Derbi i parë pas shumë viteve për Mirel Josën, i cili po përjeton emocionet e aventurës së tij të tretë në stolin bardheblu. Skuadra e drejtuar prej tij është rikthyer në nivelet më të larta të klasifikimit pas 7 pikëve të marra në tre ndeshje dhe pret e qetë sfidën delikate të së Enjtes, pa presionin e faktit që Tirana nuk arrin të fitojë prej 10 ndeshjesh. Në konferencën e zakonshme për shtyp, Josa e vuri theksin te rëndësia e kësaj sfide, por preferoi të fkusohej te ajo që kërkon të bëjë skuadra e tij në fushën e lojës. Në këndvështrimin e Josës, Tirana dhe Partizani janë dy rivalë të drejtëpërdrejtë për titullin kampion dhe është e paevitueshme që rezultati pozitiv apo negativ të mos ndikojë në pjesën tjetër të sezonit për të dyja ekipet. Trajneri i bardhebluve nuk preferon të ciolësohet si njeriu që mund të rikthejë Tiranën në rrugën e fitores, madje këtë ai e bën të qartë duke vendosur pikat mbi “I”.
“Nuk erdha te Tirana me objektivin për të mundur thjesht Partizanin. Nëse fitojmë do të jetë një arritje e madhe. Kjo nuk është një përballje mes Josës dhe Starovës por një duel mes Tiranës dhe Partizanit. Më intereson të jemi kompaktë dhe teknikisht të mos humbasim. Duhet të tregojmë anët pozitive që kemi shfaqur deri në këto momente dhe të korrigjojmë ato që bëmë gabim në sfidën me Kukësin”, u shpreh Josa.
Atmosferë pozitive në kampin bardheblu që plotësohet edhe me lajmin se Ilion Lika do të zbresë në fushën e blertë për të mbrojtur katërkëndëshin. Një gjë të tillë e konfirmon vetë trajneri që nuk pranon të zbulojë emrin që do të zëvendësojë në mesfushë të pezulluarin Asion Daja. Në vijim, ai jep një mesazh të rëndësishëm edhe për të gjithë mbështetësit që do të jenë të pranishëm në stadium. “Jam i kënaqur me atmosferën që prodhon kjo ndeshje. Uroj të mos ketë incidente dhe gjithçka të shkojë mirë”, tha ai.
Derbi i fazës së parë prodhoi shumë emocione por jo gola. Në atë sfidë as Josa dhe as Starova nuk ishin në stolin e skuadrave, por për trajnerin e Tiranës, historia ndryshon në çdo 90 minutësh. ”Nuk është derbi mes meje e Starovës, por mes Tiranës e Partizanit. Duam fitore, por skuadra nuk duhet të humbë identitetin dhe lojën që ka shfaqur në ndeshjet e fundit”, tha Josa.
53-vjeçari shton se nuk mendon aspak për merkaton e Janarit, ndërsa ndalet të flasë edhe për skuadrën kundërshtare duke nënvizuar me diplomaci se Partizani ka një grup cilësor, por ai nuk preferoi të veçonte lojtarë të caktuar. “Partizani ka shumë lojtarë që më pëlqejnë, nuk bëj dot diferenca, por nuk i druhem asnjë lojtari. Vendos loja e skuadrave, jo individualitetet, edhe pse Partizani ka lojtarë cilësorë në çdo repart“, përfundoi Josa.

Rrëfim i gjatë e padyshim interesant i Gianni de Biasit për edicionin italian të Goal.com. Trajneri i Kombëtares Shqiptare ka bërë një përshkrim në lidhje me aventurën e tij në krye të stolit kuqezi. Fillimisht teksa nënvizon punën e vështirë në fillimin e saj teksa i duhej të rinovonte një grup ku disa lojtarë ishin drejt fundit të karrierës, De Biasi flet për arritjen historike me pjesëmarrjen në Europianin francez, duke prekur dhe një temë të debatuar jo pak pas asaj aventura në opinionin sportiv shqiptar në lidhje me ndarjen e meritave, ndërsa shprehet.
“Bëmë një punë të shkëlqyer dhe kur përdor numrin shumës, nënkuptoj, stafin teknik, lojtarët, por edhe Federatën. Besoj se rezultatet arrihen vetëm duke punuar të gjithë bashkë në një drejtim dhe kjo ndodhi në Shqipëri”, u shpreh De Biazi.
Dhenie e meritave pra për Federatën e më pas edhe një tjetër “përkëdhelje” për Skënderbeun dhe arritjen e tij në grupet e Europa League nga De Biasi që vijon. “Jo rastësisht, përtej Europianit, edhe një klub shqiptar u kualifikua në një kompeticion ndërkombëtar, si një konfirmim i rritjes së lëvizjes futbollistike. Natyrisht për dicka të tillë, jemi krenarë”, tha ai.
De Biasi nuk e fsheh pengun për eleminimin në Europian, ku Shqipëria i tha lamtumirë kompeticionit në fazën e grupeve ku kishte të njëjtën kuotë pikësh me Portugalinë që më pas u shpall kampione. Trajneri është i bindur se Shqipëria nuk meritonte të humbiste përballë Zvicrës e Francës, ndërkohë që shprehet edhe për disfatat e pësuara së fundmi në eleminatoret e Rusi 2018, kundër Spanjës dhe Izraelit.
“Humbja ndaj Spanjës mund të pranohet, edhe pse ndeshja u vendos nga një gabim i yni, por djeg më shumë ajo kundër Izraelit, edhe për mënyrën se si erdhi. Pas pak minutash na u përjashtua një lojtar, ndërsa në pjesën e dytë kjo ndodhi edhe me portierin tonë, duke na dhënë kundër edhe një penallti për mendimin tim të ekzagjeruar. Kurrë më shumë se në këtë rast nuk mund të flitet për një ndeshje të vendosur nga episodet. Në cdo rtast duhet të shohim përpara me besim, pasi përvec këtij aksidenti me Izraelin, ndeshjet që duhej të fitonim i kemi fituar”, tha De Biazi.
De Biazi ka folur edhe për duelin ndaj Italisë. “Të përballem me Italinë do të ketë një shije të veçantë për mua, por tashmë jam një person i shëtitur. Italia që po lind më pëlqen shumë: admiroj Venturën, një trajner i madh dhe e shoh si shumë intrigues projektin e tij. Ka shumë të rinj dhe me shumë perspektivë që po paraqiten mjaft mirë. Nuk them vetëm për Belotin, por edhe për Imobile, Insinje e shumë të tjerë.
E pashë ndeshjen kundër Gjermanisë dhe më bënë shumë përshtypje, pavarësisht faktit se gjermanët ishin me formacion eksperimental, pasi edhe Italia ishte e tillë dhe u paraqit shumë mirë gjithsesi. Mendoj se si italianë duhet të vlerësojmë dhe të mbështetim këtë rrugë të re, në vend që, si zakonisht, të gjykohet gjithçka në bazë të rezultateve”, përfundoi ai.

Liverpuli ka arritur në gjysmëfinalen e Kupës së Ligës duke mundur me rezultatin 2-0 Lidsin në “Anfilld” në një ndeshje ku u regjistrua një rekord i veçantë. Takimi filloi me një minutë heshtje për të nderuar viktimat e tragjedisë ajrore në Kolumbi, nddërsa më pas Liverpuli dominoi ndeshjen ndaj skuadrës së Championship, por vuajti shumë për të gjetur rrugën e rrjetës, pasi Klop kishte hedhur në fushën e lojës shumë lojtarë të skuadrës së dytë.
Goli i avantazhit erdhi me Origin në minutën e 76-të, ndërsa 5 minuta më vonë, ishte djaloshi Ben Udbërn që realizoi golin e rezultatin 2-0 për të kaluar ekipin e tij në fazën tjetër të turneut. Udbërn, i aktivizuar në minutën e 67 nga Klop, u bë rekordmeni i ri i kësaj skuadre. Në moshën 17 vjeç e 45 ditë, ai është zyrtarisht futbollisti më i ri që ka shënuar gol në ndeshje zyrtare me fanellën e këtij klubi legjendar.
Në gjysmëfinale kaloi edhe Hall Siti që mundi me penallti Njukasëllin e Rafel Benitez. Koha e rregullt përfundoi 0-0 ndërsa në shtesa, të dy skuadrat shënuan nga një herë, ndaj u desh gjuajtja nga pika e bardhë për të përcaktuar se kush kalonte në turin tjetër. Në fund buzëqeshi Hall Siti, pasi Njukasëlll gaboi 3 nga 4 tentativat e veta.

Ngjarjet tragjike kanë gjithnjë një anë pozitive, sepse bëjnë bashkë edhe rivalët më të mëdhenj. Brazili dhe Argjentina njihen për rivalitetin mjaft të ashpër mes tyre në futboll, por aksidenti fatal i skuadrës braziliane Çapekoense gjatë udhëtimit me avion për në Kolumbi, ka bërë që ky rivalitet të lihet mënjanë.
Federata Argjentinase e Futbollit i dërgoi një letër ngushëllimi Federatës Braziliane të Futbollit duke i bërë me dije gjithashtu gatishmërinë e plotë për të ndihmuar në rimëkëmbjen e klubit të goditur nga tragjedia. “Në emër të Federatës Argjentinase të Futbollit si dhe të gjithë klubeve pjesëtare të saj, përveçse duam t’ju shprehim keqardhjen tonë për këtë ngjarje të rëndë, duam t’ju bëjmë me dije se jemi në gatishmëri për të ndihmuar rimëkëmbjen e klubit të Çapekoenses duke vënë në dispozicion lojtarë të ndryshëm”, shkruhej në letrën e Federatës Argjentinase.

Flasin lojtarët që nuk udhëtuan
Një nga lojtarët, i cili nuk u grumbullua në ndeshjen që shënoi tragjedinë me skuadrën braziliane të futbollit ka folur për mediat pas tragjedisë. Alejandro Marinuccio, i cili ka luajtur edhe me Vijarealin në Spanjë tregon për mediat se një dëmtim e la larg ndeshjes në Kolumbi, ku edhe u rrëzua avioni me futbollistë.
“Kisha marrë një dëmtim dhe trajneri nuk më grumbulloi. Ndihem thellësisht i dëshpëruar. E vetmja gjë që më shkon në mendje tani, është që të lutem për shokët e skuadrës”, thotë ai.
Ishin 8 lojtarë të tjerë të ekipit që nuk u grumbulluan për sfidën në Kolumbi. Ata janë Nenem, Domerson, Marcelo Boek, Andrei, Hyoran, Nivaldo, Moises dhe Rafael Lima. Por më me fat mund të cilësohet, Matehus Saroli, i cili nuk arriti të fluturonte me skuadrën, pasi kishte harruar pasaportën.

Tifozë dhe familjarë kalojnë natën në stadium
Familjarë të futbollistëve të Çapekoenses dhe shumë tifozë të skuadrës po kalojnë momente shokuese që pas aksidentit ajror që skuadra braziliane e futbollit pësoi në Kolumbi, për ku ishte duke udhëtuar për të zhvilluar ndeshjen e parë të finales së Kupës së Amerikës së Jugut.
Që në momentet e para të përhapjes së lajmit, qindra tifozë u grumbulluan para stadiumit të skuadrës për të pritur informacione të reja. Ndërkohë në mbrëmje dyert e stadiumit u hapën dhe familjarë të shumtë të viktimave, si dhe tifozë të skuadrës, kaluan natën aty duke kryer homazhe në nderim të tyre.

I mbijetuari që kërkoi t’i ruanin unazën
Alan Rushel, i mbijetuari i aksidentit tragjik me avion mbi Kolumbi, kishte një arsye shumë të fortë pse në momentin kur u transportua në spital, i kërkoi atyre që t’i ruanin unazën që mbante në gisht. Sipas mediave lokale, futbollisti brazilian kishte qenë i ndërgjegjshëm gjatë gjithë kohës dhe kishte bërë këtë kërkesë të veçantë para se të futej në sallën e operacionit.
Mediat braziliane kanë zbuluar se arsyeja përse ai e bëri një gjë të tillë, ishte sepse sot duhej të ishte dita kur do të kishte shpallur datën e dasmës së tij, por e kishte shtyrë pikërisht për shkak të ndeshjes së skuadrës në Kolumbi.
Gjithçka u konfirmua nga e fejuara e futbollistit, atletja Marina Storçi, e kontaktuar nga mediat braziliane. “Alan është gjithçka për mua dhe sot ishte dita kur do të shpallnim dasmën tonë”, tha ajo.
Rushel i është nënshtruar operacioneve të njëpasnjëshme, por sipas mjekëve, pas këtij aksidenti kaq të rëndë, rrezikon të mbetet i paralizuar falë frakturave të shumta që ka pësuar në këmbë dhe në shtyllën kurrizore.

E bujshme. Angel di Maria dhe Mesut Ozil kërkojnë të rikthehen te Reali i Madridit. Dy mesfushorët me tipare sulmuese që luajnë respektivisht për Paris Saint Germain dhe Arsenalin e kanë shprehur hapur dëshirën e tyre për të qenë sërish pjesë e Los Blancos. Lajmi publikohet nga gazeta madrilene “Marca” që bën të ditur se si Di Maria ashtu edhe Ozil i janë ofruar Realit Madridit dhe janë të gatshëm të riveshin fanellën e bardhë. Turko-gjermani dhe argjentinasi ishin dy elementë shumë të rëndësishëm të Realit të Jose Mourinhos që në sezonin 2011-2012 fitoi La Ligan duke vendosur një rekord pikësh.
Ozil më 2013-tën pas largimit të “Special One” zgjodhi të transferohej te Arsenali, ndërkohë që Di Maria edhe pse ishte një nga lojtarët deçizivë të Realit të Ancelottit që fitoi Championsin më 2014-tën, pak muaj pas finales së Lisbonës u ble nga Manchester United për 75 milionë euro. Nga shitjet e këtyre dy futbollistëve Reali i Madridit arkëtoi rreth 120 milionë euro edhe pse nuk kishte shpenzuar më shumë se 45 milionë për t’i transferuar në Madrid me kërkesë të Jose Mourinhos në vitin 2010.
Të dy lojtarët nuk ndihen më të lumtur në klubet respektive. Ozil nuk ka ndërmend të rinovojë kontratën me Arsenalin që i skadon në verën e vitit 2018 dhe mesfushori i përfaqësueses gjermane pret një telefonatë nga drejtuesit e Realit për t’u rikthyer krahëhapur në Madrid ku ai do të ribashkohej me Sergio Ramos që është mik shumë i mirë i tij. Kapiteni po përdor të gjitha influencat e tij për të bërë të mundur rikthimin e Ozil në “Santiago Bernabeu”.
Rasti i Di Marias, shitjes më të shtrenjtë në historinë e Realit të Madridit është disi i ndryshëm, pasi argjentinasi luan prej vetëm një sezoni e pak te kampionët e Francës, por lojtari nuk ndihet më i lumtur në Paris dhe ua ka shprehur hapur drejtuesve të Realit dëshirën e tij për të firmosur sërish me Los Blancos. Mbetet për t’u parë se çfarë do të bëjë Florentino Perez me dy futbollistët, por e sigurtë është që Ozil dhe Di Maria dëshirojnë rikthimin në Madrid.

Ka nga ato raste kur ëndrrat bëhen realitet dhe me kinezët në drejtimin e Interit ëndrra e Massimo Morattit, por edhe e të gjithë tifozëve zikaltër mund të mos mbetet thjesht një ëndërr. Suning Group dëshiron të ndërtojë një Inter të madh, por për ta realizuar diçka të tillë, skuadra milaneze ka nevojë për futbollistë të mëdhenj. Mund të tingëllojë si diçka e pabesueshme, por është Lionel Mesi objektivi i madh i Interit në merkaton e verës së ardhshme.
Ylli argjentinas po mendon seriozisht largimin nga Barcelona dhe kinezët e Interit janë gati ta mbulojnë me ar 5 herë fituesin e Topit të Artë në mënyrë që ai të veshë fanellën zikaltër. Për të hapur një skenar të tillë ka menduar Marco Tronchetti Provera. Shefi ekzekutiv i Pirrellit, sponsorit që Interi mban në fanellë prej gati dy dekadash, në një intervistë për të përditshmen italiane “Corriero dello Sport” ka zbuluar se Zhang Jindong dëshiron të transferojë te 18 herë kampionët e Italisë Lionel Mesin.
Për Interin në këtë moment të shkëpusë Lionel Mesin nga Barcelona ngjason më shumë me një mision të pamundur, por ka raste kur edhe e pamundura bëhet realitet aq më tepër në futboll. Mesit i skadon kontrata aktuale me Barcelonën në verën e vitit 2018, por argjentinasi për momentin nuk ka ndërmend të rinovojë me Barçën dhe skenarët mund të ndryshojnë. 29-vjeçarin e dëshiron me çdo kusht edhe Pep Guardiola te Manchester City, por Interi me paratë që vijnë nga Kina do ta bëjë një tentativë. Mesi shpeshherë ka deklaruar se nëse largohet një ditë nga Barcelona do ta bëjë vetëm për të luajtur me skuadrën e vendlindjes së tij Newells Old Boys.
Por në verë ai do të jetë vetëm 30 vjeç dhe kampionati argjentinas mund të presë edhe për disa vite me Mesin që mund të provojë një eksperiencë të re në Serinë A italiane, ndoshta për të ndjekur gjurmët e Diego Armando Maradonës. “Ëndrra është gjithmonë e njëjta, të shoh Lionel Mesin të mbajë veshur fanellën e Interit”, deklaroi Tronchetti Provera për “Corriere dello Sport”. Tashmë topi kalon te Zhang Jindong që për të rikthyer Interin në majat e futbollit italian dhe atij europian duhet të tentojë blerjen e 5 herë fituesit të Topit të Artë.
Mesi ka kontratë me ekipin nga “Camp Nou” deri në vitin 2018, por deri më tani ende nuk ka nisur negociatat për vazhdimin e saj. Kjo situatë ka bërë që klube të mëdha evropiane, si Manchester City dhe Paris Saint Germain, të vihen pas argjentinasit.
Drejtuesit e skuadrës së Interit po synojnë ta përforcojnë ekipin gjatë afatit kalimtar të janarit. Sipas “Calciomercato”, Nerazzurrët nuk po heqin dorë nga mesfushori i Chelseas, Oscar, edhe pse Antonio Conte ka deklaruar se braziliani do të largohet nga ekipi. Thuhet se ekipi nga “San Siro” shpreson që me një ofertë të majme ta transferojnë lojtarin brazilian.

Mbrojtësi i kombëtares shqiptare dhe Këlnit, Mërgim Mavraj, në një prononcim për “express.de”, ka folur në lidhje me rinovimin e kontratës së tij me klubin gjerman, ku gjatë këtij sezoni është shndërruar në një titullar të padiskutueshëm.
“Rinovimi im është në duart e njerëzve të duhur dhe po vazhdojnë bisedimet. Te Këlni ndihem shkëlqyeshëm dhe situata është fantastike. Nuk ka asnjë arsye pse të mos gjejmë gjuhën e përbashkët me klubin”, u shpreh futbollisti shqiptar.
Mavrajt i skadon kontrata në verën e 2017-s, por sipas deklaratave që futbollisti ka bërë shpesh, rinovimi i tij është thjesht çështje kohe, sidomos tani që Këlni po kalon një periudhë shumë të mirë me rezultate dhe mbrojtësi shqiptar është një ndër pikat kyçe të formacionit.

Arlind Ajeti ishte ai që fitoi derbin e shqiptarëve në raundin e 1/16-ave të Kupës së Italisë, pasi në kohën shtesë Torino e tij realizoi 4 gola duke eliminuar Pisën. Paraqitja e mbrojtësit shqiptar në debutimin e tij në një ndeshje zyrtare me skuadrën “Granata” u vlerësua me notën 6 nga mediat italiane, me Ajetin që përveç se shfaqi shumë siguri në prapavijën e Torinos iu afrua në dy raste golit. Në krahun tjetër Edgar Cani dhe Samir Ujkani ishin dy lojtarët më të mirë në fushë për Pisën teksa u vlerësuan me notën 6,5 për performancën e tyre.
Portieri i përfaqësueses së Kosovës me pritjet e tij arriti ta çonte ndeshjen në shtesë, ndërkohë që nuk pati faj në asnjë nga 4 golat e realizuar nga Torino. Ndërkohë me shiritin e kapitenit në krah, Cani u shfaq si një gladiator në fushën e lojës duke vendosur në vështirësi në jo pak raste mbrojtjen e Torinos. Në fund të sfidës sulmuesi i kombëtares kuqezi theksoi se Pisa e Gennaro Gatusos bëri një ndeshje të mirë ndaj Torinos së Sinisa Mihajloviç. “Kemi vendosur në vështirësi për një pjesë të madhe të kohës Torinon, që është një nga skuadrat më të mira të Serisë A, rezultati në fund të takimit ishte i gënjeshtërt”, deklaroi për mediat Edgar Cani.
Sfida mes Torinos dhe Pisës, që ishte edhe një derbi shqiptarësh, përfundoi me rezultatin 4-0, me të gjithë golat që u shënuan pas përfundimit të kohës së rregullt. Kjo përballje shënonte debutimin e Ajetit në ndeshjet zyrtare me skuadrën “Granata”, që duhet pranuar vuajti jo pak për ta eliminuar Pisën, në radhët e së cilës Edgar Cani mbante edhe shiritin e kapitenit. Madje në minutën e 60-të një ndërhyrje e gabuar e Ajetit ndaj Canit u ndëshkua me karton të verdhë nga gjyqtari.
Duhet theksuar se që nga minuta e 77 Pisa luajti me një lojtar më pak, pasi Lazzarri doli nga fusha i dëmtuar, ndërkohë që Gatuso i kishte kryer të tre ndërrimet. Në minutën e 3-të të 15-minutëshit të parë Adem Ljajiç shënoi golin e parë, që e çliroi psikologjikisht Torinon. Më pas për skuadrën e Mihajloviç realizuan me radhë Maxi Lopez, Boye dhe Belotti. Në fazën e 1/8-ave Torino do të përplaset me Milanin.

Te Atletico e Madridit vjen momenti i Keidi Bares. Mesfushori i kombëtares Shpresa të Shqipërisë është grumbulluar në skuadrën e parë nga trajneri Diego Pablo Simeone dhe me shumë gjasa Bare do të bëjë debutimin e tij me Los Colchoneros në sfidën e parë të raundit të 1/16 të Kupës së Mbretit. Atletico sfidon në transfertë skuadrën e kategorisë së tretë, Guijuelo dhe për këtë ndeshje “El Cholo” ka thirrur në total 16 futbollistë, përfshirë këtu edhe Keidi Baren.
Aktualisht 19-vjeçari shqiptar aktivizohet me skuadrën B të Atleticos që luan në Segunda Division B ose më saktë në kategorinë e tretë të futbollit spanjoll. Në këtë sezon Bare ka luajtur në total 9 ndeshje duke realizuar dhe 1 gol. Për sfidën ndaj Guijuelos, Simeone ka lënë pushim shumë futbollistë titullarë, por në listën e të grumbulluarve bëjnë pjesë emra të tillë si Saviç, Gimenez, Saul, Carrasco, Gaitan e Correa. Edhe nëse nuk e nis si titullar këtë ndeshje, Bare ka shanse të mira për t’u aktivizuar edhe nga stoli dhe për të bërë kështu debutimin e tij me Atleticon e Madridit në një ndeshje zyrtare.
Keidi Bare ka luajtur me të gjitha kombëtaret e moshave të Shqipërisë dhe aktualisht 19-vjeçari nga Fieri është një nga lojtarët më të rëndësishëm të përfaqësueses Shpresa. Në fund të vitit 2013 ai është bërë pjesë e të rinjve të Atleticos së Madridit. Pas gati 3 vjetësh për Keidi Baren vjen ora e debutimit me skuadrën e parë, një ëndërr që mund të bëhet realitet mbrëmjen e së mërkurës.