ka qenë titullar në çdo ndeshje të Premier Ligës në të cilën ka qenë i disponueshëm.
Ish-sulmuesi i PSG-së po tregon se është një i mbinatyrshëm fizikisht, kjo përveç vullnetit të tij personal, edhe për meritë të trajnerit. Zhoze Murinjo e ka menaxhuar në mënyrë të shkëlqyer deri tani, duke i ofruar veteranit pushime më të zgjatura gjatë pushimeve ndërkombëtare.
“Unë e njihja karakterin e tij, sepse në këtë moshë mendoj se është karakteri, personaliteti dhe pasioni ai që vendos. Cilësinë ai e ka. Unë e dija që ai mund ta bënte këtë që po bën këtu me shumë pasion. I thashë se Anglia nuk është vendi më i mirë për pushime dhe se kur një djalë i pasur me një karrierë fenomenale dëshiron të bëjë pushime, ai nuk vjen në Angli. Ti vjen në Angli nëse dëshiron të jesh pjesë e kampionatit më të vështirë në botë dhe nëse do që t’i tregosh vetes se çfarë mund të bësh. Pra, vendimi i tij për të ardhur në Premier Ligë bazohet te kjo gjë.
Prandaj jam i kënaqur, sepse nuk bëhet fjalë vetëm për gola, por për golat e tij, rolin e liderit dhe motivimin. Unë jam shumë i gëzuar”, tha Murinjo pas ndeshjes për njeriun e arteve marciale që mori edhe trajner personal fitnesi me vete dhe frymëzohet duke dëgjuar muzikë “rege” për të treguar se është më i miri në aventurën e fundit europiane në karrierë.

Pep Guardiola nuk i trembet aspak Arsenalit. Në konferencën për shtyp në vigjilje të supersfidës së javës së 17-të të Premier Leagues angleze, trajneri i Manchester City, edhe pse thuri elozhe për kolegun e tij Arsene Wenger nënvizoi se Citiziens i kanë të gjithë mundësitë për t’i mposhtur Topçinjtë pavarësisht se në 6 ndeshjet e fundit nuk kanë fituar ndaj tyre.
“Nëse ne luajmë mirë jam i sigurtë që ata do të mbrohen gjithë kohës. Për momentin futbollistët e mi janë pak dembelë dhe nuk jemi ende ajo skuadër e fortë që presin të gjithë. Arsenali në krahun tjetër ka kualitete dhe duhet vlerësuar. Jam përballur disa herë me Arsene Wenger-in kur kam qenë në drejtimin e Barcelonës dhe Bayernit dhe kam shumë respekt për të si trajner. Por kjo ndeshje është një tjetër histori. Arsenali di të mbrohet mirë dhe kundërsulmon rrezikshëm kështu që për ne nuk do të jetë një ndeshje aspak e thjeshtë”.
Më pas Guardiola u ndal të fliste për dy individë të skuadrës së tij, mesfushorin nga Bregu i Fildishtë, Yaya Toure dhe turko-gjermanin Ilkay Gundogan, i cili së fundmi ka pësuar një dëmtim të rëndë.
“Më vjen shumë keq për Ilkay-in. Do të jetë një mungesë e rëndësishme për ne. Ai është një futbollist shumë i pafat, por futbolli i tillë është dhe nuk i shmangesh dot dëmtimeve. Yaya Toure? Është i madh, është mirë fizikisht. Toure ka shumë personalitet. Është një lojtar i fortë dhe me shumë cilësi. Në këtë moment kemi nevojë për një si ai në mesfushë”.
Të dielën në orën 17:00 në “Stadiumin Etihad” do të zhvillohet dueli i javës në Premier League, takim ku ekipi i Arsenalit do të bëjë çmos për të ruajtur ndaj Manchester City-t ecurinë pozitive në përballjet ndërmjet tyre, që në fakt zgjat prej plot 6 ndeshjesh. Një sfidë tepër e veçantë për fansat e këtyre dy klubeve, për vetë rrethanat, sidoqoftë trajneri i Topçinjve, Arsene Wenger mundohet t’i thjeshtojë gjërat, duke shpjeguar pak a shumë atë çfarë nevojitet për të bërë mirë në një ndeshje të tillë.
“Ndeshje të mëdha me City-n? Duhet që të mbrojmë mirë, që të gjithë së bashku dhe të mos kemi ndrojtje, çdo herë që kemi topin, duke u përpjekur për të sulmuar, sepse kjo është filozofia jonë dhe mbi të gjitha është pikërisht gjëja që nevojitet në një ndeshje të tillë, megjithatë nuk duhet të harrojmë gjithashtu që City është një skuadër tepër e fortë kur luan në sulm, ndoshta akoma më shumë tani me Guardiolën, kështu që duhet të jemi të përqendruar për t’u mbrojtur sa më mirë”, u shpreh Wenger.

Besart Berisha shkruan emrin e vet me germa të arta në historinë e futbollit australian. Sulmuesi shqiptar barazoi rekordin e Archie Thompsonit si shënuesi më i mirë në kontinentin e largët.
Berisha dje i dha Melburn Viktorit fitoren 2-1 në derbin ndaj Sitit, me golin e 90-të për të që prej transferimit në Australi më 2011-n. Një arritje e jashtëzakonshme kjo për 31-vjeçarin nga Prishtina, duke pasur parasysh që arrin një legjendë si Tompson në gjysmën e kohës së këtij të fundit. 38-vjeçari i shënoi 90 golat e tij në dhjetë sezone, kurse Berisha në vetëm pesë. Me këtë gol Berisha ka hyrë në histori të futbollit australian, duke u bërë golashënuesi më i mirë në histori me 90 gola. Aq sa Berisha ka legjenda Archie Thompson, por kosovarit i janë dashur 74 ndeshje më pak për të arritur këtë shifër.

Nga vëzhgimet e talenteve dhe shifrat mbresëlënëse të projektit për të seleksionuar lojtarë të rinj në të gjithë Europën deri te ëndrra që të bëhet trajner. Drejtori teknik i ekipeve kombëtare, Paolo Tramexani rrëfen planet e së tashmes dhe objektivat e së ardhmes.
Vëzhgimet nëpër Europë: “Le të themi që po bëjmë një punë mjaft të rëndësishme, tek e cila presidenti Armand Duka dhe e gjithë Federata besuan. Për rrjedhojë ndihemi të shpërblyer, që mund të vëzhgojmë të gjithë djemtë shqiptarë, të cilët jetojnë në Europë dhe janë vërtet të shumtë. Kjo realizohet nëpërmjet një rrjeti zbuluesish, persona të cilët jetojnë në emigrim, por edhe nëpërmjet një kërkimi që kryejmë ne në mënyrë direkte. Në këtë mënyrë arrijmë të monitorojmë shumë të rinj, do të thoja qindra lojtarë në të gjithë Europën”.
Risi në seleksionime: “Në të ardhmen kemi programuar të zhvillojmë grumbullime edhe në shtete ku më parë seleksionimet nuk ishin realizuar në mënyrë direkte. Bëhet fjalë për Belgjikën, Austrinë dhe Gjermaninë, por edhe vendet e Europës Veriore, ku përfshihen edhe Danimarka e Suedia, por edhe në Turqi. Arsyeja që na shtyn ta kryejmë këtë punë, është se ne e cilësojmë të rëndësishme që t’i ndjekim lojtarët prej moshës së vogël, kur janë ende fëmijë. Në fakt jemi gati që të inaugurojmë edhe kombëtaren e 15-vjeçarëve, e cila mungonte në organizimin tonë. Besoj se është e rëndësishme, që kjo rrugë të përshkrohet me ndihmën e të gjithëve, duke nisur nga kombëtarja e madhe dhe deri te më të vegjëlit, duke përfshirë në këto seleksionime edhe trajnerët e të gjitha skuadrave kombëtare. Kjo është mundësia që të vëzhgojmë, të unifikojmë edhe programin, të shohim të njëjtat aspekte te të rinjtë, duke bërë që kërkimi të ketë si synim një lloj të caktuar lojtari. Cilësitë e para që shohim dhe vlerësojmë janë aspekti teknik, tekniko-individual, vizioni i lojës, shpejtësia e të menduarit dhe shpejtësia me topin në këmbë. Mendojmë se këto janë aspekte të rëndësishme dhe që lojtarët tanë, mbi të gjitha të rinjtë, të cilët janë edhe më të talentuar, i kanë në mënyrë natyrale. Është e qartë, që ndoshta ata që janë rritur jashtë vendit, ndryshe nga të rinjtë që jetojnë në Shqipëri, mund të ketë eksperiencën e një shkolle tjetër. Në Itali u evidentua që kemi fëmijë, të cilët prej moshës së vogël, janë mjaft të përgatitur edhe në aspektin taktik, duke marrë shembull nga kultura e futbollit italian. Kjo na e lehtëson punën edhe për të ardhmen. Kemi vëzhguar gjithashtu fëmijë të moshës 12-13-vjeçare dhe është kënaqësi të shohësh që në skuadrat e akademitë e Juventusit, Milanit, Romës, Interit, Lazio-s, Fiorentinës, Empolit, Atalantës, Parmës, Sasuolos e kështu me radhë, pra në të gjitha skuadrat e klubeve të rëndësishme luajnë fëmijë shqiptarë. Mendoj që kjo është një arsye për të qenë krenarë. Ne duhet t’i ndjekim, t’u qëndrojmë pranë, në mënyrë që këta të rinj ta ndjejnë se ndodhemi aty dhe t’u bëjmë të kuptojnë, që e ardhmja varet nga ata”.
Skedimi i të rinjve: “Për ne është e rëndësishme t’i ndjekim dhe t’i monitorojmë të gjithë. Vendosëm se mënyra më e lehtë për ta realizuar është të plotësojmë një program të personalizuar për secilin lojtar. Si për ata që ndjekim, ashtu edhe ata që seleksionojmë, të vetëdijshëm se mbi të gjitha, te të rinjtë shohim talentin aktual, por edhe atë që mund të jetë talent i perspektivës. Në aspektin organizativ, e cilësojmë shumë të rëndësishëm menaxhimin e të gjitha të dhënave që dalin nga seleksionimet dhe nga vëzhgimi i këtyre fëmijëve. Si të atyre që seleksionohen, e që sipas nesh në këto momente janë më të avancuar në krahasim me të tjerët, por edhe lojtarë që aktualisht kanë një nivel paksa më të ulët. Vlerësimi duhet të jetë kompleks, duhet të mbahet parasysh që çdo fëmijë ka një zhvillim të veçantë fizik, teknik, taktik dhe në zgjidhjen e situatave të lojës. Do të vazhdojmë t’i monitorojmë dhe t’i ndjekim në kohë, duke u kujdesur për të gjithë aspektet, nëpërmjet një skede vlerësimi. Këto skeda janë teknike, taktike, fizike, koordinative, por janë edhe emocionale. E rëndësishme është edhe puna e përgatitësit atletik të ekipit të parë, Alberto Belle. Ai kryen teste njësoj si me kombëtaren A: me GPS dhe kompjuter, për të matur elasticitetin muskulor, gjendjen fizike, kohën e shpërthimit dhe mbi të gjitha shpejtësinë me topin në këmbë”.
1,000 lojtarë nën vëzhgim: “Mendoj që në momentin kur të përfundojmë edhe seleksionimet në vendet që thashë më parë, pra Turqi, Danimarkë, Suedi, Gjermani, Belgjikë dhe Austri, duke përfshirë edhe ato që kemi bërë në Itali, Zvicër, Shqipëri dhe Greqi do ta kalojmë shifrën e 1,000 fëmijëve”.