Toni Kroos mund ta mbyllë karrierën te Reali i Madridit. Mesfushori gjerman, i cili pak javë më parë rinovoi zyrtarisht kontratën e tij me Los Blancos deri në vitin 2022, në një prononcim për mediat gjermane la të kuptohet se, kur të jetë 32 vjeç do t’i japë fund futbollit të luajtur. “Nuk jam nga ata lojtarë që mund të jem pjesë e futbollit deri në moshën 38 apo 39-vjeçare”, nënvizoi 26-vjeçari. Kjo deklaratë e Kroos mund të ngjasojë disi e çuditshme, por 32 vjeç, mesfushori i kombëtares së pançerave do ti mbushë në vitin 2022, periudhë e cila përkon edhe me fundin e kontratës së re që ai ka firmosur me Los Blancos.
Aktualisht, Kroos është i dëmtuar dhe mungesa e tij është një minus i madh për Realin e Madridit, që gjithsesi ka arritur t’i fitojë të gjitha takimet e fundit. Ai është një nga lojtarët më të rëndësishëm që ka në dispozicion klubi merengues dhe jo më kot nga kontrata e re me Realin, Kroos do të përfitojë më shumë se 20 milionë euro në sezon. Në intervistën e tij, mesfushori gjerman theksoi se, fiziku i një futbollisti mund të lejojë të luash në nivelet më të larta deri në moshën 32-vjeçare dhe viti 2022 ndoshta është ai i duhuri që Kroos t’i japë fund karrierës. Megjithatë, Kroos u tregua gjithashtu realist, duke shtuar se nuk di se çfarë mund të ndodhë pas 6 vitesh.
Ndërkohë, Bastian Schweinsteiger pritet të rikthehet në Brazil, aty ku ngriti edhe trofeun e Kupës së Botës jo për të luajtur me Gjermaninë, por me ekipin e Santosit. Trajneri i këtyre të fundit, Dorival Junior, konfirmoi interesimin për mesfushorin gjerman, i cili ka përfunduar jashtë skuadre te Man. United. Ai shtoi se do të ishte një goditje e mirë për Santosin ardhja e Schweinsteiger teksa ky operacion mund t’i ngjajë atij të Botafogos që afroi Clarence Seedorf pas largimit nga Milani.

Shkëlzen Gashi nuk ja doli të fitonte dot titullin e Konferencës së Perëndimit në MLS, me Koloradon që u mposht 0-1 në shtëpi nga Seattle në sfidën e kthimit, duke u mundur 3-1 në total. Në Dick Sporting Good Park, Colorado e dominoi lojën, por pa arritur të gjente dot golin që do t’i jepte përmbysjen e sfidës së parë të humbur 2-1. Pas vetëm pesë minutash, Jones pati mundësinë për Coloradon për të kaluar në epërsi vendasit pas një harkimi të Gashit në zonë, por gaboi, ndërsa rasti më i mirë për Rapids u paraqit në minutën e 23-të, kur sërish vendasit nuk arritën të shfrytëzonin një aksion kundërsulmi. Një tjetër harkim i Gashit në minutën e 25-të për pak sa nuk u shndërrua në gol nga Jones në të 25-ën, ndërsa në të 56-ën ishte Morris që i dha epërsinë ekipit mik me golin e 0-1. Ky gol ishte mëse i mjaftueshëm për ekipin e Seattle, deri në fund që fituan jo vetëm titullin e Konferencës, por dhe mundësinë për të luajtur në finalen e MLS ndaj Torontos ose Montrealit më datë 10 dhjetor.

Normalizohet situata e Rey Manajt te Pescara. Sulmuesi shqiptar, pas pezullimit për sfidën me Romën për arsye disiplinore, ka nisur normalisht stërvitjen me skuadrën e parë nën urdhrat e trajnerit Massimo Oddo. Konfirmimi vjen nga kapiteni i Pescarës Ledian Memushajn, i cili sqaron nëpërmjet telefonit se gjithçka ka ndodhur i përket së shkuarës dhe se 19-vjeçari po përgatitet për ndeshjen e radhës.
“Situata është normalizuar që sot dhe gjithçka është si më parë. Manaj është i ri ka gabuar mund të gabojë sërish. Edhe unë kur kam qenë në moshën e tij kam patur raste që kam gabuar. Trajneri Massimo Oddo nuk i mban mëri, kështu që pezullimi ka qenë vetëm për ndeshjen me Romën. Unë e kam si një vëlla të vogël dhe gjithmonë i jap këshilla”, u shpreh Memushaj.
Ndaj verdhekuqve 29-vjeçari shënoi golin e parë në Serinë A, finalizim që fatkeqësisht nuk ishte mjaftueshëm për t’i dhënë pikë Pescarës. Memushaj ndihet i keqardhur që goli i tij nuk mori vlerën që meritonte.
“Ishte goli i parë në Serinë A dhe sigurisht që jam i gëzuar, por më vjen keq që goli im nuk u shoqërua me rezultatet pozitiv. E kisha humbur më parë një 11-metërsh ndaj Lazios pikërisht në portën ku i shënova Romës”, tha ai.
Pescara e nisi mirë sezonin, por humbjet radhazi e kanë komplikuar seriozisht situatën e saj në zonën e ftohtë të renditjes. Gjithsesi futbollisti i kombëtares shqiptare beson se ekipi i tij do të arrijë të mbijetojë.
“E kam të vështirë ta shpjegoj se çfarë po ndodh. Ndoshta edhe mungesat që kemi patur për arsye dëmtimi mund të kenë ndikuar. Megjithatë edhe skuadrat e tjera që renditen më lart se ne nuk janë të distancuara, kështu që kemi mundësi dhe besoj se do të arrijmë të qëndrojmë në Serinë A”, tha Memushaj.
Vendimin e Federatës Italiane të Futbollit për zhvillimin e ndeshjes së marsit mes Italisë dhe Shqipërisë në Palermo të Siçilisë, Memushaj e mendon të qëllimshëm, që të ketë sa më pak shqiptarë në stadium. “Po ta mendosh, ai stadium është i vetmi ku shqiptarët e kanë më të vështirë të jenë të pranishëm. Megjithatë, unë mendoj se mbështetja e tifozëve tanë nuk do të mungojë as në Palermo”, përfundoi Memushaj.

Vetëm një mbiemër i madh mund t’i bëjë ballë Juventusit dhe kur emri që mban mbi shpinë është Simeone ke atë të duhurin. Giovanni Simeone, djali i El Cholos, ishte protagonisti i Genoas në fitoren 3-1 me Juventusin duke shënuar një dygolësh në “Marassi” kundër kampionëve në fuqi, që pësuan humbje e 3-të sezonale, këtë herë, atë më të thellën. Ekipi i Allegrit në ndryshim nga humbjet e mëparshme me Interin dhe Milanin nuk arriti të kishte asnjë lloj impakti në ndeshje, pasi Giovanni Simeone shënoi dy herë në minutat 3 dhe 13-të, për një epërsi të dyfishtë të ekipit të tij. Goli i 3-të ishte një dhuratë e vetë Juventusit me Alex Sandro, që gabimisht dërgoi topin në rrjetën e tij. Shifrat bardhezinjtë i shkurtuan vetëm në fund me një goditje dënimi shumë të bukur të Pjanicit.
Një humbje që për momentin nuk ndikon në klasikimin e bardhezinjve ndërsa ngjiti jo pak në renditje Genoan. Atalanta është skuadra e momentit. Ekipi ku luan Etrit Berisha, i cili këtë herë mungoi për shkak dëmtimi regjistroi fitoren e 6-të radhazi pasi mposhti në transfertë dhe Bolognën 2-0 falë golave të shënuar nga Masiello në pjesën e parë dhe Kurtic në të dytën. Një sukses që e mban Atalantën në zonën europiane. Cagliari mori një fitore qetësie ndaj Udineses në Sardenjë me golat e Farias dhe Saut teksa mundi 2-1 Udinesen, që nuk mundi të ruajë dot barazimin provizor të Fofanas.
Tomas Strakosha regjistron ndeshjen e pestë në Serie A dhe njëkohësisht suksesin e katërt sezonal për të me skuadrën e Lazios. Portieri i kombëtares shqiptare u rreshtua titullar për të dytën herë rresht pasi Marchetti nuk ia doli të rikuperohej për transfertën e Palermos, ku Lazio fitoi me rezultatin 1-0. 22-vjeçari shqiptar zhvilloi një ndeshje pozitive në “Renzo Barbera”, stadiumin që më 24 mars do ta vizitojë si portier i Shqipërisë për eliminatoren ndaj Italisë. Në minutën e 31, Milinkovic Savic kaloi kryeqytetasit në avantazh, ndërsa gjatë 45 minutave të para, gardiani kuqezi u detyrua të kryente vetëm një ndërhyrje kur në minutën e 34, Nestorovski rrezikoi portën bardhekaltër.
Në fraksionin e dytë, Lazio u tregua më e kujdesshme duke kontrolluar ndeshjen dhe duke ulur presionin, kjo e detyroi portierin shqiptar të aktivizohej shpeshherë në pasimet e shpeshta të bardhekaltërve për të qetësuar lojën. Ai u shfaq i sigurt dhe nuk e vuri për asnjë moment në rrezik suksesin e ekipit të Simone Inzaghit. Me këtë sukses, Lazio qëndron në zonën europiane me 28 pikë dhe shkon e qetë drejt derbit të Romës javën e ardhshme. Për Strakoshën, kjo ishte ndeshja e dytë brenda pak ditësh pas rikthimit në fushë kundër Genoas.

Manchester United nuk di më të fitojë në “Old Trafford”. “Djajtë e Kuq” regjistruan barazimin e 4-t radhazi në shtëpi në Premier League pasi nuk shkuan më shumë se rezultati 1-1 në sfidën përballë West Ham United. Mungesa e qetësisë përpara portës e lojtarëve vendas, por edhe ndërhyrjet fantastike të portierit irlandez Darren Randolph ishin dy faktorët kryesorë që i mohuan fitoren skuadrës së Jose Mourinhos. “Special One” e ndoqi nga tribuna pjesën më të madhe të kësaj sfide pasi u përjashtua nga fusha nga gjyqtari Moss në minutën e 27-të për faktin se goditi një shishe, i nervozuar nga një karton i verdhë i dhënë nga arbitri për Paul Pogba. I njëjti gjyqtar e kishte nxjerrë nga fusha Mourinhon në një ndeshje ndaj West Ham-it edhe kur ishte pjesë e Chelsea-it. Sfida e “Old Trafford” nisi në malore për Manchester-in. “Djajtë e Kuq” u ndëshkuan që në minutën e 2-t nga Sakho.
Sulmuesi nga Senegali shfrytëzoi një harkim të Dimitri Payet duke i shpëtuar mbulimit të Ibrahimoviç për avantazhin e West Hamit. Megjithatë shtatlarti suedez e shleu shumë shpejt gabimin në rastin e golit të parë të skuadrës së Slaven Bilic duke vendosur baraspeshën në minutën e 21-të.
Ibra i shërbyer nga Pogba goditi saktë me kokë duke realizuar golin e tij të 7-të në këtë sezon të Premier League. United bëri gjithçka për ta fituar këtë sfidë, por as hyrja në fushë e Rooney dhe Mkihtarayn në fraksionin e dytë nuk e ndihmoi Manchesterin të gjente golin e fitores, pasi Randolph me pritjet e tij të shkëlqyera, por edhe fati nuk ishin në krahun e “Djajve të Kuq”. Mesfushori armen madje goditi shtyllën në minutën e 77-të, me Lindgard që arriti ta shtynte topin drejt rrjetës, por ishte në pozicion jashtë loje në momentin e gjuajtjes së Mkhitaryan. Në fund United rrezikoi ta humbiste ndeshjen pasi West Hami iu afrua disa herë golit. Me këtë barazim skuadra e Jose Mourinhos vazhdon të mbetet në vendin e 6-t tashmë në kuotën e 20 pikëve.
Fjalët e Herrerës në përfundim të ndeshjes tregojnë me të vërtetë shumë. “Një tjetër ndeshje që përfundon si të tjerat. E kontrollojmë tërësisht takimin që nga vërshëllima e parë. Ata shënojnë një gol me fat dhe pas tij, ne kemi kontrollin dhe krijojmë raste. Portieri i tyre ishte më i miri edhe një herë tjetër. Kështu ndodhi ndaj Stokut, Bërnlejt dhe Arsenalit.
Nuk e dimë se çfarë duhet të bëjmë për të fituar një ndeshje”, tha i dorëzuar mesfushori spanjoll. “Kemi më shumë zotërim topi se kundërshtarët. Sinqerisht, nuk e di çfarë po ndodh. Unë kam pasur një seri të tillë rezultatesh, por kur nuk kemi luajtur mirë. Në futboll vlejnë golat dhe ne nuk po i bëjmë”, tha Herrera.

Debutimi i Arlind Ajetit me Torinon në një ndeshje zyrtare mund të vijë në raundin e 1/16-ave të Kupës së Italisë. Këtë të martë skuadra “Granata” sfidon në stadiumin “Olimpico”, Pisën, me trajnerin Sinisa Mihajloviç që në këtë takim pritet t’u japë mundësi aktivizimi lojtarëve që kanë luajtur më pak deri në këtë fazë të sezonit. Në këtë mënyrë mbrojtësi i kombëtares kuqezi mund të bëjë debutimin e tij me Torinon në një derbi shqiptarësh sepse në krahun  tjetër aktivizohen sulmuesi Edgar Cani dhe portieri i përfaqësueses së Kosovës, Samir Ujkani. Ajeti edhe pse shkëlqeu në miqësoret e verës me skuadrën “Granata” për shkak të një dëmtimi humbi fillimin e sezonit me Torinon. Prej më shumë se 1 muaji, 23-vjeçari shqiptar është riaftësuar plotësisht nga dëmtimi, por duke qenë se skuadra po ecën me një ritëm shumë të mirë Ajeti nuk ka arritur të luajë qoftë edhe 1 minutë të vetme në këtë sezon të Serisë A.
Në ndeshjen ndaj Pisës së Genaro Gattusos, ish-lojtari i Baselit ka shanse të mira të marrë vendin e Rossettinit në qendër të prapavijës së skuadrës “Granata”. Pavarësisht problemeve të shumta financiare, Pisa këtë fundjavë arriti të rikthehej te fitorja në Serinë B, pas 9 takimesh dhe 5 ndeshjeve që nuk gjente rrugën e rrjetës. Skuadra e Genaro Gattusës për meritë edhe të dyshes Cani-Ujkani mposhti 1-0 Trapanin në shtëpi, duke iu larguar fundit të klasifikimit. Sulmuesi i kombëtares kuqezi ishte njeriu asist në golin e fitores të realizuar nga Eusepi. Megjithatë në prag të ndeshjes ndaj Torinos, takim të cilin Ujkani dhe Cani pritet ta nisin si titullarë problemet janë të shumta për skuadrën zikaltër. Sipas asaj që raportojnë mediat italiane, Pisa nuk ka para për grumbullimin në qytetin verior, por ndeshja ndaj skuadrës “Granata” nuk është dyshim sepse skuadra e Genaro Gattusos do të zbresë rregullisht në fushë.

Migjen Basha është shndërruar në një prej elementëve më të rëndësishëm të Barit në Serinë B italiane. Mesfushori kuqezi, që mbetet një prej zërave më autoritarë brenda skuadrës, u shfaq i zhgënjyer pas disfatës 1-0 në fushën e Verona-s, përballje që u vendos nga Giampaolo Pazzini. Pas sfidës mesfushori shqiptar u shpreh i keqardhur për humbjen, duke thënë se “kushdo që e pa ndeshjen, është i bindur se nuk duhej të kishte përfunduar në këtë mënyrë”.
“Na vjen vërtet keq, por në disa raste futbolli është i padrejtë”, tha Migjen Basha. Sipas tij “Bari krijoi të paktën katër raste të pastra për gol në Verona dhe pas paraqitjes së bërë nuk duhej të ishte larguar nga fusha pa marrë asnjë pikë”. Me Colantuono-n në stol, 29-vjeçari duket i rilindur, ndërsa meritë të padiskutueshme ka trajneri, i cili i ka besuar mesfushorit ekspert çelësat e mesit të fushës.
“Me trajnerin po punojmë trefish më tepër, sepse më përpara na mungonte intensiteti në fushë”, deklaroi Basha, i cili theksoi se tashmë ka rigjetur formën më të mirë, pas problemeve në fillim të sezonit, prej lodhjes fizike dhe përgatitjes së pjesshme gjatë verës, që lidhej me pjesëmarrjen e kombëtares shqiptare në finalet e Kampionatit Europian.
Në fund, mesfushori i kërkoi skuadrës që të mos demoralizohet nga humbja me Veronën, por të shfaqet e bindur në potencialin që zotëron, duke nisur prej transfertës së radhës në fushën e Salernitanës, ku Bari do të kërkojë fitoren, për t’iu afruar zonës “play off” në garën për skuadrat që sezonin e ardhshëm do të ngjiten në elitën e futbollit italian.

Lodhja e Europianit ka nisur të lerë shenjë në radhët e futbollistëve shqiptarë, që militojnë në Serinë A italiane. Ngarkesa e madhe fizike dhe mungesa e një pushimi për të rikuperuar forcat, ka sjellë tri dëmtime të njëpasnjëshme të kuqezinjve. Elseid Hysaj vuan nga shqetësimi në muskujt aduktorë dhe u detyrua t’i lerë vendin në formacionin titullar te Napoli veteranit Maggio, për sfidën e kësaj të hëne ndaj Sassuolos. Pushim i detyruar dhe disa ditë për t’u rikuperuar për mbrojtësin kuqezi pas problemeve në muskujt e brendshëm të kofshës, ndërsa pritet edhe një diagnozë e saktë nga stafi mjekësor i “të kaltërve”, për të mësuar më tepër rreth periudhës së rikuperimit.
Prej një lëndimi muskulor vuan edhe Frederik Veseli. Mbrojtësi, i cili është kthyer në titullar absolut te Empoli u detyrua të largohej përpara kohe, në sfidën e së shtunës ndaj Milanit. Gjendja e 24-vjeçarit mbetet për t’u vlerësuar, ndërsa stafi teknik pritet të mos e rrezikojë në ndeshjen e Kupës së Italisë përballë Cesena-s, me shpresën se Veseli do të rikuperohet në kohë për duelin e të dielës së ardhshme ndaj Sassuolo-s.
Disi më shqetësuese gjendja e portierit Etrit Berisha, që prej disa ditësh është stërvitur i diferencuar te Atalanta, prej shqetësimeve në gjurin e djathtë. Gardiani kuqezi nuk ishte pjesë e skuadrës, në fitoren 2-0 në fushën e Bologna-s. Në suksesin e pestë radhazi në Serinë A, Berisha u detyrua t’i linte vendin e titullarit Sportiello-s, me portierin shqiptar që shpreson të rikuperohet në kohë, për duelin e radhës, në fushën e Juventusit kryesues. Për fat të mirë, dëmtimet e Hysajt, Veselit dhe Berishës nuk ndikojnë te kombëtarja shqiptare, me kuqezinjtë që do të rikthehen në aksion në ndeshjen kualifikueset të Botërorit, më 24 mars ndaj Italisë në stadiumin “Renzo Barbera” të Palermos.