Endrra e Edi Ramës për të futur në dorë sistemin e drejtësisë mori një goditje jo të vogël dje nga një institucion ndërkombëtar siç është Komisioni i Venecias. Veglat e tij të vendosura në institucionet e shtetit, në pjesën dërrmuese me axhendë të paracaktuar dhe në kundërshtim me ligjin, nuk do të jenë ata që do të kenë në dorë fatin e gjyqtarëve dhe prokurorëve të këtij vendi. Ato do të vazhdojnë të ngelen kompentencë e grupit të punës, që do të ngrihet për këtë qëllim nga organet kushtetuese të këtij vendi, siç janë Presidenca dhe Kuvendi i Shqipërisë.
Komisioni i Venecias ka rrëzuar pikën kyçe të Vettingut përmes të cilës Rama synonte të kapte drejtësinë duke kontrolluar prokurorët dhe gjyqtarët përmes institucioneve të ekzekutivit. Vendimi i Venecias thotë se këto institucione të ekzekutivit duhet të jenë nën kontrollin e institucionit kushtetueses. “Për Komisionin e Venecias, konkluzioni themelor është që grupi i punës, i cili ka rolin kryesor në kontrollin e figurës dhe që përbëhet nga personel sigurie, të funksionojë nën mbikëqyrjen dhe kontrollin e organeve të rivlerësimit dhe që të gjitha materialet në dispozicion të grupit të punës duhet të jenë në dispozicion të tyre”, tha deputeti Bylykbashi.

Kontroll i plotë i institucioneve kushtetuese

Partia Demokratike përshëndet miratimin e shpejtë të Opinionit të Komisionit të Venecias për 4 pyetjet që i ka drejtuar Gjykata Kushtetuese për vettingun. Opinioni i Komisionit të Venecias përbën kontribut për shqyrtimin e shpejtë dhe objektiv të çështjes nga Gjykata Kushtetuese. Komisioni i Venecias, në paragrafin 64, ka shprehur qartë opinionin se, grupi i punës i përbërë nga organet që janë nën varësinë apo ndikimin e Kryeministrit (siç janë DSIK, SHKB në Ministrinë e Brendshme, DPPPP, etj), duhet të jetë domosdoshmërisht nën mbikëqyrjen dhe kontrollin e plotë të Komisionit të Pavarur të Vettingut. Konkretisht, paragrafi 64 thekson se: “Për Komisionin e Venecias, konkluzioni themelor është që grupi i punës, i cili ka rolin kryesor në kontrollin e figurës dhe që përbëhet nga personel sigurie, të funksionojë nën mbikëqyrjen dhe kontrollin e organeve të rivlerësimit dhe që të gjitha materialet në dispozicion të grupit të punës duhet të jenë në dispozicion të tyre”, thotë deputeti i PD-së. Më tej, ai shton se ky konkluzion është pikërisht ai që kish luftuar deri më tani dhe Partia Demokratike. “Ky konkluzion themelor i Komisionit të Venecias konfirmon tërësisht qendrimin e Partisë Demokratike, se; procesi i kontrollit të gjyqtarëve dhe prokurorëve (vetting) duhet të bëhet vetëm nga organet kushtetuese të rivlerësimit, dhe se çdo organ tjetër qeveritar duhet të veprojë nën mbikëqyrjen dhe kontrollin e organeve kushtetuese të rivlerësimit (Komisioni i Pavarur i Kualifikimeve dhe Kolegji i Apelimit). E thënë qartë, paragrafi 64 i Opinionit të Komisionit të Venecias, sanksionon se vettingu i gjyqtarëve dhe prokurorëve duhet të bëhet jo nga Kryeministri, por nga organet kushtetuese të rivlerësimit.
Komisioni i Venecias në paragrafët 46 dhe 58 çmon se është Gjykata Kushtetuese që duhet të vlerësojë nëse organet kushtetuese të rivlerësimit, kanë kontrollin e plotë mbi organet qeveritare, si kusht që ligji të jetë në përputhje me nenet 6 dhe 8 të KEDNJ-së. Ne nxisim Gjykatën Kushtetuese që të përfundojë në një kohë të shkurtër shqyrtimin e kushtetutshmërisë së ligjit të vettingut, sipas të gjithë çështjeve të ngritura në kërkesën e Partisë Demokratike. Komisioni i Venecias shprehet qartë në paragrafin 15, se nuk merr përsipër të analizojë përputhshmërinë e ligjit me Kushtetutën dhe legjislacionin e brendshëm. Kjo detyrë i takon vetëm Gjykatës Kushtetutese, e cila duhet të garantojë që ligji i vettingut të jetë në përputhje me Kushtetutën.
Vettingu, sipas Kushtetutës është garancia e vetme për largimin nga sistemi të gjykatësve dhe prokurorëve të korruptuar‎. Vettingu, sipas ligjit antikushtetues të Edi Ramës mbron të korruptuarit dhe kriminelët në pushtet”, thotë deputeti i PD-së.

Reagimi i Bylykbashit

Kryeministri Rama paska filluar të interpretojë materien e komplikuar juridike dhe paska dalë në konkluzione që s’të linin shteg. Tashmë të rrimë të qetë se reforma është në rrugë të drejtë. Madje po i jepte me ton leksione edhe Gjykatës Kushtetuese se si ta përkthente opinionin e Komisionit të Venecias. Boll ta lexosh atë që thotë dhe e kupton se ata që ia kanë përkthyer Opinionin janë ata që deklaruan se ishin gati ta votonin Kushtetutën edhe pa e lexuar fare! Shpjegim i thjeshtë për një materie të komplikuar për Kryeministrin: Komisioni i Venecias nuk ka thënë në asnjë rresht që ligji i vetting-ut është Kushtetues. Të sfidoj të lexosh 65 paragrafet e Opinionit dhe po e gjete, e pranoj që jemi përballë një ngjarje historike. Madje, Komisioni ta thotë troç që kjo është detyrë e Gjykatës Kushtetuese. Paragrafi 64 ta thotë troç se çështja thelbësore është që organet qeveritare që ti kontrollon duhet të veprojnë vetëm nën drejtimin, mbikëqyrjen dhe kontrollin e organeve kushtetuese e të pavarura të vetting-ut dhe çdo prove apo dokument që kanë organet e tua, duhet t’ia dorëzojnë patjetër organeve të pavarura të vetting-ut. Pikë! Këtë ta thotë edhe në paragrafet 35, 54, 55 dhe 58. Bëje një sforco dhe lexo sa më sipër dhe besoj do të kuptosh që je ngatërruar nëpër pyll. Ky është thelbi i asaj që i kërkojmë Gjykatës Kushtetuese dhe këtë mbështet edhe Venecia. Vettingu kushtetues që qëron me rrënjë korrupsionin në drejtësi është ky dhe jo ai që do të bësh ti për të vënë gjyqtarët e prokurorët që do të të mbyllin çështjet që do të të përndjekin ty dhe ministrat apo kryebashkiakët e tu. Zoti Kryeministër, Venecia i ka dhënë një udhërrëfyes Gjykatës dhe nuk i ka shkruar një vendim. I ka treguar limitet se si interpretohet më qartë Konventa e të Drejtave të Njeriut, se Kushtetutën e dinë ata vetë. Komisioni i Venecias i ka dhënë Gjykatës rrugën që e mbron nga presioni yt dhe garanton Kushtetutën e 22 korrikut. Pyet ndonjë profesionist që ke pranë se do të të thotë të njëjtën gjë. Mos pyet ata që intrigojnë për të kapur drejtësinë apo që votojnë pa lexuar. Dhe diçka të fundit; mos i bëj presion Gjykatës Kushtetuese. Ajo deklaratë e jotja sot, në një vend normal do të mjaftonte për të të filluar procedimin penal. Gjykata do të marrë vendim shpejt. Me siguri do mbroje vetting-un siç e miratuam më 22 korrik dhe sa më shpejt e fillojmë ta zbatojmë dhe të korruptuarit të shkojnë prapa hekurave, gjyqtarë, prokurorë e ministra. T’i bëj vetëm një gjë: mos e mero kriminelët që ke në grupin parlamentar në Komisionin Ad Hoc parlamentar që do përzgjedhë komisionerët e vetting-ut. Këtë test ke përpara ti.

Kundërshtimi i PD, kërkonte të njëjtën gjë si Venecia

Por si kërkonte Rama që të kryente procesin e vettingun me anë të veglave të tij në institucionet shtetërore?. Duke përfituar nga pozitat e tyre, siç mund të jenë fjala vjen, Drejtoria e Sigurimit të Informacionit të Klasifikuar, DISK Drejtoria e Pastrimit të Parave. ILDKP apo dhe Shkolla e Magjistraturës apo Drejtoria e Ministrisë së Brendshme, ashtu siç është formuluar ligji, duket se këto institucione do të jenë ato që vendosin për fatin e gjyqtarëve dhe prokurorëve. Në fakt kërkesa për çdo prokuror apo gjyqtar duhet të dërgohet tek këto institucione nga Komisioni i Pavarur i Kualifikimit apo dhe Komisionerë publikë, ndërkohë që ligji siç kërkon ta bëjë Rama me rekomandimin e Xhafës parashikon fillimin e hetimeve në mënyrë të pavarur nga vetë institucionet. Gjithashtu, procesi i vlerësimit profesional i hiqet Komisionit të Pavarur të Kualifikimit dhe i kalohet Shkollës së Magjistraturës. Kjo shton dhe më tej dyshimet se hetimi mund të bëhet selektiv, dhe sipas dëshirave të kryeministrit, duke deformuar rezultatin e tyre. Eshtë pikërisht ky amendament që kish kërkuar opozita 24 orë përpara miratimit në seancë plenare të këtij ligji. “Roli aktiv dhe përcaktues që kanë organe të kontrolluara apo nën varësinë e pushtetit ekzekutiv (ILDKPKI dhe DSIK), pas sjell kontroll tërësor të qeverisë në të gjithë komponentët e procesit të rivlerësimit (veçanërisht, tek komponenti i kontrollit të pasurisë dhe kontrollit të figurës). Ndërkohë, që testimi, sipas rastit, për konfirmimin në detyrë të gjyqtarëve/prokurorëve, bëhet nga Shkolla e Magjistraturës, jashtë çdo kontrolli apo drejtimi nga organet e vettingut. Ky fakt, bie ndesh me pikën 5, të nenit 179/b, ku specifikohet se rivlerësimi kryhet nga KPK. Gjithashtu, kjo bie ndesh me pikat 3 dhe 4 të Nenit  të Aneksit të Kushtetutës, ku qartësisht specifikohet se KPK apo Kolegji, sipas rastit përmes personelit të tyre, Komisionerit Publik ose vëzhguesve ndërkombëtarë, shqyrton deklaratën e subjektit për të shkuarën e tij”, thuhet në kundërshtimin e PD.

Emërimi i Hysenajt në krye të DPPP

Një hallkë tjetër, e cila është mjaft e rëndësishme në këtë proces është dhe Drejtoria e Pastrimit të Parave. Pra është drejtoria që do të hetojë pasuritë e gjyqtarëve, përgjatë gjithë kohës që ata kanë ushtruar këtë funksion. Në qershor të këtij viti, Ministria e Financave që në krye ka një tjetër yes man të Ramës, Arben Ahmetaj, hapi procedurat për vendin vakant të drejtorit të Pastrimit të Parave. Në fakt deri në atë kohë këtë post e mbante Genti Gazheli një financues i PS-së, i cili u emërua ambasador në Turqi. Lideri global, kishte piketuar për këtë post Alket Hysenajn, i cili deri në atë kohë mbante kryetarin e garancive statuore në PS. Ishte pikërisht njeriu, i cili do ta kthente garën për kreun e PS-së, mes Ramës dhe Blushit, në një referendum që s’merrej vesh se ku donte të dilte. Natyrisht që në fund fitoi Rama, i cili ju shmang garës. Në PS, Hysenaj njihet si adhurues i kryetarit dhe vegël e bindur e urdhrave të tij. Kushdo mund ta kujtojë, emocionin e tij të thellë, kur lajmëroi tërë emocion fitoren “publishitare” të liderit në referendumin e stisur. Edhe në rastin e emërimit të Hysenajt, Rama sërish do shkelte e shpërfillte ligjin. E para, sepse procedurat për vendin vakant nuk mund t’i hapë Ministria e Financave, por Departamenti i Administratës Publike. Nga ana tjetër, sipas Ligjit të Nëpunësit Civil, drejtori i Parandalimit të Pastrimit të Parave, është Trupë e Nivelit të Lartë Drejtuese (TND), dhe ligji e përcakton qartë se në këtë post duhet një person që e gëzon këtë status. Alket Hysenaj, gëzon vetëm statusin e besimit të liderit, i cili në luftën për pushtet nuk pyet për ligje, por e trajton administratën si të ishte në çifligun e babait skulptor. Detyra e Hysenajt, është të gjejë gjilpërën në kashtë, pra të gjejë motivacion për të shkarkuar gjyqtarë ose prokurorë që nuk e kanë pëlqimin e kryetarit, por kurrsesi zbatimin e ligjit.

Emërimi i Sadushit në krye të Magjistraturës

Në dhjetor të  2014-ës, u krijua një zallamahi me emërimin e Sokol Sadushit, në krye të Shkollës së Magjistraturës. Eshtë pikërisht shkolla, që përgatit gjyqtarët dhe prokurorët e ardhshëm pas përfundimit të sistemit trevjeçar dhe master në juridik. Ligji përcaktonte që kjo e drejtë për emërimin e drejtorit të kësaj shkolle, i takonte KLD-së. Në këtë vend, ai do të zëvendësonte Neshat Fanën i zgjedhur në këtë post vetëm diçka më shumë se një vit më parë sipas ligjit nga KLD. Por dhe këtu ndërhyri Xhafa, i cili me Sokol Sadushin ka dhe lidhje familjare, pasi është kunati i tij dhe me forcën e kartonit, kjo e drejtë emërimi dhe shkarkimi ju hoq KLD-së, dhe ju kalua Këshillit Drejtues,i cili brenda një mbledhjeje shkarkoi Fanën dhe emëroi Sadushin drejtor. Aso kohe, nuk ju vu shumë rëndësi, pasi vala e shkarkimeve nga Rilindja, e sapoardhur në pushtet ishte e madhe dhe një drejtor më shumë apo një më pak në opinionin publik nuk “ngrinte kandar”. Por petët lakrorit do i zbuloheshin pikërisht në momentin kur do të flitej për rivlerësimin e gjyqtarëve ose me vettingun e famshëm.
Shkolla e Magjistraturës në ligjin e vettingun është ajo që do të marrë në “provim” gjyqtarët dhe prokurorët e të gjitha niveleve. Nga kryetarët e gjykatave dhe deri tek gjyqtari më i thjeshtë, nga kryetarët e prokurorive të të gjitha niveleve dhe deri tek prokurori më i thjeshtë. Nuk janë pak, por 850 gjyqtarë dhe prokurorë të sistemit që në vlerësimin profesional do të varen nga dëshirat e Sokol Sadushit, kunatit të Fatmir Xhafës dhe njeri i besuar i Edi Ramës. Njeriu, i cili kontribuoi fort për hartimin e këtij drafti  dhe për hir të tij, Xhafa bllokoi reformën në korrik të këtij viti. Pra është një proces, i cili lë shumë shteg për manovrat e vlerësimit në fushën e jurisprudencës. Ai do të vendosë kush do të kalojë, dhe kush jo në testin profesional. Ai do të jetë ai që do të rekomandojë emrat, për zëvendësimin e atyre gjyqtarëve që me hir apo me pahir do të lenë punën, sepse kështu urdhëron lideri suprem. Më tej, është po Sadushi që prej kohësh në shkollën që e ka shndërruar në një çerdhe të rilindjes, do të rekomandojë emrat për gjyqtarë të të gjitha shkallëve.

Rama ka tentuar të manipulojë Avokatin e Shtetit për aferën e CEZ duke i kërkuar atij që të bëjë një raport të ndryshëm nga ai që kishte paraqitur, ku argumentonte se çështja ndaj kompanisë CEZ fitohej në Gjykatën e Arbitrazhit. Ish-Kryeministri Berisha denoncoi dje këtë aferë, për të cilën ai tha se ekzistojnë dokumente, të cilat ai i disponon. Ndërmjetësi i kësaj afere të pistë për të manipuluar edhe avokatin ka qenë ministri i Energjetikës Gjiknuri. “E dini premtimin që i ka bërë me Gjiknurin? Rama është gati të bëjë dhe intervista vetëm na bëj një raport të ndryshëm nga ky. E dini kë mbroni, një kriminel. Një raport që të dalë pala shqiptare në disfavor, natyrisht që do të shpërblente avokatin me dhjetëra milion dollarë. Avokati qëndroi i palëkundur”, tha Berisha. Dëmi i shkaktuar shtetit nga pazari i pistë i Ramës me CEZ arrin në 620 milionë euro. “Janë 620 milionë euro fatura që CEZ kishte detyrime ndaj shtetit shqiptar, ndërkohë që Rama i ka falur ato në një marrëveshje të pistë dhe korruptive”, tha Berisha. Ish-Kryeministri deklaroi para Komisionit Hetimor se CEZ arriti të korruptojë Ramën dhe një sasi më të vogël ka përfituar nga ky korruptim edhe Gjiknuri. “E gjitha kjo është bërë në këmbim të zgjidhjes së marrëveshjes me CEZ me negociata dhe jo përmes vendimit të Gjykatës së Arbitrazhit”, tha Berisha. Ai kujtoi se për të fshehur këtë krim që ka bërë në zhdukjen e 620 milionë eurove, Rama vendosi edhe pikën në marrëveshjen e miratuar në Parlament ku nuk lejonte asnjë lloj hetimi për këtë aferë.
Berisha ka evituar të gjitha pyetjet e ndërhyrjet e Ballës duke e konsideruar atë një shpifës ordiner dhe duke e evituar në mënyrë de fakto nga drejtimi i Komisionit. “Je vetëm mender shpifës”, i drejtohej Berisha Ballës sa herë ai e pyeste.
“Ai që kryeson komisionin është një shpifës ordiner, i dënuar me vendim të formës së prerë të gjykatës, nenin e shpifjes së ndyrë, me 10 mln lekë dëmtim. Dhe është konflikt interesi. Të paktën 5 herë brenda në sallë tha se nuk jam dënuar asnjëherë, duke dëshmuar se i urdhëruar nga Edi Rama është i aftë të pështyjë, të nxijë, të denigrojë veten, si një njeri që nuk është rritur në këtë tokë, që nuk ka familje, që nuk ka miq, nuk ka nder, dinjitet, nuk ka asgjë. Kjo u faktua”, tha Berisha.
Ish-Kryeministri tha se kryetari i Kuvendit Meta ka larë duart në mënyrë të padrejtë nga vendimi që duhet të merrte në rastin kur Komisioni drejtohet nga një njeri në konflikt interesi.
“Nëse shërbimet e Kuvendit do të vendosnin që pavarësisht nga përcaktimi i ligjit të Kodit të Procedurës Penale, i cili është i qartë për përjashtimin e konfliktit të interesit, në rast se ato do të vendosnin në këtë mënyrë, ose cilido të jetë vendimi i tyre unë do e miratoj. Sot në orën 2 e ca, kryetari i Parlamentit ka larë duart në mënyrë, për mendimin tim të padrejtë dhe ka thënë këtë vendim ta marrë komisioni. Në komision këta kishin shumicën dhe unë bëra një vendim, thashë të vij, dhe çdo fjale të tij t’ia përplas akuzat shpifës dhe i pafytyrë. Çdo njeri publik, që del para shqiptarëve dhe thotë 5 herë që s’jam i dënuar, tregon që nuk ka një nanogram dinjiteti njerëzor. Duhet t’u kërkonte falje qytetarëve. Ai nuk e bëri këtë gjë, ndaj edhe siç e dëgjuat në çdo pyetje pati një përgjigje standarde”, tha Berisha.

Berisha: Rama dënohet me 35 vite burg, Balla, mender shpifës

Berisha: Nuk mundet kurrë të përdhoset betimi para një shpifësi ordiner. Nuk ka autoritet, moral, kredenciale të marrësh asnjë betim derisa je i dënuar me vendim të formës së prerë.
Balla: Gjeneralitetet nuk i thoni dot. Interpretimi i dhënë nga kreu i Kuvendit është shumë mirë i hartuar. Kuvendi ka një praktikë të konsoliduar për këtë çështje në një komision tjetër hetimor parlamentar në 2006, ku hetohej Prokurori Dhori Sollaku, i cili ka kërkuar përjashtimin e zotit Astrit Patozi.
Berisha: Në çdo fjalë vetëm shpif, je fytyra e vërtetë e Edi Ramës.
Balla: Kam fytyrën që më kanë dhënë prindërit e mi dhe jam krenar për ta.
Berisha: Po lexon shpifje dhe trillime me të cilat ka një qëllim, të shpëtojë Edvin Kristaq Ramën nga sëpaku 35 vjet kalbje në burg për vjedhjen monstruoze që u ka bërë shqiptarëve, duke përjashtuar çdo procedurë dhe firmosur marrëveshjen për të ndarë me CEZ 620 milionë euro, për vjedhjen monstruoze me të cilën i fali CEZ 3.2 miliardë dëme Shqipërisë dhe ekonomisë shqiptare. Ky që flet është shpifësi ordiner.
Balla: Zoti dëshmitar a keni dijeni që ka filluar procedura e privatizimit pa bërë kuadrin rregullator gati, pa bërë legjislacionin gati dhe pa ditur vlerën e asetit publik që po privatizohej?
Berisha: Je i dënuar me nenin për shpifje të ndyra.
Bode: Në paranjoftuam se e gjithë kjo që bëni me zotin Berisha është tërësisht manovër politike që synon të devijojë hetimin në një Komisioni tjetër që e ngritët ju paralel me Komisionin tonë. Ju sot nuk jeni duke bërë pyetje për të marrë sqarime për çështje që është në dijeni. Me audite të turpshme dhe bëni pyetje të kundraligjshme, që nuk përputhen me ligjin. E pyesni dëshmitarin a ke dijeni për humbje apo shkelje, për borxh të keq. E dini që këto pyetje janë të jashtëligjshme?
Balla: Ku e bazon këtë?
Bode: Ligji i privatizimit. Ai thotë që vlerën e humbjeve në rrjet do ta përcaktojë një audit ndërkombëtar i pranuar nga të dyja palët, qeveria dhe ai që erdhi të blejë pasurinë. Nuk je ti që përcakton se kush është humbja.
Balla: Dakord. Çojeni dhe këtë në Kushtetuese. Citoni nenin e ligjit për komisione hetimore, ku kjo që thoni ju bazohet.
Bode: Të citoj ligjin e privatizimit.
Balla: Unë atë po hetoj.
Bode: Po heton ligjin ti?
Balla: Po hetoj gjithë procedurën, përfshirë dhe ligjin.
Bode: Jo t’i nuk mund të hetosh ligjin, duhet të hetosh zbatimin e ligjit dhe po të them që pyetjet e tua i ke antiligjore.Nuk mund të impresionosh me asgjë. E di t’i që muajin e kaluar KESH-i jot me reformën e madhe e ka borxhin e keq 25%? Dhe ti bëke çudi.
Balla: Nuk është procedurë kjo që po bën.
Bode: Pyetjet e tua janë të jashtëligjshme.
Balla: Një sekondë, do të thërrasim dhe ty në seancë dëgjimore.
Berisha: Shpifësi po kavardiset në shpifjet e tij. Kërkon të shpëtosh kryehajdutin Edi Rama nga vjedhja më e madhe në historinë e Shqipërisë, 620 milionë euro fatura të çertifikuara një më një nga kompani ndërkombëtare. Por nuk shpëtoni dot, aq sa shpëtove t’i nga shpifjet. More atë që meritove, aq do të shpëtojë ai pa u kalbur në 35 vjet më thonë specialistët e penales, më së paku për dëmin e tmerrshëm, gjobën që i ka bërë çdo qytetari shqiptar me të paktën 3000 euro.
Balla: Këtë nuk e kuptova.
Berisha: Nuk ka gjë, ti të kuptosh? Ku mund të kuptosh ti?
Balla: Keni ndonjë opinion për këtë?
Berisha: Nuk mund të kuptosh ti.
Balla: Keni qenë në këtë mbledhje qeverie? Ministri i Financave ju ka thënë jeni duke bërë gabim.
Berisha: Sa të qëndrosh në atë karrige e di si ngjason ti apo jo? Si një grumbullshpifës.
Balla: Dakord, kalojmë tek pyetja tjetër.
Ristani: Nuk keni të drejtë të deformoni shprehjen që po i referoheni, më gjeni ku e ka thënë ministri i Financave që po veproni gabim, sapo e thatë ju tani. Pse deformoni fjalët dhe flisni të pavërteta?
Balla: Lëreni dëshmitarin.
Berisha: Është shpifës.
Balla: A keni deleguar që të flasë ministri Ruli në lidhje me privatizimin e OSSH-së më 2006 me Nuel Kalaj?
Berisha: Shpifësi është shpifës dhe vetëm kaq. Edvin Kristaq Rama kërkon që me shpifje të mbulojë vjedhjen e madhe që u bëri qytetarëve shqiptarë. Por të harrojë, ka 35 vjet burg.
Balla: E njihni Hamza Merxhanin?
Berisha: Shpifësi është shpifës dhe vetëm kaq. Mender shpifës.
Balla: A jeni takuar ndonjëherë me të?
Berisha: Shpifësi është shpifës dhe mender shpifës.
Balla: A e njihni Rebeka Gaskin, drejtoreshën e DIA?
Berisha: Shpifësi është shpifës dhe mender shpifës.
Balla: A jeni takuar në zyrën tuaj me Rebeka Gaskin?
Berisha: Shpifësi është shpifës dhe vetëm mender shpifës.
Balla: Një dëshmitar tjetër në këtë Komision, Romeo Karaj, ka deklaruar se Nuel Kalaj ka përfituar një ryshfet 2.6 milionë euro nga përfshirja në privatizimin e OSSH-së. A keni dijeni për këto çështje?
Berisha: Shpifësi është shpifës dhe vetëm mender shpifës.
Balla: Kush ka qenë personi që ka organizuar takimin mes teje dhe Nuel Kalajt?
Berisha: Shpifësi është shpifës dhe mender shpifës.
Balla: A ka qenë Kastriot Ismailaj personi që e ka negociuar këtë takim?
Berisha: Shpifësi është shpifës dhe mender shpifës.
Balla: A ka ndikuar ky takim në lidhjen e kontratës mes DIA dhe CEZ?
Berisha: Shpifësi është i pafytyrë si ti.
Balla: A ka lidhje ky fakt me dëshminë e Josef Hejsek, ish-drejtori i CEZ Shpërndarje me Bujar Nepravishten, ish-kryetarin e ERE?
Berisha: Shpifësi është shpifës dhe vetëm kaq, mender shpifës.
Balla: A e njihni Elvis Mataj, ish-drejtorin Ekzekutiv të DIA-s në Shqipëri?
Berisha: Një shpifës i vërtetë nuk meriton asnjë përgjigje.
Balla: Elvisi?
Berisha: Ju, ju. Këtu je vetëm ti shpifës.
Balla: A ka punuar si këshilltari juaj vëllai i Elvis Matajt, Endri Mataj?
Berisha: Shpifësi meriton vetëm përçmim dhe neveri.
Balla: A ka ndikuar tek ju në emërimin e Elvis Mataj si drejtor ekzekutiv i DIA-s në Shqipëri vëllai i këtij dhe këshilltari juaj?
Berisha: Shpifësi është shpifës dhe vetëm shpifës.
Balla: A kanë ndikuar këto raporte me Ismailaj, Gaskin, Mataj etj., në nxjerrjen e VKM numër 329 dt. 17.05.2011 për rishpërndarje fondesh brenda programeve në buxhetin e 2011 miratuar për Ministrinë e Punëve Publike, Transportit për përdorimin e tyre për pagesën e detyrimeve të energjisë elektrike të shoqërive të ujësjellësave që ka bërë të mundur pagesën e 573 milionë lekëve në favor të CEZ ku gjysmat e tyre i merrte DIA në bazë të kontratës së saj me CEZ?
Berisha: Shpifësi është shpifës dhe vetëm shpifës.
Ristani: Ka një manipulim të madh dhe me pyetjet.
Berisha: Nuk është gënjeshtër, është shpifës. Mos e nderoni me gënjeshtër.
Ristani: Këto janë trillime. Mund t’ia bëni pyetjet me shkrim dhe të merrni një përgjigje që t’ua thotë të shkruar dhe këtë pjesë.
Berisha: Edi Rama bëhet Kryeministër dhe merr këto letra nga arbitri: Zotëri shanset i kemi ne të fitojmë, mos bëj asgjë. Përpiqet të korruptojë avokatin. E dini premtimin që i ka bërë me Gjiknurin. Rama është gati të bëjë dhe intervista vetëm na bëj një raport të ndryshëm nga ky. E dini kë mbroni, një kriminel. Një raport që të dalë pala shqiptare në disfavor, natyrisht që do të shpërblente avokatin me dhjetëra milion dollarë. Avokati qëndroi i palëkundur. Jo tha, kam bindjet e mia, pala shqiptare ka të drejtë, fiton. Kam dhe dokumente për këto. Prandaj bëhet ai ashtu, pështyn veten. I thashë që ke fytyrën e Edi Ramës, është Edi që e detyron atë. Në këtë revansh hajdutët jo vetëm vodhën, por vunë dhe nen në ligj që drejtësia të mos mund t’i trajtojë. Nuk ka kontratë që është ligj.
Berisha: Ato para do të gjenden, bindja është e hekurt. Paratë i transferoi, disa thonë se po i  investon në qytete të caktuara me të vëllanë, pa të vëllanë. Megjithëse për para nuk njeh dinë as imanë. Është i papërmbajtur, është i çmendur.
Balla: Ti e di mirë këtë.
Berisha: Me këtë ves po merr në qafë Shqipërinë. Jo me të tjera.
Balla: Kthehu në objekt tek Vettingu.
Berisha: E përshëndes Komisionin e Venecias. Meqenëse e do.

Enton DACI

Rama është frikacak edhe kur keqpërdor policinë. Nuk kishte faj. Çonte policë për shoqërimin e Berishës atje ku ai nuk ishte. Berisha ishte në zyrë, Rama ja dërgonte shkresën në adresën e shtëpisë. Më ka çuar nëna me larë gojën, i thonë kësaj. Megjithatë mirë ka bërë sepse Rama e di se ku mund të përfundojë me këto shkelje të ligjit dhe nuk i bëjnë punë as mercenarët e krimit që mban rreth vetes dhe as makina e blinduar.
Një shkresë e Ministrisë së Brendshme për Kryesinë e Kuvendit dhe deputetin Taulant Balla është bërë publike, në të cilën shkruhet se një grup policësh shkuan në shtëpinë e ish-Kryeministrit Berisha. Komisariati nr.1 ka marrë një kërkesë nga Drejtoria e Policisë së Tiranës dhe Sekretarja e Përgjithshme e Kuvendit përmes të cilave u kërkohej të bëhej shoqërimi me forcë i Kryeministrit Berisha për në Kuvend.
Policët nuk kanë gjetur njeri në shtëpi dhe kanë lënë kërkesën në duart e rojes së Gardës. Në fakt Berisha ka qenë në zyrë vetëm pak metra larg shtëpisë dhe policët nuk kanë shkuar atje.
Kërkesa për shoqërim me forcë është konsideruar e paligjshme nga zyrtarët e lartë të PD-së.
“Kjo është shkresa me të cilën Policia e Shtetit tregon se ka pranuar të marrë me forcë një deputet të Kuvendit, në zbatim të urdhrit antikushtetues të lëshuar nga disa deputetë të mazhorancës!
Ndërkohë, neni 73, pika 2 e Kushtetutës parashikon se:
‘2. Deputeti nuk mund të arrestohet ose t’i hiqet liria në çfarëdolloj forme apo ndaj tij të ushtrohet kontroll personal ose i banesës, pa autorizimin e Kuvendit’.
Pra, Kushtetuta ndalon shprehimisht që deputetit t’i hiqet liria në çfarëdolloj forme, qoftë edhe në formën e shoqërimit të detyrueshëm.
Eksperiment mizor i Edi Ramës për të provokuar shqiptarët nëse janë nostalgjikë për diktaturën e para 25 viteve!
Vetëm një pjellë e sistemit komunist dhe kulturës së diktaturës mund ta bëjë këtë! Vetë gjyqtar, vetë prokuror, vetë polic, vetë drogën, vetë koncesionet, vetë pasurinë publike, vetë Vetting-un! Gjithçka për vete dhe burgun për kundërshtarët!”, deklaron sekretari për Rendin dhe Sigurinë, Enkelejd Alibeaj.

Arben SHAHINI