Shefi i sektorit për mbështetjen teknike shkencore pranë Policisë së Shtetit, Eduart Goga, ka pranuar dje para Komisionit Hetimor parlamentar, se pajisja IMSI CATCHER është përdorur disa herë për përgjime. Dje në Komisionin Hetimor parlamentar ishte thirrur për të dëshmuar edhe Ardian Çipa, drejtor i Hetimit të Krimit të Organizuar në polici, por ai refuzoi t’u përgjigjet pyetjeve për futjen e pajisjes së përgjimit IMSI Catcher dhe mënyrën sesi u përdor për të përgjuar ambasadat dhe institucionet e tjera shtetërore. Ashtu si ministri i Brendshëm, Saimir Tahiri e drejtori i Policisë së Shtetit, Haki Çako, Ardian Çipa ishte thirrur në Komisionin Hetimor për t’u pyetur si dëshmitar, por ai nuk pranoi t’u përgjigjej pyetjeve të kreut të Komisionit për këtë hetim, nën argumentin se, “për këtë po heton Prokuroria dhe unë deklarimet e mia i kam bërë atje”.
Kryetari i Komisionit Hetimor, Flamur Noka pyeti Çipën, a është në dijeni që pa firmën e Prokurorit është futur një pajisje e paligjshme në territorin e Shqipërisë, ndërsa ai u përgjigj se, “jam thirrur në Prokurori dhe jam shprehur për këtë çështje”. “Çmoj sugjerimin, por ky Komision nuk po kërkon që dëshmitarët të kthejnë përgjigjen që duam ne. Kanë për detyrë t’i kthejnë përgjigje Komisionit. Por nuk është etike, as morale dhe as ligjore kodi i heshtjes”, u shpreh Noka.
Noka u shpreh se, Ky ‘kod i heshtjes’ i aplikuar nga ministri dhe drejtues të Policisë së Shtetit, është kodi i mafies. “Për sa i përket ‘kodit të heshtjes’, të vendosur nga Saimir Tahiri, Haki Çako dhe Ardian Çipa, nuk është se e them unë, por duket. Është e rëndë të aplikohet ‘kodi i heshtjes’ nga drejtuesit e Ministrisë së Brendshme dhe të Policisë së Shtetit. Ky ‘kod i heshtjes’ i aplikuar nga ministri dhe drejtues të Policisë së Shtetit, është kodi i mafies”, u shpreh Noka.
Më pas, Komisioni Hetimor parlamentar ka thirrur për të dëshmuar edhe Artion Dukën, shefi i Forcave Operacionale dhe Eduart Gogën, Shef i Sektorit të Teknologjisë dhe Trajnimeve në Forcat e Posaçme Operacionale. Ky i fundit i mundësoi anëtarëve të komisionit përgjigje konkrete mbi pyetjet e tyre.
Rifreskuese ishte dëshmia e shefit të sektorit për mbështetjen teknike shkencore pranë Policisë së Shtetit, Eduart Goga, i cili pranoi se ka patur një aparaturë përgjimi e cila, sipas tij, ishte ofruar nga partnerët ndërkombëtarë. “Sektori jonë trajnohet në vazhdimësi nga partnerët ndërkombëtarë për përgjime. Kemi bërë trajnime të vazhdueshme me IMSI CATCHER. Ne ofrojmë ambientet ata ofrojnë pajisjet”, u shpreh Goga.
Goga tha më tej se, kjo pajisje ishte përdorur disa herë për trajnim. “E kemi përdoruar disa herë pajisjen e përgjimit për trajnim. Nuk kemi praktikë të njoftojmë Prokurorinë”, deklaroi Goga. Goga tha se, sektori i tij nuk ka kryer trajnime në ambiente burgjesh. Për rastet apo ambientet ku janë bërë trajnimet me pajisjen IMSI CATCHER, Prokuroria nuk është njoftuar, pasi sipas Gogës, nuk ekziston një detyrim ligjor për vënien në dijeni apo marrjen e lejes nga Prokuroria për raste trajnimi.
Pyetjes së kreut të komisionit Flamur Noka, lidhur me hyrjen e një makine në Burgun e Peqinit, më datë 11 qershor, shefi i Forcave Operacionale, Artion Duka tha se, “nuk është e vërtetë data dhe lloji i mjetit”. Por kjo deklaratë e tij nuk qëndron pasi, vetëm 6 muaj më parë, Prokuroria lëshoi urdhër për konfiskim të librit të hyrje-daljeve në burgje.
Në 12 qershor 2015, automjeti me targë AA 380 BD, mjet i cili një ditë më parë ndaloi në Burgun e Peqinit për 30 minuta, figuron të ketë hyrë për monitorim dhe matje të ajrit në paraburgimin “Mine Peza”.
Deputeti i PD, Asllan Dogjani i ka kërkuar Komisionit Hetimor që të verfikohen targat e Forcave Operacionale. “Të kërkojmë targat e forcave operacionale”, është shprehur Dogjani, por kjo kërkesë është kundërshtuar nga deputeti i PS, Pjerin Ndreu. Ndreu ka ndërhyrë në momentin që po fliste deputeti Dogjani, por ky i fundit i është kundërpërgjigjur se edhe ai ka qenë polic, por nuk ka hyrë në burg. Kur flas unë mos me ndërprit mua ti polic. Dhe unë polic kam qenë, por nuk kam qenë në burg si ty”, iu drejtua Dogjani Ndreut. Pas këtyre debateve, Pjerin Ndreu është larguar nga salla, duke braktisur mbledhjen e Komisionit Hetimor parlamentar.

R.POLISI

Kolegji Administrativ në Gjykatën e Lartë rihap çështjen e pronësisë për ish-hotel Vollgën në Durrës, duke rikthyer për rigjykim në apel këtë çështje. Në seancën e zhvilluar ditën e djeshme, kolegji ka vendosur të rikthejë çështjen në Gjykatën e Apelit në Durrës, aty ku kompania Saaudi Brothers pretendon se është bërë dhe padrejtësia.
Kolegji Civil ka gjetur shkelje në vendimin e Apelit dhe për këtë arsye, ka vendosur që procesi duhet gjykuar përsëri. Themeli i kësaj çështjeje do të jetë përsëri objekti i Apelit të Durrësit, që në vitin 2003 vendosi t’ia kalojë pronën Zanmir Hasës. Togat e zeza kanë lënë në fuqi vendimin për pezullimin e pronësisë së ish-hotelit dhe deri në përfundim të procesit nuk mund të kryhen transaksione me këtë pronë.
Për 11 vite kompania arabe “Saudi Brothers”, e cila e bleu ish-hotelin në vitin 1994 pretendonte pronësinë. Në vitin 2014 Gjykata e Lartë vendos pezullimin e regjistrimit të kësaj prone deri në përfundimin e procesit gjyqësor. Po gjatë 2014, Gjykata e Durrësit me një vendim të dyshimte, sipas Prokurorisë, anashkalon Gjykatën e Lartë dhe prona regjistrohet në emër të kompanisë arabe. Pas këtij momenti 2/3 e pronës kalojnë tek shtetasit Fejzi dhe Marjeta Kodra për shumën e 671 mijë eurove. Pjesën tjetër kompania arabe me përfaqësues shtetasin Ylvi Beqja ia dhuron për mirënjohje Emiljano Shullazit.
Prokuroria ka dyshime se Fejzi dhe Marjeta Kodra nuk kanë mundësi financiare të paguajnë një shumë të tillë dhe ka dyshime se kanë pastruar para. Por, Fejzi Kodra thotë se paratë i ka marrë nga miku i tij Luan Leka.
Veprimet e shitjes dhe dhurimit, thotë Prokuroria, janë kryer nga shtetasi Ylvi Beqja, i cili, pas arrestimit të Emiljano Shullazit mësohet të ketë deklaruar në Prokurori se dhurimin e kishte bërë nën kërcënim dhe se po nën kërcënimin e armëve i kishte dhënë edhe 550 mijë euro.
Nga këto veprime shkruan Prokuroria në dosjen hetimore, dyshohet se është kryer një vepër penale tjetër në Hipotekën e Durrësit dhe Tiranës siç është ajo e zhdukjes së origjinës së kësaj prone dhe regjistrimin e saj në emër të Emiljano Shullazit.
Ndërkohë që Gjykata e Lartë ka vendosur që kjo pronë të qëndrojë në masën e sigurisë për t’u mos u tjetërsuar, atë të sekuestros preventive për llogari të Prokurorisë së Durrësit, e cila ka nisur hetimet për mënyrën se si kjo pronë u tjetërsua nga pronarja e para diktaturës Alie Fortuzi tek Zamir Hasa, Saudi Brother, Ylvi Beqaj e në fund Emiljano Shullazi.

Hetimet

Bashkëpunëtori i drejtësisë Ylvi Beqja, ka rrëfyer me detaje para prokurorëve, të gjithë kalvarin e proceseve gjyqësore për të marr ish-hotel Vollgën si përfaqësues i kompanisë arabe. Si dhe ka treguar njohjen dhe takimet me Emiljano Shullazin dhe dhunën e kërcënimet që ky i fundit i ka bërë, duke detyruar të paguaj në formë gjobe rreth 550 mijë euro cash.
Burimet thonë se biznesmeni tashmë i mbrojtur, ka treguar se si pasoj e kërcënimeve dhe dhunës është detyruar t’i paguajë Shullazit dhe pjesëtarëve të bandës së tij rreth 400 mijë euro cash. Para këto që janë provuar se i ka tërhequr nga bankat e nivelit të dytë në disa raste, duke ia dorëzuar pjesëtarëve të bandës së Shullazit. Por, pas dorëzimit të kësaj shume, Beqja ka treguar se për të lënë gjurmë, ka kërkuar që pagesat e tjera të bëheshin me çeqe me arsyetimin se nuk e lejonte kompania që të tërhiqte para CASH. Të ndodhur në këto kushte, Shullazi ka pranuar kërkesën e tij, duke ia dorëzuar tre emrat e të besuarve të tij, si personat në emër të cilëve do kalonin parat.

Operacionet për arrestimin e Klement Balilit, të cilësuar si “Eskobari i Ballkanit”, duket se nuk po realizohen në fshehtësinë që e kërkon detyra. Ashtu si edhe në tre tentativat e mëparshme për kapjen e tij, kanë qenë informatorët ata që e kanë njoftuar Balilin; po njësoj ka ndodhur edhe në aksionin e nisur më 10 tetor.
Teksa vijon aksioni i policisë për kapjen e “Eskobarit të Ballkanit”, është dërguar për verifikim nga SHKB një oficer i Policisë së Sarandës, i cili dyshohet se ka ndihmuar Balilin. Sipas burimeve nga grupi hetimor, Balili informohej nga dy oficerë lidhur me operacionet që zhvilloheshin për kapjen e tij.
Përveç oficerit për të cilin kanë nisur tashmë hetimet, emri i të cilit nuk bëhet i ditur, mësohet se verifikime po bëhen për të gjithë grupin e përfshirë në operacionin e ndërmarrë gjatë këtyre ditëve për arrestimin e Klement Balilit.
Operacioni i katërt për arrestimin e tij, është shtrirë në Sarandë, Gjirokastër, Ksamil e Durrës, por deri më tani nuk ka patur rezultat. Po kështu edhe tre tentativat e mëparshme për arrestimin e tij kanë dështuar.
I pari operacion është zhvilluar në verë, gjatë kohës kur ka qenë piku i turistëve në Sarandë. U tentua të arrestohej, por operacioni dështoi, pasi ai u informua.
Operacioni i dytë është bërë diku rreth datës 20 tetor. U dërgua skuadra speciale nga Tirana për të mos patur dekonspirim të operacionit, por në momentin kur u ngrit prita, ai la makinën dhe u largua. Në mjetin e blinduar ai la celularin për të shmangur arrestimin.
Tentativa e tretë u bë tre ditë më vonë. Pati informacion se ai do të ishte në një stadium ku luante Delvina. Duke përfituar nga fakti se në stadium ka shumë njerëz, aty u dërgua sërish nga Tirana skuadra speciale, e kamufluar si tifozë, civilë. Por ai nuk shkoi në stadium. Pas ndeshjes është kontrolluar makina e kryetarit të bashkisë, por ai nuk u gjet.
Klement Balili akuzohet për trafik ndërkombëtar narkotikësh, ndërsa në dosjen voluminoze të dërguar nga qeveria greke kërkohet edhe hetimi pasuror për 44-vjeçarin.

Ndonëse dy ditë nga vrasja e Agron Xhezairit, babai i të shumëkërkuarit nga policia Albi Xhezairi, i cili akuzohet për vrasjen e Aleksandër Bardhit, ende nuk ka një të dyshuar për ngjarjen. Burime zyrtare nga Policia e Ksamilit bënë të ditur se të gjithë personat e shoqëruar dje, mes të cilëve dhe familjarë të Aleksandër Bardhit, të cilët u morën në pyetje dhe janë lënë të lirë. Të njëjtat burime theksuan se nuk ka asnjë të shoqëruar aktualisht në komisariat.
Hetimet që po bëhen nga policia në lidhje me vrasjen e Agron Xhezairit, kanë dalë në përfundimin se autorët mund të jenë vrasës me pagesë. Vrasja e babait të Albi Xhezairit, i cili është i shpallur në kërkim si i dyshuar në vrasjen e Aleksandër Bardhit në Sarandë, ndodhi mbrëmjen e 2 ditëve më parë, ndërsa nuk ka asnjë person të ndalur.
Dyshohet se autorët e ngjarjes së rëndë, pas krimit janë larguar për në Greqi, për shkak edhe të afërsisë së zonës me kufirin. Nga dëshmitë e marra mësohet se kanë qenë më shumë se dy persona në këtë krim, por vetëm një person ka qëlluar ndaj Xhezairit.
Krimi i rëndë ndodhi të dielën ku 53-vjeçari Agron Xhezairi është vrarë me breshëri arme, ndërsa burime të BalkanWeb thonë se ka dyshime të forta që vrasja mund të jetë bërë për hakmarrje, pasi djali i tij është personi kryesor i dyshuar për vrasjen e Aleksandër Bardhit më 24 shtator në fshatin Shëndëlli. “Rreth orës 17:40, është qëlluar me armë zjarri një shtetas, i cili ka gjetur vdekjen.
Policia ka shkuar menjëherë në vendngjarje dhe ka konstatuar se në fshatin Ksamil të Sarandës, persona të pa identifikuar ende kanë qëlluar me armë zjarri shtetasin A.Xh., rreth 53 vjeç, banues në Ksamil, i cili për shkak të plagëve të marra në trup ka ndërruar jetë disa minuta më vonë.
Ngjarja ka ndodhur në oborrin e banesës së këtij shtetasi, ku dyshohet se krimi është kryer me armë zjarri të llojit “Automatik”.

Mungesa e shpërblimit të fundvitit është një ndër arsyet kryesore që do t’i mbledhë mësuesit e Tiranës, por edhe të rretheve përpara godinës së Ministrisë së Arsimit të premten, në orën 14:00.
Disa kërkesa kryesore, që ia kanë përcjellë më herët në një letër ministres Lindita Nikolla, veçanërisht në lajmërimin e tyre, Sindikata e Pavarur e Arsimit rendit një sërë kërkesash: shpërblimi i fundvitit, respektimi i normave të punës, pagesa e orëve mbi normë, qëndrueshmëria e reformave, transparenca në emërime, vendime, kurrikula e të tjera.
Me disa prej tyre, Ministria e Arsimit është njohur nëpërmjet një letre të nisur që më 22 nëntor, ku Sindikata e Pavarur e Arsimit të Shqipërisë konstaton se partneriteti me MAS nuk po funksionon siç është parashikuar në kontratën kolektive të punës. Nisur nga kjo, parashtrohen disa shqetësime që kërkojnë zgjidhje:
1. Formatizimi dhe funksionimi i Këshillit Kombëtar të Arsimit parauniversitar dhe të këshillave vendorë të arsimit parauniversitar.
2. Pagesa e transportit të mësuesve, duke e llogaritur largësinë e vendit të punës nga qendra e njësisë administrative ku banojnë.
3. Pagesa e orëve mbi normë, të provimeve të fundvitit, të maturës shtetërore e të tjera.
4. Shpërblimi prej 10 mijë lekësh për çdo mësues në fund të vitit si detyrim ligjor që rrjedh nga
Kodi i Punës, neni 114, pika 2 dhe neni 10.11 i kontratës kolektive të punës.
Protestat e vazhdueshme e madje edhe bojkoti i mësimit janë dy mjetet që sindikata ka përdorur që zëri i mësuesve të dëgjohet. Shpesh ata i kanë paraqitur kërkesat e tyre në formë shkresash ministrisë apo edhe i kanë shprehur në komisione parlamentare. Të parët që u prinë protestave në rang vendi ishin mësuesit e Shkodrës, të cilët protestuan një ditë më parë përpara shkollave. Ata pretendojnë se shpërblimi i fundvitit është paracaktuar në buxhet dhe nuk është dhënë që prej më shumë se tri vitesh. Përpara pak ditësh, Ministria e Arsimit u ka nisur të gjithë mësuesve një letër për fundvitin, në të cilën i uron e i motivon ata për punën e tyre.

Policia e Shtetit ka zhvilluar në mesditën e djeshme operacionin e koduar “Blici rrugor”, të shtrirë në 12 qarqet e vendit, në akset kryesore dhe zonat urbane. Operacioni nisi në orën 12:00 dhe zgjati deri në orën 13:30 minuta. Policia e Qarkullimit Rrugor është mbështetur nga Policia e Rendit, FNSH e Shqiponjat.
Në këtë operacion blic u angazhuan rreth 1200 punonjës policie në total. U ngritën dhe funksionuan 280 pika kontrolli në gjithë vendin. Aksioni synoi goditjen e paligjshmërisë, kryesisht atë që lidhet me zbatimin e nenit 170 të Kodit Rrugor, për mos vendosjen e rripit të sigurimit.
Në total në të gjithë vendin u vendosën 1495 masa administrative: Nga këto 950 për mos vendosje të rripit të sigurimit, si dhe për shkelje të tjera u vendosën 545 masa administrative.
Operacioni i zhvilluar kishte për qëllim rritjen e parametrave të sigurisë rrugore, ndërgjegjësimin e qytetarëve për rëndësinë e vendosjes së rripit të sigurimit, por edhe të respektimit të rregullave të qarkullimit rrugor në tërësi.
Policia Rrugore edhe në ditët në vijim do të vijojë me intensitet punën për ndëshkimin e çdo shkelje të kodit rrugor, duke u fokusuar më shumë në drejtim të ndëshkimit të drejtuesve të automjeteve që përdorin pije alkoolike, që përdorin celularin dhe nuk respektojnë normën e vendosjes së mjeteve të fiksimit.

Një furgon që transportonte nxënës shkolle është aksidentuar në afërsi të fshatit Bilaj në Fushë Krujë pak pas mesditës së djeshme. Si pasojë e aksidentit janë lënduar 7 fëmijë, nxënës të shkollës 9-vjeçare nga të cilët dy janë në gjendje të rëndë dhe po trajtohen në Spitalin e Traumës në Tiranë. Humbja e kontrollit të mjetit dyshohet të ketë qenë shkak për aksidentin e rëndë, ndërkohë që drejtuesi i tij është shoqëruar në polici.
Një fëmijë që udhëtonte në furgon i ka thënë gazetarit tonë se në makinë ndodheshin rreth 30 fëmijë në momentin e aksidentit, mbi kapacitetin që mban mjeti, dhe askush prej tyre nuk ka qenë i lidhur me rripin e sigurimit.
Aksidenti vjen pikërisht në ditën që Policia Rrugore ndërmori një aksion mbarëkombëtar në të gjithë vendin për të sensibilizuar drejtuesit të respektojnë rregullat e qarkullimit rrugor.
Policia informon: “Më datë 13.12.2016, rreth orës 14:30, në fshatin Bilaj, Fushë-Krujë, mjeti tip “Furgon” me targa AA 580 FE, me drejtues shtetasin G.N., i cili transportonte nxënës shkolle, ka dalë nga rruga. Për pasojë, vetëm një nxënës ka fraktura në krah, i cili është jashtë rrezikut për jetën”, njofton Policia e Durrësit. Policia ka shkuar në vendngjarje dhe po punon për zbardhjen e shkaqeve.

Përplasja e dy automjeteve në hyrje të qytetit të Vlorës, ka shkaktuar plagosjen rëndë të një 26-vjeçareje, ndërsa momentet fill pas aksidentit kanë qenë të mbushura me tension. Në një video të shpërndarë në rrjetet sociale duket vajza që nxirret nga makina, ku dëgjohen të bërtitura dhe thirrje për ndihmë: “Kush ka ujë, na duhet një bidon me ujë?”
Situata tensionohet më shumë kur bëhet thirrje që vajza të nxirret sa më shpejt, pasi makina po merr flakë. “Mori flakë makina po nxirreni shpejt!” Policia e Vlorës bëri me dije se, aksidenti ndodhi rreth orës 17:50, në hyrje të Vlorës, pranë vendit të quajtur “Pusi i Mezinit”, ku automjeti tip “Nisan” autoveturë, me targë AA 879 JX, me drejtuese shtetasen J.L., 26 vjeçe, banuese në Vlorë, është përplasur me një mjet tjetër “Nisan” karoceri, me targë AA 294 MZ, me drejtues shtetasin Xh.Sh., rreth 45 vjeç, banues në Vlorë.
Për pasojë është dëmtuar rëndë shtetësja J.L, e cila ndodhet në Spitalin e Vlorës, ndërsa drejtuesi i mjetit tjetër, 45-vjeçari Xh.Sh është shoqëruar në polici për të sqaruar rrethanat e aksidentit. Blutë e qytetit bregdetar vijojnë ende hetimet për ngjarjen.
Ndërkohë, një aksident ku janë përfshirë 5 makina ka ndodhur mesditën e djeshme në autostradën Tiranë-Durrës. Përplasja e mjeteve ka ndodhur në kilometrin e 7-të. Sipas burimeve paraprake bëhet me dije se arsyeja ka qenë shpejtësia e lartë dhe mos respektimi i distancës nga ana e mjeteve të përfshira në aksident.