Deri në dhjetor 2014 pjesës më të madhe të fëmijëve me prindër të huaj u duhej të zgjidhte në moshën 18 deri 23-vjeçare nëse donin të mbanin nënshtetësinë gjermane apo atë të prindërve të tyre. Kjo kishte të bënte kryesisht me fëmijët me prindër turq.
Ky ligj u ndryshua në vitin 2014 pas bisedimeve të gjata mes partive të unionit CDU/CSU dhe SPD-së, që përbëjnë së bashku koalicionin e madh në Berlin. Që prej asaj kohe personat në fjalë mund t’i mbajnë në kushte të caktuara të dyja pasaportat – madje përgjithmonë.
As dy vjet më pas CDU-ja e bën nënshtetësinë e dyfishtë temë debati në kongresin e partisë në Essen. Grupi rinor i CDU-së “Junge Union” kërkoi anulimin e këtij ligji dhe pas një debati të nxehtë dhe plot diskutime, arriti një shumicë të vogël kundër dëshirës së Kancelares dhe të ministrit të Punëve të Brendshme. Pra çështja është kthyer në rendin e ditës.

CDU-ja i kundërvihet kancelares Merkel
Eva Högl zëvendëskryetare e grupit parlamentar të socialdemokratëve në Parlamentin gjerman tha në intervistë me “Deutsche Wellen” se është “me të vërtetë e tronditur me këtë vendim të CDU-së. Sepse me të partia i kundërvihet Kancelares Angela Merkel dhe ministrit të Punëve të Brendshme, Thomas de Maizière.” Sipas saj, me këtë vendim CDU-ja nxit politikën e partisë radikale të djathtë, Alternativa për Gjermaninë.

Dynënshtetësia nxit integrimin
Ajo thotë se ligji për lejimin e dynënshtetësisë tregon respekt për faktin se gjithnjë e më shumë njerëz kanë biografi ndërkombëtare. Sipas saj, ata e pranojnë Gjermaninë dhe prandaj duan të marrin nënshtetësinë gjermane, por nuk duan që të humbasin as lidhjet me vendin e origjinës së prindërve dhe të gjyshërve dhe kjo është në rregull. Sipas Eva Hëgl, dynënshtetësia nxit integrimin dhe nuk është pengesë për këtë.

Kurs i rrezikshëm
Zëvendëskryetarja e grupit parlamentar të socialdemokratëve mendon se CDU/CSU-ja po orientohen nga e djathta dhe se duket se po i bien pas shpine kryetares së partisë CDU dhe Kancelares Angela Merkel. Në kongres delegatët vërtet e rizgjodhën atë si kryetare të partisë, por miratimi i kërkesës për ndryshimin e ligjit për nënshtetësinë tregon se ka mospërputhje mes partisë dhe drejtuesve të saj dhe se ky kurs është i rrezikshëm dhe se CDU-ja duhet ta mendojë mirë nëse ky është kursi i duhur.

Pasi kanë shtënë në dorë sektorin e energjisë elektrike dhe të sigurimeve, investitorët kinezë u janë lëshuar tani bankave dhe mediave portugeze. Kina po blen thuajse gjithçka në Portugali: spitale, shoqëri sigurimi, gazeta dhe banka. Dhe ndërsa ekonomistët dhe madje edhe biznesmenët janë të alarmuar për shtimin e ndikimit kinez, kryeministri Antonio Costa e konsideron Kinën si shpëtimtare nga kriza dhe do ta zgjerojë edhe më tej bashkëpunimin.
“Bankat portugeze po ndjellin investitorë që nuk janë patjetër të dëshiruar”, paralajmëroi javën e kaluar Fernando Faria de Oliveira, ish-ministër i Ekonomisë dhe kryetar i Shoqatës së Bankave, pasi grupi kinez Fosun kishte blerë 16,7% të bankës BCP. Kjo bankë është banka më e madhe private në Portugali dhe kinezët që tani janë aksionerët më të mëdhej të kësaj banke, duan të blejnë rreth 30% të aksioneve të saj.

Blerje për rreth 13 miliardë euro
Që prej fillimit të krizës në vitin 2011, Republika Popullore e Kinës ka blerë në Portugali në mënyrë masive. Ajo kontrollon ndërkohë sipërmarrjen e energjetikës EDP si dhe ish-koncernin shtetëror të energjisë REN. Po ashtu, ajo ka blerë edhe shoqërinë e sigurimeve Fidelidade, si dhe një sërë spitalesh e klinikash. Dhe së fundi një investitor nga Macau, që deri në vitin 1999 ishte koloni portugeze, do të blejë shumicën e grupit mediatik Global Media, koncernit më të madh të gazetave portugeze.

Dera e Kinës në Evropë?
Në vend që të jetë i shqetësuar kryeministri portugez Antonio Costa vetëm se lavdëron miqësinë kinezo-portugeze. Gjatë vizitës së tij në Kinë në muajin tetor, ai tha se marrëdhëniet mes dy vendeve kanë një histori 500-vjeçare dhe tha se Portugalia ka nevojë urgjente për investitorë.
Tani investitorët kinezë kanë në shënjestër bankat dhe pas bankës BCP synojnë të blejnë edhe bankën “Novo Banco”. Profesori i ekonomisë João Duque thotë se “kinezët nuk punojnë patjetër sipas kritereve të ekonomisë së tregut” dhe se bankat portugeze nuk duhet të varen vetëm nga një investitor, edhe pse kanë nevojë për para.
Kina nuk e fsheh interesin e saj për ta kthyer Portugalinë në deriçkë për të depërtuar në Evropë. Dhe në kuadër të partneritetit strategjik mes të dy vendeve po vazhdon planet për të investuar në logjistikë, transport, bujqësi, turizëm dhe ndërtim.

Udhëheqësi i rajonit rus të Çeçenisë, Ramzan Kadirov, vlerëson se trupat e vendosur në këtë zonë do të ishin të gatshëm që të luftonin kundër atyre që i ka quajtur “llum” në Siri, nëse këtë e dëshiron Presidenti rus, Vladimir Putin.
Kadirov ka reaguar ndaj raportimeve të mediave ruse që thonë se dy batalione të Policisë Ushtarake nga Çeçenia janë duke u bërë gati të nisen për në Siri, për të mbrojtur bazën ajrore ruse në shtetin e Lindjes së Mesme të shkatërruar nga lufta.
Kadirov nuk i ka konfirmuar këto raportime, por në rrjetin social, Instagram ka shkruar se trupat e stacionuar në Çeçeni, me dëshirë do të shkonin në Siri. Ai ka shtuar se edhe vet me dëshirë do t’i bashkohej luftës kundër “terrorizmit ndërkombëtar”.
“Do të isha i lumtur dhe krenar që menjëherë të nisem për në Siri, të luftojë llumin”, me urdhër të Putinit, ka thënë Kadirov.
Rusia, prej shtatorit të vitit 2015, ka nisur fushatë ajrore në përkrahje të presidentit sirian, Bashar al Assad, duke i ndihmuar forcat e këtij të fundit për të rimarrë territoret e humbura.
Kadirov nuk e ka sqaruar se kujt iu ka referuar si “llum”.
Qeveritë perëndimore thonë se sulmet ajrore ruse kryesisht kanë pasur cak luftëtarët kundër qeverisë e jo militantët e grupit, Shteti Islamik.
Kadirov, të cilin kritikët thonë se rregullisht abuzon me të drejtat e njeriut në rajonin çeçen, kryesisht të banuar nga myslimanët, së fundi i ka thënë televizionit shtetëror rus se ai ka dërguar çeçenë në Siri për t’u infiltruar brenda IS-it dhe për të mbledhur informacione.

Fushata elektorale në Maqedoni, që mbyllet të premten (09.12) karakterizohet prej akuzave të rënda mes partive politike e nuk mungojnë as tonet nacionaliste. Në mitingjet elektorale kryetari i VMRO-së, Nikolla Gruevski, fjalimet e tij i përqendron në akuzat drejtuar kreut të opozitës, Zoran Zaev. Gruevski thotë, se në rast të fitores së Zaevit, Maqedonia do të ndahet si shtet, gjuha shqipe do të bëhet zyrtare, e me këtë, sipas tij, do të rrënohet karakteri i shtetit unik. Lideri i opozitës Zoran Zaev, kësaj retorike të Gruevskit i është përgjigjur me vendosmërinë e tij për të nxjerrë para drejtësisë të gjithë zyrtarët e inkriminuar. Analistët për çështje ndëretnike thonë, se retorika e tillë nacionaliste është si pasojë e mungesës së ofertave konkrete për zgjidhjen e problemeve të shumta, me të cilat përballen qytetarët e Maqedonisë. “Është evidente që partitë çdo herë gjatë cikleve zgjedhore paraqiten me retorikë nacionaliste. Si duket, partitë ende nuk kanë kuptuar se vota apo fitorja në zgjedhje nuk mund të arrihet me nxitje të tilla nacionaliste, që tanimë janë të lexuara nga populli dhe si të tilla nuk kalojnë”, thotë Vllado Dimovski, drejtues i Qendrës për Tolerancë Ndërentike.
Kreu i VMRO-DPMNE-së Nikolla Gruevski, fton elektoratin që të dalin në votime dhe të mbështesin VMRO DPMNE-në, për të fituar 63 deputetë, si mënyra e vetme për të dalë nga kriza dhe për të ruajtur rendin kushtetues në Maqedoni, pasi, sipas tij, LSDM-ja pretendon të kundërtën. Zgjedhjet e 11 dhjetorit Gruevski i cilëson si referendum për shtet unik dhe të unifikuar, kundër dygjuhësisë dhe ripërcaktimit të shtetit. “Kushtetuta garanton, se Maqedonia është shtet unitar. Kushtetuta e garanton që maqedonishtja është gjuha e vetme zyrtare në të gjithë territorin e republikës. Është interesi ynë që maqedonishtja të mbetet gjuha e vetme zyrtare. Dygjuhësia që Zoran Zaev ia premton shqiptarëve nuk është dygjuhësi vetëm në vendbanimet shqiptare, por në tërë teritorin e vendit”, shprehet Gruevski.
Lideri i LSDM-së, Zoran Zaev, theksoi se në këto zgjedhje do të fitojnë qytetarët. Ai ftoi qytetarët të votojnë pa frikë dhe të lajmërojnë nëse dikush i kërcënon, apo u kërkon t’ua blejë votën.
“Në Maqedoni do të vlejë për të gjithë njëlloj ligji, ata që kanë bërë vepra kriminale dhe korrupsion do të japin llogari. Maqedonia nuk mund të vazhdojë me të pavërteta dhe gënjeshtra, ju premtoj se e gjithë e vërteta do të zbardhet deri në fund. Nuk mund të jemi shtet e të mos e dimë çfarë ka ndodhur në të vërtetë, të mos e dimë se kush i vrau katër djemtë e rinj në liqenin e Smillkovës, nuk mund të presim të jemi shtet si ato europiane, e të mos zbulohet e gjithë e vërteta e Lagjes së Trimave. Nuk mund të jemi të armiqësuar edhe me Greqinë, Bullgarinë, Shqipërinë, Kosovën e Serbinë. Këtu diçka kundërmon, diçka nuk është në rregull”, deklaron kryetari i LSDM-së, Zoran Zaev.
Partitë politike parlamentare shqiptare, Bashkimi Demokratik për Integrim dhe Partia Demokratike Shqiptare, fushatën elektorale për zgjedhjet e 11 dhjetorit e kanë vazhduar me premtimet për avancimin dhe mbylljen e çështjeve të pazgjidhura shqiptare. Në mitingjet elektorale drejtuesit e BDI-së kanë thënë, se në pushtetin e ardhshëm të gjitha vendimet do të merren me konsensus.
E sotmja ka shumë dallim nga e kaluara, shqiptarët tanimë ndihen të sigurt në vendin e tyre, gëzojnë të drejta të shumta, ka deklaruar kryetari i BDI-së, Ali Ahmeti. Sipas tij, shqiptarët duhet të unifikohen dhe mos ta përçajnë votën, çdo votë që do të jepet për partitë oponente do të shkojë në dëm të shqiptarëve dhe do të defaktorizojë shqiptarët e Maqedonisë. “BDI është vlerë kombëtare dhe kjo vlerë duhet ruajtur e trashëguar nga brezat që vijnë, pasi në këtë parti militojnë njerëz, të cilët kanë dhënë shumë për këtë vend. Unë nuk ndjej asnjë shqetësim dhe frikësim, se dikush mund të sfidojë BDI-në, pasi fitorja më datën 11 dhjetor është e padiskutueshme”, ka deklaruar Ali Ahmeti.
Kreu i PDSH-së, Mendu Thaçi u zotua se do të angazhohet për të realizuar të gjitha të drejtat politike të shqiptarëve si dhe për të ndërprerë diskriminimin ekonomik. PDSH zotohet, se do të miratojë dy ligje për amnisti. Amnisti për të burgosurit në raste të pretenduara si raste të montuara dhe amnisti, apo falja e të gjitha borxheve që kanë shqiptarët ndaj shtetit.
“Ne e kemi ligjin për amnisti fisklale, me të cilin do t’i falim të gjitha borxhet që kanë shqiptarët ndaj shtetit. Shqiptarët do të fillojnë të paguajnë borxhe ndaj shtetit atëherë kur ky shtet do t’u jepë shqiptarëve borxhin e madh. Një miliard e shtatëqind milionë euro të buxhetit të shtetit duhet të vijnë te shqiptarët. Ligji i dytë për amnisti, që do të sillet është zbrazja e burgjeve që janë të mbushura me shqiptarë”, thotë Thaqi.
Kryetari i Lëvizjes BESA, Bilall Kasami, tha se me ardhjen e tyre në pushtet, ky shtet do të ridefinohet si një shtet i barabartë si për maqedonasit ashtu edhe për shqiptarët. “25 vite politika na mashtroi, politika na uli dinjitetin tonë shiptar dhe ne nuk kemi kohë për të pritur. Prandaj ne ju garantojmë se të gjitha ato projekte, të cilat janë nevojë immediate do të realizohen. Vërtetë që këta shkatërruan gjithçka që ka të bëjë me shqiptarët dhe shqiptarinë, shkatërruan arsimin tonë, shkatërruan shëndetësinë shkatërruan ekonominë, kësaj gjendjeje do t’i themi stop më 11 dhjetor”, është shprehur Kasami.
Aleanca për shqiptarët vlerëson, se kriza politike dhe shkatërrimi i ekonomisë, janë pasojë e qeverisjes së gabuar nga ana e VMRO-DPMNE-së dhe BDI-së. “Unë dhe të gjithë shqiptarët po të themi se t’i i dogje 153.000 vota, që i more në vitin 2014. Ndaj tani çdo votë që shkon për ty dhe BDI-në, është votë e djegur”, sipas Ziadin Sela kryetar i LR-PDSH-së. Sipas tij, institucioni që bën shqiptarët të barabartë në gjitha sferat, si në drejtësi, buxhet, zyrtarizim të gjuhës shqipe është institucioni i votës së lirë.

Ligjvënës amerikanë të të dyja partive politike, thanë së është borxh ndaj qytetarëve amerikanë një llogaridhënie e hollësishme për ndërhyrjen ruse në zgjedhjet presidenciale të muajit të kaluar, ndërsa një përfaqësues i rëndësishëm republikan bëri thirrje për sanksione ndaj hakerëve rusë.
“Është e qartë që Rusia është përfshirë në zgjedhjet e fundit dhe ka mbledhur të dhëna për të dyja palët, ndërsa ka publikuar të dhëna vetëm për njërën palë (për të dëmtuar demokratët) në një përpjekje për të ndikuar zgjedhjet”, i tha “Zërit të Amerikës” kreu i demokratëve në Komitetin e Zbulimit, Dianne Feinstein.
Senatori republikan, Lindsey Graham, u pajtua.
“Ka shumë dëshmi që ata ndërhynë në zgjedhjet tona duke hakuar sistemet dhe duke i bashkuar forcat me të tjerët që të japin informacion që ishte i favorshëm për njërën palë kundër tjetrës”, tha tha Graham, duke shtuar se “ky është një precedent që nuk mund të lejojmë që ta kalojë pa u vërejtur”.
“Unë dua të gjejmë se çfarë kanë bërë, faktet kundrejt fiksioneve dhe të vendosim sanksione që do t’i shkaktonin dhimbje Rusisë – individëve në Rusi (përgjegjës për ndërhyrjet)”, theksoi Graham.
Pohimet e tilla mund të çojnë në përplasje me të mundshme me presidentin e sapo zgjedhur Donald Trump, i cili ka pohuar se zgjedhjet ishin të lira nga ndërhyrjet ruse.
Në një deklaratë të rrallë publike në tetor, zyrtarët e qeverisë së SHBA-së thanë se sulmet kibernetike mbi organizatat politike demokratike dhe emailet e personelit të ish-kandidates demokrate, Hillary Clinton, u drejtuan nga “zyrtarë të lartë rusë”.
Shumë demokratë nga të dyja dhomat e Kongresit i shkruan Shtëpisë së Bardhë me kërkesën që të bëhen të ditura më shumë informacione rreth kësaj çështjeje.
Feinstein nuk e kishte hedhur emrin e saj në letër, duke theksuar se tash për tash nevojitet më shumë durim.
“Hetime të caktuara janë ende duke u zhvilluar. Mendoj se ato duhet të kompletohen para se të dalin informacionet, tha Feinstein. “Një ditë të gjitha do të dalin në shesh”.
Ligjvënësit demokrat Eric Swalwell and Elijah Cummings, nxorën të mërkurën ligjin për krijimin e një paneli të të dyja partive për të hetuar ndërhyrjen ruse.
Republikani Graham tha se çështja nuk është partiake. Ndërsa demokratët ishin në shënjestër të këtij viti, republikanët mund të jenë në shënjestër të një vendi tjetër në zgjedhjet e ardhshme, tha ai.
“Çfarë nëse iranianët e bëjnë këtë? Nëse Trumpi do të jetë i rreptë me iranianët siç ka thënë se do të jetë, mund të shohim një ndërhyrje në palën republikane. Dhe kjo mund të çojë në kaos”, tha Graham.
Çështje e hapur mbetet se si arritën hakerët e huaj tek emailet e fushatës së zonjës Clinton dhe i publikuan ato nëpërmjet WikiLeaks në periudhën përmbyllëse të fushatës presidenciale.
Senatori demokrat, Ben Cardin, tha se pret që më shumë informacione të dalin në ditët në vazhdim nga administrata e Presidentit Obama.

Miratimi i një ligji në Kroaci që ndalon shfaqjen e të gjitha simboleve të totalitarizmit, lajmëruar nga kryeministri Andrej Plenkoviç të hënën përmban rreziqe të mundshme, thotë një ekspert.
Teksa ligji i ri do të ndalojë të gjitha simbolet totalitare, ka mundësi që të përfshijë edhe yllin e kuq, simbolin e partizanëve të ushtrisë komuniste jugosllave që luftoi fuqitë e Aneksit në Luftën e Dytë Botërore dhe që mori pushtetin në Jugosllavi në 1945.
Profesor Tihomir Cipek, nga Fakulteti i Shkencave Politike të Zagrebit, tha se nuk dihej me siguri se si një ligj i tillë mund të kalohej për shkak se mund të hapë një çështje kushtetuese.
“Nëse shihet si ndryshim i Kushtetutës, nevojitet një shumicë dy të tretat e deputetëve, gjë që është e pamundur”, tha ai.
“Por nëse kalohet vetëm si një ligj, që nuk ndryshon asgjë thelbësore, është e mundur që [partia në koalicion] MOST të mbështesë iniciativën”, tha ai.
Ai shpjegoi se Kroacia është ndërtuar nga aspekti kushtetues si pasuese e Këshillit Shtetëtor Antifashist për Çlirimin Kombëtar të Kroacisë nga Lufta e Dytë Botërore.
Meqë ky organ drejtohej nga komunistët “këto të dyja nuk mund të ndahen plotësisht” dhe kriminalizimi i njërës do të çonte në kriminalizim të tjetrës”, tha ai.
Megjithëse një politikan i moderuar, partia në qeveri e qendrës së djathtë e Penkoviç, Bashkimi Demokratik Kroat, BDK, shpesh pretendon se Jugosllavia e drejtuar nga komunistët ishte një regjim totalitar, ashtu si entiteti i luftës i ustashëve drejtuar nga fashistët, Shteti i Pavarur Kroat.
Deklarata e Penkoviç të hënën pasoi një polemikë në Kroaci mbi ngritjen e një pllakade në bashkinë Jasenovaç, që ishte qendër e një kampi famëkeq të përqendrimit drejtuar nga ustashët ku rreth 83,000 serbë, hebrenj, romë dhe antifashistë u vranë nga viti 1941 deri në 1945. Pllakada shkaktoi kontraversitet sepse lidhej me sloganin ustash “Za dom spremni” (Gati për Atdheun).
Megjithatë, ngaqë pllakada u vu nga shoqata e ish-luftëtarëve të Forcave Kroate të Mbrojtjes, që u integrua në ushtrinë kroate në 1992, dhe ngaqë fraza është në uniformat e kësaj lidhje, Plenkoviç nuk pranoi ta dënonte pllakadën.
Cipek theksoi gjithsesi se, megjithëse të dyja sistemet totalitare ishin përgjegjëse për vdekjen e miliona vetëve, komunizmi nuk shkon drejtpërdrejt kundër vlerave të përgjithshme dhe nuk pretendon për shembull “se disa grupe njerëzish nuk janë aspak njerëz. Kjo është arsyeja përse simbole të tilla si ylli i kuq ose drapri dhe çekani nuk janë ndaluar në Europën Perëndimore”, vëzhgoi ai.
“Kjo qasje e barazimit të dy sistemeve totalitare, që vjen kryesisht nga Europa Verilindore, me anti-komunizmin e fortë të saj, rehabiliton qëllimisht ose jo një regjim totalitar dhe ky është fashizmi”, përfundoi ai.
Disa shtete europiane kanë ndaluar shfaqjen në publik të yllit të kuq, përfshirë Hungarinë, Letoninë, Lituaninë dhe Ukrainën. Të tjera po mendojnë të ndjekin shembullin.
Megjithatë, Gjykata Europiane e të Drejtave të Njeriut në 2008 vendosi në favor të një politikani hungarez, Attila Vajnai, që u prangos dhe u dënua në vitin 2003 për veshjen e yllit të kuq, duke thënë se ndalimi shkelte lirinë e tij të shprehjes.

Ekziston marrëveshje e fshehtë mes VMRO-DPMNE-së dhe BDI-së për rikthim të Gruevskit kryeministër dhe Sasho Mijallkovit në postin e drejtorit të DSK-së edhe pse bashkësia ndërkombëtare është kundër një plani të tillë, thonë diplomatë të vendeve perëndimore në Shkup. Sipas tyre, këtë plan mund ta pengojnë vetëm shqiptarët, duke votuar kundër BDI-së. “Ndërkombëtarët janë munduar gjatë kohës ta çlirojnë Ahmetin nga kthetrat e Gruevskit, mirëpo si duket kryetari i BDI-së është futur shumë thellë. Rikthimi i Gruevskit në post kryeministri dhe i Mijallkovit në postin e drejtorit të DSK-së, me siguri do të pasohet edhe me zgjedhjen e Tarçullovskit ministër të Brendshëm. Ky skenar do t’i rrisë tensionet dhe ka gjasa të shkaktojë luftë qytetare në Maqedoni. Këtë skenar mund ta pengojnë vetëm shqiptarët. Nëse BDI merr më pak se 7 deputetë në zjedhjet e së dielës, atëherë Gruevski nuk mund të kthehet në post kryeministri, sepse partitë e tjera shqiptare janë deklaruar qartë se nuk do të bashkëpunojnë me të. Nëse BDI merr më shumë se 7 deputetë, Gruevski do të bëhet prap kryeministër me çka do të vazhdojë ngecja e procesit të integrimit të Maqedonisë në NATO dhe BE, që do të përcillet me tensione të reja mes shqiptarëve dhe maqedonasve”, ka thënë për “Lajm” një diplomat perëndimor i akredituar në Shkup.

Ambasadat dhe diplomacitë e vendeve të huaja në Maqedoni kanë paralajmëruar shtetasit e tyre që të kenë kujdes në 11 dhjetor datë kur do të mbahen zgjedhjet e përgjithshme në vend.
Qytetarët nga jashtë të kenë kujdes më 11 dhjetor nëse ndodhen në Maqedoni. Kështu rekomanduan Ambasada e SHBA-së dhe përfaqësitë diplomatike të vendeve evropiane në Shkup. Në njoftimet e kumtuara, qytetarëve u rekomandohet t’i shmangen qëndrimet në grupe apo pjesëmarrjet në tubime politike. Por pavarësisht paralajmërimit, Ambasada amerikane në Shkup, e quan thjesht një procedurë standarde. “Është procedurë standarde dhe përmbushje e obligimit të ambasadës ndaj qytetarëve. Të dhëna për rrezik konkret nuk ka! Kjo nuk duhet të merret si koment mbi ecurinë e zgjedhjeve, por thjesht si detyrim i ambasadës ndaj qytetarëve të saj”, thuhet në njoftimin e Ambasadës së SHBA-së. Ambasada e Francës ndan të njëjtin qëndrim.“Ky rekomandim është i karakterit të përgjithshëm dhe nuk ndërlidhet aspak me zgjedhjet e parakohshme parlamentare”, thanë nga Ambasada e Francës. Nga Ambasada e Britanisë së Madhe në Shkup informojnë qytetarët e tyre që ndodhen në Maqedoni se deri më tani ka pasur disa sulme në objekte të partive politike, andaj duhet të kenë kujdes.“Gjatë periudhës së zgjedhjeve, qytetarët britanikë duhet t’i shmang tubimet politike dhe çfarëdolloj tubimi tjetër”, njoftuan nga Ambasada e Britanisë së Madhe.