Presidenti i zgjedhur amerikan, Donald Trump, paralajmëroi ashpër dje bizneset amerikane se nëse zhvendosen në vende të tjera, do të përballen me një taksë prej 35% nëse përpiqen të shesin produktet e tyre në Shtetet e Bashkuara.
Nëpërmjet disa komenteve në Twitter, zoti Trump tha se ai synon të reduktojë ndjeshëm taksat dhe rregullat shtrënguese ndaj bizneseve. Por, ai shtoi se çdo kompani që shkarkon punonjësit e saj, ndërton qendër të re në një vend tjetër dhe pastaj mendon se do të shesë produktet e saj në SHBA pa pasoja, e ka gabim.
Zoti Trump, i cili merr detyrën më datë 20 janar, thotë se vendosja e taksës kufitare për produktet e prodhuara në vende të tjera, do ta bëjë largimin të vështirë financiarisht dhe se tashmë kompanitë janë të paralajmëruara ndaj një gabimi të tillë që do t’u kushtojë.
Shtetet e Bashkuara kanë humbur 5 milionë vende pune manifakture që nga viti 2000, një pjesë për shkak të automatizimit dhe një pjesë prej largimit drejt vendeve të tjera ku pronarët i paguajnë punëtorët shumë herë më pak se sa në SHBA.
Zoti Trump përmend si histori të hershme suksesi ofertën prej 7 milionë dollarë uljesh në taksa për kompaninë e kondicionerëve “Carrier” që ajo të mbajë të 1069-të vendet e punës në shtetin Indiana, për të cilat “Carrier” pati njoftuar se do të zhvendoseshin drejt Meksikës. Por, zoti Trump nuk përmend se sidoqoftë kompania do të zhvendosë 1100 vende të tjera pune drejt Meksikës. Ai përmendi si një sukses rastin e kompanisë “Carrier”, megjithëse në të kaluarën pati denoncuar pakte të tilla të ngjashme me favorizime në taksa. Presidenti i zgjedhur sulmoi në vazhdim kompaninë e kuzhinetave “Rexnord”, për të cilën tha se po shkarkon pa mëshirë të 300 punonjësit dhe po largohet drejt Meksikës.
Kritikët e marrëveshjes me kompaninë “Carrier” thonë se kjo do të shtyjë kompani të tjera të kërkojnë favorizime në taksa për të qëndruar në Shtetet e Bashkuara.
Por, një nga këshilltarët ekonomikë të zotit Trump, Anthony Scaramucci, u shpreh se, “kompanitë sidoqoftë do të kenë ulje taksash. Ne kemi nivelin më të lartë të taksimit të korporatave në botën e industrializuar; duhet t’i ulim këto taksa në një nivel konkurues… Shpresoj që çdo drejtues biznesi në Amerikë po e merr sinjalin e fanarit të administratës së re Trump”.
Taksa për korporatat në SHBA është zyrtarisht në nivelin 35%, por shumica e kompanive paguajnë shumë më pak, pas zbritjes së shpenzimeve të tyre të biznesit.
Hector Castillo-Olivares, kryebashkiak i qytetit Santa Catarina, në Meksikë, ku planifikohej të zhvendosej kompania “Carrier”, i tha “Zërit të Amerikës” se nuk është i shqetësuar prej ndryshimit në planet e kompanisë.
Ai tha se “nuk na shqetëson, pasi ne vazhdojmë të përmirësojmë kushtet që i bëjnë bizneset të vijnë këtu. Boshllëku i lënë nga një investitor do të mbushet nga një tjetër”.

A mund ta nisë qeveria britanike Brexit-in pa miratimin e Parlamentit? Kjo është pyetja për të cilën do të vendosë gjykata më e lartë e Britanisë. Fillimi i gjykimit katërditor në lidhje me Brexit-in përpara Gjykatës së Lartë i ka ndezur sërish gjakrat në Britaninë e Madhe.
Në fillim të nëntorit një gjykatë në Londër vendosi që qeveria e kryeministres Theresa May nuk ka të drejtë të vendosë pa pëlqimin e Parlamentit për tërheqjen e Britanisë nga BE-ja, tani kjo çështje kalon në raundin e dytë. Qeveria apeloi ndaj vendimit të mësipërm dhe tani për të do të vendosin njëmbëdhjetë gjyqtarët e Gjykatës së Lartë.
“Normalisht gjykata duhet të ketë prova ose dëshmitarë i rinj që të mund të presim një vendim të ndryshëm nga Gjykata e Londrës”, thotë Matthew Cole, profesor i historisë në Universitetin e Birmingham. Në këtë rast, nuk ka të tilla dhe Cole thotë se, “Gjykata thjesht do të shohë nëse provat që janë paraqitur tashmë në gjykimin e mëparshëm, janë interpretuar si duhet”.

A do të zbatohet Brexit-i apo jo?
Në Britaninë e Madhe gjykimi shihet nga shumë si një vendim nëse i ashtuquajturi Brexit do të vazhdojë të zbatohet apo jo. Shumica e deputetëve do të votojë në Parlament për daljen. Por qeveria ka frikë se procesi mund të shtyhet prej propozimeve për ndryshime të mundshme ligjore.
Oliver Patel, punonjës shkencor pranë University Colleges në Londër mendon se Gjykata e Lartë nuk do ta ndryshojë vendimin e Gjykatës së Londrës. Sipas ligjit, i cili ka bërë të mundur referendumin për Brexit-in, vota e këtij referendumi ka vetëm karakter këshillues dhe jo detyrues.
Vendimin për anëtarësimin e Britanisë së Madhe në BE në vitin 1972 e ka marrë ‘Parlamenti, pra për përmbysjen e këtij vendimi dhe daljen nga BE-ja mund të vendosë vetëm një statut ose rezolutë e Parlamentit, sqaron Matthew Cole. Parlamenti mund të vendosë edhe nëse do ta injorojë vendimin e referendumit apo ta shtyjë zbatimin e tij, thotë Matthew Cole.

Mediat: “Gjyqtarët janë armiq të popullit”
Vendimi i Gjykatës së Londrës shkaktoi shumë kritikë në media. Gazeta bulevardeske “The Daily Mail” i quajti gjyqtarët si “Armiq të popullit”. Mendime të ngjashme u botuan edhe në gazetat e tjera tabloide.
Procesi i tanishëm është edhe një provë se sa do të jenë në gjendje gjyqtarët të vendosin në mënyrë të pavarur prej presionin publik, thotë Matthew Cole. “Drejtësia britanike është e njohur se nuk ndikohet prej gjërash të tilla”, thotë ai, por ky rast do të tërheqë me siguri vëmendje mjaft të madhe.
Oliver Patel thotë se, “organet e drejtësisë përbëjnë një shtyllë të fortë të demokracisë britanike dhe se britanikët i respektojnë ato. Do të ishte mjaft alarmuese nëse respekti publik dhe besimi i tyre në një rast të tillë do të përkeqësohej”.
Tani të gjitha sytë janë të drejtuara nga qeveria dhe se si do të reagojë ajo ndaj vendimit që pritet të shpallet në fillim të janarit.

Kryeministri japonez, Shinzo Abe ka thënë dje se në Hawai së bashku me presidentin amerikan, Barack Obama, dëshiron të kujtojë viktimat e sulmit japonez në Pearl Harbor, të kryer para 75 vjetësh. Abe udhëton drejt Hawait edhe për të marrë pjesë në një samit që do të mbahet më 26 dhe 27 dhjetor.
Vizita e Abes do të kryhet pasi Obama udhëtoi drejt Hiroshimës në muajin maj, duke u bërë i pari president amerikan në detyrë që e viziton qytetin japonez ku forcat amerikane kanë kryer sulm me bombë bërthamore, në vitin 1945.
Japonia ka sulmuar forcat amerikane në Pearl Harbor në dhjetor të vitit 1941.

Një aeroplan luftarak rus, Su-33 është rrëzuar derisa ka tentuar të ulët në aeroplanmbajtësen ruse “Admirali Kuznetsov” në Mesdhe, raporton “Reuters”, duke u mbështetur në njoftimet e agjencive ruse të lajmeve.
Rasti ka ndodhur më 5 dhjetor, ndërsa për këtë ka pasur edhe një njoftim nga Ministria e Mbrojtjes së Rusisë.
Piloti ka arritur të dalë nga aeroplani para rrëzimit, thuhet më tej në komunikatën e ministrisë ruse.

Kandidati i së djathtës në Austri, Norbert Hofer pranoi humbjen në zgjedhjet presidenciale të së dielës, pak pasi sondazhet treguan se rivali i tij Alexander van der Bellen, shënoi fitore.
Sondazhet që u publikuan nga televizioni publik, “ORF”, treguan se Van der Bellen ka fituar 53.6 për qind të votave.
Menaxheri i fushatës së zotit Hofer, Herbert Kickl, tha se sistemi ja doli mbanë sërish të bllokojë dhe të shmangë rinovimin.
Austriakët iu drejtuan ditën e diel kutive të votimit në përsëritje të procesit zgjedhor të muajit qershor, rezultati i të cilit u anulua për shkak të parregullsive.
Sondazhet fillestare të ditës së djeshme tregonin për një përparësi të ngushtë të pretendentit të së djathtës, Norbert Hofer, i cili si kandidat i Partisë së Lirisë, zoti Hofer pati marrë pozicione të forta antiemigracion, si dhe pati bërë thirrje fillimisht për një dalje të Austrisë nga Bashkimi Evropian, ku u anëtarësua në vitin 1994. Pas vendimit të Britanisë për të dalë nga BE-ja, zoti Hofer e zbuti retorikën e tij kundër bashkimit, gjë që e konfirmoi edhe ditën e diel pasi votoi në qytetin e tij të lindjes, Pinkafeld.
Rivali kryesor i tij, Alexander van der Bellen, i Partisë së Gjelbërt, fitoi ngushtë në zgjedhjet e qershorit, rezultatin e të cilave Gjykata e Lartë austriake vendosi ta anulojë për shkak të parregullsive në procesin e numërimit të votave.
Fushata elektorale në Austri ka qenë e gjatë dhe e ngarkuar me tensione. Shtypi lokal e përshkruan madje si “zgjedhjet e urrejtjes”, për shkak të irritimit në radhët e mbështetësve të djathtë të zotit Hofer dhe të frikës dhe zemërimit të kundërshtarëve të tij të majtë që e kanë quajtur ndonjëherë edhe nazist, për shkak të qëndrimeve të tij antiemigracion.

Ministria e Brendshme gjermane do të ngrejë një njësi të veçantë specialistësh të IT-së që mund t’u përgjigjen me kundërsulme sulmeve kibernetike ndaj Gjermanisë.
Nëse preken elemente shumë të ndjeshme të infrastrukturës, sidomos termocentralet apo sistemi i furnizimit me ujë, është e nevojshme “të paralizohen mjetet e sulmit” dhe të nxirren jashtë përdorimit serverat e kundërshtarëve jashtë vendit, citon gazeta “Frankfurter Allgemeine Sonntagszeitung” ekspertë që po merren me planet e qeverisë gjermane për të reaguar në raste sulmesh kibernetike. Një potencial i tillë është i nevojshëm nëse një vend nga i cili burojnë sulmet, nuk është i gatshëm për të bashkëpunuar. Ministria e Brendshme gjermane do të ngrejë një njësi të veçantë specialistësh të IT-së që mund t’u përgjigjen me kundërsulme sulmeve të tilla kibernetike ndaj Gjermanisë, shkruan “Frankfurter Allgemeine Sonntagszeitung”.
Projekti konsiderohet në radhët e koalicionit ende si i diskutueshëm, thuhet në raport. Por Ministria e Brendshme është, sipas gazetës, optimiste se një njësi e tillë mund të ngrihet dhe të nisë nga puna brenda dy deri tre vjetësh.
Javën e kaluar ka pasur një sulm spektakolar në routerin e internetit të Deutsche Telekom. 900,000 konsumatorë qenë të prekur nga ky sulm, i cili mesa duket kishte edhe objektiva të tjera.

Parandalim dhe mbrojtje
Ministri i Brendshëm, Thomas de Maiziere prezantoi së fundmi vendimet e kabinetit për një “Strategji kibernetike për Gjermaninë”. Përveç parandalimit fjala është edhe për ekipet për rastet e “krizave dhe të zjarrfikësve” për mbrojtjen gjatë dhe pas sulmeve, shpjegohet politikani i CDU-së.
Qendra e Mbrojtjes Kibernetike, e themeluar në vitin 2011, do të zgjerohet në një qendër të vërtetë dhe efektive koordinuese.
Sistemi i rrjetit elektronik të qeverisë gjermane sulmohet çdo ditë rreth 6.500 herë, pjesërisht me ndihmën e sulmeve të automatizuara, tha kohët e fundit ministrja Federale e Mbrojtjes, Ursula von der Leyen. 20 deri 30 sulme kryhen në “një formë shumë të specializuar që na krijon shumë probleme”, tha ajo. Prandaj Bundeswehr investon tani çdo vit rreth një miliard euro në fushën e sigurisë së IT-së, tha ministrja. Në vitin 2017 do të fillojë nga puna edhe një sektor ushtarak “në fushën e kibernetikës” ku do të punësohen rreth 13,500 ushtarakë dhe punonjës civilë, sepse, siç theksoi ministrja Von der Leyen: “Fushëbeteja e së ardhmes shtrihet në hapësirën kibernetike”.

Shenjë e mirë kundër populizmit në Evropë – lehtësim për fitoren e Van der Bellen në zgjedhjet presidenciale në Austri.
Në zgjedhjet presidenciale në Austri fitues doli ish-kryetari i Partisë së Gjelbër, Alexander van der Bellen. Ai fitoi ndaj kandidatit populist të djathtë, Norber Hofer.
Në reagimet e politikanëve evropianë u ndje lehtësimi për fitoren e Van der Bellen. Tani ka për detyrë “të bashkojë sërish shoqërinë austriake pas kësaj fushate të gjatë dhe të fortë elektorale”, tha sekretari i Përgjithshëm i CDU-së, Peter Tauber në Berlin.

Shenjë e mirë kundër populizmit në Evropë
“Rezulati është një shenjë e mirë kundër populizmit në Evropë”, tha ministri i Jashtëm gjerman, Frank-Walter Steinmeier (SPD).
Kjo është një ditë e mirë për Austrinë, por përfundimi i zgjedhjeve nuk do të thotë se duhet të ulim shkallën e gatishmërisë, tha për gazetën “Berliner Zeitung” sekretarja e Përgjithshme e Partisë Socialdemokrate, Katarina Barley. “Populistët e djathtë apelojnë në të gjithë Evropën ndaj instinkteve të ulëta dhe shfrytëzojnë madje edhe shqetësimet e njerëzve dhe nxisin frikëra”, tha ajo.
Fitorja e Van der Bellen është “një humbje e rëndë për nacionalizmin, prapambetjen dhe populizmin antievropian”, shkroi në Twitter presidenti i Parlamentin Evropian, Martin Schulz (SPD).
“Në një kohë kur ne gjendemi përpara sfidash të vështira, kontributi i mëtejshëm konstruktiv i Austrisë për gjetjen e zgjidhjeve të përbashkëta evropiane mbetet me rëndësi vendimtare”, tha në Bruksel presidenti i Këshillit të BE-së, Donald Tusk.