Edhe pse numri i të rinjve është në ulje për shkak të emigracionit dhe përfshirjes në trend plakjeje të popullsisë, Shqipëria e ka numrin më të lartë të nxënësve për një mësues në rajon.
Banka Botërore ka bërë një krahasim global të këtij treguesi dhe ka gjetur se Shqipëria në vitin 2014 kishte mesatarisht 19 nxënës për një mësues, në Maqedoni ky tregues ishte 15, në Bosnje 17, në Serbi 16 dhe në Kroaci 14.
Vendet e Evropës dhe ato të zhvilluara karakterizohen nga një numër i ulët i nxënësve për mësues me vetëm 15, por gjithashtu vendet në zhvillim dhe ato të varfra kryesisht në Afrikë kanë një numër të madh nxënësish për një mësimdhënës me më shumë se 40.
Mesatarja globale e këtij treguesi arriti më 2014 në 24 nxënës për një mësues. Në vitin 1970 mesatarja e këtij treguesi ishte 28 nxënës për mësues.
Në vjetarin statistikor të Ministrisë së Arsimit thuhet se ka një tendencë në ulje të numrit të nxënësve për arsimin bazë, fakt ky që shpjegohet me uljen e numrit të lindjeve dhe dukurisë së emigrimit.
Ndërsa për arsimin e mesëm kemi një rritje të numrit të nxënësve vit pas viti.
Rritja e numrit të nxënësve që ndjekin arsimin e mesëm është rezultat i një sërë faktorësh, ndër të cilët përmendim: politikat dhe reformat e qeverisë për arsimin, rritja e interesit të komunitetit të nxënësve dhe prindërve për arsimin përtej arsimit bazë. Për vitin 2008-2009, rënia e numrit të nxënësve në arsimin e mesëm ka ardhur si pasojë e kalimit të arsimit bazë nga sistemi 8-vjeçar në sistemin 9-vjeçar.
Shqipëria me numrin më të lartë të nxënësve për mësues
Në vendin e 111 për disponueshmërinë dhe cilësinë e infrastrukturës së transportit
Publikohet indeksi për lehtësimin tregtar 2016, i cili vlerëson 136 ekonomi bazuar në kapacitetin e tyre për të lehtësuar rrjedhën e të mirave nga kufijtë në destinacion. Raporti, ku tregohen përllogaritjet e indeksit, është hartuar nga Aleanca Globale për Lehtësi në Tregti në bashkëpunim me Forumin Ekonomik Botëror. Indeksi, i cili mbështetet në disa shtylla kryesore, e rendit Shqipërinë të 60-n nga 136 vende.
Për sa i përket qasjes në tregun vendas, Shqipëria renditet e teta, duke humbur dy vende në klasifikim krahasuar me vitin 2014. Në këtë tregues janë marrë në shqyrtim tarifat dhe kompleksiteti i tyre, si dhe pjesa e importeve, të cilat janë pa doganë.
Jemi të 52-tët për sa i përket qasjes në tregun e huaj, duke përkeqësuar renditjen në krahasim me 2014-n kur vendi renditej i 44-ti. Dy janë faktorët kryesorë që ndikojnë në këtë shtyllë, tarifat me të cilën përballen shqiptarët që bëjnë tregti jashtë dhe preferenca konsumatore ndaj mallrave të tyre.
E 50-ta në lidhje me transparencën dhe efikasitetin me administratën kufitare, ku treguesi që përkeqëson renditjen është efikasiteti i procesit të zhdoganimit.
Ndërsa në lidhje me disponueshmërinë dhe cilësinë e infrastrukturës së transportit, Shqipëria është e 111-a në renditje, duke kaluar vetëm Bosnjën dhe Hercegovinën nga vendet e rajonit. Shkak për këtë është cilësia e dobët hekurudhore, numri i kilometrave ajrore në dispozicion, si dhe cilësia e rrugëve.
Në shtyllën e “Mjedisit Operues”, vendi renditet i 59-i. Sipas raportit, problem vazhdon të mbetet mbrojtja e pronës private dhe financimi.
Katastrofa që pret Korçën nga TEC-i me torf
Më 24 nëntor 2016, qytetarët e zonës së Maliqit në Korçë firmosën një peticion për pezullimin e projektligjit për ndërtimin e një TEC-i me torf në këtë zonë. Sipas ekspertëve të mjedisit, termocentrali do të prodhojë rreth 50 milionë tonë hi dhe jetesa në këtë fshat do të bëhet e pamundur.
Qeveria Rama në vitin 2014 bëri një projektvendim për kthimin e 288 hektarë tokë bujqësore në zonë minerare me qëllim ndërtimin e TEC-it.
Gjatë seancës plenare në nëntor të 2014, akuzave të vazhdueshme të opozitës, zëvendëskryeministri Niko Peleshi iu përgjigj:
Është vendim i qeverisë me iniciativën e Ministrisë së Energjisë për t’i dhënë të drejtën Ministrisë së Energjisë të analizojë zonën torfike prej më shumë se 200 hektarësh në zonën e ish-kënetës së Maliqit. Është një zonë jo prodhuese, gjithmonë e përmbytur, një zonë torfike. Torfa digjet në vetvete vazhdimisht. Nëse e vini re tymin dhe ndotjen që i shkaktohet sot asaj zone nga torfa do ta dinit pak më mirë.
Unë jam i pari që kundërshtoj ndërtimin e një termocentrali, i cili do të digjte torfë dhe do të dëmtonte mjedisin, sepse ajo do të ndoste ajrin dhe do të ishte kundër standardeve ndërkombëtare dhe të gjitha konventave tona. [….] Ministria kërkoi leje për të studiuar torfën, nëse është e vlefshme si burim energjie […] dhe për t’i dhënë një zgjidhje përmbytjeve në këtë zonë.
Zoti Peleshi pranoi se qeveria nuk ka asnjë plan për ndërtimin e TEC-it në Maliq, i cili do të shkelte standardet ndërkombëtare të mjedisit, por Ministria e Energjetikës kërkon vetëm të bëjë një vlerësim nëse torfa është apo jo një burim energjie i vlefshëm.
Këto dy deklarata të zëvendëskryeministrit bien në kundërshtim me njëra-tjetrën. Nëse qeveria nuk planifikon të ndërtojë një TEC, atëherë përse i duhet ministrisë ky studim?
Ose ministria po shpenzon paratë publike kot ose qeveria po planifikon të ndërtojë me të vërtet një të tillë. Dhe deklaratat e zotit Peleshit, ndoshta, ishin vetëm një gënjeshtër e thënë në sallën e Kuvendit për qytetarët.
Po të lexojmë projektligjin, i cili pritet të miratohet në Kuvend, duket se qeveria po planifikon më shumë se sa thjesht një leje për të analizuar torfën për Ministrinë e Energjetikës.
Neni tre i projektligjit për “Miratimin e ndryshimit të statusit të një toke bujqësore, me sipërfaqe 288.4 ha, në zonë minerare, për shfrytëzimin e torfave për prodhimin e energjisë elektrike”, parashikon se ndryshimi i statusit të tokës nga bujqësore në minerare bëhet atëherë kur një kompani private është licencuar më parë për shfrytëzimin e torfës si burim energjie, nga ministria.
Në të shkruhet se:
Ndryshimi i statusit të tokës bujqësore i fillon efektet pas përfundimit të procedurave të licencimit, nga Ministria e Energjisë dhe Industrisë, për shfrytëzimin e torfave për prodhimin e energjisë elektrike.
E vetmja arsye pse një kompani private mund të kërkojë leje “për shfrytëzimin e torfës për prodhimin e energjisë” nga Ministria e Energjetikës, është sepse planifikon të djegë torfë.
Dhe duke qenë se në Shqipëri mungon një i tillë, me siguri qeveria ka menduar ta ndërtojë edhe kundër standardeve mjedisore, por si gjithmonë në favor të interesave të privatit.
Një ndotës natyral
Torfa është një burim natyral që ndot mjedisin dhe prodhon energji. Torfa mund të përdoret si burim për të prodhuar elektricitet. Djegia e torfës çliron në ajër emetime të karbonit, në vlera disa herë më të larta se qymyrguri ose linjiti.
Një termocentral me torfë në Shqipëri do të rriste nivelin e mbetjeve të karbonit.
Sipas Protokollit të Kyotos, Shqipëria është një nga të paktat vende evropiane, e cila nuk ka bërë asgjë për të ulur emetimet e dioksidit të karbonit.
Gjithashtu, vendi jonë nuk ka ratifikuar as Amendamentet Doha, të cilat rregullojnë emetimet e karbonit deri në vitin 2020.
“Exit.al”
Objektet e urryera të diktaturës, tani në vepra arti
Presidenti në Parlamentin Europian për krimet e komunizmit
Bujar NISHANI
Presidenti i Republikës, Sh.T.Z. Bujar Nishani mori pjesë dhe përshëndeti Konferencën e zhvilluar në Sallonin e deputetëve të Parlamentit Evropian mbi “Krimet e regjimit komunist në Shqipëri”, të organizuar nga ministri belg i Shtetit dhe Eurodeputeti Louis Michel dhe Këshillit Kombëtar shqiptaro-evropian në Bruksel.
Fillimisht Kreu i Shtetit shqiptar i shoqëruar nga delegacioni zyrtar, zhvilloi një takim me Eurodeputetin belg Louis Michel, gjatë të cilit u diskutua procesi integrues evropian i Shqipërisë, si dhe domosdoshmëria për dënimin e krimeve të komunizmit jo vetëm në vendin tonë, por në mbarë vendet e ish-bllokut komunist.
Më pas, gjatë fjalës së Tij në Konferencën mbi “Krimet e regjimit komunist në Shqipëri” në të cilën ishin të pranishëm eurodeputetë të Parlamentit Evropian, zoti Ramadan Gjana, Kryetar i Këshillit Kombëtar shqiptaro-evropian, deputetë, politikanë dhe drejtues institucionesh shqiptare për integrimin e të përndjekurve politikë, bashkëatdhetarë që jetojnë në Belgjikë, etj., Kreu i Shtetit u shpreh: “Ndihem shumë i nderuar dhe i privilegjuar, që në cilësinë e Presidentit të Republikës së Shqipërisë, të jem i pranishëm në këtë konferencë me një temë kaq të rëndësishme, delikate dhe me ndjeshmëri të lartë për të gjithë popullin shqiptar dhe të shkuarën tonë historike dhe për të ardhmen e brezave që vijnë. Ftesën për të marrë pjesë e pranova menjëherë me kënaqësi, por edhe me emocion e përgjegjshmëri, prandaj që në fillim dëshiroj t’i shpreh mirënjohjen deputetit të Parlamentit Evropian zotit Louis Michel, si dhe Kryetarit të Këshillit Kombëtar shqiptaro-evropian zotit Ramadan Gjana.
Shqipëria festoi një vit më parë me krenari njëzet e pesë vjetorin e shembjes së diktaturës komuniste që përkon me njëzet e pesë vjetorin e Lëvizjes Studentore-Intelektuale Shqiptare të Dhjetorit 1990 për daljen dhe ndarjen përfundimtare të vendit tonë nga katër dekada e gjysmë të karakterizuara nga terrori i përgjakshëm, shtypja dhe izolimi i plotë nga Evropa dhe bota. Ata studentë që u ngritën në Dhjetorin e largët e të ftohtë të 1990-ës, jo më kot në demonstrata dhe mitingjet e tyre paqësore, ideuan dhe hodhën parullat: “Poshtë diktatura!”, “Liri – Demokraci” dhe “E duam Shqipërinë si gjithë Evropa”! Në ato tri thënie përmblidhej më së miri gjithë dëshira dhe aspirata e shumicës së shqiptarëve për t’u ndarë njëherë e përgjithmonë nga komunizmi, për të hequr qafe diktaturën e pashpirt dhe veglat e saj si dhe për të ndërtuar një të ardhme tërësisht të lirë, demokratike dhe evropiane, si ajo që gëzoni ju sot në Bruksel, ekzaktësisht si ajo që tentojmë në Tiranë e kudo tjetër.
Deri në vitin 1990, regjimi vazhdonte të kryente më gjakftohtësi dhe përpikëri prej xhelati krimet e veta makabre që e kishin zanafillën qysh në vitin 1944, madje para se ta merrnin pushtetin dhe ta shpërfytyronin krejtësisht vendin dhe shoqërinë tonë nën flamurin e një ideologjie të rreme, të importuar e të dështuar.
Krimet e panumërta, vrasjet pa gjyq, arrestimet “Në emër të popullit”, burgosjet pa shkak, internimet, dëbimet e pajustifikuara, eliminimet në kufij për këdo që përpiqej të ikte në Perëndim, varret pa emra dhe viktimat ende pa varre, ndalimi i ushtrimit të fesë dhe përndjekja çnjerëzore që iu bë klerikëve dhe besimtarëve, shtetëzimi dhe grabitja e pronës private dhe pasurisë së vënë me djersë e gjak – të gjitha këto karakterizuan atë periudhë të errët të historisë së Shqipërisë, për të cilën nuk do të mjaftonte jo vetëm një konferencë, por as dhjetëra e qindra syresh për të folur, për të dëshmuar, për t’i evidentuar dhe dënuar.
Kushdo qoftë, historian, politikan, studiues, viktimë e pafajshme, mësues, hetues, gardian – do ta kishte shumë të vështirë të rrëfente gjithçka, sepse nuk do të mjaftonin dot as netët e gjata të disa dimrave për t’i treguar, folur e diskutuar mbi ato krime të padrejta.
Nuk di se nga t’ia fillosh! Nuk je në gjendje të mbarosh…! Ta filloj nga Musine Kokalari, intelektualja e ndritur e shkolluar në Perëndim që përfundoi e burgosur, e internuar dhe pastruese në Burrel për t’u varrosur pastaj me duart e lidhura me tela? Nga aspiruesja për murgeshë Marie Tuci, e cila u torturua çnjerëzisht, vetëm se besonte në vlerat njerëzore dhe në Zot? Nga Nëna e mbarë botës, Shën Tereza jonë, e cila nuk e lejua të vizonte as nënën e vet para se t’i mbyllte sytë në Shqipëri? Nga Liri Belishova, e cila edhe pse bashkëluftëtare dhe komuniste madje, përfundoi e syrgjynosur, duke parë të bijën e vetme t’i tretej nga sëmundja e pashërueshme para syve…? Sepse komunizmi ishte një kuçedër që hëngri edhe kokat e bijve e të bijave të vet. Nga fisi i Mirakajve që u vranë, u burgosën, u lindën dhe u rritën në internim? Nga familjet e intelektualëve të Tiranës që u pushkatuan pa gjyq me sebepin e së ashquajturës “bombë në ish-Legatën Sovjetike”? Nga cila krahinë ta fillosh diskutimin dhe ku ta mbarosh atë – nga veriu e deri në jug, nga lindja e deri në perëndim, gegë apo toskë, krimet u kryen sistematikisht dhe përndjekja ishte e pamëshirshme për këdo që nuk mendonte, sillej apo vepronte si përfaqësuesit e diktaturës së proletariatit.
Sidoqoftë, ne kemi nevojën dhe përgjegjësinë t’i dokumentojmë ato krime, kemi detyrimin të lexojmë pambarimisht “Rrno me rrëfye” të At Zef Pllumit, “Nën hijen e Rozafës” të Sami Repishtit dhe të pastrojmë ndërgjejgjen tonë të përbashkët shoqërore nga çdo hije e errët e së kaluarës, duke u mësuar brezave të rinj mbi të kaluarën e hidhur, në mënyrë që ajo të mos përsëritet kurrë më!
E parë në optikën e zhvillimeve historike dhe ideologjike të kohës, e ashquajtura “luftë e klasave” ishte krimi më i rëndë dhe i pajustifikueshëm në asnjë mënyrë. Kemi dëgjuar ish-drejtues të lartë të shtetit diktatorial që janë munduar të justifikuar, duke thënë “Nuk kemi bërë krime, por gabime, paçka se nuk i numërojnë dot…” Jo! E pamëshirshmja luftë e klasave nuk kurseu askënd: as pleq, as burra, as gra, as nëna, madje as fëmijë të vegjël! Ajo duhet të quhet me plot gojë ashtu siç ishte: Krim çnjerëzor në emër të luftës për pushtet!
Dhe të dënohet forcërisht dhe prerazi si janë dënuar nga njerëzimi krimet e nazizmit, të stalinizmit, të Pol Potit, gjenocidi dhe spastrimi etnik i makinerisë ushtarake të Millosheviçit, diktatura kubaneze e Fidel Kastros e deri te masakrat e ISIS-it dhe aktet terroriste, të cilat goditën edhe civilizimin këtu në Bruksel!
Gjatë këtij çerek shekulli, në vendin tonë, por edhe në mbarë Evropën Qendrore dhe Lindore, sidomos në vendet e ish-bllokut komunist, janë hartuar dhe miratuar deklarata dhe rezoluta, të cilat jo vetëm dënojnë krimet e komunizmit, por edhe synojnë dekomunistizimin, shërimin e plagëve shoqërore të shkaktuara nga diktatura, dhe sidomos ripajtimin dhe ndërtimin e një të ardhmeje të përbashkët evropiane, pa ndasi ideologjike. Menjëherë pas mbarimit të Luftës së Ftohtë, të shembjes së Murit të Berlinit dhe të ringjalljes së demokracisë në ish-vendet e bllokut komunist, pjesa perëndimore e kontinentit tonë të vjetër dhe institucionet e Evropës së Bashkuar u njohën nga afër me trashëgiminë e tmerrshme të krimeve të komunizmit.
Periudha e mesviteve 1990-të u karakterizua nga një sërë rezolutash që i dënonin ato krime siç ishte Rezoluta e Asamblesë Parlamentare të KiE-së 1096 (27 qershor 1996) për “Masat e çmontimit të trashëgimisë së ish-sistemeve totalitare komuniste” apo Rezoluta 1481 (25 janarit 2006) mbi “Nevojën për dënimin ndërkombëtar të krimeve të regjimeve totalitare komuniste”; konferenca ndërkombëtare “Ndërgjegja Evropiane dhe Komunizmi” që u mbajt në Senatin çek më 2-3 qershor 2008, e cila u mbështet edhe nga ish-Presidenti Sarkozi, Ledi Margaret Thatcher, Sekretari i Shtetit, Jason Kenney i Kanadasë dhe ish-Këshilltari i Sigurisë Kombëtare amerikane, Zbiniew Brzezinski.
Deklarata e Pragës që pasoi, citonte Rezolutën 1481 e Këshillit të Evropës si dhe “rezoluta të miratuara nga një numër parlamentesh kombëtare mbi krimet e komunizmit”, të paraprirë nga një numër seancash dëgjimore publike evropiane mbi krimet e shkaktuara nga regjimet totalitare. Kjo deklaratë, nismëtar i së cilës ishte disidenti i përjetshëm dhe Kreu i Shtetit të Lituanisë, Vytautas Landsbergis, u nënshkrua dhe u mbështet nga pesëdhjetë anëtarë të Parlamentit Evropian, nga disidentë, nga Vaclav Haveli frymëzues dhe nga Presidenti gjerman Joachim Gauck, nga poetë, shkrimtarë, filozofë dhe aktivistë shoqërorë të të drejtave të njeriut nga mbarë ish-vendet e bllokut komunist të Lindjes.
Përpjekje të për rilindur të kaluarën e hidhur
Edhe në Shqipëri, paçka se nuk janë mbajtur kurrë seanca të tilla u miratua nga Kuvendi dhe hyri në fuqi më 30 tetor 2006, rezoluta “Për dënimin e Krimeve të kryera nga Regjimi komunist në Shqipëri”. Sot, pas një vonese të gjatë e të pajustifikuar, në Shqipëri është ngritur dhe konstituuar Autoriteti i Hapjes së Dosjeve të Komunizmit, i cili shpresojmë se do t’i përmbushë pritshmëritë e të përndjekurve dhe viktimave të regjimit, për t’ua qetësuar të paktën shpirtin si dhe për të gjetur eshtrat e të parëve.
Në Shqipëri, për fat të keq, vërehen sot e kësaj dite disa tendenca dhe përpjekje për të rilindur të kaluarën e hidhur dhe për ta justifikuar atë në një farë mënyre. Kjo gjë e dëmshme për vetë shoqërinë tonë, për historinë, por sidomos për brezat e rinj, të cilët nuk e kanë jetuar atë kohë, po bëhet nëpërmjet glorifikimit të figurave të dala boje të regjimit totalitar, nëpërmjet shndërrimit të objekteve të urryera të diktaturës në të ashtuquajtura “vepra arti” dhe vende turistike, apo edhe nëpërmjet një lustrimi fals të ngjarjeve apo fakteve historike.
Lumturimi i 38 Martirëve të Kishës Katolike shqiptare nga Papa Françesku i bërë pak ditë më parë na frymëzon jo vetëm për të marrë shembull, por edhe për të reflektuar si shoqëri. Kriminelët duhen dënuar ligjërisht më e shumta, ose më e paktë duhet të heshtin e të kërkojnë falje”.
Në emër edhe të qytetarëve shqiptarë, Presidenti Nishani shprehu vlerësimin dhe mirënjohjen ndaj Diasporës shqiptare në përgjithësi, dhe asaj në Belgjikë në veçanti për sakrificat dhe përkushtimin që ka treguar për të denoncuar dhe demaskuar krimet e tmerrshme të komunizmit. “Këto sakrifica që ju dhe të parët tuaj bënë këtu, shërbyen për të mbajtur gjallë jo vetëm identitetin tonë kombëtar, shpirtin e lirë dhe të panënshtruar, por u ofruan shqiptarëve nën diktaturë shpresë dhe frymëzim të pashterur. Konferenca e sotme është një rast ideal që këtë vlerësim dhe mirënjohje ta shpreh dhe ta ndajmë së bashku pikërisht nga Parlamenti Evropian, që është vatra e përfshirjes së gjithë atyre aktorëve, të cilët vlerat e vërteta të lirisë dhe demokracisë i kanë vendosur në themel të veprimtarisë së tyre individuale dhe institucionale”, përfundoi fjalën e Tij Kreu i Shtetit shqiptar.
6 segmente rrugore që do të ndërtohen me koncesion
Duke qenë se fondet publike janë të limituara dhe hapësirat për të marrë borxh të ri për investime gjithashtu, qeveria planifikon të ndërtojë 6 projekte kryesisht të infrastrukturës rrugore me koncesion të formës Partneritet Publik Privat.
Sipas planit të ministrisë këto projekte do të ndërtohen nëpërmjet financimit publik privat deri në vitin 2020, por në rast se nuk gjenden partnerë në investime dhe financime ato do të shtyhen.
Gjithashtu në rastin e forcave madhore dhe të një krize ekonomike në Shqipëri ose në Ballkanin Perëndimor apo BE plani i investimeve të parashikuara në rrugë do të ripërshtatet për pas vitit 2020, ka argumentuar Ministria e Transportit në lidhje me planin 4-vjeçar të investimeve në rrugë sipas formës me partneritet publik privat.
Bëhet fjalë që të jepet me koncesion PPP, dyfishimi i segmentit të rrugës Fushë-Krujë-Thumanë. Projekti i dytë është by pass-i i Tiranës, i treti është ndërtimi i by pass-eve të Tepelenës, Elbasanit, Lezhës dhe Gjirokastrës. Projekti i katërt është përfundimi i urës dhe tunelit në Morinë-Kukës. Projekti i pestë është dyfishimi i rrugës Milot-Rrëshen dhe projektimi i detajuar për ndërtimin e segmentit të rrugës së Arbrit.
Për vitin që vjen sipas programimeve në projektbuxhet vepra që merr “pjesën e luanit” nga fondet publike është rruga Qukës-Qafë Plloçë, e cila vitin e ardhshëm financohet me 2.73 miliardë lekë ose mbi 22 milionë dollarë. Ky aks ka nisur vitin e kaluar dhe sipas programit buxhetor afatmesëm përfundon më 2018-n.
Projekti i dytë me financimin më të madh është sërish në Qarkun e Korçës. Bëhet fjalë për rrugën, Qafë Thanë-Lin-Pogradec, që në vitin 2017 merr 1.3 miliardë lekë ose mbi 10 milionë dollarë. Edhe ky projekt është ekzistues. Ai ka nisur në vitin 2013 dhe përfundon më 2019-n.
Tiranë-Elbasan dhe Rruga e Kombit janë dy projekte të tjera që do të vazhdojnë të marrin sërish para nga buxheti. Sipas listës së investimeve, për Tiranë-Elbasan do të shpenzohen 1.25 miliardë lekë, ndërsa për Fushë-Krujë-Milot-Morinë do të paguhen vitin tjetër 1.23 miliardë lekë. Të dy veprat sipas Ministrisë së Financave përfundojnë në vitit 2018.
By pass-i i Vlorës dhe ai i Fierit, do të marrin respektivisht 250 dhe 900 milionë lekë. Të dy veprat vazhdojnë të zvarriten prej vitesh dhe sipas listës së investimeve nuk pritet të përfundojnë para vitit 2019.
Fushë-Krujë-Thumanë dhe Skrapar-Përmet janë dy rrugë projekte të tjera që vazhdojnë, por financimi për to është më i ulët. Në total Ministria e Transportit pritet që vitin e ardhshëm të marrë 27 miliardë dhe pas rrugëve sektori më i financuar janë ujësjellësit që marrin mbi 8 miliardë lekë për vitin e ardhshëm.
Objekte të infrastrukturës rrugore të programuara për t’u ndërtuar me koncesion deri më 2020.
1- Dyfishimi i segmentit të rrugës Fushë-Krujë-Thumanë
2- By pass-i i Tiranës
3- Ndërtimi i by pass-eve të Tepelenës, Elbasanit, Lezhës dhe Gjirokastrës
4- Përfundimi i urës dhe tunelit në Morinë-Kukës
5- Dyfishimi i rrugës Milot-Rrëshen
6- Projektimi i detajuar për ndërtimin e segmentit të rrugës së Arbrit.
Rama: Ftoj Putinin të vallëzojmë së bashku
– Pse ne rusët aty i radhisim?
Rusët nuk janë antishqiptarë. S’kanë asnjë lidhje me ndonjë vokacion antishqiptar. Unë kam mbajtur pozicione koherente. Nëse gjeni në historinë e jetës time politike deklarata nacionaliste, zjarrvënëse apo zjarrnxitëse, atëherë flasim. Krahasimi që më bëhet me Saliun është shumë simplist, pasi nuk ka asnjë lidhje.
– Këtu më dukeni si Donald Trump, që thoshte kur fliste se në kohën që këtej ka kaos, Putin është i qartë në qëndrimet e tij.
Unë nuk thashë që këtej ka kaos, unë thashë që strategjia e Rusisë është koherente dhe këmbëngulëse në çdo veprim dhe kjo duket qartë edhe në Ballkan.
– Ju si do ta përballonit si kryeministër i një vendi të vogël ku ndikimi rus nuk është se është larguar, përkundrazi, aktiviteti diplomatik i Federatës Ruse është shtuar së fundmi. Ju si do ta përballonit?
Shqipëria ka qenë një ndër vendet anëtare të NATO-s që brenda aleancës ka mbështetur qasjen e re të samitit të fundit në raport me Rusinë, që është shtrëngim dhe dialog. Ne e kemi mbështetur këtë qasje dhe ne nuk kemi armiqësi me Rusinë, përkundrazi dhe fakti që jemi tërësisht të orientuar në vijën tonë drejt Perëndimit, nuk na pengon që me Rusinë të kemi një dialog. Megjithatë, këtë nuk e vendosim ne, pasi duhen dy për të hedhur një valle.
Ministri i Jashtëm grek: Droga e krimi, kushte shtesë për Ramën më 12 dhjetor
Ministri i Jashtëm grek, Nikos Kotzias u shpreh se Shqipëria do të marrë në dhjetor kushte të reja për hapjen e negociatave të anëtarësimit. Duke folur për edicionin grek të “Huffington Post” tha se pikërisht këto kushte kanë shkaktuar nervozizëm së fundi tek pala shqiptare.
Në një intervistë për “Huffington Post” ministri i Jashtëm grek, Nikos Kotzias u shpreh se Shqipërisë do t’i vihen edhe kushte të tjera, përveç pesë prioriteteve të njohura për hapjen e negociatave të anëtarësimit në BE. Në raportin që do të publikohet më 12 dhjetor, sipas Kotzias, veç pesë reformave që kërkon Komisioni Europian, do të përmenden edhe nevoja e respektimit të fqinjësisë së mirë, njohja e të drejtave të minoritetit, shfuqizimi i konceptit të trashëguar nga periudha e sundimit komunist mbi zonat minoritare, që nuk i njeh të drejtën e minoritetit banorëve të Himarës, lufta kundër krimit të organizuar dhe trafikut të drogës.
Sidomos këto dy çështjet e fundit, sipas Kotzias, kanë shkaktuar nervozizëm te pala shqiptare. I pyetur nëse ka tensione në marrëdhëniet diplomatike mes Greqisë dhe Shqipërisë, politikani grek shton se pala shqiptare është e tensionuar, pasi e kishte konsideruar shumë të lehtë marrjen e një date për hapjen e negociatave, ndërkohë tashmë ka kuptuar se duhet të plotësojë edhe kushtet e tjera për të marrë një vlerësim të mirë.
Kreu i Antimafias: Nga Shqipëria po vijnë sasira të mëdha droge
Sasia e madhe e drogës e kapur kohët e fundit në brigjet e Italisë sjell në Tiranë kryeprokurorin e Antimafias së Leçes, Cataldo Motta. Kreu i Antimafias italiane zhvilloi dje paradite një takim të mbyllur me Prokurorin e Përgjithshëm Adriatik Llalla. Pas takimit dy orësh në Prokurorinë e Përgjithshme Motta tha se, nga Shqipëria po vjen sasi më e madhe droge. Sipas tij, situata e drogës është e tillë që në këto momente duhet një bashkëpunim më i madh se më parë.
Kreu i Antimafias italiane ka zhvilluar një takim edhe me drejtuesin e Prokurorisë për Krime të Rënda, Besim Hajdarmataj. Gjatë takimit është diskutuar edhe për çështje konkrete të hetimeve të përbashkëta. Bëhet e ditur se, gjatë takimit, Shefi i Krimeve të Rënda prokurori Hajdarmataj, ka kërkuar nga Kryeprokurori i Leçes dhe përfaqësuesit e Interforcës në Shqipëri, të dorëzojnë edhe në Prokurori raportin e fluturimeve, filmimet dhe fotografimin e parcelave të hashashit në territorin tonë. Gjithashtu, mësohet se në takim është diskutuar edhe për rastet konkrete, të parandalimit të trafikut të drogës me gomone dhe avionë të vegjël.
Pas takimit nga oborri i Prokurorisë, kreu i Antimafias së Leçes, theksoi faktin se, Guardia di Financa italiane ka kapur sasi të mëdha droge, duke kërkuar që fenomeni i trafikut të luftohet që në Shqipëri. “Janë kapur sasi të mëdha kanabisi në brigjet italiane. Ky fenomen duhet që të luftohet që në Shqipëri. Bashkëpunimi është i nevojshëm. Kemi bërë një verifikim për çështjet që lidhen me prokuroritë e dy vendeve. Hetimet do të vijojnë”, u shpreh Motta.
Kreu i Antimafias italiane tha se, Prokuroria e Krimeve të Rënda në Shqipëri ka ofruar bashkëpunim të mirë. Motta nuk ka pranuar të flasë për çështje të veçanta që janë nën hetim, siç është çështja e avionit të rënë në Ishëm që drejtohej nga italiani Guido Guidi. “Jam i vjetër, por një gjë që besoj është bashkëpunimi. Kemi bërë një verifikim të hetimeve që i kemi të përbashkëta. Hetimet që po kryhen janë për sasitë e drogës së kapura në brigjet italiane, por edhe dosje të tjera, për të cilat nuk mund të flas. Situata është e tillë që duhet një bashkëpunim më i madh se më përpara. Drogë më shumë është kapur në Itali gjatë kësaj periudhe”, përfundoi Motta.
Si për ironi të fatit, në kohën kur Kryeprokurori i Antimafias, Cataldo Mota fliste para Prokurorisë së Përgjithshme, Policia italiane në zonën e Leçes një sasi prej rreth 1 ton hashash dhe një kallashnikov dhe fishekë. Sasi kjo që mendohet se është trafikuar me gomone nga Shqipëria drejt brigjeve italiane.
Një ditë me parë, prokurori i Antimafias së Leçes është takuar edhe me ministrin e Brendshëm, Sajmir Tahiri. Mësohet se është vënë theksi në bashkëpunimin mes dy vendeve në luftën kundër trafikut të drogës dhe krimit të organizuar. Kreu i Antimafias italiane i ka kërkuar ministrit të Brendshëm që të forcohen kufijtë për të parandaluar trafikun e drogës.
Policia e jugut të Italisë ka kapur javët e fundit mbi 2 ton drogë që shkon nga Shqipëria ndërkohë që fluksi i trafikut po vjen gjithnjë e në rritje.
Mediat italiane: 15 ton drogë në tre muajt e fundit nga Shqipëria
Trafiku i drogës dhe armëve nga Shqiëpria ka alarmuar Italinë. Sipas mediave italiane, gjatë tre muajve të fundit, Guardia di Finanza ka sekuestruar rreth 15 ton hashash që janë trafikuar nga Shqipëria në Itali në rrugë të ndryshme, tokësore dhe ajrore. Ndërsa Antimafia italiane dhe mediat përtej Adriatikut japin alarmin për tonelatat e drogës që futen nga Shqipëria, Rama mohon dhe fsheh gjithçka. Kryeministri shqiptar mundohet të fshehë një realitet të hidhur të kanabizimit të vendit, ndërsa mediat ndërkombëtare publikojnë çdo ditë lajme për Shqipërinë, që është kthyer në furnizuesen e Europës me kanabis. Mediat italiane, greke, gjermane dhe BBC japin alarmin për hashashin shqiptar që po mbulon vendet e tyre. Ndërsa Rama sërish mohon dhe thotë se nuk ka drogë, edhe pse mbarë Europa është e shqetësuar.
Italia tashmë duket e shqetësuar për ndryshimin e rrugës së trafikut, specializuar së fundi përmes ajrit me avionë të vegjël që kanë shpejtësi të madhe. “Repubblica” në një shkrim të para disa ditëve raportonte se linja e trafikut ajror të drogës nga Shqipëria po shqetëson Italinë, duke theksuar se trafikantët kanë pikat e tyre të zbritjes në Bari dhe Brindisi. Sipas autoriteteve italiane, tani linjat ajrore me avionë të vegjël dy vendësh që janë të aftë të udhëtojnë distanca të gjata, janë shtuar.
Shifrat flasin qartë, në Portin e Barit janë rritur sekuestrimet dhe kjo nuk është thjesht rastësi. Me rritjen e alarmit nga terrorizmi janë shtuar edhe masat në dogana, e për këtë grupet kriminale duhet të ndryshonin strategji.
Hetimet e konfirmojnë; me deltaplane dyvendëshe, të aftë të përshkruajnë distanca të gjata me shpejtësi të mirë ka dalë në dritë rruga e re e trafikut mbi Adriatik. Në shkrim përmendet rasti i sekuestrimit të 3 kuintalëve e gjysmë marijuanë që erdhi nga Shqipëria me avion.
Ndërkohë që në shtator u bllokua në Vercelli një sipërmarrës që kishte edhe licencë për fluturim që arriti të dërgonte në veri një sasi të madhe drogë. Në mars erdhi konfirmimi tjetër, po për trafik droge me avionë. Ndërkohë në Bari autoritetet në drejtimin e gjeneral Vincenzo Papuli, kanë konstatuar raste të shumta të sekuestrimeve të armëve prodhim sovjetik, të gjitha të mbërritura nga Shqipëria.
Mijëra euro vetëm në një javë, shqiptarët i qarkullonin me drogë
Policia italiane ka publikuar të dhëna rreth operacionit “Toka Jonë”, ku u arrestuan 14 tutorë shqiptarë që shfrytëzonin të paktën 20 femra për prostitucion. Sipas mediave italiane, mijëra euro vetëm në një javë, shqiptarët i qarkullonin me drogë. Ky grup kriminal shqiptarësh shfrytëzonte vajza të reja nga lindja në rrugët e Milanos, të cilat i kishin vendosur si territorin e tyre dhe e kishin quajtur “Toka jonë”.
“La Repubblica” shkruan se ishte kjo shprehja që i bëri efektivët e policisë të godisnin një rrjet që zgjaste prej vitesh. 14 persona janë vënë në pranga për shfrytëzim prostitucioni dhe trafik ndërkombëtar droge, e cila vinte nga Shqipëria, por edhe nga Holanda. Hetimet nisën në janar 2015, kur edhe policia ra në gjurmë të këtij rrjeti kriminal, i cili shfrytëzonte vajza të reja rumune, moldave dhe çeke.
“Në qoftë se 1.500 euro në javë do ju duken pak, vetëm shumëzojini për njëzet vajzat që ky grup kishte nxjerrë për të prostitutuar”, tha kreu i hetimeve Lorenzo Bucossi teksa ka dhënë detaje lidhur me operacionin policor në Itali.
Ai ka thënë se banda me 14 shqiptarë, fitonin 1500 euro nga një vajzë që prostituonte vetëm në një javë, deri në 12 mijë euro në muaj. Sipas hetuesve, këto para më pas investoheshin në trafikun e kokainës që vinte me makinë nga Holanda. Gjatë operacionit të koduar “Toka Jonë”, policia ka sekuestruar rreth 7 kg kokainë dhe 3 kg marijuanë fshehur në disa pako oriz në një apartament që përdorej nga një nga të arrestuarit.
R.POLISI
1 ton drogë dhe armë nga Shqipëria në Leçe
Droga shqiptare vazhdon të “mbysë” Italinë. Rreth 1 ton kanabis, 250 gram kokainë dhe një armë automatike tip Kallashnikov janë sekuestruar dje nga policia italiane në Leçe. Gjatë katër operacioneve të ndryshme u arrestuan 4 shqiptarë dhe një shtetas italian. Sipas mediave italiane, sasia më e madhe e lëndës narkotike është kapur në fshatin e Akajas, ku policia sekuestroi rreth 5 kuintalë marijuanë. Policia italiane ka vënë në pranga dy shqiptarë, të cilët u kapën në një veturë me një kallashnikov si dhe me 70 kg marijuanë.
Ndërkohë që një shqiptar tjetër u vu në pranga, pasi gjatë kontrollit që iu bë karroatresit me të cilin punonte iu gjetën 130 kg marijuanë. Ndërkohë që shqiptari i katërt i arrestuar ishte një 23-vjeçar shqiptar, të cilit iu kapën në makinë 1 kuintal marijuanë. Një pjesë e drogës u gjet në tre automjete të ndryshme. Pjesa tjetër u gjet në një zonë me shkurre pranë bregut të detit. Droga, sipas autoriteteve, ka mbërritur në Itali nga Shqipëria, përmes skafeve të fuqishëm. Në Burgun e Leçes është dërguar edhe një 47-vjeçar rezident në Racale, pasi policia i gjeti 250 gram heroinë.
Gjatë ditëve të fundit është rritur trafiku i drogës nga Shqipëria drejt Italisë. Para pak ditësh, Guardia di Finanza e Brindisit sekuestroi 400 kilogram kanabis sativa në qytezën San Pietro Vernotico. Policia italiane tha se, droga është “Made in Albania” dhe ishte futur në Itali nga kanali i Otrantos. Sipas hetimeve, droga kishte mbërritur në Itali nëpërmjet trafikut të kanalit të Otrantos. Sulmi “Blic” i Guardia di Finanza u bë në një banesë, ku u gjet një pjesë e drogës, ndërsa pjesa tjetër ishte në kamionin e shqiptarit të arrestuar.
1 ton marijuanë në Katania
Tre ditë më parë u sekuestrua 1 ton marijuanë në Katania. Droga, e cila mendohet se në treg do të jepte një fitim prej më shumë se 3 milionë eurosh vinte nga Shqipëria. Policia italiane ka bërë të ditur për mediat, se kjo është sasia më e madhe e drogës që është sekuestruar brenda vitit 2016 në Siçili. Përveç pronarit të apartamentit ku ishte fshehur droga u arrestuan dhe pesë persona të tjerë, që sipas autoriteteve italiane janë emra të njohur të trafikut të drogës në vend. Ata kryesisht merren me transportimin e drogës nga Ballkani, dhe më pas ua shisnin trafikantëve të vegjël në Itali. Hetuesi italian Marcelo Kardona u shpreh për mediat se, ky ishte një operacion shumë i rëndësishëm, pasi nuk bëhet fjalë për organizata të vogla italiane, por për persona që punojnë me të tjerë trafikantë jashtë kufijve.
Droga ka mbërritur në 25 nëntor nga Shqipëria në Siçili, ku në vend të trafikantëve, të cilëve do u dorëzohej droga ishin agjentët e policisë që kanë ndjekur çdo veprim. Sipas mediave italiane, të gjithë të arrestuarit janë shtetas italianë.
Autoritetet italiane këmbëngulin se, operacioni i fundit tregon dhe njëherë më shumë lidhjen e ngushtë mes Katanias dhe Shqipërisë për trafikun e drogës. Në nëntor të vitit 2013, në Skordia u sekuestruan 900 kilogramë marijuanë dhe u arrestuan dy shtetas shqiptarë. Një vit më pas u sekuestruan 1500 kilogramë marijuanë në një anije.
Ndërsa në 2015-ën janë tre sekuestrimet e bujshme: në muajin shkurt në Spartivento, më pas 1 ton marijuanë në një peshkarexhë në Portin e Ripostos dhe në shtator në kuadër të operacionit “Odisea” i Guardia di Finanza u arrestuan 15 persona dhe u sekuestrua një sasi droge me një vlerë 70 milionë eurosh.
1.6 ton drogë në Bari
Para një jave, Policia italiane sekuestroi në Bari një gomone me 1650 kg marijuanë dhe arrestoi tre skafistët, dy prej tyre nga Vlora. Mediat italiane raportuan se, Guardia di Finanza zbuloi një gomone 10 metra të gjatë që udhëtonte në brigjet mes Monopoli dhe Mola. “BrindisiOggi” raporton se, pasi roja bregdetare italiane nisi ta ndjekë gomonen arriti ta bllokojë atë dhe në bordin e saj sekuestroi 1650 kg marijuanë dhe një pistoletë me 5 plumba.
Sasia e marijuanës së sekuestruar ishte e ndarë në pako. Megjithatë, shqiptarët kur vunë re ndjekjen nga policia, disa pako i hodhën në det. Nga hetimet e para të policisë rezultoi se, gomonia e tre skafistëve shqiptarë ishte e vjedhur.
Sipas mediave italiane, të cilat i referohen policisë, tre shqiptarët u përpoqën të largohen, duke u hedhur në det, por u arrestuan. Droga e nisur nga Shqipëria kishte si destinacion, Lombardinë. Vlera e saj në treg është 16 milionë euro.
Gjysma e Romës furnizohet me drogë nga Shqipëria
“Corriere della Sera” raporton aksionin më të fundit të Policisë italiane në Romë, ku sipas autoriteteve gjysma e kryeqytetit është e pushtuar nga droga që vjen nga Shqipëria. Droga vinte nga Shqipëria e sidomos kuintalë hashashi të destinuara për bandat që drejtojnë shpërndarjen në zonën qendrore dhe atë lindore të Romës. Kështu nis raportimin e saj “Corriere della sera” për aksionin më të fundit të Policisë italiane në Romë. Sipas autoriteteve droga shpërndahej sidomos në zona me shumë banorë, ku numri i klientëve mund të arrinte më shumë se një mijë. Fitimi ishte aq i madh se janë katër organizatat e zbuluara nga policia, të cilat ndanin fitimet mes tyre, hetimet në fakt kanë nisur që në vitin 2013, për t’u konkretizuar me aksionin e sotëm.
Një perandori e vërtetë krim mes kërcënimeve, rryshfeteve dhe ndëshkimeve për ata që nuk pranonin të bindeshin. Mëngjesin e së martës hetuesit arrestuan katër persona, të cilët mendohet të jenë krerët e bandave që vepronin në zonë. Por të hetuarit e operacionit “Vëllezërit” janë më shumë se 100, dhe trafiku bazohej pikërisht te hashashi.
Sërish kanabis me trajler drejt Italisë
Një sasi e madhe droge që po transportohej me trajler u kap në portin e Durrësit. Duket se mjetet e tonazhit të rëndë po përdoren sëfundmi nga trafikantët, pasi 3 ditë më parë u kap një tjetër maune me konfeksione duke transportuar 700 kg hashash drejt Italisë, ndërsa mendohet se sasi të mëdha droge kanë kaluar drejt Italisë pa u vënë re nga autoritetet portuale.
Trajleri me targa AA 045 ND që shihni në foto u kalua në skaner pas dyshimeve se mund të kishte lëndë narkotike. Dyshimi u vertetua pasi u gjetën plot 190 kg hashash. Eshtë ndaluar drejtuesi i mjetit Erblin Tuka 33 vjeç, banues në Shijak. “Specialistët e Narkotikëve kanë ushtruar kontroll të imtësishëm ku u gjetën dhe u sekuestruan në cilësinë e provës materiale: 158 pako me peshë rreth 190 kg lëndë narkotike e dyshuar e llojit Cannabis Sattiva”, njoftoi policia.
R.POLISI
Binomi i hajdutëve Rama-Çela lë Tiranën në errësirë, anullohet derbi
Energjia elektrike u ndërpre mbrëmë edhe gjatë ndeshjes Tirana-Partizani, ndërsa gjysma e kryeqytetit ndodhet pa drita. Në minutën e 63 të derbit kryeqytetas është ndërprerë energjia elektrike, ndërsa tifozët kanë ndezur dritat e telefonit për të krijuar idenë e dritave të emergjencës. Nuk ka shpresë për derbin, por as për qytetarët e Tiranës që vazhdojnë të jenë në errësirë dhe në mungesë të energjisë elektrike. Ndërkohë qytetarët e Tiranës i janë kthyer qirinjve në këtë natë të ftohtë dhe shumë dyqane kanë ndezur gjeneratorët. Kjo është Tirana 2016, një pamje që i ngjan atyre të viteve 2000 kur kishte vetëm 4 orë drita.
Operatori i Shpërndarjes së Energjisë Elektrike ka pranuar se ka një defekt në rrjetin energjetik, duke bërë që disa zona në Tiranë të jenë pa energji elektrike. OSHEE thekson se ndërprerja e energjisë u bë pas një defekti në nënstacionin qendër. Ndërkohë, trajneri i Tiranës Mirel Josa ka deklaruar se, duhet të merren masa për të mos patur ndërprerje të energjisë elektrike. “Duhet të merren masa për gjenerator. Kjo nuk është pjesë që më takon mua. Është ndeshje derbi, që nuk mund të parashikosh shumë gjëra”, tha Josa. Josa tha se, ndihet i çuditur nga kjo situatë. Me humor, trajneri i Tiranës tha me shaka se ne trajnerët paskemi lindur për të vuajtur.
Pas disa minutash shkëputje të energjisë elektrike në derbin Tirana-Partizani, drejtuesit e klubit si dhe Federata e Futbollit kanë vendosur që minutat e mbetura të ndeshjes të zhvillohen ditën e nesërme në orën 14:00 të drekës, po në stadiumin “Selman Stërmasi”. Megjithëse energjia është rikthyer, rreth 36 minutat e mbetura të lojës do të zhvillohen nën dritën e diellit. Hyrja do të jetë e lirë për këdo që do ta ndjekë derbin.
Ndërkohë, pas ndërprerjes së energjisë elektrike në stadium, Klubi i Korabit ka marrë një vendim që ndeshjet në vijim të kampionatit mos t’i luajë në stadiumin “Selman Stërmasi” siç ka bërë deri tani. Drejtuesit e Korabit kanë nënshkruar një kontratë të re që ndeshje deri në fund të kampionatit do t’i luajnë në stadiumin e Kukësit “Zeqir Ymeri”.
Pavarësisht mosnjoftimit nga ana e drejtuesve të stadiumit, për ndeshjen e sotme, OSHEE mori përsipër dhe u angazhua për suport të dhënies së sigurisë së dyfishtë për furnizimin me energji elektrike, por punonjësit tanë nuk janë lejuar! Aktualisht kanë marrë energji elektrike zonat: Selvija, ish-Blloku, qendra ku janë ministritë, rruga e “Durrësit”, Blloku i Ambasadave. Vijojnë të mbeten pa energji një pjesë e “Vasil Shantos”, “Myslym Shyri”, etj”, citohet në njoftimin e OSHEE-së.
Kryesore
Continue to the category
