Te Pescara është momenti i Rey Manajt. Sulmuesi shqiptar, i dhënë në formë huazimi nga Interi, pritet të luajë titullar edhe në transfertën me Sampdorian për javën e tetë të Serisë A. Talenti 19-vjeçar e ka lënë pas dëmtimin që pësoi në humbjen 0-2 me Chievon dhe është 100% në dispozicion të trajnerit Massimo Oddo. Në fakt pasojat fizike të sfidës me veronezët Manaj i vuajti edhe në kombëtare, duke lënë grumbullimin e kuqezinjve për sfidat me Lihtenshtejnin dhe Spanjën si masë paraprake.
Gjithsesi faza e riaftësimit ka shkuar sipas parashikimeve dhe talenti i lindur në Lushnjë mund të japë kontribut për skuadrën e tij ndaj Sampdorias. Mediat italiane raportojnë se, Manaj konsiderohet zgjedhje e parë nga Oddo, që kërkon nga sulmuesi të jetë pikë referimi në fazën sulmuese. Në 7 javët e para të Serisë A, Manaj është aktivizuar në 6 ndeshje, ku në 5 raste si zëvendësues. Në këtë fillim sezoni ka mundur ta dërgojë dy herë topin në rrjetë, pikërisht ndaj Sassuolos, sfidë të cilën Pescara e fitoi më pas 0-3 në tavolinë dhe në barazimin 1-1 në transfertë me Genoan.
Manaj titullar ndaj Sampdorias
Gazetarët në protestë kundër censurës
Gazetarët kanë protestuar para Bashkisë së Tiranës kundër censurës mediatike.
Protesta erdhi pas mbylljes së emisionit investigativ “Publicus” në “Vizion Plus” që po hetonte për vdekjen e 17-vjeçarit Ardit Gjoklajt në Sharrë.
Emisioni u mbyll me anë të “ndërhyrjes” së kryebashkiakut Veliaj.
Po ky i fundit ishte shkaktar edhe për shkarkimin e gazetares Alida Tota si drejtoreshë e “A1News”, që po hetonte pikërisht vdekjen e Arditit.
Sot Erion Veliaj duhet të japë përgjigje për vdekjen e 17-vjeçarit, ai duhet të japë llogari për institucionin që drejton. Unë kam besuar që Erion Veliaj do jetë një model, por ai u tregua më maskara se maskarenjtë. Turp të të vijë”, ka thënë Bledian Koka, gazetar i News 24. Në tubim folën edhe Armir Shkurti, Alida Tota dhe gazetarë të tjerë. Protesta e gazetarëve kundër censurës nuk u transmetua live nga televizionet kryesore informativë, por as nuk u pasqyrua në përgjithësi në faqet on-line të mediave më të rëndësishme.
Asnjë fjalë nga Top Channel, Tv Klan, Balkanweb, Ora News, ABC News e kështu me radhë. Për të mos folur për Vizion Plusin që shkruante për çelësin e qytetit të Goteborgut që i kishin dhënë Erion Veliajt në Suedi. Ndonëse nuk ka pasqyruar protestën, BalkanWeb ka pasqyruar qëndrimin e Maja Koçijançiç, zëdhënësja e përfaqësueses së Lartë të Bashkimit Europian, e cila ka reaguar në lidhje me censurën e medias në Shqipëri.
Teksa u pyet për ndalimin e një emisioni investigativ në vendin tonë, Kocijancic tha: Liria e shprehjes dhe e medias janë themelore për Bashkimit Evropian. Liria e medias, kyçe për procesin e zgjerimit. Po ndjekim zhvillimet në rajon dhe në Shqipëri. Censura do analizohet në raportin e përvitshëm”. Është e vërtetë se censura e medias nuk përbën më lajm në Shqipëri, por protesta kundër censurës ndoshta do t’i meritonte ca fjalë. Dhe jo vetëm kur bëhet shqetësim për të huajt.
Vendi po rrëshqet drejt destabilizimit
Albana Vokshi
“Mbrëmë vonë mora këtë mesazh në Facebook nga një banor i Milotit:
“Znj Albana. Prej dy ditësh shtatë familje në qytetin e Milotit janë përmbytur nga shirat. Asnjë nuk përgjigjet për ta, as Bashkia as komuna, vetëm e vetëm sepse jemi të djathtë. Çdo gjë ka marrë fund në qytetin tonë, rrugët janë prishur e çdo gjë tjetër”.
Mesazhi i familjeve të braktisura në Milot dhe bilanci tragjik i përmbytjeve të ditëve të fundit, me humbjen e një jete. 48-vjeçari i ndjerë përpiqej të shpëtonte biznesin nga përmbytja, por nuk ia doli. Duke i shprehur ngushëllimet e sinqerta familjarëve, i bëj thirrje qeverisë së propagandës të akordojë fondet dhe të veshë çizmet pasi në Kurbin, Milot, Rrëshen mbi 160 banesa ndodhen nën ujë dhe 2000 hektarë tokë bujqësore janë përmbytur. Ndërsa në Dibër janë dëmtuar dhjetëra banesa dhe janë bllokuar disa akse rrugore.
Kryeministri zgjodhi të mos bëjë pis këpucët, por të organizojë një nga ato takimet alla Çavez me fermerët në Manzë të Durrësit, ku nuk ja kurseu fyerjet një qytetari që kërkoi të fliste. Këtë herë nuk i kujtoi gruan, por rakinë… Fyes në absurditet, nuk guxon, denjon, nuk ka dëshirë, nuk i intereson të dëgjojë dikë që mbart halle pa fund në kurriz të tij, që nuk ka me ç’të ushqejë fëmijët, që nuk paguan dot dritat… Kjo, jashtë skenarit të parapërgatitur, i stonon ngjyrave të ndezura të propagandës së tij.
Të nesërmen, Rama zgjodhi një takim me “Policinë që Duan”. Rastësishëm apo jo, si për ironi, zgjodhi sallën “Ngjallja e Krishtit” për të folur për atë që ai e quan “policia e gjeneratës së re”, që të sjell ndërmend parullat e Enver Hoxhës: “Të krijojmë njeriun e ri!” Por edhe në këtë sallë, nuk foli për paqen, por i tregoi policisë që armiku i përbashkët nuk ishte as krimi, as bandat, as droga. Armiku ishte “opozita”, e cila me median dhe Prokurorinë qenkan bashkuar në atë që ministri i Brendshëm e quan “fronti i së keqes” që baltos atë dhe policinë pa të drejtë, ndërkohë që lajmet për kultivim dhe sekuestrim hashashi në Shqipëri, apo nga fqinjët i dëgjojmë disa herë në ditë…dhe kanë kapur (si asnjëherë më parë) të gjitha gazetat prestigjioze ndërkombëtare.
Pas deformimeve apo gabimeve trashanike në citimin e Kant, Kunderës, Shën Terezës, duke tallur policët, këtë herë citoi ish – Presidentin Regan. “Nuk ka qeveri të përsosur dhe çdo ditë e më shumë i besoj fjalës së Ronald Reagan, që qeveria nuk është zgjidhja, por problemi. Një problem që shoqëria duhet të mësojë të bashkëjetojë se nuk ka zgjidhje tjetër”, tha Rama. E meqë nuk kanë zgjidhje tjetër, sipas Ramës, shqiptarët të mos presin asnjë zgjidhje për ta, por të ulin kokën e të presin ndihmë veç nga Zoti…
Të nderuar qytetarë,
Vendi po rrëshket drejt një rendi destabilizues. Qeveria po vret çdo ditë, ka varfëruar gjysmën e popullsisë dhe po detyron profesionistët e të gjitha fushave të braktisin vendin nga pasiguria. Qeveria, administrata, ekonomia edhe vota janë kriminalizuar.
Edhe shpresa e fundit, media u shua nga kontrolli i papreçendentë i qeverisë dhe njerëzve të veshur me pushtet korruptiv.
Ngjarja kriminale në landfillin e Sharrës, çensurimi për herë të dytë nga Kryetari i Bashkisë së Tiranës i investigimit televiziv është dëshmia tronditëse se Tirana drejtohet nga një diktator. Denoncimet e gazetarëve të guximshëm si Alida, stafit profesional të Publicus, Artanit, Endrit, Jetmirit dhe Elvit, të cilët e kapën në flagrancë Erion Veliajn teksa kishte firmosur kontratën e vdekjes dhe të shfrytëzimit të fëmijëve, grave dhe burrave në landfillin e Sharrës.
Ndërsa Kryeministri vazhdon të heshtë përpara kësaj çensure, sepse landfillin e vdekjes dhe shfrytëzimit të njerëzve si skllevër e quan model për të ricikluar me urgjencë paratë që mafia pagoi për të firmosur fundin e Shqipërisë me miratimin e ligjit për importin e plehrave dhe mbetjeve të rrezikshme toksike.
Djaloshi kryebashkiak si duket me paratë e fiqve arriti të pushojë dy herë radhazi gazetarët nga puna dhe të censurojë median tradicionale, por fatmirësisht nuk mundi të kontrollojë lumin e shikuesve në rrjetet sociale që dëgjuan, panë dhe vërtetuan pse Erjon Veliaj nuk lejoi të zbardhej vrasja e fëmijës 17 vjeç, dhe nënës me 2 fëmijë.
Një shok fëmijërie që si duket e njeh më mirë se ne Erjonin, i bënte një thirrje ironike që të zinte shoqëri me Zuckerbergun për të censuruar edhe Facebook-un.
Kolegë deputetë,
Nga Shtetet e Bashkuara të Amerikës, një ish–ushtarak i lartë, eksperti i sigurisë dhe i shërbimeve inteligjente, analist i FOX NEËS, Bill Coëan, i bëri thirrje Kongresit Amerikan të nisë një hetim ndërkombëtar për përfshirjen e zyrtarëve të lartë të qeverisë së Shqipërisë në trafikun e drogës, krimin e organizuar dhe në veprimtaritë terroriste. Ai theksoi se një hetim i tillë mund të ketë sukses vetëm nën udhëheqjen e fortë të SHBA-së. Ai ngre shqetësimin se konvertimi i Shqipërisë në një strehë të drogës në Ballkan ka fluturuar nën radarët e politikës dhe se ka nevojë për vëmendje të menjëhershme të Shteteve të Bashkuara të Amerikës, sepse nuk mund të injorohet një krizë që po destabilizon një anëtar të Aleancës.
“Shqipëria është kthyer në një version ballkanik të Meksikës dhe Kolumbisë” shkruan Bill Coëan.
Edi Rama ja doli!!! Me pak mund arriti ta nxjerrë Shqipërinë në titujt kryesore të mediave prestigjioze ndërkombëtare, por jo për atë që ajo ofron për të huajt…por për drogën dhe krimin e lidhur me qeverinë.
Në Kongresin e Forumit të Gruas të Partive Popullore Europiane që u mbajt në Sofie të Bullgarisë, kërkova ndërhyrjen e Brukselit për të ndalur qeverinë në politikat e saj çnjerëzore për të përdorur të rinjtë dhe gratë për aktivitete të paligjshme, duke i kthyer në punëtorë me mëditje në parcelat e drogës; për të mos lejuar që Shqipëria të kthehet në një “Kolumbi” në Ballkan për shkak të lidhjeve të qeverisë me prodhuesit dhe trafikantët e drogës; për të mos lejuar pushtimin e Shqipërisë nga trafikantët e drogës dhe mafia e plehrave. Kërkova ndihmën e europarlamentareve dhe politikaneve të larta të vendeve anëtare apo aderuese në BE për të lobuar me kancelaritë perëndimore për ta nxjerrë Shqipërinë nga kjo situatë kritike që rrezikon edhe procesin e integrimit në BE.
Përfaqësuesi i qeverisë austriake deklaroi që 60 mijë shqiptarë ishin larguar vitin e fundit në BE dhe më shumë se 20 mijë ishin fëmijë…Reintegrimi në kushtet e kësaj, qeveria antisociale bëhet edhe më i vështirë, duke mos lënë hapësira për familjet, gratë e fëmijët përveç se të punojnë mbase në landfille (si ai i Sharrës) apo fusha kanabisi…
Është shqetësuese që numri i vrasjeve për shkak të konflikteve për parcelat e drogës, si dhe përdorimi nga ana e fëmijëve e të rinjve është rritur ndjeshëm (pavarësisht se policia në disa raste mundohet t’i fshehë). Trafikantët po shfrytëzojnë të rinjtë dhe familjet e varfëra për të mbjellë kanabis, duke sjellë edhe rënien e sektorëve të tjerë prodhues të ekonomisë (bujqësia, fasonët etj). Edhe në mediat më prestigjioze po shkruhet se qeveria e Tiranës po e përdor drogën për të mbajtur pushtetin.
Ndërsa, në një denoncim të oreve të fundit flitet se një lloj i rrezikshëm përzierje droge me lëndë kimike ka hyrë në Shqipëri dhe po konsumohet në lokalet e natës në Tiranë. Denoncuesit flasin për një substancë narkotike që shkakton vdekjen e shpejtë në 24 muaj.
Në kohën kur statistikat e BB, INSTAT apo institucioneve të tjera ndërkombëtare bërtasin për nivel të lartë varfërie, papunësie, në një kohë kur për 3 vjet radhazi pagat dhe pensionet reale janë ulur ndjeshëm…sot si për ironi, na sillni këtë projektligji për pensionet suplemenetare të disa nëpunësve të Agjencisë së Inteligjencës, agjenci tejet e rëndësishme për sigurinë kombëtare, por e shndërruar tani në një shërbim politik, si mjet presioni në Forcat e Armatosura dhe në Ministrinë e Mbrojtjes. Shërbimi Inteligjent i Mbrojtjes, ku së fundmi kanë gjetur fole dhe janë promovuar ish-sigurimsat e shtetit, e ka humbur pavarësinë politike dhe parimin “check and balance” në raport me autoritetet e komandimit dhe drejtimit strategjik në RSH. Misioni dhe detyrat janë kompromentuar nga politika dhe paaftësia profesionale, të cilën e dëshmon edhe buxheti i shpenzuar për operacione brenda dhe jashtë vendit (5-7%) nga 90-95% që ishte në qeverinë pararendëse për operacone në interes të sigurisë kombëtare. Pra, ky shërbim ose duhet reformuar totalisht ose duhet shkrirë e përgjegjësitë e detyrat e tij të kalojnë në struktura të tjera të sigurisë kombëtare.
Qeveria nuk dëgjon kërkesat e pensionistëve, të PAK, të grave e fëmijëve…por… nuk harron të shpërblejë spiunët që i zbardhin listat në demokratë apo socialistë…
Por nuk është koha të ndalemi as në foltore dhe as në deklarata, është koha të bashkohemi në koalicionin e vlerave kundër “Aleancës së Krimit”.
Opozita e ka nisur marshimin e saj: Qytetarët vendosin për Shqipërinë!
Edi Rama është rrëzuar në pistat e krimit dhe drogës, nuk meriton asnjë sekond t’ju qeverisë…
Nga po vjen skenari për trazira sociale
Kastriot Islami
Kultivimi i kanabisit është një çështje që prej disa ditësh merr vëmendjen kryesore të politikës e medias shqiptare, por jo vetëm. Shërbimet e ndryshme deri ato inteligjente vendase e të huaja kanë përgatitur raportet e tyre, kancelaritë partnere e kanë të gjithë informacionin mbi tavolinat e tyre; media perëndimore ka filluar të shkruajë intensivisht.
Fillimisht mendova se ndoshta do të ishte e tepërt të mbaja një fjalë për një çështje kaq të trajtuar. Por vendosa të flas sot për dy pasoja që lidhen me këtë dukuri, së pari, ndikimi i saj në zgjedhjet e ardhshme në Shqipëri dhe së dyti, ndikimi i kësaj dukurie në stabilitetin e sigurinë e vendit dhe në rolin e Shqipërisë si anëtare e NATO-s.
Ky shqetësim është ngritur nga një ekspert amerikan që merret me çështjet e NATO-s, të sigurisë, të terrorizimit, të shërbimeve inteligjente dhe të operacioneve speciale. E gjithë fjala ime do të synojë të ndriçojë publikun shqiptar pikërisht përmes analizës dhe shqetësimeve që ngre ky ekspert që dëgjohet me vëmendje nga publiku amerikan dhe politika amerikane…
Nga leximi i shkrimit të këtij eksperti arrihet në disa përfundime:
Kultivimi i kanabisit, në mënyrë të paligjshme për një vend si Shqipëria me ekonomi të brishtë, me shqetësime të konsiderueshme sociale, me institucione të dobëta, me nivel të lartë korrupsioni, me drejtësi ende të pangritur, me lidhje të fuqishme krim-politikë si në qeverisje ashtu edhe në Kuvend është një dukuri me shumë pasoja negative për një vend anëtar të NATO që mund të kthehet në një hallkë të dobët të Aleancës…
Një dukuri e tillë mbart rreziqe të konsiderueshme në periudhën afatmesme për stabilitetin e vendit, për funksionimin e shtetit ligjor aq më tepër që Shqipëria ndodhet në prag të hapjes së negociatave për anëtarësim në BE.
Në periudhën afatgjatë një dukuri e tillë e shtrirë në të gjithë vendin, e përhapur në nivel kapilar dhe për më tepër pjesë e një strategjie politike për manipulimin e zgjedhjeve, do të cenonte fillimisht rëndë sigurinë dhe eventualisht edhe mund të çonte në trazira sociale e destabilitet të vendit. Kjo ka ndodhur edhe gjetiu, konkretisht në Ukrainë, por edhe në Shqipëri në vitet 1996-1997.
Kultivimi i kanabisit në nivel kaq masiv dhe implikimi i shtetit, më konkretisht i rrjetit të policisë, s’është një çështje që mund të fshihet apo maskohet apo mohohet.
Këtë e ka thënë troç e qartë eurodeputeti Kukan: të gjithë e dinë se ç’ndodh me kultivimin e kanabisit në Shqipëri. Kukan është një politikan serioz, që s’ka interesa personale në Shqipëri dhe s’ka asnjë lidhje as ideologjike dhe as personale me politikën shqiptare. Dhe si për të konfirmuar këtë, tha Kukan, ditët e fundit ka pasur shkrime shumë të forta për vërtetësinë e tyre edhe gazeta zvicerane “Le Matin”, edhe media italiane, por edhe media “Hill” nga SHBA…
Unë gjykoj se nuk është as serioz dhe dinjitoz për ne debati lidhur me ekzistencën apo jo të kultivimit të kanabisit të Shqipëri. Kjo është një e vërtetë e patjetërsueshme. Madje edhe implikimi i policisë është i padiskutueshëm. I padiskutueshëm është e synimi i aplikimit të kësaj dukurie për qëllime elektorale, gjë që e vërtetuan zgjedhjet në Dibër… Por nuk po i futem sot këtij debati…
Do t’i përgjigjem disa pyetjeve që shtrohen nga publiku përmes përgjigjeve që ka dhënë eksperti amerikan…
Por para se të bëj këtë gjë dëshiroj të qetësoj të gjithë qytetarët e ndershëm dhe ata që kanë një arsyetim të shëndoshë që eksperti amerikan është i pavarur dhe nuk ka asnjë lidhje personale apo partiake me Shqipërinë, e thënë më troç, qëndrimi i tij është invariant nga çdo grup politik apo lider politik është në pushtet në Shqipëri. Ai flet vetëm për interesat strategjike të SHBA dhe meqenëse jemi në këtë pikë me duhet të evokoj edhe diçka që shqiptarët ndoshta e dinë…
Partneriteti strategjik SHBA–Shqipëri është rezultat i rezonimit të interesave të përbashkëta… Ato s’varen nga cili është në pushtet në SHBA apo Shqipëri. Ato kanë qenë dhe do të mbeten strategjike. SHBA gjithnjë ka pasur për synim të ndihmojë Shqipërinë të stabilizohet përmes demokratizimit.
Tani të kthehem te pyetjet e publikut dhe përgjigjet e ekspertit amerikan.
– Çfarë mendojnë në SHBA për kultivimin e kanabisit në Shqipëri?
Përgjigjja e ekspertit: Në Uashington, kohët e fundit kthimi i Shqipërisë në një strehë droge, është jashtë fokusit së politikës dhe ka nevojë për vëmendje të menjëhershme.
– Përse kjo çështje është e mprehtë për SHBA?
Përgjigjja e ekspertit: Së pari se Shqipëria është anëtare e NATO-s. Dhe së dyti, Shqipëria ka filluar të duket si një Meksikë dhe Kolumbi në Ballkan.
– A po hesht SHBA, përse? Dhe kur do të merret seriozisht?
Përgjigjja e ekspertit: Menjëherë pas zgjedhjes së Presidentit në SHBA… por kjo nuk ka lidhje as se kush do të zgjidhet dhe as kush është në pushtet në Tiranë…
– Vetëm SHBA ka dijeni për këtë dukuri? Dhe për çfarë tjetër stigmatizohet Shqipëria?
Përgjigja e ekspertit: Këto dhe të tjera raporte, e përcaktojnë Shqipërinë jo vetëm si një prodhues të madh të drogërave të paligjshme, por edhe si vend tranzit të drogës që vjen nga Azia dhe më pas kalon në të gjithë Evropën.
– Çfarë të këqijash ka kultivimi i marijuanës dhe tranzimit i drogave të forta? Përse mos të jetojnë më mirë shqiptarët duke shitur këtë bimë magjike përderisa përdoruesit janë në Perëndim?
Përgjigjja e ekspertit: Shqipëria është kthyer në një bazë nga e cila grupet kriminale kontrabandojnë heroinë, kokainë, kanabis dhe substanca të tjera të paligjshme në pjesën tjetër të Evropës, sipas Agjencisë së Drogërave të Evropës.
– A është kjo një dukuri që vjen si reagim spontan i qytetarëve për shkak të varfërisë apo prapa kësaj dukurie është shteti? Cili është implikimi i shtetit në këtë dukuri?
Përgjigjja e ekspertit: Disa raporte lidhin Kryeministrin Edi Rama dhe ministrin e Brendshëm Saimir Tahiri me familjarë të tyre të angazhuar fuqishëm në biznesin e drogës.
– Cili është rreziku më i madh që shqetëson në këtë rast Perëndimin?
Përgjigjja e ekspertit: Mediat në Mbretërinë e Bashkuar kanë shkruar se simpatizantë të ISIS kanë marrë kontrollin e plantacioneve të kanabisit në Shqipëri.
– Po Shqipërisë vetë çfarë rreziku i kanoset?
Përgjigjja e ekspertit: Korrupsioni mund të jetë shkaktar që udhëheqësit e lartë të qeverisë mbyllin njërin sy për tregtinë e drogës, duke bërë që i gjithë sistemi i sigurisë dhe i zbatimit të ligjit në Shqipëri të rrezikohet.
-Po pasoja, rreziku për vendet e tjera të Europës paraqet kjo gjendje e Shqipërisë?
Përgjigjja e ekspertit: Në një kohë që anëtarësimi i Shqipërisë në NATO është i rëndësishëm, transformimi i saj në një strehë droge është i papranueshëm. Lidhjet e drogës në Shqipëri nuk janë një shenjë e mirë për sigurinë afatgjatë të partnerëve tanë evropianë.
– Çfarë mund të bënte SHBA apo marrëdhëniet e qeverisë shqiptare me qeverinë amerikane janë të tilla që heshtja është zgjidhja e artë?
Përgjigjja e ekspertit: Gjithçka do të nisë pas zgjedhjeve të nëntorit në SHBA. Kongresi dhe autoritetet amerikane të zbatimit të ligjit duhet të shikojnë më thellë në këtë mjedis të rrezikshëm, duke përfshirë një hetim ndërkombëtar të zyrtarëve të lartë të qeverisë shqiptare të lidhur me krimin e organizuar, trafikun e drogës dhe veprimtaritë terroriste. Vetëm nën udhëheqjen e fortë të SHBA një hetim i tillë mund të jetë i suksesshëm.
Si përfundim: Kultivimi i kanabisit pas kriminalizimit të Parlamentit dhe administratës publike dhe pas Reformës në Drejtësi për ndëshkimin e politikanëve të korruptuar që kanë marrë peng shtetin është çështja e tretë madhore që shqetëson Perëndimin dhe rrezikon rëndë Shqipërinë. Këtë e dinë të gjithë. Heshtja është e përkohshme dhe për arsye rrethanash të momentit. Rruga më e qartë është e ajo e angazhimit serioz amerikan, e cila besoj shumë që do të japë rezultatet e saj në zgjedhjet e ardhshme.
Konkretisht bëhet fjalë për hetim ndërkombëtar të lidhjeve të politikës dhe politikanëve shqiptarë me korrupsionin, krimin dhe kultivimin e kanabisit.
Kjo është rruga që me shumë gjasa të ndodhë dhe përmes këtij diskutimi do të ftoja të gjithë deputetët e ndershëm dhe të arsyeshëm të këtij Kuvendi të reflektojnë thellësisht.
Qytetarët duhet të ndërgjegjësohen për nevojën e veprimit të tyre aktiv.
Përndryshe vendi do të rrezikohej nga futja në rrugë me shumë të papritura dhe pasiguri, ose drejt një regjimi autoritar me pasoja për sovranitetin dhe integritetin e vendit ose drejt trazirave sociale.
Unë shpresoj shumë në reflektimin e politikës dhe qytetarëve për të vijuar rrugëtimin drejt demokracisë perëndimore liberale…
Zbardhet gjobvënia e Shullazit, arrestohen dy ushtarët e tij
Kapobanda Emiljano Shullazi ka urdhëruar nga qelia e burgut ku ndodhet prej disa muajsh vënie gjobe 1 milion euro një biznesmeni. Dy ushtarët e tij, Endrit Qyqja dhe Endrit Zela, që ka dhe lidhje gjaku me Shullazin, u arrestuan dje pas kërkesës së Prokurorisë për Krime të Rënda. Sipas burimeve të Prokurorisë, Qyqja, nip i Shullazit, përfundoi në pranga sapo kishte mbaruar takimin me kapobandën në Burgun 313 në Tiranë. Ai u ndalua në lokalin përballë burgut. Ndërsa, Endrit Zela u arrestua brenda ambienteve të burgut, sapo kishte dalë nga takimi me Shullazin.
Burime nga Prokuroria kanë bërë të ditur se dy personat e arrestuar, në emër të Emiljano Shullazit, i kanë vendosur një gjobë 1 milion euro një biznesmeni të njohur në Tiranë. Ka qenë denoncimi i biznesmenit që Prokuroria ka nisur hetimet ndaj anëtarëve të bandës së Emiljano Shullazit që ka çuar edhe në arrestimin e tyre.
Prokuroria i dorëzoi policisë urdhër-arrestet rreth orës 12:30 dhe u ekzekutuan vetëm 5 minuta më vonë. Prokuroria i akuzon këta dy persona se në bashkëpunim me Emiljano Shullazin e Gilmano Danin, si edhe për llogari të këtyre të fundit, i kanë marrë shuma të konsiderueshme parash një biznesmeni, nëpërmjet kërcënimit dhe dhunës fizike. Biznesmeni që ka bërë denoncim në Prokurori, i ka identifikuar ata.
Në këtë mënyrë, Prokuroria e Krimeve të Rënda ka rikonfirmuar akuzat për Emiljano Shullazin.
Organi i akuzës thotë se, Shullazi dhe Dani dyshohet se i kanë marrë një biznesmeni shuma parash në kohë të ndryshme, duke e kërcënuar fizikisht, si edhe duke ushtruar dhunë fizike. Në disa nga rastet e kërcënimit për dhënie pasurie, në shoqërinë e Shullazit dhe Danit kanë qenë edhe Endrit Qyqja dhe Endrit Zela.
Po në bazë të veprimeve hetimore, rezulton se të dyshuarit Qyqja dhe Zela kanë qenë të pranishëm në disa momente, kur Emiljano Shullazi ka bërë kërkimin e padrejtë të sasisë monetare. Gjithashtu, këta persona kanë përfituar sasi monetare të lëvruara me çek nga ana e biznesmenit të dëmtuar, në favor të tyre, me porosi të Emiljano Shullazit.
Arrestimi i dy personave që janë pjesë e grupit të Shullazit vjen pak ditë pas publikimit të raportit të PAMECA 4, e cila për arrestimin e Shullazit tha se ishte kryer pa hetime të thelluara.
Hetimi i Prokurorisë
Me kërkesë të Prokurorisë për Krime të Rënda, Gjykata ka vendosur masën e sigurisë “arrest në burg” për Endrit Qyqja dhe Endrit Zela, të dyshuar për veprat penale të “Shtrëngimit me anë të kanosjes për dhënie pasurie”, në kuadër të grupit të strukturuar kriminal. Vendimi i Gjykatës është zbatuar nga ana e forcave të Policisë së Tiranës mesditën e së enjtes, në momentin që ata po linin ambientet e burgut, ku kishin patur një takim me Shullazin.
Prokuroria sqaron se, dy të arrestuarit e sotëm, në bashkëpunim me Emiljano Shullazin e Gilmano Danin, si edhe për llogari të këtyre të fundit, i kanë marrë shuma të konsiderueshme parash një biznesmeni, nëpërmjet kërcënimit dhe dhunës fizike. Prokuroria për Krime të Rënda bën të ditur se është duke zhvilluar hetime për një grup të strukturuar kriminal, i dyshuar për “gjobvënie”. Gjatë këtij hetimi fillimisht janë shtetasit Emiljano Shullazi, Gilmano Dani dhe Blerim Shullazi.
Në bazë të veprimeve hetimore ka rezultuar se, Shullazi dhe Dani dyshohet se i kanë marrë një biznesmeni shuma parash në kohë të ndryshme, duke e kërcënuar fizikisht, si edhe duke ushtruar dhunë fizike. Në disa nga rastet e kërcënimit për dhënie pasurie, në shoqërinë e Shullazit dhe Danit kanë qenë edhe Endrit Qyqja dhe Endrit Zela. Po në bazë të veprimeve hetimore rezulton se të dyshuarit Qyqja dhe Zela kanë qenë të pranishëm në disa momente, kur Shullazi ka bërë kërkimin e padrejtë të sasisë monetare.
Gjithashtu, këta persona kanë përfituar sasi monetare të lëvruara me çek nga ana e biznesmenit të dëmtuar, në favor të tyre, me porosi të Emiljano Shullazit. Në rastet e të dyshuarve Qyqja dhe Zela, rezulton se ndërmjet tyre dhe biznesmenit nuk ka asnjë marrëdhënie kontraktuale. Për këtë arsye, kërkimi i parave është realizuar në mënyrë të padrejtë, si edhe duke përdorur dhunën fizike dhe verbale.
Në këto kushte, Prokuroria për Krime të Rënda ka krijuar dyshimet e arsyeshme, bazuar në prova, se Endrit Qyqja dhe Endrit Zela kanë konsumuar elementët e veprave penale të “Shtrëngimit me anën të kanosjes për dhënie pasurie”, “Grupi i strukturuar kriminal” dhe “Veprime në kuadër të grupit të strukturuar kriminal”. Në bazë të veprimeve proceduriale të deritanishme, Prokuroria për Krime të Rënda kërkoi caktimin e masës së sigurisë “arrest në burg” për të dyshuarit Qyqja dhe Zela, të cilat janë miratuar nga ana e Gjykatës për Krime të Rënda.
Kush është biznesmeni që u gjobit me 100 mijë euro nga ushtarët e Shullazit
Zbardhet emri i biznesmenit ndaj të cilit bashkëpunëtorët e Emiljano Shullazit vendosën gjobë 100 mijë euro. Burime të Lapsi.al thonë se, bëhet fjalë për biznesmenin Ylvi Beqja nga Durrësi. Ky biznesmen pak kohë më parë deklaroi se i kishte dhënë 20% të hotel “Vollgës” Emiljano Shullazit, ndërsa më pas dy bashkëpunëtorët, Endrit Qyqja dhe Endrit Zela, i kishin vendosur gjobë prej 1 milion euro. Qyqja dhe Zela u arrestuan dje, teksa dolën nga paraburgimi ku ishin takuar me Emiljano Shullazin.
Lidhur me çështjen e pronësisë së hotel “Vollgës”, pak kohë më parë administradori i firmës arabe, Ylvi Beqja, i kishte dërguar një letër kryeprokurorit Adriatik Llala, ku ndër të tjera i thoshtë se nuk kishte faj Emiljano Shullazi, por noterët, gjyqtarët dhe hipoteka. Ylvi Beqja është gjithashtu edhe pronari i kompanisë së kafes “Pascucci Albania”.
Me kërkesë të Prokurorisë së Krimeve të Rënda dje u arrestuan dy ushtarët e Emiljano Shulllazit vetëm pak çaste pasi kishin dalë nga paraburgimi, ku u takuan me kapobandën të akuzuar për gjobëvënie.
Endrit Qyqja dhe Endrit Zela dyshohet se janë pjesë e grupit, të dyshuar për disa gjobëvënie dhe atentate në Tiranë dhe Durrës. Sipas Prokurorisë dy të arrestuarit, në bashkëpunim me shtetasit Emiljan Shullazi e Gilmano Dani, si edhe për llogari të këtyre të fundit, i kanë marrë shuma të konsiderueshme parash biznesmenit, nëpërmjet kërcënimit dhe dhunës fizike.
Dëshmia e biznesmenit që “fundosi” Shullazin
Një biznesmen në fushën e bojërave në Shqipëri, ka dëshmuar kundër “bandës” së Emiljano Shullazit. Bëhet e ditur se Prokuroria i ofroi statusin e bashkëpunëtorit biznesmenit, i cili rrëfeu se ka paguar 100 mijë euro me çeqe dhe llogari bankare për Shullazin pas dhunës e kërcënimeve për jetën. Me dëshminë e tij, biznesmeni i bojërave ka fundosur Emiljano Shullazin dhe “bandën” e tij për akuzën e “gjobëvënies” në bashkëpunim. Prokuroria për Krime të Rënda bëri të ditur se, ka firmosur marrëveshjen e bashkëpunimit me një biznesmen të njohur në vend, që ka përfaqësi e një kompani të madhe bojërash në Shqipëri. Emri i biznesmenit, nuk bëhet i ditur për arsye sigurie, por mësohet se ai ka larguar familjen nga Shqipëria. Ndërkohë, vetë ka pranuar të bëhet pjesë e programit të bashkëpunëtorëve të drejtësisë, duke rrëfyer kërcënimet, dhunën fizike dhe gjobat që i ka paguar Shullazit dhe “bandës” së tij.
Burimet thonë se, për një periudhë 2-vjeçare, dyshohet se Shullazi i ka marrë me anë të kërcënimit dhe dhunës fizike biznesmenit rreth 100 mijë euro. Para, të cilat, mësohet se biznesmeni i ka paguar me çeqe, llogari bankare dhe me kompani transfertash të parave, duke lënë gjurmë në sistem. Kjo ka lehtësuar punë në mbledhjen e provave për Prokurorinë, pasi deklarimet e biznesmenit provohen edhe me faktet konkrete, si fatura të tërheqjes së parave nga të dyshuarit, Gilmando Dani, Endrit Qyqja dhe Endri Zela për llogari të Emiljano Shullazit.
Në dosjen e Prokurorisë, thuhet se është provuar se në disa raste ka qenë i pranishëm vetë Shullazi, gjatë dhunës fizike e kërcënimëve për jetën ndaj biznesmenit të bojërave, i cili i ka paguar në dorë me çeqe edhe vetë të dyshuarit si kreu i “bandës”.
Burimet thonë se nga hetimet e kryera, rezulton se mes biznesmenit dhe të dyshuarve nuk ka asnjë marrëdhënie kontraktuale apo biznesi të përbashkët, që të dyshuarit të përfitonin shumat e caktuara të marra nga biznesmeni.
Sipas Prokurorisë, pas administrimit të dëshmisë së biznesmenit u bë arrestimi i dy të dyshuarve Endrit Qyqja dhe Endri Zela, të cilët në bashkpëunim me Blerim Shullazin, Gilmando Danin dhe Emiljano Shullazin akuzohen për “Shtrëngim me anë të kanosjes për dhënie pasurie”, në kuadër të grupit të strukturuar kriminal dhe “Veprime në kuadër të grupit të strukturuar kriminal”.
R.POLISI
Shoferi i aksidentit me 4 viktima ndiqej nga policia
Një aksident tragjik ka ndodhur rreth orës 4:15 të mëngjesit të djeshëm në autostradën Tiranë Durrës. Përplasja ballore e dy automjeteve shkaktoi 4 viktima në afërsi të Sukthit. Policia bëri të ditur se, automjeti me targa AA 979 GV që drejtohej nga Dashnor Deliallisi po ecte në sens të kundërt me një shpejtësi kur u përplas me mjetin me targa AA 694 IL që drejtohej nga 23- vjeçarja Greta Sherifi. Nga përplasja e dy automjeteve humbi jetën në vend 36-vjeçari Deliallisi dhe 3 vajzat që udhëtonin në automjetin tjetër, Greta Sherifi 23 vjeç, banuese në Sarandë, pronare e makinës, Izabela Balla, 33 vjeç, si edhe Elona Kaçibaros, 34 vjeç, banuese në Tiranë. Ndërkohë sipas policisë drejtuesi i mjetit tip “Benz” Dashnor Deliallisi, një emigrant i sapo kthyer nga Italia po lëvizte me 150 km në orë. Rruga ku ndodhi aksidenti është zgjeruar nga të dy anët në tre korsi nga një subjekt privat.
Burimeve të policisë thonë se, shkak është bërë futja në krah të kundërt e automjetit tip “Benz” që pak minuta më parë nuk kishte ndalur një postblloku policie. Ai drejtohej nga 36- vjeçari Dashnor Deliallisi, nga Durrësi, baba i dy fëmijëve, emigrant në Itali. Sipas hetimeve paraprake të ekspertëve të policisë, për t’i shpëtuar ndjekjes së uniformave blu, ai ka kaluar në krahun e kundër të autostradës, ku është përplasur me automjetin ku udhëtonin 3 vajza dhe që drejtohej nga 23-vjeçarja Greta Sherifi nga Saranda. Në makinën e saj ndodheshin si pasagjere dy mikeshat e saj, Izabela Balla 33-vjeçe që jetonte në Greqi dhe Elona Koçibaros 34 -vjeçe nga Tirana, të treja humbën jetën.
Mësohet se të tre vajzat ishin nisur për një udhëtim drejt Greqisë ku jetonte njëra prej tyre. Automjetet në të cilat udhëtonin viktimat janë shkatërruar plotësisht, ndërsa është dashur ndërhyrja e policisë dhe zjarrfikëses për të nxjerrë trupat e pajetë.
Ekspertë të policisë kanë shkuar në vendin e ngjarjes dhe janë duke punuar për zbardhjen e plotë të rrethanave të këtij aksidenti të rëndë. Trupat e viktimave janë dërguar fillimisht në morgun e qytetit të Durrësit. Dyshohet se 36-vjeçari Deliallisi ka hyrë në rrugë nën efektin e pijeve alkoolike, por do të jetë ekspertiza që do të vërtetojë këto dyshime. Burime policore në vendin e ngjarjes thanë gjithashtu se, automjeti i tij ka qenë duke udhëtuar me një shpejtësi tej normave të lejuara dhe se në këtë aks rruga është e pandriçuar.
Pasi janë njoftuar mbi lajmin e kobshëm për ndarjen tragjikisht nga jeta e vajzave të tyre, familjarët e 3 vajzave kanë mbërritur në morgun e Spitalit të Durrësit për të identifikuar viktimat, si dhe për të marrë trupat e tyre të pajetë. Të zhytur në dhimbje të thellë e tronditje të pashoqe, familjarët e vajzave kanë thënë se 3 të rejat ishin në Greqi për disa ditë pushime. Njëra prej tyre, Izabela Balla, kishte familjen në Greqi ku jetonte prej vitesh. Paraprakisht, dyshohet se ajo ishte shoferja e mjetit, shkruan portali “Durrës lajme”.
Ndërsa për 36-vjeçarin nga Durrësi, Dashnor Deliallisi, mësohet se ishte emigrant në Itali, i martuar e me dy fëmijë. Nuk është ende e qartë se për çfarë arsye ai po lëvizte në sens të kundërt në autostradë, duke u përplasur me “Benz”-in tjetër ku udhëtonin 3 vajzat, përplasje e cila rezultoi fatale e tragjike.
Shoferi i aksidentit në krah të kundërt dhe me 150 km/orë
“Toni Montana”, është ky pseudonimi në rrjetet sociale i 36-vjeçarit, Dashnor Deliallisi, i cili është shkaktar i aksidentit në autostradën Tiranë-Durrës, në Sukth. Tre vajza, shoqe me njëra-tjetrën, gjetën vdekjen pasi u përplasën ballë për ballë me makinën e drejtuar nga Deliallisi, i cili ecte kundravajtje. Edhe 36-vjeçari gjeti vdekjen nga aksidenti. Automjeti i tij, me targa AA 979 GV, po ecte në sens të kundërt kur u përplas me automjetin me targa AA 694 IL, që drejtohej nga 23-vjeçarja Greta Sherifi.
Burime zyrtare bëjnë të ditur se mjeti që ecte në krah të kundërt dhe që drejtohej nga 36-vjeçari Dashnor Deliallisi ishte në ndjekje nga policia. Policia sqaron se ka qenë një patrullë e efektivëve rrugorë që ka konstatuar mjetin tip “Benz” në afërsi të një karburanti, duke ecur në krah të kundërt dhe me shpejtësi tej normave të lejuara, 120 km në orë. Ata i kanë bërë shenjë të ndalonte, por Deliallisi ka shtuar shpejtësinë, duke vënë në rrezik edhe jetën e punonjësve të policisë.
Pas kësaj, policia është vënë në ndjekje, por mjeti është shkëputur, duke përfituar në kohë, pasi lëvizte në sens të kundërt dhe shërbimet e policisë nuk kanë lëvizur në atë sens. Sipas të njëjtave burime, vetëm pak minuta më vonë është konstatuar se po ky mjet ishte përfshirë në një aksident në autostradën Tiranë-Durrës, në Sukth, rreth orës 04:15.
Pasi eci për rreth 12 kilometra në krah të kundërt, duke qenë se ndiqej nga policia, e cila e kishte pikasur duke qarkulluar tej normave të lejuara, ai u përplas në Sukth me një automjet tip “Benz”, aksident nga i cili 36-vjeçari dhe tre të rejat gjetën vdekjen. Dashnor Deliallisi ishte qytetar rom, i lindur në Fushë Krujë dhe me mbiemër të ndryshuar. Aktualisht, ai bashkëjetonte me një grua në qytetin e Durrësit. Në fakt ai rezultonte i papunë, por nga fotot e publikuara në rrjetet sociale duket që bënte jetë luksoze me makina të shtrenjta, në lokale nate, me orë e unaza prej ari.
Sipas burimeve zyrtare, Dashnor Deliallisi është një shtetas me precedentë penalë, i cilësuar si “kamikazi shkatërrues”. Ai rezulton të jetë arrestuar në vitin 2011 në lagjen 12 në Durrës, pasi tentoi të vriste një person me një armë pa leje. Në momentin e aksidentit në Sukth, Dashnor Deliallisi dyshohet të ketë qenë nën efektin e alkoolit dhe drogës, por ende nuk kanë dalë përgjigjet përfundimtare, përsa i përket analizave toksikologjike, nga Instituti i Mjekësisë Ligjore.
Prokuroria të hetojë dhe të zbardhë shkaqet e aksidentit
Një qytetar nga Durrësi i ka dërguar një mesazh ish-Kryeministrit Berisha ku shkruan se, policia është përgjegjëse për aksidentin që u mori jetën 4 të rinjve në Sukth. “Qytetari dixhital denoncon: përgjegjësinë e policisë në aksidentin që ju mori jetën 4 të rinjve në autostradën Tiranë-Durrës”, shkruan Berisha në një postim në Facebook.
“Duke shprehur ngushëllimet më të thella familjarëve të viktimave dhe ndarë me to dhimbjen e madhe, i bëj thirrje Prokurorisë të hetojë me përparësi këtë informacion për të zbardhur shkaqet e aksidentit tragjik që tronditi sot mbarë vendin. sb”, shkruan Berisha duke publikuar mesazhin e qytetarit.
“Përshëndetje, po ndjek parlamentin të lutem Dr., thuaj Saje qorrit se vdekja e 4 të rinjve në autostradë është shkaktuar nga policia. Burim i sigurtë. Djali që u përplas me makinën e 3 vajzave ishte në ndjekje nga policia që i ishte vënë pas me sirenë ndezur”, shkruan qytetari nga Durrësi.
Udhëtimi i vdekjes, sms e fundit të 33-vjeçares
Ndonëse ato u nisën së bashku për një udhëtim drejt Greqisë, rruga e tyre u pre në mes nga një aksident që i mori jetën tragjikisht në një moshë të re. Në profilin e ‘Facebook’ e të treja vajzave shihen foto që ato kanë dalë bashkë, ndërsa shihen të pandara. Në mesazhet e fundit të Izabela Ballës, shihen se si ajo bën dedikime me foto dhe thënie për njerëzit e saj të dashur, ndërsa disa prej tyre janë domethënës.
Po ashtu, shihet se në postimin e fundit Izabela Balla ka shpërndarë horoskopin e datës 11 tetor. “Ujori, Hëna vazhdon të jetë në shenjën tuaj. Mund të ndjeheni më emocionalë se zakonisht, ta ndjeni më shumë dashurinë për partnerin apo partneren. Vëmendja është tek ju dhe ju duhet ta shfrytëzoni gjithashtu”.
Ndërkohë, një foto që Greta Sherifi ka postuar në ‘Fb’ është një tato, dedikim për babain e saj. “Nëse dikush ka humbur 5 kg, të vijë t’i marrë se i kam unë”, thuhet në mesazhin e fundit që ka shpërndarë Elona Kaçibaros, 34 vjeçe, nënë e një fëmije.
Greta Sherifi, vetëm 23 vjeç, drejtonte mjetin tip ‘Benz’ ndërsa pasagjere ishin Izabela Balla, 33 vjeçe dhe Elona Kaçibaros. Vajzat ishin nisur në mëngjes herët për në Greqi, ku do të kalonin disa ditë tek Izabela Balla, e cila jetonte atje, ndërsa fati i keq deshi që ky të ishte udhëtimi i tyre i fundit.
Droga, muri i rrezikshëm i Shqipërisë në Evropë
Sali BERISHA
Ju zotërinj keni kohë që, në një marrëzi kolektive, nuk them të gjithë, por tre a katër nga ju, përpiqeni me çdo kusht t’u thoni shqiptarëve se është pakësuar kanabisi, se po e luftoni me sukses, në një kohë kur vetëm dje nga e mbarë bota ka katër artikuj që damkosin Shqipërinë dhe që s’ka ndodhur kurrë në një hark kohor të shkurtër të shkruhen katër shkrime, secili më i zi se tjetri për Kolumbinë e Evropës. Qëndrimi ynë mbi këtë është denoncimi, nga mëngjesi deri në darkë, me të gjitha mënyrat e mundësitë, me të gjitha lidhjet, me të gjithë potencialin. Mund të ketë prej jush që mendoni se kjo është e gabuar. Por ju garantoj se kjo është në interesin më absolut të fëmijëve tuaj. Edi Rama po e çon vendin drejt drogës sepse vetë është i droguar, është përdorues droge. Mediat njoftuan se është futur Krokodili, droga letale, vdekësore, droga e të varfërve. Po nuk vumë kufi dhe po nuk qëndruam, këtë që i keni bërë ju Shqipërisë, s’ja ka bërë asnjë pushtues deri sot. Në mënyrë absolute asnjë nga pushtuesit nuk ka cenuar në këtë mënyrë qenien shqiptare sa ç’po e sulmoni ju me drogën. U bëj thirrje shqiptarëve të largohen prej saj, se në mënyrë absolute është alternativa më e dëmshme, më e rrezikshme, për veten e tyre, fëmijët, vendin e tyre, për kombin e tyre. Unë që e them këtë e di shumë mirë që ka dhe shtete apo vende që po shkojnë drejt legalizimit. Hajt ta marrim variantin që po e legalizojmë, të mbjellim tokat me hashash. Ku do e çojmë? Fëmijëve tanë? Do të ketë një rënie katastrofale të çmimit, tregu europian nuk e merr kurrë. Ku do e çosh, çfarë do të bësh? Do të mbytesh në kanabis, do të mbytesh në drogë. Një gazetar amerikan investigativ dha një mesazh këto ditë për shqiptarët: mos u bëni si kolumbianët. 30 vjet ka vazhduar lufta në Kolumbi, vetëm me një qëllim, drogën dhe vetëm drogën. Sigurisht ja u qan hallin ky (Tahiri), sepse Habilajt e tij mbjellin gjysmën e Vlorës ndaj ja u qan hallin ky. Unë i mirëkuptoj ata që e mbjellin thotë. Sigurisht që i mirëkupton sepse është përfitues kryesor i drogës në Shqipëri. Ju në këtë mënyrë po ngrini një mur, por murin më të rrezikshëm të Shqipërisë në Evropë, po shkatërroni me shpejtësi të madhe imazhin e vendit dhe të kombit. Ata që përpiqen që të bëjnë krahasime me kombin e Spinozës apo e gjenive të tjerë, gabojnë shumë rëndë. Së pari, nuk njohin legjislacionin e atij kombi, së dyti, asgjë s’mund të nxijë as Rembrantin, as Rubensin, as Spinozën dhe asnjë nga gjenitë e atij kombi që i ka bërë dritë njerëzimit.
Nuk po ju quaj unë kanabista, po ju quan e gjithë Shqipëria, po ju quan e gjithë bota. Çfarë doni më shumë se sa 4 artikuj në të katër anët e planetit për Kolumbinë e Europës! A ju dhembset apo jo Shqipëria? Apo për xhepin tuaj jeni të gatshëm të shkelmoni çdo qelizë, çdo interes të këtij vendi dhe keni pafytyrësinë dhe paturpësinë dhe thoni se nuk ka kanabis në një kohë që çdo shqiptar e sheh sot se ka dy ministra bujqësie, njëri është zoti Panariti, tjetri është zoti kanabist Tahiri. Në një kohë kur gjitha Shqipëria e shikon se një vello e zezë krimi ka mbuluar Shqipërinë, nga thellësitë e Alpeve deri në Pogon. Vetën 3 ditë më parë, një djalë 31 vjeç u ekzekutua me kodin e mafies, në Shën Gjergj, me një plumb mbas koke dhe ky është viktima e tetë.
Qeveria socialiste i tha qeverisë greke se problemi çam nuk ekziston
Zoti kryetar kam dhe një çështje që dua të shpreh mendimin tim, lidhur me diskutimet që bëhen për marrëdhëniet me fqinjët dhe dua të të them këtu se, në tërësi marrëdhëniet me fqinjët, falë doktrinës së Davutoglu të “zero problemeve me fqinjët”, me keqardhje duhet të them se problemet me fqinjët janë sot më serioze se ndonjëherë më parë. Po pse? Nuk them se pala shqiptare ka bërë akte, të cilat e kanë përkeqësuar marrëdhënien, jo nuk e them këtë. Por them se pala shqiptare, si e papërgjegjshme ka pranuar fermentimin e problemeve. Fermentimi i problemeve është problem madhor në vetvete. Ne kemi probleme me fqinjët, por ne jemi të dënuar të bëjmë gjithçka për zgjidhjen e tyre me dialog dhe në mënyrë konstruktive. Unë mendoj se, gabimi më i madh është nëse këto probleme përdoren për qëllime elektorale. Ato nuk i shërbejnë cilitdo që i përdor. Me fqinjët ne duhet të jemi seriozë dhe sigurues, duke i trajtuar dhe qëndruar në çdo problem. Por mund të evitohet diplomacia e megafonit. Ajo nuk të sjell gjë. Të jep duartrokitje po asgjë tjetër. Unë po marr problemin çam. Më datën 13 janar ‘91 në takimin e parë me një Kryeministër që kam patur unë me tre a katër bashkëpunëtorë në hotel “Dajti”, ja kemi ngritur çështjen çame. E ngrita në Stamboll, edhe aty kam qenë me tre a katër vetë, më tha Kryeministri Mitsotaqis se sa herë takohemi po këtë problem më ngre ti. Po, i thashë, unë këtë problem do të ngre, po të duash takohu ose jo me mua, por unë, sa herë të takohemi këtë problem do ta kem çështje të dytë ose të tretë. Pra, domethënia e kësaj ishte që, po të duash mos më tako, por nëse më takon unë këtë problem do ta ngre. Ky problem, me gjithë komplikimet që lindën, u trajtua në çdo diskutim dhe u konkretizua në traktatin e miqësisë dhe bashkëpunimit, i cili ka një meritë të jashtëzakonshme. Është dokumenti i parë ligjor që sanksionon kufijtë. As Enver Hoxha nuk kishte vënë kufij. Një pjesë e madhe e kufirit të Jugut ishte pa asnjë piramidë. Zona të tëra në kufij ishin pa piramida sepse shmangej sherri. Ne i thamë jo, ne do të njohim. U bënë kaq debate, pati pretendime për protokollon e Firenzes dhe për shumë gjëra, por ne thamë jo, duhet ta njohim bilateralisht dhe u arrit kjo. Çfarë ndodhi? Qeveria socialiste që erdhi pas nesh i thotë qeverisë greke se nuk ekziston për ne problemi çam. Këtë ma ka thënë Simitis në ambasadën greke dhe e ka bërë publike që atë ditë. Jo i thashë, problemi çam ekziston. Dhe këtë ja thashë jo vetëm atij, por edhe Kancelarit Shreder në “Rogner”. Pra, e varrosën problemin çam. Dhe unë i them Kancelarit gjerman se këta heqin nga axhenda një gjë të tillë. E vërteta është se e mbajti shënim dhe e tha diku. Tani ç’ndodh? Unë nuk flas në mënyrë përfundimtare këtu, por u them shqiptarëve një gjë: në mënyrë absolute shumë shpejt do të kuptoni se në interes të kujt vepruan. Dhe u them këtu, në bindjen më absolute, se vepruan në interes të një pale të tretë. Historia do e provojë. Kjo është deklarata ime. Por unë nuk ngutem.
Çdo lloj insinuate për rivendikime territoriale është e gabuar
Duke thënë këto, në çdo takim që kam patur, kam insistuar pranë autoriteteve greke dhe insistoj ende edhe sot edhe pse nuk kam ndonjë peshë, se qeveria shqiptare nuk ka asnjë alternativë tjetër përveç zbatimit të vendimit të Gjykatës Kushtetuese, ndaj dhe çështja duhet të shkojë të zgjidhet sipas ligjit ndërkombëtar sepse qeveria nuk mund të thyejë vendimin e gjykatës pavarësisht, e them këtu dhe mbajeni mend mirë, e keni bërë për llogari të një pale tjetër. Kaq! Tani vijmë te kjo qeveri. Unë besoj se kjo qeveri greke, me dy vizita të ministrit tregoi një vullnet për t’i çuar gjërat përpara, sepse gjëja më e gabuar është t’i lësh ato në vendnumëro. Nga ana tjetër dëgjova edhe përfaqësuesit tanë që thanë se duhet ta rishqyrtojmë traktatin dhe do ta plotësojmë. Plotësisht dakord, nuk them se është i përsosur se kanë kaluar 20 vite. Le ta plotësojmë, por ajo është një bazë solide e pandryshueshme. Dhe është gabim i madh nga shqiptarët të heqin dorë, por dhe nga grekët që duan të përmirësojmë marrëdhëniet me Shqipërinë s’mund të heqin dorë nga ai traktat. Jo. A mund të thuash që çështja çame nuk ekziston? S’mund ta thuash kurrë, sepse ajo ekziston. Se ajo është një çështje ndërgjegje njerëzore në radhë të parë. Ka një spastrim etnik, ka një krim të papërshkrueshëm aty, ka një mashtrim. Kolaboracionizëm ka patur në gjithë Europën, por çamët kanë luftuar dhe nuk mund të shkelësh mbi gjakun e tyre nëse do t’i qëndrosh të drejtës historike. Natyrisht çdo lloj insinuate për rivendikime territoriale është absolutisht e gabuar. As kërkojmë as mund të kërkojmë ndryshimin e kufijve. Kërkojmë të zgjidhim mbi bazën e konventave ndërkombëtare dhe të drejtave ndërkombëtare ato çka u takon çamëve, dhe kjo vetëm e lartëson Greqinë, djepin e demokracisë botërore.
Urimi për ditëlindjen e Dritëro Agollit
Kam zgjedhur këtu një strofë nga poeti i talentuar, poeti i madh, kolosi i kulturës dhe letrave, në ditëlindjen e tij, Dritëro Agollit, por dhe si mesazh për t’ja uruar këtë ditëlindje:
“I dashur shok,
i miri vëlla,
etërit tanë mbathin opinga,
s’duhet të flas me fjalë të mëdha,
vetëm të lutem mos më bëj të liga”
Shqiptarët janë njerëzit e opingave, njerëz që vijnë nga varfëria, njerëz që vijnë nga vuajtje kolosale, pse doni t’i zhysni në kazanë dhe në kanabis?! Apo vetëm që të mbushni xhepin ju o zotërinj kanabistë dhe zonja kanabina? Apo vetëm e vetëm që t’u mbyllni gojën apo vetëm që të blini vota? Është një akt i shëmtuar dhe i papërgjegjshëm.
Investigimi i aferës së Sharrës nxori përfshirjen direkte të Veliajt
Partia Demokratike reagoi dje në lidhje me censurimin e emisionit “Publicus” mbi aferën e landfillit të Sharrës si dhe përgjegjësinë e Erjon Veliajt mbi vrasjen e 17 vjeçarit në këtë landfill. Sekretarja për Marrëdhëniet me Publikun, Grida Duma tha se ishte Veliaj që bëri çdo përpjekje për mostransmetimin e emisionit. “Mbrëmë Opinion bëri të mundur transmetimin e emisionit “Publicus”, një investigim mediatik që Erjon Veliaj e kishte bllokuar. Dhe mbrëmë u kuptua fare qartë pse Erjon Veliaj bëri çdo përpjekje për ndalimin e këtij emisioni. Investigimi mediatik nxori qartë aferën e madhe korruptive e kriminale të Sharrës dhe përgjegjësinë direkte të Erjon Veliajt në vdekjen e Arditit. Investigimi zbuloi firmën e Erjon Veliajt në kontratën me kompaninë 3R, e kryetarit socialist të Peqinit, që edhe sot e kësaj dite merret në mbrojtje nga Edi Rama e nuk i dorëzohet drejtësisë. Mbrëmë shqiptarët panë se në kantierin e Veliajt nuk zbatohej asnjë ligj, nuk respektohej asnjë kriter sigurie, nuk paguheshin siguracionet. Panë kushtet mizerabël të punës ku kishte humbur jetën para Arditit edhe një grua, një lajm i mbajtur i fshehur deri tani. Të rinj, të mitur, burra e gra shfrytëzoheshin në këtë landfill, ndërkohë që Erjon Veliaj kishte premtuar punë të sigurtë me thirrjen publike që u bëri qytetarëve. Publikimi i emisionit të censuruar nga Erjon Veliaj është një lajm i mirë që tregon se ka ende garanci në vend për lirinë e shprehjes, megjithë shtypjen kriminale që pushteti u bën mediave herë me kërcënime e herë me joshje. Transmetimi mbrëmë është një thirrje e fortë për Prokurorinë e Tiranës, që të mos dremisë mbi këtë dosje, por të çojë hetimin përpara e të bëjë drejtësi për jetët e humbura në këtë aferë korrupsioni e krimit të Erjon Veliajt” u shpreh Duma.
Çdo përpjekje për të vendosur në hije Kosovën, reminishencë e bllokmenëve të vjetër
Berisha ironizoi dje qëndrimet e Ramës gjatë vizitës në Beograd ndërsa theksoi se çdo përpjekje për të vendosur në hije Kosovën është reminishencë e tradhtisë së vjetër kombëtare dhe e qëndrimeve të bllokmenëve të vjetër. “Dua t’i them Edi Ramës dhe këto fjalë. Ka deklaruar sot aty se nuk çan kokën nëse e quajmë tradhtar apo hero. Në fakt zotëri nuk meriton të quhesh as tradhtar e as hero, por thjesht një batakçi. Je batakçi! Shkon për të shitur pikturat. Në Paris shiste ikonat e vjedhura, këtu shet shkarravinat që s’t’i blinte njeri. Nga shitës ikonash në shitës shkarravinash. A e dini ju që pa u bërë Kryeministër ai zotëri kishte gjithsej 3 mijë euro të deklaruara? Unë aty i kam të miat. Aq i kishin prodhuar atij pikturat dhe Kurbani. Pra, a shkon njeriu në konflikt të hapur interesi? Përdor postin e Kryeministrit për të shitur pikturat njësoj siç përdorje emigracionin në Francë për të shitur pikturat e vjedhura. Unë kërkoj që Parlamenti të hetojë të gjitha ekspozitat që ky zotëri ka hapur si Kryeministër. Që të gjitha me para shtetërore e në konflikt të hapur interesi. Në fakt ai është mr. Kazani. E filluan si mazhorancë qelbësirash e mbyllët dhe një herë si një pakicë e lemeritur plehrash. Shqiptarët sot ju urrejnë ju sa vetë plehrat që kanë mbushur rrugët e tyre!” u shpreh Berisha. Nga ana tjetër, ai i cilësoi qendrimet e Ramës si servilosje ndaj Beogradit. “Këta kanë një gjë: Meka e neobllokmenëve është Beogradi. Vdesin për t’u servilosur, krekosur, për t’u plluqur me Beogradin, e kanë sëmundje. Sot e ndoqa aktivitetin. Dhe sot pashë një gjë të cilën unë e vlerësoj, sot Kryeministri i Serbisë deklaroi, për herë të parë që e dëgjoj unë, se jam i vendosur të punoj për marrëdhëniet, ai tha serbo-shqiptare ne themi shqiptaro-serbe. Dhe mendoj se ky është një zhvillim shumë pozitiv. Mirëpo tani ç’na del? Nëse themi do të punojmë për marrëdhëniet shqiptaro-serbe, kjo nënkupton shqiptarët kudo që janë, vetëm me një kusht ama, që është jetik për suksesin e këtyre marrëdhënieve: Kosova në ballë. Në këto marrëdhënie udhëheq Kosova dhe këto marrëdhënie do të shkojnë në ato nivele ku duhet vetëm nëse për palën shqiptare të udhëheqë Kosova. Nuk them që Tirana të jetë jashtë, në asnjë mënyrë. Nuk them që Tirana të mos bëjë politikën e vet, në asnjë mënyrë. Por ama duhet të kemi një ndërgjegje, një vetëdije, nëse flasim për marrëdhënie shqiptaro-serbe, këto marrëdhënie do të njohin sukses dhe jemi të interesuar për sukses, atëherë kur ato për palën shqiptare prin Kosova. Çdo përpjekje për të vendosur në hije Kosovën është reminishencë e tradhtisë së vjetër kombëtare e bllokmenëve të vjetër, e kthyer nga bllokmenët e rinj. Çfarë do të thotë kjo? Thotë (Rama) se shkoi për rrugën Nish-Durrës. Kë do të mashtrosh ti me këtë, Nastradin? Ky është një segment rruge Nish-Merdare dhe ne e mirëpresim, por është program i mirëfilltë serb. Ti hajde mburru me ndonjë projekt tëndin, por s’ke marrë dot asnjë projekt nga iniciativa evropiane. Kosova mori 4-5 projekte, kurse Shqipëria mori korridorin e Bregut, 10 mln euro investim. Asgjë s’mori. Ndaj duhet të punojmë për marrëdhëniet, është detyrë, dhe duhet të jemi të vëmendshëm se ne trashëgojmë 47 vjet diktaturë, e cila na la me konceptet e marrëdhënieve të para 47 viteve, të cilat ishin marrëdhënie barbarie ndaj nesh, pushtim ndaj nesh. Dhe është në detyrimin tonë që ne të luftojmë për t’i kapërcyer ato. Pra, edhe në këtë çështjen e marrëdhënieve me Serbinë, dhe marrëdhëniet shqiptaro-serbe janë shumë të rëndësishme për Ballkanin dhe rajonin, por ama në ballë duhet të jetë Kosova dhe interes i parë duhet të jetë Kosova. Asnjë cenim, përveç interesave të vjetra pushtuese nuk bën Kosova” tha Berisha
Kryesore
Continue to the category
