Hakerat ukrainas kanë thyer një e-mail të dytë që lidhet me Vladislav Surkov, ndihmës i lartë i Presidentit rus, Vladimir Putin dhe kanë publikuar disa dokumente, që, sipas tyre, janë dëshmi të reja për ndërhyrjen e Kremlinit në çështjet e Kievit.
Korrespondencat i janë siguruar Radios Evropa e Lirë nga hakerat. Nëse janë autentike, ato tregojnë detaje për punën e zyrës së Surkovit në ngritjen e enklavave separatiste në lindje të Ukrainës, më 2014.
E-mail-et po ashtu tregojnë se si bashkëpunëtorët e Surkovit kanë bërë komplot për të destabilizuar rajonin Kharkiv të Ukrainës dhe kanë ndihmuar në krijimin e udhëheqjeve të grupeve separatiste në rajonet Donjeck dhe Luhansk të Ukrainës.
Publikimi i këtyre korrespondencave vjen një javë pas publikimit të serisë së parë të e-mail-eve që dyshohet se lidhen me Surkovin. Në këto e-mail-e është folur për planifikimin e aneksimit të Krimesë nga Moska.

Shtetet e Bashkuara po bisedojnë me Turqinë për marrjen eventuale të një roli në fushatën për rivënien nën kontroll të qytetit të Sirisë, Raqqa, nga grupi ekstremist Shteti Islamik, tha sekretari amerikan i Mbrojtjes, Ash Carter.
“Do të vazhdojmë që të bisedojmë me Turqinë për rolin e saj në një marrje eventuale të Raqqas, por ne po ecim tani me operacionin sipas planit tonë”, tha Carter në një konferencë me gazetarë më 2 nëntor.
“Synojmë të shkojmë atje së shpejti me forcën që është e aftë për ta bërë këtë dhe ta rrethojmë qytetin e Raqqas… Vënia përfundimtare nën kontroll e Raqqas, ne po vazhdojmë që të bisedojmë me Turqinë për këtë dhe rolin e mundshëm për Turqinë gjatë rrugës”, tha Carter.
Ai tha se luftëtarët kurdë të YPG-së do të jenë pjesë e forcës të angazhuar për rrethimin dhe izolimin e IS-it në bastionin e tij më të rëndësishëm në Siri.
Por forcat arabe pritet që të jenë ato që do ta marrin qytetin, thonë zyrtarë të SHBA-së, me qëllim të shmangies së konfliktit të mundshëm etnik. Një strategji e ngjashme është hartuar edhe në operacionin për rimarrjen e Mosulit iraken nga IS-i për të shmangur nxitjen e konflikteve etnike dhe sektariane.
Roli i kurdëve të YPG-së në betejë u bë pikë përplasjeje me Turqinë. SHBA-ja i konsideron kurdët si një aleat më të aftë të Sirisë dhe luftës kundër kundër IS-it, por Turqia i cilëson ata si organizatë terroriste për shkak të lidhjeve me militantët kurdë që luftojnë mbi tri dekada në një kryengritje në Turqi.
Shqetësimi i Turqisë është rritur kur kurdët sirianë, me një mbështetje të fortë të SHBA-së, kanë marrë nën kontroll nga militantët pjesën më të madhe të brezit kufitar të Sirisë me Turqinë.
Turqia thotë se operacioni për Raqqan duhet të kryhet nga forcat lokale dhe milicia kurde YPG nuk duhet të përfshihet.
Por zyrtarët e SHBA-së e kanë paralajmëruar privatisht Turqinë se duhet të qëndrojë anash dhe ta lërë operacionin e mbështetur nga koalicioni që të zhvillohet, njofton “The Washington Post”.
Komentet e Carter më 2 nëntor, sugjerojnë se SHBA-ja do të provojë që të përfshijë Turqinë në një betejë përfundimtare për marrjen e qytetit, pasi forcat kurde YPG të kenë ndihmuar për ta rrethuar dhe izoluar atë.

Varshava vazhdon kursin konfrontativ me BE-në në mosmarrëveshje për reformën e Gjykatës Kushtetuese. Në mes të dhjetorit, kreu i Gjykatës Kushtetuese zëvendësohet. Pas kësaj qeveria mund ta ketë më të lehtë.
Ata e quajnë “tradhtar” dhe “terrorist”, i dërgojnë atij letra kërcënimi dhe kërkojnë: “Rzeplinski në burg”. Për ithtarët e partisë në pushtet PiS, kryetari i Gjykatës Kushtetuese të Polonisë është armik i shtetit. Por ai nuk do t’u përulet nacionalistëve dhe nuk ka frikë nga kërcënimet. “Një gjyqtar që frikësohet, nuk është më gjyqtar”, tha ai në një intervistë me “Deutsche Wellen”. “Frika të bën të ndikueshëm dhe kush ka frikë nuk është gjë tjetër, veçse një zyrtar shteti që dëshiron t’i pëlqejë shefit të tij”. Një gjë të tillë Andrzej Rzeplinski nuk e do.
Ai renditet aktualisht i katërti në listën e besimit që gëzojnë personat publikë në Poloni. Dhe në punë shkon pavarësisht kërcënimeve ose me mjetet e transportit publik ose me biçikletë dhe i pashoqëruar nga truproja.

Gjykata Kushtetuese e përçarë
Për shumë polakë Rzeplinski është simbol i luftëtarëve të fundit në luftë për sundimin e ligjit në vend, gjë që sipas mendimit të tij është në rrezik prej kuptimit që ka qeveria në pushtet për demokracinë. PiS e konsideron mandatin e zgjedhësve si çek të bardhë dhe mendon se për shkak të shumicës së votave mund ta ushtrojë pushtetin si të dojë dhe pa kontroll.
Pushtetarët janë të zemëruar me Rzeplinski për shkak se ai në fillim të vitit 2016 e shpalli reformën e tyre të drejtësisë si antikushtetuese, sepse kufizonte pavarësinë e Gjykatës Kushtetuese.
Qeveria i injoroi vendimet dhe organet e drejtësisë janë që atëherë të paralizuara.
Kjo ka bërë që thuajse prej një viti rreth një milion qytetarë të dalin në rrugë për të protestuar për pavarësinë e Gjykatës Kushtetuese. Mbështetja për këtë gjykatë vjen nga Komisioni Evropian, i cili ka kërcënuar edhe me sanksione ndaj Polonisë.
Por diapazoni i veprimit i Brukselit nuk është shumë i madh. Në rast se Komisioni do të vendosë sanksione ndaj Polonisë duhet që pro tyre të votojnë të gjitha vendet anëtare. Në rast se ndonjë vend, si për shembull, në këtë rast Hungaria, do të vendosnin veton, Komisioni do të shfaqej si tigër pa dhëmbë.
Pikërisht me këtë spekulojnë edhe politikanët e PiS. “Grindja me BE-në do të shuhet shpejt, ngaqë Evropa ka sot probleme shumë më të rëndësishme, si për shembull, kriza e refugjatëve”, thotë eurodeputeti polak, Ryszard Czarnecki.

Lojë me kohën
Mandati i Rzeplinskit përfundon në mes të dhjetorit. Kryetari i ardhshëm i Gjykatës Kushtetuese do të jetë sipas të gjitha gjasave dikush nga radhët e dashamirësve të PiS. Por politikanët e PiS-së duan që ta prishin imazhin e Rzeplinskit dhe thonë se ai i bën të gjitha këto se do të bëhet politikan. Rzeplinski vetë thotë se ai do të kthehet në vendin si profesor në Universitetin e Varshavës.
Nga ana tjetër ndaj tij për momentin po heton në dy raste Prokuroria. Fjala është për dy vendime që ka marrë Rzeplinski dhe në rast se ato janë të drejta, Prokuroria polake ndoshta mund të kërkojë që ai të thirret në bankën e të akuzuarve. E më së voni në këtë moment Komisioni i BE-së duhet të tregojë se sa seriozisht e merr çështjen e demokracisë në Poloni.

Shkalla e lartë e papunësisë në Kosovë vlerësohet si një prej faktorëve që ndikon në rritjen e veprave kriminale dhe shfaqjen e dukurive të tjera negative.
Sipas sociologëve dhe psikologëve, shkalla e lartë e papunësisë ndikon sidomos tek të rinjtë që të përfshihen në dukuri negative.
Bazuar në të dhënat e fundit të Agjencisë së Statistikave të Kosovës, të cilat flasin për vitin 2015, niveli i papunësisë në Kosovë ka arritur në 32.9 për qind, ndërsa shkalla e punësimit 25.2 për qind.
Në raportet e përditshme të Policisë së Kosovës, të cilat iu dërgohen mediave, paraqiten raste të krimeve të rënda dhe shumë prej tyre u përkasin dukurive të vjedhjeve nëpër banesa, shtëpi private, institucioneve financiare, veturave e dyqaneve.
Sociologu Leotrim Sahiti, në një bisedë për Radion Evropa e Lirë, thekson se papunësia në aspektin social ka efekte të shumta negative, të cilat dëmtojnë rëndë shoqërinë në përgjithësi.
“Problemi më akut i kësaj shoqërie është papunësia, sidomos tek të rinjtë. Përveç efektit ekonomik që e ka në shoqërinë kosovare, sigurisht ka edhe ndikime të tjera. Në aspektin social, niveli i lartë i papunësisë mund të ndikojë deri tek revoltimi i rinisë. Ky nivel i lartë i papunësisë po ashtu ndikon shumë keq në rritjen e kriminalitetit dhe pastaj shfaqjen e dukurive negative, si dhe ikjes së të rinjve nga Kosova në vendet të tjera”, thotë Sahiti.
Papunësia është parë si shkaktari kryesor edhe i veprimeve të tjera, qoftë i përfshirjes së qytetarëve në veprime jo legale apo edhe i largimit të tyre nga vendi.
Gjatë nëntorit 2014-qershorit 2015 ishte shënuar një fluks i madh i largimit të qytetarëve të Kosovës për në vendet e Evropës Perëndimore. Arsyeja e largimit të këtyre banorëve nga Kosova ishte thënë të ishte papunësia dhe gjendja e rëndë ekonomike e tyre.
Fluksi i largimit të qytetarëve nga Kosova për në vendet e Bashkimit Evropian, shton sociologu Sahiti, mund të përsëritet edhe në të ardhmen, nëse autoritetet e Kosovës nuk do të arrijnë të krijojnë vende të reja të punës për të rinjtë.
Pasojat e nivelit të lartë të papunësisë, në anën tjetër, sipas profesorit të psikologjisë, Fitim Uka, janë të mëdha edhe në aspektin psikologjik.
“Mund të them me përgjegjësi të plotë që kjo shkallë e lartë e papunësisë, në veçanti tek të rinjtë – të cilët kanë përfunduar një nivel të studimeve dhe pamundësia e tyre për të gjetur punë – shkakton një varg të problemeve në aspektin psikologjik. E para ka të bëjë me mungesën e besimit dhe vetëvlerësimit”, thekson Uka për Radion Evropa e Lirë.
Mungesa e vendeve të punës, shton Uka, lidhet ngushtë me stresin që përjetojnë të rinjtë e papunë.
Ai thotë se përderisa ata përjetojnë stres, predispozitat janë të mëdha që ata të përjetojnë edhe gjendje të tilla emocionale negative, siç është depresioni.
“Konsideroj që gjithë mekanizmat institucionalë do të duhej të viheshin në funksion, në mënyrë që të krijojmë vende të reja të punës dhe të rinjtë të kenë mundësi që të shfrytëzojnë potencialin e tyre, në të kundërtën rrezikojmë që gjithë këta të rinj të shëndoshë të mos i kemi të tillë dhe të kemi shtim të numrit të problemeve të shëndetit mendor në mesin e tyre”, thekson Uka.
Ndërkohë, të rinjtë e anketuar nga Radio Evropa e Lirë shprehen të shqetësuar për perspektivën e tyre në Kosovë.
Arif Morina, një i ri nga Malisheva, shprehet i zhgënjyer nga puna e institucioneve të Kosovës. Sipas tij, të rinjtë në Kosovë po përballen me vështirësi të shumta në fusha të ndryshme, derisa autoritetet kompetente po heshtin.
“Mendoj që nuk ka ndonjë perspektivë për të rinjtë në Republikën e Kosovës. Ne vetëm e përfundojmë fakultetin. Fakulteti është bërë njëlloj për të gjithë, vetëm ta përfundojmë dhe asgjë tjetër”, thotë Arifi.
Ndryshe, bazuar në trendet e zhvillimit ekonomik në vend dhe parashikimet e Bankës Botërore, si dhe në vlerësimet e ekspertëve të fushës, shkalla e papunësisë pritet të mbetet e njëjtë edhe për dy vitet e ardhshme.

Një dëshmitar i mbrojtur, K1, një nga anëtarët e akuzuar si pjesë e rrjetit kriminal të Naser Kelmendit, dëshmoi kundër ish-shefit të tij të hënën, duke thënë se grupi trafikoi heroinë nga Turqia përmes Bullgarisë, Sllovenisë dhe Kroacisë në Bosnje, ku shitej në vende të ndryshme të Europës.
“Heroina merrte formën e biskotave dhe futej në qese të veçanta najloni e transportohej me kamionë”, tha dëshmitari K1 në Gjykatën e Prishtinës, duke shtuar se grupi përdorte serbatorët për të fshehur drogën.
Dëshmitari K1 tha se heroina më pas përzihej dhe paketohej në përmasa të ndryshme për vende të ndryshme, duke shtuar se jo çdo vend merrte sasi të njëjtë.
“Si shembull mund të them se cilësia më e keqe e heroinës shkonte në Zvicër dhe disa vende të tjera, ndërsa më e pastra shkonte në Angli”, tha K1.
K1 e përshkroi Kelmendin si bosin kryesor të rrjetit të krimit, ndërsa shtoi se kushëriri i tij dhe partneri i afërt, Rexhep Kelmendi “Xheko” ishte ai që merrej me organizimin e operacioneve. Rexhepi u vra në Pejë në tetor 2013.
“Xheko ishte me ne gjatë gjithë kohës, duke na dhënë informacion se ku do të shkonim”, shtoi K1.
Dëshmitari gjithashtu shpjegoi se grupi përdori ujë acid nga Gjermania për të larë heroinën, ndërsa substanca të tjera të importuara nga Holanda trazoheshin gjithashtu.
K1 shtoi se grupi operoi në Kosovë disa herë, kryesisht në Pejë dhe Mitrovicë, ku pronotonin dhoma hoteli për të përzierë dhe paketuar heroinën.
Kelmendi, gjyqi i të cilit filloi në janar 2015 akuzohet për vrasje të shkallës së rëndë, për krim të organizuar dhe shitje e prodhim të drogës, si dhe për menaxhim dhe mbikëqyrje të rrjetit të narkotikëve.
Duke kaluar nga Mbretëria e Bashkuar në Turqi, qendra e rrjetit të drogës mendohet të jetë Sarajeva në Bosnje, ku droga ripaketohej ose përgatitej për shitje në Europë.
Kelmendi pretendoi pafajësi për të gjitha akuzat dhe tha se ai “priste çastin kur gjykata të deklaronte pafajësinë e tij”.