Në Krakow u hodh shorti i fazës finale të kampionatit europian të 21-vjeçarëve që do të zhvillohet nga data 16 deri në 30 qershor të vitit 2017-të në Poloni. Ndryshe nga edicionet e kaluara këtë herë në këtë kompeticion marrin pjesë në total 12 përfaqësuese dhe jo 8. 12 ekipet që do të luftojnë mes tyre për fitimin e trofeut u ndanë në 3 grupe me 4 skuadra, ku të parat e çdo grupi do të kualifikohen në fazën gjysmëfinale, ndërsa më tej do të avancojë edhe e dyta më e mirë e të treja grupeve.
Polonia si vend organizator u shortua në grupin A së bashku me Sllovakinë, kampionen në fuqi të Europianit të 21-vjeçarëve, Suedinë dhe Anglinë. Në grupin B, do të kemi një derbi iberik me Portugalinë dhe Spanjën që do të masin forcat me njëra-tjetrën por edhe me Serbinë dhe surprizën e këtij edicioni Maqedoninë. Gjermania që ishte një nga 3 kokat e serisë u shortua në grupin C me përfaqësuese të tilla si Republika çeke, Danimarka dhe mbi të gjitha, Italia. Një sfidë për të mos u humbur ajo e 24 qershorit mes kombëtares së pançerave dhe përfaqësues së kaltër. Ndeshjet e Europianit të 21-vjeçarëve për vitin 2017 do të zhvillohen në 6 stadiume polake.

Sulmuesi francez i Këlnit dhe njëkohësisht golashënuesi më i mirë i skuadrës me 12 gola, Antoni Modeste, ka lavdëruar shokun e tij të skuadrës, Mërgim Mavrajn, për paraqitjet e tij gjatë këtij sezoni. “Mërgimi ka fituar shumë besim në vetvete. Ai është një futbollist shumë i rëndësishëm për ne dhe një kundërshtar aspak i preferuar”, tha Modeste, gjatë inaugurimit të një dyqani sportiv ku disa prej futbollistëve të Këlnit ishin të pranishëm.
Në këtë sezon në Bundesligë, Këlni ka pësuar vetëm 8 gola në 12 ndeshje, po aq sa Bajerni, duke mbajtur së bashku pozicionin mbrojtjes më të fortë të Gjermanisë. Në këtë fundjavë, Këlni do të ndeshet në transfertë përballë Hofenhajmit, një nga dy ekipet e pamposhtura ende bashkë me Lajpcigun.

Besart Berisha i jep një pikë Melbourne-it në kampionatin australian. Sulmuesi shqiptar ishte autori i golit të barazimit për Victory në sfidën e Ammi Park ndaj Perth Glory që përfundoi me shifrat 1-1. Falë golit të tij të 5-të sezonal, 31-vjeçari nga Prishtina evitoi humbjen e Melbourne Victory që deri në momentin e finalizimit të Berishës po mposhtej nga Perth Glory me rezultatin 0-1. Ish-sulmuesi i kombëtares shqiptare, i cili po zhvillon sezonin e tij të 3-të me skuadrën e trajnerit Kevin Muscat ishte përcaktues në minutën e 41-të të ndeshjes, kur shfrytëzoi një pasim të Rojas për të mposhtur portierin mik, Reddy.
Berisha u tregua gjakftohtë brenda zone, duke realizuar një gol të thjeshtë. Ky ishte finalizimi i 5-të i Besart Berishës në këtë sezon të A-League, 31-vjeçari për momentin pozicionohet në vendin e 3-t të listës së golashënuesve që kryesohet nga uruguiani Fornaroli dhe irlandezi Keogh me nga 7 gola. Pikërisht, ky i fundit ishte autori i golit të avantazhit për Perth Glory-in në sfidën e javës së 9-të të kampionatit ndaj Melbourne Victory. Përsa i përket Berishës, së fundmi 31-vjeçari nga Prishtina ka marrë dritën jeshile nga FIFA për t’u aktivizuar me përfaqësuesen e Kosovës, por tashmë gjithçka mbetet në dorë të sulmuesit, pasi largësia e madhe ndërmjet Australisë dhe Europës vazhdon të mbetet një problem për Berishën.

Entonjo Elezaj shumë shpejt mund të rivalizojë Etrit Berishën, Alban Hoxhën dhe Thomas Strakoshën për katërkëndorin e përfaqësueses shqiptare të futbollit. Portieri i talentuar 20-vjeçar shqiptar ka debutuar dje me fanellën e Peruxhias në Kupën e Italisë, ku ndonëse ka dalë i mundur përballë Xhenoas, ka marrë notën më të lartë në këtë ndeshje dhe konfirmoi se është një talent me perspektivë.
Në një sfidë, të cilën skuadra e tij e niste si e pabarabartë ndaj ekipit të Serisë A, trajneri Buki vendosi të aktivizonte Elezajn për t’i dhënë eksperiencë portierit të talentuar shqiptar. Ky i fundit nuk e zhgënjeu me pritje të njëpasnjëshme që shpëtuan shumë herë katërkëndorin e skuadrës së tij. Pas një fillimi të vrullshëm të Xhenoas, që realizoi dy gola, Peruxhia barazoi gjithçka dhe çoi takimin në shtesë.
Pandev dhe Ninkoviç shënuan dy gola të tjerë pas rifillimit të ndeshjes dhe ndonëse Di Nolfo shkurtoi shifrat, Peruxhia nuk ia doli dot të çonte takimin në penallti dhe sfida u mbyll me fitoren 4-3 të Xhenoas dhe kualifikimin në turin tjetër.
Kur një portier pëson katër gola, normalisht nuk krijon një përshtypje të mirë, por kjo nuk mund të thuhet për Elezajn, i cili është vlerësuar me notën e lartë 7 nga portali “Tuttomercatoweb”.
“Është një nga më të mirët në fushë, edhe pse pësoi katër gola. Me ndërhyrjet e shkëlqyera mban gjallë skuadrën për të gjithë ndeshjen: shpëton ndaj Okampos, Simeone e Ninkoviç. Dorëzohet vetëm në kohët shtesë”, ishte shpjegimi i portalit të njohur italian për këtë notë të lartë.
E njëjta notë edhe nga portali tjetër italian, “Calciomercato”. “I kaluar në fillim nga Simeone, shlyen gjithçka në më shumë se një rast, duke iu kundërvënë Okampos apo edhe vetë sulmuesit argjentinas. Nuk mund të bëjë asgjë ndaj gjuajtjes së Pandev. Në pjesën e dytë bën fenomenin ndaj Ninkoviç, duke mbajtur në lojë skuadrën e tij”. Berisha & Co. janë të paralajmëruar…

Skuadra e Peskarës po kalon një moment aspak pozitiv në kampionatin italian të Serisë A, teksa pas 14 javësh numëron vetëm 7 pikë të grumbulluara, duke u renditur në vendin e 18, një pozicion që të rrëzon në Serinë B. Kjo performancë mjaft e dobët ka bërë që ekipi i drejtuar nga Masimo Odo të vendoset në kërkim të futbollistëve cilësorë për t’u afruar në janar. Sipas raportimeve nga mediat italiane, Peskara ka vendosur në shënjestër dy futbollistë, Adel Tarabt i Benfikës, marokeni që më parë është aktivizuar dhe me Milanin, si dhe Alesandro Rosina i Salernitanës.
Në rast të realizimit të këtyre transferimeve, të parët që janë në listë për t’u larguar janë 2 futbollistët e ardhur në huazim, Rei Manaj dhe Zhan-Kristof Bahebek.
Mediat italiane shkruajnë se sulmuesi shqiptar, i ardhur në huazim nga Interi, nuk e ka bindur trajnerin Odo, madje së fundmi ka shfaqur dhe probleme disiplinore, të cilat e lanë jashtë grumbullimit në ndeshjen e fundit në kampionat përballë Romës. Ndërkohë Bahebek i huazuar nga PSG mund të largohet për shkak të dëmtimeve të shpeshta.
Merkato e janarit po afrohet dhe tashmë nëpër media kanë filluar të qarkullojnë emrat e afrimeve apo largimeve në lidhje me çdo skuadër. Mediat italiane kanë bërë me dije se Torino në janar pritet të bëjë disa afrime të rëndësishme, por para kësaj i duhet të largojë disa futbollistë për të liruar vende në listën prej 25 lojtarësh që duhet të regjistrohet në Ligë.
Sipas raportimeve nga fqinjët përtej Adriatikut, emri i parë në listën e trajnerit Mihajloviç në merkaton dalëse është ai i mbrojtësit shqiptar, Arlind Ajeti. Futbollisti i kombëtares shqiptare pritet të largohet në huazim duke qenë se nuk bën pjesë në planet e trajnerit serb.
Ajeti u afrua në verë te Torino nga Frozinone dhe paraqitjet e tij gjatë fazës përgatitore dhanë përshtypjen se do të shndërrohej në një titullar të padiskutuar për skuadrën, por një dëmtim i rëndë i pësuar para fillimit të kampionatit dhe rezultatet mjaft të mira të Torinos gjatë këtij sezoni bënë që ai ta humbë pozicionin e tij në ekip.
Ndërkohë, Etrit Berisha nuk iu nënshtrua operacionit të planifikuar për ditën e djeshme. Portieri shqiptar i Atalantës duhej të kryente në klinikën “Villa Stuart” një ndërhyrje kirurgjikale në meniskun e gjurit të djathtë, por sipas “L’Eco di Bergamo”, operacioni është anuluar përkohësisht duke u shtyrë për në një moment tjetër. Berisha u dëmtua në ndeshjen ku Atalanta u përball me Romën dhe humbi dy ndeshjet e kaluara të skuadrës së tij, ndaj Bolonjës në kampionat dhe ndaj Peskarës në Kupë. Në ndeshjen e fundjavës në transfertë përballë Juventusit, porta e Atalantës do të mbrohet sërish nga Marko Sportielo, njësoj si në dy ndeshjet e fundit ku portieri i kombëtares shqiptare nuk ka qenë prezent.

Çmimi i FIFA-s “Trajneri i Vitit” për 2016-n ka njohur tashmë 3 finalistët e tij. Pas votave të shumta të fansave të futbollit në faqen e internetit “FIFA.com”, institucioni qeverisës i futbollit botëror ka publikuar emrat e 3 kryesuesve.
Trajneri kampion i Anglisë në drejtimin e Leiçesterit, Klaudio Ranieri, trajneri fitues i Ligës së Kampionëve në drejtimin e Realit të Madridit, Zinedin Zidan, si dhe trajneri kampion i Europës në drejtimin e Portugalisë, Fernando Santos, do të garojnë me njëri-tjetrin për të fituar çmimin prestigjioz.
Italiani, francezi dhe portugezi arritën suksese mjaft të rëndësishme gjatë këtij viti që po mbyllet, çka bëri që dhe fansat të mos kishin dyshime në hedhjen e votës së tyre.
“FIFPro”, unioni botëror i futbollistëve dhe FIFA kanë shpallur dje 55 kandidatët për formacionin më të mirë të vitit.
11-shi do të përzgjidhet nga votat e më shumë se 25 mijë futbollistëve mbi 70 vende të botës. Secili prej tyre ka të drejtë të zgjedhë një portier, katër mbrojtës, tre mesfushorë dhe tre sulmues.
Formacioni më i mirë do të shpallet më 9 janar 2017 në Zyrih, në ceremoninë ku do të jepen edhe çmimet e tjera nga FIFA, mes tyre edhe ai për futbollistin e vitit.

El Clasico është një nga sfidat më prestigjioze të lojës së futbollit, ndoshta më e ndjekura e historisë dhe e tillë do të jetë edhe këtë të shtunë kur në “Camp Nou”, Reali do të sfidojë Barcelonën në një duel shumë të rëndësishëm për fatet e këtij sezoni. Barcelona kampione në fuqi, ndërsa Reali kryesues i këtij sezoni do të kryqëzojnë rrugët e tyre në 90 minutëshin e parë El Clasico të sezonit. Gjithsesi, pikëpyetjet mbeten pasi në një duel të tillë asgjë nuk është e sigurt. Disa të tilla po i rendisim më poshtë.
1. Barcelona vazhdon të jetë e favorizuar në kuotat e basteve të bukmejkërsave, por statistikat favorizojnë Realin, pasi aktualisht është skuadra e vetme që nuk ka regjistruar asnjë humbje në La Liga. “Los Blancos” po tregojnë se janë ekipi më në formë në kontinent dhe ndoshta kuotat duhet të ishin disi më bujare për ta.
2. A do të jetë Andres Iniesta gati për të zbritur në fushën e lojës? Mesfushori mungon që prej 22 tetorit për shkak të një dëmtimi në gju dhe minutat për të në El Clasico mund të jenë me pikatore, pasi mundësitë që të aktivizohet që në pjesën e parë janë të vogla.
3. A mund të luajë Cristiano Ronaldo si një 9 i deklaruar? Në një pozicion të tillë Zidane e aktivizoi në derbin me Atleticon dhe CR7 ia shpërbleu me tri gola. Gjithsesi, pozicioni në fushë pak rëndësi ka për luzitanin, i cili është përherë i lirë të luajë në çdo pozicion të fushës, pasi klasi i tij i bën punë Realit në çdo centimetër.
4. Pikëpyetja më e madhe është se cili lojtar do ta zëvendësojë uellsianin Gareth Bale. Lucas Vazquez mbetet emri më i lakuar, por Zidane do t’i japë edhe detyra mbrojtëse pasi shpeshherë, i riu spanjoll duhet të tërhiqet edhe në mesfushë.
5. A do të jetë MSN sulmi fatal edhe në këtë El Clasico? Shifrat flasin pak ndryshe sepse gjatë këtij sezoni, treshja e famshme nuk ka arritur të ngrihet në nivelet e viteve të shkuara, me përjashtim të Lionel Messit, i cili vazhdon të mbajë mbi shpatullat e tij fatet e Barcelonës. Në krahun tjetër, Suarez po kalon një moment jo shumë pozitiv, ndërsa magjitë e Neymar nuk po funksionojnë.
6. Kush do ta ketë kontrollin e lojës? Tradicionalisht katalanasit kanë preferuar ta mbajnë topin, por në epokën Luis Enrique ky nuk ka qenë një prioritet dhe gjatë ndeshjeve të fundit është vënë re që Barcelona e ka ulur ritmin në këtë aspekt dhe nuk është aspak çudi që për herë të parë pas shumë vitesh, Reali i Madridit të dominojë edhe në mbajtjen e topit.
7. Kureshtja është e madhe edhe për debutuesit në këtë El Clasico. Paco Alcacer është emri që ngjall më shumë interes, pasi është ai alternativa kryesore për të hyrë në mes të treshes MSN. Impakt pozitiv mund të ketë edhe Samuel Umtiti, ndërsa në krahun madrilen, Mateo Kovaçiç do të tërheqë jo pak vëmendje.
8. Pyetja e pashmangshme është, cili prej Messit dhe Ronaldos do ta vendosë këtë duel? Argjentinasi ka dështuar në misionin për të gjetur rrjetën në 5 ndeshjet e fundit. Ai numëron 400 minuta pa gol ndaj Realit, ndërsa Cristiano ishte njeriu që i dhuroi Realit fitoren në duelin e fundit të zhvilluar në impiantin katalanas.
9. Pikat e dobëta të dy skuadrave. Barcelona është treguar e brishtë në mesfushë me Sergi Busquets që nuk arrin të gjejë harmoninë me shokët e repartit, ndërsa në krahun tjetër, Sergio Ramos po shihet si hallka më e dobët e mbrojtjes madrilene, pasi ka treguar pasiguri në zonën e rreptësisë gjatë muajve të fundit.
10. Nëse Reali i Madridit fiton, atëherë për Barcelonën do të jetë një “game over”. 9 pikë diferencë do të ishin shumë për katalanasit, pasi “Los Blancos” kanë treguar se pika më e fortë e sezonit të tyre është vazhdimësia në rezultate.