A janë të detyruar punëdhënësit t’i paguajnë punonjësit mirë, me një rrogë me të cilën mund të jetohet? Rritja e pagës për disa nga punëtorët që paguhen më pak është një çështje shumë e debatuar gjatë këtij sezoni zgjedhjesh në SHBA. Korrespondentja e “Zërit të Amerikës”, Katherine Gypson shkoi në qytetin Portland, të shtetit Mein për të parë se si votuesit e shohin këtë çështje që mund të ndikojë në ekonominë e shtetit.
Hillary Morrison ka shumë për të menduar. Koston e qirasë, ushqimet, kredinë studentore… “Nuk mund të kem vetëm një punë. Më duhet të marr dy ose tre punë vetëm për të përballuar jetesën”, thotë ajo. Ajo jeton në një qytet ku kostoja e jetesës është e lartë dhe nuk është si punëtorët e tjerë të restoranteve, sepse fiton pothuajse tre herë më shumë se paga minimale. “Është e mrekullueshme që paguhem më shumë”, shton ajo. T’u japësh njerëzve një rrogë me të cilën mund të jetojnë është një çështje morale, thotë shefi i Hillary-t, Steve Corman.
“Po përpiqem të mbaj punëtorët që kam”, thotë ai. Zoti Corman thotë se shërbimi në restorantin e tij përmirësohet, kur ai i paguan punonjësit më shumë se paga minimale prej 3.75 dollarësh në orë.
“Gjatë një të premteje apo të shtune, ata fitojnë më shumë se 30 dollarë në orë. Në qoftë se e bëjnë këtë dy apo tre ditë në javë, mund të fitojnë një rrogë të arsyeshme”, thotë zoti Corman. Kjo është arsyeja pse ai mbështet një ligj që po shqyrtohet në shtetin Mein këtë sezon zgjedhor dhe që do ta bënte situatën e Hillary Morrison-it realitet për të gjithë punëtorët.
Kudo në Amerikë, punëtorët kanë protestuar për paga më të larta, duke e bërë çështjen e pabarazisë së të ardhurave një nga më të debatuarat këtë vit zgjedhor.
“Nëse besoni se paga minimale duhet të jetë e mjaftueshme për të jetuar dhe se askush që punon me kohë të plotë nuk duhet t’i rrisë fëmijët në varfëri, bashkohuni me ne!”, tha Hillary Clinton. Kundërshtari i saj, Donald Trump, ka bërë thirrje që qeveritë lokale të vendosin vetë për zgjidhjen më të mirë. “Shtetet duhet të vendosin”, tha ai.
Propozimi për pagën minimale dështoi në Dhomën e Përfaqësuesve të Meinit, por sipas sistemit jashtëzakonisht të hapur të këtij shteti, qytetarët mund ta risjellin ligjin në fletën e votimit në nëntor.
Një ndryshim në pagën minimale mund të detyrojë disa pronarë të restoranteve të rrisin çmimet ose të shkurtojnë shpenzimet për të mbuluar rritjen e pagës. “Nuk besoj se vlera e një personi duhet të etiketohet sipas pagesës që merr. Nuk them se dikush vlen dymbëdhjetë dollarë në orë, por paga do të rritet nëse ne si shoqëri pranojmë të paguajmë 30 dollarë për një picë”, thotë Chris Tyll, pronar restoranti.

Presidenti i Rusisë, Vladimir Putin, i hodhi poshtë pretendimet se vendi i tij mund të përballet me akuzat për krime lufte, për shkak të bombardimeve në Alepo të Sirisë.
Ai i tha medias franceze se, akuzat janë “retorikë” që nuk përkon me realitetet në Siri.
Presidenti i Francës, Francois Hollande, ka thënë, ditë më parë, se sulmet ajrore të Rusisë në Alepo mund të llogariten krime lufte.
Pjesa lindore e këtij qyteti, e cila kontrollohet nga rebelët, është cak i bombardimeve të vazhdueshme që nga kolapsimi i armëpushimit, disa javë më parë.
Pavarësisht akuzave të ndërsjella se kush është fajtor për dështimin e armëpushimit, Rusia dhe Shtetet e Bashkuara janë pajtuar të mërkurën që të rinisin bisedimet për Sirinë.
Ministri i Jashtëm rus, Sergei Lavrov, do të takojë homologun amerikan, John Kerry dhe përfaqësues të tjerë të fuqive rajonale, të shtunën në Zvicër.
Putin tha se Rusia do t’i ndjekë terroristët edhe nëse ata fshihen në mesin e civilëve.
“Nuk mund t’i lejojmë terroristët që t’i përdorin njerëzit si mburoja dhe të shantazhojnë gjithë botën”, tha Putin në një intervistë për kanalin “TF1”, duke shtuar se vdekjet e civilëve janë “realiteti i hidhur i luftës”.
Duke iu përgjigjur pretendimeve se, sulmet ajrore të Rusisë mbi zonat e populluara me civilë llogariten si krime lufte, Putin tha se, “kjo është retorikë politike që nuk do të thotë shumë dhe nuk përkon me realitetet në Siri”.
“Jam thellësisht i bindur se janë partnerët tanë perëndimorë, para së gjithash Shtetet e Bashkuara natyrisht, ata që janë përgjegjës për situatën”, tha Putin.
Rusia ka akuzuar SHBA-në se mbështet fshehurazi xhihadistët e lidhur me Al-Kaidën në Siri, në përpjekje për të rrëzuar Presidentin sirian, Bashar al-Assad. SHBA i hedh poshtë këto akuza.
Këtë javë, Putin ka shtyrë një vizitë të planifikuar në Francë, pasi homologu i tij francez ka këmbëngulur që bisedimet të përqendrohen vetëm te çështja e Sirisë.
“Vladimir Putin ka refuzuar të vijë dhe të bisedojë për Sirinë… Ai ka intensifikuar bombardimet në Alepo dhe e imagjinoj se sa e turpshme do të ishte për Putinin të vinte në Paris dhe të fliste për Sirinë”, tha ministri i Jashtëm francez, Jean-Marc Ayrault, për radion “Europe 1”.
Moska vazhdimisht mohon se sulmon civilët në Siri, duke thënë se shënjestër e saj janë grupet terroriste.
Departamenti amerikan i Shtetit ka thënë se në bisedimet e së shtunës, sekretari Kerry do të diskutojë “qasje të ndryshme” për t’i dhënë fund krizës, “përfshirë armëpushimin e qëndrueshëm dhe rifillimin e dërgesave humanitare”.
Fuqitë kryesore rajonale: Arabia Saudite, Turqia dhe Irani pritet po ashtu të marrin pjesë në bisedimet në Lozanë.
Të mërkurën, së paku 40 veta, përfshirë fëmijë, janë raportuar të vrarë nga sulmet ajrore në Alepo.
Alepo, dikur qyteti më i madh i Sirisë dhe qendër komerciale dhe industriale e vendit, është i ndarë qysh në vitin 2012; forcat e Assadit kontrollojnë pjesën perëndimore, ndërsa fraksionet rebele atë lindore.

Rusia tha se një sulm me mortaja ka goditur ambasadën e saj në Damask të Sirisë. Ky është sulmi i dytë i raportuar në këtë kompleks, brenda këtij muaji. Asnjëri prej sulmeve nuk ka shkaktuar pasoja në njerëz. Ministria e Jashtme ruse tha se mortajat janë hedhur nga një qark që kontrollojnë rebelët. Duke e dënuar, siç tha, sulmin terrorist, ministria tha se Rusia mbetet e përkushtuar të luftojë pa kompromis terroristët në Siri. Moska është aleat i rëndësishëm i Presidentit sirian, Bashar al-Assad, regjimi i të cilit, qysh në vitin 2011, po lufton forcat rebele.

Raportimet e mediave maqedonase muajin e fundit kanë shënuar përparime krahasuar me periudhën paraprake kur ishte regjistruar raportim i pabalancuar, gjuhë e urrejtjes apo jo profesionalizëm në të gjitha segmentet e mbulimit të ngjarjeve qoftë politike, ekonomike apo të jetës së përditshme.
Ndryshimi pason fillimin e punës së komisionit ad hoc, organ ky i paraparë me marrëveshjen politike për monitorimin e punës së mediave, në mungesë të një zgjidhjeje gjithpërfshirëse për reforma në media.
Lulzim Haziri, anëtar i komisionit ad hoc, thotë se në të gjitha raportet e deritanishme, me përjashtime të vogla, mediat kanë ndryshuar qasjen e raportimit.
“Besoj se mediat kanë filluar të jenë pak më të vetëdijshme, duke e kuptuar se një mënyrë e tillë e raportimit nuk është profesionale dhe nuk shihet me sy të mirë. Aq më tepër kur kjo çështje tani mbikëqyret dhe priten edhe sanksionet ligjore lidhur me këtë formë të raportimit”.
“Vlerësoj se situata para një shtatorit dhe pas një shtatorit dukshëm ka ndryshuar, aq më tepër kur shqyrtojmë raportet mbikëqyrëse të muajit prill dhe të raporteve të tanishme. Atëherë, një televizion i kishte 24-25 shkelje, ndërsa tani ka 3, 4 apo 5 shkelje të tilla”, thotë Haziri.
Ndryshimet në raportimet e mediave janë regjistruar edhe nga ekspertët e komunikimit.
Mirçe Adamçevski, nga Komisioni për Ankesa pranë Këshillit të Etikës, thotë se rezultatet e monitorimit njëmujor tregojnë se mediat dinë si të raportojnë profesionalisht, por disa prej tyre këtë nuk e kanë bërë për shkak të mungesës së vullnetit dhe dirigjimit nga qendra të caktuara.
“Analizat e bëra nga ana e këtij organi tregojnë se mediat tona mund të raportojnë në mënyrë të balancuar, por që kjo të ndodhë, ato duhej të detyroheshin në një gjë të tillë”.
“Se a janë në pyetje gjobat apo sanksionet e tjera të parapara, nuk mund ta them, por me rëndësi është të konstatojmë se ato mund të punojnë në mënyrë profesionale, madje këtë mund ta bëjnë edhe ato media që gjithmonë kanë qenë në shënjestër të kritikave të ndryshme”, thotë Adamçevski.
Sefer Tahiri, profesor në Fakultetin e Shkencave të Komunikimit pranë Universitetit të Evropës Juglindore, pret që mediat ta vazhdojnë këtë lloj raportimi edhe në të ardhmen. Ai vlerëson se mediat nuk frikësohen nga gjobat që mund t’u shqiptohen, por më tepër kanë frikë nga reagimet e opinionit.
“Vlerësoj se raportimi i mediave ka ndryshuar për dallim nga e kaluara dhe kjo më tepër është rezultat i punës së komisionit ad hoc sesa i agjencisë së medaljeve, që vazhdon të jetë një organ politik. Mendoj se kjo mund të jetë edhe nga frika e sanksioneve, pasi gjobat arrijnë deri në 4 mijë euro. Por, kjo vlerësoj se më shumë është si pasojë e faktit se dënimi moral apo publik nga ana e qytetarëve është më i madh”, thotë Tahiri.
Çështja e mediave ka qenë një ndër pikat kryesore të mospajtimeve mes partive politike. Opozita kërkonte ndryshimin e gjithë strukturës së agjencisë së mediave, organit më të lartë për kontrollin e punës së mediave, ndryshime ligjore në çështjen e raportimit, reklamave qeveritare, gjobave, si dhe transformimin e transmetuesit publik, por ato janë refuzuar nga partitë në pushtet, duke ofruar zgjidhjen e tyre, që në fund bisedimet të përfundojnë me formimin e komisionit ad hoc.
Ndryshe, Maqedonia në të gjitha raportet e organizatave ndërkombëtare është radhitur në grupin e shteteve me liri të kufizuar të shprehjes.

Banorët e Kosovës kërcënohen nga mjedisi i ndotur jetësor, i cili po ndikon në rritjen e numrit të të sëmurëve nga mushkëritë dhe sëmundjet e tjera respiratore e madje edhe shkakton vdekjen e njerëzve. Kështu thonë ekspertë të çështjeve të ruajtjes së ambientit.
Për kah degradimi i mjedisit jetësor, Kosova ishte kritikuar edhe nga mekanizmat ndërkombëtarë.
Në raportet e këtyre mekanizmave, Kosova ishte renditur në nivelin më të ulët të standardeve mjedisore në Ballkanin Perëndimore dhe në Evropë.
Përfaqësues të organizatave joqeveritare që merren me mbrojtjen e mjedisit në Kosovë, flasin për rreziqet e mëdha që vijnë nga ndotja e ambientit.
Agron Bektashi nga Qendra Rajonale e Mjedisit (REC), në një prononcim për Radion Evropa e Lirë, thotë se Kosova është duke u përballuar me ndotje të madhe të ajrit, ujërave dhe tokave.