Një nga kushtet më të forta të vendosura për hapjen e negociatave mes Shqipërisë dhe Bashkimit Europian do të jetë zhvillimi i zgjedhjeve në bazë të standardeve ndërkombëtare dhe pranimi i tyre nga të gjitha forcat politike. Dje nga Kryetari i Komisionit të Marrëdhënieve me BE të Bundestagut gjerman Gunther Krichbaum, njëherazi edhe kryetar i Grupit parlamentar CDU-CSU ka folur qartë dhe prerë në Tiranë. Ai ka hequr dorashkat dhe ka lexuar pesë kriteret e vendosura nga BE dhe dy kushte shtesë nga Gjermania.
Berlini ka vendosur të jetë i prerë me Tiranën zyrtare. “Zgjedhjet nuk duhet të manipulohen”, thotë Krichbaum. “Sa i përket zgjedhjeve duhet të bëhet më shumë punë për mosmanipulimin e zgjedhjeve. Zgjedhjet duhet të zhvillohen në përputhje me standardet evropiane, e theksoj me vullnetin dhe angazhimin e të gjitha palëve politike”, tha Krichbaum.
Mjaft i prerë ka qenë parlamentari gjerman në lidhje me moszbatimin e ligjit të dekriminalizimit, i cili është po ashtu një pengesë për hapjen e negociatave. Krichbaum ka folur qartë, duke thënë se të zgjedhur të inkriminuar vazhdojnë të jenë në krye të qeverisjes lokale, duke lënë të kuptohet se flet në këtë rast për Roshët dhe Bushët.
“Ligji për dekriminalizimin duhet të zbatohet në mënyrë të qëndrueshme dhe gjithëpërfshirëse. Ka ende persona të inkriminuar në funksione publike. Kjo është e papranueshme për ne si grup parlamentar dhe për mua personalisht. Këto janë pritshmëritë tona që ne kemi. Të gjitha këto reforma bëhen, sepse ju do të jeni qytetarë të Bashkimit Europian”, tha Krichbaum.
“Duam që qytetarët e Shqipërisë të përfitojnë nga avantazhet e statusit të të qenit anëtarë të BE. Duam që negociatat me Shqipërinë të çelen kur të jenë krijuar kushtet e nevojshme. Krijimi i shtetit të së drejtës ka rol thelbësor. Sot është ende e paqartë se kur do të hyjë në fuqi Reforma në Drejtësi, pasi Gjykata Kushtetuese e ka pezulluar.
Deri tani, ky kusht nuk është përmbushur. Deri tani nuk janë përmbushur numri 2 dhe numri 3 i prioriteteve kyçe. Rezultatet e deritanishme janë të pamjaftueshme. Për këto arsye do t’i rekomandoj qeverisë federale të mos miratojë hapjen e negociatave. Nuk ka kuptim që në Shqipëri të ketë ekspertë ndërkombëtarë rekomandimi, nëse nuk merren parasysh rekomandimet dhe standardet evropiane. Qytetarët shqiptarë presin procese të drejta ligjore”, tha Krichbaum.
Një pikë tjetër problematike për Gjermaninë është niveli i lartë i korrupsionit të përhapur në të gjitha fushat e qeverisjes. “Lufta ndaj korrupsionit në Shqipëri është ende në nivele të pamjaftueshme. Që nga progres-raporti i fundit nuk shënohen hapa përpara. Korrupsioni mbetet në Shqipëri i përhapur gjerësisht në shumë sektorë, përfshirë drejtësinë dhe policinë. Janë shtresat e varfëra që e vuajnë më shumë korrupsionin. Lufta ndaj korrupsionit është testi më i fuqishëm për të provuar shtetin e së drejtës”.
Një pikë mjaft e fortë e deklaratës së Krichbaum kanë qenë hapat pas që qeveria ka bërë me drogën, duke e kthyer vendin në një plantacion gjigant për drogën në Europë. “Lufta ndaj trafikut të drogës duhet të rritet ndjeshëm. Në luftën ndaj trafikut të drogës janë bërë hapa pas. Kjo duhet të shndërrohet në një detyrë parësore. Të gjitha këto prioritete kyçe duhet të përmbushen përpara se të jepet një votë pro. Ligji për kthimin e pronave është në përpunim e sipër, por duhet të bëhet më shumë transparencë në lidhje me këtë proces. Shqipëria ndodhet larg standardeve evropiane në këtë drejtim”, tha Krichbaum.
“Në raport-progresin e Komisionit Evropian propozon çeljen e negociatave të anëtarësimit, pasi të jenë shënuar arritje të besueshme dhe të prekshme në Reformën në Drejtësi. Dua të paraqes ato fusha, të cilat aktualisht në këndvështrimin tonë janë ende pengesë për hapjen e negociatave të anëtarësimit, sepse në këndvështrimin tonë nuk janë plotësuar kushtet themelore në pesë reformat kyçe”, tha Krichbaum.

Asnjë progres për drogën, korrupsionin e krimin

Kryetari i grupit më të madh parlamentar gjerman CDU-CSU tha dje se, Shqipëria nuk ka bërë asnjë hap përpara në luftën ndaj korrupsionit, drogës dhe krimit të organizuar dhe se vendimi për hapjen e negociatve do të shtyhet për në vitin 2018.
“Lufta ndaj korrupsionit dhe së treti në luftën kundër krimit të organizuar dhe trafikut të drogës, pothuajse nuk ka pasur asnjë progres. Në këtë mënyrë nuk janë përmbushur as këto prioritete kyçe, pra numri dy dhe numri tre. Me të drejtë, KE-ja në mënyrë të përsëritur ka tërhequr vëmendjen për Reformën Zgjedhore dhe për zbatimin e ligjit të dekriminalizimit, kushti katër dhe pesë. Në të dyja këto fusha, rezultatet janë të pamjaftueshme.
Në pikëpamjen e grupit parlamentar të jepet një rekomandim për çeljen e bisedimeve për anëtarësi. Për këtë arsye, grupi parlamentar i CDU-së dhe CSU-së do t’i rekomandojë qeverisë federale që të mos miratojë çeljen e negociatave derisa të përmbushen ato pika të formuluara në dokumentin e paraqitur në 7 pritshmëritë. Këto nuk janë pritshmëri të tepruara.
Nuk është vetëm një vend që shprehet kundër çeljes së negociatave, por është emërtimi dhe shprehja e qartë e asaj çka duhet të realizohet në mënyrë që kapitujt për negocim të negociohen në mënyrë sa më të shpejtë. Nëse këto pritshmëri do të përmbushen deri në raportin e ardhshëm të Komisionit Evropian në pranverën e vitit 2017, varet nga vullneti politik i të gjithë partive politike shqiptare”, tha Kricgbaum.
Deputeti gjerman tha se vendi do të pranohet në Bashkimin Europian vetëm kur të ketë një konsensus dhe bashkëpunim mes pozitës dhe opozitës.
“Nuk është e mundur që këto forca politike të bllokojnë ecjen e vendit drejt Bashkimit Evropian. Ne duam që vendi të anëtarësohet në BE, por kjo do të ndodhë vetëm atëherë, kur të gjithë forcat shoqërore, ku përfshihen edhe forcat politike të bashkohen për një qëllim të përbashkët. Kjo është një përgjegjësi ndaj kombit. Për këtë arsye, do të jetë e nevojshme të bëhen përpjekje më të mëdha për reformim. Në këtë drejtim, Grupi i parlamentar i CDU-CSU, do të marrë këtë vendim vetëm pasi të jetë publikuar progres-raporti i BE-së në vitin 2018.
Budestagu ka të drejtën të shprehet me qëndrimin e tij përpara se të çelen negociatat për një vend kandidat. Ndaj, pa vendimin e Bundestagut, kancelarja gjermane nuk mund të shprehet pro çeljes së negociatave të anëtarësimit me një vend kandidat. Bundestagu gjerman mban mbi supe një përgjegjësi të madhe”, tha Krichbaum.

Kontroll të plotë 800 gjyqtarëve dhe prokurorëve

Deputeti i Bundestagut gjerman, Gunther Krichbaum, theksoi se për çeljen e negociatave për anëtarësim duhet të ketë zbatim të plotë dhe me fakte të Reformës në Drejtësi.
Gjatë konferencës për shtyp në Tiranë, ku paraqiti edhe vendimin e Grupit të parlamentar të CDU-së së Merkelit kundër hapjes së negociatave për Shqipërinë, theksoi se duhen të kontrollohet imtësisht figura e 800 gjyqtarëve dhe prokurorëve dhe ndëshkimin e tyre ligjor. Ai thotë se ekspertë ndërkombëtar të monitorimit duhet ta ndjekin nga afër këtë proces dhe se pala shqiptare duhet të ndjekë rekomandimet e tyre.
Krichbaum: Së pari, në lidhje me reformën në administratën publike duhet të provohet në praktikë se sa i qëndrueshëm është zbatimi i ligjeve të miratuara.
Së dyti, Reforma në Drejtësi duhet të zbatohet në mënyrë të qëndrueshme dhe të plotë me qëllim që të forcohet në mënyrë tërësore niveli i profesionalizmit dhe integritetit në fushën e drejtësisë. Për të përmbushur këtë qëllim duhet të ketë hyrë në fuqi Reforma në Drejtësi dhe të jenë miratuar ligjet e nevojshme dhe të ketë filluar zbatimi i tyre. Ky proces duhet të jetë në përputhje me standardet evropiane.
Pjesë e domosdoshme është verifikimi i rreth 800 gjyqtarëve dhe prokurorëve i ashtuquajtur proces i Vettingut. Ky proces duhet të ndjekë parimet e dhëna nga Komisioni Evropian. Kjo do të thotë se nuk duhet të ketë afate parashkrimi apo procesimi. Duhet të krijohen rregullime ligjore për dëshmitarët kyç. Duhet verifikim i plotë të pasurisë. Të mos ketë asnjë kufizim të rolit të ekspertëve ndërkombëtarë të monitorimit. Këshillat e ekspertëve ndërkombëtarë të monitorimit duhet të ndiqen dhe të zbatohen në praktikë.
Një kusht për çeljen e bisedimeve të anëtarësimit, përbën verifikimi shterues i të gjithë gjyqtarëve dhe prokurorëve të gjykatave të larta dhe të gjykatave të Apelit dhe pas verifikimit të merren masa ligjore dhe individuale.
Për forcimin e shtetit të së drejtës në Shqipëri, Reforma në Drejtësi ka një rol vendimtar, veçanërisht në luftën ndaj korrupsionit dhe krimit të organizuar. Për realizimin e tyre, Reforma në Drejtësi duhet të hyjë në fuqi me të gjithë pjesët përbërëse. Tani për tani, me vendimin e 25 tetorit të Gjykatës Kushtetuese ky proces është shtyrë. Ne po presim që së shpejti të ketë sqarim të kësaj çështjeje.
Nga pikëpamja e grupit parlamentar të CDU-së dhe SCU-së duhen arritur rezultate konkrete, të cilat dëshmojnë dhe vërtetojnë se Reforma në Drejtësi po zbatohet në përputhje me kërkesat e Bashkimit Evropian, në mënyrë që të jemi të sigurt se zbatimi i mëtejshëm do të përfundojë me sukses. Kjo edhe për informacionin tuaj është trajtuar edhe në vende të tjera në të njëjtën mënyrë. Kjo nuk do të thotë se në Shqipëri kemi një procedurë të posaçme.
Për shembull në Serbi, shteti i së drejtës ka rëndësi themelore. Në fund të fundit, bëhet fjalë për besimin e qytetarëve në shtetin e tyre. Për këtë, dua të përmend këtu ngritjen pa vonesa të institucioneve përgjegjëse për zbatimin e Reformës në Drejtësi dhe pajisjen e tyre me burimet e nevojshme. Po kështu duhet të aplikohen aspekte të rëndësishme si urdhra gjyqësor të pagesës dhe mbështetja financiare për shpenzimet gjyqësore.

Arben SHAHINI

Kryetari i Komisionit për Çështjet Europiane në Bundestagun gjerman, Gunther Krichbaum deklaroi dje se Bundestagu do të votojë kundër hapjes së negociatave për anëtarësim të plotë të Bashkimit Europian me Shqipërinë, sepse ajo nuk i ka plotësuar kriteret paraprake, që kanë të bëjnë me forcimin e shtetit ligjor, duke nisur nga reforma në drejtësi. Gunther Krichbaum ka bërë të ditur në një konferencë shtypi se, Shqipëria duhet të zbatojë 7 kushte përveç 5 prioriteteve për hapjen e negociatave për anëtarësim në Bashkimin Europian.
Kryetari i Grupit parlamentar i CDU/CSU, Krichbaum, tha gjatë një takimi me shtypin se Gjermania do të mbështesë të gjitha forcat politike në raport progresin që KE propozon për çelje negociatash pasi të jenë shënuar arritje të konsiderueshme për reformën në drejtësi.
“Vërtet është miratuar reforma në drejtësinë shqiptare, por me vendim të Gjykatës Kushtetuese disa akte janë pezulluar”.
Sipas tij, vetë gjykata ka kërkuar të merret një opinion nga Komisioni i Venecias dhe sot është ende e paqartë, se kur do të hyjë reforma në fuqi, pra, kjo detyrë kryesore nuk është përmbushur.
Ai tha po ashtu se nuk është përmbushur ende në praktikë pika 2 mbi reformën në administratën publike. Nuk është plotësuar sipas tij, as pika 3 që lidhet me luftën ndaj korrupsionit, ku duhej të ishte arritur më shumë, sepse mungojnë ngritje të padive penale konkrete dhe vendime penale të formës së prerë.
Goditja e krimit të organizuar dhe trafiku i drogës, si pikë e katërt, duhet të forcohen më tej, tha ai, madje, në luftën kundër trafikut të drogës janë bërë hapa pas.
“Lufta ndaj korrupsionit, krimit të organizuar dhe trafikut të drogës do të pengonte kalimin e krimit drejt politikës dhe drejtësisë”, pohoi ai. Së pesti, ligji për pronat është larg standardeve europiane, është në përpunim e sipër dhe nevojitet më shumë transparencë mbi këtë proces. Zoti Krichbaum tha se zgjedhjet e 2017 duhet të bëhen sipas rekomandimeve të OSBE/ODIHR dhe në përputhje me kodin e ri zgjedhor. Edhe kjo është tjetër pikë ende e papërmbushur, sipas tij.
Po ashtu, ligji për dekriminalizimin duhet të zbatohet në mënyrë të qëndrueshme, shtoi ai, sepse ishte një marrëveshje e rëndësishme mes palëve, për të mbajtur të inkriminuarit larg Parlamentit.
“Negociatat me Shqipërinë do të hapen vetëm kur të plotësohen parakushtet, theksoi zoti Krichbaum, duke shtuar se ende nuk po shihet bashkëpunim mes forcave politike për të zbatuar reformat”. Zoti Krichbaum është kryetar i Komisionit parlamentar për Çështjet e BE-së pranë Bundestag-ut gjerman.
Ky komision është përgjegjës për çështjet themelore të integrimit evropian, temat institucionale dhe çështjet e zgjerimit, si dhe zotëron kompetenca të veçanta për këto. Sipas tij, çelja e negociatave për anëtarësimin e plotë të Shqipërisë në BE mund të kalojë për në vitin 2018.
Ai shtoi se grupi i tyre parlamentar, që është më i madhi në Bundestagun gjerman, nëse nuk jep OK për hapjen e negociatave, Kancelarja Angela Merkel nuk mund të mbështesë çeljen e tyre. Kryetari i Komisionit për Çështjet Europiane në Bundestag u shpreh gjithashtu se dekriminalizimi dhe reforma zgjedhore kanë marrë notë jokaluese, pra nuk janë realizuar si kushte.

Shtatë kushtet e Gjermanisë

1- Në lidhje me reformën në administratën publike duhet të provohet në praktikë sa i qëndrueshëm është zbatimi i ligjeve të miratuara.
2- Reforma në Drejtësi duhet të zbatohet në mënyrë të qëndrueshme dhe të plotë me qëllim forcimin tërësor të nivelit të profesionalizmit dhe të integritetit në fushën e drejtësisë.
3- Në luftën ndaj korrupsionit nëpërmjet Strukturës së Posaçme kundër Korrupsionit dhe Krimit të Organizuar (SPAK), e cila duhet të jetë e pavaruar  nga kontrolli dhe ndikimi i politikës, duhet të jenë shënuar arritje të konsiderueshme.
4- Duhet të shënohen arritje ndaj krimit të organizuar.
5- Në lidhje me prioritetin kyç në fushën e të drejtave të njeriut, masave kundër diskriminimit dhe realizimit të së drejtës së pronës.
6- Rekomandimet e OSBE-së dhe të ODIHR-it në lidhje me reformën zgjedhore duhet të zbatohet deri në zgjedhjet e qershorit 2017.
7- Ligji për dekriminalizimin e Parlamentit, të institucioneve qendrore e vendore dhe të administratës publike duhet të zbatohet në mënyrë të qëndrueshme e të plotë.
Këto 7 kushte, CDU-CSU pret që të reflektohen pozitivisht në raport progresin e pranverës së vitit 2018, për të dhënë më pas dakordësinë për negociatat.

Roshët e Bushët shkak i bllokimit

Përfaqësuesi i partisë së Angela Merkel në Komisionin e Jashtëm të Parlamentin gjerman, Krichbaum, nuk e ka kursyer shumicën socialiste për kriminelët e Parlamentit.
Ai e ka quajtur të çuditshme se si njerëz të dënuar në Shqipëri apo në vende perëndimore vazhdojnë të jenë deputetë. Ai ka kërkuar zbatim të qëndrueshëm dhe të plotë të ligjit të dekriminalizimit.
“Në pushtetin lokal dhe qendror nuk mund të ketë njerëz që ndiqen me urdhra kombëtarë dhe ndërkombëtarë”, ka thënë ai. Ne nuk mund t’i përmendim “kriminelët” me emra ka thënë ai, por ato i dinë të gjitha institucionet.
“Ligi për dekriminalizimin duhet të zbatohet në mënyrë të qëndrueshme dhe gjithpërfshirëse. Ka ende persona të inkriminuar në funksione publike. Kjo është e papranueshme për ne si grup parlamentar dhe për mua personalisht.
Emrat janë të njohur, por nuk mund t’i përmendim ata me emër. Janë organizatat evropiane që kanë informacion. Se çfarë do të bëhet, kjo është një detyrë”, u shpreh Krichbaum.

Policia ushtroi dhunë dje ndaj protestuesve paqësorë para Parlamentit. Protesta nisi që mesnatën e së mërkurës, ku dhjetëra aktivistë e kaluan natën jashtë para Parlamentit, por në orët e para të mëngjesit dhjetëra forca policie, “Shqiponja” dhe ata të Komisariatit Nr.1 kanë shkuar pranë Parlamentit dhe kanë tentuar që të shpërndajnë protestën dhe të heqin çadrat. Policia ka shfrytëzuar orët e mëngjesit, kur njerëzit janë në gjumë dhe media është e vakët në atë orë, por menjëherë janë bërë denoncimet në rrjetet sociale. Gjatë dhunës së ushtruar, policia ka arrestuar edhe dy protestues, një nga Kukësi e një nga Lushnja.
Përfaqësuesit e AKIP bënë të ditur se policia dhunoi protestuesit Mirel Elezi nga Kukësi dhe Oltjon Zaka nga Lushnja. I riu nga Kukësi ka treguar arsyet që sipas tij çuan në shoqërimin në polici, ndërsa tha se një nga oficerët e policisë i ka shkaktuar traumë në dorë shokut të tij.
“Rreth orës 7:00 të mëngjesit u paraqitën forca të shumta policie për të zhvendosur paletat e shtruara në tokë, që ne i kishim vënë gjatë natës për të mos u ulur në trotuar. Policia kërkoi t’i zhvendosnim, ne kërkuam që të paktën edhe 1 orë të qëndronin paletat aty, sepse nuk bllokonin rrugën. Një nga oficerët e policisë ka tërhequr me forcë një nga bashkëprotestuesit.
Gjatë kësaj ndërhyrjeje, ai ka pësuar edhe një traumë në dorën e djathtë. Pas shoqërimit në Komisariatin Nr.1 punonjësit e policisë patën një sjellje shumë profesionale dhe të edukuar. Nuk më është dhënë arsyeja e shoqërimit. Por besoj se një nga arsyet e shoqërimit tim ishte pse i kërkova të mos bërtiste”, tha Mirel Elezi.
Ai u shpreh se pavarësisht kësaj, do të vijojnë protestat dhe qëllimi i tyre është të mos votohet ligji që lejon importin e mbetjeve. “U mblodhëm për të kundërshtuar importin e plehrave apo mbetjeve. Që njerëzit edhe të vrisnin frikën e të dilnin në protestë. Ne kishim informacione se nuk do kalojë sot në Parlament. Arsyeja dihet, sepse ky ligj nuk mund të marrë votat e nevojshme për të kaluar. Protestat do të vazhdojnë deri sa ky ligj të mos kalojë në Parlament”, tha aktivisti.
Policia ka ndërhyrë mëngjesin e djeshëm, duke ndërprerë protestën e nisur që mbrëmë para Parlamentit kundër importit të mbetjeve. ¬Aktivistët kanë deklaruar se janë dhunuar nga policia, e cila ka hequr çadrat e tyre të vendosura që mbrëmë, pasi protestuesit e kaluan natën para Parlamentit. “Policia ndërhyri me dhunë. Na hoqi çadrat ku kaluam natën. U shoqëruan 2 persona, u goditën dhe u dhunuan. Na kanë arrestuar dy djem pse po protestonin kundër plehrave, janë në Komisariatin Nr. 1”, deklaruan protestuesit.
“Në orën 6:00 të mëngjesit Oltion Zeka u rrëmbye pa asnjë shkak nga policia në mes të protestuesve dhe nga dhuna shtazarake e ushtruar ndaj tij pati frakturë në kockë dhe përfundoi në Spitalin Ushtarak! Por ai menjëherë sapo mbaroi trajtimin mjekësor u kthye në protestë bashkë me anëtarët e familjes së tij! Këta janë qytetarët dhe heronjtë e vërtetë të këtij vendi, që e duan me zemër Shqipërinë! Ndërsa policia e Tahirit vërtetoi publikisht për të njëmijtën herë, se është vetëm një kamzhik i Juntës në Pushtetin e Oligarkisë Sorosiane të NarkoRilindjes!”, shprehet përfaqësuesi i Shoqërisë Civile, avokati Altin Goxhaj.

Oltion Zeka: “Shqiponjat” më shkaktuan frakturë në dorë

Oltion Zeka, një prej aktivistëve që u shoqërua në polici gjatë protestës në orët e para të mëngjesit akuzon policinë se e kanë dhunuar dhe i ka shkaktuar frakturë në njërën dorë. Ai tregon se policët “Shqiponja” e kanë marrë me dhunë dhe e kanë dërguar në komisariat pa asnjë shkak.

-A mund të na thoni si ndodhi ngjarja?
“Gjithë natën kemi qenë zgjuar para Parlamentit. Rreth orës 7:00 të mëngjesit erdhi policia. Erdhi një ford me “Shqiponjat”, pastaj erdhi i dyti dhe na thanë ngrihuni, sepse pengoni rrugën për kalimtarët prandaj duhet të ngriheni me patjetër.

-Ku ishit vendosur jui?
Ishim vendosur para Parlamentit. Nuk ishim vendosur në mes të rrugës, kishte rrugë edhe për kalimtarët.

-Pse ju dhunoi policia?
Isha mes protestuesve kur më vjen një polic dhe më kap nga jaka e xhupit dhe duke më tërhequr me dhunë më thotë, çohu, çohuni. Unë i thashë mos më prek me dorë, nuk keni të drejtë të prekni popullin me dorë. Më kap ai, pastaj më kap edhe një polic tjetër dhe më tërhoqën zvarrë.

-Policia ua ka shqyer edhe xhupin?
Po, policia më ka shqyer edhe xhupin. Më kapi një polic me forcë, pastaj më kapën tre, më kapën katër. Njëri më goditi nga këmbët dhe më morën në ajër. Dhe pastaj në momentin që më morën në ajër rashë në beton dhe pësova dëmtimin në dorë.

-Çfarë të thanë mjekët?
Më dërguan në komisariatin nr.1. Isha në polici, pastaj policia mori ambulancën dhe më dërguan te Spitali Ushtarak, më bënë grafi dhe më thanë që është një shembje, por nuk e di nëse është shembje apo thyerje, pasi unë nuk mund ta lëviz dot dorën, as gishtat.

-Do të bëni denoncim për këtë dhunë të ushtruar?
Natyrisht, sespe është një dhunë pa një motiv dhe në qoftëse dora nuk përmirësohet pas tre javësh, atëhere çështja do të jetë më e rëndë.

Policia e Tiranës pranon dhunën ndaj protestuesve

Policia ka pranuar dhunën ndaj protestuesve para Parlamentit dje në mëngjes. Në një njoftim për mediat, Policia e Tiranës sqaroi përplasjen e forcave të saj me disa nga protestuesit e mbledhur para Parlamentit, duke deklaruar se një protestues është dhunuar. Në njoftimin zyrtar ajo pranoi se njëri nga të shoqëruarit ka pësuar dëmtime në dorë dhe është dërguar për mjekim. Policia thotë se përplasja ndodhi, kur u kërkua të hiqeshin disa paleta që protestuesit kishin me vete, pasi ato nuk ishte përcaktuar në lejen e  dhënë për tubimin. Policia jep në deklaratë edhe inicialet e dy të rinjve 31-vjeçarë të shoqëruar në Komisariatin Nr.1, ndërsa thotë se ndaj këtyre shtetasve ka filluar procedimi penal në gjendje të lirë, për veprën penale “Prishja e qetësisë publike”. Rreth orës 07:00, sqaron Policia, është ndërhyrë për heqjen e këtyre paletave, por kanë hasur në kundërshtim prej tubuesve dhe si pasojë janë shoqëruar dy prej tyre, Oltion Z., 31 vjeç, Irel E., 31 vjeç.
Më tej, sqarohet në deklaratë, njëri prej të shoqëruarve ka ngritur pretendimin se është dëmtuar në dorë gjatë konfrontimit dhe u dërgua për mjekim të lehtë (shembje). Ndaj tyre ka filluar procedimi penal në gjendje të lirë, për veprën penale “Prishja e qetësisë publike”.
Ky reagim vjen, pasi më herët, aktivistët të cilët e kaluan natën përpara Parlamentit për të protestuar kundër ligjit të mbetjeve deklaruan se në orët e para të mëngjesit, policia kishte tentuar të prishte protestën e tyre, duke ndërhyrë me dhunë dhe duke ndaluar dy aktivistë.
Qindra protestues dhe aktivistë të Shoqërisë Civile protestuan dje para Parlamentit për të kundërshtuar miratimin e ligjit për importin e mbetjeve. Nën thirrjet, “Nuk duam plehra në Shqipëri” dhe “Ne i themi Jo plehrave”, aktivistë të AKIP, ambientalistë, por edhe qytetarë të shumtë protestuan para Parlamentit ku janë mbajtur të rrethuar nga policia.

R.POLISI

Ish-Kryeministri Berisha e ka konsideruar dje në Parlament një skandal të përmasave të mëdha dhënien e lejes nga qeveria për ndërtimin e TEC-it, i cili do të helmojë zonën e Korçës. “A e dini të dashur qytetarë se, sot duhet të ishte në Kuvend, ligji për katastrofën e Korçës, Pogradecit dhe Kolonjës, ligj që do të shndërronte zonën më të pasur të Shqipërisë, në pellgun më të ndotur të Ballkanit dhe Evropës?! Ligji që i jepte jetë një projekti, të cilin nuk guxoi asnjë qeveri që nga viti 1992 deri sot, t’i japë jetë, i ndërtimit të një megaTEC-i me torfën e kënetës së Maliqit, e cila në sipërfaqen që do të jepej për këtë qëllim për 157 milionë metër kub, e cila, sipas ekspertëve më të shquar të fushës, për shkak të koeficientit të ulët energjetik do të prodhonte 50 milionë metër kub hi pleh me të gjitha mbetjet toksike.
Ky është peshqeshi që Peleshi i bën Korçës me kryemafiozin, me don Edvinin. Po ka mendje të sëmurë që mund t’i lejojë vetes një vendim të tillë?”, tha Berisha.
Ish-Kryeministri u shpreh se çdo gjë është ndërmarrë në një feshtësi të plotë. “Dhe e bën këtë në sekretin më të plotë, duke thyer çdo ligj të vendit, duke mos patur asnjë autorizim tjetër përveç xhepit të Lefterit, që majmet me ryshfetet që merr nga kriminelët e mjedisit dhe të Peleshit me shokë.
A ka mundësi o socialistë t’ju pyes, si ka mundësi që nuk pyetet asnjë qytetar i Korçës? Ku e keni ligjin e kalimit nga fondi bujqësor në fond të përdorimit për TEC të 288 hektarëve tokë në Maliq? A keni ndjenja njerëzore a jo, o të babëzitur që mendoni vetëm për xhepat tuaj? Si mund të veproni prapa shpinës o të neveritur?! Këtë as diktatori nuk e bënte. A doni t’ju jap dokumente të plota?! Ju jeni të mbërthyer kokë e këmbë nga mafia e plehrave! Ju jeni mafia e plehrave! Në fakt, kufi për të vjedhur këtë vend ju nuk njihni”, tha Berisha.

Replika e Berishës me Peleshin

Duhet të jeni i decelebruar që të dilni këtu dhe të thoni që fantazuat dhe pastaj të mbeteni me dy këmbë brenda. Nuk jam unë që sajoj një gjë të tillë. Është projekti që ju keni dërguar në Parlament, është projekti që sot duhet të ishte këtu, por nuk ja u mban. Meqë i lejove vetes të përdorësh një gjë të denjë vetëm për veten, po nuk jam unë që të të jap ty edukatën elementare, do të të bëj një pyetje. Nuk kam dyshim që ti do Korçën, por ti do më shumë xhepin tënd. Ju të gjithë doni zonat që ju kanë votuar, por problemi është që doni të mbushni xhepat në zonat që ju kanë votuar. Po si ka mundësi që pas 7 muajsh nuk bën një konsultë publike me qytetarët e Korçës, por detyrohet opozita që të shkojë ta bëjë? A e di ti që ai projekt ka 20 vite dhe nuk e pa dot kurrë derën e Parlamentit? Dhe kur? Në kohërat tona më të vështira, kur vërtet vuanim për ngrohje në shkallë ekstreme. Por nuk na shkoi mendja kurrë të tymosim Korçën dhe Pogradecin. Dhe ai projekt është me 500 mijë megavat, pra ai futet në termocentralet e mëdha. Po si ka mundësi që një projekt që është refuzuar nga çdo qeveri, e majtë dhe e djathtë, për 22 vite me radhë vjen këtu në Parlament? Po çfarë është kjo? Ky është një akt megakorruptiv. Prandaj nuk shkoni dot tek zgjedhësit ju.
Zgjedhësit s’duan t’ju shohin bojën ju, se i mashtroni.

Reforma në Drejtësi

Fole për Reformën e Drejtësisë. Meritë historike e kësaj opozite është Reforma e Drejtësisë. Ju menduat se me larje e lyerje do i kaloni këto punë. Me larje e lyerje nuk kalohen.
Juve jua kanë hequr maskën dhe këtu do të jeni, mbaheni mend, çdo ditë e më shumë do të dini se kush jeni. Menduat se mashtruat Europën, por nuk ka më të marrë se ata që mendojnë se mund të mashtrojnë Europën. Europa është zemra e qytetërimit perëndimor. Mendoni se do të fusni drogën në thes, se do të fusni aferat me Shullazin dhe njerëzit e krimit në thes. Po ushqeheni me mashtrime e suksese të rreme. Zonja kushërirë (Harito), nëse lexon me vëmendje raportin do të krijohet mundësia ta shohësh të zbërthyer raportin, por ti s’di ta lexosh atë. S’është faji i raportit, faji është se nuk dini ta lexoni. Rrini diskutoni u hapën apo nuk u hapën negociatat. Sigurisht që do të hapen, por në kushte të plota, të cilat nuk janë plotësuar. Ndaj hajdeni të plotësojmë kushtet, lërini sukseset imagjinare, lëreni këtë koprolali dhe llogore të neveritshme dhe të ulemi e të bëhemi seriozë.
Pse e telefonoi bota Bashën më 21 korrik? S’ka ndodhur kurrë që lideri i opozitës të marrë telefonata në një ditë e të Europës dhe botës. Pse i mori? I mori se shpëtoi reformën nga kthetrat tuaja. I mori jo se e votoi, por se e shpëtoi reformën nga kthetrat tuaja. Ju doni Vetting me Shullazin, me Alket statutin. Po pse Vetting është ky? O shakaxhinj. Vettingun e kemi kërkuar ne jo ju, por s’kemi kërkuar Vetting për të bërë gjahun e shtrigave siç doni ta bëni ju.
Pra, hajdeni të bëjmë Reformën e Drejtësisë, hajdeni ta vazhdojmë, por jo për ta kapur. Sillni këtu ligjin për Ushtrinë, duke mashtruar. A mund të ndodhë në një vend të lirë demokratik që shefi i Shtabit të Përgjithshëm, gjeneral Trafiku, i dekretuar me Kushtetutë nga Presidenti i Republikës, komandant i Përgjithshëm i Forcave të Armatosura, të mos pranojë t’i dërgojë në tri vite një informacion të vetëm komandantit. Ju jeni racë e veçantë, racë e neveritshme.
Njeriu që e shndërroi Shqipërinë në aerodrome ilegale, njeriu që vuri në dispozicion instalimet ushtarake për drogën, qendrën e kontrollit të detit.
Zotërinj deputetë (i drejtohet Dogjanit), personave që heqin fytyrën dhe përdoren si leckë nga kryekumbara mos u kushtoni asnjë vëmendje. Me kaq unë e mbyll fjalën time, urdhëro zotëri, nuk të dëgjon njeri Shals.

Zhduken 40 mijë ton naftë

Ish-Kryeministri ka denoncuar aferën tjetër të naftës mes Ramës dhe ortakut të tij Besnik Sula. Bëhet fjalë për 40 mijë ton naftë që rezultojnë të zhdukur, ndërsa ka kujtuar edhe thyerjen e moratoriumit të prerjes së pyjeve në zonën e Librazhit, ku për çdo ditë priten me dhjetëra hektarë pyje.
“Një nga kriteret më themelore sot të BE është mbrojtja e mjedisit, sepse mjedisi është jeta. A dëgjoni ndonjëherë të flasin për mjedisin? A nuk e bënë këta moratoriumin e drurëve, e prerjes së drurit? Shkoni në rrugën në Librazhd. Çdo 10 min kalon një makinë me trungje. Për të gjitha taksën e merr Edi Rama me çakallin e tij të pafytyrë, me çakallin që e përdor si leckë për këpucët. A dëgjuat ju për moratoriumin për gjahun? Ja u kanë dyllosur çiftet gjahtarëve të ndershëm që prej vitesh e dekadash jetonin me gjahun. Dhe kanë dyfishuar çiftet e nomenklaturës së tyre të kalbur socialiste, që vjedh nga mëngjesi në darkë, plaçkit edhe copëza toke, ku mundet e ku s’mundet. Do që të prishë në Himarë shtëpi mbi 300-vjeçare dhe nuk prish pallatet e Koços, që janë dy monstra, dy përbindësh që i kanë zënë detin Himarës, sepse është aksioner. Del dhe flet këtu për naftën, ndërkohë që mafia e naftës bën ligjin në Shqipëri, që kur e mori me Besnik Sulën. A e dini ju që janë zhdukur mbi 40 mijë tonë naftë dhe ky zotëria jep porosi që të mos flitet për këtë? Këta mashtrues ordinerë që përdorin këtë platformë për të lëshuar gënjeshtra dhe mashtrime për qytetarët të pafajshëm shqiptarë. Dalin e flasin se mblodhën të ardhurat. Çfarë mblodhët? Duke rritur taksat 50%, kanë mbledhur në 4 vite, 4 herë më pak nga ç’kemi mbledhur ne me uljen e taksave mbi 50%. Dallimi është i madh shumë. Se ato para që u mblodhën me ulje taksash shkuan jo vetëm në buxhet, por edhe biznesit i vilet shumë më tepër, kurse këta vjedhin e vjedhin çdo gjë, natën, ditën, në çdo tender e gjithçka tjetër”, tha Berisha.

Lidhjet e Ramës me kompaninë serbe

Linja e Interkonjeksionit mes Tiranës dhe Prishtinës është bllokuar nga një komani serbe në lidhje direkte me Ramën. Ky është denoncimi i bërë dje në Parlament nga Berisha.
“A e dini që ERE ka anuluar me urdhër tenderin e kumbarit Rama me kompaninë serbe? Kurse Rama urdhëron veglën e tij dhe i jep një llokmë të madhe pa tender dhe pasi ia jep asaj, bën me 1/3-ën e sasisë një tender me 5 kompani të tjera. A i pagoi kjo kompani ekspozitën në Beograd apo e bleu me dhurata të tjera? Një gjë është e sigurtë, se ajo është famoze në korrupsion. Dhe druaj se kjo është kompania nr. 1 që bllokon linjën Tiranë-Prishtinë dhe këtu Edi Rama është në tavë me këtë kompani. Kur Enti Rregullator i Energjisë urdhëron anulimin si të paligjshëm të tenderit, s’ishte tender, por dhënie gratis dhe këta vazhdojnë si pa të keq, sigurisht që këtu Rama është skllav i kompanisë serbe, e njohur kjo për korrupsion të politikanëve në Serbi dhe vende të tjera”.
Berisha ka paraljamëruar se rrëzimi i qeverisë do të jetë i shpejtë dhe se ditët e saj janë të numëruara.
“Më thatë se pse i quaj kumbarë dhe ndrikulla. Po çfarë mund t’i quaj ndryshe unë këta që shesin çdo interes për xhepat e tyre. A mund të veprohet siç veprojnë këta njerëz? Një njeri që del dhe bërtet e mashtron nga mëngjesi deri në darkë për suksese imagjinare në një kohë kur të gjitha janë dështime të plota. Çdo gënjeshtër e juaja, një nga një po del në dritën e diellit. Të jeni të sigurtë që i keni kohërat shumë të numëruara, keni marrë fund!”, tha Berisha.

Bushati, i kapur në bordello burrash

Ish-Kryeministri ka akuzuar direkt Ramën si birin e skulptorit kriminel, i cili ka duart e lyera me gjakun e shqiptarëve të pafajshëm, ndërsa ka denoncuar skandalin e ministrit të Jashtëm Bushati të kapur në bordello burrash.
“Lidhur me problemin e fundit, i them Edi Ramës të mos shërbehet me njerëz, të cilët i depersonalizon, i shpërfytyron, i degjeneron dhe degradon në shkallën më ekstreme në radhë të parë para vetes së tyre, para familjarëve më të afërt të tyre, para miqve e kolegëve, para zgjedhësve të Shqipërisë. Shërbeu sa të duash, por ata janë simboli i fytyrës tënde. Unë nuk them se janë të pafajshëm, jo nuk janë. Ata janë skllevër të rekrutuar. Por e vërteta është se faqja e zezë të mbetet ty, kur i detyron ata mjeranë të shpërfytyrohen dhe të gënjejnë në mënyrë të përsëritur para kamerave. E çon ministrin e Jashtëm në Brazil dhe shtypi i botës thotë se shkoi në bordello burrash dhe nuk e përgënjeshtron dhe nuk e hedh në gjyq…. Po ju s’keni as dinjitet individual dhe asgjë tjetër. Po për cilin ministër është thënë kjo? Ja u tha opozita këtë? Ja u tha bota more, e keni shkrimin që është qarkulluar në çdo kancelari të botës kudo që shkon. Nuk e shkruan dot opozita një shkrim të tillë. Absolutisht ja kanë shkruajtur ata që e kanë fotografuar, ata që e kanë faktuar. Po pse nuk del ta hedhë në gjyq autorin ky (Bushati)? Apo ja nxjerr fotot dhe videon pastaj? Çdo njeri, kudo që të ndodhë ka të drejtë të hapë gjyqe. Edhe Brazili ka një sistem gjyqësor të jashtëzakonshëm. Kanë kryqëzuar presidentin ata”, tha Berisha.
Për Berishën, Rama i ka pushkatuar për së dytë martirët e kombit, duke i kujtuar një zhgarravinë të postuar në rrjetet sociale prej tij. “Me një shkarravinë që ke shpërndarë, duke u vendosur yllin në ballë martirëve të kombit, i ke pushkatuar për së dyti ata. Turp i madh! Tregove që je besnik i xhelatëve të tyre, sepse ata vërtet ranë në luftë me nazistët, por për së dyti ata, idealin e tyre e ekzekutoi Enver Hoxha. Ti që e ke quajtur gjakun e tyre si gjak të rremë në themel të kolltuqeve, në faqen 7 të “Refleksione”-ve të tua, ti tani në vend të një ndjese publike, se ai është gjak i shenjtë jo gjak i rremë, ai që bie për atdhe atij i shenjtërohet gjaku. Yllin e kuq nuk ja u dha nëna dhe babai vet. Yllin e kuq ja u dha Enver Hoxha, kryekrimineli i të gjithë historisë kombëtare të shqiptarëve. Dhe ti ja u rivendos yllin e kuq pas 25 vitesh që e kemi hequr. Ti, atyre që ja u quan gjakun e rremë, tani na del në emër të babait tënd, skulptorit kriminel Kristaq Rama dhe kryexhelatit Enver Hoxha, gjete këto ditë t’ja u rikthesh yllin në ballë.  Ata kanë përjetësinë kurse ylli ka shkuar në koshin e plehrave të historisë së bashku me ata, të cilët e sollën në Shqipëri”, tha Berisha.