Përsëri shpërthim eksplozivi në banesën e oficerit të Krimeve në Komisariatin e Policisë së Rinasit. Pa u mbushur dy javë nga shpërthimi i parë, në banesën e Arben Kajmakut në Fushë Prezë, ka shpërthyer një tjetër sasi eksplozivi. 10 ditë më parë, atij ju vendos një sasi eksplozivi nga shpërthimi i së cilës nuk pati persona të lënduar, por vetëm dëme materiale. Po në të njëjtën banesë, persona të paidentifikuar i vendosën sërish tritol ku edhe këtë radhë pati vetëm dëme materiale. Ngjarja ndodhi në orët e para të së hënës në Fushë-Prezë.
Burime nga policia thanë se, nga shpërthimi ka vetën dëme materiale. “Rreth orës 21:30 minuta të mbrëmjes së djeshme në Fushë-Prezë, në oborrin e banesës së Arben Kajmakut, 43 vjeç është vendosur e ka shpërthyer lëndë eksplozivi dyshohet tritol”, thanë burime nga policia e kryeqytetit.
Si pasojë e këtij shpërthimi mësohet, se është dëmtuar një bordurë prej betoni. Policia tha se, ka nisur hetimet për të ardhur tek shkaqet dhe identifikuar autorët e kësaj ngjarjeje, të dytë brenda pak ditësh. Në polici, ai ka deklaruar se nuk ka konflikt me asnjë person. Të njëjtën gjë kanë deklaruar edhe familjarët e tij.
Tritol për herë të dytë banesës së oficerit të Krimeve në Rinas
Polici i FNSH përplasi me makinë kalimtaren
Një punonjës i Repartit të Ndërhyrjes së Shpejtë është vënë në pranga, pasi ka aksidentuar një kalimtare. Ngjarja ka ndodhur pasditen e djeshme në kryeqytet, rreth orës 16:40, teksa inspektor Ramazan Durishti, duke lëvizur me makinën e tij me targa TR 6897 P, ka përplasur 58-vjeçaren me inicialet N.T në rrugën “Bulevardi Blu” në Kamëz.
E lënduara është dërguar menjëherë në Spitalin e Traumës, dhe tashmë ndodhet nën kujdesin intensiv të mjekëve. Pas kësaj, Shërbimi për Çështjet e Brendshme dhe Ankesat (SHÇBA) ka arrestuar rreth orës 22:30 inspektor Ramazan Durishtin, me detyrë trup shërbimi operacional pranë Repartit të Ndërhyrjes së Shpejtë (FNSH). Durishti akuzohet për “Shkelje të rregullave të qarkullimit rrugor”.
Përse ky makabritet? Mbyt 2 fëmijët e mitur
Një ngjarje që i kalon përmasat e imagjinatës njerëzore ka tronditur mëngjesin e djeshëm qytetin e Korçës. Një 41-vjeçar u mori jetën dy fëmijëve të tij të mitur dhe më pas vari veten. Autor i këtij krimi makabër është Naum Toshi, i cili jetonte vetëm me dy djemtë 6 dhe 4 vjeç, pasi prej pak kohësh ishte braktisur nga bashkëshortja e tij 24-vjeçare, Marsela me të cilin kishin pasur konflikte për kushtet e rënda ekonomike.
Burime nga policia lokale thanë se, dy fëmijët ishin mbytur me tel në qafë, kurse babai i tyre ishte varur, gjithashtu me tel. Trupat e pajetë janë gjetur në mëngjes nga babai i tij. Në derën e shtëpisë, ai gjeti një letër ku shkruhej: “Ngjituni lart”. Ishte ai që lajmëroi policinë. Motra e 41-vjeçarit rrëfen mes lotësh skenën e tmerrshme që pa kur hyri në shtëpi. “Nuk e kishte të saktë nusen, ca kohë e kishte në Greqi, pastaj e solli këtej. Në katin e dytë ishin të varur, unë sa u ngjita dhe zbrita, vetëm vëllain pashë”, tha ajo.
Kjo familja kishte vetëm pak kohë që ishte kthyer nga Greqia. Kjo ishte martesa e dytë e Marsela Toshit, e cila kishte djalin 6-vjeçar nga martesa e parë. Mësohet se ajo punonte në një lokal nate në Korçë, gjë që kishte sjellë konfliktet në familje. Paraprakisht dyshohet se shkak është bërë depresioni i 41-vjeçarit pas largimit të bashkëshortes së tij.
Viktimat ishin në të njëjtën dhomë, dhe policia akuzoi për krimin e trefishtë Naum Toshin. Nga hetimet e deritanishme del që 41- vjeçari Naum Toshi ishte rënduar psikologjikisht, pas largimit nga banesa të bashkëshortes së tij Marsela Toshi.
Edhe familjarët e tij, konfirmojnë mosmarrëveshjet e vazhdueshme të çiftit, të cilat sollën largimin e gruas nga shtëpia dhe më pas krimin makabër të burrit të braktisur. Çifti ishte në konflikt edhe kur ndodheshin në Greqi. Me një grua 15 vjet më të re, Toshi vendos të lërë emigracionin dhe të kthehet në Korçë, në shtëpinë e tij në lagjen 4. Marrëdhënia midis tyre nuk u normalizua, por u përkeqësua. Naum Toshi nuk e lejonte atë të punonte si kameriere në një disko të qytetit.
Sipas familjarëve, gruaja ishte larguar nga shtëpia në mes të muajit nëntor, drejt Greqisë, duke e braktisur të shoqin dhe dy djemtë e mitur, ku më i madhi ishte fryt i martesës së parë të saj. Ka dëshmi që ajo u kthye dhe dy orë para se të ndodhte ngjarja tentoi të merrte fëmijët dhe të largohej bashkë me ta në Greqi. Por e refuzuar nga i shoqi, ajo vazhdoi e vetme në shtetin fqinj, kurse 41-vjeçari mori vendim fatal, vrau dy fëmijët dhe veten.
Toshi kishte planifikuar gjithçka
Bëhet e ditur se, Toshi kishte planifikuar gjithçka, vrasjen e dy djemve si dhe të varte veten. Në letrën që ai kishte lënë për të atin, shkruante se nuk e kishte pyetur kur ishte martuar me Marsela Toshin dhe nuk do e pyeste as për vendimin tragjik të fundit. 41-vjeçari shkruante në letër se
gjithçka po e bënte për shkak të mosmarrëveshjeve me gruan dhe se ajo “kishte marrë rrugë të keqe”.
Ndërkohë nga sistemi TIMS, Marsela Toshi rezulton se është futur në Shqipëri nga pika kufitare e Kapshticës rreth orës 2 të mëngjesit të ditës së dielë. Ajo kishte shkuar tek banesa e bashkëshortit dhe fqinjët kanë treguar se mes tyre ka pasur grindje. Po ashtu mësohet se, Marsela Toshi është larguar nga Shqipëria, sipas sistemit TIMS në orën 16:00 të ditës së dielë.
Policia e Korçës dha detaje mbi ngjarjen e ndodhur mëngjesin e kësaj të hëne në lagjen nr. 4, të qytetit në rrugën “Koli Tupa” ku në një banesë u gjetën të pajetë nga familjarët e tyre Naum Toshi 41 vjeç dhe V.T, 4 vjeç (djali i tij) si edhe J.T, 7 vjeç (fëmijë i ardhur nga martesa e parë, e bashkëshortes së 41-vjeçarit).
Policia thotë se, nga veprimet hetimore të kryera nga ana e shërbimeve policore në vendngjarje, rezulton se Toshi gjatë natës, pasi ka mbytur e më pas ka varur dy djemtë e tij të mitur, është vetëvarur edhe vetë në ambientet e dhomës së tij. Policia thotë se, në vendin e ngjarjes janë konstatuar edhe disa shënime, të cilat viktima ia kishte lënë babait të tij, ku e sqaronte atë për aktin që do të kryente.
Letra e vrasësit para se të kryente krimin
Publikohet letra që që 41-vjeçari Naum Toshi, kishte lënë për babain e tij, përpara se të mbyste dhe të varte dy fëmijët e tij të mitur.
“Ngjitu lart dhe shiko! Babi unë nuk të pyeta kur e mora gruan dhe s’po të pyes as tani pse po iki! Po i jap fund jetës dhe fëmijët po i marr me vete! Ajo mori rrugë tjetër! Nuk më dëgjoi që të kthehej pranë familjes dhe të hiqte dorë nga jeta e rrugës! Nuk u kujdes asnjëherë për fëmijët! Asnjëherë nuk pyeti nëse ushqeheshin apo jo! Ajo shkatërroi çdo gjë! Dhe unë ndaj po iki bashkë me fëmijët e mi!”, shkruan në letër 41-vjeçari.
Nëna 24-vjeçare u kthye në banesë për t’i marrë dy fëmijët
Nëna e dy fëmijëve 4 dhe 6 vjeç, që u gjetën të pajetë në banesën e tyre, ishte vetëm 24 vjeç. Marsela Toshi, punonte në një lokal nate, dhe burri i saj nuk ia lejonte këtë. Me sa duket nga këto ka nisur edhe konflikti mes çiftit, duke pasuar me largimin nga banesa të 24-vjeçares dy muaj më parë.
Sipas fqinjëve të tyre, gruaja ishte kthyer në banesë mbrëmjen e të dielës, ku ka qëndruar deri në orën 2 pas mesnate, me pretendimin për të marrë fëmijët e saj. Por pasi nuk e ka arritur këtë gjë është larguar.
Nga ky moment fqinjët rrëfejnë se kanë dëgjuar të bërtiturat dhe ulërimat e fëmijëve, por nuk e kanë menduar se 41-vjeçari do të arrinte deri aty sa të mund të kryente një krim të tillë. Mësohet se gruaja e re, e cila kishte fëmijën 6 vjeç nga martesa e parë, dhe fëmijën 4-vjeçar nga martesa me Naum Toshin, e kishte denoncuar këtë të fundit, për faktin se e pengonte të punonte.
A mund të ishte ndryshe Shqipëria e njeriut me kartelë?
Ende pa u mbushur 48 orë nga vrasja e një gruaje në Fier, e cila u hodh nga ballkoni i shtëpisë nga bashkëshorti i saj, një tjetër krim makabër ndodhi dje në Korçë. Babai 41-vjeçar mbyti me litar dy fëmijët e tij të mitur 4 dhe 6 vjeç dhe më pas vari edhe veten. Dy fëmijët e mitur ishin krijesat më të pafajshme, por jeta e tyre u shua në mënyrë barbare nga babai i tyre në kushtet e një depresioni psikik.
Varfëria ekstreme dhe mjerimi që ka pllakosur të gjithë vendin, por sidomos në zonat rurale janë shkaqet kryesore që e ka çuar shoqërinë shqiptare në një depresion shokues.
Në fakt kohët e fundit është rritur së tepërmi krimi brenda familjes si dhe vetëvrasjet për shkaqe të rënda ekonomike. Përditë ndodhin vrasje e vetëvrasje, ndërsa qeveria jo vetëm që nuk siguron bukën e gojës, por nuk jep asnjë zgjidhje për njerëzit e pashpresë dhe të dëshpëruar nga mosgjetja e një rruge për të mbijetuar.
Vetë Rama është me kartelë dhe me veprimet e tij të pakontrolluara e ka kthyer shoqërnë shqiptare në depression. Si pasojë e skizofrenisë së Ramës, Shqipëria i është kthyer epokës migjeniane. Rritja e papunësisë dhe korrupsioni qeveritar ka humbur shpresën tek shqiptarët dhe ka çuar në dëshpërim mijëra vetë. Duke qenë në mjerim dhe në mungesë të një shprese për të mbijetuar, qytetarët ndërmarrin akte barbare përtej njerëzores.
Një grusht njerëzish në pushtet dhe miqtë e tyre pasurohen me korrupsion dhe duke plaçkitur gjithçka nga pasuria shtetërore aq sa nuk dinë ku t’i çojnë paratë, ndërsa populli ropatet në varfëri e mjerim. Askush nuk kujtohet nga qeveritarët për ata familjarë që zgjohen në mëngjes dhe nuk kanë me çfarë t’i ushqejnë fëmijët e tyre. Qeveria kujtohet vetëm t’u presë edhe dritat dhe t’u heqë përkrahjen sociale atyre familjeve që jetojnë në kushte mjeruese.
Ndërsa ushtria e të papunëve shtohet çdo ditë me më shumë, kryeministri i vendit del në ekrane televizive dhe bën sarkazëm, tallet me shqiptarët, duke u shprehur se, “punë ka, por nuk ka specialistë”. Ky kryeministër që harxhon miliona lekë për të zbukuruar zyrën e tij me taksat e shqiptarëve dhe jep tendera miliarda lekësh për miqtë e tij, guxon dhe tallet me njerëzit hallexhinj në takimet e tij bajate, kur ata i kërkojnë punë.
Shoqëria shqiptare po përjeton një gjendje shoku si pasojë e kësaj qeverie bastarde dhe mjaft njerëz në kulm të dëshpërimit vrasin apo vetëflijohen. E vetmja mënyrë shpëtimi është rrëzimi i kësaj klike që përveçse po mjeron çdo ditë e më tepër shqiptarët po i çon ata drejt akteve barbare dhe të paimagjinueshme.
Rexhep POLISI
Si nata e Timishoarës
Frrok ÇUPI
Jashtë është natë, me një grusht drita në qendër të Tiranës. Pjesë të tjera të qytetin mbeten pa drita gjysmë ore, pastaj vijnë dritat dhe ikin prapë. Lagjia jonë e kishte mbrëmë radhën e padritave. Nuk ka ndonjë të papritur. E vetmja gjë që më krijon stres është pyetja që më rrotullohet: “Po sikur të më ikin dritat në ora 6:30? Në 6:30 kryeministri i Francës të shpallë kandidaturën për president?!”. Komedi!..
Më duhet të ndjek ngjarjet, për shkak të profesionit. Por shumë njerëz po i ndjekin ngjarjet e Europës, njësoj si të ishin këtu në Tiranë…
Jo!, nuk mund të bëhet gjithmonë ky krahasim. Ngjarjet ndërkombëtare, zakonisht, nuk i bëjnë kujt përshtypje në Tiranë. E njëjta sjellje si në kohën e diktaturës. Atëherë lajmet e botës zinin veç pak vend, vetëm faqen e fundit të gazetës. Edhe ato, copë-copë. Si nuk u davarit ky dreq zakon i poshtër diktature?!
Sonte mund të thyhet edhe ai zakon. Ka ndodhur edhe më parë; për shembull në vjeshtën e vitit 1989 kur në Europën Juglindore po shembej regjimi komunist. Në Tiranë-me ato mjete informimi të kohës, copë-copë, dëgjoheshin lajme vetëm nga jashtë. Nga brenda ishte bosh. Nga jashtë kërkohej të përmbysej e keqja përbrenda. Dikush kishte një radio me bateri, dikush tjetër merrte e jepte me “kanaçen” e televizorit… Sonte i kemi të gjitha mjetet. Mund të na ikin dritat, vetëm kaq; por kjo nuk është e keqe e vogël.
Sonte priten ngjarje në Europë; ose më mirë priten të bien gurët e dominosë.
Kryeministri i Italisë, Matteo Renzi, një “selfish” me selfie pa fund, ka ardhur në pikën që duhet të japë dorëheqjen para Presidentit të Republikës. Pritet pas pak, minutë pas minute; boll që të mos na ikin dritat!… Një kryeministër majtist që e pruri Italinë përballë murit. Para dy muajsh shpalli referendumin kushtetues për të “ulur përtokë Senatin”, dhe humbi vetë mbrëmë. Mbi 70 për qind e italianëve dolën në votime, gjë që nuk ka ndodhur kaq shumë prej 30 vjetësh. Dolën jo për të kundërshtuar referendumin, se “çfarë është ky?”, askush nuk e çmonte. Kishin dalë në votime për t’i thënë Renzit “ik tani!”… Pritet kryeministri i ri. Por edhe i riu nuk bën punë. Në Itali, si edhe në Europë pritet ndryshimi i madh: Largimi i establishmentit që ka krijuar “moçalin”.
… Në ora 6:30 kryeministri i Francës ka njoftuar shpalljen e kandidaturës për President. Socialisti Manuel Valls krijoi rekordin e Europës për atë që nuk ndodh kurrë në politikë: Vuri kandidaturën përballë Presidentit të Republikës, kandidat i partisë së vet. Çorientim total i të majtës në Europë. Valls e di se nuk fiton si president i Francës, por puna ka ardhur “ku mund të strehohesh!”. Presidenti i majtë i Francës, Holande, po shkon me rekordet më të ulëta të historisë së Francës.
Pas humbjes në Itali e në Francë pritet që të dy shtetet të shkojnë në “Brexit”. Referendumi për të ikur nga BE është i mirëpritur në disa shtete anëtare. Pritet në Holandë pas këtyre zgjedhjeve që janë në prag, pritet në Austri, pritet në Rumani dhe Bullgari…
Ka një valë të gjerë dëshire për ndryshim. Qeveritë e Europës u bënë modeli i keq i qeverive që vinin nga regjimi komunist-më e keqja e botës. U zhytën në distancë të largët me popullin, u zhytën në korrupsion, në tregti influencash, në stilin liberal të pranimit të së keqes për kombet e tyre. Pas tyre, qeverive të Lindjes, siç shikoni qeverisë së Tiranës, iu mori “lopata ujë”. U bënë ortakë në trafik droge, u angazhuan në vjedhje të mëdha, u bënë të paprekshme…
… Kështu ishte edhe nata e Timishoarës. Ja, kështu pritej, me kaq padurim, që të vinte ndryshimi. Timishoara është një qytet i Rumanisë, ku shpërtheu revolucioni i përmbysjes së komunizmit. Për 11 ditë u shënua ajo që bota nuk e kishte ëndërruar; nga 16 deri më 27 shtator 1989 u shemb regjimi. Këtu në Tiranë, krerët komunistë thonin se “nuk ka lidhje me ne”; por nuk zgjati shumë. Ato netë nuk kishim drita; Qyteti “Studenti” u ngrit më këmbë fillimisht për dritat…
Po ndryshon bota, po bien establishmentet. Era e Brexit dhe e ardhjes së Donald Trump si president i Amerikës, kanë lajmëruar për erë të re.
Në pritje të Krizëlindjes: Renzi s’u ngjall!
Zamir GJURGJI
Që ‘Rilindja’ ka vdekur e ka mbaruar nuk përbën më lajm. As shifrat e ofruara shatra-patra nga INSTAT-i, as buxheti me hije e në hije i një qeverie në rënie të lirë, as fjalori me ‘libër shpie’ i Brisit të Tatimeve, as lajlelulet e Elisës së çudirave të Doganës, as Lali Erin që ia kalon në aktoriadë edhe Luftar Pajës, as arsimi që puqet me shëndetësinë në morgun e kësaj të fundit… Janë kronologji për nekrologji.
Parlamenti është vendi ku lëshohen kuja e piskama për shkak të kufomës së pakallur të drejtësisë me paterica Devilesh, teksa Rama i LSI-së kërkon t’ia lerë topin në derë Ramës së PS-së. Përkthimet anglisht-shqip kanë rënë në fushë manjetike. Laja ka shkuar në drejtim të paditur, Luja s’di ku ta kërkojë më parë. Nuk është e nevojshme të dëgjosh a lexosh gazetar-politikanët Blushi përtej të majtës e Patozi përtej të djathtës që të bindesh se ka pllakosur zia. Mjafton të dëgjosh Taulantin për të kuptuar se nuk është e këshillueshme që fëmijët të lihen pranë kufomës që dergjet ende pa çarçaf m’u në mes të Parlamentit. Mjafton të shohësh fytyrën e Rencit të Italisë pas JO-së referendare, për të kuptuar se mosha e dytë e çiftit të selfi-kllounëve Renzi-Rama ia kishte me t’futme të parës e të tretës.
“Renaissance pour l’Europe”, e projektuar nga kryerilindasi francez Francois Hollande katër vite të shkuara në Paris, është duke dalë krejtësisht nga qarkullimi politik i së majtës “progresiste”, siç po përgatitet z.Hollande të dalë “nga dera e pasme” e presidencialeve franceze.
Në fakt është një vdekje e paralajmëruar kjo e rrugës së tretë. Projektuesi i saj, z.Anthony Giddens, e pati deklaruar publikisht gjashtë vite më parë se neolaburizmi i rrugës së tretë ka vdekur dhe se kufomës i duhej vënë ‘çarçafi i bardhë’; e për më tepër, me emertesën e të vdekurit nuk duhej abuzuar. Por Shqipëria është vendi i çudive, është orvatur të mbajë e mbartë komunizmin edhe kur kishte rënë ‘de jure’ në vendorigjinë e vendorgji. Ideologjia në vendin tonë nuk dorëzohet edhe kur kryeideologu kthente potkonjtë nga dielli. Ka gjithmonë një shpresë-vegim edhe kur të dhënat flasin ndryshe.
Për të ideologjizuarit tanë shpresa-vegim nuk vdes e fundit, ajo rilind e para. Edhe kur zezohej Çaushesku, të singjashmëve tanë u dukej se ishin në ëndërr. Nuk e besonin se komunizmi mund të vdiste, prandaj edhe kufomës nuk ia hiqnin tubat. Ç’rëndësi kishte a vegjetonte a jetonte, rëndësi kishte të mos shpallej vdekja, dita e saj. Sepse ideologjia ka vetëm ditë lindjeje, nuk ka ditë vdekjeje. Në të kundërt s’do të ishte ideologji ngadhnjimtare që s’pret shpëtim nga Zot e Mbret. Në fund të fundit, kur kallej nën dhe, kishte gjithmonë një shpresë shpëtimi, mrekullie. Do ringrihej Ai, do ringjallej Ai, do rilindej Ai. Janë në pritje të gjithëpushtetësisë së Zotit të tyre, Xhorxh Soros, që e ka shpallur publikisht veten Zot i Rilindur i Gjithësisë. Mbeten në pritje të (epi)krizës së (ri)lindjes.
Sado të përpiqet opozita t’i japë zgjidhje teknike kufomës, s’do bëjë gjë tjetër veçse do vonojë procedurat që rëndom kryhen për ditën e vdekjes.Gjendja Civile nuk punon me shpejtësinë e erës, përkundrazi. E vetmja shpresë mbetet Mrekullia! Duhet provuar. Nuk ka lindje pa kriza, madje krizat janë simptomat e saj. Ka kohë ende deri sa të zbresë bredhi nga majat e maleve. Deri atë çast, të mandatuarit do të kryqëzojnë gishtat, duke bërë lutjet e rastit tek “Zoti” 80 e kusur vjeçar i (si)fatit të tyre. Eshtë lufta finale, vendimtare nën dhe…ringrihu Xhorxh Soros, ngadhënjimi është me Ne!
Rama provon sensacionin e Pavlovit!
Ilir HILAJ
Pamundësia gërshetuar me paaftësinë për të gjeneruar një gjetje frytdhënëse gjeopolitike për Shqipërinë e ka çuar Kryeministrin tonë drejt Rusisë. Në fakt nuk ka pse tregohemi kaq skeptik nëse Rusia do të ofronte zgjidhje më të mira se Perëndimi, por statistika historike tregon se në tranzicionin shqiptar nuk kemi parë asnjë komunist apo komunist të riformuar (ndryshe riemërtuar) nga Partia Socialiste që të ketë emigruar në Rusi.
Është fakt se ata që duan të çojnë vendin drejt “dimrit polar rus” për veten e tyre zgjedhin “parajsat e ngrohta në Karaibe”, blejnë rezidenca në Europën Perëndimore, hapin ekspozita në vendin “armik” SHBA, pazaret e veshjeve i bëjnë në “armikun” BE etj. Pra, ky eksperiment i ngjan tërësisht atij të Pavlovit, që kur ju pre gabzherri kafshës së gjorë dhe ushqimi nuk mbërrinte në stomak, vazhdonte të sekretonte lëngje tretës për ushqimin.
Ky eksperiment është i bukur, por kafsha e gjorë e Pavlovit ngordhi nga mungesa e ushqimit, vetëm se ngordhi e lumtur se i dukej vetja e ngrënë. Po si përfundoi qeni në duart e Pavlovit? Ishte endacak! Domethënë qeni nuk kishte zbatuar rregullat elementare të qëndrimit të paravendosur. A nuk është e njëjta gjë ajo që po ndodh sot?
Shtatë kushtet e vendosura nga Parlamenti gjerman, kanë të bëjnë vetëm me sjelljen e qeverisë, sipas regullave të paravendosura në konventa, traktate dhe marrëveshje. Konkretisht.
1. Reforma në Administratën Publike, nuk ka të bëjë me opozitën, dhe as me shoqërinë shqiptare, por me qeverinë që sapo erdhi minoi konsesusin për ligjin e nëpunësit civil.
2. Reforma në Drejtësi, ku si parakusht të funksionalitetit të vet ka mundësinë për të dënuar personazhe me pushtet, pra nënkupto ministra aktual. Kapja që po kërkon t’i bëjë qeveria e pamundëson këtë. Le të kujtojmë se sa shpejt qeveria prishi konsensusin e ndryshimeve kushtetuese, duke miratuar njëanshmërisht ligjet rrjedhës nga Kushtetuta e ndryshuar.
3. Lufta ndaj korrupsionit, lidhet me korrupsionin ushtrimor sot. Keni dëgjuar ndonjë të dënuar nga qeveria Rama pas raporteve nga KLSH, apo emisionet investigative. Në fakt kemi dëgjuar mbrojtje qeveritare ndaj tyre.
4. Lufta ndaj krimit të organizuar. Është hera e parë që një ministër në detyrë përgjegjës për luftën ndaj krimit, të ketë të implikuar imazhin e vet me krimin e organizuar dhe trafiqet. Sot, ne kemi gati 20% të trupës policore të dyshuar si e lidhur me kanabisin, domethënë në çdo 5 punonjës, një është pjesë e narkotrafikut, përfshirë edhe makina private e ministrit.
5. “Prioriteti kyç” mbetet fusha e të drejtave të njeriut. D.m.th. siguria juridike, e pronës, e lëvizjes së lirë, e shprehjes, e informimit etj. Kemi parë jo pak herë sesi me një të shtrirë të dorës rrënohen prona private për t’u bërë lulishte. Në Fier, rrafshohet një pronë e viteve 1930 për t’u ndërtuar një lulishte, kur ligji lejon prishjet për interes të lartë publik, natyrshëm lulishtja nuk është e tillë. Në Pogradec, një objekt rrënohet edhe pse ishte me leje e hipotekë të rregullt, dhe dëmshpërblehet me çmime qesharake. Mos harrojmë edhe mediat e kontrolluara nga qeveria që dëmtojnë të drejtën e shprehjes. E në fund indiferencën e qeverisë për të informuar publikun, dhe të famshmin “kodi i etikës” = “kodi i heshtjes”.
6. Rekomandimet e OSBE/ODIHR që kanë të bejnë me zgjedhjet. Bëhet fjalë për ato zgjedhje që sot kuotohen si në bursë. Çmimi mbetet 20-30 Euro plus një thes miell për votë. Reforma për zgjedhjet e 2017 dhe ecuria e tyre (nënkupto të mos blihet vota nga qeveria) është kusht shtesë për të hapur negociatat.
7. Implementimi i ligjit të dekriminalizimit. E morët vesh se, Bushi është i pafajshëm. Rroshi firmos ende si kryetar bashkie. Parlamenti me kriminelë voton ndryshime për ashpërsim të dënimeve penale për vepra me rrezikshmëri minore. Pra, jo vetëm qenkan të pastër, por edhe kriminel patriot. A nuk është edhe ky kusht për qeverinë? Pra, të shtatë kushtet janë për qeverinë. Por këto kushte shoqërohen edhe me masa shtërnguese, që për publikun janë të paperceptueshme. Uria e qeverisë për pushtet po zvenitet, sistemi e rënies domino ka nisur. Përpjekja e fundit është krijimi i një iluzioni se lidhja me Rusinë, do të sjellë rritje ekonomike. Edhe pse në volumet tregtare mes dy vendeve, pesha e ekonomisë ruse është e papërfillshme e nuk mposht dot nevojën për bashkëpunim tregtar me BE të Shqipërisë. A nuk është ky një eksperiment si i Pavlovit?
Renzi: Nuk mendoja se më urrenin aq shumë
Kryeministri italian, Matteo Renzi pranoi humbjen në referendumin për reformën kushtetuese dhe theksoi se do t’i dorëzonte sot dorëheqjen presidentit Sergio Mattarella.
Një një deklaratë të për mediat pas rezultatit shkatërrues , ai ka thënë se:” Unë kam bërë atë që duhej bërë”
“Kam propozuar një reformë të drejtë. Kam luftuar kundër kastës më të neveritshme. Unë po tërhiqem me një ndërgjegje të pastër “, tha Renzi në ditën e tij më të vështirë.
“Unë nuk mendoja se ata mund të më urrenin kaq shumë,” pranon Kryeministri italian,
Rreth 59.11% e 46 millionë zgjedhësve italianë kanë votuar kundër referendumit lidhur me një reformë kushtetuese, duke votuar kështu kundër kreut të qeverisë së qendrës së majtë, në kuadrin e një vale populiste, shkruan “Corriere della Sera”
“Jo-ja’ fitoi. Kur humbet askush nuk mund të pretendojë se nuk ka ndodhur asgjë”.
”Përvoja e qeverisë sime mbaron këtu”, theksoi Renzi.
Basha: Monopole edhe tek mielli, buka e shqiptarëve
Varfëria dhe papunësia e ka gjunjëzuar Hasin. Tregtarët e Krumës i thonë Lulzim Bashës se kalojnë ditë dhe javë pa shitur asgjë. Dimri i ftohtë ka mbërritur dhe çmimi i miellit dhe i druve është dyfishuar.
“Njerëzit ndjekin mundësinë për të qenë të lumtur vetë, jo t’ia përcaktojë shteti, t’i do ecësh përpara, t’i nuk do ecësh përpara, t’i do ndërtosh biznes, t’i nuk do të ndërtosh biznes, t’i do marrësh subvencione, t’i nuk do marrësh subvencione. Kësaj do t’i japim fund dhe bashkë me të gjithë shqiptarët e ndershëm do të ndërtojmë një shoqëri, ku përpara të eci më i zoti, më i miri dhe të gjithë të jenë të barabartë para ligjit”, u tha Lulzim Basha banorëve të Krumës që ankohen për mungesën e shanseve e të mundësive për punë e shkollim.
Hasi ka rreth 8 mijë banorë dhe mbi 50 për qind e popullsisë mbahet me ndihmë ekonomike. Ndërkohë qeveria po shpenzon 850 milionë lekë për fasadën e qytetit. Me demokratët e Hasit, Basha foli për ndryshimin e politikës që duhet të sjellë ndryshimin e realitetit.
“Shqipëria po përjeton ditë dramatike, të varfërisë, të papunësisë, që është thelluar nga një politikë e papërgjegjshme që ka vrarë shpresën e që po i detyron shqiptarët më shumë, e më shpejt se kurrë më parë, të braktisin vendin e tyre. Pse është thesi i miellit këtu dyfish më i shtrenjtë se përtej Qafës së Prusht?! Pse? Sepse ka monopole. Le ta themi edhe më qartë që ta kuptojnë edhe fëmijët 12-vjeçar. Sepse Edi Rama ka vendosur që në Shqipërinë e 2016-ës mielli, buka, sheqeri, vaji, nafta të mos tregtohen siç tregtohen kudo në botë me rregullat e tregut të lirë, po t’ua japë një grusht njerëzish, një grusht njerëzish të kenë mundësinë dhe çdo kush tjetër që futet në treg ndëshkohet, penalizohet, me gjoba, me kontroll, me xhandar, me tatimor, me doganier”, tha Basha.
Basha theksoi se shqiptarët arrijnë të ecin përpara e të kenë sukses në Europë e në Perëndim, atje ku garantohen kushtet e barazisë para ligjit, ku respektohet puna, merita, mundi, aftësia.
“Shikoni të afërmit tuaj kudo ku kanë shkuar në Perëndim. Këtu sado i aftë dhe i përkushtuar ndaj punës dhe zanatit tënd të jesh, shteti është ai që vendos nëse do të ecësh përpara apo jo, do të kapesh pas shtetit, do të kapesh pas drejtorëve, do të kapesh pas ministrave, duhet të kapesh pas Kryeministrit që të bësh përpara, vetë nuk bën dot përpara”, u shpreh Basha.
Kryetari i Partisë Demokratike tha se, demokratët duhet të qendrojnë pranë njerëzve, të njohin realitetin e tyre, të vërtetat e tyre.
“Po, jemi gati duke njohur hallet tuaja, duke i pranuar ato, duke pranuar edhe pjesën tonë të përgjegjësisë për sa na takon. Jemi gati, duke i kuptuar, duke i ndjerë si hallet tona e jo duke jetuar në një botë të veçuar nga hallet tuaja. Jemi gati, sepse kemi zgjidhje, zgjidhje plotësisht të realizueshme, jo dëngla me shëndetësi falas dhe me premtime boshe që u përdorën vetëm për të marrë votat. Jemi gati, sepse kemi vullnetin që t’i përvishemi që ditën e parë misionit të shenjtë të Partisë Demokratike. Shqipëri për shqiptarët, qeverisje për qytetarët! Taksa të ulëta, buxhet për qytetarët, asnjë familje pa bukë, ujë dhe drita, zhvillim ekonomik, duke i dhënë mundësinë çdo kujt që të ecë përpara në bazë të aftësisë, mundit dhe djersës së vet. Më i miri do të çajë përpara, por çdo kush do të mbështetet nga qeveria e ardhshme, nga shteti i shqiptarëve”, tha Lulzim Basha.
Nuk do të lejojmë barrikadën për Kukësin
Varfëria në Kukës ka arritur në një shkallë të panjohur më parë. Gjysma e familjeve të qytetit janë të regjistruara në listën e ndihmës ekonomike. Dhe një goditje tjetër pritet nga taksa e Edi Ramës për rrugën e “Kombit”, që do ta dyfishojë çmimin e biletës së udhëtimit dhe do të rrisë kostot në çdo drejtim, duke e shtrenguar akoma më shumë jetesën atje. Lulzim Basha u takua me demokratët e Kukësit dhe angazhua për të mos e pranuar këtë taksë.
“Nuk mjafton fakti që nuk ka hapur një vend të ri pune në Kukës, nuk ka bërë një investim në Kukës. Por tani dëshiron t’i vendosë Kukësit një rrethim, një barrikadë, një mur në formën e taksës për rrugën e “Kombit”. Pse duhet të paguajnë kuksianët taksë për rrugën e “Kombit” ?! Pse duhet të paguajnë kuksianët taksë për rrugën e “Kombit” kur secili prej nesh paguan 240 lekë shtesë taksë për karburantin që me ardhjen e Edi Ramës. Ne nuk do të lejojmë vendosjen e një takse që do të ndalojë qarkullimin e lirë midis Kukësit dhe Tiranës, midis Prishtinës dhe Tiranës. Rrugën që e ndërtuam me kaq sakrificë e përkundër përpjekjeve për ta penguar, do ta kemi jo vetëm rrugën e “Kombit”, por rrugën e kombit të lirë dhe rrugën e lirë të kombit, për qytetarët dhe mallrat shqiptare, të Shqipërisë dhe Kosovës”, tha Lulzim Basha.
Duke u ndalur në analizën e gjendjes së rëndë të vendit dhe nevojës për ndryshim, Basha vuri theksin tek detyra që u del përpara demokratëve, për ta ndryshuar në radhë të parë Partinë Demokratike. Basha tha se qeverisja aktuale degjeneroi në gjendjen e sotme, sepse i braktisi qytetarët, dhe e lidhi fatin e saj me krimin e me një grusht njerëzish e klientësh.
“Hallka e dobët është fakti se politikani me sistemin aktual nuk e ka të lidhur fatin e tij me qytetarin. Ka humbur çdo lidhje me realitetin, sepse fatin e tij nuk e ka të lidhur më me qytetarët. Këtu duhet të ngulemi fort ne demokratët e të nxjerrim konkluzionet tona. Së pari, ne nuk mund të lejojmë kurrë që ne demokratët të humbim lidhjen me realitetin, të humbim lidhjet me qytetarët, të jetojmë një realitet që ska lidhje me hallet dhe problemet e tyre. Detyra jonë e parë është të jemi afër njerëzve, t’i kuptojmë dhe t’i prekim hallet që ata prekin në mënyrë të përditshme e të bëjmë gjithçka për t’u ardhur atyre në ndihmë”, deklaroi Basha.
Erdhe si shpëtimtar, po ikën si varrmihës
Arben RISTANI
Erdhe si shpëtimtar e po ikën si varrmihës i ëndrrës, shpresës dhe besimit të shqiptarëve.
Të kuptoj që sje i kënaqur nga vetja, por kush ta fal që e ke zhytur Shqipërinë në mjerim, krim, drogë dhe korrupsion.
Të kuptoj që sje i kënaqur nga vetja se ndoshta do kishe dashur të hapje më shumë ekspozita, të promovoje më shumë libra, të shihje më shumë ndeshje të NBA, apo inspektoje stadiumet më të famshme të Europës.
Ndoshta do kishe dashur më shumë përfitime nga tenderat dhe koncesionet. Në fund të fundit ky ishte dhe qëllimi i qeverisjes tënde.
Rendjen pas qejfeve të tua e paguan shtrenjtë qytetarët. Taksat u rritën, çmimi i energjisë dhe naftës po ashtu, varfëria dhe papunësia pllakosen kudo.
Sot duhet të rëndonin në ndërgjegjen tënde vetvrasjet për faturën e energjisë, familjet e pashpresa që enden nëpër kampet e refugjatëve në Gjermani, Holandë etj., mijëra bizneset e mbyllura nga arroganca dhe arbitrariteti i “shtetit” tënd.
Duhet të rëndonin në ndërgjegjen tënde ata fëmijët e mitur dhe prindërit e tyre që trajtohen si skllevër në arat e kanabisit, vdekjet nga shëndetësia e munguar e sorollatjet e të sëmurëve pa gjetur zgjidhje.
Sado të përpiqesh me propagandë e gjithfarë marifeti, nuk do arrish të manipulosh të vërtetën.
Sje asgjë tjetër veçse si ai vrasësi gjakftohtë dhe me paramendim, që bën si i penduar, por që në fakt, njësoj do të vepronte sa herë t’i jepej mundësia.
Erdhe si shpëtimtar e po ikën si varrmihës i ëndrrës, shpresës dhe besimit të shqiptarëve.
Media europiane i jep lamtumirën Renzit
Dorëheqja e njoftuar e kryeministrit italian, Matteo Renzi, pas fitores së pastër të “JO”-së në referendumin kushtetues, hap të gjitha faqet në internet të gazetave kryesore të botës.
Që nga amerikanet “The New York Times” dhe “Wall Street Journal” për të vazhduar me francezen “Le Monde” dhe më pas me britaniket “Financial Times”, “BBC” dhe “Telegraph” për të përfunduar me spanjollen “El Pais”.
Të gjitha këto sjellin në faqe të parë lajmin urgjent për humbjen e referendumit nga Renzi.
Këto gazeta e drejtojnë fokusin jo vetëm për faktin se çfarë do të ndodhë më pas apo për rrugët e mundshme që mund të hapen me krizën politike të provokuar nga rezultati i votimit, por edhe për faktin që shumë prej këtyre gazetave rezultatin e këtij referendumi e shohin si një sinjal të ri të një Evrope të kërcënuar nga populizmi.
“Renzi njofton dorëheqjen pasi humbi referendumin për reformat kushtetuese”, shkruan “CNBC”, që flet për humbje turpëruese që zhyt vendin dhe zonën euro në konfuzion.
“Renzi arkëton humbjen në duart e populizmit”, shkruan “The New York Times”.
“Nga nesër vendi futet në një paqartësi politike dhe ekonomike, në një Bashkim Evropian të tronditur nga përmbysjet politike dhe irritimi ndaj partive politike”, thekson “NYT”.
“Bëhet fjalë për një dorëheqje nën presionin populist që po rrethon establishmentin politik evropian, që humbi një tjetër betejë”, shkruan nga ana e saj gazeta “The Washington Post”.
Ndërkohë francezja “Le Monde” dhe spanjollja “El Pais” nënvizojnë refuzimin e pastër që italianët i bënë reformës kushtetuese.
Kryesore
Continue to the category
