Sampdoria dhe Atalanta u kualifikuan në 1/8 e Kupës së Italisë pas fitoreve ndaj Cagliarit dhe Pescarës. Në “Marassi”, Sampdoria nuk e pati shumë të vështirë përballë sardëve duke fituar 3-0 falë dhe një fillimi shumë të mirë. Goli i Alvarezit në minutën e 13-të i dha qetësinë e nevojshme skuadrës doriane, që menaxhoi mjaft mirë rezultatin deri në të 70-ën, kur ishte Schick që dyfishoi shifrat, ndërsa në të 91-ën, Schick shënoi dhe golin e dytë personal. Falë këtij suksesi, Sampdoria kaloi në raundin tjetër, ku iu bashkangjit, Atalantës që formën e mirë të kampionatit e tregoi dhe në Kupë, ku eliminoi pa shumë probleme Pescarën.
Skuadra bergamaske fitoi 3-0 përpara tifozerisë së saj, duke zgjidhur mjaft shpejt ndeshjen me Raimondin e Grassin që shënuan në 30 minutat e para të ndeshjes, ndërsa në fund realizoi dhe Pesic. 3 shqiptarët Maloku, Manaj e Memushaj e nisën ndeshjen nga stoli, me Rejin që u fut si zëvendësues që në minutën e 14-të, duke treguar se marrëdhëniet me trajnerin Oddo janë përmirësuar, ndërsa Memushaj u aktivizua në pjesën e dytë. Në 1/8 kaloi gjithashtu dhe Spezia, që mundi 1-0 Palermon, që pas kësaj sfide shkarkoi dhe trajnerin De Zerbi.

Asnjë problem për Realin e Madridit, që siguron me lehtësi një vend mes 16 më të mirëve të Kupës së Mbretit. “Galaktikët” me plot lojtarë të rinj në formacion, mposhtën 6-1 Kultural Leonesën pas suksesit 7-1 në ndeshjen e vajtjes. Në listën e shënuesve sonte ishte edhe emri i Enco Zidanit, djali i madh i trajnerit Zinedin, në të parën ndeshje zyrtare me ekipin e parë.
Ndërkaq, hyn në histori edhe domenikani Mariano Diaz, të cilit i mjaftuan vetëm 23 sekonda për të shënuar golin më të shpejtë të Realit në Kupën e Mbretit. Gjithçka e thjeshtë edhe për Atletikon, që i bëri gjashtë gola Gihelos pas triumfit 2-0 në duelin e parë.
Surpriza e mbrëmjes vjen nga Alikante, ku Herkulesi i ligës së dytë ndali në barazim 1-1 Barcelonën në ndeshjen e vajtjes. Me një ekip me rezerva, të besuarit e Luis Enrikes u ndëshkuan nga David Mainz në të 52-ën. Por gëzimi i vendasve zgjati vetëm gjashtë minuta, pasi katalanasit barazuan me një gol spektakolar të Karles Alenas. 18-vjeçari realizoi me një të majtë të fuqishme nga rreth 20 metra në debutimin me skuadrën e parë.

Lajm i keq për Realin e Madridit në prag të El Clasico-s me Barcelonën. Pas dëmtimit ndaj Sportingut të Lisbonës në Champions dhe operacionit në Londër, zgjatet periudha në të cilën Gareth Bale do të qëndrojë jashtë fushave të lojës. Sipas mediave madrilene, sulmuesi nuk do të mund të japë kontributin për skuadrën përpara muajit prill. Prej dëmtimit në tendinë, të martën, uellsiani iu nënshtrua operacionit në kavilje. Një goditje e rëndë për teknikun Zidane, që nuk do të ketë shërbimet e lojtarit për 25 ndeshje.
Një lajm i keq ky, edhe sepse fillimisht u mendua që Bale mund të rikuperohej në shkurt të vitit të ardhshëm, për të luajtur në 1/8 e Champions. Por, një komplikim gjatë ndërhyrjes kirurgjikale ka bërë që afati për rehabilitimin e sulmuesit të zgjatet me të paktën dy muaj.
Gjatë operacionit, mjekët evidentuan se dëmtimi në kavilje ishte më i rëndë nga sa parashikohej. Sulmuesit të Realit do t’i duhet të qëndrojë për 10 ditë me kaviljen në allçi. Gjatë kësaj kohe, 27-vjeçari do të qëndrojë në Kardif, ku do të ndjekë nga televizioni edhe duelin Klasik me Barcelonën, për t’u kthyer më pas në Madrid, ku do të nisë fazën e parë të rehabilitimit.

Edinson Cavani arrin kuotën e 100 golave. PSG është në dorë të “El Matador”, i cili në takimin  kundër Angers, arriti të realizonte golin e tij të 100 me fanellën e parisienëve. Uruguaiani ia dedikoi golin viktimave të klubit brazilian Chapecoense, të cilët humbën jetën në një aksident ajror, duke veshur një bluzë me mbishkrimin “Forca Chapecoense”. Sulmuesi është duke kaluar një moment shumë të mirë duke tejkaluar të gjitha parashikimet e bëra për të. Sezoni më i mirë i Cavanit është ai i vitit 2012-2013 gjatë kohës kur luante për skuadrën e Napolit me 38 rrjeta të realizuara. Sidoqoftë rekordet janë bërë për t’u thyer dhe 29-vjeçari duket se është në rrugën e duhur për të zhvilluar një vit futbollistik me ritme shumë të larta. Goli kundër Angers, e çon “El Matador” momentalisht në kuotën e 19 golave në të gjitha kompeticionet në këtë sezon dhe premisat janë që kjo shifër të rritet. Trajneri i kampionëve të Francës, Unai Emery nuk ka aspak dyshime për cilësitë e bomberit uruguain, madje ai është i gatshëm të vendosë bast se ky do të jetë sezoni më i mirë në karrierë për Edinson Cavanin. Uruguaiani për herë të parë që nga momenti kur ai u transferua tek Parisi, po luan futboll pa qenë nën hijen e Zlatan Ibrahimoviç, por edhe pse suedezi nuk luan më për parisienët, golat e tij kanë lënë gjurmë. 156 është numri i rrjetave të realizuara në katër sezone që ai luajti për PSG, por ky fakt nuk e shqetëson aspak Cavanin, i cili ka deklaruar se detyra e tij është të punojë fort për skuadrën, për arritjen e objektivave sezonalë.
PSG nuk e humbi ritmin e kryesuesve në Ligën e parë franceze pasi bëri detyrën në shtëpi përballë Angers duke fituar me rezultatin 2-0. Skuadra parisiene vinte pas katër fitoreve radhazi në kampionat dhe ndaj Angers hasi probleme deri në momentin që zhbllokoi rezultatin me Tiago Silvën në minutën e 34-tërt. Në pjesën e dytë ishte Cavani që vuri në kasafortë 3 pikët me golin e 2-0. Me këtë fitore PSG ngjitet në vendin e 2-të në klasifikim, 1 pikë pas Nicës kryesuese dhe me pikë të barabarta me Monacon.
Olimpik Lion u ngjit në zonën europiane pas një fitoreje tenistike 6-0 me Nantes që zbret akoma më poshtë në renditje pas kësaj humbje. Miqtë bënë një ndeshje shumë të mirë në transfertën e “La Beaujoire” teksa dominuan të gjithë ndeshjen duke vajtur në pushim në shifrat 3-0 pas golave të shënuar nga Tolisso, Lacazzete dhe Gonalos, që realizoi për herë të parë në këtë sezon. Në pjesën e dytë rezultati u thellua më tej nga Valbuena, Diakabhy dhe Fekir që vulosën fitoren më të thellë të Lionit në këtë kampionat.

Pas fitores ndaj Fiorentinës, Interi i Stefano Piolit kërkon vazhdimësinë. Për të shpresuar te zona Champions deri në fund të kampionatit, zikaltërit kanë nevojë për disa fitore radhazi në mënyrë që të rikuperojnë terren ndaj skuadrave që kanë përpara në renditje. Interi këtë të premte sfidon Napolin në “San Paolo” në një stadium ku zikaltërit kanë fituar vetëm 2 herë në Kupën e Italisë gjatë 16 viteve të fundit. Gjithsesi Pioli beson se Interi i tij i ka të gjitha mundësitë për të thyer tabunë “San Paolo”.
“Kemi përballë një kundërshtar të fortë që luan mirë. Është një fushë e vështirë, e kemi të qartë se çfarë janë të aftë të bëjnë ata, por ne besojmë te aftësitë tona. Jemi përgatitur mirë dhe do të zbresim në fushë vetëm për fitore”, u shpreh Pioli.
Nga ëndrra për të parë Lionel Messin të mbajë veshur fanellën e Interit një ditë tek projekti i kinezëve për të rikthyer Interin në majat e futbollit italian dhe atij europian. Në konferencën për shtyp përpara ndeshjes ndaj Napolit, Pioli foli edhe për këto dy tema.
“Të ëndërrosh është diçka e bukur, por në disa raste mund të jetë edhe e rrezikshme. Tashmë duhet të mendojmë vetëm për realitetin. Pronarët e rinj duan të bëjnë mirë, ata transmetojnë grintë te skuadra dhe dëshirojnë ta ngrejnë Interin në nivelet më të larta. Janë shumë ambiciozë”, tha trajneri i Interit.
Njeriu i momentit në shtëpinë zikaltër është padiskutim kapiteni Mauro Icardi, i cili ka realizuar 12 gola në kampionat. Për argjetinasin Napoli ishte gati të shpenzonte 70 milionë euro në verë, por Interi vendosi të mos privohej nga shërbimet e 23-vjeçarit për të cilin Pioli ka vetëm fjalë të mira.
“Icardi po tregon që është një nga sulmuesit më të mirë në botë, është shumë i ri dhe mund të përmirësohet ende. Mauro është një profesionist i vërtetë, një lojtar që punon shumë në stërvitje. Është një shembull për shokët e ekipit dhe gjithmonë vendoset në dispozicion të skuadrës”, përfundoi trajneri i Interit.
Interi fitoi 4-2 me Fiorentinën në “San Siro” në takimin përmbyllës të javës së 14-të të Serisë A dhe rikuperon plot katër pozicione në renditjen e përgjithshme. Zikaltrit në fakt e zgjidhën ndeshjen që në pjesën e parë, duke shënuar 3 gola për 19 minuta lojë. Fitorja e parë si trajner i Interit për Stefano Piolin ishte mahnitëse.

Torino arriti të kualifikohej në turin tjetër të Kupës së Italisë pas fitores përballë Pizës, një ndeshje në të cilën debutoi për herë të parë në ndeshje zyrtare me këtë skuadër mbrojtësi i përfaqësueses kuqezi, Arlind Ajeti. Lojtari shpreson të ketë bindur trajnerin Sinisa Mihajloviç me paraqitjen e tij dhe trajneri serb justifikoi pikërisht 23-vjeçarin shqiptar në shpërthimin e tij pas ndeshjes, ku kritikoi shumë prej futbollistëve që kishte aktivizuar në këtë sfidë.
“Nuk treguam asgjë në fushë, zero parime loje. Stërviten të gjithë në të njëjtën mënyrë dhe për mua është e pafalshme që lojtarë të Torinos, në një turne të rëndësishëm si Kupa e Italisë, të hyjnë në fushë kështu. Disa ishin të justifikuar, si Ajeti, i cili nuk ka luajtur asnjëherë apo djemtë e rinj, por nga të tjerët prisja shumë më tepër”, ishin fjalët e Mihajloviç në konferencën për shtyp pas ndeshjes, të cilin ekipi i tij e fitoi me rezultatin 4-0 pas shtesave.
“Një herë mund të gabohet. Unë do të vazhdoj të flas për 22 titullarë, por sigurisht që nuk do të ketë më raste për të gabuar për ndonjë. Sot, shumë luajtën edhe xholin”, paralajmëroi trajneri.

30 tetori 2016 duhej të ishte dita e debutimit të Keidi Bares te Atletico Madrid. Mesfushori kuqezi u grumbullua nga trajneri Diego Simeone, në ndeshjen e Kupës së Mbretit, ku “colchoneros” fituan 6-0 në fushën e Guijuelo-s. Duhej të ishte një ndeshje e mirë për të testuar plotësisht potencialin e Bares dhe për ta shndërruar më pas 19-vjeçarin në një alternativë të rëndësishme për ekipin e parë.
Megjithatë, në suksesin tenistik në duelin e parë të raundit të katërt, me Atleticon që hipotekoi kualifikimin në 1/8-at, mesfushori nga Fieri mbeti jashtë ekipit, me stafin teknik që grumbulloi Olabe-n. Gazeta spanjolle “AS” zbuloi prapaskenat e lënies jashtë dhe debutimit të munguar të Keidi Bares. Shkak është bërë një karton i kuq, me të cilin lojtari ishte ndëshkuar në ndeshjen e fundit me Atletico B.
Klubi madrilen i dërgoi një shkresë zyrtare Federatës spanjolle për të sqaruar situatën e mesfushorit dhe faktin nëse ai mund të luante në Kupën e Mbretit. Në mënyrë të habitshme, Federata nuk dha asnjë përgjigje dhe mes dyshimit se aktivizimi i parregullt i shqiptarit mund ta penalizonte Atleticon, Keidi Bare u la jashtë skuadrës, për të pritur një tjetër shans nga trajneri Simeone, ndoshta në ndeshjen e kthimit ndaj Guijuelo-s, më datë 20 dhjetor.
Vendimi u mor për të evituar një tjetër situatë si ajo e sezonit të kaluar, kur Reali i Madridit u përjashtua nga turneu pas aktivizimit të mesfushorit Cheryshev në ndeshjen me Cadiz. Edhe në atë situatë, Federata spanjolle nuk i lajmëroi “Los Blancos” për pezullimin e futbollistit, një pakujdesi të cilën Reali e pagoi duke u larguar nga turneu edhe pse ishte një prej skuadrave pretendente.

Thomas Strakosha përgatitet për të luajtur ndeshjen më të rëndësishme të karrierës së tij. Të dielën në “Olimpico” luhet një nga derbit më të ndjerë dhe me më shumë rivalitet të futbollit botëror, Lazio-Roma. Përpara disa muajsh Strakosha as që do ta kishte imagjinuar se do ta përjetonte si protagonist këtë sfidë, por falë punës dhe përkushtimit të shfaqur në stërvitje dhe paraqitjeve fantastike në ndeshjet që ka luajtur me Lazion në këtë kampionat do të jetë talenti shqiptar ai që do të mbrojë portën e skuadrës bardhekaltër në derbin e kryeqytetit italian.
Federico Marchetti nuk ia ka dalë të rikuperohet në kohë dhe tashmë është e sigurtë prania e Strakoshës në formacionin titullar të Lazios për ndeshjen ndaj verdhekuqve të Luciano Spallettit. Simone Inzaghi beson shumë te 21-vjeçari shqiptar, i cili në 5 ndeshjet që është aktivizuar si titullar në këtë sezon të Serisë A me skuadrën kryeqytetase ka pësuar në total vetëm 3 gola, duke përcjellë sigurinë dhe klasin e tij mes shtyllave.
Nëse vazhdon me këto ritme Strakosha ka shanse të mira të jetë ai titullari i Lazios edhe në momentin që Marchetti do të rikthehet nga dëmtimi, por derisa të vijë ai çast derbi i Romës është një mundësi e shkëlqyer që ish-portieri i Salernitanës, të fitojë zemrat e tifozëve bardhekaltër dhe të blindojë vendin e tij në formacion. Strakosha së fundmi është grumbulluar rregullisht edhe nga trajneri Giani de Biasi në kombëtaren kuqezi dhe nëse vazhdon të paraqitet në këto nivele në mungesë të Etrit Berishës, 21-vjeçari ka shanse të mira të bëjë debutimin e tij me Shqipërinë pikërisht në sfidën ndaj Italisë që do të zhvillohet në mars në stadiumin “Renzo Barbera” të Palermos.